طرائف وحكاوي المساح الذي لن يرتاح...!!!

هلا يا يوم يا حار وحبابك يا يوم الهندسة والمعمار
وشوق السحابة الراحلة علي كروس هير يحملنا بكل حنين الي مدارات الهندسة الجميلة التي هي غرب السنتر والتي هي صلاة النبي فوووقها
هنا سنسافر عبر حكاوي وبلاوي وطرائف المساحين اصدقاء الخلا والرفيق الفسل وكراكير وجخانين كتب عليهم ان يحطو بهتشهم ومعداتهم فيهاكاوائل طلائع اعمال التعمير وتنمية الارض وتحسس من اين ستوكل كتف الاشياء سوي ان كانت برا او بحرا ومرات مرات ان كان الحكاية وراه فالمساح موجود وبكثرة جوا وفي اعماق الارض..

المفارقات والبلاوي التي تجعل تضحك عاليا تضج بها عوالم المساحة وقد بداء لنا هذا الامر باكرا في تدريب الميزانية وقياس اللفل في شارع النيل وذلك الجدول العجيب الذي قيل في الاثر بان بعض الفتية من المساحين قد بداو قياسات انطلاقا من النقطة الموجودة خلف التاور في الكلية وحتي كبري النيل الازرق وفي المعتاد ان ياتي (الايرور) في حدود (الملي مترات) ونيف...ولكن الجموع المساحية التي كانت راسها دايش من استخدام اللفل والقامة وتلك الاشياء التي كان الراحل حاج الباقر من يوضبها... بدل (ملي مترات) ونيف اتي هولا النشامي بايرور يساوي ما يقارب الكيلو لووووول..

اولي التسريبات عن البلاوي والحكاوي التي قاعدة بتحصل للمساحين البروفشينل سربها الينا الدكتور النحرير محمد عثمان استاذ المساحة بالكلية وواحد من اعظم المساحين السودانيين الذين جابو هذا السودان شبر شبر..
دكتور محمد عثمان قال مشو مامورية بتاعة مساحة لتثبيت نقاط تحكم مساحي ونقاط التحكم المساحي دوما تحتاج في تركبيها وتوضيبها الي زمن حتي يتم (الاستبلتي) للخرصانة وتصبح النقطة ثابتة كونكريت... اها ثبتو نقاط كثيرة واحداهم كانت في اطراف قرية(وذكر بان النقطة الجنب القرية دي بالذات جننتهم جنون شديد في القفلة بتاعتها واعادو شغلهم زي ديشليون مرة حتي يطمئن قلبهم المساحي)... واها يوم الخلاص قرروا يمشو من القرية دي قرر اهالي القرية ان يبضبحو ليهم خرفان وعملو ليهم عازومة كاربة وفي نص العازومة دي جاهم احد ابناء هذه القرية وقال ليهم يا ناس المساحة والله شرفتونا كثير وبارك الله فيكم الثبتو لينا نقطة جنب حلتنا ولكن قبيل جاء زول مطرطش من ناس الحلة حفر مصيبتكم الدفنتوها دي ...وجدعها بعيد ولكن ماعندكم مشكلة انا حفرت ليكم حفرة تاني وختيتها ليكم فيهاااا

مساح جديد كرت كرتونة مشي الي كراكير السودان وبصحبة مساح اخر ذو خبرة ميدانية كبيرة
وداعكين الاثنين ميزانية وكل وااحد جاري باللفل بتاعو اها اللفل بتاع المساح البرلوم يبدو ان جهاز من الاجهزة الصينية التي تصنع في بعض الاحيان كلفل قطر قام...
وفي احدي النقاط اراد المساح الجديد ان يظبط الستنغ بتاع الجهاز ليتفاجي بان (البابل) قد اختفي تماما سماء وارض
ليصيح البرلوم صيحة شهيرة صارت نكتة في الاوساط المساحية القريبة من تلك المجموعة..
يا مهندس عمر البابل
يا مهندس عمر البابل
فقد كان ذلك المساح الجديد يصيح مخلوعا ومفزوعا وكان جنيا قد مسه

معقول يا كيكي
يعني عايز تقول لي انكم كنتو بتقيسوها بالجد!!!!!!
يا اخوي نحنا كنا "بنطبخها" ، ومن قبل يوم كمان
وطبعاً الطبخة لازم تكون مبنية على ارقام شبه حقيقية ، لانو عمك حاج الباقر ربنا يرحمه كان عارف مكان الطلعات والنزلات
يعني تكتب النتيجة بي الإرور بتاعها بعدين تعمل باكوورد للتيبل حق القراءات
اي واحد حاول يعملها "حقيقية".........رسب


المنبر العام حاصل ليهو شنو يا كيكي؟

Quote: معقول يا كيكي يعني عايز تقول لي انكم كنتو بتقيسوها بالجد!!!!!! يا اخوي نحنا كنا "بنطبخها" ، ومن قبل يوم كمان وطبعاً الطبخة لازم تكون مبنية على ارقام شبه حقيقية ، لانو عمك حاج الباقر ربنا يرحمه كان عارف مكان الطلعات والنزلات يعني تكتب النتيجة بي الإرور بتاعها بعدين تعمل باكوورد للتيبل حق القراءات اي واحد حاول يعملها "حقيقية".........رسب المنبر العام حاصل ليهو شنو يا كيكي؟

هلا يا الشفيع وحبابك يا هندسة
والمنبر ياخي والله ماعارف الحصل عليهو شنو
ويبدو بانو هنالك مشكلة حقيقية لانو في العادة بكري بكون نائم زي المواعيد دي
ونتمني ان تكون العواقب سليمة...
والطباخة يا الشفيع بيني وبينك حاصلة حاصلة (الحكاية بكون فيها ترس تقيل)
رغم انو الطبخ ممكن يودي التوج زي الجماعة الطبخو المسالة الكانت اجابتها (سغما) العاملة زي الستة ديك
طبخوها وخلو الاجابة (5.99)

الطبيخ ده يا كيكي ادربنا عليهو من سنة البرلم
من قانون اوم اساهل داك ، والمشكلة كل الاميترات ما بتشتغل الا تديها خبطة
يعني تلقاهو قاري ليك 4 امبير ، تديهو خبطة يقرأ ليك 12
بالله تعمل شنو غير تطبخ
يا تطبخ يا ترسب

وعندنا تجربة ما عارف في سنة كم عن Hysteresis Loop والمفروض يجيك القراف في شكل صفقة 
واتذكر كان معاي في التجربة دي صديق الاصم وعمر الدقير
طلعناها ليك صفقة زي ما الله خلقها
صديق قال لينا غايتو با عينونا تيوترات يا رفدونا

Quote: صديق قال لينا غايتو با عينونا تيوترات يا رفدونا

بالله يا الشفيع انت دفعة النحرير عمر الدقير
ياخي انت زول سنيرنا الاكبر تماما لانو ناس عمر ديل طلعو من الجامعة كدا ونحن جينا وراهم في نفس السنة 85
الترس في الكلية كان رهيب وليهو فنون وجنون
في دروينغ (تو) صاحبنا هاشم كونسايدر لمن سخنت الحكاية معاهو قلب (يدو) برجل ولطش بيها المقاسات من جارو
وتخيل كونسايدر ده جاري زي خمسة متر جوووه القاعة وكان حريص علي اصابعو ما تتحرك وتكون محافظة علي المقاسات اللاطاشها

كيكي الحبيب وودعمي الشفيع،
أماني ما عندكم سماحة منبر!
بركه العام داون الخلاني جيت تاوق بي هني!!
وتاني ياني الماني مارق وحردت العواره الحاصلي بي
غادي ديك!!

كبكي ورفاقه الكرام
السلام عليكم ورحمة الله

شكلنا حنقدم طلب لجؤ الى منبركم العامر حتى اشعار اخر

Quote: كيكي الحبيب وودعمي الشفيع، أماني ما عندكم سماحة منبر! بركه العام داون الخلاني جيت تاوق بي هني!! وتاني ياني الماني مارق وحردت العواره الحاصلي بي غادي ديك

هلا يا محمد عبدالرحمن وحبابك يا الما كيكي
واليوم الحار هو مدهش دوما وانا زاااتي كنت غايب منو والليلة اشتقت للربع او كما يقول اهل الخليج
ويبدو انو المقام سطيب لنا جميعا بجاي
واخير لينا فعلا من العجاج والكبع واللبع والخنق الشلاليف المتطايرة بهناك ديك
لووول
وتحياتي يا محمد عبدالرحمن محمد . الما كيكي

Quote: شكلنا حنقدم طلب لجؤ الى منبركم العامر حتى اشعار اخر

هلا يا البدري وحباب كردفان وسيرة البركس الجميل
ومعليش يا شباب حناخذ رسوم وقبانة ولو زول ما دفع حنسوي شغب واحتمال نعمل معاه كركبة ودشمان في الحلبة بتاعة المنبر العام
ونشيل حالو

Quote: ومعليش يا شباب حناخذ رسوم وقبانة ولو زول ما دفع حنسوي شغب واحتمال نعمل معاه كركبة ودشمان في الحلبة بتاعة المنبر العام

يا كيكي ياخ براحة علينا قبانة شنو ياخ ؟ انتو اتفاقية جنيف لحماية اللاجئين وحقوقهم ما سمعتوا بيها ولا شنو ؟ عموما للضمان كدي معزوم معانا باسطة ولبن من النوع البيحبوه اخوانا انصار السنة.. اها المراقة دي كيف معاكم ؟!!

أهلاً بي سرنا وِليد عبد الرحمن والبدري
يا ناس البيت بيتكم
اخدو راحتكم وما تسمعو كلام كيكي ده


الدروينق يا كيكي ده موضوع تاني خااالص
طبعا انتو ما حضرتو الارهاب بتاع "علي يوسف"
كان في المعمار بورد كده "سحري"
فيهو لمبات من تحت
ومصمم "للتتريس"
كان مريحنا ليك شديييد
طبعاً كنا ننتظر لامن "علي سيوري" يخلص وبعدين نمشي نترس منه
والله كانت ايام لا تنسى

جنا الوراريق أهل القبب،
بديت سمِّح:

Quote: أهلاً بي سرنا وِليد عبد الرحمن والبدري يا ناس البيت بيتكم اخدو راحتكم وما تسمعو كلام كيكي ده

يلا تقوم تطردنا بالبارد:

Quote: الدروينق يا كيكي ده موضوع تاني خااالص..

وهلمجرا!
قايلين الدروينغ الليلكن دا ما درونا ولا شنو؟
والله كان عندنا كورسات [ هندسه] زي الحلاوه!!
شابكننا دروينغ و[تريس]!!

والله حقيقه يا كيكي العجيب،
ياخي ديك هباله لا مواخذه ما أنزل الله بها من سلطان
ما تلقالك شي يفتح نفسك الا ما ندر خصوصاً اليومين ديل
الحاصل شنو ما بعرفو..
غايتو ربك يهون..
محمد عبدالرحمن [المطرطش]!

Quote: والله حقيقه يا كيكي العجيب، ياخي ديك هباله لا مواخذه ما أنزل الله بها من سلطان ما تلقالك شي يفتح نفسك الا ما ندر خصوصاً اليومين ديل الحاصل شنو ما بعرفو.. غايتو ربك يهون.. محمد عبدالرحمن [المطرطش]!

هلا يا ابوحميد
وتبري انت ياخ من الطرطشة فحقو تقاسم اخونا عبدالكريم احمد في الما كيكي دي
فهي منحة كيكية وعربون صداقة اسفيرية نتمني ان تدوم..
المنبر يا محمد بقي ساحة للاحتقان والخطاب المتهتك والتفسخ اللفظي والعصف الذهني الخرب..
وفي الزمن الذي يحتاج فيه الوطن الينا جميعا نجد انفسنا هالكين للزمن والباندوث في الدشمانات ورغبة الانتصار للذات والمكابرة التي
لا تنفع وتضر بدور المنبر الذي يجب ان نفاخر به الامم
ولكن يبدو بان الحال في الواقع وفي الاسفير كلو طين في طين
والناس محبطة وقايم ليها كك في راسها وجاية تفكها في باندوث بكري ابو صلعة المسكين ده

ودمت يا الما كيكي

كيكي ،،

إنشاء الله المنبر العام (يسكروه) إلى أجل غير مسمى ،،


والجابك ،،
يجيب أبو الخل ،،

(وش شمتان ،،)

Quote: إنشاء الله المنبر العام (يسكروه) إلى أجل غير مسمى ،، والجابك ،، يجيب أبو الخل ،، (وش شمتان ،،)

هلا ياهومي
وبيني وبينك الواحد بكتب حسسع وهو خجلاااااااان لوووووول
واعتبرني ياخ من العائدين واعتبر اللاستفتاء حصل والانفصال رجع الطيور الراحلة الي ديارها
ودي القعدة يا هومي واليوم الحار wayeeeeeeeeee

Quote: عموما للضمان كدي معزوم معانا باسطة ولبن من النوع البيحبوه اخوانا انصار السنة

فعلا عرض يسيل له اللعاب ويذكرني اوضة صحبي انصار سنة شعرون وصلاح علي
ولكن اين البطيخ ياااخي...
طبعا كمية البطيخ الاكلناها في اوضة انصار السنة ديك تاني ما اظن اكل زيها قريبات دي لوووووول

Quote: المنبر يا محمد بقي ساحة للاحتقان والخطاب المتهتك والتفسخ اللفظي والعصف الذهني الخرب.. وفي الزمن الذي يحتاج فيه الوطن الينا جميعا نجد انفسنا هالكين للزمن والباندوث في الدشمانات ورغبة الانتصار للذات والمكابرة التي

ما قلت الا الحقيقه يا صاحبي الجميل..
وبعدين ماخدين المسأله كأنما هي شغل [مراهقين] للأسف
وما دروا أنهم يقذفون انفسهم لدرك أخشى ألا منجاة منه..
ربنا يهدي الجميع..
__
ياخي معليش علي الازعاج وواصلوا نضمكن اب لهجاً طاعم!!

كيكي ،،

Quote: واعتبرني ياخ من العائدين

نتمنى بس تكون عودة طوعية ،،

وما تقوم تطالب بالعضوية المذدوجة ،،




كاااااااااااااااااااااااااك ،،

المنبر(عام) وأريتو يغرق..

مرحب بيكم كلكم بيجاي..

تخريمة:
انت يا كيكي صاحبك دة كدوسو دة توباكو ما بخلص؟؟

العزيز كيكي و ضيوفة الكِرام

تحياتي, و الف مبروك اختيار قطر لمنديال 2022

ضحكت كثيراً عندما صرح احد المسئولين السودانين قائلاً

ان السودان سوف يُسَخِر كل امكانياته لانجاح هذه الفعالية

بانتظار كثير من الطرائف و الحكاوي

و اليكم هذه الحكاية الطريفة

في عام كم كده ما عارف و بمدينة عطبرة حيث التدريب لطلبة السنة الثالثة

اصدرت الجبهة الديمقراطية عدد من جريدة المتاريس الحائطية التي تصدرها الجبهة

الديمقراطية بالكلية ... و كان ان اقتربت احدي الغنم و اكلت جزء من الجريدة

فقال محمد الحسن عثمان (الداف) و عضو البورد الكسول

الغنم ديل ما عارفين انو نحن قادرين علي الدفاع عن منابرنا

اي غنماية تقترب من جريدة المتاريس سوف نتعشي بيها