السودان بلد المليون سمسار

عالم عجيب من البشر
لا فكاك من سطوتهم ، يفهمون في كل شئ ويفتون في كل شئ . لم يستطع الناس منهم فكاكاً
إن أردت شراء قطعة أرض فهم الجيولوجيون الفطحل وهم خبراء الـ Soil الذين يعرفون قوة تحملها وهم خبراء التخطيط الذين يعرفون المشاريع المستقبلية التي سوف تنشأ على هذه المنطقة وتأثير ذلك على القيمة المستقبلية المتوقعة للأرض . أما إن أردت شراء منزل فهم المهندسون المعماريون الذين يفهمون في التصميم وروعة المعروض وتلبيته لكل الضروريات والجماليات وهم المهندسون الإنشائيون الذين يعرفون التصميم الإنشائي والأحمال ومطابقة المنشأ ومكوناته لكل المواصفات العالمية .
إن أردت شراء عربة فهم المهندسون الميكانيكيون الذين يعرفون كفاءة العربة المعروضة والعيوب الخفية وهم الأقدر على معرفة قيمتها الحقيقية .
إن أردت شراء خروف سماية أوخروف كرامة أو خروف إكرام ضيف أو حتى خروف توسعة للعيال فهم الأطباء البيطريون الذي يعرفون ( من نظرة ) الخروف السليم والخروف المريض ويعرفون أنساب وسلالات الخراف الأصيلة والمهجنة .
وفي كل الأحوال فإن السماسرة غض النظر عن تخصصك ، هم الأدرى وهم الأعرف بالقيمة الفعلية للمادة المطروحة للبيع والشراء وهم الذين لهم الكلمة الفصل في السعر " الذي فيه يختلف القوم " حتى لو أتت هذه الكلمة الفصل عبر الحليفة التعسفية " حرَم إنتو الإتنين ما تقولوا تاني حاجة "
وقبل ذلك كله فإن العمولة أو النسبة أو حق السمسرة ( من طرفي ) العملية هو حق أصيل في كل مواثيق السوق السوداني الفريد ، وهو حق قد نال الإعتراف وأصبح مسلماً به حتى لو أنهيت كل ( بيعتك ) مع صاحب العلاقة مباشرة فسوف ينط لك من يدعي أن له ( حقاً ) فلولاه لما تمت هذه البيعة
وسط ذلك العالم الفريد تنشأ قصص وحكاوي ، مآسي وطرائف .
ما رأى أهل القانون
وأهل الإقتصاد
وأهل الإجتماع
وما رأيكم سيداتي آنساتي سادتي
أهي عطالة مقنعة ؟؟
أهي ضرورة ؟؟
أم خليط يحتاج لتنظيم ؟؟

لعله من اللافت للنظر أن حواء بلادي وقد غزت بفضل علمها واصرارها كل المجالات التي كانت تصنف تقليدياً وحتى ( عضلياً ) أنها مهن رجالية، إلا أن مهنة ( السمسرة ) قد ظلت عصية عليها أو لعلها لم تروق لها فلم أرى أو أسمع بـ ( سمسارة ) .
فهى يا ترى هو عدم إقتناع بالفكرة من الأساس ؟؟
أم هناك أسباب أخرى ؟؟

في (سمسارات) يا حبيب و خاصة في قطاع الأراضي و البيوت!

Quote: في (سمسارات) يا حبيب و خاصة في قطاع الأراضي و البيوت!

أهو دا الكلام ولاَ بلاش
مافيش حد أحسن من حد
لعن الله الغربة الطويلة وما تفرزه من جهل
شكراً كثيراً للتصويب أميرتنا الغالية لنا

يا عاطف
لو داير ليك غناية بالدلوكة تكون ساكنة الانقاذ ولا الازهرى
يوصفو ليك واحد طول فى عرض ولطخ
ويقولو ليك دى متعهد حفلات عشان يتوسط ليك ويجيب ليك الغناية
وكمان يجى قاشر معاها ساعة الحفلة
دى تسميها شنو ؟

Quote: لو داير ليك غناية بالدلوكة تكون ساكنة الانقاذ ولا الازهرى يوصفو ليك واحد طول فى عرض ولطخ ويقولو ليك دى متعهد حفلات عشان يتوسط ليك ويجيب ليك الغناية وكمان يجى قاشر معاها ساعة الحفلة دى تسميها شنو ؟

عارف يا عبدالدائم كنت كلما أسأل عن أحد الأقرباء أوالمعارف أو الأصدقاء تأتيني الإجابة
" والله فلان دا عاقل ، إستقال من وظيفتو ونزل السوق "
وفي تخريمة جانبية كنت استعجب من تعبير ( نزل السوق ) فالنزول فعل يدلك على إنخفاض منسوب المكان الذي يأتي بعد الفعل .فهل هم يقصدون ذلك صدقاً ؟؟
ما علينا
المهم يا سيدي كنت استعجب كم هي ( مساحة ) ذلك السوق الذي يستوعب كل ذلك الكم من الناس . فهمت بعدئذ أن المسألة لا تكلف سوى شوية أناقة في الملبس وفي العربة ( إن توفرت ) وشوية كلام مرتب ومعرفة ( مراكز القوى ) في عالم السماسرة .أو تعرف من يعرف ذلك فهذا ما يحدد نصيبك من العمولة . ومع ذلك فلم نسمع أن من نزل السوق قد ندم وطلع تاني لوظيفته الأصلية ، بل قد يكون أننا قد رأينا بيوته وعرباته و......
لكن - والصدق منجاة - لم يخطر ببالي مسألة سماسرة الغنايات أهو برضو معلومة جديدة استفدناها من هذا البوست .
تحياتي يا أمير

مليون سمسار ياعاطف عمر !!!
ياخي حرام علييييييييييك
والله اقل شيء احتمال يكون 10 مليون سمسار

يا خي والله عندنا سمسارة بتاعت { عدة } والله كرهتنا حياتنا
قميصي الفي الصورة دا كنت محتفظ بيهو لو اتعمل أي مزاد انساني لسودانيز أون لاين اتبرع بدخله لصالح المشروع
هذا القميص والله تم تبديله { بصحن وكباية } !!!! ضغطي مازال مرتفعاً حتى اليوم وحلفت لهذه السمسارة إن دخلت بيتنا مرة تاني فلن ترجع سالمة 00 يعني سأستعمل العكاز المضبب وأشياء اخرى حتى لاتأتي بسيقانها الناشفة بجوار البيت !!! قال مافي سمسارات قال !!!
أشياء أخرى دي الا الرفسي والواحد بعد داك يبرك فووووووووووقها لأنها منتهية الصلاحية
لم يقابلني في حياتي سمسار ضعيف
فكلهم لديهم { رقبة } السيف مايقطعها
سماااااااااااااااااااان ونجاض وجلاليبهم نظيفة لدرجة ماعادية ومركوب نمر ولسان زي الحنظل !!!
والله العظيم خروف الضحية لمن اشتريتو كان في خمسة من النوع الجهامة ماشين ورااااااااي
قال شنو : أدينا حق السمسرة
وأنا اتفقت مع البائع بره الزريبة
والمطاليق ديل عاوزين بعد الجرح الإنجرحناه بشراء الخروف عاوزين ليهم قروش زيادة
أخيراً قلت لصاحب الخروف شيل خروفك { فقد ضحى عنا البشير النذير }
في النهاية الجماعة اتراجعوا لكن في واحد منهم عكليت عكلتة بطالة جداً
ساعة رفضت اعطيه
قال حايمشي يضبح الخروف ويشيل الجلد والراس
سمسار وجزار ومكار
علي بالطلاق مرقنا من الخروف بي صحن لحمة وصحن كمونية
الراس والجلد والثلث للسمسار
والكراع الخلفية أخذتها أمي
والكراع التانية { أم ست النفر }
غايتو بس نحن طلعنا مجاهدين و ناس جنة سااااااااااااكت

أبو حراز يا عسل

والله ما قادر امسك نفسي من الضحك
وما قادر أعمل إقتباس لأى جزء من مداخلتك اللطيفة دي
أصلوا ما كنت قايل في زول ( متوك ) من السماسرة قدر دا .

وعشان تهدي نفسك شوية اسمع القصة دي
مجموعة من أعز أصدقائي ( نزلوا السوق ) وتعودوا أن يحضروا لمدينة دبى لأغراضهم التجارية فرادى أو مجتمعين، كنت خلال رحلاتهم تلك مستشارهم التجاري وسائقهم الخاص . أخبرتهم يوماً برغبتي في شراء قطعة أرض في إجازتي المقبلة ففرحوا لذلك فرحاً خرافياً وقالوا ما معناه ولا تحمل هم سوف نقدمك لأحسن السماسرة ونختار لك أحسن القطع في أجمل المواقع وبأقل الأسعار . وأضافوا " إنها فرصة لنرد بعض جمايلك "
ذهبت الإجازة وقدموني فعلاً لأحد السماسرة . ووجدت فعلاً قطعة أرض حسب طلبي وبسعر حسب توقعاتي أفهموني أن عمولة السمسار ما يعادل وقتها ( ألفين دولار ) وسألتهم سؤالاً صريحاً مباشراً " وكم عمولتكم أنتم ؟؟؟ " وغضبوا لكلامي هذا غضبة مضرية
" إنت بتشتمنا ولا شنو ؟؟ معقولة نحنا نشيل منك إنت عمولة ؟؟"
صدقتهم فالدنيا لا تزال بخير .
المهم تم شراء الأرض بحمد الله . الدنيا ضيقة في نفس الإجازة إلتقيت بالسمسار مصادفة في أحد المناسبات الإجتماعية فصرت أمازحه بالقول
" ياخي حرام عليك تمشي معاى مشوارين تأخذ فيهم ألفين دولار ؟؟؟ "
هنا استعدل في جلسته ورمى قنبلته
" اسمع أوع تكون فاكر الألفين دولار بتاعتك أنا أخدتها براى ؟؟ على الطلاق بالتلاتة أصحابك شالوا منها ألف وخمسمية دولار . أنا نصيبي كان خمسمية دولار بس . أصلهم كانوا مستحين يشيلوا منك عمولة عديل كدا . "
ولاحقاً عرفت أنه قد ( فت ) لهم بما دار بيني وبينه .

شفتا العالم دا كيف يا حبيب ؟؟

واحد سمسار حيوان عرض لينا بيت للإيجار
قال سيده طالب خمسمائة الف في الشهر
لكن هو بالفهلوة بتاعتو
وعشان نحن قال ناس طيبي
وكمان جيرانه
لازم يخدمنا ويخفض لينا سعر الايجار
جانا بعد يومين قال عاوز الحلاوة لأنو الايجار اتخفض ل 400 الف
ست النفر عاوزة تقع على خشمها لمن عرفت السعر اتخفض شوية
وانتظرتني بفارغ الصبر عشان الخبر السعيد
المهم حاولت بطريقة خبيثة اعرف صاحب البيت
وكان في قرية بعيدة
تصدق سافرت ليهو
وعرفت انو الايجار 275 الف
قال جيرانا قال !!

Quote: ذهبت الإجازة وقدموني فعلاً لأحد السماسرة . ووجدت فعلاً قطعة أرض حسب طلبي وبسعر حسب توقعاتي أفهموني أن عمولة السمسار ما يعادل وقتها ( ألفين دولار ) وسألتهم سؤالاً صريحاً مباشراً " وكم عمولتكم أنتم ؟؟؟ " وغضبوا لكلامي هذا غضبة مضرية " إنت بتشتمنا ولا شنو ؟؟ معقولة نحنا نشيل منك إنت عمولة

عاطف عمر...بلاي دفعت سمسرة بس 2000 دولار؟ يعني بي حساب الوقت داك كانت 5 مليون جنيه او أكثر

يعني معناها ما نفكر خالص...نشتري او نتكلم مع زول...وبعدين( انتو القروش دي بتلقوها وين؟)

Quote: بلاي دفعت سمسرة بس 2000 دولار؟ يعني بي حساب الوقت داك كانت 5 مليون جنيه او أكثر يعني معناها ما نفكر خالص...نشتري او نتكلم مع زول...

مراحب يا نزار
هذه القصة كانت في يوليو 1995 وقتها كان سعر الصرف الدولار 700 جنيه . الألفين دولار كانوا مليون وأربعمائة ألف جنيه .

طيب ماذا تقول لو قلت لك أن عمولة مجموعة سماسرة لقطع أراضي بيعت مؤخراً في الخرطوم كانت خمسين مليون جنيه أكرر خمسين مليون جنيه .
يا راجل قول يا باسط

عارف يا أبو حراز أنا بحب (اللعبة الحلوة) وبتكيف منها حتى لو كنت أنا ضحيتها . سميها ميتة قلب أو أى شئ .
قلت لك في مداخلتي السابقة

Quote: الدنيا ضيقة في نفس الإجازة إلتقيت بالسمسار مصادفة في أحد المناسبات الإجتماعية

هذه المناسبة الإجتماعية كانت زواج إبن خالتي . استغربت وجوده سألت عنه عرفت أن الرجل قريبنا جداً وحضر معي من يعرفنا على بعض ففاجأنا بالقول
" يعني قايلني ما عارفو ؟؟ حرم عارفو من زمن كان شافع وبيلعب الكورة في الشارع لمن خلص الجامعة ولمن سافر بلاد برة . "
هنا قلت له
" لكين نحن لمن جيناك ما أديتني إحساس إنك بتعرفني "
رد بقنبلة
" أديك إحساس بشنو ؟؟ أقول ليك أنا في الحسبة خالك ؟؟ عشان لمن البيعة تتم تقوم تتنفض و ( تملحني ) وتقول لى والله يا خال ماقصرتا ؟؟ لييه قايلني عوير؟؟ "

ياخي شفتا اللعب دا كيف ؟؟

عاطف كيفنك
حمدا لله على السلامة
يا زول البلد بقت طلقيتة ساكت

Quote: عاطف كيفنك حمدا لله على السلامة يا زول البلد بقت طلقيتة ساكت

إن شاء الله تسلم يا طارق
غايتو أصحابنا ناس الإقتصاد زمان كانوا عاملين لينا فلقة بنظرياتهم بتاعت العرض والطلب وفائض القيمة وشنو كدا ما بعرفو . هسع يا ربي سودانا البنعرفوا دا ماشي بنظرية محددة ولاَ بس مركب على الله " محل ما تمسي ترسي "
حالة بالجد تحيِر

عاطف عمر تحياتي وإستمتعت جدا بمتابعة هذا الخيط
انته عارف السمسرة معروفة عالميا وشغلة نضيفة جدا
ولكن في السودان كل شي بيبدأ كويس وبيوسخ كالعادة
وبيدخل في النص "عالم لبط"

وحاليا كمان في موضة انو المحاميين يكونوا سماسرة
والتسويات المالية دي برضو جزء من السمسرة وله انا غلطان

عايز من زول خمسين مليون يقوم محامي بقدرة قادر
يقنعك بان المال تلتو ولاكتلتو ويقولك اجيبلك من الزول ده مثلا
30 مليون وتتنازل عن الباقي وانت اصلا حتستفيد شنو من سجنه
قااااعد مرطب في السجن والاكل يجيهو بالعمدان

وياخد منك وياخد من المدان والرزق يحب الخفية

تسلم

Quote: انته عارف السمسرة معروفة عالميا وشغلة نضيفة جدا ولكن في السودان كل شي بيبدأ كويس وبيوسخ كالعادة وبيدخل في النص "عالم لبط"

تحياتي أخي العزيز الطاهر
لا تتصور سعادتي باستمتاعك بما خط في هذا البوست . وسعيد أكثر بمداخلتك الغنية مع قصرها .
تمنيت ولا أزال أن يتداخل أحد زملائنا من أهل الإقتصاد ليشرح لنا الأصول العلمية ( للشغلانية ) . رأينا شركات الوساطة المالية ، عقد محدد الشروط به واجبات وحقوق . الـ brokers يقومون تقريباً نيابة عنك بكل شئ . وأنت تعرف لمن تدفع وكم تدفع . أما في نظامنا ( الفريد ) تروح تشتري خروف ضحية كما يقول أخونا أبو حراز فـ ( ينط ) لك خمسة ( شحوط ) مطالبين بما يسمونه حقوق في أسلوب أشبه بالتسول . أو أن تدفع للسمسار الذي يكون معك فيطالبك بدفع عمولة لآخرين كانوا يعملون خلف الستار أو يأتون بأنفسهم للمطالبة بـ ( حقوقهم )

Quote: وحاليا كمان في موضة انو المحاميين يكونوا سماسرة والتسويات المالية دي برضو جزء من السمسرة وله انا غلطان عايز من زول خمسين مليون يقوم محامي بقدرة قادر يقنعك بان المال تلتو ولاكتلتو ويقولك اجيبلك من الزول ده مثلا 30 مليون وتتنازل عن الباقي

كنت قد طلبت في متن البوست لو يفيدنا أهل القانون عن النظرة القانونية للممارسة التي أصبحت ( أمراً واقعاً ) لا مناص من التعامل معه . لكن أن يكون ( حماة القانون ) أنفسهم جزء من الممارسة فهذا ( واقع جديد ) لا حول ولا قوة معه إلا بالله العلي العلي العظيم .

عاطف يا حبيب..

سلامات ومليون حمد لله على السلامة..

السودان بلد المليون عجيبة..

ربي يكون في عون أهلنا الغلابة

Quote: سلامات ومليون حمد لله على السلامة.. السودان بلد المليون عجيبة.. ربي يكون في عون أهلنا الغلابة

تسلمي من كل سوء يا غالية الغالين رجاءنا العباسية
نعم سوداننا كذلك بلد للمليون عجيبة
ولولا تقديرنا لظرفك الذي لم يمكنك حتى من ( مد الشوق ) لأحبابك المنتظرين هناك على أنغام ساحر الموسيقى عزيزنا الموصلي ، لكنا قد قلنا لك ( وكلنا طمع وعشم ) إننا نطمح في مزيد من التشريح ووصف الدواء لعلل ذلك الجسد بعقلك الراجح وقلمك النزيه .

كوني دوماً بألف خير

مليون سمسار حمار

كنت اعمل مدير تصدير وعلاقات خارجية باحدى الشركات في الرياض

وقلنا في طفرة في السودان وفتحنا خط اتصالات
وبدت تلاستفسارات في الاول
رسلنا الفاكسات وعروض الاسعار
وبقينا نتابع بالتلفونات
ومافي فيد باك
في فاكس وفيه عرض سعر وقالوا عاجل جدا
وعملنا اللازم
المهم
نزلت السودان قلت اشوف الحاصل شنو
الحاجة الحيرتني انو اي واحد كنت مفتكر انه بزبزمان لقيتو سمسار
واول عبارة يقولها ليك ( حقي برة)
ما علينا
قالوا لي في رجل اعمال سوري وبده يقابلني وحددو لي الموعد والمكان
مشيت
جا الاخو وشايل السبحة بطريقة اهل الشام
بعد السلام والتعارف قال لي
خيوا
والله جانا فاكس من السعودية وعايزين نشتغلوا معاكم
استبشرت خير
طلبت منه الفاكس وناولني ليه
طلع هو نفس الفاكس الانا ارسلته لاحدى الشركات ومنتظر رد اكتر من 4 شهور
وفاكسيني بي سلامته حايم في السوق العربي ( حسدته)
اما اجمل سمسارات يا عاطف
في سوق الناقة
وديل double agentيعني يسمسروا لبتاع اللحمة وللمرة البتعمل الفطور
ما قابلوك؟
يكون اجازتك فشنك
مودتي

Quote: الحاجة الحيرتني انو اي واحد كنت مفتكر انه بزبزمان لقيتو سمسار واول عبارة يقولها ليك ( حقي برة)

يآآآآآآآه أخي محمد حسن
يا أخي إنت دخلت في الغريق
أحد الأصدقاء الخليجيين سمع هو الآخر بـ ( طفرة في السودان ) ، جهز مخططاته و دراسات الجدوى الإقتصادية لمشروع إسكاني كبير يخدم شريحة كبيرة من ذوي الدخل المتوسط ، أجرى إتصالاته وبحماس لا مثيل له حمل أوراقه ويمم وجهه صوب الخرطوم. رجع من هناك لاغياً للفكرة تماماً. مراعاة لمشاعري تمنَع في البدء من البوح بأسباب عدوله الحقيقية . بعد فترة من الزمن صارحني بالحقيقة الصادمة فقد قال والعهدة عليه أنه إلتقى الكثيرين ، لم يناقشه أحد في تفاصيل المخططات ، ولا في جدوى مشروعه الإقتصادية ولا في الخدمات التى يمكن أن يسهم بها كمستثمر في تطوير خدمات المنطقة التى سيقام عليها المشروع . كان جل إهتمام من إلتقاهم كم نسبتهم من الشغلانية ومع تجميع نسب من إلتقاهم توصل لحقيقة أن تكلفة المشروع قد تضاعفت ثلاث مرات مما يلغي ( عملياً ) دراسته التي أعدها والتي لم يفتحها هناك .

Quote: اما اجمل سمسارات يا عاطف في سوق الناقة وديل double agentيعني يسمسروا لبتاع اللحمة وللمرة البتعمل الفطور ما قابلوك؟ يكون اجازتك فشنك

والله يا محمد سوق الناقة من المعالم التي أرغب حقاً في زيارتها واستمتع بشوائها الذي سمعت عنه ما أسال اللعاب . لكن لحكمة يعلمها الجليل الرحيم لم يقيض لي زيارته حتى الآن . لكم يسعدني أن تكون أول زياراتي له برفقتك أيها الحبيب . أما عن أجمل سمساراته وكونها double agent فهي بذلك تكون قد جابت الموضوع من الآخر فكل السماسرة مزدوجي الولاء والحمد لله برضها أحسن من سماسرة أخونا أبو حراز .

في (سمسارات) يا حبيب و خاصة في قطاع الأراضي و البيوت!

معظمهن فى سجن النساء بام درمان
والله كنت فى زيارة لسجن ام درمان الاسبوع الماضى لحصر النساء الدخلن السجن بقضايا الاراضى والشيكات الطايرة لمساعدتهن من اهل الخير اللذين سخروا زكاة اموالهم لتفريج عن كرب النساء .
سجن ام درمان به اعداد خيالية من السمسارات اللذين خدعوهم زملاؤهم السماسرة التماسيح .
كمان والله فى سجينة بشيك بتمنمائة مليون جنيه 800,000000 و300 مليون دى عادى جدا
والله انا محتارة من اين نبدأ المساعدة كلهم ظروفهم قاسية واولادهم وبناتهم ما عندهم ذنب .
اخى عاطف موضوع السماسرة ده امشى فيهو الى ان يسمع المسؤوليين ويحاولوا ان تحل هذه المشكلة العويصة ..
نحياتى
ام وضاح

Quote: سجن ام درمان به اعداد خيالية من السمسارات اللذين خدعوهم زملاؤهم السماسرة التماسيح . كمان والله فى سجينة بشيك بتمنمائة مليون جنيه 800,000000 و300 مليون دى عادى جدا

أختي العزيزة أم وضاح
صباحك ندي وصافي يا صاحبة القلب الكبير .
شكراً جزيلاً لك وأنت تلقين إشارة صوفية لجانب مهم من المسألة . جانب مآلات الدخول في مجال دون الإستعداد الكافي للتعامل معه . إستعدادات تتمثل في التأهيل العلمي والخبرة العملية . هناك قاعدة ذهبية في دنيا المال هي أن يستثمر الإنسان في المجال الذي يفهم فيه .مهنة السمسرة بالكيفية التي تمارس بها تبدو في ظاهرها أنها مهنة من لا مهنة لها حيث لا مواصفات واضحة لممتهنيها، نضيف إلى ذلك عقلية التقليد أو ( العقلية القردية ) المتأصلة فينا نحن معشر السودانيين إذ يكفي أن ينجح إنسان ما في مشروع ما لنجد أن كل معارفه ومن يمتون له بصلة قد جربوا تنفيذ نفس المشروع غض النظر عن الفروقات الظرفية والموضوعية المحيطة بمشاريعهم والمشروع الأصلي والفروقات الشخصية بين شخصياتهم وشخصية صاحب المشروع . كل ذلك مع بعضه إضافة للأخلاق السيئة التي تنتج عن التنافس تفرز ضحايا . المرأة بحكم واقعها الإجتماعي حلقة ضعيفة لذلك كانت في السجون بالكيفية التي تفضلتي بشرحها لنا . ما قيل عن المرأة هنا يقال أيضاً عن بعض الرجال ( الغشيمين ) الذين ( يروحون في الرجلين ) بسبب بعض كبار ( الهوامير ) من السماسرة .
حماية لهؤلاء وأولئك لا بد إذن من تنظيم المهنة حماية لممتهنيها وحماية لمن يرغب في التعامل خلالها من الجمهور . في بلدان العالم المختلفة حتماً توجد تجارب يمكن الإسترشاد بها.

اخ عاطف..عساك بخير

Quote: لا فكاك من سطوتهم ، يفهمون في كل شئ ويفتون في كل شئ . لم يستطع الناس منهم فكاكاً

عاملين بالضبط ذي الفايروس وللأسف أثبتوا وجودهم بي طريقة السلب والنهب والحكاية مشت.
ديل ياكلوك وانت واقف وماشيين كمان بأمثال مهمة مواكبه لعصرنا الحالي....البقاء للأقوى ....القوي يأكل الضعيف...العنده قرش يساوي قرش وهلمّ جراّ...وحول بس يا أخ عاطف اشتري ليك عقار بي محاولة شخصية منك بس أصله ما بتلقى الا عن طريق أخوانّا السماسرة



كل التقدير

Quote: وللأسف أثبتوا وجودهم بي طريقة السلب والنهب والحكاية مشت.ديل ياكلوك وانت واقف

مراحب يا سلمى
ذهبت يوماً وشقيقي الأكبر لشراء بعض الخرفان من السوق لمناسبة زواج شقيقتنا . إخترنا الخرفان واتفقنا على السعر ودفعنا المبلغ للبائع . بعث البايع صبيه لإحضار عربة لتحميل الخرفان ، ونحن وقوفاً أتى أحد الأشخاص وسلم على وعلى شقيقي وحمداً لله على السلامة يا عاطف ومبارك مقدماً للبنية ورددت عليه السلام والمباركة . إلتفت للبايع وقال له إنت عاطف دا ما عرفتو ؟؟ رد عليه البايع كيفن ما بعرفو والبيعة زاتا تمت معاهو على أحسن ما يكون . أتت العربة وشحنا الخرفان ووصفنا للسائق المنزل. لاحظت أن صاحبنا يتبعنا لخارج الزريبة ، عندما ودعناه أفصح عن مقصده .
يا باشمهندس ين حقنا ؟؟
تملكتني الدهشة
" عفواً حق شنو ما أخدت بالي ؟؟ "
رد بثقة
" حق السمسرة ولا شغلكم في بلاد برة نساكم الأصول ؟؟"
رددت عليه
" ياخي معليش لكين إنت ما قمت بأى عمل سمسرة أو خلافو، إنتا لمن جيت أنا كنت خلصت البيعة ودفعت للبايع قروشو ""
أراد أن يرد لكن شقيقي الأكبر سحبه بعيداً ورأيته يدخل يده في جيبه ويعطيه بعض المال
إنتظرت حتى عودة شقيقي ، استفسرت منه ماذا أعطاه ومقابل ماذا أجاب بحكمة
" يا أخي الناس دي عالم لبط هسع يمشي يملأ سوق رفاعة كلام أنو عاطف أكل قروشي . وإنت بكرة عندك مناسبة ، قلنا نقفل خشمو ."

Quote: حق السمسرة ولا شغلكم في بلاد برة نساكم الأصول ؟؟"

شكلنا احنا الناسين!! أخ عاطف

....

Quote: والله فلان دا عاقل ، إستقال من وظيفتو ونزل السوق " وفي تخريمة جانبية كنت استعجب من تعبير ( نزل السوق ) فالنزول فعل يدلك على إنخفاض منسوب المكان الذي يأتي بعد الفعل .فهل هم يقصدون ذلك صدقاً ؟؟

الأخ العزيز
عاطف

دوما ما أحب مداخلاتك اللطيفة
و التي تعبر عن رجاحة العقل و إتزان الشخصية
هذا البوست أوضح الجانب الفكاهي (العالي) لديك
حقيقة, إستمتعت جدا بالبوست
و أتابع

كل الود
غادة

القريب عاطف

هذه السمسرة سبب جوهرى فى ثبات اعمارنا على شماعة الغربة دون التفكير فى العودة
مسمار كبير مدقوق على لياقة افئدتنا الرافضة للكذب بسبب الضمير ومعلقين مابين الرجوع لنحلف اليمين فى بضاعة دنوية ومابين الهجر الطويل المدى فى مدن المنفى ومساومة الذات .


...........


عاطف

كبارنا فى رفاعة ولوقت قريب يمنعونا الذهاب معهم بالبنطال والقميص لسوق المواشى لان هذه اول علامة لقنبلة السمسرة وفرد الشرك على المشترى (اذا شافونا بالبنطلون والقميص عرفو اننا مسطحين فى الشغلة )،لذا وجب لبس العراقى ووضع المبلغ بالداخل ثم لبس الجلابية وتشنيق الطاقية .

فقد ذهب ابن عمى بلبس الفرنجة وبيع له (نعجة) بدل خروف والغريبة جاى لينا مبسوط يظن فى قرارة نفسه انه انتصر فى الشراء,


تحياتى الطيبة

بابكر زيكو

يا زيكو انت من زمن السمسار بالجلابية والعمة ياخوى هسى السمسار اكتر اناقة من الفنان وما يفوت عليك الجنس اللطيف ذاتو دخل الشغلة يعنى لما ترجع السودان انت والاخ عاطف ما بقصر معاكم فى حق السمسرة اولاد حلة وكدا ومن هسى فكروا فى المشاريع
وفى سماسرة تخصص عرس لو عندكم النية فى الدبل ههههههههههه تحياتى واشواقى لكم وفاقدنكم والله

Quote: يا زيكو انت من زمن السمسار بالجلابية والعمة ياخوى هسى السمسار اكتر اناقة من الفنان وما يفوت عليك الجنس اللطيف ذاتو دخل الشغلة يعنى لما

نعيش نشوف يامواهب
بقيت اجى السودان (احس بانى طيرة ورويرة )
المرة الفاتت واحد من سماسرة العملة المحتالين فى ابوجنزير شال قروشى عينك ياتاجر ومشى
قال لى خليك هنا وجيب الريالات انا ببدلة ليك فى الدكان ده ، وتعلل بانو التاجر ماعاوز حد يعرفو
اتاريهو الدكان فيهو فتحة بالناحية التانية
جيت سالت بتاع الدكان
قال لى ياخوى ريالات شنو وزول منو انت جاى ترمى بلاويك فينا
مشيت شربت لى كركدى بااارد واستعوضت الله

Quote: لما ترجع السودان انت والاخ عاطف ما بقصر معاكم فى حق السمسرة اولاد حلة وكدا ومن هسى فكروا فى المشاريع

المرة دى حانجى نشوف الجنس اللطيف البسمسر ده كيف والعرس التانى ده كيف

سلام لكل الحلة

تحياتي يا مواهب
مشتاقون كثيراً

Quote: يعنى لما ترجع السودان انت والاخ عاطف ما بقصر معاكم فى حق السمسرة اولاد حلة وكدا ومن هسى فكروا فى المشاريع

دا كلام في منتهى الجمال، وزى العسل .

Quote: وفى سماسرة تخصص عرس لو عندكم النية فى الدبل ههههههههههه تحياتى واشواقى لكم وفاقدنكم والله

ودا كلام يمسح كلامك الجميل الزى العسل داك .
يعني كيف عاوزانا ندخل في مشاريع وفي نفس الوكت عاوزانا نقوم ( ندبِل )
هو نحنا الـ ( الفلسة ) الدخلت فينا من العرس الأول قايلاها مرقت ؟؟

Quote: مسمار كبير مدقوق على لياقة افئدتنا الرافضة للكذب بسبب الضمير ومعلقين مابين الرجوع لنحلف اليمين فى بضاعة دنوية ومابين الهجر الطويل المدى فى مدن المنفى مساومة الذات .

العزيز أبو الزيك
ما لك يا أخي تفتح الجروح التي أقنعنا النفس ( خداعاً ) أنها إندملت . قرار الخروج نتخذه ( لحد كبير ) بكامل إرادتنا،أما قرار العودة فدونه أطراف عدة كل طرف منها إمتلك ( حقاً أصيلاً ) في ثمار غربتك ولا بد إذاً من موافقتهم جميعاً . وهذا هو المستحيل بعينه .
كثيراً يا بابكر ما تلجمني حكمة كبارنا المعظمهم ( يا دوبك ) يفك الخط ، يعلمونك وببساطة متناهية ما عجزت المدرجات والمراجع عن تدريسه .

سعيد بوجودك هنا

Quote: دوما ما أحب مداخلاتك اللطيفة و التي تعبر عن رجاحة العقل و إتزان الشخصية هذا البوست أوضح الجانب الفكاهي (العالي) لديك حقيقة, إستمتعت جدا بالبوست

هسع يا غادة أقوم أصدق كلامك السمح دا ورأسي يكبر
باقي ليك سعدية دي ما إلا تأخد مواعيد عشان تتكلم معاى
وحقيقي سعيد للغاية أنك تتابعين البوست

Quote: شكلنا احنا الناسين!! أخ عاطف

عليك الله يا سلمى من الله خلقك شوفتي ليك إفتراء قدر دا ؟؟
إحنا برضو الطلعنا ما بنفهم في الأصول
كدي عليك الله اقري كلام حبيبنا زيكو وشوفي الزول دا ( ممغوس ) من الجماعة ديل قدر شنو ؟؟

طلبت منى ماما ثريا كما ينادينها السجينات ان اجرى معها مقابلة صحفية لكى تشرح للنساء ماذا حصل لها وكيف كان مصيرها السجن الا ما لا نهاية وعقوبتها كما رأيتها الحبس لحين السداد او الموت فكيف لها ان تسدد مبلغ ثمانمائة مليون يعنى مليار , ماما ثرياامضت الى الان عشرة سنوات بالسجن وكلهن امضن سنوات ولا وجيع لهن والسجن به المحاميات والمهندسة وصاحبة الماجستير فى الادارة كلهن مستوى من التعليم ولكن ضيعن مستقبلهن فى السمسرة . والاغلبية ضعن فى مسألة التواكيل لموبيتل ونصبوا عليهن الهوامير الكبار والشيكات كلها ياسمهن . وكما تقول امى لها الرحمة والمغفرة [ القلم ما بزيل البلم ]رأيك شنو فى العبارة دى ؟؟؟
قدمت يوم الاثنين الماضى اذن للمقدم اميرة مدير السجن لكى اجرى معهن حوار كامل واذا وافقوا سوف انشر لكم الموضوع فى المنبر ان شاء الله .

تحياتى لكل الاحباب المتداخلين ..
ولك اخى عاطف
ام وضاح

بس مليون ؟

Quote: بس مليون ؟

شفتا يا وليد ، أنا قلت مليون
أخونا أبو حراز قال عشرة مليون
لكين عليك الله شوف (المليون بس ) ديل ( توَكوا ) العالم كيف
طفشوا زيكو من السودان

Quote: طلبت منى ماما ثريا كما ينادينها السجينات ان اجرى معها مقابلة صحفية لكى تشرح للنساء ماذا حصل لها وكيف كان مصيرها السجن الا ما لا نهاية وعقوبتها كما رأيتها الحبس لحين السداد او الموت فكيف لها ان تسدد مبلغ ثمانمائة مليون يعنى مليار , ماما ثرياامضت الى الان عشرة سنوات بالسجن وكلهن امضن سنوات ولا وجيع لهن والسجن به المحاميات والمهندسة وصاحبة الماجستير فى الادارة كلهن مستوى من التعليم ولكن ضيعن مستقبلهن فى السمسرة .

التحية لك يا صاحبة القلب الكبير أختي أم وضاح وأنت تنتقلين بالموضوع نقلة عملية ، في محاولة لإنقاذ ما يمكن إنقاذه لمن تورطن في هذا المضمار ولدق ناقوس الخطر لمن هن/هم في بداية الطريق تسكرهن خمرة المكسب السريع الذي يأتي بلا مجهود حقيقي . أرجو من كل قلبي أن تكلل مساعيك بالنجاح لإجراء ذلك اللقاء .
ومنذ الآن كلنا آذان صاغية وأعين وقلوب مفتوحة في إنتظار هذا اللقاء

دمت في سلام

جينا بعد الفرقة نسأل

جينا نلقاااااا محنـّة عندَكْ ..
عزيزي عاطف ،،
ســــلامات ، وتحايا طيـّبة لكَ ولضيوفك الكِرام .. قرأتُ البوست، وعلى الرغم من اقتناعي بمدى الخراب الإقتصادي والاجتماعي الذي يُحدثه مليون سمسار بالسودان - وربما أكثر - ، إلاّ أنّي وجدتني أتهامس مع نفسي بهتافٍ داوٍ :
أرفــعوا أيديكم عن سماسرة الســـودان !
السماسرة ، يا أخوانّا، - ولستُ من كارِهمْ - نتاج سياسات اقتصادية عجفاء بفعل السياسة العاجزة في السـودان منذ زمن ، وهم كذلك، مظهر لاندراشـة دولة الأفندي الكانت مسنودة بخدمة مدنية سودانية " فائقة الجودة " من غير شهادات إيزو ! .. يقولون إن الإنجليز ، كانوا ضِمن تفاخرهم بمآثرهم في الدول التى استعمروها ، يلهجون بأياديهم البيضاء تلك التى أنجزتها كفاءة الرجل الأبيض في مسيرته للإرتقاء بالآخر المتخلـّف بحسب شعارهم المتمثل في : عبْ الرجل الأبيض White man burden والذي وظّفوه جيداً في مواجهة ثوّار التحرير الوطني وأنصارهم في البلدان المستعمـَـرة والمُستعمِرة على حدِّ سواء ؛ كانوا يقولون : أنّهم تركوا للسودانيين خدمة مدنيةتُضاهي ،إن لم تزد عن، الخدمة المدنية في الجُزُر البريطانية .. تلك الخدمة العامة بالسودان، وبصرف النظر عن تشكير شـكاّرتا، كانت بالفعل - كما يبدو لنا من واقع السِـجِـل التاريخي العام مكتوباًأومُتناقَلاً شفاهياً الترياق المُضاد لانتشار الأعمال الطُفَيلية من سمسرات وقوموسنجيـّات ووكلاء وكالات ووسطاء إلخ,,.

لقد هلـّت على السودانيين ، على حين غِرّة، دولة الرأسمالية الطفيلية ذات النمط الإستهلاكي الذي يفوق الإنتاج ولا يحفل بقوانين السوق الطبيعية ولا قوانين الإجتماع التى تحمي من الإنزلاق الى حمأة ذاك القول المايوي ، والمنسوب لأحد أباطرتها المَرحين! [ الغِنا غِنا .. والما غِنا يبعِد من هِنا! ] .. فاندفق الناس نحو السمسرة تلبيةً لذاك النداء المُريب ! وغيره من الدواعي والأسباب ، وابتعد البعض حيث انفجرت طامّة الإغتراب المتنامي في سبعينات القرن الماضي ، وضـَـعُـفَ المدد الإيجابي المُزوِّد لدولاب العمل بخبراتٍ وتجارب ، فزاد انبهام الحال ونمَتْ السمسرة من داخل مكاتب الخدمة العامة ثم اندفقتْ في السـوق اللّزج ، وزرائب الفحم والبهائم والغابات والزراعات وتجارة الشنطة و .. و.. و .. ولله الأمرُ من قبل ومن بعد .

السماسرة ، تزداد شـراهتهم لكسب المال عن طريق الفهلوة والدناءة والإتّكال على حُسنِ تأدُّب الآدبين والمُشترين من المُغتَربين الطيـِّبين ؛ ولا نجاءٌ من عماهة السمسرة ، إلاّ باستعدال القوانين الاقتصادية الحاكمة للنشاط ، بحيث تتيح مقار عمل نافعة للكثيرين من المتعطـِّلين والمُتَبطـلين بالسمسرة وغيرها من أدواء المجمتع الطُفيلي .



ودمتم بالمُحَـقَّق عن أجمل المُتَمـَـنَّى ..

نحنا سالمناك بطيبة
ياما ( أسعد قلوبنا ) ردك
أخي العزيز أبوجودة
كانت قد تثاقلت أصابعي فلم تشأ أن تنقر على الكيبورد كلمة ( فوق ) ، لحساسية تعتريني أن أفرض على الأعضاء موضوعاً رأوا أنه استنفذ غرضه فلم يعودوا راغبين في مزيد من التداخل فيه . أقنعت نفسي بأن ( إمكن نسى وإمكن قسى ) وتوكلت على واحد أحد ورفعته . طالعتني مداخلتك فأزالت من النفس حرجها . ذلك إن لم يكن من رفع البوست من فائدة سوى مداخلتك فانعم بها من فائدة . لن أقتبس منها فالإبداع لا يجزأ ، ولن أعلق على تفصيلاتها فأحرم القراء من متعة تذوقها فقد أتت كعهدنا بصاحبها ( لميض ) فيما يتحزم له، مجود لما يسنُ له اليراع . فما أسعد البوست بمداخلتك وما أسعدني بك .

كن دائماً بألف خير