Post: #1
Title: الحسرة !
Author: ست البنات
Date: 08-07-2005, 07:44 AM
سفرك كان بلا اشعار
وكتفك خالى من نيشان
ومنتظرين حلمنا الطال
حفاة
وعراة
وشماسة
وسجين كل يوم يصابحو سؤال
وناس عشمانة فى الأوبة
تعود ترجع
وتعيش فى ضل ضحاها الزال
وسفرك طال
وضاع مشوار عمر أخضر
قضيتو نضال
تشق غابة
ووراها جبال
كان جيعان
وأكان عطشان
أكان حفيان
وكان لابس
صبرت ونلت للسودان
وساعة جيت تحصد الخير
بقينا نشوف أملنا طشاش
وما شفناك يا سوميتة الجرتق
وما حضر العرس فنان
وما غنن بنات الحى
زعاريد ميرى ما انسمعت
ولا دق النحاس والطار
نحنا اصلنا ماب نسعد
ولاب ينتم لينا حلو
عد ما جانا زول مبروك
يفوت يرحل بلا انذار !!!
عد ما جانا زول مبروك
يفوت يرحل بلا انذار !!
ست البنات .
|
Post: #2
Title: Re: الحسرة !
Author: لؤى
Date: 08-08-2005, 01:55 AM
Parent: #1
الأخت ست البنات
تحاياي
هي بالفعل حسرة .. كلمات معبّرة وصادقة .
صادق مواساتي
ـــــ
انا في البعيد مشتاق لهمسة من الوطن يانسمة
[email protected]
|
Post: #3
Title: Re: الحسرة !
Author: نادية عثمان
Date: 08-08-2005, 06:10 AM
Parent: #2
Quote: نحنا اصلنا ماب نسعد
ولاب ينتم لينا حلو
عد ما جانا زول مبروك
يفوت يرحل بلا انذار !!!
عد ما جانا زول مبروك
يفوت يرحل بلا انذار !! |
منو القال وطنى زول منحوس
وطن مصرور وشيهو عبوس
وطنى النور بيضوى شموس
عريس ومهيرة ليهو عروس
|
Post: #4
Title: Re: الحسرة !
Author: منصوري
Date: 08-08-2005, 09:12 AM
Parent: #1
نعم يا ست البنات هى الحسرة..لقد دخل جون قرنق حلقة السلام محباً للسلام. ولكن في الله عنه عوض وما ذلك على الله بعزيز...
|
|