الخرطوم عاصمة ( الفرح ) الدائم ..... لمن يقدره

إن إحتفى أهل ( شارقة ) الإمارات أنها مكان الإبتسام
وإن ظل شعارها " إبتسم فأنت في الشارقة " مرسوماً في أذهان زوارها أو المقيمين فيها
فقد حق لأهل الخرطوم أن يكون شعارهم
" إفرح فأنت في الخرطوم "

تفرح
إن إيتدأت يومك بفتح صنبور المياه ووجدت الماء ينساب خلاله

وتفرح أكثر
إن كان لون الماء - لا طعمها - كلون المياه الذي تعرفه

نشجب وندين ونستنكر (تقزيم) الفرح الحاصل في الخرطوم

Quote: نشجب وندين ونستنكر (تقزيم) الفرح الحاصل في الخرطوم

حاشا لله أن نسعى لـ ( تقزيم ) الفرح المتمدد في خرطومنا
نحن نريد أن نلقي عليه شبئاً من ضوء


__________

سلامات أمير

تفرح
إن ذهبت للبقالة ووجدت ما تحتاج شراؤه

وتفرح أكثر
إن وجدت أن السعر الذي إشتريت به نفس المادة بالأمس لم يزيد

تفرح
إن أنجز عامل ما اتففتم عليه من عمل بعد موعده بأسبوع - أو أكثر -

وتفرح أكثر
إن لم يحكي لك كل القصص المثيرة للتعاطف لـ ( تصلح شوية كدا ) ما اتفقتم عليه من مبلغ مالي

تفرح
إن إتصل بك صديق ينوي زيارتك ويحدد موعد زيارته

وتفرح أكثر
إن حضر بعد موعده ( فقط ) بساعتين

تفرح
إن أنجزت ( واحداً ) - فقط - من الأعمال التي برمجتها ليومك في دواوين الدولة

وتفرح أكثر
إن عدت لمنزلك دون أن يرتفع لديك معدل الضغط والسكري والكوليسترول أو تكون قد إرتكبت ( معصية )

يا هندسة

رمضان كريم وكل سنة وانت طيب

Quote: إن عدت لمنزلك دون أن يرتفع لديك معدل الضغط والسكري والكوليسترول أو تكون قد إرتكبت ( معصية )

أوع تكون نزلت إجازة في الحر دا


المهم

حاسب على نفسك لو كنت في الخرطوم

الاخ العزيز عاطف عمر
رمضان كريم
وقصر الديك يا ظريف
زرت الخرطوم بعد غيبة سنة 2007
اي زول قالبتو قال لي
لا صحينا عجبنا الصباح
لا نمنا غتانا العشم

طال ما ابو مقص بي فوق
وابودجانة بي تحت... حاييم بسوطوا يجلد البنات ستات الذوق والصفات في صينية بري

ورمضان كريم
واتمنى ان لا اكون افسدت عليك البوست

Quote: سلامات أمير

الله يسلمك ياتيفه

واصل هذا الفرح النبيل

Quote: واصل هذا الفرح النبيل

إيدك معانا يا الأمير

أمينا عادل أمين
تحيات وسلامات
ورمضان كريم

Quote: واتمنى ان لا اكون افسدت عليك البوست

مشاركاتك ننتظرها كـ هلال هذا الشهر الكريم
هى تجلب ( فرحاً ) وحاشاها أن تفسد بوستًا

Quote: زرت الخرطوم بعد غيبة سنة 2007 اي زول قالبتو قال لي لا صحينا عجبنا الصباح لا نمنا غتانا العشم

ينظرون إلينا نظرات نعجز عن تفسير كنهها الحقيقي عندما نعبر لعم عن أشواق دفينة أن كفانا تغرب وشتات وأننا نفكر في أن نلقي عصا الترحال جانباً لنقيم بقية حياتنا بين ظهرانيهم
نظرات فيها ألف معنى ومعنى
وحتماً لهم ألف حق وحق


تسلم يا حبيب

حمد يا فنان
تحيات ومحبات وسلامات
ورمضان كريم

Quote: أوع تكون نزلت إجازة في الحر دا

نزلت وجيت
رافقني في الرحلة ذهاباً ( علي يوسف ) مع إتصال تلفوني من ( عفيف المشرف )
وهناك كان جاري في السكن ( كمال خليل )
ولك أن تتخيل الباقي
كنت معنا في الذكريات وعادل عبدالغفار وعبدالكافي والأخوات

Quote: رافقني في الرحلة ذهاباً ( علي يوسف ) مع إتصال تلفوني من ( عفيف المشرف ) وهناك كان جاري في السكن ( كمال خليل ) ولك أن تتخيل الباقي

ديني أنا

ياخ دا ما الفرح الخرافي ذاتو ومداخلتك دي قيمتها خمسة سنين روائع

تعرف دي لمة صعب جدا حدوثها في الزمن دا

أول أمس كنت بكلم كمال وفعلا قال لي علي يوسف في السودان

حاولت الاتصال بيهوا ما اتمكنت

نهنئكم

نفرح اكتر لمن تنزل المطرة ويكون فى تصريف ما يخلى وراهو برك ومستنقعات
لمن ما تلقى زبالة مكومة قدام البيوت ومحروقة تجيب ليك ازمة
نفرح لمن يكون مافى سكن عشوائى
بيوت مبنية بادمية ولاصحابها الحق فى النور والموية والصحة
والتعليم المجانى لاطفالها
لمن يلاقى الشيوخ العلاج مجانا والاطباء يبتسمون فى وجه مرضاهم لا يطلبون حق العلاج مقابل الحياة
لمن المدارس الحكومية والمدرسين والمدرسات حقوقهم فى ادنى حالاتها مجابة
لمن الكراس والكتاب ما يكون عبئ اسرى يقضى على الاطفال الخروج للشارع للعمل الهامشى
ممكن مش ؟

Quote: نفرح اكتر لمن تنزل المطرة ويكون فى تصريف ما يخلى وراهو برك ومستنقعات لمن ما تلقى زبالة مكومة قدام البيوت ومحروقة تجيب ليك ازمة نفرح لمن يكون مافى سكن عشوائى بيوت مبنية بادمية ولاصحابها الحق فى النور والموية والصحة والتعليم المجانى لاطفالها لمن يلاقى الشيوخ العلاج مجانا والاطباء يبتسمون فى وجه مرضاهم لا يطلبون حق العلاج مقابل الحياة لمن المدارس الحكومية والمدرسين والمدرسات حقوقهم فى ادنى حالاتها مجابة لمن الكراس والكتاب ما يكون عبئ اسرى يقضى على الاطفال الخروج للشارع للعمل الهامشى ممكن مش ؟

شايفة يا سلمى أبواب الفرح كتيرة كيف ؟؟؟
في كل التفاصيل التي تعتبرها مدن أخرى أساسيات تعتبر عندنا في خرطومنا مبعث فرح
فرح إن تحققت
وفرحت أكبر إن تحققت بأقل قدر من السوء


__________

رمضان كريم يا ستهم

Quote: ديني أنا ياخ دا ما الفرح الخرافي ذاتو ومداخلتك دي قيمتها خمسة سنين روائع تعرف دي لمة صعب جدا حدوثها في الزمن دا

عارف يا حمد
بتجيك أحاسيس عجيبة خلاص لمن تلقى نفسك ( فجأتن ) أمام أحلى أيامك
وتتذكر ( شقاوة ) زمااان وتقارنها بـ ( مسؤولية ) هسع
لمن تسرح في الونسة ( الجادة ) هسع والعيال ومسؤولياتم والحياة وبلاويها لمن تقارن دا بـ ( إنطلاق ) زمان وكل الهموم في كيف ( تباصي ) الإمتحان و ( أين تسهر هذا المساء ؟؟؟)
للزمن أحكامه مافي شك
وتلك الأيام التي يداولها المولى عز وجل بين عباده



_____________

ياخ إنت زااااتك
هسع مالك علينا ؟؟؟

تفرح
إن أنجزت ( واحداً ) - فقط - من الأعمال التي برمجتها ليومك في دواوين الدولة

وتفرح أكثر
إن عدت لمنزلك دون أن يرتفع لديك معدل الضغط والسكري والكوليسترول أو تكون قد إرتكبت ( معصية )

تفرح
إن توقف لك صاحب سيارة الأمجاد الذي أشرت عليه بالتوقف


وتفرح أكثر
عندما يجيبك إجابة مباشرة على سؤالك المباشر عن ثمن المشوار للجهة التي تحددها له
ودون أن يدخلك في دوامة
ادفع المعقول ....
المعقول كم يا ود الناس
ياخ أى حاجة بس اركب
ياخ نتفق قبل ما أركب
طيب ادفع كذا ...
( وتكون كذا ) هذه ضعف الثمن الذي تعودته
لتبدأ المفاوضات من أول وجديد
وتكتشتف أنك أضعت نصف ساعة في هذه العملية

الأخ عاطف
تحياتي ورمضان كريم،

أضف إلى شلالات الفرح هذه
التعامل الراقي والحضاري في
استخدام مكبرات الصوت في المساجد؛
حينما تتم مراعاة المرضى، والطلبة،
وغير المسلمين.

تحياتي وسلامات أخي العزيز الأستاذ عثمان رضوان
رمضان كريم

Quote: أضف إلى شلالات الفرح هذه التعامل الراقي والحضاري في استخدام مكبرات الصوت في المساجد؛ حينما تتم مراعاة المرضى، والطلبة، وغير المسلمين.

وإلى ذلك أضف مكبرات الصوت المحمولة في سيارات لتعرض البضائع
وتلك قصة أخرى
توقف سيارة أمام منزلي وبدأت في شرح مزايا ( الدهان الصيني ) ولا شنو كدا ما عارف
أيقظتني المكبرات من قيلولة أتت بالكاد
نزلت لأخبرهم بلطف أننا قد عرفنا ( دهانهم ) هذا لذلك ونشراً للمعرفة أرجوهم أن ينتقلوا به لمكان آخر
لكنني توقفت أمام هذا الدهان الذي يعالج البواسير والصداع والمغص وآلام المفاصل وآلام المعدة المزمنة و ,...........
وجدتني أقول لهم ياخ دهانكم دا ودوهو لى للجامعات عشان يقفلوا كليات الطب والصيدلة الكتيرة دي