Post: #1
Title: بكري أبوبكر و كعكة اليتيم
Author: عاطف عمر
Date: 05-02-2007, 04:20 AM
Parent: #0
الأخ العزيز بكري أبوبكر المحترم
تحياتي والمحبة
أنزلت هذا البوست وكان عدد زواره لحدي أمس 765
أصبحت اليوم لقيت عدد الزوار بقوا 70 فقط
مبروك عليك يا ( رشا عوض ) الشهرة الجاتك واقعة من السماء
يا أخي منذ إستضافتك لينا لم نطلب منك أى طلب خاص
أه يا أخوي هسع طلبي الوحيد
رجع لى عدد زواري الصادرتهم أو صادرتهم التكنولوجيا
ولاً حتبقى على قصة المثل
الكعكة في يد اليتيم عجبة
ولك الشكر والإمتنان
|
Post: #2
Title: Re: بكري أبوبكر و كعكة اليتيم
Author: عاطف عمر
Date: 05-02-2007, 10:21 AM
Parent: #1
| Quote: الكعكة في يد اليتيم عجبة |
|
Post: #3
Title: Re: بكري أبوبكر و كعكة اليتيم
Author: almulaomar
Date: 05-02-2007, 01:10 PM
Parent: #1
أخي عاطف
تحية العافية
الماوس في يد اليتم عجبه
والتقنية من شدة ما بتشطح بتريد ناس وتكره ناس ، تصور يا عاطف مرة دخلت يوم الثلاثاء في النت وكنت أون لاين لمدة ثلاثة أيام متتالية ما أصلو النت ملح والكهربه ملح ، أها يا مان كل ما أعاين للمنتدي ألقي ليك الأعضاء الموجودين إثنين إثنين يعني مثلا عاطف عمر يكون مكرر ومين كده برضو مكرر لمن شكيت وقلت يمكن عيوني زغللن فناديت أم أحمد وقلت ليها كدي شوفي بدر الدين شنا ده مكتوب كم مرة قالت لي تلات مرات قلت ليها إنتي متأكده قامت طلعت نضارتها وقالت لي لا إستغفر الله العظيم مرتين وأنا قالت لي إنت مرة واحده إلا تكون داخل بإسم تاني
المهم أعذر التقنية وسامح التكنولوجي وأعمل طناش ، أنا يا عاطف فاتح بوست راسو عديل في الأسبوع الأول من أبريل لقيتو في الأرشيف بتاع الربع الأول وأنا قلت يمكن الربع بقي أربعه شهور والسنة بقت ستة عشر شهراً يعني الحبش أحسن مننا في شنو مش السنة بتاعتهم أو دعايتهم بتقول: ثيرتين منص أوف سن شاين ، وهو بالمناسبة إسم فلم تدور أحداثة عن قصة شاب أثيوبي مهاجر تزوج فتاة أثيوبية وكانا ينويان جمع بعض المال لعمل كوفي شوب وكانا ينتظران القريج كارد حيث يقيما وبعد مضي ثلاثة عشر شهرا إكتشفا أن هناك أشياء أهم من القرين كارد بكثير.
الفيلم من قصة واقعية من تأليف وإنتاج وإخراج Yehdego "Bobby" Abeselom والشغلانة يبدو أنها عدوي نحن برضو تلقي الكثير من المطربين عندنا الأغاني من كلماتهم وألحانهم وتوزيعهم وهم ما ناقشين دو من ري من فا.
المهم يا عاطف الجابت في زوارك سامحتك وأخير الزوار ينقصو من يتلحس البوست وتفتش ليهو مستخدما الحوقلة والقوقلة والشمشره والوهوهة - والأخيرة دي من الياهو - ما تلقاهو زي بوستي السبب لي أذاي بعنوان بكري أبوبكر خاطبه دوت كوم ولا خاطبه نص كم والموضوع كتبته عندما أنزل السيد الأدمنستيريتور مقالاً فحواه مواطن سوداني مقيم بالخارج يرغب الزواج من سودانية للجادات فقط.
|
Post: #4
Title: Re: بكري أبوبكر و كعكة اليتيم
Author: عاطف عمر
Date: 05-02-2007, 04:26 PM
Parent: #3
أخي العزيز الملا عمر
سلامات
وينك ياراجل ؟؟؟
ياخي البشوف ( كعكة ) غيرو تهون عليهو قصة كعكتو .
موتني عديل من الضحك . وفعلاً | Quote: والتقنية من شدة ما بتشطح بتريد ناس وتكره ناس |
. فكل البوستات الموجودة ظلت على حالتها في أمان الله . فلم تجد إلا زواري ( الخايف عليهم ) لتلطشهم .
حلوة شديد قصة ربع السنة البقى أربعة أشهر وبوستك الفتحتو في أول أبريل لتلقاهو في أرشيف الربع الأول من السنة. أما عن بوست الآدمن ( مواطن سوداني مقيم بالخارج يرغب الزواج من سودانية للجادات فقط.) فلي معهو قصة لطيفة فقد لاحظت أن الأخت التي وافقت ( مبدئياً ) على العرض كانت المداخلة التي أبدت فيها موافقتها هي المشاركة الثانية لها علماً بأنها مسجلة في البوست منذ عام 2002 فكتبت مداخلة لها أقول لها فيها ( برافو عليك إنتظرتي خمس سنوات لتكتبي هذه المداخلة المثمرة . وأطلب من بكري أن يمدنا بمعلومات عن الشخص نفسو بعد أن شبكنا She should ---- She should خاصة بعد أن طلعت البنت بلدياتنا وبناتنا ما بنرميهم ساى كدا . المهم رسلت المداخلة وحياتك لى هسع لا المداخلة ولا البوست ما لاقيهم . وكان ما كلامك دا مرات كنت أشك في أني عملت مداخلة من أصلو .
المهم بس نقول يا جامع يا رقيب
كل التحايا والود
|
Post: #5
Title: Re: بكري أبوبكر و كعكة اليتيم
Author: عاطف عمر
Date: 05-02-2007, 10:03 PM
Parent: #1
غايتو نقول فرق التوقيت
ومشغوليات بكري الكتيرة
والسيرفر الكان متعطل
ونقنع نفسنا بأنو عشان كدا بكري ما شاف البوست
نقوووووووم نرفع البوست
|
Post: #6
Title: Re: بكري أبوبكر و كعكة اليتيم
Author: AMNA MUKHTAR
Date: 05-02-2007, 11:24 PM
Parent: #1
الأعزاء عاطف عمر
والملا عمر...
سعيدة بمشاهدة أسماءكم فى المنبر..
ونرفع البوست.
|
Post: #8
Title: Re: بكري أبوبكر و كعكة اليتيم
Author: عاطف عمر
Date: 05-03-2007, 03:13 AM
Parent: #6
الغالية آمنة مختار
والله ليك وحشة
ومشتاقين لي بوستاتك ومداخلاتك وروحك الحلوة
شفتي البقت علينا زوارنا ( إتلحسوا ) بين عشية وضحاها .
تشكرات لرفع البوست
رفع الله قدرك
مودتي
|
Post: #7
Title: Re: بكري أبوبكر و كعكة اليتيم
Author: Raja
Date: 05-02-2007, 11:54 PM
Parent: #1
عاطف يا عزيز..
ضحكتني والله..
تعرف يومداك لما عملت بوست بنيًة أساسي.. عدد الردو كان 35 وفجأة عدد الزوار بقى 15.. دخلت في أضافريني.. أصلو اليومين ديك كان في بوست بيتكلم عن المدافسة في بوستات البنات.. قلت هسع صاحب البوست يجي يعمل كابشن لعدد الزوار وعدد المشاركين ويمشي يعمل بوست مدنكل يقول أهو الدليل.. يعني رجاء عشان "جكس " عدد الردود لبوستها أكبر من عدد الزوار ..
قمت رسلتا لبكري رسالة في المسينجر أرجوه يستر علينا من الفضيحة وشيل الحال ..
..
عرفتا إنها مشكلة "تقنية" حلوة تقنية دي.. وما ليها حل لإرجاع الرقم..
ختيت الخمسة في الاتنين وصبرتا.. بعد شوية عدد الزوار بقى مساوي لعدد الردود.. قلتا خير.. بعد شويتين زاد من عدد الردود.. فرحتا.. ولما إتضاعف العدد قفلت المنبر ومشيت نمتا مرتاحة.. شفتا البقى علينا..؟
وبالمناسبة الكعكة حلوة و"مهضومة"..
ودي
|
Post: #10
Title: Re: بكري أبوبكر و كعكة اليتيم
Author: عاطف عمر
Date: 05-03-2007, 10:13 AM
Parent: #7
| Quote: تعرف يومداك لما عملت بوست بنيًة أساسي.. عدد الردو كان 35 وفجأة عدد الزوار بقى 15.. دخلت في أضافريني.. أصلو اليومين ديك كان في بوست بيتكلم عن المدافسة في بوستات البنات.. قلت هسع صاحب البوست يجي يعمل كابشن لعدد الزوار وعدد المشاركين ويمشي يعمل بوست مدنكل يقول أهو الدليل.. يعني رجاء عشان "جكس " عدد الردود لبوستها أكبر من عدد الزوار .. |
عارفة يا رجاء
زمان لمن د. عمر محمود ( طالب الطب أيامها ) كتب قصيدتو الشهيرة
يا سيدة لا
فايتانا وين مستعجلة
ما إنتي كملتي الحلاة
.
.
ومشى فيها لحدي ما وصل لقوله
غلطات كتيرة الكمبيوتر بعملا
نحن قلنا الزول زعلان ساى عشان الرفدة الحصلت لى ( زولتو ).
هو كمان الكمبيوتر بيغلط ؟؟
هسع الزول كان عاوزين يصفوهو بالدقة يقولوا ليك
" بالله فلان دا ما شاء الله عليهو مخو كمبيوتر بس . "
أو عندما يتضايق أحد من التفاصيل الكثيرة التي يسأل عنها يقول ليك
" ياخي عاوزني أتذكر ليك الحاجات دي كلها أصلو أنا مخي كمبيوتر ؟؟؟ "
أها نحن يا مؤمن يا مصدق إتعاملنا مع الكمبيوتر على هذا الأساس . يقوم ( الخيط يتقطع مكان رقيق ) أو كما قال صديقي نصار " يلمها النمل ويطاها الفيل "| Quote: عرفتا إنها مشكلة "تقنية" حلوة تقنية دي.. وما ليها حل لإرجاع الرقم.. |
كان كدي أمانة يا ( التقنية ) ما إتلومتي .
ما لقيتي إلا ( الغلبان عاطف ) دا وتلطشي زوارو
إنتي وكت مغروضة في ( زوار ) ما تشوفي بوستات ناس رجاء ومنى خوجلي زي الخمسمية ستماية زائر ديل بيغطوهم في يوم واحد( عيونا باردة ) .
المهم
الله جاب ، الله خد ، الله عليه العوض
|
Post: #9
Title: Re: بكري أبوبكر و كعكة اليتيم
Author: نصار
Date: 05-03-2007, 03:30 AM
Parent: #1
العزيز عاطف عمر
يا صديقي كتيرا رايح و قليلا رايح
و اصلنا نحنا ما الناس البتزاحموا الخلق في ابواب بوستاتهم
لكن بعد دا كمان بقت عليك حكاية يلمها النمل و ياطاها الفيل
مفروض العنده فضل زوار يعود بهم علي من لا زوار له او زواره
شوية زي حلاتنا كدا...
و العاقبة عندكم في المسرات
|
Post: #11
Title: Re: بكري أبوبكر و كعكة اليتيم
Author: Muna Khugali
Date: 05-03-2007, 10:35 AM
Parent: #9
يا لهوي..
البوست بتاعك مسكون!
شوف يا عاطف كله الا العفاريت..
والحمدلله انك نزلت البوست ده بالصباح لو كان بالليل كنت أكيه ماعرفت أنوم!
تاني لما تعمل البوست..نزل فيه قرايه تحميه..
ولا أهي دي النتيجه..
مش امكن العدد ده مات؟
|
Post: #12
Title: Re: بكري أبوبكر و كعكة اليتيم
Author: غادة عبدالعزيز خالد
Date: 05-03-2007, 11:53 AM
Parent: #11
عارف يا عاطف
قبل كم يوم كدة,
فيصل نوبى منزل بوست أسمة "بسم الله"
قال نزل موضوع و تانى ما لقاهو
فدحين قول بسم الله
و أستعذ بالله من الشيطان الرجيم
و خش البور برجلك اليمين
أما وصيتنا للأخت سعدية
فجهزى عليك الله البخور
و ولعى الفحمة
و حومى المبخر حول البوست سبعة مرات
ههههههههههههه, و إن شاء الله ينفع
تخريمة
عينا عليك بادرة اليويمن ديل يا عاطف
بوستات ساااااااى
زى الفستق
سعدية, الزول دة ما شايفه شغلك معاهو ولا شنو؟
بس ما تقولو بحرض
|
Post: #16
Title: Re: بكري أبوبكر و كعكة اليتيم
Author: عاطف عمر
Date: 05-04-2007, 04:40 AM
Parent: #12
Quote: قبل كم يوم كدة,
فيصل نوبى منزل بوست أسمة "بسم الله"
قال نزل موضوع و تانى ما لقاهو |
الحالة عامة إذاً
والعفاريت حايمة والله يستر
بس يا غادة يعني ما لقت إلا بوستات الغلابة عشان تلطشهم
عارفة كدا العفاريت عاملة زي حرامي يسيب كل الفلل الضخمة لينط في قطية صغيرة عشان يسرقها .
نحن بعد كدا يا غادة كان عملنا بوست حنقرأ ليهو ( المولد ) عديل كدا قبال ما ننزلو .Quote: سعدية, الزول دة ما شايفه شغلك معاهو ولا شنو؟
بس ما تقولو بحرض |
لا .. معقولة نقول إنتي بتحرضي ؟؟؟
إنتي يا دوبك بتحرشي بس
|
Post: #15
Title: Re: بكري أبوبكر و كعكة اليتيم
Author: عاطف عمر
Date: 05-03-2007, 09:37 PM
Parent: #11
Quote: يا لهوي..
البوست بتاعك مسكون!
شوف يا عاطف كله الا العفاريت..
والحمدلله انك نزلت البوست ده بالصباح لو كان بالليل كنت أكيه ماعرفت أنوم!
تاني لما تعمل البوست..نزل فيه قرايه تحميه..
ولا أهي دي النتيجه.. |
إنت بالذات يا منى أعملي حسابك
مرات كتير بدخل المنبر ( زائر ) ألقاك ( مصنقرة ) براك الله ورقبتك
وغادة قالت الحالة عامة البوست بتاع فيصل نوبي بحالوا إتلحس لحدي ما تاني يوم نزل بوست سماهو ( بسم الله ).
لكين المحيرني يا منى عفاريت الجن دي ما لقت إلا بوستات الغلابة الزينا ؟؟؟
غايتو الله غالب
ونصيحتك بنفذها بحذافيرها
|
Post: #13
Title: Re: بكري أبوبكر و كعكة اليتيم
Author: عاطف عمر
Date: 05-03-2007, 01:00 PM
Parent: #9
Quote: يا صديقي كتيرا رايح و قليلا رايح
و اصلنا نحنا ما الناس البتزاحموا الخلق في ابواب بوستاتهم
لكن بعد دا كمان بقت عليك حكاية يلمها النمل و ياطاها الفيل
مفروض العنده فضل زوار يعود بهم علي من لا زوار له او زواره
شوية زي حلاتنا كدا... |
صديقي العزيز نصار
شوفتا عليك الله البخت المايل دا كيف ؟
سمعنا ونفذنا كل النصائح الإسفيرية .
قالوا ما تفتحوا البوست في الويك إند عشان ما يبور، قلنا حاضر وفتحناهو في نص الإسبوع لكل الناس ( الإجازاتم خميس والإجازاتم جمعة والإجازاتم سبت وأحد ) .
قالوا ما تردوا على المتداخلين مرة واحدة عشان البوست يفضل على طول في الصفحة الأولى ، قلنا حاضر بقينا نرد واحد واحد لمن خفنا الناس تزعل مننا وتتهمنا بالتجاهل .
لكين الما درسونا ليهو أن الزوار البيجوك ( بعد التكتيك دا كلو ) يروحو في غمضة عين .
ولا أراكم الله ( لطشة زوار ) في بوست عزيز لديكم
|
Post: #14
Title: Re: بكري أبوبكر و كعكة اليتيم
Author: ماجدة عوض خوجلى
Date: 05-03-2007, 06:21 PM
Parent: #1
غايتو ياعاطف بس نسكت ساكت
عارف مصداقية لكلامك انا زاتى حصلت لى حاجه اغرب من الخيال
والله انا لوقلتها احتمال انت ماتصدقا وامكن كمان لوصدقتها تقوم تتخلع
بس علشان تعرف انو الحاجهالحصلت ليك دى طبيعية جدا بتصدق انا مرة عملت لى بوست
بالليل لمن صبحت علينا الدنيا لقيتو موجود
كيفيك ياعاطف وكيف سعديه والاولاد سلامى ليكم كلكم
|
Post: #17
Title: Re: بكري أبوبكر و كعكة اليتيم
Author: عاطف عمر
Date: 05-04-2007, 05:26 PM
Parent: #14
Quote: عارف مصداقية لكلامك انا زاتى حصلت لى حاجه اغرب من الخيال
والله انا لوقلتها احتمال انت ماتصدقا وامكن كمان لوصدقتها تقوم تتخلع
بس علشان تعرف انو الحاجهالحصلت ليك دى طبيعية جدا بتصدق انا مرة عملت لى بوست
بالليل لمن صبحت علينا الدنيا لقيتو موجود |
يا ماجدة لا
زننننننننن
بطلي
معقولة بس تلقيهو موجود ؟؟؟
ومع العفاريت الحايمة دي ؟؟؟
شئ لطش بوستات ، وشئ لطش مداخلات ، وشئ لطش زوار .
لكن نرجع ونستغفر ونقول
إنتي عاد ما بت المشايخ
مدد يا الخوجلية مدد
|
Post: #18
Title: Re: بكري أبوبكر و كعكة اليتيم
Author: عاصم ابوبكر حامد
Date: 05-04-2007, 06:31 PM
Parent: #1
الاخ عاطف
لك التحية
بصراحة بكرى الايامات دى سخن وجاتوا وجع ركب وصداع من الحر ...
انا ما عارف لكن المنبر مضروب ....
ولو عندك مواضيع وثقها فى الايميل احسن ليك ....
المنبر فيه شلل الايامات دى ...
تسلم
|
Post: #19
Title: Re: بكري أبوبكر و كعكة اليتيم
Author: عاطف عمر
Date: 05-04-2007, 11:22 PM
Parent: #18
| Quote: بصراحة بكرى الايامات دى سخن وجاتوا وجع ركب وصداع من الحر ... |
تحياتي أخي عاصم
ونحن في المرحلة الثانوية العليا في منتصف السبعينات ، كانت المدارس الثانوية تتبنى نظام فصول إتحاد المعلمين . خدمة للطلاب الذين لم يتمكنوا ( أكاديمياً ) من الإلتحاق بالمدارس النظامية وفي نفس الوقت مصدر دخل إضافي للمعلم . بعض الطلاب كانوا من موظفي الحكومة الذي إنخرطوا في الوظيفة بشهادة الثانوي العام .
أستاذ مادة الفنون أستاذنا الفنان صاحب الحس الفني العالي والطرفة الحاضرة محمد علي جناح كان لا يجد أى مبرر لأى طالب أن يدخل حصة الفنون ولا يحمل قلم رصاص لذلك فهو يبدأ الحصة بالطلب من الطلاب أن يبرزوا أقلام الرصاص ويوقف كل من لايكن معه قلم ليضربه بالسوط الموجود أبداً بحوزته . في أحد المرات كان من الطلاب الذين لم يحضروا قلم الرصاص الصديق ( .. ) وهو في ذات الوقت رجل شرطة. ضرب الأستاذ جناح بسوطه كل الطلاب الواقفين الذين لم يكن بحوزتهم أقلام رصاص . عندما جاء الدور على صاحبنا الشرطي وهم الأستاذ جناح بضربه صاح الطلبة بصوت واحد :
- يا أستاذ دا بوليس
تراجع أستاذنا جناح وسأل الطالب عن صحة المعلومة فأكدها له وأخرج له الكارنيه . وبسرعة بديهة لم تخطر لنا على بال أخذ الأستاذ جناح قلم رصار جار الطالب وأعطاه للشرطي وضرب الجار صاحب القلم الأصلي بدلاً عنه.
فيا صديقي نحن قلنا عفاريت المنبر فقط
سعيد بمرورك
|
|