قصيدتك عظيمة يا دكتور كرسني.. خواطر وفاء للراحل الدكتور علي التوم

رحم الله الأستاذ علي التوم وأنزله منازل المقربين وأحسن فيه عزاء السودان والسودانيين قبل أهله وأسرته وأحبائه.. لم أشاهده بالعين، ولكني عرفته من مقالاته التي كتبها، وبعضها تكرمت الأستاذة رجاء العباسي بنشرها في هذا المنبر..

لقد أعجبتني قصيدتك يا دكتور كرسني فأفردت لها هذا البوست تخليدا لذكرى هذا الراحل الكبير والفقد العظيم..

وغدا تشرق الشمس..

ياسر

خواطر وفاء

وفاءً لروح أستاذي الجليل وصديقي الوفيّ المرحوم علي التوم

علي التوم

د. ابراهيم الكرسني/دبي
[email protected]

تاج القومُ

خاتٍي اللّوم

وكت الناعي صاح مكلوم

"الحيّ الله...الدايم الله...علي التوم راح في حقّ الله"

غاب بدر السما الضاوي

سماياً لا شهب لا نجوم

ده موتاً يتّم السودان

وموتاً يتّم الخرطوم

.......

باب حوشك دوام مفتوح

ضيفانك يحجرو النوم

ما بتعرف تقول لا لا

فعل الخير ده ليهو تروم

السّواي ومو حدّاث

كريم وأجواد ومو مذموم

كتّ تكيّة للبيجوع

عطاياك واصلاه للمحروم

...................

ما إتلومّت طول عمرك

حاشاك ما بتعرف اللّوم

فارس الحوبة ما بتخاف

إلاّ من الله خالق القوم

دايما ماشي لي قدّام

كضّاب البقول مهزوم

......

قلمك للغبش مسنون

بي همّ الغبش مهموم

لا بد للغٌبشُ من كلمة

كلمة زول دوام مظلوم

يوماً للغبٌش مشهود

من دارفور للخرطوم

يوم يتفجّر البركان

الكان في الصدور مكتوم

ويتهدّم سجن كوبر

وبيوت أشباح أذلّت لي كبار القوم

يوم النفرة يوم الثورة

يوم تهدر جحافلنا

يوم تتفرز الكيمان

كوم الثورة أكبر كوم

.........

يوم عدل الغبٌشُ منصوب

و الحاكم صبح محكوم

يوماً للقصاص مدخور

يوم فرحاً لكل مهموم

يوم تشهد جرائمكم

ياحكّامنا جاكم يومُ

يوماً أسوداً بالحيل

يشهد فيهو كل مظلوم

ويشهد الله يوم الحق

يوم تفرج كروُب وهموم

...................

يوم داك العرس مشهود

ويتبسّم وليد التوم

وقبرو يضوّي زي برقاً

شلع وسماهو كلّو غيوم

وتخدر عاد جروفنا الناشفي ليها سنين

مما جوها ناس "هولاكو"

لا شافت مطر لا غيوم

.................

و ضوّت ديك حمد النيل

قبورا تقول قصور الروم

تشيل لي نورا من نورو

وتنوّر لي سما الخرطوم

وليد التوم يبشّر للخلق من جمُ

أصبرو شويي حتى إن كان قدر محتوم

و الليل المضلّم داك

لابد في سماهو نجوم

نجوم بتضوّي للضهبان

للمسكين والمهموم

................

وليل الظلم مهما طال

لابد ينقشع مهزوم

ده يوماً مو بعيد بالحيل

بشّر بيهو ود التوم

يوم تهدر جماهيرنا

يوم تفتح مدارسنا

وتتعمّر مزراعنا

وتتصلّح مصانعنا

وتجدد مشافينا

يوم بيغنّو أطفالنا

و المرضان بيلقى النوم

.......

يوم ينزل مطرنا غزير

يوم تمطر غيوم وغيوم

يوم تتفتح أزهارنا

يوم يتوفر المعدوم

يوم أطفالنا فرحانين

يشوفو الدنيا بى ود عين

ده كان عميان قبل كم يوم

.....

وفي وسط الغٌبشُ يهتفُ

وليداً لي وليد التوم

يقيف أكرم وسط أخواتو مشمّر

يصيح يا أخوانا صح النوم

أقيفو عديل وأعدلو الميل

عشان نلحق بقية القوم

عشان "تضحك سما الخرطوم"

عشان نبنيهو ها السودان

والخرطوم تعود خرطوم

د. ابراهيم الكرسني

دبي

8/6/2005م

الأخ الفاضل دكتور ياسر
أسأل الله العلى القدير أن يرحم أستاذنا على التوم وأن ينزله منزلة الصديقين والشهداء وأن يلهمنا واياكم الصبر الجميل فى هذا الفقد الجلل. توالت علينا المصائب يا ياسر بفقد أنبل الرجال وأعظم مفكرى الوطن تحت أسنة رماح الأنظمة الظلامية بدءا بالشهداء عبد الخالق محجوب ومحمود محمد طه, مرورا بالخاتم عدلان وانتهاءا بعلى التوم وحرمان شعبنا من مساهماتهم الفكرية المتميزة ونحن أحوج ما نكون لها فى هذا الظرف الحرج الذى تمر به البلاد.
أقدر لك تقديرك للراحل الكبير كما أسأل الله أن يجعل افرادك لهذا البوست فى ميزان حسناتك.

العزيز د/ كرسني،
تحية المودة والتقدير

أرجو أن يتكاتف المهتمون بجمع مقالات وكتب الراحل الكبير، ويكتبوا سيرته العطرة لتعريف الناس به وللإستفادة من علمه وتجربته..

لقد تأسفت جدا أن بعض مقالات الراحل العزيز التي كنت قد نشرتها في موقع منبر الفكرة "القديم" قد تعرض للتدمير، ربما بفعل فاعل، وقد ضاعت مني هذه المقالات لكنها موجودة بالتأكيد في مكان آخر..

أناشد الأخ بكري أبو بكر بإقامة مكتبة للراحل الدكتور علي التوم.. وهذا أقل ما يجب..

ولك شكري، فقد أهديتني دموعا هذا الصباح أسأل الله أن يغسلني بها من ذميم الأخلاق ببركة راحلنا العزيز..

ياسر