شكراً جزيلاً...................

Quote: الاخ الفاضل بكرى ابوبكر السلام عليكم ورحمة الله تعالى وبركاته ارسل رسالتى هذه واتمنى ان تجدك بخير انت والأسرة الكريمة اخى بكرى انا إبراهيم عوض الذى ارسلت لك الرسالة وانا قادم من السودان الى امريكا طالباً المساعدة من احد الاخوة المقيمين فى أمريكا ولم يخب ظنى. فى نفس مواعيد خروجى من المطار قابلنى ابن البلد الأصيل والشهم عضو البورد نصر الدين صلاح وماقام به تجاهى اعجز عن كتابته ههنا لكى لا افسد أجره ومازالت جمايل نصر الدين متواصلة معى فهلا شكرته معى. ولك جزيل شكرى يا اخ بكرى ولكل الاعضاء و لسودانيز اونلاين تعظيم سلام ونتمنى لكم التوفيق والسداد ... ابراهيم عوض عمر

شكرا نصلا الدين
انك ما قصرت مع اخوك ابراهيم

ويا ابراهيم اقامه موفقه باذن الله.


وشكرا لبكري ابو بكر الذي جعل هذا ممكنا.

دي المحرية في نصر الدين و في كل سوداني ..

ربنا يوفقكم جميعاً ..

الحمد لله علي هذه النعمة .. يكفي هذا الموقع وبكري ابوبكر اذا توقف عن العلاقات الاجتماعية
التي ربطت الاعضاء ببعضهم وكاسرة واحدة وكبورداب في كل مكان .. وهذا مثال للحب الكبير الذي
يحمله الاعضاء لبعضهم ولاخوانهم في كل السودان .. فعلا اسم يحمل كل معاني الحب والاخاء ..شكرا
الاخ نصر الدين وشكرا ابراهيم .. .. وكل الشكر للاخ الفاضل بكري ابوبكر

ياهو دا السودان

يا هو دا السودان

مساعدة عاجلة مع شكرى ... يا سودانى نيويورك

Quote: الملف الشخصي ل نصرالدين صلاح اللقب: نصرالدين صلاح : . عدد البوستات: 60 تاريخ التسجيل: 01-09-2009 محل الاقامة: new york - usa : عنوان مكتبتى بسودانيزاونلاين دوت كم : اكلات مفضلة: الاسم الحقيقى: نصرالدين صلاح التلفون: الجامعة/المعهد: الحالة الاجتماعية: Single العنوان الدائم: الفنان المفضل: اللون السياسى: النوع: Male الهوايات المفضلة: الوظيفة: تاريخ الميلاد: درست المرحلة الابتدائية فى ......و سنة....: درست المرحلة الثانوية فى ......و سنة....: درست المرحلة المتوسطة فى ......و سنة....: شاعرك المفضل: عدد الاطفال: معلومات اضافية: مكان العمل: مكان الميلاد فى السودان: صورتى:

شكراً جزيلاً يا نصر الدين يا ود البلد الأصيل، والله يكتر من أمثالك يا راجل يا صحراوي، واللي زيك ديل فى الغربة إنعدموا

اصالة

بارك الله في هذه الخصلة الطيبة وحماها من الزوال
هي ما تبقت لنا وسط الاحباطات الكثيرة
شكرا لمنبرنا العامر بأمثال نصر الدين
ولعشم الاخ الكريم في بكري اخوانه

ومرة أخري ..
تثبت سودانيز أون لاين أنها قبيلة ..
ووطن كبير،،

شكرا يا نصر الدين,,,, ويا بكري والله ما شفت البوست لكن الاخوان ما بقصروا.


ومرحب بكل الاخوان في نيويورك

ودا البخلي الزول يصبر على قرف البورد

انا افتكرتابكري عايز يستقيل


بكري بسملة منتظرة باسوردك...

التحية للأخ : نصر الدين , ولسيد الحوش
الباشمهندس : بكري أبوبكر ...

يا هو دا السودان

فعلا هذا المنبر هو السودان في توادده وتواصله وتراحمه لك عظيم الأمتنان نصرالدين صلاح وكل طيورنا المهاجرة تحية ومن قبل لسيد الحوش الكبير الذي جعل هذا ممكناً.

،،،،أبوقصي،،،،

الشكر كل الشكر للخالق عز وجل

الذي وفق الباش مهندس بكري أبو بكر لإنشاء هذا الموقع

ثم الشكر للباش مهندس بكري أبو بكر الذي أتاح لنا هذه الفرصة للتواصل

ثم الشكر للأخ نصر الدين الذي قام بواجبه السوداني وأظهر كرمه وطباعه السودانية الأصيلة

ثم الشكر لجميع الأعضاء والقراء

شكراً جزيلاً يا نصر الدين يا ود البلد الأصيل، والله يكتر من أمثالك، واللي زيك ديل فى الغربة إنعدموا. وجزاك الله خيرآ...

راشد

شكراً للكل

شكرا للجميع ,,

قال الشاعر:
إذا أنت صاحبت الرجال فكن فتى *** كأنك ممـلوك لكل صديـق
وكن مثل طعم الماء رطباً و بـارداً *** على الكبد الحرى لكل رفيق

وليس أخـي من ودني بلسانه ’’,,’’ ولكنْ أخي من ودّني في النوائبِ
ومَن مالُهُ مالي إذا كنتُ معدَمًا ’’,,’’ ومالي له إن عضّ دهـرٌ بغاربِ
===
اِستكثرنّ مـن الإخـوان إنهُمُ ’’,,’’ خيرٌ لكانزهم كنزا من الذهبِ
كم من أخٍ لك لو نابتْكَ نائبةٌ ’’,,’’ وجدْته لك خيرا من أخِ النسب
===
أخوك الذي يحميك في الغيب جاهدا ’’,,’’ ويستر ما تأتي من السوء والقبح
وينشر ما يُرضيك في الناس معلِنـا ’’,,’’ ويُغضي ولا يألوا من البر والنصح
===
لعمرك ما شيء من العيش كله ’’,,’’ أقر لعيني من صديـق موافقِ
وكل صديق ليس في الله وُدُّه ’’,,’’ فإني بـه في وُدّه غـير واثـقِ
صفيِّي من الإخوان كلُّ موافقٍ ’’,,’’ صبورٍ على ما نابَ عند الحقائقِ

ربنا يديم الود بين الجميع ...

ابراهيم عوض !!

انت ما داير تدفع ؟؟ ولا شنو شكرا دى !!
لووووووووووووول .










ــــــــــــــــــــ
اها يا بكرى دا جايى من السودان عرفناه ..
انت شكرا بتاعتك دى شنو ؟ عامل رايح ؟
ادفع ادفع ... مافى حاجه اسمها شكرا يا اولاد
كامل التضامن مع نصر الدين ,,,

وردة محبة
الى
الأصيل
نصرالدين

شكرآ الباشمهندس بكر..شكرآ اخى نصرالدين...وهذا من شيم الكرام..

Quote: Quote: الاخ الفاضل بكرى ابوبكر السلام عليكم ورحمة الله تعالى وبركاته ارسل رسالتى هذه واتمنى ان تجدك بخير انت والأسرة الكريمة اخى بكرى انا إبراهيم عوض الذى ارسلت لك الرسالة وانا قادم من السودان الى امريكا طالباً المساعدة من احد الاخوة المقيمين فى أمريكا ولم يخب ظنى. فى نفس مواعيد خروجى من المطار قابلنى ابن البلد الأصيل والشهم عضو البورد نصر الدين صلاح وماقام به تجاهى اعجز عن كتابته ههنا لكى لا افسد أجره ومازالت جمايل نصر الدين متواصلة معى فهلا شكرته معى. ولك جزيل شكرى يا اخ بكرى ولكل الاعضاء و لسودانيز اونلاين تعظيم سلام ونتمنى لكم التوفيق والسداد ... ابراهيم عوض عمر

ولمثل هذه ألأشياء الجميلة...نحن هنا..والله ولى التوفيق....

إشـراقـات ســودانيـة

إشـراقـات ســودانيـة

التحية للاخ نصرالدين الذى قام بالواجب وهكذا اهل السودان ........... وهاكم الواقعة الحقيقية دى
...... وانا خريج حديث من الجامعة ذهبت فى رحلة الى نيروبى فى كينيا وتعرضت لموقف لا انساه لم ينقذنى منه الا شهامة السودانيين .......
واحد كينى عينى عينك خطف من يدى مبلغ 100 دولار واختفى فى الزحام ........ تانى يوم وفى نفس المنطقة قابلت غريمى الذى لا تخطئه العين وانا اشعر بالغبن والحمق حتى اننى لم احكى الواقعة لقريبى السودانى الذى كان معى ....... امسكت بالكينى ولويت له زراعه من خلف ..... وقريبى السودانى محتار فى الموقف وكان اعلم منى بفنيات السفر وخطورة نيروبى ...... وهو يصيح بى ان اتركه والا سيقتلونى ........ وانا فى تلك اللحظة تملكتنى قوة خارقة وعناد عجيب ...... تحلقت حولى بقية العصابة وادعو انهم من الامن الكينى ..... وحاولوا تخليصه فلم ينجحوا ابدا .... وبداؤ فى ضربى حتى سقطت ارضا وانا لا زلت ممسكا بغريمى ...... ولا ادرى الى اين تسير الامور ..... علما بان رجل شرطة كينى كان بالقرب منا وكان الامر لا يعنيه ..... وانا فى قمة تلك الماساة اسمع اصوات سودانيين من حولى (( خلاص فكو لينا )) وانا بين مصدق ومكذب ...... تعرفو الحصل شنو ؟...... بالصدفة المحضة هذه الاحداث دارت امام فندق كان ينزل فيه فريق المريخ لاداء مباراة امام فريق كينى ..... وتصادف ان كان ستة من لاعبى المريخ ببدلة التدريب امام الفندق ....اذكر منهم كمال عبدالغنى وعاطف القوز والنجم رقم 5 بدر الدين بخيت الذى قام باستلام الكينى منى وواسعه ضربا ولكما بعد هروب بقية العصابة ...... وواسعه بدرالدين ضربا امامى حتى سالت منه الدماء وتمزق قميصه ........ الطريف فى الموضوع انه بدرالدين بخيت والكينى دماؤه تنزف جاء جوارى وسالنى (( الزول دا مالو..... عمل شنو ؟؟؟))
التحية لبدرين بخيت ولرفاقه الميامين الشجعان ولفريق المريخ جمعيه .......... علما اننى هلالابى على السكين
بالمناسبة بدرالدين بخيت حتى الان لا يعلم سبب هذه الشكلة ........ بالله لو واحد منكم قابله يعيد ليه الموقف ويخبره ان السبب كان 100 دولار مخطوفة
وهكذا هو شعبى ...........

Quote: اخى بكرى انا من الذين حالفهم الحظ بالفوز باللوترى عبر منتداكم هذا وبواسطة الاخ الفاضل الخير محمد عوض له منى جزيل الشكر والتقدير وبإذن الله سوف اكون فى نيويورك يوم الاربعا 30/9/2009 الساعة الثالثة ظهراً بتوقيت نيو يورك عبر طيران القطرية رحلة رقم 083 ولعدم معرفتى بالبلد فالرجاء المساعدة منكم على ان ينتظرنى احد بالمطار ارجو منك ان تساعدنى فى ذلك وتنزل هذا النداء فى موقعكم العامر واعرف انك لن تقصر ولك جزيل الشكر والتقدير ابراهيم عوض عمر

يا سلام ياخي والله حوشنا دا اريتو حوش الهنا وبالمناسبة اخونا ابراهيم دا زول نبيل وكريم وشهم
وفي مبتدأ حياته الزوجية يعني مدامو رجلها خضراء عليهو وهو الان في ولاية نورث كارولاينا وقد ارسلت
له البطاقة الخضراء ( القرين كارد) قبل فترة وهو الان مستقر واستلم عمله ورسل ابو الجورج للحاجة
ودا كلو بفضل مساعدتكم انتو يا ناس نيو يورك الله يديكم العافية والما معرس فيكم السنة الجاية اريتو
بحال تمبس ههههههههههههه ... خمسة وخميسة

شكراالاخ نصر الدين
وشكراالاخ ابراهيم واقامة طيبة في بلاد انكل توم

وكل الشكر للاخ الباشمهندس بكري ابوبكر

وسودانيز اونلاين فوق دايما

شكرا نصرالدين

هكذا هم السودانيون اينما ذهبوا (وا اسفاى لو ما جيت من ذى ديل )

لك التحية والشكر اخي نصرالدين

الشكر لك اخي بكري لجعل ذلك ممكنا

والشكر لك اخي ابراهيم فهذا يدل

على اصالتك

تحياتي واحترامي

الف شكر لكم جميعا...

هذا مايتميز به اهل الحوش جميعا..

............... هكذا السودان .
مرة واحد حكى انه فى سودانى فى السعودية اضطرته الظروف للدخول الى مستشفى عام ولم يكن معه مرافق ..... وطلبو منه احضار دواء لم يكن متوفرا بالمستشفى ..... واثناء الزيارة نادى السودانى على شاب سعودى جاء لزياة قريبه فى نفس العنبر الذى فيه السودانى ....وسلمه الروشته وطلب منه انه بمجرد خروجه من الباب ويقابل اول زول سودانى ويعطيه الروشتة ويذكر له رقم الغرفة والسرير ...... فلم يستوعب السعودى ذلك ... ولكنه فى النهاية رضخ لرغبة السودانى ... وبالفعل حال خروجه قابل اول زول سودانى وحكى له ما قاله المريض السودانى وانصرف .... وبعد يومين جاء السعودى لزياره قريبه مرة اخرى .... وتوجه بالسؤال للسودانى وهل وصله الدواء؟ فاجابه المريض السودانى بالايجاب والسعودى بين مصدق ومكذب ... وكان تعليقه (( والله انتو السودانيين عجيبين .... ))
ولذلك اثناء احداث مباراة الجزائر و مصر ادعى احد المصريين ان عدة بنات تعرضن للهجوم من بعض الجزائريين واضطررن بصوت عالى لخبط بيت احد السودانيين الذى رفض ان يفتح لهن .... ومثل هذه الواقعة لا تشبه السودانيين على الاطلاق ولا تنسجم مع طبعهم فى مثل هذه المواقف
ودمتم

الاخ الباشمهندس بكري

الاخوه والاخوات المتداخلون

لي يومين و انا احاحي حول البوست و ما عارف اقول شنو

فحقيقي احس بالخجل من كلماتكم الطيبه و لم افعل الا قليل جدا

فما حدث هو فعل سوداني بحت من الجميع

ابراهيم لم يقابل و لا يعرف الاخ الخير عنما قدم له اللوتري

و ابراهيم لم يقابل و لا يعرف الاخ بكري ابو بكر عندما بعث برسالته الاولي طلبا للمساعده

و ابراهيم لا يعرفني الا بعد ان قابلته في نيويورك يومها


انا احس ان الشكر لبكري ابو بكر هو المستحق

ما الهدف من سودانيز اونلاين و لماذا نحن هنا


فلمثل هذا نحن هنا


نصر الدين

إنتصار القيَم السودانية الأصيلة...

شكرا نصر الدين...

شكرا بكري

شكرا الحلفايا

شكرا السودان...

شكراً جزيلاً...................

اعظم الامنيات تاتئ من قلب نظيف.......

لا يفهم لغة غير لغة السودان الجميل.....جمالها......التى جعلت منا......

اخوات واخوان.....احباب.....

نتواصل....نختلف....ثم نآتلف...بغير ضغينة أو حقد.......

نعم شكراً جزيلاً لسودانيز اونلاين التى اعطتنا السلام....و فوق كل ذلك تصالح مع النفس.....و النفوس شواهد

اخى ابراهيم عوض عمر....اتمنى لك كل التوفيق ... وانت تمتد الى الشتات....ثم تبقى إلفة....هنا.....

اما ذلك الاصيل ....صحة و عافية.....فاجره عند من لا تختلف موازينه.....الى....الاصيل نصرالدين...لك كل الاحترام و انت تمثل اعظم سفراء بلادى...

كل عام و سودانيزونلاين....وكل السودان فى اجمل صورة...يمكن ان نحلمها......

شكراً جزيلاً...................

صديق القاعد بعيد

التحية للأخ نصرالدين ومن قبل للأخ الكريم بكرى أبوبكر
والتحية لكل المتداخلين
والله لقد شعرت بإعزاز وفخر لأنى سودانى فنحن شعب متفرد
وكم سعدت بعد ما قرأت ماخطة د.امام الصديق عبد المعطى
نسأل الله أن يحفظ السودان وشعب السودان وأن يجمعنا بعدما تفرق شملنا
فنحن شعب أكبر من أن نعيش فى إختلاف وحروب

أنا ســـــــــــوداني أنا

ســـــــــودانا أنا

شكراً جزيل لنصر الدين صلاح إذ عكست وجها مشرقاً

شكرا للأخ إبراهيم عوض عمر إذ توسمت خيرا في أعضاء سودانيزاونلاين وماخاب ظنك

شكرا بكري صاحب الحوش الكبير إذ جعلت ذلك ممكن

وكما قال حبيبنا إسماعيل عباس

Quote: ولمثل هذه ألأشياء الجميلة...نحن هنا ..والله ولى التوفيق....

تحياتي للجميع

Quote: فعلا هذا المنبر هو السودان في توادده وتواصله وتراحمه لك عظيم الأمتنان نصرالدين صلاح وكل طيورنا المهاجرة تحية ومن قبل لسيد الحوش الكبير الذي جعل هذا ممكناً.

دا السودان
ود الحوش الكبير واهل الحوش

كل يوم فى جديد عشان كدة نحن مواصلين

أنا سوداني أنا ........ انا سوداني أنا..
كل أجزاءه لنا وطن إذ نباهي به ونفتتن
نتغنى بحسنه أبداً دونه لا يروقنا حسن
حيث كنا حدت بنا ذِكر ملؤها الشوق كلنا فداه
نتمنى جماله لنرى هل لتقييم عيشه ثمن
غير هذه الدماء نبذلها كالفدائي حين يمتحن
بسخاء بجرأة بقوى لا يلين جدها ولا تهن
تستهين الخطوب عن جلد سكة الهانوا وهي تتزن
.........................................
أيها الناس نحن من نفر عمّروا الأرض حيث ما قَطَنوا
يذكر المجد كلما ذكروا وهو يعتز حين يقترن
حكموا العدل في الورى زمناً يا ترى هل يعد ذا الزمن
ردد الدهر حسن سيرتهم ما بها حطّة ولا درن
نزحوا لا ليظلموا أحداً لا ولا لاضطهاد مَن أَمِنوا
وكثيرون في صدورهم تتنزل الأحقاد والإحن
دوحة العُرْب أصلها كرمٌ وإلى العُرْب تُنسَبُ الفِطَنُ
أيقظ الدهر بينهم فتناً وكم أفنت الورى الفتن
................................
يا بلادي
يا بلاداً حوت مآثرنا كالفراديس فيضها منن
قد جرى النيل في أباطحها يكفل العيش وهي تحتضن
رقصت تلكم الرياض له وتثنت غصونها اللدن
وتغني هزارها فرحاً كعشوق حدا به الشجن
حفل الشيب والشباب معاً وبتقديسك القمين علو
نحن بالروح للسودان فداء فلتدم أنت أيها الوطن..
نحن بالروح للسودان فداء فلتدم أنت أيها الوطن..
نحن بالروح للسودان فداء فلتدم أنت أيها الوطن..
.......................................

ما ديل نحن

تخيل كيف يكون الحال لو ما كنت سودانى و أهل الحارة ما أهلى

الشكر اجزله للأخ نصر الدين و للأخ ابراهيم الذى تعشم خيرآ فى أهله فلم يخذلوه و لك أخى بكرى من الشكر أجزله
وأنت تقود دفة هذا المكان ليعكس الوجه المشرق للسودان و السودانيين

ألف شكر يا نصر ... لقد انتصرت للأصالة السودانية.

يا باشمهندس بكري التحية لك وأنت تدير هذا الموقع الفريد ببراعة فائقة.

تحياتي للجميع

الاخ نصرالدين صلاح
الاخ الباشمهندس بكري

Quote: التحية للأخ نصرالدين ومن قبل للأخ الكريم بكرى أبوبكر

و اللـة بكيتونى

نصر الدين قوم لف...

ويا بكـري بالله عليك ما تبوظ لينا شبابنا النيويوركي الهميم ده
تعرف لو كل واحد فتحتا ليهو بوست... حرم تقعد تأرشف كل أسبوع من الزحمة

وحمدالله على سلامتك يا أبراهيم عوض... وإنشاء الله يطيب ليك المقام


عاشت سودانيتكم... وحبابكم عشـرة

Quote: ابن البلد الأصيل والشهم عضو البورد نصر الدين صلاح

شكرا لك يا ابن بلادي

في كل بلاد سوالو أولاد.. هذا حال سودانيز أونلاين

..
..
شكراً بكري أبو بكر الذي جعلت هذا ممكناً والتحية عبرك للأخ نصر الدين.،

كتب السوداني الأصيل د. إمام:

Quote: واضطررن بصوت عالى لخبط بيت احد السودانيين الذى رفض ان يفتح لهن .... ومثل هذه الواقعة لا تشبه السودانيين على الاطلاق ولا تنسجم مع طبعهم فى مثل هذه المواقف

الدكتور إمام
تحية طيبة

وشكراً على حكاويك عن أصالة السودانيين، مع اتفاقي التام حول أن هذه التصرفات لاتشبه الشعب السوداني العظيم،
إلا أنني أختلف معك بأنها قد تحدث، فمازالت عالقة بنفسي ذكرى مريرة قد عايشتها عن سوء وخزلان بعض السودانيين
ولا زلت مندهشاً منها حتى الآن.

الحادثة وقعت لي عندما كنتُ طفلاً فى حوالي الرابعة عشر من عمري، إبان فيضانات 1988 فقد ذهبتُ مع خالي لزيارة
قصيرة للشمالية، وعند عودتنا بقطار كريمة داهمتنا الأمطار بمنطقة تسمى العابدية على بعد حوالي 30 كيلومتر
شمال مدينة بربر، وقد جرفت الأمطار قضبان السكة الحديدية، فاضطررنا للنزول عند العابدية، ثم المشي سيراً
على الأقدام والسباحة فى مياه الأمطار الهائلة، المهم، قد بقينا بداخل القطار ريثما تتوقف الأمطار ومن ثم
التوجه إلى مدينة بربر، وعندما توقفت الأمطار تماماً توجهنا مباشرةً لدكاكين منطقة العابدية لشراء شيء نأكله
أو نشربه، فللأسف وجدنا أن ركاب القطار قد قضوا على الأخضر واليابس فيها وجعلوها خاوية على عروشها، وحتى الشعيرية
والمكرونة والأزر رأيتهم يأكلونها بدون طهي، فلم يتبق بداخل الدكانين سوى الصابون و ليف العدة، وكل مايؤكل
قد قام ركاب القطار بشراؤه، ولم نجد شيئاً نأكله أو نشربه.

المأساة (فى العابدية):
توجهنا من فورنا لأقرب المنازل، لنسألهم شربة ماء، فعلى الرغم من تضورنا جوعاً إلا أننا استحيينا أن نسأل عن طعام، وتخيل
المأساة، والله العظيم والله العظيم، وجدنا بعض سكان تلك المنطقة،واقفين على أبواب منازلهم وشاهرين أسلحتهم البيضاء
من عكاكيز وسيوف وسكاكين، لصد ركاب القطار من الدخول إليها، والله كان منظر تعيس وأنا خجلتا ليهم، وقلتا معقولة يكونوا
ديل سوادنيين؟! والله هذا ما حصل. قلنا لابأس سنتجه فوراً إلى مدينة بربر، مع هذا الجوع وخصوصاً أن الجوع يشتد عند الإنسان
عند هطول الأمطار، وقد تغلبنا على العطش بشراب مياه الأمطار، والمأساة الأخرى وجدنا بعض سكان هذه البلدة - التى ظالم أهلها-
يبيعون التمر الأخضر للمارة وبأسعار غالية، على الرغم من أنه لا يغني ولايسمن من جوع (وبعمل حيرقان) المهم، قلت لهم تباً لكم،
وأفٌ لكم ولما تعملون، ولقد جئتم بشيءٍ إداً تكاد السماء أن تنفطر وتنهد الجبال هداً، وواصلنا المسير صوب مدينة بربر.

الكرم الحاتمي الأصيل (فى مدينة بربر):
تحركنا فى حوالي الساعة السادسة صباحاً إلى مدينة بربر، ولم يكن قطع مسافة 30 كيلومتر مشياً بالأقدام بالشيء الهين وخصوصاً
مع وعورة الطريق، ومياه الفيضانات، والعقارب والثعابين والفئران التى خرجت من جحورها خوفاً من الغرق، والتى هبطت على الركاب
كأنها المن والسلوى، فقد شاهدت البعض يأكلها، ولكني لم أفعل، المهم قد أضررنا للسباحة فى معظم الأحيان إلى أن وصلنا مدينة
بربر العامرة، عند السادسة مساءً (أي حوالي 12 ساعة من السير بلا توقف) فهى مدينة ضخمة مقارنة مع منطقة العابدية. فقلتُ لخالي:
الحمد لله بأننا وصلنا أول الفوج، فيمكننا تناول الطعام فى أحد مطاعم هذه المدينة العامرة، وتلافي شر سؤال الناس وعدم تعرض أنفسنا
للإحراج مرة أخرى كما حدث معنا فى العابدية، ولم نكن ساعتئذٍ نتوسم خيراً فى هؤلاء الناس.

فكم كانت دهشتي بالغة عندما رأيت سكان بربر والله النساء قبل الرجال يهرعون إلينا ومناشدتنا بتناول الطعام معهم! والله موقف مؤثر
لا أنساه لهم ما دمتُ حياً، فقد قاموا بفرش جميع طرقات المدينة المتاخمة لخط السكة حديد بالسجادات والبروش كأنه إفطار رمضان،
وقد ذبحوا لنا الذبائح، فقد كانوا على النقيض تماماً عن سكان العابدية على الرغم من أن المسافة التى تفصل بينهم بضع كيلومترات!
ونزلنا على موائدهم لاهطين، وبعدما شبعنا قلنا الحمد لله الذى أنجانا من القوم الظالمين، وسخر لنا سكان بربر الطيبين الأكرمين، والتحية
والقومة لهم فى الأولين والآخرين، والحمد لله رب العالمين.

مع فائق التقدير

بلادى .. اسماعيل حسن

--------------------------------------------------------------------------------

بــلادى
بلادي أنا
بلاد ناسا في أول شئ
مواريثهم كتاب الله
وخيل مشدود
وسيف مسنون حداه درع
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع
وساقية تصحّي الليل مع الفجراوى
يبكى الليل ويدلق في جداولو دمع
يخدر في بلادي سلام
خدرة شاربي موية النيل
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع
وتدفق مياه النيل علي الوديان
بياض الفضة في وهج الهجير بتشع
بلادي سهول ..بلادي حقول
بلادي الجنة للشـافوها أو للبرة بيها سمع
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع
بلادي الصفقة والطنبور
وبنوتاً تحاكي الخيل
يشابن زيي جدي الريل
وشبالن مكنن في طريفو ودع
بلادي أمان بلادي حنان
وناسها حنان يكفكفوا دمعة المفجوع
يبدوا الغير علي ذاتهم
يقسموا اللقمة بيناتهم
ويدوا الزاد حتى إن كان مصيرهم جوع
يحبوا الدار
يموتوا عشان حقوق الجار
ويخوضوا النار عشان فد دمعة
وكيف الحال كان شافوها
سايلة دموع
ديل أهلى
البقيف في الداره وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة
ديل أهلي
ديل قبيلتي لما أدور أفصل للبدور فصلي
أسياد قلبي والإحساس
وسافر في بحار شوقم زمان عقلي
أقول بعضى
ألاقيهم تسربوا فى مسارب الروح بقو كلي
محل قبلت ألقاهم معايا معايا زي ضلى
لو ما جيت من زي ديل
كان أسفاي وأسفاي وآمأساتي وآذلي
تصور كيف يكون الحال
لو ما كنت سوداني وأهل الحارة ما أهلي
تصور كيف يكون الحال؟



اذكر في اول يوم لقدومي الي الدوحة وانا خارج من المطار حضر رئيسي في القسم من جهة العمل وهو جزائري يحمل ورقة مكتوب عليها اسمي لاستقبالي ومرافقتي الي حيث ساقيم كما هو شائع عند حضور شخص جديد ولكنه فوجئ بمجموعة من اصدقائي السودانيين وهم في استقبالي واصرارهم علي اخذي معهم فكان رده والله انتم السودانيون حيرتمونا في تواددكم وتعاونكم وتراحمك فيما بينكم فمثل هذه القيم اصبحنا نحن العرب نقرأ عنها في الكتب

شكرا جزيلا
ونطالب بي باسورد لابراهيم عوض يجي يشكر بنفسه
وبرضوا شكرا بكري ونصرالدين



فوق فوق سودانا فوق

الاخ النذير حجازى

لك الشكر وانت تظهر كرم بربر

وما فعله اهلى الطيبين فى بربر كان ممكن ان يفعله اهلك لنت وكل اهلنا فى السودان

عشان كده نحن متمسكين بيسودانيتنا لحدى الان

لك كامل المودة والمحبة

...........رغم ان هذا البوست مخصص لشكر الاخ نصرالدين ولصاحب الدار بكرى ابوبكر...... دعونى احى الاخوين ياسر الجعلى والنذير حجازى .... واقول للاخ النذير ان الخروج على القاعدة احيانا فيه اثبات للقاعدة وانا لا زلت عند رائ فى الظرف الذى حكيته بخصوص مباراة الجزائر ومصر ... ولم اصدق المصرى الذى كان يصرخ فى تلك اللحظات انه البنت المصرية كانت محاصرة وخبطت بيت سودانى ولم يفتح لها السودانى .... وبعدين ما تنسى الحكاية فيها بنات وعروض .... غايتو البنت المصرية دى لو صحت الرواية فى اساسها اما خبطت على بيت سودانى فاضى (ما فيه سكان )او سفارة اجنبية .

وبعدين ناس العابدية ما يزعلو مننا لعل الله يخرج من اصلابهم من يلحقهم بزمرة ناس بدرالدين بخيت الذين ينصرونك دون ان يعرفوا اسمك او قبيلتك او مهنتك او دينك ...... والتحية لاهل بربر الذين شكرتهم وما خليت ليهم حاجة ...... واليوم بقابل واحد صاحبى من ناس بربر وموضوعى الرئيسى جاهز للونسة بفضل حكايتك ......

بالله شفتو المنظر فى شارع مدنى فى رمضان واهل القرى حول شارع الظلط عند ساعة الافطار يحوشون البصات والعربات لاجل مشاركتهم افطارهم ومواصلة الرحلة ..... والله لفيت اكثر من 30 دولة ذى دا انا ماشفت..... وانا ذاتى امكن ما اقدر اعمل كدا

... .....وعودة لما بدات به من الخروج على القاعدة احكى لك انه فى نفس شارع مدنى (ودى واقعة حقيقية دون ذكر البلدة ) واحد بيته فاتح على شارع الظلط مباشرة .... فوجئ بخبط عنيف على باب الشارع عند الثانية صباحا.... ومن سريره فى الحوش نادى ((البخبط منو ؟)) فرد عليه الصوت من الخارج ( انا ضيف ) فاجابه صاحب الدار يسرعة (( يا زول امش شوف شغلك ... شارع الظلط دا ما خلى ليه ضيف ))
ودمتم جميعا

Quote: الاخ النذير حجازى لك الشكر وانت تظهر كرم بربر

العزيز عادل البربري الصحراوي،
تحية المودة والاحترام

يا عزيزي لا شكر على واجب، وهذا دين فى رقبتي ولازم أوصله لكل الناس باعلى صوتي
وهو أضعف الإيمان

ولك من ودي أنبله

Quote: واليوم بقابل واحد صاحبى من ناس بربر وموضوعى الرئيسى جاهز للونسة بفضل حكايتك ......

العزيز د. إمام تسلم والله يا راجل يا ذوق، وعليك الله أشكر وبلغ صحبك دا أسمى تحياتي، مع فائق التقدير

شكرا باشمهندس بكرى لمنحى العضوية فى منتداكم العامر واتمنى ان اجد نفسى بينكم
الاخوة الأفاضل لكم جزيل شكرى وعظيم إمتنانى ....
شكراً جميلاً اخى نصر الدين

الاخ ابراهيم عوض ............ لك مجيد الاستقبال والحفاوة مثل حفاوة نصر الدين بك ......
انا ظللت مستمع من الخارج فى هذا البورد اربعة سنوات وما ادونى العضوية الا بعد ما ارسلت مشاركة من الخارج حول جدوى نقل عمليات الكلى بالسودان .
الف مرحب بيك ..... وباين عليك سودانى عيار 24 والا ما كان احسنت الظن بالاخوة فى نييويورك رغم مشغوليات الحياة .... لكنهم ما خذلوك وما خذلونا .
ودمتم
امام

الله يديكم العافية في عمركم دا يا بكري ابوبكر ونصرالدين والخير
أنتم رجال من اصلاب رجال

دموعي جرت من فرحتي بما قرأت

أبومجتبى

الاخ د.امام الصديق عبد المعطى
يا مرحباً وعليك السلام ،...
انا ممتن لكم ولكلماتكم الطيبة وإن شاء الله الدار ترحب بنا وبكم !
حقيقة مافعله الاخ الكريم نصر الدين كما قال هو فعل سودانى بحت ودة حال عموم السودانيين فى الغربة وياها الفضلت لينا والبتميزنا مع باقى خلق الله !
وظنى فى سودانيز هو نابع من خلال متابعتى اللصيقة للموقع وما يقوم به الاعضامن اعمال خيرية ومشاركات إجتماعية ومساعدات إنسانية ، لذا لم أتردد لحظة عندما أرسلت صورتى للأخ الخير محمد عوض ليقدم لى للوترى وحالفنى الحظ بالفوز ومن ذات المفهوم أرسلت رسالة المساعدة للباشمهندس بكرى جزاه الله خير وقام مشكورا بنشرها ووجدت ترحيب من الاخوة المقيمين فى نيويورك ومن ضمنهم الاخ نصر الدين وما قصر تب !
.........
رسلت رسالة للاخ بكرى ليشكر جميع المتداخلين نيابة عنى قال يازول ما تلخمنى هاك دة باسورد أمشى أشكر براك

Quote: رسلت رسالة للاخ بكرى ليشكر جميع المتداخلين نيابة عنى قال يازول ما تلخمنى هاك دة باسورد أمشى أشكر براك

حمداً لله علي سلامة وصولك طيب

وشكرا لسيد الحوش الحدادي مدادي

وللجدع نصر الدين

ويالله بعد لهموك الباسوورد اجدع علي كيفك واردح ردحي جد.