Post: #1
Title: زواج بوردابية من بوردابي
Author: ودقاسم
Date: 11-20-2004, 03:18 AM
Parent: #0
أعرف أن هناك زيجات تمت عبر هذا المنبر ، وأن طرفي الزيجة كانا عضوين بالمنبر ،، وكنت من قبل قد كتبت محرضا الزملاء والزملاء أن يدخلوا إلى علاقات أمتن سعيا لانتهائها بالزواج ،، وكتبت أكثر من مرة ، وقلت أن زميلاتنا رائعات ، وأنهن جديرات بزملائهن الرائعين ،،
طلبت من إحدى الزميلات التي دخلت في تجربة الزواج البوردابي أن تكتب لنا عن تجربتها لتكون تشجيعا للآخرين والأخريات ليتزوجوا ،، وأهو يكون زيتنا في بيتنا ،،،
الزميلة لم تكتب ، ولم ترد على رسالتي ،، وها أنا ذا أفتح الموضوع على مصراعيه علّني أجد من يدعم الفكرة بتجربته العملية ، أو أجد مؤيدين للفكرة ، أو أجد متحمسين لها وداعين لتنفيذها ، أو أخرج منها بعدد من التوفيق بين الرؤوس بالحلال ،،،،
بالله يا جماعة ( كلكم نساء ورجال ) ما تبخلوا ،، قولوا أي حاجة ،، لا تترددوا ،، يمكن نطلع بحاجة ،،
|
Post: #2
Title: Re: زواج بوردابية من بوردابي
Author: samwal ebrahiem
Date: 11-20-2004, 03:26 AM
Parent: #1
الخال ود قاسم
صاحب الافكار الجميلة ربنا يديك الصحة والعافية
ويخليك لينا يا خال يا جميل
| Quote: وها أنا ذا أفتح الموضوع على مصراعيه علّني أجد من يدعم الفكرة بتجربته العملية ، أو أجد مؤيدين للفكرة ، أو أجد متحمسين لها وداعين لتنفيذها |
سجل عندك يا خال انا اول المؤيدين وببصم معاك بالعشرة
السمؤل
|
Post: #10
Title: Re: زواج بوردابية من بوردابي
Author: ودقاسم
Date: 11-20-2004, 04:22 AM
Parent: #2
سموأل العزيز
المسألة يا أبني فيها كشف حال ،، قول لينا إنت أخبارك شنو ،، عندك زولة شاغلة بالك ، وللا ندبرك ؟
|
Post: #3
Title: Re: زواج بوردابية من بوردابي
Author: ahmed haneen
Date: 11-20-2004, 03:29 AM
Parent: #1
يا خال وينك
اولا ابدأ بي بورداب الرياض
رغم انك زوغتا من بوست الشمارات
بخصوص اخوانا الرائعين
تمبس وشتات ومعتصم دفع الله
علي العموم
يا خال ممكن راجل مرة ،،،!!! ياااااا اب شره
|
Post: #5
Title: Re: زواج بوردابية من بوردابي
Author: Hussein Mallasi
Date: 11-20-2004, 03:38 AM
Parent: #3
ترى يا خال؛ هل هنالك فرق بين زواج البوردابية من البوردابي
- كما ورد في العنوان - و زواج البوردابي من البوردابية !
تحياتي
|
Post: #21
Title: Re: زواج بوردابية من بوردابي
Author: ودقاسم
Date: 11-20-2004, 11:07 PM
Parent: #5
حسين
كلو داخل في بعضو
خليك محضر خير ، ومادام إنت هناك شوف لي بورداب وبوردابيات الخرطوم ،،
|
Post: #7
Title: Re: زواج بوردابية من بوردابي
Author: Tumadir
Date: 11-20-2004, 03:49 AM
Parent: #3
انا ضد زواج البورداب من بعض لان الطب اثبت ان زواج ناس بيحملو جينات وراثية متشابهة بنتج عنه اطفال "ما على قدر كده"...فزواج البورداب ما مضمون امكن يجيبوا اطفال عندهم " عمى بوستات" او "تضخم فى المداخلات" او نقص المناعة الهكرية " او اى مرض "وراثى معروف ... على اقل تقدير..ينتقل ليه ميكروب غريب اسمه " سرادقرا" وهو اختصار لكلمتين هم "سردوب و مصاقرة.." بسبب مرض بعد ماكان معدى بقى وراثى ولسه "الاطباء" ما وصلوا للسبب الخلاهو يتسردب كده شنو.
والله ياود قاسم انا بكتب فى الكلام ده وباقى لى دقيقة وااااااحده اطلع
وبقيت ما قادرة اقرا ولا اتابع البورد والحكاية دى زى موجعانى شوية كده قلت افتى ليك فى زواج البورداب "من ناحية طبية" وطيران على الهاى ويى...والشغل للعصر...وبعد داك هموم الدنيا العادية..
يعنى دى بصراحة كده واحده من الطرق الحاقول بيها "ياحليلك يالبورد"...مرة... مرة..
ارجو ان تتقبلها بصدر رحب...وبدون زعل..شايفة فى زعل شديد جدا جدا حايم اليومين ديل..
اها مع السلامة
مع كل القرقراب...الممكن...
وفقك الله واياكم فى مهمة المأذون الفتحتها دى ...والعاقبة عندكم فى المسرات.
|
Post: #22
Title: Re: زواج بوردابية من بوردابي
Author: ودقاسم
Date: 11-21-2004, 00:23 AM
Parent: #7
تماضر
ربنا يديك العافية ويقدّرك على معافرة الدنيا ،، بس أنسي حكاية المرض الغريب دا ، فليس هناك مرض أسوأ من مرور السنين بلا حنين ،،
وحرّكي لينا الأمور وسط بورداب أمريكا ، ينيبك ثواب من عند ربنا،
أسأل الله أن يحفظك ويخليك لي وليداتك ولي الناس البيريدوك كلهم ،، وأنا عمري ما أزعل منك ،، بس كمان ما تزعلي مني يا بت الخالة ..
|
Post: #19
Title: Re: زواج بوردابية من بوردابي
Author: ودقاسم
Date: 11-20-2004, 10:23 PM
Parent: #3
أحمد حنين
بورداب الرياض ديل جننوني وجننتهم ،، كل يوم أقدم ليهم في الترشيحات ، وهم زايغين ،، غلبوني عديل كده ،، وبيني وبينك داخلني شك ...
|
Post: #4
Title: Re: زواج بوردابية من بوردابي
Author: samwal ebrahiem
Date: 11-20-2004, 03:37 AM
Parent: #1
[B]تخريمة بسيطة يا خال
أحمد حنين كل عام وانت بخير
وانشاءالله القابله كدى جميع الامنيات تكون اتحققت
كنت متمنى اعيد عليك تلفونيا لكن ماحصلت الرقم
فى انتظار الشمار يا خال
السمؤل
|
Post: #6
Title: Re: زواج بوردابية من بوردابي
Author: طلال عفيفي
Date: 11-20-2004, 03:48 AM
Parent: #4
أنا الزواج ده ما سمعت بيهو , لكني والله أعلم عارف
إنو تحت تحت في علاقات عاطفيه قامت على أكتاف هذا
البورد ..
وربنا يعمل الفيهو الخير ..
...
طلال
|
Post: #27
Title: Re: زواج بوردابية من بوردابي
Author: ودقاسم
Date: 11-21-2004, 02:26 AM
Parent: #6
طلال
ما قلنا عايزين حد يفتح الباب ...
يلا يا شباب : ابن حلال يفتح الباب ..
|
Post: #8
Title: Re: زواج بوردابية من بوردابي
Author: حمزاوي
Date: 11-20-2004, 04:04 AM
Parent: #1
اخي ودفعتي / ودقاسم
كيفك
اللهم اوعدنا وتمم مرادنا
تعرف يا الخال في واحدة في البورد دا
كاسرة في ضلع
كلما ادخل القاءها عاملة مداخلة اقعد اتأمل في كلماتها
بس نعمل أيه عشق من طرف واحد
واقعد اقول يا ليت الشباب يعود يوماً
خلاص كبرنا وكبرت احزانا
. . .
تخريمة ذي ما بيقولوا الشباب
يا خالتي تماضر انا برضوا معاكي في رأيك بس مش خالص يعني شوية كدا
نعمل ايه يا خالتي اها كبرنا والعيال بقوا رجال وبقوا اخوانا
. . .
احمد حنين يا اخوي الله يسهل
|
Post: #30
Title: Re: زواج بوردابية من بوردابي
Author: ودقاسم
Date: 11-21-2004, 04:57 AM
Parent: #8
حمزاوي
هات ،، أفصح عما في داخلك ،،
سلامة ضلعتك ،، بس قول لي أو حرفين من الاسم ، وأنا أفهمك على طول ،،
|
Post: #9
Title: Re: زواج بوردابية من بوردابي
Author: Ana Zaty Omdur
Date: 11-20-2004, 04:13 AM
Parent: #1
ودقاسم عندى سؤال
ممكن نفك تسجيل العقد القديم وندخل فى التسجلات الجديده
ولا حأتمقلب؟؟؟
|
Post: #11
Title: Re: زواج بوردابية من بوردابي
Author: Hussein Mallasi
Date: 11-20-2004, 04:29 AM
Parent: #9
هو داب مقلب ....
|
Post: #12
Title: Re: زواج بوردابية من بوردابي
Author: Ishraga Mustafa
Date: 11-20-2004, 04:41 AM
Parent: #11
ودقاسم...كل سنة واسرتك بالف خير... كعادة مواضيعك دائما حيوية للنقاش
لكن لاى مدى يعكس البورد الطريقة الفعلية اللى بنفكر بيها، خاصة لمن تكون المسألة مسألة حياة او موت
هل ياربى التنظير الجميل بيكون حقيقة فى الواقع؟ ولا بتحصل التنقاضات لمن نبقى فى الجد؟ كده نديهم/ن فرصه يقولوا/ن
Quote: ودقاسم عندى سؤال
ممكن نفك تسجيل العقد القديم وندخل فى التسجلات الجديده
ولا حأتمقلب؟؟؟
|
انا ذاتها ام در
انا غايتو مابدخل فى مقالب ذى دى، القديم عرفتى حنفة وشه وعرف حنفة عينيك لم تقوم عليك كديسة الشكلة
اها يا ود قاسم جن تعرف ولا جن ماتعرفوأ
|
Post: #14
Title: Re: زواج بوردابية من بوردابي
Author: ود شندي
Date: 11-20-2004, 07:38 AM
Parent: #12
العيد مبارك
حنين، حمزاوي
الارتفاع 5.5
ممنوع دخول الشحاحنات 11:00PM 8:00AM
ابقو داخلين من ضو
|
Post: #37
Title: Re: زواج بوردابية من بوردابي
Author: ودقاسم
Date: 11-21-2004, 01:19 PM
Parent: #14
ود شندي
كل سنة وإنت طيب ، وتحياتي للعروس
أقعد في مواعينك واسقي شتلتك ،، ما تباري لي ناس حنين وحمزاوي ،، ديل مستهلكين خالص ،، ويكفيك الله شر الاستهلاك ،،
ما تهبّش ،، وما تتلفت جاي وجاي ،،
اسمع كلام خالك ،،
|
Post: #36
Title: Re: زواج بوردابية من بوردابي
Author: ودقاسم
Date: 11-21-2004, 01:14 PM
Parent: #12
أم واصل
وانتي بخير وعافية ، وتحياتي لك وللأسرة ، وتقبلي تحيات فوزية وأولادها ..
التوافق الفكري والسلوكي مطلوب لنجاح الأسرة ،، لكنه لا يمكن أن يكون شرطا لازما ،، بعدين كلنا تغيرنا كثيرا عن ما كنا عليه عندما تزوجنا ،، واختلفنا كثيرا ، لكن الحياة تسير بلا توقف ،، تفكيرنا من خلال البورد يعكس شخصيتنا الحقيقية إلى حد كبير ، خاصة الذين امتد بهم العمر البوردي لأكثر من سنتين ،،،
خليهم يتزوجوا يا إشراقة ، ويخشّوا التجربة والنجاح هو التحدي ،،
|
Post: #35
Title: Re: زواج بوردابية من بوردابي
Author: ودقاسم
Date: 11-21-2004, 01:08 PM
Parent: #11
ولا مقلب ولا حاجة ،،،
التجديد مطلوب ، والجديد في الكرو سمح ..
|
Post: #34
Title: Re: زواج بوردابية من بوردابي
Author: ودقاسم
Date: 11-21-2004, 01:06 PM
Parent: #9
أنا ذاتي أم در
جربي فك التسجيل ،، ولو قدرتي تسجلي من جديد وتنجحي أنا ذاتي بجي معاك ،،
لا شاورتيني لا شفتك ....
|
Post: #13
Title: Re: زواج بوردابية من بوردابي
Author: بلدى يا حبوب
Date: 11-20-2004, 05:56 AM
Parent: #1
ودقاسم
وانت رايك شنو الظاهر ناوى
كل سنة وانت طيب
|
Post: #15
Title: Re: زواج بوردابية من بوردابي
Author: ابو جهينة
Date: 11-20-2004, 12:37 PM
Parent: #13
ود قاسم
تعددت أسباب الزواج
و كذلك طرقه .. ( أتذكر القصص التي حكيتها لك بالتفصيل غير الممل و الممل أحيانا ؟
لو تلاقت أفكار بوردابي و بوردابية فلا ضرر و لا ضرار .. بشرط أن لا ينطلق البوردابي إلا من قناعاته الثابتة و تنطلق البوردابية من منطلق لا ( كوم فيه أو تشرذم أو مجاملة ) ..
و إلا سينطبق عليهما المحاذير التي ساقتها الخنساء تماضر ..
سؤال عنكبوتي :
هل سيأتي يوم و يكون الزواج عبر النت عن طريق مأذون سايبري ؟
و الشاهدين على الماسنجر أو البالتوك أو الإيميل ؟
و الزغاريد كالأشكال التي على Smiles Library ؟؟
تخريمة : تخيل يوم العقد السايبري دة لما المأذون يقول لأبو العروس : قول زوجتك إياها ..
يقوم النت يقطع 
|
Post: #16
Title: Re: زواج بوردابية من بوردابي
Author: تاج السر حسن
Date: 11-20-2004, 12:44 PM
Parent: #15
| Quote: زواج بوردابية من بوردابي |
*** أما أنا فافضل زواج (موردابيه) من (مواردابى) و(هلالابيه) من (هلالابى) ، عشان ما تحصل لخبطه.
|
Post: #40
Title: Re: زواج بوردابية من بوردابي
Author: ودقاسم
Date: 11-24-2004, 11:23 PM
Parent: #16
صديقي تاج السر
يا أخي حرام عليك ، الهلالاب ديل اخوان ما ممكن يتزوجوا بعض ،، لكن ممكن تزويج هلالابي من مريخابية ، وتكون دوافع العلاقة انتقامية ..
|
Post: #41
Title: Re: زواج بوردابية من بوردابي
Author: ودقاسم
Date: 11-24-2004, 11:29 PM
Parent: #15
أبوجهينة
لك التحية
زواج سايبيري ، زي زواج مسيار ، والله فكرة ممتازة ، ويمكن أن يلتقي فردتي الزواج على النت ، يعني مافي داعي للاجتماع على صعيد واحد ، وبلاش صرف ،،
ولكن هل يدخل الزواج السايبيري في حدود الزوجات المسموح بهن أم أنه يمكن اعتباره إضافيا ، دون ترتيب أي ضرر ديني ؟ أعتقد ممكن يكون زيادة خير ،، وبالطبع لا تترتب عليه حقوق ،،
ما تشوف لي حاجة زي كده يا أبوجهينة ،،
|
Post: #39
Title: Re: زواج بوردابية من بوردابي
Author: ودقاسم
Date: 11-24-2004, 11:17 PM
Parent: #13
بلدي يا حبوب
كل سنو وأنت طيب
المشكلة أنا خال البنات ، وطبعا الخال من المحارم ..
|
Post: #17
Title: Re: زواج بوردابية من بوردابي
Author: Raja
Date: 11-20-2004, 03:19 PM
Parent: #1
العزيز ود قاسم..
تحايا وود..
انتا لسة مع الموضوع ده..
اتفق مع ابو جهينة ان الارتباط لا يكون فقط عشان هي بوردابية او هو بوردابي.. يجب توافر عوامل أخرى.. خشية ان يكون البوردابي يريد السفر إلى الأرض الجديدة او كندا ويغيًر وضعه فيركًز على بوردابيات تلكم المناطق.. او تريد البوردابية عريس والسلام فتقبل بأي شخص بيقول كلام حلو.. وهكذا..
الارتباط ليس بالضرورة ان يكون لأشخاص من محيط واحد.. او منبر واحد.. لووووووووووول..
عموما انا ضد فكرة الارتباط عن طريق النت.. مع احترامي لكل التجارب التي نجحت من خلاله.. وذلك لأني أجد من الصعوبة بمكان ان تتفاهم مع شخص وتقتنع به كأب مستقبلي لأطفالك - وجها لوجه - فما بالك - شاشة لشاشة -
تخريمة: الاحظ اختفاء معظم الزملاء البورداب الأتزوجوا من بعض من هذا المنبر.. يا ربي لييه..؟
ودي..
|
Post: #42
Title: Re: زواج بوردابية من بوردابي
Author: ودقاسم
Date: 11-24-2004, 11:40 PM
Parent: #17
رجاء
أنا زعلان منّك ،، لماذا تحاولين نسف الفكرة بعدم اقتناعك ،، خليك محضر خير ،،
للأسف يا رجاء أن النت جاءت متأخرة ، ولم تلحق على أيام جيلي ،، ولو أنها كانت موجودة لكنا كلنا تزوجنا عن طريق النت ،،
علاقات عديدة نمت من علاقات الزمالة ، وأصبحت علاقات ناضجة وأثمرت أبناء وبنات ، وسنوات من السعادة ،،
لوحي بغصن الزيتون يا رجاء ، واتفقي معي أن إنجاح العلاقة واستمراريتها رهن بتعاملنا داخل بيت الزوجية ، وليس له علاقة بالشروط المسبقة ،،
يلا يا أولاد ، يلا يا بنات ،، كل واحد/ة خاتّي /ةعينو/ها على زول/ة في البورد يقول لي ،،
http://[email protected]
|
Post: #18
Title: Re: زواج بوردابية من بوردابي
Author: abas
Date: 11-20-2004, 08:11 PM
Parent: #1
يا خال
الموضوع ده كبير جدا ويا ريت الناس تفكر فيه بطريقه عملية
رجويه انا قاعد منو القال ليك اختفو
|
Post: #20
Title: Re: زواج بوردابية من بوردابي
Author: معتصم دفع الله
Date: 11-20-2004, 11:05 PM
Parent: #18
Quote: اولا ابدأ بي بورداب الرياض
رغم انك زوغتا من بوست الشمارات
بخصوص اخوانا الرائعين
تمبس وشتات ومعتصم دفع الله |
يا خال
أنا معاهم ؟ ..
|
Post: #23
Title: Re: زواج بوردابية من بوردابي
Author: ود شندي
Date: 11-21-2004, 00:35 AM
Parent: #20
ابو جهينه
سلامات والله
Quote: تخيل يوم العقد السايبري دة لما المأذون يقول لأبو العروس : قول زوجتك إياها ..
يقوم النت يقطع |
هنا يكون البكا والنواح علي الفاكس مودم
|
Post: #45
Title: Re: زواج بوردابية من بوردابي
Author: ودقاسم
Date: 11-25-2004, 01:15 AM
Parent: #20
معتصم
إنت رأس القائمة ، وهم رأس الحيّة ..
|
Post: #44
Title: Re: زواج بوردابية من بوردابي
Author: ودقاسم
Date: 11-25-2004, 00:09 AM
Parent: #18
عبس يا عريس البورد ،
لك التحية ،،
الموضوع كبير ، وعايز ناس كبار ،، وخالك جاهز .. بس المرّة دي عايزها تكون من الأعراك ..
|
Post: #24
Title: Re: زواج بوردابية من بوردابي
Author: شرووم
Date: 11-21-2004, 01:12 AM
Parent: #1
يا خال ،، كيف حالك
أنا مسجل اسمي من هسة رأيك شنو
عبد الله ،،
|
Post: #25
Title: Re: زواج بوردابية من بوردابي
Author: ابو جهينة
Date: 11-21-2004, 01:18 AM
Parent: #24
ود شندي الحبوب
كل عام و أنت و العروس بألف خير و القابلة على أمانيكم
هنا يكون البكا والنواح علي الفاكس مودم  
بالمناسبة : عملت شنو في الموضوع إياه ؟
|
Post: #46
Title: Re: زواج بوردابية من بوردابي
Author: ودقاسم
Date: 11-25-2004, 01:18 AM
Parent: #24
شروم
أركز ،، كثر زوغانك ،،
قضارف نفر ..
|
Post: #26
Title: Re: زواج بوردابية من بوردابي
Author: أحمد الشايقي
Date: 11-21-2004, 01:38 AM
Parent: #1
الأخوة الكرام ودقاسم وبورداب الرياض
كل عام وانتم بخير
أنا الشايفه كدا انه بورداب الرياض اكثر حرصا على المشروع دا
ما عندي مانع أتجاوب مع الأخ ابو جهينة واعمل بحث كدا في موضوع العقد السايبري
بس الحكاية لو وقفت على العقد بنشوف ليها حل
المهم الجدية والعزم و(التربيـط)
مش كده يا خالو
تحياتي
|
Post: #28
Title: Re: زواج بوردابية من بوردابي
Author: Ishraga Mustafa
Date: 11-21-2004, 02:44 AM
Parent: #26
Quote: فليس هناك مرض أسوأ من مرور السنين بلا حنين ،،
|
ياود قاسم ده اجمل واعمق تعبير اسمعه من زمن، نبهنى لحرقتناوالسنين تنسرب مثل الماء من اصابع ايامنا
عليك الله كتر من الكلام العميق ده، اصلو بيخلنى متماسكة وانا على حد انفراط اليقين
|
Post: #51
Title: Re: زواج بوردابية من بوردابي
Author: ودقاسم
Date: 12-21-2004, 10:02 PM
Parent: #28
العزيزة أم واصل
أحيانا أتونس مع فوزية في الحب ، تقوم تقول لي يا أخي إنت بترجع سنين بعيدة لي ورا ، إنت ما عايز تتجاوز الحتة دي مالك ؟ ، نحن بقينا كبار ، وعندنا عيال ، لسة حا نقعد نتكلم في الحب ؟ وأقول لها : يا فوزية شوفي إنا بفتكر إنو إذا مات الحب بين الزوجين يكون ما في داعي لاستمرار الزيجة حتى ولو نتج عنها عيال يملوا الدنيا ،،
تقول لي أيوة كلامك صح ، بس مش يكون موضوع يتكلموا فيهو الناس ،، هو حاليا معايشة .. وأصر أن الحديث في الحب يكون شهيا كرائحة الشواء ، تأتي بك من البعيد ، لتدفعك لتناول وجبتك ،،
|
Post: #50
Title: Re: زواج بوردابية من بوردابي
Author: ودقاسم
Date: 12-21-2004, 09:53 PM
Parent: #26
الفاضل أحمد الشايقي
فعلا إذا توفرت الجدية فالعقد ساهل ،،
هسة شوف الجماعة الحولك ديل فيهم زول جاد ؟
|
Post: #29
Title: Re: زواج بوردابية من بوردابي
Author: أبو ساندرا
Date: 11-21-2004, 02:51 AM
Parent: #1
يا ودقاسم الجمع بين بوردابيتين حلال ؟؟!!؟؟
ولو الواحد فاتح عينو على واحدة في بورد الجيران يقوم يعمل شنو؟
ولو عندي علاقة مع واحدة ماعضوة لكنها من الزوار هل أستمر معاها ولا أوقف الموضوع لغاية ما تبقى بوردابية؟
وفيها شنو لو قمنا غطينا ماعونا الفي البورد بالنسبة للعزباوات والمطلقات والأرامل ،يعني انت {تاخد} إتنين وأنا تلاته مش بينكون حلينا مشكلة ناس غزيزات جدآ ،
وبالمناسبة مرة سمعت واحد زميل متخلف من الجزيرة بتاعتكم بيحكي عن واحد ، قال {ماخد} ليهو واحدة من بنات رفاعة !
|
Post: #52
Title: Re: زواج بوردابية من بوردابي
Author: ودقاسم
Date: 12-21-2004, 10:53 PM
Parent: #29
أبوساندرا
يا أخوي بورد الجيران ده ما فيهو زولة ما مرتبطة ، ما تدفق مويتك على الرهاب ،، بعدين إنت كان ماك غبيان في زولة ( بتاخد ) ليها واحد مستهلك زيّك ؟ قال الجمع بين بوردابيتين قال ،،
تعرف أنا حكاية تغطية الماعون دي هي همي ، وأنا قاعد أدودر الوليدات الصغار ، لكن كان لقيتهم ما شادين الحيل ، بقوم أعملها ،،
ناس الجزيرة ما متخلفين يا تعبان ، وحكاية ( ماخد ) دي تيرمنولوجي ، تعني أنه متمسك بزوجته ومركز عليها ،، ما هو المصريين بيقولوا ( واخد بالك ؟ ) ..
ما أشوفك تاني تتكلم عن العرس ،،
|
Post: #31
Title: Re: زواج بوردابية من بوردابي
Author: Al-Shaygi
Date: 11-21-2004, 05:10 AM
Parent: #1
ود قاسم كل سنة وإنت طيب ،،،،
غايتو أنا شمرت وجاهز وباكر ماشي حراج الكمبيوتر بالعليا أشتري الشيلة (كروت شاشة وكروت صوت وسماعات وخلافه) (مش الحكاية كلها على البورد) والله يعيني على أم العيال،،،
وفي تفاصيل كتيرة دايره مناقشه بره أول وبعدين نعمليها بوست ؟؟؟؟
بس أنا باقي لي يا ودقاسم البوست ده إنت فاتحه من ورا أم قاسم وتحت تحت كده عرفت أنك لقيت ليك برنامج خاص نزلته في كمبيوترك بيعمل Hide للبوستات الخاصة البتختاره بيه وكمان البرنامج زاتوا ما بيظهر في قائمة البرامج !!!!!!!!!!!
تعرف يا ودقاسم بيني وبينك في يوم من الأيام قربت أدبل بي بوردابيه بس ما حصلت قسمه وأم العيال عاد قامت وقعدت وفرت ليك الدنيا ولو لا أنه الله ستر كان أخوك زمان بقى شهيد الصبغة وكان حسي أكون متوسد لي طوبه في مقبرة العود ولا النسيم كان ما طفشتوني في البعيييييييدي ديك "المنصورية" ؟؟؟؟
الله يستر
|
Post: #54
Title: Re: زواج بوردابية من بوردابي
Author: ودقاسم
Date: 12-21-2004, 11:49 PM
Parent: #31
الشايقي
حلوة الشيلة البيشتروها من حراج الكمبيوتر ،، شيلة الزواج السيبيري
حقيقة في بوستات كتيرة أنا بكتبها من وراء أم قاسم ، وأحيانا من وراي أنا ذاتي ،وبيني وبينك الواحد فعلا عايز ليهو تدبيلة ، بس يا حبيب البوردابيات ما بيرضن بالتدبيل ..
|
Post: #32
Title: Re: زواج بوردابية من بوردابي
Author: معتز تروتسكى
Date: 11-21-2004, 07:52 AM
Parent: #1
خالى ازيك 00
صحتك واخبارك00
بصراحه النحدثك ياخال00
ود اختك صراحه بحب بس المشكله انو لو الفكره خلها تسيطر عليهو ببتقى مشكله لانو لسه ساكين القرايه ام دك بعد العمر ده 00
والشى التانى الزول برتاح ليهن كلهن لانى قلبى رهيف لكن هناك واحدات مميزات00
صراحه لاقبل زواج بوردابيه (x)من بوردابى (تروتسكى) وياحبذا ياخال لو كانت مقرشه عشان الواحد يقدر يكمل تعليمو ده00
ولا اخليك تختار لى 00
ولا نتشاور 00
يمكن نعرس سوى 00
لوووول00
شكلك نويت ياخال 00
يلا00
البتشوفو كلو طيب 00
ود اختك معاك للنهاية00
مسكين قلبى 00مكسور الخاطر00
وياسلوى قلبى شن سوى000
سلامى ليك كتير
|
Post: #33
Title: Re: زواج بوردابية من بوردابي
Author: abuguta
Date: 11-21-2004, 12:54 PM
Parent: #32
الخال
واحد
عذابى...
بخاف
من عضة
الدابى...
العمر
متشابى...
ساكن
البطحاء
شارع
الغرابى...
مروق
ياصحابى...
فى
السطوح
عندى
رملة
وترابى...
وعنقريب
هبابى...
بالليل
بشوف
نجوم
فوق
السحاب...
وندى القلعة
تغنى
يابوى عاج
دابى....
جنبو
الشجر كابى..
وكفتيرة
تغلى
وتربيزة
وكبابى
لو زهجت
من
الرقدة
بفتح جهازى
وبكون
بوردابى...
بلقى
ذات
الورود
واللون
العنابى....
وحدات
فى كندا
وفى ماليزيا
ناويات
الاياب...
وفى ابوظبى
شلبى
وايهاب..
لو بوردية
تزوجت
بوردابى...
دى
حكومة
عسكرية
والرئيس
انقلابى..
تعرف
كيف
ياخال
الاصحابى...
مافيش
اكل
مافيش
شغل
حتى شاى الصباح
بكون على الباب..
ما فيش
ماما
مافيش
بابى...
مافيش دراسة
ولا فتح كتابى...
لو قلنا
نشترى جهازين
بلخبطن الحسابى...
فواتير تلفون
رسوم انترنت
وضياع الشبابى..
لو بوردابية
عرست بوردابى...
الليلة
باصحابى...
الاكل من المطاعم
بروستد وكبابى...
واحد عذابى
فى السوق
العرض سارى
قبل عيد الاضحى
|
Post: #38
Title: Re: زواج بوردابية من بوردابي
Author: حبيب نورة
Date: 11-21-2004, 06:05 PM
Parent: #33
سلامو عليكو
|
Post: #43
Title: Re: زواج بوردابية من بوردابي
Author: ebrahim_ali
Date: 11-24-2004, 11:47 PM
Parent: #38
ودقاسم سلام واحترام وكل المتداخلين تعظيم سلام
تتطرقت قبل فترة طويلة لموضوع سميته علاقة حب عنيفة تشهدها أروقة البورد وذكرت فيما ذكرت انه قد وصلتني عن طريق الخطاء رسائل عبر المسنجر ياحليلو الكان حلل المشاكل ومقرب البعيد
المهم في الموضوع انه هذه العلاقة تتطورت على ما اعتقد وربما تكون قد تمت الزيجة والله أعلم وبطلب رقيق من الرقيقة بت شيخ الدين ان اغلق ذلك البوست فقمنا بتغتسية في صقط لقط وممكن يطلع تاني
مبروك لكل عروسين جداد مش زينا كده الفات علينا سنة نحن عائزين نحن لنج ومن انتاج البورد
|
Post: #47
Title: Re: زواج بوردابية من بوردابي
Author: ابو جهينة
Date: 11-25-2004, 01:48 AM
Parent: #43
ود قاسم قال :
ولكن هل يدخل الزواج السايبيري في حدود الزوجات المسموح بهن أم أنه يمكن اعتباره إضافيا ، دون ترتيب أي ضرر ديني ؟ أعتقد ممكن يكون زيادة خير ،، وبالطبع لا تترتب عليه حقوق ،،
ما تشوف لي حاجة زي كده يا أبوجهينة ،،
الجمع بين زوجتين سايبريتين لا يجوز .. لأن بيت العنكبوت أصلا بيت واهن ما بيتحمل إلا واحدة بالتيلة ..
ممكن تتزوج واحدة على المنبر سايبريا جهارا نهارا و في أوقات الذروة العنكبوتية عشان تلقى شهود عدول .. و حنشوف ليك فتوى عشان التانية تكون سرية ( على الماسنجر ) .. و ممكن واحدة مسيار على ( البالتوك ) .. و تتحجج بعدم الزيارة نظرا لل Heavy traffic وقت الزيارة
عوزني أشوف ليك واحدة زى كدة ؟ أوكي ... هات موافقة من أم طلال .. و مع إنو أنا متأكد ما حتجيك موافقة .. إلا أن لك أجر المحاولة و حتكون شهيد ( حركة الزواج السايبري ) ..
أرقد عافية
|
Post: #48
Title: Re: زواج بوردابية من بوردابي
Author: Rawia
Date: 12-20-2004, 07:49 AM
Parent: #47
ود قاسم سلام
اها عملتو شنو
|
Post: #57
Title: Re: زواج بوردابية من بوردابي
Author: ودقاسم
Date: 12-22-2004, 04:26 AM
Parent: #33
ابوقوتة
لسة ما بطلت العزوبية ؟
شوف لك حل بسرعة ، شوف لك بوردابية ،،
أحسم قبال يفوت الفوات ..
|
Post: #56
Title: Re: زواج بوردابية من بوردابي
Author: ودقاسم
Date: 12-22-2004, 01:51 AM
Parent: #32
معتز
والله الجرسة عندك ، وقليبك زي الريشة ،،،
يا بنات الدايرة تعرّس معتز ده تكلمني ، أو تكلمو مباشرة ،،
بس يا معتز ما تنوم بالشمار براك ..
|
Post: #49
Title: Re: زواج بوردابية من بوردابي
Author: ست البنات
Date: 12-20-2004, 08:23 AM
Parent: #1
مبروك يا جماعة قلبتوها أفراح !
أنا كنت متحسسة أدخل البوست تقوموا تتهمونى !
وانا جيت أعاين !
اتشجعت وقت لقيت أخوى معتز السمح وأخياتى ناس تماضر ورجاء وراوية قلت البكان أمان ! ووينكن يا عشة وعلوية تحضرن فتح الخشم !
لكن عندكم لى شايقى ????
بس الجماعة ما يقولوا عنصرية !
أصلى ماب أفهم الا فى السبروق والتمر والقرفتن والسبيق والدباس والبشنتيق والآشميق والبقل ، والدونكا واللقدابة !!
ست البنات .
|
Post: #53
Title: Re: زواج بوردابية من بوردابي
Author: alsngaq
Date: 12-21-2004, 11:20 PM
Parent: #1
الخال العزيز ود قاسم سلامات
كلام ام واصل
لكن لاى مدى يعكس البورد الطريقة الفعلية اللى بنفكر بيها، خاصة لمن تكون المسألة مسألة حياة او موت
هل ياربى التنظير الجميل بيكون حقيقة فى الواقع؟ ولا بتحصل التنقاضات لمن نبقى فى الجد؟ كده نديهم/ن فرصه يقولوا/ن
موضوعي شديد
لاي مدى البورد بعكس بالفعل طريقتنا فى التفكير؟؟
السؤال دا مهم جدا يا خال
تحياتي
|
Post: #55
Title: Re: زواج بوردابية من بوردابي
Author: أبو ساندرا
Date: 12-22-2004, 00:32 AM
Parent: #1
ودقاسم:
سلامة النظر يا {خويا} بعد شهر بالتمام والكمال من21/11 - 21/12 عايز تجي ترد علينا يا دوبك بعد ما الفاس وقع في الراس وتزوجنا على سنة البورد !
|
|