Post: #1
Title: وأقول ليكم حاجة ?
Author: ست البنات
Date: 01-13-2005, 03:11 PM
Parent: #0
يا جماعة ،
العفو والعافية .
وفرصة سعيدة .
ست البنات .
|
Post: #2
Title: Re: وأقول ليكم حاجة ?
Author: waleed500
Date: 01-13-2005, 03:21 PM
Parent: #1
انتو الليلة مالكم كدى يا زولة قولى بسم الله
يادوب فضينا وانتى تقولى مع السلامة
|
Post: #3
Title: Re: وأقول ليكم حاجة ?
Author: هشام مدنى
Date: 01-13-2005, 03:26 PM
Parent: #1
Quote: يا جماعة ،
العفو والعافية .
وفرصة سعيدة
هشام مدنى |
|
Post: #4
Title: Re: وأقول ليكم حاجة ?
Author: عماد عثمان
Date: 01-13-2005, 03:35 PM
Parent: #1
لله .. والرسول
الله يقطيك ويضاريك
ويديك الصحى والعافى
وكل سنة وانت طيبى
أخيك / عماد كرنديس
|
Post: #5
Title: Re: وأقول ليكم حاجة ?
Author: خضر عطا المنان
Date: 01-13-2005, 06:11 PM
Parent: #4
وأقول ليكم حاجة ?
يا جماعة ،
العفو والعافية .
وفرصة سعيدة .
ست البنات .
دا شنو آ...... ستهن لاحدهن ؟؟؟.
قولي أي حاجة ونحنا نسمع الا حكاية الوداع دي .
واللقدابة دي تخليها لى منو ؟؟؟؟.
ومنو الغيرك بكفي الضيفان ديل ؟؟؟ .
ألحق يا عمي مامان ألحق !!!!!!!.
عووووووووووووووك يا أهل اللقدابا !!!!!!!!.
السلام يبراك محل تكوني .
والعافية تبقالك تقايي ووقايي .
وراجيك .. ومعاي كل ناس لقدابتك العامرة لاحدهن .
خضرعطا المنان
|
Post: #6
Title: Re: وأقول ليكم حاجة ?
Author: خضر عطا المنان
Date: 01-13-2005, 06:13 PM
Parent: #4
Quote: وأقول ليكم حاجة ?
يا جماعة ،
العفو والعافية .
وفرصة سعيدة .
ست البنات .
|
دا شنو آ...... ستهن لاحدهن ؟؟؟.
نحنا دخلنا هنا عشان نسمعك دايري
تقولي شنو .
قولي أي حاجة ونحنا نسمع الا حكاية الوداع دي .
واللقدابة دي تخليها لى منو ؟؟؟؟.
ومنو الغيرك بكفي الضيفان ديل ؟؟؟ .
ألحق يا عمي مامان ألحق !!!!!!!.
عووووووووووووووك يا أهل اللقدابا !!!!!!!!.
السلام يبراك محل تكوني .
والعافية تبقالك تقايي ووقايي .
وراجيك .. ومعاي كل ناس لقدابتك العامرة لاحدهن .
خضرعطا المنان
|
Post: #7
Title: Re: وأقول ليكم حاجة ?
Author: Muna Khugali
Date: 01-14-2005, 07:10 AM
تـمـشـي ويـن وعـليـكـي ديـن....
وبالمـصـري هيـة وكـالـة مـن غـير بواب...
وبالشايقـي...
انتـي مـاك نصـيحـي شـي? (ان بقيتي ماشـي)
تخـليني لـيمـنـو?
وضـيفـانيك الرايحـالـن بـلد ديـل يقـبلـوا وين?
القـراريص الـحـاري دي يلقـوهـا وين تـانـي مـع الونسـي الظـريفـي دي?
ألاقيـك بعـدين
خـيتك مـنـي
|
Post: #8
Title: Re: وأقول ليكم حاجة ?
Author: zola123
Date: 01-14-2005, 07:53 AM
Parent: #1
ست البنات واحلى واعقل البنات
كل زول هنا بكون اتشاكل ليه من 3 لي 10 شكلات
وبيزيد عدد الشكلات بطول المدة
وبما انك جديدة في البورد كان لزاما علينا ان نخبرك انها الحالة العامة هنا
لاكن مع ده في ناس حلوة كتير بتحب وبتقرا ليك وياريت ما تحرميهم من طلتك.
اختلفي واتشاكلي في حته, وتعالي اعملي كم بوست مشرقين ومزهرين يرجعوا ليك شيء من الهواء النقي اللي فقدتيه في مكان آخر.
بالمناسبة, انتي شكلتك كانت مع منو عشان فاتتني 
|
Post: #9
Title: Re: وأقول ليكم حاجة ?
Author: saif massad ali
Date: 01-14-2005, 08:23 AM
Parent: #8
ست البنات ليش ماشه وين تاني انا اناقر منو ؟ عشان شنو يا اختي تعلمت منك حاجة بس اقعدي شوية عشان اكلمك عن اهلي الهوسا والفلاتة وخالاتي الشايقيات , والله الزعل بشقني النص كان ما تميت شكلتي معاكي
|
Post: #10
Title: Re: وأقول ليكم حاجة ?
Author: غادة نصر
Date: 01-15-2005, 01:29 AM
Parent: #1
ست البنات
فرصة سعيدة دي شكلها كدة ذي المفرتكة مننا او ... الوداع ...الناس دي كلها بتودع ماشة وين ؟؟؟؟؟
تحياتي..... ولو في طريقة لي تعديل القرار ...كيفن يكونن البنات بدون ستهن ؟؟؟؟
غادة
|
Post: #11
Title: Re: وأقول ليكم حاجة ?
Author: ست البنات
Date: 01-15-2005, 09:05 AM
Parent: #1
سلام ,
شكرا اعزائى ,
والله انا حصل لى احباط من الحاصل هنا وكلكم شايفين !
وانا اصلى دخلت عليكم عشان محروقة حشا ! وقلت :
الحزن بى قربكم برحل بعيد
ويمكن الاقى مع الشقاء
غفلة زمن تبقالى عيد !
___
اها والبورد بقى سوق وحروب ! وانا يا ناس قلبى رهيف ومليانة أسية ! دحين ان بقيتو بتساعدونى اسوى معاكم جو أحسن , بقعد معاكم , واصلى بلاكم ببقى زول تائه !
وعشانكم , وعشان حبانى ديل ! قعدت معاكم !والساويها علينا الله بتبقى ! والموت مع الجماعة عرس !
ست البنات .
|
Post: #12
Title: Re: وأقول ليكم حاجة ?
Author: عبداللطيف خليل محمد على
Date: 01-15-2005, 09:15 AM
Parent: #11
بييييييي مهلك يا ست البنات ؛ و سوي الفى مزاجك و قولى الفى بالك و الناقص بنتم ..
|
Post: #13
Title: Re: وأقول ليكم حاجة ?
Author: معتصم الطاهر
Date: 01-15-2005, 12:25 PM
Parent: #1
وأقول ليك حاجة
بلاك خربانة ..
يعنى تمرق ستهن .. ونقعد لى شنو ..
نعم فى الكويسين ..
لو مرقوا واحد ورا واحد ..القاعدين ليها شنو ؟
|
Post: #14
Title: Re: وأقول ليكم حاجة ?
Author: ست البنات
Date: 01-15-2005, 01:14 PM
Parent: #1
اخوانى ,
عبد اللطيف , ومعتصم ,
والله لا مرقكون بى شيين شى !
وانا نان بلاكون ببقى ؟؟
انتو مو ياكون اخييانى و والبينيات ديل اخيياتى !
الله يجبر بى خاتركون ويغتيكون .
بس يانا نغدب , ونصفا , معا بعضنا !
بيقينا الاهل , والوطن لى بعضنا !
نان بخليكون بمشى شيقيش ؟
ست البنات .
|
Post: #15
Title: Re: وأقول ليكم حاجة ?
Author: shazaly gafar
Date: 01-15-2005, 01:41 PM
Parent: #14
أختى ست البنات
ساعة العصارى
الضُل يمد فوق الجروف
يكسى التبيسات بالطِّرَح
والغيم ينقِّط من دموعو
على الصفيقات كالسِبَح
عين الشمس تنزل خجيلانى
وتكوِّع بين شديرات البلح
وامونه تمسح من خديداته
وتكوِّن قوس قُزح
عبدالله محمد خير
انا معجب جداً يااخيتى بقلمك الأخضر
وكليماتك (الحنينى)زى وتر الطنبور (الحنين)بتعرفيهو؟-المقابل الخنصر-
واشعارك الكيزانية ديك
قولى يا رايعة
لا فُض فوك ولا نضب كوزك
كل المنى
شاذلى
|
Post: #16
Title: Re: وأقول ليكم حاجة ?
Author: ست البنات
Date: 01-15-2005, 02:38 PM
Parent: #1
شادلى أخوى ,
ضو القبايل الماك هيين !
نان الليلى الشى الانت كاتبو دا دحين ساهل ؟؟
جبت القساسييب وضل الضحى !
ويمشوا البوطان جنب البوقل!
عاشة انهريهون لا يوتبوا
ولا يمرضو !
الحوكما ويين ؟
الادوى ويين ؟
----
يعجبك سمحك آآ عشاى , مقنع غوتاى !
ويعجبك عديلك وزيينك !
---
يا حيليل الناس الختولنا النضم السمح ومشوا فاتونا !
ويين تانى نلقاهون عاد ؟؟
مو مغاييس وانزرعتلنا !!
ست البنات.
|
Post: #17
Title: Re: وأقول ليكم حاجة ?
Author: shazaly gafar
Date: 01-15-2005, 04:30 PM
Parent: #16
تسلمى يا اخيتى من كل بلية
عيلا النشكى لِكْ البورداب ديل
مبورين لى بوستاتى...ديك يا المواضيع والقصص
والقصايد المى خمج حللللللللللللوه زى المشرق
احسن لى براى اشكِّرا
نان يا يمه لى ونسه ولى قلة ادب شعر بالفصيح والعامى الفصيح
فى ضمتِّك آ ستنا ده موضوع يبوروه لىالفيديو كليب فى عالم الطنبور والدليب
البوره التاخدن انشاءالله
بركة من صلى وقال يا الله
وداعة الله عند الرسول
شاذلى
|
Post: #18
Title: Re: وأقول ليكم حاجة ?
Author: أحمد الشايقي
Date: 01-16-2005, 06:12 AM
Parent: #1
ستهــن
لا تكوني رايحــة
نمشي وراك
|
|