بكري أبو بكر .. صغر الغرف ... وضيق الحوش .. ثم أتى بسكان إضافيين

أولاً بالتبادي
إلى صديقنا العزيز الباشمهندس بكر قدس الله سره

قولنا هذا ليس بتدخل في عمل الإدارة لذلك خلى لينا البوست دا يومين تلاتة

يعني
لا تكشوا وتقشو وتجيب أجلو

حاكم أنا اليومين دي قائم على مزاج كتابة بوستات

تانياً مراحب بالبرالمة الجدد
الظاهرين والمخفيين
من عرف نفسه ومن لم يعرفها

والنفوس متطايبة بحمد الله
وحوش بكري يسعكم ويسع قدركم تاني كمان

خلينا كل شي يا وجـيـه كمان بقيت تتكلم في السياسة ...؟؟؟

و الله في البرد دا القعدة في الشارع حاااااااااااااااارة .....

المقصود بالغرف هو صفحات البوست

يعني تكتب تسعطاشر مداخلة تلقى الصفحة قلبت بدلاً عن أربعين سابقاً أو ثمانين أسبق

المقصود بالحوش

هو عدد البوستات في صفحة المنبر

السكان اَلاضافيين هو أخوانا البرالمة

ماشاء الله عليهم
آخر نشاط
ومحاولات لتعريف وتقديم أنفسهم وتثبيت أقدامهم
وهذا حق أصيل لهم

زادت الحركة

وبما أن الغرف قد صغرت... تعاين للبوست تلقى آخر واحد متداخل إسمو ( النقر ) مثلاً
تفتح آخر صفحة تلقى آخر متداخل هو ( إبراهومة )
تقعد تفتش صفحة وراء صفحة عشان تشوف النقر دا مدسي وين ؟؟؟
وترد عليهو وين ؟؟

راس السوط هبشنا يا عاطف

Quote: راس السوط هبشنا يا عاطف

ركز يا برلوم
ثم ركز


وتحياتي





________________

أها شوفو هسع البرلوم دا زرع مداخلتو في المكان الإتخطيناهو قبييييل
وخلاني أرد عليهو قبال ناس صبري

حالتنا صفحة وااااحدة
لو عدة صفحات كان حالنا يصبح كيف؟؟

وتاني نرجع لى زيادة الحركة

الحوش بقى ضيق

تكتب بوست
وترد على مداخلتين تلاتة
تمشي تتغدى وتجي تلقى البوست كان قريب في الصفحة السادسة

تشيل وتعتل وتجيبو تاني للصفحة الأولى
تمشي تشرب الشاى وتجى تفتش للبوست تلقاهو كان قريب في الصفحة التامنة
تشيل وتعتل وتجيبو تاني للصفحة الأولى

فدحين يا بكري يا خوى

زمااااان أهلنا لمن يكونوا عاوزين يسكنوا ناس زيادة على ناس البيت بكبروا الغرف ويوسعوا الحيشان

فمالك يا أخي قلبت الآية ؟؟


يا ربي تكون دي هى العولمة البيقولوها ؟؟

Quote: فدحين يا بكري يا خوى زمااااان أهلنا لمن يكونوا عاوزين يسكنوا ناس زيادة على ناس البيت بكبروا الغرف ويوسعوا الحيشان فمالك يا أخي قلبت الآية ؟؟ يا ربي تكون دي هى العولمة البيقولوها ؟؟

تحياتى الحبيب عاطف .
ولك الشكرا نيابة عن كل البرالمه لترحيبك الجميل.
بالتاكيد اول مره يحصل تسجيل عدد بهذه الكمية فى عضوية المنبر.
والتسجيل نفسه كان فيهو مرونه وسهوله ملحوظه.
نشكر الاخ بكرى لاستجابته لنداءت الكثيرين من متابعى ومعجبى المنبر .

بوست ذو صله
سيد الحوش راقد لو فوق رأئ

مراحب عزيزنا بدر الدين ( نقيب البرالمة )

ياخ والله كان نفسنا نقوم معاكم بالواجب و ( بيتنا ) ظروفو أحسن من كدا
نوسع ليكم الغرف
نكبر ليكم الحوش
عشان الونسة تكون للصبح


___________________

عارف يا بدر دفعتكم دي ذكرتني بدفعتنا نحن ناس 2004
عمك بكري سجل كمية زي حقتكم دي

أحد زملائنا ( الحاليين ) إستقبلنا بكلمته الشهيرة

" ناس الأمن فكوا ليكم كتيبة كاااملة "

أحد زميلاتنا ( الحاليات ) إستقبلتنا بقولها

" بكري طلق العضوية في السهلة "

تخيل ؟؟

Quote: خلينا كل شي يا وجـيـه كمان بقيت تتكلم في السياسة ...؟؟؟ و الله في البرد دا القعدة في الشارع حاااااااااااااااارة .....

يا حبيبنا وين السياسة ؟؟
نحن نشيل ونكسر في التلج ( في البرد دا ) وتقول لى الشارع ؟؟

عليك الله عمنا بكري ما كان يوسع الحوش على الأقل
الغرف نقول ما ضروري
الناس ينوموا في الطراوة

Quote: قولنا هذا ليس بتدخل في عمل الإدارة

أول مرة أشوف لي زول داخل يستأسد وهو (جارّي واطـي)
هسه في زول هبشك؟؟

Quote: أول مرة أشوف لي زول داخل يستأسد وهو (جارّي واطـي) هسه في زول هبشك؟؟

يا دكترة
مثلنا الشعبي بيقول

" العندو ذرة رئاسة ما تكمل معاهو الفراسة "

وعمك بكري قدس الله سره موش عندو ( ذرة ) رئاسة دا عندو الرئاسة كلها
ونحن يا خوى ما بنقدر على الهبباى في عز الصيف
ولا بنقدر على القعاد في الشارع في البرد دا ( أو كما قال أبو حسين )

تحياتي اخي عاطف
واشكرك علي ترحيبك الجميل .
تعرف ياعاطف انت من الاقلام البتعدل المزاج
وانا سعيد جدا اكون في حضرة ناس حلوين
زيكم
تسلم ياحبيب

اعتقد والله اعلم انو بكري قبل جاى وعاين جاى .. لقى اسماء متكرره ليها سنين كل يوم نفس الاسماء ماليه الصفحة الرئيسية
والغرييب انو لقى نفس المواضيع فى نفس الصفحة قاعده ليها سنين
قضية بوكرامي
مشاكل فلان وفلان
المنابر والايام وذكريات الجامعات

كأنما الزمن واقف من سنين ..
ما فى جديد
فقرر طال عمرو ... انو يغير التركيبة السكانية .. فاعتمد النظام الامريكي فى منح الجنسيات
عسى ولعل تنهض التنمية وتدور عجلة الحياة

تحياتي ومراحب يا وضاح

Quote: اعتقد والله اعلم انو بكري قبل جاى وعاين جاى .. لقى اسماء متكرره ليها سنين كل يوم نفس الاسماء ماليه الصفحة الرئيسية والغرييب انو لقى نفس المواضيع فى نفس الصفحة قاعده ليها سنين قضية بوكرامي مشاكل فلان وفلان المنابر والايام وذكريات الجامعات كأنما الزمن واقف من سنين .. ما فى جديد فقرر طال عمرو ... انو يغير التركيبة السكانية .. فاعتمد النظام الامريكي فى منح الجنسيات عسى ولعل تنهض التنمية وتدور عجلة الحياة

وجهة نظرك مقدرة تماماً
بس بنأخذ على وجيهنا بكري أنه قد ضيق المواعين بدل توسيعها
وخاصة وهو بصدد إسكان آخرين جدد
أو على الأقل كان يخليها على حالتها القديمة




_________________

غايتو تعلمنا إستخدام آلية البحث للعثور على البوست
هى برضك كويسة
بتعفي الواحد من ( الإحباط ) لمن يفتش للبوست ويلقاهو في الصفحة العاشرة
هسع كدا الواحد بيلقاهو وخلاص

Quote: تحياتي اخي عاطف واشكرك علي ترحيبك الجميل . تعرف ياعاطف انت من الاقلام البتعدل المزاج وانا سعيد جدا اكون في حضرة ناس حلوين زيكم تسلم ياحبيب

مراحب عزيزنا أبو داوود
كتر خيرك

يلا إنت وأصحابك حركوا لينا المنبر
وانقلونا نقلة نوعية

سلام يا باشمهندس ...

Quote: عاطف عُمر كتب: وبما أن الغرف قد صغرت... تعاين للبوست تلقى آخر واحد متداخل إسمو ( النقر ) مثلاً تفتح آخر صفحة تلقى آخر متداخل هو ( إبراهومة ) تقعد تفتش صفحة وراء صفحة عشان تشوف النقر دا مدسي وين ؟؟؟ وترد عليهو وين ؟؟

ما قام به بكري مؤخراً عمل جميل وسيطوّر المنبر ويجعله يُنافس شبكات التواصل الاجتماعي ...
فقط ينقصه أن يجعل أحدث رد ينزل كآخر مُشاركة في البوست ...

Quote: عاطف عُمر كتب: يا ربي تكون دي هى العولمة البيقولوها ؟؟

عولمة المنتديات = سهولة التصفّح والتنقل + سهولة الوصول + سهولة المُشاركة
وذلك لمُنافسة شبكات التواصل الاجتماعي السريعة في كل شيء ...



ــــــ
وما زال المنبر ينقصه الكثير ...

ياعاطف
ابوصلعة راقدلو فوق ربيع
محتاج لدماء جدد ...
وزى مانصحك ابو الحسين ماتتكلم في السياسة

تحياتي وسلامات عزيزنا أبو لبيد

Quote: ياعاطف ابوصلعة راقدلو فوق ربيع محتاج لدماء جدد ... وزى مانصحك ابو الحسين ماتتكلم في السياسة

وحياتك نحن كلامنا دا كووولو عشان ننستر مع الضيوف
الناس في أربجي وفي رفاعة لمن تحصل مناسبات زى دي بيكسروا الحيطة المشتركة بين الحوشين عشان الناس توسع
عمنا بكري عمل العكس
زى ما قلت لى صبري
لو كان قال لينا وشاورنا كان لقى ليهو آراء كويسة

هسع كلامنا دا فيهو ريحة سياسة ؟؟

تحياتي وسلامات عريسنا صبري

ما شك فيه أن الأخ بكري عندما يقوم بأى إجراء فإن قصده هو ( تحديث وتطوير الموقع ليجعله منافساً لشبكات التواصل الإجتماعي ) ..
مأخذنا عليه أن الإجراء تم آحادياً ( من جانبه فقط )
في ظني أن الأخ بكري لو طرح الموضوع للنقاش لربما تحصل على آراء أفضل
بمعنى آخر أنه ربما توصل لذات النتيجة التي يريدها من ( سهولة التصفّح والتنقل + سهولة الوصول + سهولة المُشاركة )
وفي ذات الوقت يتجنب تصغير الغرف وتضييق الحوش

وفي ظني أيضاً أن أغلب العضوية قد أصبحت تدين بالإنتماء لهذا الموقع لذلك فهى على إستعداد للتفاعل ( حيثما وكيفما يقتضي الحال )

من الخبرات الجميلة التي أكسبنا لها العمل في مجال المشاريع الإسكانية في دولة الإمارات

" أن نستأنس برأى السكان في المنطقة التي نود بناء مشاريع سكنية فيها قبل مرحلة التصميم ، ثم العودة لتقصي آرائهم بعد أن ننفذ المساكن ونسلمها لهم ويعيشون فيها "

جمال الخبرة أنها ألهمتنا حلولاً لمشاكل كثيرة وطورت نظرتنا