جمهورية السودان ( الصينية )

سوف نتجاوز أن تعتمد جمهورية السودان في كل إستثماراتها النفطية والعمرانية والخدمية على ( دولة واحدة )
حتى لو كانت هذه الدولة دولة عظمى من حاملات حق النقض ( الفيتو ) ...
حتى لو كان إسم هذه الدولة الصين
سوف نتجاوز هذا ( الإحتكار ) رغم أن هذا التجاوز يصطدم بقوانين المنافسة الحرة التي تتيح أفضل العروض بأفضل الشروط

كذلك سوف أغلق كل مسامات وخلايا التفكير والتحليل في عقلي
وأصدق ما بشرنا به وزير ماليتنا الهمام أن ( شركة صينية ) قد وافقت على تقديم ( قرض ) لحكومة جمهورية السودان قيمته أربعة مليارات دولار بشروط ميسرة
وأن هذا القرض سوف يفعل الأفاعيل في إقتصادنا.. يخفض سعر صرف الدولار ويهوي به لأعماق سحيقة .. ويرخص المواد ... ويوجد فرص عمل لجيوش الخريجين العطالى

كوني لم أسمع من قبل أن ( شركة ما ) في أى جزء من المعمورة قد أقرضت ( حكومة دولة أخرى ) فذاك ضعف في معلوماتي
لذلك لن أفكر ولن أعلق

أن تمتلئ أسواق جمهورية السودان
إبتداء من أسواق العاصمة الكبرى
سوق السجانة وما أدراك ما مواد البناء
المفروشات والأثاث باختلاف شركاتها ( وأغاني دعاياتها الهاجة )
السوبر ماركتات ( مشو لينا يا سادة جمع المؤنث السالم دا ) بأسمائها الإسلامية وغير الإسلامية
المغالق الموجودة في الأحياء السكنية

أن تمتلئ هذه الأسواق بالمنتجات الصينية فلا ضير
أحسن من ألا تجد شيئاً تشتريه

نعرف أن الصين دولة متطورة في مجال الصناعة
وأن منتجاتها تغزو حتى أمريكا بجلالة قدرها ودول الإتحاد الأوربي

ولكن

أن تكون المنتجات الصينية ( الغازية ) لأسواق السودان هى أسوأ المنتجات فذلك هو موضوع البوست

لا أدري ما هو العمر الإفتراضي للمنتجات الصينينة المصدرة للسودان
لكنها صاحبة رقم جينيز القياسي في العطب - بكل تأكيد -
عمالتنا التي نلجأ إليها لإصلاح العطب - أى عطب - أصبح ردهم جاهز

" والله أنحنا الشغلانية ظبطناها ليكم لكن نعمل شنو مع السوق المليان بضاعة صينية دا ؟؟"

الأخ عاطف عمر

تحياتي - التجارة الحرة تستدعى أن تكون لديك مقومات ( مقومات دي مساحتها واسعة وبالحيل يا عاطف ) لتستطيع إدارة العملية التجارية بكل إقتدار لصالح جيهتك التي تمثلها بكفاءة عالية وحديث الرسول عليه أفضل السلام أن تلتين الرزق في التجارة يؤكد أنها بالفعل تستحق ما نراه من دراسات وتجارب ونجاحات وفشل في مناطق كثيرة من العالم من حولنا . والصين كدولة صناعية وزراعية بها تطور كبير في نواحي عديدة كما أنها لازالت تتعلم في نواحي أخرى من الأنشطة الإنسانية ولا تُكابر في ذلك . ولعل العلة الأساسية تكمن في تعاطينا نحن شعب ودولة السودان والحزب الحاكم مع العاقة الصينية السودانية وتقليب الجانب السياسي فيها علي أي إعتبار موضوعي ومنطقي آخر ولذلك حتى المُخطط والمُنفذ تجده بعيد كل البعد عن الغاية الأساسية من التعاون والتبادل التجاري الصرف من تسحين مداخيل الناس وتنويعها وتجويد حياة الناس بتقديم أفضل أو سلعة معقولة الجودة للمستهلك. ومن خلال تفاوضي مع عديد من المصانع الصينية حول سلع ومنتجات عديدة لأسواق الخليج حيث هناك ميزات تفضيلية لدي المُمصنع الصيني تجعلة يُناور كثيراً في الأسعار والجودة لكن مسئولية المشتري وخوفه من النزول لمستوى يُسقطه في حفرة ( الطمع ودر ما جمع ) وقوانين صارمة في الإلتزام بالمقاييس ومعايير الجودة لدى دول إستقبال هذه البضائع والخدمات قد تجعلة يفكر كثيراً في النزول عن المستوى المعقول من الجودة ، بجانب إنفتاح الأسواق من حولة على أكثر من مورد وجهة .

بحيراوي

تحياتي وسلامات عزيزنا البحيراوي

Quote: التجارة الحرة تستدعى أن تكون لديك مقومات ( مقومات دي مساحتها واسعة وبالحيل يا عاطف ) لتستطيع إدارة العملية التجارية بكل إقتدار لصالح جيهتك التي تمثلها بكفاءة عالية وحديث الرسول عليه أفضل السلام أن تلتين الرزق في التجارة يؤكد أنها بالفعل تستحق ما نراه من دراسات وتجارب ونجاحات وفشل في مناطق كثيرة من العالم من حولنا

Quote: ومن خلال تفاوضي مع عديد من المصانع الصينية حول سلع ومنتجات عديدة لأسواق الخليج حيث هناك ميزات تفضيلية لدي المُمصنع الصيني تجعلة يُناور كثيراً في الأسعار والجودة لكن مسئولية المشتري وخوفه من النزول لمستوى يُسقطه في حفرة ( الطمع ودر ما جمع ) وقوانين صارمة في الإلتزام بالمقاييس ومعايير الجودة لدى دول إستقبال هذه البضائع والخدمات قد تجعلة يفكر كثيراً في النزول عن المستوى المعقول من الجودة ، بجانب إنفتاح الأسواق من حولة على أكثر من مورد وجهة

نعم يا بحيراوي
أرادت لنا المشيئة الإلهية أن نشهد تجربة تجارية ( صينية ) في مكان آخر لديه ( مقومات تجارة حرة )
عشنا تجربة سوق المنتجات الصينية في مدينة دبى بدولة الإمارات العربية المتحدة
ورأينا ( نوعية ) المنتجات القادمة لهاهنا
نوعية منافسة للمنتجات الأوربية
هنا القوانين صارمة لا تحابي ولا تظلم
هنا المنافسة قوية ..
إن ضاعت السمعة أفلس التاجر

Quote: ولعل العلة الأساسية تكمن في تعاطينا نحن شعب ودولة السودان والحزب الحاكم مع العاقة الصينية السودانية وتقليب الجانب السياسي فيها علي أي إعتبار موضوعي ومنطقي آخر ولذلك حتى المُخطط والمُنفذ تجده بعيد كل البعد عن الغاية الأساسية من التعاون والتبادل التجاري الصرف من تسحين مداخيل الناس وتنويعها وتجويد حياة الناس بتقديم أفضل أو سلعة معقولة الجودة للمستهلك.

الخمول الذهني
عدم الإبتكار
الركون لما هو مألف ومجرب يا بحيراوي

قلت محدثاً مكلمتي الفتاة الصينية التي تعمل كـ ( خبيرة ) سوق ومترجمة في أسواق مدينة قوانزو الصينية
وهى فتاة تخصصت في التعامل مع ( السودانيين ) وقد رشحها لى أحد الأصدقاء وذلك في فترة سابقة لشراء بعض الأثاث
قلت لها

" الأهم عندي هو الإلتزام بالوقت والإلتزام بـ الـ High Quality "
أجابتني
" الإلتزام بالوقت هو سمتنا وبالنسبة للجودة فعندنا من أعلى مواصفات تصدر لأمريكا وأوربا لحدي الـ Sudanese Standard "
أدهشتني نقطة الـ Sudanese Standard "
وسألتها عنها
فأجابتني

" أصلو ناسكم بيجو يسألوا عن بضاعة معينة ، نعرض لهم Many Grades من البضاعة المطلوبة ،
فتكون إجابتهم الفورية

" لا لا نريد الأرخص .. The Cheapest

لذلك أسمينا هذه النوعية من البضاعة الـ Sudanese Standard

دي حالة دي يا عاطف؟
بقي عندنا سودانيز ستاندارد ضمن الاستاندارز بتاعة الكواليتي؟

:)

تحياتي يا هندسة ...

ما عارف يا عاطف هل عنوانك كان مفروض يكون جمهورية السودان (الصينية) ولاّ جمهورية الصين (السودانية)!!
السودان هو الذي اوجد للصين سوقاً لتسويق منتجاتها الأقل جودة ولولاه لما استمرت الصين في انتاج جودة لا تستطيع تسويقها (حسب قانون العرض والطلب)!

ــــــــــ
حقو نبارك للسودان هذا التمييز يا صحبي

شكرا يا باشمهندس لفتح هـذاالموضوع الهم

والحمد لله الناس عرفت السبب من التجار السودانيين الجشعين، لأنه زمان كان ما يكتب هنا يصب فى نقـد الصينيين.

ويا أخ أمير الصناعة الصينية الرخيصـة لن تنتهى بإمتناع السوداينن عن شرائها.. وحتى الجيدة لن تنتهى بمقاطعـة الغرب لها.. فإن السوق الصينية المحلية اليوم صارت أكبر مستهلك.
وفيهم الفقراء الذين كانوا وما زالوا يشترون الرخيص وما عندهم مشكلة، أولا لأنهم ما عندهم قروش للغالى، ثم لو اتكسر السرير يصلحوه فى خمس دقائق، ولو باظ التلفزيون يصلحوه
فى 10 حقائق.. ما عندهم حاجـة تترمى أبدا.. والما تنفع كلو كلو يعتبروها مواد خام ويعيدوا تدويرهـا.. شفت كيف؟!!

طيب انت اشتريت موزع كهرباء رخيص، ثم بعد فترة باظ وبقى ما يطلع كهرباء لأجهزتك، السودانيين يرموه ويلعنوا الصينيين بدل يلعنوا التجار الإختاروه من ضمن موزعات أجود،
أما الصينيين يجيبوا مفك ويفتحوه ويدقدقوا فيه لحد ما يشتغل تانى ...

النهاية: اما تشترى الجيد، أو تبذل مجهود لصيانة الرخيص زى ما يعملوا فقراء الصينيين .. ناسنا ما دايرين يعملوا الإتنين..

Quote: ويا أخ أمير الصناعة الصينية الرخيصـة لن تنتهى بإمتناع السوداينن عن شرائها.. وحتى الجيدة لن تنتهى بمقاطعـة الغرب لها.. فإن السوق الصينية المحلية اليوم صارت أكبر مستهلك. وفيهم الفقراء الذين كانوا وما زالوا يشترون الرخيص وما عندهم مشكلة، أولا لأنهم ما عندهم قروش للغالى، ثم لو اتكسر السرير يصلحوه فى خمس دقائق، ولو باظ التلفزيون يصلحوه فى 10 حقائق.. ما عندهم حاجـة تترمى أبدا.. والما تنفع كلو كلو يعتبروها مواد خام ويعيدوا تدويرهـا.. شفت كيف؟!! طيب انت اشتريت موزع كهرباء رخيص، ثم بعد فترة باظ وبقى ما يطلع كهرباء لأجهزتك، السودانيين يرموه ويلعنوا الصينيين بدل يلعنوا التجار الإختاروه من ضمن موزعات أجود، أما الصينيين يجيبوا مفك ويفتحوه ويدقدقوا فيه لحد ما يشتغل تانى ... النهاية: اما تشترى الجيد، أو تبذل مجهود لصيانة الرخيص زى ما يعملوا فقراء الصينيين .. ناسنا ما دايرين يعملوا الإتنين..

عزيزي ابو الريش تحية عطرة وشكراً لك على الشرح الوافي الذي يلاقي عندي كل القبول والإتفاق!
لم أرم بمداخلتي إلى المعنى المباشر، وإنما المقصود السخرية المُبطنّة مما آل إليه حالنا يا صديقي، ولذلك إختتمت مداخلتي بالمباركة على هذا التميُّز السوداني الفريد.

مودتي

تحياتي وسلامات عزيزنا أبو الريش

كنت في بالي بشدة وأنا أعد مادة هذا البوست
فأنت رجل خبير بالصناعة والأسواق الصينية
وأنت رجل خبير بالأسواق الخليجية
وفي ذات الوقت تحتك - قطعاً - بالتجار السودانيين القادمين للشراء من الصين
تجربتك أو شهادتك سوف تكون إضاءة حقيقية

أرجو تعزيز أو تصويب ما ذكرناه في متن هذا البوست من واقع معايشتك للواقع

تحياتي وسلامات حبيبنا د. أمير

Quote: ما عارف يا عاطف هل عنوانك كان مفروض يكون جمهورية السودان (الصينية) ولاّ جمهورية الصين (السودانية)!! السودان هو الذي اوجد للصين سوقاً لتسويق منتجاتها الأقل جودة ولولاه لما استمرت الصين في انتاج جودة لا تستطيع تسويقها (حسب قانون العرض والطلب)!

إخترت العنوان الوارد في البوست ( أملاً ) في أن يكون الوضع الحالي عابراً ويفيق السودان من غيبوبته
لو إخترنا العنوان الثاني كنا سوف ( نشيل الفاتحة ) على الذي كان إسمه السودان ... أو كما قال الأستاذ يسن عمر الإمام

تحياتي وسلامات دكتورة رحاب

Quote: دي حالة دي يا عاطف؟ بقي عندنا سودانيز ستاندارد ضمن الاستاندارز بتاعة الكواليتي؟

ومشهور على نطاق دولي
شوفتي العز دا كيف ؟؟

لا لا لا
الشغلانية أتاريها أبعد من مجرد تجارة وإستثمار
عمنا حسن الترابي عاوز يجيب ( صينيين ) ويزوجهم سودانيات عشان يطلعوا خلطة تانية

Quote: ما رأيك في دعوة عصام العريان بعودة اليهود لمصر ولأوطانهم؟ اليهود هذا وطنهم الحقيقي واتأذوا أذى شديد في البلاد الأخرى، زمان جمال عبد الناصر طردهم بره، أفكاري ورأيي أن الأرض خلقت للناس جميعا،والمفروض تخف كل أحكام تأشيرات الدخول وتخف موضوع الجنسية بدرجة، وأي ناس لم يجدوا في بلدهم الفرصة يذهبوا لبلدان أخرى وينتجوا، فأنا أوافق على ذلك. حتى لو كانوا اليهود ياشيخ حسن؟ أنا لا يهمني يهودي هندي روسي أي جنسيات، زمان كنت أريدأن نأتي بصينين ونزوجهم عندنا حتى نطلع خلطة، الصينيون فيه فوائد لانهم بيعملوا جيدا، يعملوا في مجموعات، يشتغلوا كتلة واحدة ولا تستطيع أن تميزهم ورواتبهم متقاربة وليسوا مستعمرين، أما نحن في السودان لا نجتمع إلا في الافراح والمآتم، ولا نجتمع في أي شئ آخر، حتى الأحزاب مشققين، ولذلك نحن في حاجة لمن يعلمنا، ولكني وجدت الصينين بيشتغلوا في كل شئ فلم يعجبني هذا الأمر، فأنا لا أريد أن يحتكرني أحد نريد مصريين وجنسيات مختلفة.

________________

المقتبس منقول من بوست للصديق زهير الزناتي

الكلام ده ما فى السودان وبس

ادقش مثلا اسواق السعودية وشوف العجب

لا لا لا
الشغلانية أتاريها أبعد من مجرد تجارة وإستثمار
عمنا حسن الترابي عاوز يجيب ( صينيين ) ويزوجهم سودانيات عشان يطلعوا خلطة تانية

__________________________________________________________________________________________

الأخ عاطف عمر

تحياتي - ولعل الإشارة لوجود صينيين - سودانيين في الوقت الراهن بالسودان أمر وارد يا عاطف حيث يُعد ذلك الأمر من المسكوت عنه .
حيث كنت ذات مساء في رحلة من البحرين لهونج كونج وبالبحرين كانت هناك رحلة كونيكشن من الخرطوم لأخذ طائرة كاثي باسفك , وركب بالقرب مني صيني وعند قيام الطائرة بدأنا نتجاذب أطراف الحديث والتعرف على بعضناالبعض وسالني من ملامحي سوداني ؟ بلكنه إنجليزية صينية - قلت ليه نعم وواصل الحديث عن السودان وأنه يعمل في قطاع البترول بالسودان وطوالي دخل لي في علاقاته بالسودان فقال لدي جيل فرند سودانية وسالته عن إسمها فقال لي ( اشا) وكتمت منه طوالي قلت ليه الله يقطع البترول الجابكم دا !!

بحيراوي

سلام ياعاطف

أنا فى رأيى تشتغل بالحكمة النبوية فى موضوع الصينية
وهو أن تأكل مما يليك وربنا ببارك ليك.

Quote: أنا فى رأيى تشتغل بالحكمة النبوية فى موضوع الصينية وهو أن تأكل مما يليك وربنا ببارك ليك.

والله يا دكترة الحكمة النبوية طيبة وطاهرة ومطهرة
وربنا يقدرنا عليها







_______________

لكن إنت ( البتاع ) دا بتلقاهو وين ؟؟

Quote: Sudanese Standard

** الباشمهندس ود عمر..
** سلام ومساءك خير.
## إيه العز دا عندنا :- Sudanese Standard و Sudaneseonline وبالصينى يامرسى أهو بقينا مشهورين وعندنا معيار عالمى فى الإستاندر(Standard) الرخيص.. الله يجازى الكانو السبب ..
(ودام الود بيننا)

تحياتي وسلامات مولانا

Quote: إيه العز دا عندنا :- Sudanese Standard و Sudaneseonline وبالصينى يامرسى أهو بقينا مشهورين وعندنا معيار عالمى فى الإستاندر(Standard) الرخيص.. الله يجازى الكانو السبب ..

لو تذكر يا مولانا في النصف الأول من التسعينات ، الحكومة فتحت إستيراد العربات الصغيرة دون التقيد بسنة الصنع
العربة التي كانت مطلوبة بشدة في السودان في تلك الأيام هى التويوتا كورونا موديل 83 ( أو 81 ) لا أذكر
عينك ما تشوف إلا النور
تجار العربات زرافات ووحداناً حضروا وضربوا حراجات السيارات بأبوظبي ودبى والشارقة بحثاً عن هذه العربة ( اللقطة )
إعتلت الحيرة أصحاب معارض السيارات
فما يطلبه السودانيون هو خارج التاريخ ، حيث أن هذه العربة قد أصبحت في ذلك الوقت أشبه بـ ( مخلفات العصر الحجري ) في هذه الحراجات
لا يوجد معروض منها

وإنتعش سوق أصحاب كراجات الإسكراب

أخرجوا السيارات التويوتا كورونا التي كانت مرشحة لكونها سكراب وباعوها لـ ( جحافل السودانيين ) وهم بين مصدق ومكذب

نفس السيناريو أتخيله مع تجار الصين .. وجحافل السودانيين تهاجمهم بحثاً عن ( أرخص ) منتوجاتهم

Quote: لو تذكر يا مولانا في النصف الأول من التسعينات ، الحكومة فتحت إستيراد العربات الصغيرة دون التقيد بسنة الصنع العربة التي كانت مطلوبة بشدة في السودان في تلك الأيام هى التويوتا كورونا موديل 83 ( أو 81 ) لا أذكر

** الباشمهندس ود عمر..
** سلام ومساءك خير..
## هى الكرونا موديل 1982 ومن مُسمياتها:- (أحفظ مالك) و (كرونة الجيش) , وحياتك فى السكراب كانت بـ 300 درهم مالاقيين زوول يشتريها كحديد خليها سياره ,, اها جو جماعتنا الطُرش وصلو سعرها الى أكثر من 6000 درهم ..

** وأزيدك من الشعر بيت لايزال البعض يبحث عن بوكس تويوتا موديل :- 1978 أو 1981 - وإذا عُرف السبب بطل العجب :- بيقولوا ضهرو حار وتفسير ذلك لو شايل فيهو حاجات تستحق التهرب من الجبايات فى الطريق يمكنك ان تتخارج من دون أن تقع من ضهرو الحار إى حاجه والعُهده على الراوى ..

** والله نحنا عندنا ناس تُحف وفعلاً نحنا شعب :- عـاش الحضاره بأثر رجعى..
(ودام الود بيننا)

الاخ عاطف
سلام الله عليك
قبل فترة قرأت موضوع كبير في صحيفة مدينتنا كان بعنوان
How Canada gets dog and cat fur from China
و قبل ان اطمم قلوب قراءك هنا احذركم بعدم مواصلة قراءة ما سأكتبه بعد هذا السطر. ارجوان تفطوهو الي الموضوع الذي بعده.
عموما كانت القراءة عادية و انا اتحسر تارة علي هذه الكلاب المسكينة التي وقعت في شرك الاصطياد لاجل جلودها ذات الشعر و تارة اتخيل انني اشتريت جاكت فاخر لزوجتي Fur Jacket
و تطلع جلد ###### صنع في الصين او اي مكان اخر.
حتي اتيت الي المقطع الذي:
و اين تذهب لحوم هذه الكلاب بعد سلخ جلدها و كانت الاجابة جعلتني اتحسس معدتي ان كان في يوم ابتلعت شوربة Noodle
حيث علم من خلال التحقيق ان اللحوم تستخدم في مكونات الــشوربة Soup و الذي منها الــ Noodle

اليكم رابط المقال بالكامل لمن يريد القراءة
http://www.thestar.com/news/world/article/121...d-cat-fur-from-china

Quote: كوني لم أسمع من قبل أن ( شركة ما ) في أى جزء من المعمورة قد أقرضت ( حكومة دولة أخرى ) فذاك ضعف في معلوماتي لذلك لن أفكر ولن أعلق

دى غلبنى افكر فيها




عاطف عمر سلامات يا حبيب

تحياتي وسلامات عزيزنا البحيراوي

التفلتات الأخلاقية بوجود ( الصينيين ) أو بدونهم وارد حدوثها

يقلقني حقاً إستسهال الحلول وإدمان الكسل الذهني
إذا كان الشعب السوداني بالصفات التي ذكرها الدكتور الترابي ،
فماذا فعل الدكتور الترابي الداعية الديني الزعيم السياسي الذي تحت ظل حكمة تمت إعادة صياغة الحياة السودانية وتم التحكم حتى في ( نوم وصحيان الشعب السوداني ) للإرتقاء بالشعب ؟؟؟
الزعماء ( الملهمين ) يفجرون الطاقات الكامنة في شعوبهم

ليفعل ذلك الدكتور الترابي بدلاً من الكسل الذهني ودعاوي التهجين الفارغة





_____________

هذا لا يلغي حق أى فتاة سودانية لو أرادت الإرتباط بـ ( صيني ) أو ( طلس )

تحياتي وسلامات عزيزنا وضاح

Quote: الكلام ده ما فى السودان وبس ادقش مثلا اسواق السعودية وشوف العجب

الفرق أنك في السعودية سوف تجد خيارات أخرى
سوف تجد البضاعة الأصلية من منتجها الأصلي وفي نفس الوقت تجد الدبليكيت الصيني بدرجاته المختلفة
ويكون الخيار لك
أما في السودان فليس غير البضاعة الصينية إلا البضاعة الصينية
الخيارات في الدرجات بين السئ والأسوأ

تحياتي أخ عاطف عمر

Quote: التفلتات الأخلاقية بوجود ( الصينيين ) أو بدونهم وارد حدوثها يقلقني حقاً إستسهال الحلول وإدمان الكسل الذهني إذا كان الشعب السوداني بالصفات التي ذكرها الدكتور الترابي ، فماذا فعل الدكتور الترابي الداعية الديني الزعيم السياسي الذي تحت ظل حكمة تمت إعادة صياغة الحياة السودانية وتم التحكم حتى في ( نوم وصحيان الشعب السوداني ) للإرتقاء بالشعب ؟؟؟ الزعماء ( الملهمين ) يفجرون الطاقات الكامنة في شعوبهم ليفعل ذلك الدكتور الترابي بدلاً من الكسل الذهني ودعاوي التهجين الفارغة _____________ هذا لا يلغي حق أى فتاة سودانية لو أرادت الإرتباط بـ ( صيني ) أو ( طلس )

أولاً نقر بوجود تفلتات والتي قد لا يسلم منها مجمتمعِ ما . لكن ضبط العلاقات بين الدول أمر واجب واساسي في التعامل ما بين الدول وهذا لا يتأتى إلا بشفافية عالية في المبدأ الذي تقوم عليه العلاقة التجارية ولعل مدخلي لذلك هو ما شاب خصخصة بنك النيل الأزرق والإتصالات والإطارات مع الكوريين وغيرهم يا عاطف! ثم دخول الصينيين في الخط بعدم شفافية مقنعة في قطاع النفط الذي كان. وعذراً لو جريت البوست قليلاً خارج إطاره يا عاطف.
ولعل تصريحات دكتور الترابي تأتي في إطارها وسياقها السياسي ليس إلا وهنا تكون الفرصة مواتية تماماً للعودة للمربع نمرة واحد حيث تنعدم خطة بالمعني الحرفي في لتفجير وإستقلال طاقات وموارد السودان. وفي هذه قد يكبر الكوم بإضافة آخرين في حلقة الترابي هذه من خارج منظومته السياسية وقد تكون من حيث الزمان فيلحق به كثيرون من نخب سودانية جربت ولم تزل !بحيراوي

Quote: قلت محدثاً مكلمتي الفتاة الصينية التي تعمل كـ ( خبيرة ) سوق ومترجمة في أسواق مدينة قوانزو الصينية وهى فتاة تخصصت في التعامل مع ( السودانيين ) وقد رشحها لى أحد الأصدقاء وذلك في فترة سابقة لشراء بعض الأثاث قلت لها " الأهم عندي هو الإلتزام بالوقت والإلتزام بـ الـ High Quality " أجابتني " الإلتزام بالوقت هو سمتنا وبالنسبة للجودة فعندنا من أعلى مواصفات تصدر لأمريكا وأوربا لحدي الـ Sudanese Standard " أدهشتني نقطة الـ Sudanese Standard " وسألتها عنها فأجابتني " أصلو ناسكم بيجو يسألوا عن بضاعة معينة ، نعرض لهم Many Grades من البضاعة المطلوبة ، فتكون إجابتهم الفورية " لا لا نريد الأرخص .. The Cheapest لذلك أسمينا هذه النوعية من البضاعة الـ Sudanese Standard

اتاري السودان حقيقة وصل الدرك الأسفل من الفشل ياعاطف اخوى

أنا كنت فاكرة الجماعة مصنفنه تالت أفشل دولة فى العالم ، حسادة ساى !!!

تحياتى

تحياتي وسلامات دكتورتنا العزيزة مهيرة

Quote: اتاري السودان حقيقة وصل الدرك الأسفل من الفشل ياعاطف اخوى أنا كنت فاكرة الجماعة مصنفنه تالت أفشل دولة فى العالم ، حسادة ساى !!!

ومع كونها البضاعة الأرخص فإنها تباع في أسواق السودان بأسعار أعلى من سعر البضاعة ( الأصلية ) مضاف إليها تكاليف الشحن والجمارك والتخليص ( عن تجربة )

شوفتي كيف ؟؟

Quote: كوني لم أسمع من قبل أن ( شركة ما ) في أى جزء من المعمورة قد أقرضت ( حكومة دولة أخرى ) فذاك ضعف في معلوماتي لذلك لن أفكر ولن أعلق

تقرض الحكومة الليلة أموال..
وتجي بكرة تقرض هي كل ممتلكات البلد!

أما بالنسبة للبضاعة الرخيصة والتي لا يقبلها الغرب أبدا لعدم ضمان جودتها..
فليس هناك أفضل من السودان لتصريفها..
حيث الإنسان نفسه لا يساوي شيئا في نظر من يحكمه وهو الذي يخرج لنا مجموعة تجار إنتهازية..
فماذا يعني إذا شراؤه لبضاعة مضروبة وهو اساسا حياته كلها مضروبة؟؟

.........
.........

سلام يا هندسة


تعرف أنا 4 سنوات اشتغلت استيراد من الصين

حسب قروشك تعرف فرق 20 هللة ممكن يرفعك وينزلك خصوصا في الادوات الكهربائية

يعني مسئول /ة التسويق كانو بنصحوني أزيد 10 هللات فقط وسوف يتغير الاستاندارد

حتى زي ما قال ليك وضاح هسة هنا في السعودية إلا تبقى داخل في علبها حتى تقدر تميز

مرة عاوز اشتري خلاط أصريت إنو يكون أصلي بتاع المعرض قال لي أصلي وفعلا قريت كلمة British Standards في الكرتونة

لما مشيت البيت لقيت Made in china دي مكتوبة صغييييرة في زاوية الكرتونة

بس طبعا في السودان اكيد الوضع غيير

تحياتي وسلامات عزيزنا حمد

Quote: تعرف أنا 4 سنوات اشتغلت استيراد من الصين حسب قروشك تعرف فرق 20 هللة ممكن يرفعك وينزلك خصوصا في الادوات الكهربائية يعني مسئول /ة التسويق كانو بنصحوني أزيد 10 هللات فقط وسوف يتغير الاستاندارد حتى زي ما قال ليك وضاح هسة هنا في السعودية إلا تبقى داخل في علبها حتى تقدر تميز مرة عاوز اشتري خلاط أصريت إنو يكون أصلي بتاع المعرض قال لي أصلي وفعلا قريت كلمة British Standards في الكرتونة لما مشيت البيت لقيت Made in china دي مكتوبة صغييييرة في زاوية الكرتونة بس طبعا في السودان اكيد الوضع غيير

ياسلاااااام يا حمد
أهو نحن عاوزين الناس العندهم خبرة في مسألة الإستيراد من الصين زيك كدا ينوروا الناس
إنت مسؤول/ة التسويق كانوا بينصحوك أن تزيد شوية هللات عشان ترفع المعيار
نحن تجارنا بيضغطوا على مسؤولي التسويق عشان يخفضوا السعر وما مهم أن ينخفض المعيار

ويغرق سوقنا بأرخص البضائع ذات أقل معيار وتباع رغماً عن ذلك بما يفوق أسعار البضاعة الأوربية الأصلية



_________

دا مش ياهو القبض بالجوكرين زاااااتو ؟؟

الملكة يا ستهم
كل الشوق والمحبة

Quote: تقرض الحكومة الليلة أموال.. وتجي بكرة تقرض هي كل ممتلكات البلد! أما بالنسبة للبضاعة الرخيصة والتي لا يقبلها الغرب أبدا لعدم ضمان جودتها.. فليس هناك أفضل من السودان لتصريفها.. حيث الإنسان نفسه لا يساوي شيئا في نظر من يحكمه وهو الذي يخرج لنا مجموعة تجار إنتهازية.. فماذا يعني إذا شراؤه لبضاعة مضروبة وهو اساسا حياته كلها مضروبة؟؟

مرات كثيرة يكون حواري مع بعض التجار حوار طرشان

- ياحاج أنا عاوز البضاعة الفلانية صناعة إنجليزية
- أيوا موجودة ... يا ولد جيب الـ .. في الرف الفوق دا
- لكين دا يا حاج ما صناعة إنجليزية .. دي مصنوعة في الصين
- يا أخوي وحاتك إنت دا سوقنا دا كووولو صيني ، ولو في زول قاليك عندو بضاعة من بريطانيا ولا فرنسا ولا اليابان بيكون كضب عليك ، أيوا حاجتك دي مصنوعة في الصين .. لكن مازى الحاجات الصينية التانية المالية السوق .. دي أنا برسل ولدي يمشي يجيبا من الصين ويجي
- يا حاج ربنا يخلي ليك ولدك .. لكن كل التجار بيقولوا نفس كلامك دا ، وكلهم بيرسلو أولادهم وأخوانهم
- هى لكين نحن بتقارنا بالجماعة ديل العرفوا الصين أول أمس القريبة دي ؟؟

وفي نهاية الأمر هى بضاعة صينية ذات معيار سوداني

عزيزنا عاطف تحايا ومحبة

الصين دولة منتجة والسودان دولة مستهلكة وبالتالي من الطبيعي انها تكون (مكب) لمجموع النفايات المصنعة هناك اذا وجدت (الشيال)ز والشيال هنا هو التاجر العايز يربح باي صورة

يا عاطف في السودان في اتنين بس بيفكروا والباقيين (كوبي بيست)

الاتنين يفكروا في الدفار اربعتاشر الف يحاكوا الفكرة
تفتح دكان ريحة ثلاتة مليون دكان زيو
ركشة تلاتة وتمانين الف يجيبو زيها
تلبس جلابية صفراء وعمة حمراء تلاتة مليون يحاكوك

مافي ابداع يا عاطف

تحياتي وسلامات عزيزنا السنوسي

Quote: الصين دولة منتجة والسودان دولة مستهلكة وبالتالي من الطبيعي انها تكون (مكب) لمجموع النفايات المصنعة هناك اذا وجدت (الشيال)ز والشيال هنا هو التاجر العايز يربح باي صورة يا عاطف في السودان في اتنين بس بيفكروا والباقيين (كوبي بيست) الاتنين يفكروا في الدفار اربعتاشر الف يحاكوا الفكرة تفتح دكان ريحة ثلاتة مليون دكان زيو ركشة تلاتة وتمانين الف يجيبو زيها تلبس جلابية صفراء وعمة حمراء تلاتة مليون يحاكوك مافي ابداع يا عاطف

ثم يا سلام عليك يا أمير
حقاً ما في إبداع
ضمور مزمن
غياب الخيال المبدع الخلاق
واحد من أصحابنا كان بيقول
" أنا لو عاوز ( أعفّن ) الخرطوم دي أفتح لى دكان ( فسيخ ) "

عشان كدا يا حبيب تاجر واحد مشى الصين .. الباقين كلهم وراهو

المؤسف أنهم أصبحوا يتنافسون في أيهم يأتي بـ ( أرخص ) بضاعة ويبيعها بـ ( أعلى ) سعر

جزيل الشكر بحيراوي

Quote: لكن ضبط العلاقات بين الدول أمر واجب واساسي في التعامل ما بين الدول وهذا لا يتأتى إلا بشفافية عالية في المبدأ الذي تقوم عليه العلاقة التجارية ولعل مدخلي لذلك هو ما شاب خصخصة بنك النيل الأزرق والإتصالات والإطارات مع الكوريين وغيرهم يا عاطف! ثم دخول الصينيين في الخط بعدم شفافية مقنعة في قطاع النفط الذي كان. وعذراً لو جريت البوست قليلاً خارج إطاره يا عاطف. ولعل تصريحات دكتور الترابي تأتي في إطارها وسياقها السياسي ليس إلا وهنا تكون الفرصة مواتية تماماً للعودة للمربع نمرة واحد حيث تنعدم خطة بالمعني الحرفي في لتفجير وإستقلال طاقات وموارد السودان. وفي هذه قد يكبر الكوم بإضافة آخرين في حلقة الترابي هذه من خارج منظومته السياسية وقد تكون من حيث الزمان فيلحق به كثيرون من نخب سودانية جربت ولم تزل

معك نتفق أن يكون الجهد السياسي في خدمة الجهد التجاري والثقافي والصحي ... أو في خدمة الجهد الخدمي بصورة أعم
قديماً أسماها الدكتور منصور خالد بـ ( دبلوماسية التنمية ) بمعنى أن تكون الدبلوماسية في خدمة التنمية..
هذا الموضوع هو بوست أو بحث لحاله

Quote: هى الكرونا موديل 1982 ومن مُسمياتها:- (أحفظ مالك) و (كرونة الجيش) , وحياتك فى السكراب كانت بـ 300 درهم مالاقيين زوول يشتريها كحديد خليها سياره ,, اها جو جماعتنا الطُرش وصلو سعرها الى أكثر من 6000 درهم .. ** وأزيدك من الشعر بيت لايزال البعض يبحث عن بوكس تويوتا موديل :- 1978 أو 1981 - وإذا عُرف السبب بطل العجب :- بيقولوا ضهرو حار وتفسير ذلك لو شايل فيهو حاجات تستحق التهرب من الجبايات فى الطريق يمكنك ان تتخارج من دون أن تقع من ضهرو الحار إى حاجه والعُهده على الراوى .. ** والله نحنا عندنا ناس تُحف وفعلاً نحنا شعب :- عـاش الحضاره بأثر رجعى..

لا كان كدا نحن بالجد محتاجين نجمع الحاجات ( الفريدة ) دي كووولها ونعمل Sudanese Standards
وصدقني يا مولانا سوف تكتسح كل الإستاندرات الماضية والحالية

يومها سوف نغني

ياخوانا الإستاندرد موجود في كل مكان
لكن الإستاندرد الأصلي في السودان

تحياتي وسلامات عزيزنا محجوب

Quote: قبل فترة قرأت موضوع كبير في صحيفة مدينتنا كان بعنوان How Canada gets dog and cat fur from China و قبل ان اطمم قلوب قراءك هنا احذركم بعدم مواصلة قراءة ما سأكتبه بعد هذا السطر. ارجوان تفطوهو الي الموضوع الذي بعده. عموما كانت القراءة عادية و انا اتحسر تارة علي هذه الكلاب المسكينة التي وقعت في شرك الاصطياد لاجل جلودها ذات الشعر و تارة اتخيل انني اشتريت جاكت فاخر لزوجتي Fur Jacket و تطلع جلد ###### صنع في الصين او اي مكان اخر. حتي اتيت الي المقطع الذي: و اين تذهب لحوم هذه الكلاب بعد سلخ جلدها و كانت الاجابة جعلتني اتحسس معدتي ان كان في يوم ابتلعت شوربة Noodle حيث علم من خلال التحقيق ان اللحوم تستخدم في مكونات الــشوربة Soup و الذي منها الــ Noodle

حقاً لم أجد تعليقاً لهذه المداخلة الصادمة غير التوسل بأن

اتقوا الله في خلق الله يا مسؤولي المواصفات
اتقوا الله في خلق الله يا تجارنا
اتقوا الله في أنفسكم وأطفاكم يا سادتي ودققوا قبل أن تشتروا

سلامات اخونا عاطف. كل سنة وانت طيب.
بعد غياب 3 سنوات بس من الخرطوم اندهشتا بان اى شيء موجود فى اسواق الخرطوم...بس ذى ما انت قلتا ...نوعيات ########ة جدا.
مضحك جدا ان الصينيين نفسهم بقوا عندهم تصنيف لمنتجاتهم التعبانة.

تحياتي وسلامات عزيزتنا سمارت
وأنت وأسرتك وأحبابك بألف بخير

Quote: بعد غياب 3 سنوات بس من الخرطوم اندهشتا بان اى شيء موجود فى اسواق الخرطوم...بس ذى ما انت قلتا ...نوعيات ########ة جدا. مضحك جدا ان الصينيين نفسهم بقوا عندهم تصنيف لمنتجاتهم التعبانة.

عارفة يا سمارت لو أتيح لك أن تتعمقي شوية في مواد البناء كنت ح تشوفي ًWonders
تشتري الحاجة بالمبلغ الفلاني وإنت بتعملي Testing and Commissioning تقوم الحاجة ( تعصلج ) وتبوظ ليك ... ( طبعاً خدمات ما بعد البيع والضمان دي بتعتبر قندفة وفلهمة )
الصنايعي ( يلكلكها ) شوية كدا ويرميها ليك قائلاً

" أصلو البضاعة الصينية دي شختك بختك "

الصينيين بيكونوا متعودين أنو يجوهم التجار من نفس الجنسية لكنهم يختلفون في خياراتهم للمنتجات
لكن الحيرهم في موضوع السودانيين أنهم جميعهم متفقين على أن يشتروا من نوعية معينة... الأرخص

إهداء
للأحباب شركائي في البوست والمتابعين

كتب الأستاذ الفاتح جبرة

Quote: خبر وتعليق - صحيفة المجهر السياسي - عدد اليوم الأحد الموافق 6 يناير 2013م المعامل تكشف عن معلومات جديدة عن شحنة المواد المشعة أوردت إدارة المعمل الجمركي ببورتسودان معلومات جديدة حول الحاوية التي تحمل شحنة سماد مشع دخلت البلاد الشهر الماضي قادمة من الصين واليابان لمشروع حلفا الزراعي وذكرت إدارة المعمل أن نسبة الإشعاع الموجودة تمثل 30% وأن نسبة المعدل الطبيعي للإشعاع هي 10% وقالت أن هذه المواد المشعة يتضرر منها كل الشعب ووصفتها بالجريمة المنظمة ضد الشعب السوداني . التعليق : طبعن المسئول المشى إشترى السماد بيكون قالوا ليهو : عندنا سماد أبو إشعاع رخيص وسماد أبو من دون إشعاع قام إختار أبو إشعاع وإن شاء الله الشعب ينقرض وما يفضل فيهو نفاخ النار !!

Quote: الصينيين بيكونوا متعودين أنو يجهوهم التجار من نفس الجنسية يختلفون في خياراتهم للمنتجات لكنهم الحيرهم في موضوع السودانيين أنهم جميعهم متفقين على أن يشتروا من نوعية معينة... الأرخــــــص

** الــرخــيــص بِـرخـصـتـو يـضـوقـك مـقـصـتـو ,, والـغـالـى بـى غـــلاتـــو يـضـوقـك حــلاتـــو **
^
^
^
## مثل سودانى صميم يحتاج الى من يُرسله للُمُصنعيين الصينيين حتى يُضاف الى السودانيزإستاندر ##
(التعديل لوجود حرف زائد )

من أكثر الأشياء إيلاماً أن تكون على دراية بالمشكلة وآثارها وتداعياتها ولا تستطيع أن تفعل حيالها شئ ، ولا تستطيع أن تتجنب حدوثها

هذا هو واقع أهلنا في السودان مع المنتجات الصينية

فلا بدائل أصلية تصل إليهم ولا دبلكيت بقريد أعلى يصل إليهم

تحياتي يا مولانا

تحياتي وسلامات عزيزنا عمار

Quote: كوني لم أسمع من قبل أن ( شركة ما ) في أى جزء من المعمورة قد أقرضت ( حكومة دولة أخرى ) فذاك ضعف في معلوماتي لذلك لن أفكر ولن أعلق دى غلبنى افكر فيها

إنها حيرة تجعل الحليم حيران
بدع تجعلك تتهم عقلك وكل مخزون معرفتك
تجعلنا نحس أننا نعيش في عالم لحالنا .. لا تجارب آخرين يمكن أن نهتدي بها

والمطلوب منا أن نلغي عقولنا ونصدق قولهم عير الخاضع لأى منطق أو غير مشابه لأى تجربة نظيرة