غنوا معاى .....دوبيت الحردلو

البلد اللبوك عمدو وجفوك نظارو

ذى المتلى قاعد فوقو شن افكارو

اولى الختره فوق جملا تكب فقارو

ما خالقنا زول مولانه واسعه ديارو



هذا الدوبيت عمره اكثر من مئه عام كتب فى زمن الخليفه عبد الله التعايشى بعد ان منع اعيان القبائل مهمتهم وقال انه هو الزعيم السياسى والدينى ومنع كل شى فى المجتمع حتى شيوخ الدين منعهم مريدنهم ففرق الاخوان من بعض والقبائل شتتهم واظنكم تسمعوا بى يحلنا الحله بله من القيد والزله الذى انقذ بنات عمه واخواته من الخليفه التعايشى هل نحن الان فى زمن الخليفه؟


كم شويملهن وقتا كتير فوق ناقه

زمنا فى طرف ريسه وشويه فاقه

عاكسنا الدهر كترت علينا العاقه

ونحن برانا يا عبد الله كيف نتلاقى


عبد الله هو شقيق الحردلو وريسه منطقه فى الشكريه سمح لهم عبد الله التعايشى
كمنطقه حره لهم يمارسوا فيها فياقتم وشراب القهوه والشاى ويسكتوا ساكت
والله كريم علينا

حمزة سليمان

انا يا حمزة اخوي... جدي .. ود الفراش قال ..


الليلة الصعيد طراني بلدا زينة

مريودة امها البي الخمرة رشو قرينة

ان جيت للجمال زي الريال يا عينا

لكن يا خسارة الفلسة حاصلة علينا


احبك .. جدا .. و واصل عليك اللة
فرحني ... شوية

الاستاذ حمزة سليمان شرفت البورد والله بحضورك الجميل
ويقال أن ال الحردلو من الشكرية لم يرضو بمجاورة الحلفاويين لهم ولعنوا من هجرهم لحلفا الجديدة فخرب عليهم فياقتهم وما اعتادوا عليه حيث قال قائلهم يندب أيام الابيتر " الحردلو الكبير"

زمناً مو بعيد .. كان الحكم بالايد
فيك اتحكر الدوق الجهامة قليد
قبال اللبيتر راسو يبقى صعيد
ما شافك حلفاوى ولا ترلى حديد

الاخوان خضر وMXB6N

لكم الحب والسلام والدوبيت فن فيه كقير من الراحه النفسيه

مع تقديرى

حمزة

و هاك المربع دة للحردلو

لونهن من بعيد متل البليبلى نضاف
حرد و معصرات من شبة الأكتاف
على الناس البغنولهن بجروا القاف
ماليات الخشم من كامل الأوصاف

اهلنا ناس البطانه فطنين ويمتازون بسرعة البديهه وشعرهم عميق ومعبر وزيدونا من هذا البحر .. ويالحبيب خواض ماتنورها لينا بى ضلمت

الاخوان خضر وود الخواض وعزيز

كدى نجادع

نهدا دق تبل ماهو المدوشش قرو

يلعب حردفى توو المراقد ترو

فى بوش العصير الناس يقوموا يبرو

فوق ندادها كرباج النصر بتورو

***


لخلوخة تقوم مسايسه ومفروقه

بين التقنتين دفق البصير ماروقه

ان جلست معاك وان سمع منطوقه

على المشببات بلحيل بعيد معلوقه

************



حسرورن زمان انا ضيقنبو خلاقى

طول الليل مساهر وعينى ما بتلاقى

من فرط البجينى الهجعه بالعراقى

وين ما ادور اغلق فوقى يصبح باقى



وابشروا بالخير وزغروده وصوت عنج وبطانه


حمزة

كيف يا حمزة

انا رسلت ليك ايميل قبيل كدى شوفو ؟؟

وتانى شى كدى بالله (ترجم) لى الكلام دة عشان والله العظيم ما فاهمة نصو !!

وانت تعال كدى، الكلام دة حافظوا كلو ؟؟ والله ما شاء الله ، لكن ما اسحرك

لكن تانى اعمل ليك زى شرح للكلمات الما مندرج على استعمالها وكدة عشان نستمتع معاكم كمان ، مش كدة ولا رأيك شنو ؟؟

سلام

وغبتى كتير واتمنى انه الزمن ما يفرق من جديد وحافظى على الردود لانها بتردنى لى زمن حالم .

وح اترجم ليك كل شى باذن الله

كل هذا الدوبيت غزلى وحاولى اجتهدى تانى واذا غلبك ح اشرح ليك
لك السلام ارسلت ليك ايميل

سلام من تانى يا (خمسة) هىهى(:

والله (اجتهدت) لما راسى لف ، لكن زى ما قلت ليك بس فهمت نصو ،غايتو يمكن

يكون راسى(تخن) من الركلسة و قعاد البيت ، مش كدة ؟؟ معقول برضو !!

وانت قصدك ايميل (تانى) ولا الأول زاتو ؟؟؟

يلا فى حفظ الله

شوف ياحمزة..هذا بوست بدأ ليستمر..فلا تتوقف أنت والأخوان عن الإضافة وراء الإضافة.. وليت في رأسي أو كراسي شيء..ولكن ما يمكن أن أقوله هنا أن الموضوع وإن كان عن الدوبيت إلا إن له بعده السياسي والتاريخي خاصة من ناحية نفي الآخر وإحتكار السلطة والنتائج التي تترتب على ذلك..وربنا يستر

لك فتون

الاول

الحردلو يصف العقد الذى صاغه الصايغ (تبل) على جيد الفتاة يوم حفل حين نهض الناس للرقص وانتصرت الفتاة على اندادها كما يفعل المنتصر بسوطه فى نشوه الانتصار

التانى ( لخلوخة)

انها تشبه القصبه اللينه التى احسن زراعتها ..ا.ن جلست معك تبين الفرق الشاسع بينها وبين من يدعين الشباب والحسن

اللخلوخه ..القصبه التى تتمايل

مسايسه زرعت بى خبره ومعرفه وسياسه

التقنتين ..التقنت هو الجدول

الماروق السماد معلوقه كنايه عن مكانتها




التالت (حسرورن)

ان فراقهن والم حبهن جعلنى اضيق فابيت ساهرا طول الليل ولم يغمض لى جفن

الحسرور الم الحب وتكون حسارا احيانا من الحسره

اغلق ... اسدد حسابى للحكومه التى فرضت مبلغ على الشيخ فى العهد التركى .



اتمنى ان نعطى ابنائنا فى الغربه جرعه من صوتياتنا اللغويه

حتى ما تكون الغربه حقيقيه والسودان مليون ميل مربع فى وجداننا.

حاولى اقريه كم مره ح تصلى للنطق الصحيح لانه التشكيل صعب فى الكمبيوتر

ولو بكرى ابو بكر دخل صوت كان سجلته صوتيا ولك الشكر الجميل .

حمزة

لك يا حمزة

الشكر الجميل لك انت على سعة صدرك ،،

والله قاعدة احاول من قبيل ٌاِنو اقراهو بالطريقة الصح ، و غايتو يمكن اكون

(بعد شرحك) المسهب انى افهم شوية شوية ، راسى تخين (انا عارفة )

اها قلت لى لقيت ايميلى ليك ؟؟انا رسلتو قبل ساعتين كدة اظن ..

الى الملتقى

ويقول الشاعر مكاشفى فى مسدار:
ملفحة يا بلد بالحر يلاوى النسمة
ضرب المستحيل كتف رموش النجمة
إن صح الكلام فى عينو تصحى الكجمة
يابلد اندفر فى رحلتو المنقسمه
ما تور ان وقع يكتر بياض البسمة

عزيزي حمزه
ماأجمل هذا ألبوست أنا مستمتع بكل المشاركات فيه يلا واصل هذا
ألعمل ألمفيد

ود أب سن
قال
نفخ الشمرة و أدلى الوعير من ضو
ردف الزوغة و اتصعد هبوب الهو
أنسى الغيرة مالى فى الشبابت هو
خلت حلقى قرقدة و لهاتى كرو

احبتى شكرا لكم وشجعتونى للمواصله

الحردلو بعد المهديه قضى اياما اخلد فيها الى العزله واخلص فيها الى فنه فانتج رائعته فى وصف الظباء التى عرفت بمسدار الصيد وبقى فى البطانه يقرا من القران سبعا كل يوم وهكذا قضى ياته الاخيره بين العباده والفن الى ان لقلى ربه سنه 1916 فى ريره رحمه الله .

مسدار معناها حكايه او قصه او من لفظ سدر مقلوب من سرد العربيه وهاكم المسدار


الشم خوخت بردن ليالى الحره

والبراق برق من منا جاب القره

شوف عينى الصقير بى جناحو كفت الفره

تلقاها ام خدود الليله مرقت بره



تعرف لى مشاهيد الرقاد والفره

فلاخ المصب بيهو بتبين تتوره

فوق حيا فوق محل من الصعيد منجره

شاد الله الكريم ما تلقى فيه مضره



اب عراق فتق قرنو المبادر شره

والباشندى عمت مهششيب الدره

من النقره كل حين فوق عليو منصره

ها الايام محاريها القليعه ام غره


قدمت من هنا مبى ضانها سمعت كره

فوق كارتوت شخيتيرا تخين خره

قلاتو الوهاط بى لشغه قبلو محره

يا باسط النعم تسقيها فى ها المره



قدمت موضوع الدوبيت من خلال سمنار فى معهد الموسيقى والمسرح وقد شجعنى على ذلك زوج اختى الكبيره الشكرى ود الصعيد رحمه الله

واتمنى ان يدرس مسدار الصيد ومسدار المطيرق الذى ساتطرق له المره القادمه فى المدارس اضافه للمعلقات لانها فيها حس سودانى ميه الميه

وطبعا المسدار طويل اديتكم منه مقتطفات

لكم الشكر الجزيل

ودي الرضي قال
باَهي وَريدَه عَالي صدَيرَه فَاْقله رَقيقةَ
تَمْشي مَنْ الُترَفْ في كل ثَانيه دَقيقَه
وهَذَا منْ الطبعْ مَا أتْصنعْلو حَقيقَه
مٍقْدارَ ثَانيهَ فَيهَا الحٍنه تبَقْي عَقيقَه

شكراً يا ناس ..عتيق قال
الحب يا مناى فى جوفى جزرو ومدو
علق روحى فوق وهيامى جاوز حدو
قاضى هواك أمر اعتقالى ومدو
مايقبل دفاع من سبدرات أو شدو

الأستاذ حمزة سليمان والأعزاء القراء والمشاركين ، لكم التحية .. هناك بوست في البيت الآخر بعنوان (خيمة الحردلو) تختص المشاركات فيه بفن الدوبيت ، وهذه دعوة لمن لم يزره بالتفضل بالزيارة ، وهذه مشاركة مني في هذا البوست ، حباً واعزازاً :

بت امات حقيبة الجاكة بي فستانا
منك واشقاوة اب دومتن زكمانة
دارة وشك الفوقو النجوم محنانة
خشمة عكة الفوقو الطيور حرقانة

ولكم التحية

الاخ الاستاذ المبدع حمزة وكل المبدعين من ابناء بلادي تحياتي بلاحدود
ماهذا الابداع يا مبدعين والله عقدوتنا عديل كده ورجعتونا للوطن والقعدة الضحوية في طل الحيطة والعصرية في الخلاء ونستمتع بهذا الالق والابداع ومزيد من اابداع يا خواض وبمناسبة خيمة الحاردلو وين دي يااخونا ممكن تورينا الموقع بتاعو مع خالص تحياتي

قال القائل الذي لم أستدل على اسمه:

سامية أديبة ما بتحمل مشاعرك همسة

حني شوية خلي الروح تجود بي همسة

قسما بي جملك والحروف الخمسة

نيرانك تلهلب فينا تصبح تمسى

وقد أخبرني في من أثق في ثقافته التراثية أن المقصودة لا تحمل اسم سامية كما فهمت أنا بشكل مباشر عند قراءة المربع بل قال لي أن سامية هنا هي صفة للسمو والرفعة.
ودمتم

الرائع المتالق دوما فى سماوات الابداع

حمزة
لك منا كل الشكر00 حقا قد اتحفتنا بتراثنا العظيم 0
وارجو المذيد المذيد 0

من الهودي قام بي مكندي
وكت جبد الرسن .. جاب راسو عندي
قال لي يا سيدي انعدل اللوريك ذندي
و عقب نحضر مشاط بت اللفندي

العزيز حمزة
اتحفتنا بروايع الحردلو لكننا عطشى فهل من مذيد

دوبيت من شعر الحردلو :

البارح رقادي كسيدة فوقكا بريش
وراكبوتن تجيب صقطة ومعاها رشيش
الـ حماني ما اشهل جمال العيش
هنهينأً بيسونو الدغش بيشيش

وهذه من غيره :

بالهنا والسرور العيد عليك مبروك
يا ست النجيمي الفي العقل مشبوك
قدمك للمجاربو بيودر ام سمبوك
زولك غير نعال بيفتر بيجيه الشوك

ناس قدر الله قاعدين في الفريق مابخترو
من كبي وكشف حال الحريم مابفترو
أنا البختر براي أسد الرصيمة بنترو
صاحبي إن ضلا مابفشاه ديمة بسترو


................................

أخوك يا ريا أخوك وقت الخيول يدبكن
أخوك ياريا أخوك وقت الرماح يشبكن
أخوك جبل الثبات وقت القواسي يتحبكن
كم بكيت - بتشديد الكاف - وكم قشيت دموع الببكن


............................................

ولدا ما سافر لامن يقولن فات
ماطلع الجمل دل السداسيات
ماكجر الحوايا وفي ضراهن بات
كيف يبكن عليهو دقس العيون إن مات
ولداً ما سافر لامن شهيرو يهل
وماورد البحر عطن شنانو يبل
وقت الشوف يشوف متل الصقير يقدل
واخيبةً على ولدا يعيش بالذل

ود ضحوية دا كان قاصدنا عديل كدا

فاهمين ولا دايرين درس عصر.

دوبيت كل يوم في الحل وفي الترحال
وسهران بيكي جاد شاغلآني فوق البال
الدنيا العبوس اكان بدوملها حال
ما جابت البشير يحكمنا بالبطال

i haven't read (dobiat)for longtime and thanQ all for (haza alkm min alebd3at). but i believe (al dobiat tasma3oo ma tagra).iam lookin forward to c some realplayer act soon.
hope some one out there 3endo 7aja nasma3a

عزيزي حمزه ألوحشه حصلت
ماأجمل هذا ألبوست أنا مستمتع بكل المشاركات فيه يلا واصل هذا
ألعمل ألمفيد

مسدار المطيرق

هذه القصيده عباره عن مطارحه بين الحردلو واخيه الشاعر عبد الله ومناسبه المسدار انو الحردلو واعد جاريه من جواريه الحسان واتفقا على ان تاتيه فى البيت بعد ان يتعشى الناس وترك الحردلو للجاريه تقدير الوقت فتعشى الناس وصلور صلاه العشاء ( والونسه جرت ) وانصرف الجلساء بعد حين وبقى الحردلو فى الانتظار ولما طال به الانتظار غفى قليلا ونام والجاريه لم تكن مقدره انصراف جلسائه فى الوقت الذى انصرفوا فيه وكل هذا الوقت كانت تستعد للوفاء بالوعد ولما اليل الليل حضرت الجاريه فوجدت الحردلو نائمافاستحت ان توقظه فان بقيت لا فائده وان ذهبت قد لا يصدق فاخذت عصاة ( المطيرق) لتكن دليلا على حضورها ونامت معها المطيرق

فلكم المجادعه

الحردلو

ذكرتى بالبنات لا عن مصوع فاحت

ضايق غلبهن من شينتن بتاحت

جديع ودعتن بالليم على ما طاحت

هبرت كفتى وعقب المطيرق راحت

عبد الله

الليله المطيرق فى نعيم وسروره

وات النوم عبدتو وما قريت ليك صورة

ساعتين ان صبر كت تحظى بى البدوره

سعدك اصلو داك ما بجبر المكسوره

الحردلو

غفوت عينى ديك من يومه ماها مريه

واصيح حالى متل ال دخلوا الظبطيه

اترجاك يا ابو التايه اول سيه

ما اتواخذ واكون فى حالة غير مرضيه

عبد الله

مسامح يا ابو يوسف ولو فى ميه

كونك للدغس بتسمح القافيه

ان بقى للمطيرق شيله جاب لو حكيه

مى مسروقه لاكين فيها حكمه خفيه

الحردلو

بعرفك وكت تقوم فى حجازة واجودية

تبذل فيها جهدك بى صفاوت نية

معلوم تصلح البطحانى والشكرية

لاكين المطيرق ما بتجى غير دية


عبد الله

شيلته فى الحقيقه مثبتابه الجيه

خوف مسك الضهر واللوم مع الكليه

فى سبب المطيرق لا تسيلك ديه

انا ملزوم بيها وتلنى الضمانه على

قصيده طويله جدا وهى مجرد ابحار فى دنيا الدوبيت والروح الابداعيه وحقيقة

يا استاذ الموصلى شجعتنى على المواصله واذا لقيت فرصه ح اكتب مسار الصيد

ومسار المطيرق ان شاء الله

والسلام حمزة

دردرنى الفقر لامن بقيت شنكيت

ودنى الغباين لى جبال فرتيت

امن جبت مالا فرح ام سوميت

وامن فى جبل تقلى انجدع ما جيت





كم من مجدوع الان من اجل الحبيبه

الاستاذ حمزة
لماذا الانقطاع؟

تقاي المفلخ شلتو في مشهادك
جوط واتجوجا لي هسع بعيد مشوارك
قال لي الهسال كان ترخي منه يسارك
بوريك أدعج النقعة الفتق نوسارك

مستعدين للترجمة (إن كان ذلك ضروريا)

أخوك بتاع إنتكم (منوت) ما بيفهم كتير في مسدار ، لكن بيحس كتير بي شعر (ليموني) ..
حاردلو بيقول :

البارح بشوف يشلع بريق النو
وحس رعداً يكركر في الضمير ، كو كو
داك طير القطا دوّر مشارع الهو
و فرقان البطانه اتماسكن بالضو

_____

منوت بيحس بي كلام لسيس دي زي مويه ليمون

يوماً في بســـــط* عند المزند عاجــــــــــــه*

ويوم غــــــربتبن* من جَنْره* شايل كـــاجه*

لا تهـــــــتاددوني ياقطبي السجن مــو* حاجه

بيش* نرضـــــيها غير البِل جدية الـــباجــــه*

البسط : الفرح

المزند عاجه : المرأة المكتنزة وكانت العرب تكني عنها بخرساء الاساور وهي من علامات الجمال .

العاج : الاساور وهي حلية تلبسها المرأة

غربتبن : أي سرت بهن ناحية الغرب .

جبرة : مكان في منطقة الكبابيش

كاجة : قبيلة في كردفان

مو : بمعنى ليس

بيش : تعني بأي شئ

البل : الإبل

جدية الباجة : الجدية تصغير جدية وهي الظبية

الباجة : اسم منطقة

يا عنتيل سلام مربع
ان شفتها غافية او جالسة يوم فى براحة
كلنا نحن ديل اسبوع تجدنا فراحى
من ام نظرا محور ما بشوف لى راحة
حبها فى ثابت زىالخطوط فى الراحة


علييك اللة رسل كلام الغناء؟
انا فى رجاك؟
من حقى اغنى لشبى
ومن حق الشعب على

يا عنتيل سلام مربع
ان شفتها غافية او جالسة يوم فى براحة
كلنا نحن ديل اسبوع تجدنا فراحى
من ام نظرا محور ما بشوف لى راحة
حبها فى ثابت زىالخطوط فى الراحة


علييك اللة رسل كلام الغناء؟
انا فى رجاك؟
من حقى اغنى لشبى
ومن حق الشعب على

سلام و تحايا الي المبدعين اعلاه


كباس درايزو ام حبر
يا دابي الجبال
قلبك صميم من حجر
يا دود الوعر
****
زينب تجر النم
زينب تجر النم في تور العماص
جارف بالكرف الدم
في محتر بواش حاشاهو ما بينزم
صاتور الرجال جرعك عقود الذم
يا دابي الجبال, قلبك صميم من حجر
يا دود الوعر
*****

زول من (شعرا ليمون ) دوبيت بيقول :

يواً كر نبيت
ويوماً عشانا ربيت
و يوماً نكتح التابا و عليها نبيت
يا جبت مالاً فرح أم سوميت
يا فوق جبال تقلي انجدعت و ما جيت

الاخوان الاعزاء


لكم المحبه

منوت اخوى و ود العم

eyes of liberty

ابو غيداء العنتيل انور

الخواض

اهل العوض


وهاكم


كت فى جقدله وفاقه وشويه روقه

على الدنيا راضيه العندى مى ممحوقه

شن معناها هسع نمتى المربوقه

كانت ليك قبيل ما تبقى كده مسروقه

مما قمتى فوق ساجك مولع ضيك
ما اتبعت لافيه العطاش بى ريك
السرع والنشاط ما بشبهن لى زيك
تاتى المشيه خلى الناس تموت بى غيك

عزيزي حمزه عشان اخوك مبخر قمت بتاليف المجادعه دي هسع

سارح لي زمن داير افوت بي حيك
لابس فنجري واخر تمام متشييك
ان مابقيت حبيب ممكن اكونلك خيك
وين في دا الزمن نلقاهو سمحا زيك

مع حبي

استاذى العزيز الموصلى
تحياتى واشواقى
ومتاسف جدا ولك العتبى حتى ترضى ويعلم الله ان الظروف هى الماخره ردودنا وطلتنا على ناسنا الحلوين0
(دوبيتك شديد)
الزول الصباه فات الكبار والقدرو
كان شافوهو ناس عبدالله كانوايعذروا
السبب الحمانى العيد هناك احضروا
درديق الشبيكى الفصلو فوق سدرو0

عنقا فاق وريد الزازة شافلو ضليل
مهدول الكتيف ديسك غزير وضليل
مردة وفاقلةضهرك قصيف وقليل
متبورة القدم ساقك حكاةخليل


اظنك عرفت عذاب المغنى

هذا البوست يحمل عتابا الي كل من حمزه سليمان وانور عبد الرحمن
اما حمزه فلانه دائما يتاخر في ردوده وظروفه مقدره واخي انور قد طلبت
منه ان يسجل لي دوبيت بصوته الجميل كي استخدمه في احد مؤلفاتي
للموسيقي الاليكترونيه ولم يوفي بعد ان وعد وظروفه ايضا مقدره ولكنه
عتاب المحبه

الي حمزه سليمان
ياود سليمان ماكا بترد قوام
والراجيك كتير بتسوي لي قدام
وقولك تب سمح ديمه بيفوح نسام
الا العطله بس فرقت ودايره همام

الي انور عبد الرحمن
قلنالك تعال غرد وقول دوبيت
كشكر وقت حاضر بالمره مارديت
احسن يابطل تبدا ونقول سويت
قبل الموصلي يحرد يسوي البيت

مع محبتي لكما

اللّكة الــــــــــبِِتل* يدو ومكـــــــضّم* ســــــــيفو

واسقي انــــــياقو* من ترعة* وسدر بــــي قيفو*

في تقطيع* مجـــــــالس همّلن من صــــــــــــــيفو

يوم بعنــــــــــــالو* بي الســـــاحر* وابزعِل كيفو*

اللكة : مغلق الفهم

تل : هز ومال وتمدح الرمرأة بتل اليد

كضم : سكت

انياقو : انياق جمع ناقة

ترعة : بركة الماء

قطع : القطيعة هي الغيبة

القيف : شاطئ النهر

الساحر : احد جمال الطيب ود ضحوية

بعنالو : من عنى بمعنى قصد

الكيف : المزاج والسرور

اخى الخواض
شكرا ليك والله ما قصرته مجادعتك جميله ومشاركاتك كلها رائعه دايما قدامى ربنا يحفظك
واصل معانا0

زاد القلب روعه حبيبي وكتنين جانا
نارنا الولعت مالكه القلب سرجانه
بي بال من جهنم في الحشا دارجانا
مو فالنا الثبات الطيبه مي فارجانا

يا اخوى الطيبه مى فايتاك

ماك قدامى ود قبايل الله يخليك فى الدوبيت متعه خاصه

متعك الله بالصحه والعافيه

اخي حمزه
انما كنت احاول ان اصحي شيطان شعري الذي تركته نائما منذ
ايام العالي والمراهقة وها انذا ارد عليك بابيات جديده

مشكوره وياكريم محريه فيك الذمه
يالاهلك عزاز مشهودلهم بالقمه
والناس المعاك معروفه فيهم همه
والكايس عداك احسن يفوت ينطمه

مع حبي

اضغط علي زر play

استاذى وصديقى الموصلى
شيطان شعرك كان نائم من الثانوى وصحا الان واوحى ليك بهذه الكلمات الرائعه لو كان صحا من زمان كان بقى مارد كما عظمة موسيقتك لك شكرى وحبى.
ابى يبقالى فوق غيرك اجيب بوباى
لا شفناك ولا خبرنا بيك حجاى
القاف السبق والدايرو من اوجاى
كل القتو فى وصفك اراه دون جاى

اخى عمر مهدى
شكرا للمشاركه ولكنى لم استطع سماعها ولا ادرى لماذا حاول ساعدنى كى استمتع بها

اخي الحبيب حمزه
يلا واصل هذا البوست الجميل وماتنقطع

الأخ حمزة وضيوفه الكرام
فتحتو باب ما بقدر أقاوموا .. أسمحو لي أدخل
ودي بليلة مباشر

مجنون ليلى من جني الجنون عاريهو
وكان جنيت حلالك عقلي شن طاريهو
وكان طشيت فداك عمري السراب باقيهو
إلا يبكـي حالي البـي كـان شفتيهـو

تحياتي

الى Singawi

لك الشكر وواصل

بليله مباشر ولا ....... مكاشر

الاستاذ الموصلى

كلما تكتب دوبيت بحس بتواضع موهبتنا

الاخ حمزة عليك بالضغط علي زر play

مى وسيخانة حاجة لطيفة
نفسك تنفتح وكتين تمسة قطيفة
ان جيت شلتها تجيك هى مليهيفة
وتاخد ليها ضحكة وتبردك بى هيفة

عزيزي حمزه
انتم اهل لها

حالي البـي يازينوبـة حـالاً شيـن
يا زينوبة خاطري كسير وقلبي حزين
يا زينوبـة شهيتيني نـوم العـين
حالـي البـي كمل فرحة الشامتين


مشتاق ليك كتير يالجوة قلبي سكونك
لقيـاك منيتي وقبلة سعادتي عيونك
شوقك شال منامي وشـن حياتي بدونك
حني على الأسير أو حلي قيد مسجونك

الاخ انور

بقترح عليك انزال دوبيت بصوتك عشان الناس تستمتع

بهذا الكم الهايل من الابداع ويعيشوا اصاله الدوبيت

ومجادعتك الاخيره نار الله المويقده

الله يخليك

معليش أعيد إرسالها لعدم وضوح اللون

حالي البي يازينوبة حالاً شين
يا زينوبة خاطري كسير وقلبي حزين
يا زينوبـة شهيتيني نـوم العين
حالي البي كمل فرحة الشامتين

مشتاق ليك كتير يالجوة قلبي سكونك
لقياك منيتي وقبلة سعادتي عيونك
شوقك شال منامي وشن حياتي بدونك
حني على الأسير أو حلي قيد مسجونك

يا سلام عليك اريتك تجمع وكدى اللون تمام

بعد سبعين سنه وبيض سبيب عينى

ما بحسب بساهر من طوارق الغى

شوق زينب ترى خلانى منى ولى

اشكى على الغصون لى من يعرف البى







الزول البريدو يا ريتنى كان ردتو

كل ما ازكروه الحال العلى يبتو

اصل الشتله بتشيل الثمار وتحتو

وانا كلن مته فنجان وانكسر عن ستو


ابشر

عمده البيت والضيفان
سلام حداي مداي
وهاكم دي

ياجريعه العسل الشارفه لي رشافكْ
نبهتي قوبنا بالعنجه وبروق كشافكْ
ربنا سمحك كيتاً علي من شافكْ
حرقتينا ياشافعه التحرُّق شافكْ

الاخ الخواض


دوبيتك نار شاف عديل كدى

ياخى انت فنان

يديك العافيه

بت ناس فاطنه زينب فيها عنقا باهى
شن تشبه برا الفى الناله غريد ساهى
حلفوا الضاقو ليمك فوق كتاب الله
احلى نفيسها مالا الزعفران والشاهى

شكرا ليك يا ورده دايماعبيرك مدهشنا0

********

فى يوم الجمع دايما رطبها عوالى
ماخده النورة فوق الصفصفو الغربالى
ان ثبتت سيادتك للشباب اجمالى
تحكابها الدول لاعن سراية الوالى

الناس فى العروض ما تقيسه بى تيبانه

ما يغرك لباسم والعروض عريانه

ديل حراس رزق ذى التكنه امانه

ذى ابل الرحيل شايله السقى وعطشانه


................


انعكس الامر عز الرخيص والعانى

والصح والصريح ما بتلقى ليه معانى

المسكين يضيع بقى ينفع الفرعانى

والظالم نبقى عونه ترى هدى الموجعانى

هذا الدوبيت الاخير لى ود الرضى

عمره 100 عام حيث انه ولد بالعيلفون

عام 1884 وكتب الشعر وعمره 10 سنوات

فحفظ القران فى ام ضبان حيث انه كان يقرا

سوره يس عند كل وضوء

يا ترى لو امد الله فى عمره ماذا كان يكتب

البارح طريت ليمك هوية ليل
مسافتك يا ام رشيم لى ابعدت بلحيل
ال خلى صبيب عينى جلبا سيل
ضوق الكمعه مسخ تافح القنديل


معانى
طريت:زكرته
ليمك:اصلها من لم واجتمع
هوية ليل:نصف الليل
ام رشيم:الجاريه
جلبا:جلب السيل ما يجلبه السيل من زبد
ضوق:ذوق
تافح:التافح من الثغر اليانع

عزيزى الاستاذ جوزيف كمايحلو لندادتك؟وليتنى اطول؟اولا شكرا ليك لاكن برضو خليت المسؤلية على ابشر بالخير

مقبل الايام القريبة سوف يكون معك الدوبيت والنميم
المو خمج؟
وكما استغلال براكه
لهذا البوست فى طرح اسئلتة استغل سوانح الفضاءات الحره هذة واهديك
رائعة شيخ شعراء الاغنية السودانية
1884--1982 انه محمد ود الرضى
علها تلامس ذلك الشفيف يوسف؟سمعتها ذات مرة فى بواكير صباى من المرحوم خلف الله حمد قادنى فضولى لسؤاله عن سر استعمال الدلوكه بجانب البنقز ذو العلبتيين المصرى +الطبله فقال لا بد من خناقه؟ادركت هذا المعنى بعد فتره .وعن حوجته كمغنى لتلك الخلفيه الايقاعيه المليئه
اعتقد بعدها ولذات الحوجه اتت العبقريه السودانيه بالعلبه الثالثه فى البنقز وصار البنقز السودانى المميز؟
ارجع بك استاذى الى قصيدة انا فى التمنى انها جديره ان تداعب خيال توزيعك وعلمك وانها ساعه لقلبك؟
ان فى التمنى ديمه هديلى ساجع
ما لقيت لى مغيث ولا لقيت لى مراجع
داير اشوف حبيبى اليوم داك شفتو
رايق دمو ناقع
اسود شعرو حالك اما صفارو فاقع
تتلاصف خدودو لا حجاب لا برقع
يفر خيط بسمه يشبه برقا ليلو هاجع
اقيس الفم بودعه والقى الودع واسع
اقيس الليل بشعرو والقى الفرق شاسع
اشوف لعسو ونواعسو
جل البارى صانع
يرفع ناعساتو ويسبل نظرو واقع
اشوف فى خدو شخصى وفى صدره المصارع
داير اشوفو غافل داير اشوفوجازع
محنن بدون قنله وحدو وتوبو واقع؟؟
يتغطى بسواعدو ويحنو كانه واجع
يتلجى بى مرافقو واطراف المضاجع
ويردد لى نغيما تشتاقلو المسامع
وتلب فوق شفاهو لؤلؤة المدامع
اعاين فيه واضحك اجرى واجيه راجع
متلاعب ليس الا ما موضع مطامع
دى ما بلقاها زولا زى انا صيده ناجع
فى المرة القادمة اكتب لك انا فى التمنى 2
لك الود
ومن حقى اغنى لشعبى
ومن حق الشعب على
لا بى ايدك تمنع قلبى
ولا قلبى كمان بى ايدى

عزيزى الاستاذ يوسف
تحيه عطره
لخطاء تكنيكى ارسلت لك بوسث عن طريق الصديق حمزه تجده فى غنو معاى مسدار الحردلو
لك العتبى واتمنى ان يعود التركييز كما يجب؟
لك الموده
من حقى اغنى لشعبى
ومن حق الشعب على
لا بى ايدك تمنع قلبى
ولا قلبى كمان بى ايدى

لسه فى دروشتك ده يا ابو منتصر

تحيات طيبة من أهل العوض مخصوصة للاستاذ حمزة وبقية حبات العقد

الاخ عمر مهدي الله يعرس ليك معانا . او يعرس لينا معاك .. فقد أمتعتنا فعلا بهذه الرائعة الجميلة معنى وأداء ، اداء سيف الجامعة أداء متفرد مافي شك

وبهذه المناسبة أنقل قول الشاعر

نحن المابقولونا الخلوق وين جيتو
وتاني بنركب الدرشي البجابد خيطو
نحن عشيرنا ما بنخونو نخرب بيتو
الا عدونا بنعصرو ونطلع زيتو

مع التحية

اهل العوض اقصد اهل الفرحه

كيف الحال كتر من جديدك

لك الشكر

عزيزي انور الغريد
محريه فيك الكرامة والكرم وانا في الانتظار
واقتراحك حول انا في التمني مي الميه تمام التمام فهي تنضح
بالشعر الوقع وتموج بالرومانسيه الجزله وانا جاهز

سيد الفرحه سلام
سودانيه سود عاليين الهمم
بنسند الضعيف وما بناكل الرمم
مين زينا؟
جعلى ودنقلاوى وشايقى ايه فايدانى
غير جعلت خلاف خلت اخوى عادانى
ويكفى النيل ابونا والجنس سودانى

قدر ما اقول انوم من نومى
اتب حاس ثانى وحبك ياجميل من الدمع حسانى
للاسى والنويح ريدك دوام حسانى
وحالف ما بسيبك حت كان ابوك حسانى
من حقى اغنى لشعبى
ومن حق الشعب على
لا بى ايدك تمنع قلبى ولا قلبى كمان بى ايدى

أبعدنا الزمان من اللهيجو بشيقنا
عاودنا السهر والنوم بقى مو رفيقنا
لامتين نلاقيهو المنشف ريقنا
ناخد بيعة من كف ايدو نحيي طريقنا

الكمساري صفر والتـرام اتحـرك
طار بيهن تركني على القضيب اتعرك
بهواهن هواهن جوة قلبي اتحرك
غابن مـنـي يالكمساري الله يضرك

الجاغريو

ابشر بالخير


انت شيلتو... شيلنى يالقطار


وكتير الفاتم القطار

يا جريعة العسل الشارقه رشافك
نهبتى قلوبنا بالعنجه وبروق كشافك
ربنا سمحك كيتا على من شافك
حرقتينا يا شافغه التحرق شافك؟
0000000000000000000000000

000000000000000000000000
0000000000000000000000000000
ان شاء الله بركت النبى يغلبوك اردافك
كيه عليكى الدوف المردوم يهدل اكتافك
والشعر امشى زايد ويدوخك عسافك
ويجبروك وتطنطنى من بويخة شافك؟
من
حقى اغنى لشعبى ومن حق الشعب على
لا بى ايدك تمنع قلبى ولا قلبى
كمان بى ايدى
حميد

هلا هلا يا ابو غيداء

ما قصرت

جمالاُ غير كلف حكمه رحيم وجليل
وجيهك دارة القمر البضوي الليل
ياريت كان بقيت تحت الصويل ضليل
أو عنبر عزيز او هبهان او هيل

ماهو دخيل بيوت حاشاهو ما بتحشر
ماهو كتير كـلام عسـلا لهيجو مقطر
وماهو قبيح قوام مخلوق طبيعي مضمر
وماهو وراء الغمام مسخ نجوم البندر

تحياتي

singawi


عقب

العزيز حمزة

ياخوي طاب المقام في دارك الرحبة دي
همبريب يرد الروح والدوبيت أهله لامين وتامين

دحين هاك دي

الليلة الغـرام حكـم علي سلطانو
ذكرني الحبيـب وشواني بي نيرانو
وين الشال قليبي وساقني في حيرانو
واشوقي الشديـد لي ضمتـو وهمسانو
مجبور القدر حتم علي هجـرانو

الليل الطويل زاد الفراق تعذيبو
جمر الشوق يحرق في حشاي لهيبو
وين الشال قليبي وخلى عندي قليبو
ما بنسى ان نسيت ليلة فراقنا نحيبو
معليش يام خدود الحر بيرضى نصيبو

تحياتي

سنجاوي

اهل الدار عوافي

مانـــــي الفاسد ال بي الكِضبْ بِتنبّـــى

سارح بى العــــُروض لي جارتي ما بدبّى

ياستـــار من نضـم الخشوم والسِبـــــّة

انا اخــو الزينة عند حل الرفيق والضّبـــّة

عقب


دوبيت فيه كتير من القيم الاخلاقيه

ابشر شيخ الدار

يقول شيخنا الطيب ود ضحوية، تغمده الله برحمته

الليل أمسى و الـبل حررنو مشيهن
عقبن موية و الجبل أب قرود راجيهن
الخلاني فرض الخمسة ما اقضيهن
رزق الدنيا و المحن البصارع فيهن

اخى الفنان الخواض الرائع


لك تحياتى ( فامشوا فى مناكبها وكلوا من رزقهاواليه النشور ) صدق الله

العظيم ....ما تنسى الفروض الخمسه

والطيب ود ضحويه فى فراش المرض ضريح مستشفى السلاح الطبى فى زمنا باكر

كتب اخر ابياته وهى


يوم بنشق عتاميرا بعيده وتيه

ويوم بنداور البكره ونمصره ثديه

يا نفس السواد المتعه كملتيها

ابقى لزومه وقت القرعه وقعت فيها.

أهل الدار سلام

قدر ما قلت أتوب إبليس يلملم ناسو
يقول لي ما تتوب التابو قبلك خاسو
والعيـش اللذيذ ما تنقطع من كاسو
ما ظني الرسول بالنـار يحرق ناسو