سلسلة حاجة سعيدة ..

طبعا تابعنا كلنا حلقات (حاجة سعيدة) الكتبها عمر الحبر من خلال المنبر ..
واللي للأسف ضاعت مع التهكير الحصل ..

حاولنا نلقى أحد الزملاء قام بحفظ نسخة منها ..
لكن للأسف .. مافي زول حفظها ..
وعمر الحبر ما فاضي عشان ينزلها تاني ..

عموما ،،
أمس ،، وأنا بأقلب في أوراق قديمة .. لقيت نسخة مطبوعة من الحلقة الثالتة ..
فتشت في الجهاز وفي الملفات المحذوفة ،،
عسى ألقاها ،، بس بدون فايدة ..
فقمت كتبتها من جديد .. (الله يجازي الكان الهكر ..)

نتمنى تكون دي بداية لتجميع الحلقات الضايعة ..
يا حبر أصحى معانا شوية ..
___________________________________________

بقلم الكاتب الكبير : عمر الحبر

الحلقه الاولى من مسلسل الحاجة سعيدة ..

يقال ان اخونا حسن بابكر مشى لى واحدة بتقرأ الكف اسمها حاجة سعيدة بت عبدالقادر ..
ودار بينهما الحوار الآتى (الكلام دة أيام السمستر الراجل ما قارى ومزنوق وعايز يهرب من الواقع)
حسن بابكر: السلام عليكم يا حاجة سعيدة
حاجة سعيدة: أهلا يا ولدى
حسن بابكر: أنا اسمى حسن بابكر يا حاجة وبقرأ فى كلية الهندسة جامعة الحرطوم وسمعت بيك كتير
وقلت اجيك تقرى لى كفى وتورينى ال بحصل لى شنو فى الامتحانات ،،
حاجة سعيدة: هو السمستر قرب يا ولدى؟
حسن: إنتى كمان عارفة إننا شغالين بنظام السمستر؟
حاجة سعيدة: أنا من كترت ناس هندسة البجونى هنا عارفة موادكم كلها من اولى لى خامسة ..
والدكاترة البدرسوها وكمان يا ولدى مرات قبل ما أقرأ الكف بأعرف الزول كان فيهو عمار ولا ما فيهو
أنا يا ولدى وأعوذ بالله من كلمة أنا شدة ما اتمرست فى المجال دة فكرت أعمل لى بورد فى بيتى دة ،،
لكن قلت مالى شايلة وش القباحة خليها ال اشيلوها ناس كليتكم ..
حسن: أها يا حاجة اقرى لى كفى ..
حاجة سعيدة: مد لى ايدك ويا ولدى لازم تعرف أنا بقول الحقيقة والشى ال بشوفو يعنى ما بقطع من راسى
وبرمى الكلام زى الدراب عشان كدى يا ولدى كان قلت ليك أى حاجة ما تزعل منى ..
حسن: مافى مشكلة يا حاجة بس شوف لى موقفى فى السمستر دة شنو .
حاجة سعيدة: بسم الله ,، أول حاجة يا ولدى عندك ال سانيترى نمرتك فيها 8
حسن : يا حاجة انا قارى ال سانيترى كويس ما ممكن اجيب 8 بس
حاجة سعيدة: يا ولدى ما تقاطعنى انا بقول الشى البشوفو وكان ماك مقتنع سجل كلامى وتعال لى بعد البورد
حسن: خلاص يا حاجة تمى كلامك كلو .
حاجة سعيدة: عينى باردة ياولدى نمرتك فى الماث 43 , ال هاى وى مباصى لكن ساقط كورس ويرك وفى ال اريقبشن
نمرتك 30 لكن دكتور المادة ود حلال تماها ليك 40 , الاسترينقس نمرتك 7 , الدكتور النحيف ودقنو شايبة ولونو
اسمر دة منو يا ولدى؟
حسن بابكر: دة دكتور زروق يا حاجة, مالو؟
حاجة سعيدة: هو ما مايل يا ولدى لكن يوم امتحانو جيب معاك ثيرموس موية كبير وجك والله يا ولدى اليوم داك
تشرب ما تروى ونمرتك فى مادتو 4 , ايدك دى مالها سودت كدى بقيت ما شايفة حاجة كدى ادينى كفك التانى ،،
حسن: هاك يا حاجة لكن طمنينى شوية
حاجة سعيدة: اطمنك بالكضب يا ولدى , بسم الله واللهم اجعلو خير وياربى تستر
حسن: فى شنو يا حاجة سعيدة خوفتينى
حاجة سعيدة: والله يا ولدى انا ذاتى خفت اول ما مسكت ايدك التانية ظهر لى عبدالله ابراهيم و عاد ال نكلمك
ياولدى امتحان عبدالله ابراهيم جاييكم زى الساطور فى نص الراس وحسب ال شايفاهو دة انت كان ورقتك صححتا
ليك امك ما بتزيد من 3 . يا ولدى عندك اصحابك اتنين واحد طويل والتانى جنبو انشاف قصير ولابس نظارة ديل منم
حسن: الطويل دة هشام سفل يا حاجة لكن ابونظارة امكن طارق عبدالرحيم؟
حاجة سعيدة: صدقت الطويل هشام لكن التانى مو طارق , طارق عبدالرحيم مهذب وود ناس لكن دة مقرم وبتاع شوشرة
حسن: عرفتو يا حاجة دة خالد الشهير
حاجة سعيدة: بس ياهو, شفت الاتنين ديل يا ولدى كان ما بعدت منهم الترابة دى فى خشم امك الراجياك وكان تمرق من رابعة
ابقى انا ما سعيدة بت عبدالقادر, انت يا ولدى ما تصاحب ملهم ومحمد هارون ديل يا ولدى كان ترس ساكت بمرقوك من السمستر
حسن: كدى يا حاجة شوفى لى باقى المواد
حاجة سعيدة: باقى المواد كلها يا ولدى نمرك فيها بين ال 3 وال7 ومن غير مجاملة يا ولدى انت كان تمرق من رابعة السنة دى
يعيبن شعراتى ديل وبعد الحالة دى ابيع المريسة فى سوق ام دفسو ..
حسن: كتر خيرك يا حاجة مع السلامة
حاجة سعيدة: ودعتك الله يا ولدى
حاجة سعيدة: يا حسن .. يا ابوعلى ,( ياربى الولد دة ما بسمع)
حسن: أيوة أيوة, فى حاجة يا حاجة سعيدة انا وصلت الشارع برة وسمعتك بتنادينى
حاجة سعيدة: مافى حاجة يا ولدى لكن انت نسيت جزمتك ولبست شبشب محاسن بتى
حسن: لا حولا والله يا حاجة الواحد مخو جايط عليك الله ادعى لى
حاجة سعيدة: الله يزيل منك الفلس ويهون ليك الترس, وراجية ربى الكريم يكفيك شر عبدالله ابراهيم,
وانشاء الله يا ولدى الله يقلل ليك النوم الكتير ويبعد منك الشهير وعوض النذير ويحميك من الحساد
ويقربك من ايهاب وخالد حماد ويسهل ليك امتحان عكود ويصبرك يوم زحمة البورد........ امين
حاجة سعيدة: عليك الله يا ولدى وكت الله جابك دايرة اوصيك , كان لاقيت عمر الحبر ومحمد الحسين قول ليهم
حاجة سعيدة قالت عايزاكم وكان ابو يجو قول ليهم ما بتتخرجو الا يجوكم التيمان ..
حسن: التيمان ديل منم ؟
حاجة سعيدة: التيمان ديل يا ولدى أولاد د.ابوبكر عبدالوهاب عميد كليتكم وهم هسى حلاتم فى المتوسط
يعنى الثانوى العام .. و يا ولدى هنيئا لى ال بحضر زمنم واتهنى بى ترسم ..

بقلم الكاتب الكبير : عمر الحبر

الحلقه الثانية من مسلسل الحاجة سعيدة ..

أخونا محمد الحسين الحسن كان بيعانى من صداع شديد لفترات طويلة ،، وبعد تردده على مجموعة من الاطباء وصل
الى ان المشكلة فى العيون وان الصداع واحيانا زغللت العيون سببها ان ال axis بتاع عيونو ما parallel .
بعض الدكاترة قالو الموضوع دة خلقة ، وبعضهم قال بتعالج لكن حتى العلاجات ال أدوها ليهو ما جابت نتيجة .
وعمر الحبر كانت عندو نفس الأعراض لكن بدرجة أقل وما مشى لى طبيب كان بيكتفى بما يقال للحسين ، لأن
الأعراض هى هى وبرضو بياخد نفس العلاج وبرضو الموضوع ما انتهى .
الحسين والحبر قررو يمشو لى حاجة سعيدة وموضوع المشى لى سعيدة ما عندو أى علاقة بالأعراض المذكورة أعلاه.
موضوع المشية الأساسى إنو التيمان دخلو الجامعة بعد 3 سنوات من وصية حاجة سعيدة لى حسن بابكر

Quote: حاجة سعيدة: عليك الله يا ولدى وكت الله جابك دايرة اوصيك , كان لاقيت عمر الحبر ومحمد الحسين قول ليهم حاجة سعيدة قالت عايزاكم وكان ابو يجو قول ليهم ما بتتخرجو الا يجوكم التيمان .. حسن: التيمان ديل منو ؟ حاجة سعيدة: التيمان ديل يا ولدى اولاد د.ابوبكر عبدالوهاب عميد كليتكم وهم هسى حلاتم فى المتوسط يعنى الثانوى العامو يا ولدى هنيئا لى ال بحضر زمنم واتهنى بى ترسم ..

باختصار الحبر والحسين مشو لى حاجة سعيدة حسب الوصف ولقو الباب فاتح لكن كل واحد يقول للتانى أدخل أول ..
الحبر: أدخل انت اول يا حسين لانو ابوك الحسين الحسن مشهور واكيد حاجة سعيدة تكون بتعرفو ..
الحسين: طيب انت ما جدك الشيخ الكباشى والناس كلها بتعرفو مش حاجة سعيدة وبس وبعدين يا اخوى انت دخلت
الجامعة قبالى انت 84 وانا 85 ..
الحبر: صاح انا دخلت الجامعة قبالك لكن انت بديت الخضرمة قبالى , لمن انت ربت انا كنت ماشى زى الخيط ..
الحسين: لكن أنا لحدى الان مربت مرة واحدة وانت مربت مرتين يعنى فتنى فى الموضوع دة ..
الحبر: انت يا الحسين بتعزف عود ،، بشير عباس ما يلحقك يعنى رجل فنان يبقى انت اول ..
الحسين: طيب انت ما كنت فى كورال هندسة ايام جمعية الثقافة والابداع والمايسترو الخطير الهادى الاصم ،، دة ما فن برضو
الحبر: شكلى كدة ما بقدر اقنعك تدخل اول لكن عندى اقتراح جميل طالما نحن جايين حب استطلاع وعشان نعرف موضوع
التيمان ال اتنبأت بيهو سعيدة قبل 3 سنة ، خلينا ندخل مع بعض وما نورى حاجة سعيدة أسماءنا الحقيقية ،،
نقول ليها نحن عزالدين محمد الخير وياسر شندى ..
الحسين: أنا خايف تكون بتعرف عزالدين وياسر شندى ..
الحبر: لا لا انا متاكد انها ما بتعرفهم لانهم ما قاعدين يجوها ..
الحسين: يا اخى دى أبوبكر حسين اول السودان بجى ليها .
الحبر: أبوبكر حسين بجى للمرة دى عايز منها شنوعايز يطلع اول العالم ولا شنو؟
الحسين: يا حبر الناس الشطار ديل محسودين امكن واحد عامل ليهو عمل ولا ضاربنو عين ولا امكن بحب وخايف من شاكوش ،،
المصائب كتيرة فى الدنيا دى ..
الحبر: والله كلو جائز يا حسين. لكن انا حضرت موقفين بيأكدو انو عزالدين وياسر شندى لم ولن يمشو لى حاجة سعيدة على الاطلاق,
الموقف الاول مرة حضرت ليك عزالدين جايط مع طارق سنوسى ومنير عوض بزعل شديد جدا لانهم بمشو لى حاجة سعيدة ،،
وذكر ليهم زى 14 حديث وكمية من الآيات تؤكد حرمة المشى لى حاجة سعيدة وقال ليهم انا بتضايق جدا جدا لمن اشوف زول صاحبى
ولا دفعتى ومتعلم ومثقف يمشى لى حاجة سعيدة, لذلك عزالدين مستحيل سعيدة تكون شافتو ..
والموقف التانى مرة كنت ماشى وقدامى أحمد ابوالريش وياسر شندى , ابوالريش قال لى ياسر انا السمستر دة بشيل فيهو strength
و structure , ياسر قال ليهو يا اخى اتفاءل خير ولو شاعر انك ضعيف فى المادتين ديل خلينا نعمل معسكر كسر ليهم الاتنين ،،
وما تنسى باقى اسبوعين على السمستر يعنى الموضوع بتلحق ..
قام ابوالريش قال لى ياسر الموضوع ما موضوع الزمن انا شاعر انى قارى كويس لكن دة كلام حاجة سعيدة ،، والمرة دى سرها باتع
وكلامها ما بقع واطة .. فى اللحظة دى انا شفت ليك ياسر شندى دة غضب غضب شديد ،، وبقى يرجف من الزعل لغاية ما نظارتو وقعت
منو وقال لى أبوالريش أنا ما عايز ادخل معاك فى نقاش لكن بقول ليك كلمة واحدة ،، اذا مشيت لى المرة دى تانى لا أيدى لا ايدك واعتبر
أى علاقة بينى وبينك انتهت,، دة كمان بياكد انو ياسر شندى ما ممكن يشوف خلقة المرة دى اطلاقا ..
الحسين: يازول انا موافق خلينا ندخل ..
الحسين والحبر: السلام عليكم يا حاجة سعيدة
حاجة سعيدة: وعليكم السلام يا اولادى اتفضلو وقومى يا محاسن جيبى لاخوانك موية
الحبر: نحن من كلية الهندسة يا حاجة سعيدة انا عزالدين محمد الخير ودة صاحبى ياسر شندى ..
حاجة سعيدة: أهلا يا أولادى خير انشاء الله ..
الحسين: نحن سمعنا بيك من اصحابنا وزملانا وقلنا نجى نشوفك وبصراحة جينا نسألك من كلام قالو لينا زميلنا حسن بابكر ،،
انك تنبأتى بدخول التيمان أولاد العميد للجامعة وحاجات تانية كدة ..
حاجة سعيدة: أنا ياولدى بطلت الشغلانة دى وعايزة أبيع ترمس وتسالى فى السوق ..
عمر الحبر: انتى زعلانة ولا شنو يا حاجة؟
حاجة سعيدة: لا ياولدى لكن انا لو بقيت ما بفرز بين عزالدين وياسر شندى وعمر الحبر والحسين ما احسن ابيع ترمس وتسالى
(الحبر يهمس فى اذن الحسين) : المراة دى عندها سفلى ولا شنو ؟
حاجة سعيدة: حاشا يا ود الكباشى ما عندى سفلى ..
الحبر: ما اقصد يا حاجة لكن انتى بتعرفى عزالدين وياسر من وين؟
حاجة سعيدة: هم انقطعو منى متين يا ولدى لغاية امبارح كانو معاى ومن اوائل الناس الجونى من كليتكم لكن دايما بجونى بعد الساعة 12
وقالو لى ما تكلمى زول ونحن ما بنقصر معاك وكانو بدونى فى الاسبوع 50 جنيه .. لكن ال 3 أسابيع الاخيرة دى ملحونى فيها عشان كدى
ياولدى قسمت بى الله ما اخليهم ..
الحسين: طيب كيف عرفتينا انا والحبر ؟ وكيف ..
حاجة سعيدة: يا محاسن جيبي لى كشف رابعة مدنية من الدولاب
الحبر: انتى عندك كشف رابعة مدنية؟
حاجة سعيدة: كشوفات الكلية كلها عندى ،، جابها لى مسجل الكلية بى نفسو .
حاجة سعيدة: عاين فى الكشف دة يا ولدى , الناس ديل كلهم معمول عليهم علامة صاح الا عمر الحبر والحسين
لانهم الوحيدين الما جونى عشان كدة اول ما دخلتو عرفتكم يعنى ما عندى سفلى يا ود الكباشى القصة منطق ..
الحسين : سامحينا يا حاجة وخلينا فى المهم
حاجة سعيدة: انا ما بقرا ليك كف الليلة لكن يا ولدى الصداع العندك دة ما تاخد ليهو علاج وبعد انتهى السمستر
باسبوعين بروح منك وتعال لى اوريك سببو كان شنو وراح ليه بالمنطق برضو يا ولدى .
الحبر: يعنى نمشى ونجيك بعد شهر كدة ؟
حاجة سعيدة: أأى يا أولادى ، مع السلامة ..





..

بقلم الكاتب الكبير : عمر الحبر

الحلقه الثالثة من مسلسل الحاجة سعيدة ..

الحسين وعمر الحبر رجعو لي حاجة سعيدة بعد سنتين من آخر زيارة ..

الحسين والحبر: السلام عليكم ..
حاجة سعيدة: وعليكم السلام يا أولادي ،، أقول ليكم تعالو بعد شهر تجو بعد سنتين؟
الحسين: والله ظروف يا حاجة
حاجة سعيدة: إتفضلو ،، معاي زميلتكم (لولا) في الأوضة الجوانية بقعد شوية معاكم وبرجع ليها ،، أها يا الحسين الصداع ما راح منك؟
الحسين: الحمد لله راح تماما يا حاجة ،، لكن تفتكري السبب كان شنو ؟
حاجة سعيدة: يا ولدي أفتح لي أضانك وأفهمني كويس عشان تعرف إنو حاجة سعيدة راسها مليان علم ومنطق ،، مش كلام ساكت ..
الحسين: أنا سامعك كويس ..
حاجة سعيدة: أول حاجة يا ولدي ، إنت كنت حسب ال index بتاعك قاعد في المقاعد ال في النص (في قاعة الإمتحانات) ،، وزميلك أمير عون
قاعد على اليمين وجمال النور على الشمال ،، وفي امتحان د. على زروق ال إنت مشيت فيهو الحمام 3 مرات لو بتتذكر ، وحسب زنقتك الشديدة وشفقتك
كنت عايز تترس منهم الإثنين في وقت واحد ، وكل عين من عيونك مشت في إتجاه ، ومن شدة خوفك من الإمتحان عيونك ثبتت على كده ، وده ال خلى ال axis
بتاع عيونك ما متوازي ذي ما قالو الدكاترة ..
الحبر: وأنا صداعي من شنو ؟
حاجة سعيدة: نفس الموضوع يا ولدي .. بس انت عشان قاعد وراء جمال عيونك ثبتت على زاوية حادة ،، والحسين عيونو على زاوية منفرجة ..
عشان كده صداعك كان أخف .. ويا ولدي لمن جوكم التيمان ، وحسب أسماءهم ما بتبدأ بحر W (وائل و وليد) وقاعدين جنب بعض بقيتو تترسو في إتجاه واحد،
عشان كده الصداع راح ..
الحبر: سبحان الله ..
الحسين: بصراحة يا حاجة سعيدة أنا والحبر في الفترة الفاتت قرينا كتير عن الميتافزكس والبراسايكولوجي ،، وكمان قلنا نستفيد من المعرفة بالصوفية
بتاعت عمر الحبر ونحاول نعرف أصل قراية الكف ونطورها ..
الحبر:: نحن في الحقيقة عايزين نتناقش معاك ونطور ليك عملك المفيد ده من خلال الإجابة على سؤال لماذا كذا ولماذا لا يكون كذا .. يعني مثلا لماذا
حاجة سعيدة تقرأ الكف ولا تقرأ الرِجل مثلا يعني ..
حاجة سعيدة: كدي يا أولادي فلسفتكم دي جربوها في روحكم ، أسألو نفسكم لماذا بتسقطو في الإمتحانات ولماذا لا تنجحو ،، ولمن تجيب ليكم نتيجة تعالو لي سعيدة ..
الحسين: نحن جادين يا حاجة .. هل ممكن تقري حاجة غير الكف؟
حاجة سعيدة: أنا يا ولدي ،، وأعوذ بالله من كلمة أنا ،، حصل قريت الصلعة .. مرة جاني زميلكم أحمد التجاني .. على بال ما سلم علي ، كنت قريت صلعتو وعرفت
ال history بتاعو كله .. ونتيجتو في السمستر .
محاسن: يا أمي (لولا) دي ما منتظراك من بدري .
حاجة سعيدة: بعد إذنكم يا أولادي ال نمشي لي زميلتكم ..
الحبر والحسين: إتفضلي يا حاجة .
الحسين: رايك شنو يا حبر نمشي نتصنت بالشباك ونعرف الجكس ده فلمو شنو ..
الحبر: تمام يا فردة
حاجة سعيدة: معليش يا بتي إتأخرت عليك ، نحن كنا بنقول في شنو ؟
لولا: سألتيني البنت الطويلة دي منو ، وعلاقتك بيها شنو .. دي يا حاجة سعيدة صاحبتي (سوسو) ..
حاجة سعيدة: شن الصحوبية يا بتي ، دي باقي خاتة عينا على كيسك ، وعايزة تختفو منك ، أسأليني أنا .. بنات كليتكم ديل عاجناهن وخابزاهن ..
لولا: لا يا حاجة سعيدة .. ما ممكن .
حاجة سعيدة: يا بتي أسمعي كلامي وقولي حاجة سعيدة قالت .. قبل كده يا بتي حذرت واحدة دفعة قدامكم إسمها (ميمي) ما سمعت كلامي لمن الفاس وقع في الراس ،
هسع بحذرك إنتي .. ويا بتي السمستر ده ذي ما قلت ليك بتشيلي 4 مواد .. وكان ما عملتي حسابك ببقن عليك ملاحق وشاكوش .. والإثنين يا بتي مافي زول بيتحملهن ..
لولا: طيب أعمل شنو يا حاجة؟
حاجة سعيدة: صاحبتك دي كان أدتك شئ بشربو ما تشربي .. وكان شئ بياكلو ما تاكلي ..
لولا: والله خوفتيني من صاحباتي يا حاجة سعيدة .. ومعنى كده ممكن بنات غير سوسو برضو يعملو كدة ..
حاجة سعيدة: أنا جاياك في الكلام يا بتي وانتي عشان تكوني في ال safe side يا بتي تعملي (case 1) إحتياطي و (case 2) إحتياطي .. تمنيهم بال case
وما تبوحي ليهم بالحب .. الفكرة دي أديتها لي شوشو ، وحياتك يا لولا يا بتي شوشو شوكشوها في break الفطور .. وكيست في lecture لساعة 10 .. case1 بقى أساسي
و case2 بقى case1 .. وتاني يوم عملت case2 إحتياطي جديد ..
لولا: لكن كده ما صاح ..
حاجة سعيدة: أنا كلتك يا بتي .. والحلبي المعصعص ده ما تضمنيهو .. عينو زايغة ..
وبعد ده يا بتي على قول الحبر ، يقعدو الناس يهدو ليك مناديل الورق وشرايط هاشم ميرغني ..




.

يا إبراهيم،

مجهود موفق،

لكن على وين؟؟
دايرين من الحلقة الاولى ياخى،،


حسه ناس امنة ديل ما عارفين حاجة سعيدة دى منو!!!



ما بعرف غايتو،
فتش ورقك تانى،،،،،

هالة ،،

Quote: حسه ناس امنة ديل ما عارفين حاجة سعيدة دى منو!!!

لكن بيكونو شكو في (لولو) دي منو ..
خصوصا صاحبتها إسمها (سوسو)




آمنة دي لماااحة ...

بالمناسبة ،،

عمر الحبر كاتب في نهاية القصة:
(إلى اللقاء في الحلقة الرابعة .. حيث ذهب أبو القوق وكيكي لي حاجة سعيدة بعد أن تكرر حلم البرتقالة الحامضة عند القرود ..)

وكمان عمر الحبر لما كان معانا هنا ،، قال بدأ يجهز سيناريو حلقة حاجة سعيدة مع بتاعين الكورة ،، ناس طلال حامد ...

ابراهيم،،،

Quote: لكن بيكونو شكو في (لولو) دي منو .. خصوصا صاحبتها إسمها (سوسو)

انت بتقول فيها والله أنا طواااااااااالي
لمحت ليك (لولو) وصحبتها سارة والضب ....قصدي (سوسو)

حذف للتكرار

يا ابراهيم عساك بخير
الحلقة الاولي في صفحة 23

والحلقة الثانية ص 24

تكتيك عالى و مزاج رائع

ماذا قالت حاجه سعيده لهشام عتوقا قبل مباراة اقتصاد والتى انتهت بهزيمة هندسة 5 / صفر وماهو دور طلال وبهاء الدين ... قريبا وحصريا فقط على قناة الكوتش مع المؤلف و المنتج عمر الحبر > حلقه جديده من حلقات حاجه سعيده ... خليكم قراب

الشامى

Quote: يا ابراهيم عساك بخير الحلقة الاولي في صفحة 23 والحلقة الثانية ص 24

نيابه عن ابراهيم علم و تم التنفيذ

________

ابراهيم

شكرا على هذا المجهود

بس حاولت انزل الحلقتين الاولى و الثانيه
بالضغط على كلمة رد فى المداخله الاولى
عشان ينزلوا قبل الحلقه الثالثه
بس نزلوا فى الآخر ... يظهر بكرى ابوبكر
عمل تعديل وده كويس على فكره

عموما حنتعبك شويه بعمليات التعديل من خلالك
لكل المداخلات السابقه و بعداك copy + paste
للحلقه الاولى و التانيه .... عشان الترتيب
مهم .... وبعداك انا برجع عشان اعدل بحذف
الحلقتين الاولى و التانيه

يا الحبر منتظرين باقى الحلقات
قبل رمضان و تنشغل بالعبادة

كتب الأخ الشامي (شقيق عمر الحبر) ..

Quote: يا ابراهيم عساك بخير الحلقة الاولي في صفحة 23 والحلقة الثانية ص 24

شكرا للتنبيه أخي الشامي ،،

يا كوشت ،،

Quote: عموما حنتعبك شويه بعمليات التعديل من خلالك لكل المداخلات السابقه و بعداك copy + paste للحلقه الاولى و التانيه .... عشان الترتيب مهم .... وبعداك انا برجع عشان اعدل بحذف الحلقتين الاولى و التانيه

تم عمل اللازم ،،






أحذف ،،

والله ماشاء الله،
و أتجمعوا التلاتة حلقات الاولى،

شكرا كتير الشامى الكباشى،،،


ياربى ما بلقى أجزاء من سارة و الضب برضو،،،




يا امنة لقيتك متامرة مع الجماعة،،،

مباااالغة الحلقة الاولى عجييبة

بجى راجعة للباقيات


جيبو لينا من الاول عليكم الله