Post: #1
Title: ان بقيت بخيت
Author: Sahar Tageldeen Elsheikh
Date: 05-08-2009, 06:04 PM
Parent: #0
إن بقيت بخيت .. ربنا يديك مرا هدية ورضية .. السماحة ماضروري لانو بعد شوية .. ما حتكون سمحة حاتكون عادية .. نصيحة ليك النسوان البقولن ليك ديل اوعك تعرس واحدة فيهن ، الفنانةوالحنانة والحردانة والمدرسة والمدبرسة والمفلسة والنوامة والحوامة واللوامة والبوبارة والكوبارة والخبارة والفشارة واللايوقة
أها نمسكن واحدة واحدة
1.
الفنانة :- حاتمرق معاها وتقعد تحوم .. في الحفلات .. وتشوف كرسي قدام وتقعد فيهو شايل عكازك وسكينك في ضراعك وعينك عليها .. إن راجل بشر ساكت تتحنفش وتتخنفش وتقوم .. إلا يهجروك اتنين علي الكرسي .. وتجوا نص الليل راجعين اهلكم والنهار كلو نائمين
2.
الحنانة :- طول النهار برا اليت .. تحنن في نسوان الرجال وهي كرعينها يكونن ما شافن حنة ليهن سنين .. والنهار كلو إنت تحاحي في الشفع ما يلمسوا الصبغة .
3.
الحردانة :- دي حا تكرهك حياك اقل كلمة تتقنع توبها وتجري بيت ناس ابوها وتلحقها انت وتلقي ابوها تقعد في طرف العنقريب .. تطقطق في اصابعيك ومدنقر في الواطة وداير تراضيها ترجع البيت .. لكن احسن حل يا تسكنوا مع ناس ابوها .. ياتجيب ناس ابوها عندكم .. عشان توفر المشاوير والجري .
4.
المدرسة :- اول حاجة دي ما بتقدر تفرق بينك وبين الطلبة .. وحتقعد تعيد وتكرر في الكلام مليون مرة .. زي برنامج من الامس في التلفزيون .. وممكن جداً تسرح وتقول ليك فاهم ياشاطر.
5.
المدبرسة :- تلقاها طوالي زهجانة . . وشايلة اخلاقها في طرف نخرتها .. وان كلكلتها ماتضحك وفي النهاية حتوديك التجاني الماحي ..... نزيل اكتئاب ..
6.
المفلسة :- مادايرة أي شرح .
7.
النوامة :- تجي من الشغل نص النهار وزهجان .. تلقاها ( تانية المخدة ) وخاتها ايدها تحتها وتشخر .. وحالتها بالبلا ..
8.
الحوامة :- طول اليوم فوق كرعينها .. في الحلة من بيت لبيت .. وتدخل البيت قبال ما إنت تجئ من الشغل بخمس دقائق .. وتجري تولع النار وتطبخ ليك ( القطر قام ) .. واول ماينتهي الغداء تدخل في سفنجتها إستعداداً لرحلة جديدة .
9.
اللوامة :- دا نوع مزعج جداً .. لو جبت سيرة اخوك ساكت .. تفتح فيهو ، الله بسألني سنتنا ديك وكت انت خليتنا بلا قروش وسافرت .. يدخل علينا مدلدل ايديهو .. كيس موز ساكت ما بيجي شايلو .. ولو جبت سيرة امك هي والله امك دي اصلها ما بتريدني من تشوفني تزعل والنيران تنطلق فيها .. وتمد قدومها ... ووليداتي ديل السلام يا الله ويا امين تسلم عليهم .
10.
البوبارة :- دي تحملك فوق طاقتك تشريك المابنشري .. وجيت الناس ف ي البيت تجري علي علبة الذهب وتتعنكش كلها من راسها لي لكرعيها .. وتقعد تنضم وتكشكش بايديها وكرعيها ورقبتها واضنيها ,, عشان توري الذهب .
11.
الكوبارة :- دي تكبر اي موضوع .. وتسوي ليهو توم وشمار .. وتقول ليك ناس القبور دقو الطنبور .. لو شافع من شفعك عتر ووقع تصرخ وتخت ايديها في نص راسها وبي طول حسهاوووووووووووووووووووووووب علي ووووووووووب علي .. ماااااااااااااااااات خلاص ماااااااااااااااااااااااااات يسمعوها في الشارع والمصيبة لو انت كنت نائم وسمعتها .. تقوم مخلوع وتمرق من الاوضة لحدي نص الصالة .. اما لوكان عندك قلب مرضان .. اللحظة ديك ...... من المهد لي اللحد
12.
اللايوقة :- دي حكايتها تانية .. تمسك في موضوع يحلك منو الجليل الرحيم ... يادا هوي يداالليلة يايمـــة طرشت ؟؟؟؟ وقدر ما تطنش هي مصرة .. وممكن تجئ وتخجك خجة جامدة عشان تنتبه ............................... للنقة
|
Post: #2
Title: Re: ان بقيت بخيت
Author: طارق الكوتش
Date: 05-08-2009, 06:16 PM
Parent: #1
المهندسه كيف ؟
|
Post: #3
Title: Re: ان بقيت بخيت
Author: Hisham Magzoub
Date: 05-08-2009, 10:02 PM
Parent: #2
وانتى من ياتو نوع ؟
|
Post: #4
Title: Re: ان بقيت بخيت
Author: Sahar Tageldeen Elsheikh
Date: 05-10-2009, 07:52 PM
Parent: #2
لكن مازنقتونى....؟؟؟اسعلة صبعة..
|
Post: #5
Title: Re: ان بقيت بخيت
Author: Tahani abdalla Attia
Date: 05-11-2009, 06:56 AM
Parent: #4
و يا ربي نحن من ياتو نوع؟؟
ما عندك غير الخيارات دي يا سحر؟؟
كلو سالب (negative ) يعني!!!
|
Post: #6
Title: Re: ان بقيت بخيت
Author: Sahar Tageldeen Elsheikh
Date: 05-12-2009, 06:04 PM
Parent: #5
Quote: و يا ربي نحن من ياتو نوع؟؟
ما عندك غير الخيارات دي يا سحر؟؟
كلو سالب (negative ) يعني!!! |
والله يادكتورة طالما مالقيتى نفسك فى اى فئة من ديل معناها الطرف التانى من فئة بخيت...يعنى برااءة
|
Post: #7
Title: Re: ان بقيت بخيت
Author: ابراهيم محمد الحسن
Date: 05-13-2009, 06:25 AM
Parent: #6
سحر ،،
| Quote: والله يادكتورة طالما مالقيتى نفسك فى اى فئة من ديل معناها الطرف التانى من فئة بخيت...يعنى برااءة |
أكيد جمال من فئة بخيت ،،
وأنا برضو المدام من فئة بخيتة ،،
مش بير؟
|
Post: #8
Title: Re: ان بقيت بخيت
Author: Amna Mohamed Arh
Date: 05-13-2009, 06:30 AM
Quote: وأنا برضو المدام من فئة بخيتة ،،
مش بير؟ |
جائز...
|
Post: #9
Title: Re: ان بقيت بخيت
Author: طارق الكوتش
Date: 05-13-2009, 06:32 AM
بخيت و عديله ليك ولك المريخابيات
وانتظرونا نجيب ليكم ال 7up لزوم التبريكات
|
Post: #10
Title: Re: ان بقيت بخيت
Author: ابراهيم محمد الحسن
Date: 05-13-2009, 06:49 AM
Parent: #9
شرط الإحتفال يكون يوم واحد أغسطس ألفين وتسعات ،،
وما تنسوا الموية .. تجيبوهـا قـارورات ،،،
بس في باكيتات .. ما يكونوا مشيوتات وفي الهواء طايرات ،،
ثمح ؟
|
Post: #11
Title: Re: ان بقيت بخيت
Author: صلاح مختار
Date: 05-13-2009, 12:32 PM
Parent: #10
إبراهيم و الكوتش...
البنغال بوظو العربي بتاعكم.
|
|