Post: #1
Title: هيا ..الخروفة !!
Author: محمد البشرى الخضر
Date: 11-01-2012, 08:25 AM
Parent: #0
خروف العيد في الإمارت وفي العين تحديدا مشكلة كبيرة و هيدك ماليه اول ولا آخر
أيام الشارقة الموضوع كان ساهل بتشتر خروفك وتمشي الصناعية تلقى البتان عاملين مسالخ في بيوتهن زي الترتيب يطقطقوا ليك الخروف و يكسّروه ليك في دقيقة لا صف لازحمة لا يحزنون
تجربتي بتاعة الستة الفاتت في مسلخ العين شيلتني هم اخدت لي خرتمية ساعة في الصف وفقدت اعصابي من الزحام و المدافرة و اتشاكلت مع كم واحد و بعد دا حصلت لخبطة في التوكن و الخروف ما جا و حكاية اظن لامن مرقت كانت الساعة قريب إطناشر ونص
المهم السنة بعد جينا من الصلاة غيرت وانا مارق لقيت في اتنين بتان راجين واقفين قدام جيرانا سالتهم الخبر شنو قالوا "قسّاب" يازول الكلام دا كيف؟ مش ممنوع!! قال مافي مشكلة أرباب داخل كراج سوي ترتيب و سكّر باب
قلت يامعلم مافي داعي بعدين بتجيب ليها هوا و غرامتها قدر الليلة وبكرة غير النضافة بعدين شغلانة المهم اتوكلنا و مشينا المسلخ
اها في المسلخ لقينا الخرفان كلها حاجزة الهلال الأحمر ومافي بيع تمشي تجيب خروفك من السوق وتجي, طيب السوق وين؟ قالوا السوق دا هنااااااااك ورا البوادي مول حتة كدة بعيدة وفقر, يا الله ياخ...
المهم مشينا السوق, زحمة الف, يا الله يا الله حتى لقينا باركنغ, طيب وين الأسترالية قالوا الأسترالية السنة مافي, كيف الكلام دا؟ دا الحاصل, يا سلااااام ياخ طيب ما شربت زيت لأني كل سنة مغمض بجيب من الاسترالي و بطلع كويس و بريحني من شناف الولية وناس غشوك وما بتعرف تعزل و غالي .. إلخ و ما تقول الدورة دي الحجاج معيّدين معانا كمان
طيب اجيب شنو؟ الخرفان دي اشكالها ما مريحة العندو قُصة و الصلعتو تقول يا غربتي وحكاية
المهم بي جاي بيجاي لقيت واحد كدا قلبي ارتاح ليه من اول نظرة قلت بس ياهو دا زولي - خروفي - اها شيلك ختك اتفقنا مع البتاني و شلناه ومتوكلين على المسلخ القريب من السوق
لقيت صف العربات اوله جوة المسلخ و آخره في الزلط الهناك قلت نمشي المسلخ التاني القبيل نفس القصة الصف مبالغة و الساعة ماشة على عشرة اتذكرت البتان القبيل في الحلة قلت يمكن احصّلهن
وفعلا لقيتهم لسّة شغالين اظن الشارع كلو جاب ليهم يضبحوا ليه اليوم داك قلت ليهم منتظركم
اها الجماعة جو, قفّلنا الباب و فرشنا البلاستيك في الأرض و الحيط - دكستر بس  - و اتوكلوا و ضبحوه
لما قلبوا على بطنه عايز يبدا سلخ الرجل بلا اعاين ليك لبيضو بقى لي غريب كدا وزي الفيه حلمة
هيا خينا دا شنو؟ قال لي هدا مال حليب !! حليب شنو يا معلم!! كيف إنت مايشوف هدا حرمة. حرمة كيف يا خينا انا يشتريه ريّــال. شو ريّـال إنت مايشوف (سَمان) مال هو مافي. يا الله طلع خروفة وما عندو (سَمان) دي مصيبة شنو دي
وياربي الأضحية تجوز بالنعجة ونسيت ليكم كلام الإبتدائي داك كلو, جري على اسلام ويب و فتحت الأسئلة لقيت قالوا شروط الأضحية بالضأن كذا وكذا ولا فرق بين الذكر و الأنثى, الحمد لله دي سلامة
لكن مع الشنافين الجوة ديل كيف الدبارة, دي حيمسكوها لي لا جنا الجنا
قلت يا معلم بس تنوم بيها واعمل رايح, اها بقيت متابع في السلخ ويدي في قلبي أكان طلعت حامل أقبل وين
وكل ما ال"قسّاب" يفتح حاجة اعصابي تبوظ متخيل يمرق ليك ضلف ولا أضان وخلاس حيلي لامن برد
ربك رب الخير ستر وطلعت ما حامل الحمد لله, المهم خلّصوا الجماعة سريع سريع لميت الحاجات - الحلمات و السّمان المافي دا - ولفيت البلاستيك و على الزبالة
اها الفطور طلع و ياسلام عليها اللحمة رخصة وطاعمة - ما حرمة عاد ههههههههه - اها وانا كل شوية بسال الولية وأمي رايكم شنو في اللحمة رايكم شنو في الخروف هم يشيلو و يشكّروا و كمان ادوها كوز موية قالوا احسن من بتاع السنة الفاتت, وأنا أضحك ساي
بعدين لي المغرب كدا تاني سألتهم اها كيف اللحمة وكيف الخروف قالوا تمام, طيب النكلّمكم حاصل كيت كيت وطلعت خروفة!!
وما تتخيّل شماتي فيهم قدر شنو
|
Post: #2
Title: Re: هيا ..الخروفة !!
Author: MOHAMMED ELSHEIKH
Date: 11-01-2012, 08:32 AM
Parent: #1
كويس انو ماطلع/ طلعت ليك"خنثى"
|
Post: #3
Title: Re: هيا ..الخروفة !!
Author: ABUHUSSEIN
Date: 11-01-2012, 08:32 AM
Parent: #1
Quote: لما قلبوا على بطنه عايز يبدا سلخ الرجل بلا اعاين ليك لبيضو بقى لي غريب كدا وزي الفيه حلمة
هيا خينا دا شنو؟ قال لي هدا مال حليب !! حليب شنو يا معلم!! كيف إنت مايشوف هدا حرمة. حرمة كيف يا خينا انا يشتريه ريّــال. شو ريّـال إنت مايشوف (سَمان) مال هو مافي. يا الله طلع خروفة وما عندو (سَمان) دي مصيبة شنو دي |
كبييييييييييييييير كدا و تقعد تفتش في الحتات دي ....
|
Post: #5
Title: Re: هيا ..الخروفة !!
Author: صبري طه
Date: 11-01-2012, 08:37 AM
Parent: #3
| Quote: كبييييييييييييييير كدا و تقعد تفتش في الحتات دي .... |
يا أبو حسين الحتّات دي بفتّشوها قبل الشراء .. مُش بعد الضّبح
ـــــــ
| Quote: وما تتخيّل شماتي فيهم قدر شنو |
شماتة شنو يا الحبيب ... بكونن خجلن منّك ساي :)
|
Post: #4
Title: Re: هيا ..الخروفة !!
Author: omer osman
Date: 11-01-2012, 08:33 AM
Parent: #1
| Quote: هيا خينا دا شنو؟ قال لي هدا مال حليب !! حليب شنو يا معلم!! كيف إنت مايشوف هدا حرمة. حرمة كيف يا خينا انا يشتريه ريّــال. شو ريّـال إنت مايشوف (سَمان) مال هو مافي. يا الله طلع خروفة وما عندو (سَمان) دي مصيبة شنو دي |
ههههههههههههههه .......
قصة حلوة جداً ياودالبشرى ......
لعناية الاخ/محمد السني .. عاوزين نشوفه في اسكتش في برنامج القناة عشرة
|
Post: #6
Title: Re: هيا ..الخروفة !!
Author: وليد محمد المبارك
Date: 11-01-2012, 08:42 AM
Parent: #4
لسانك انطلق وبقيت تنكت
قول اححح 
|
Post: #7
Title: Re: هيا ..الخروفة !!
Author: على محمد على بشير
Date: 11-01-2012, 08:48 AM
Parent: #6
Quote: لسانك انطلق وبقيت تنكت
|
|
Post: #8
Title: Re: هيا ..الخروفة !!
Author: محمد أبوالعزائم أبوالريش
Date: 11-01-2012, 08:59 AM
Parent: #7
يا زول كده أرجع تاني لي إسلام ويب ...... الكلام ده أبى يدخل في راسي كلو كلو .....
هذا، ويبدو إنو الوالدة وأم حتوت ناس عندهم ذوق ساكت، وقالوا البقت بقت، لزوم الشنافة شنو؟
|
Post: #9
Title: Re: هيا ..الخروفة !!
Author: بدري الياس
Date: 11-01-2012, 09:33 AM
Parent: #6
Quote: لسانك انطلق وبقيت تنكت
قول اححح |
ده مش قال اححح، ده لسانو انطلق لمن بقى يكتب زي ده ويضحك كمان:
| Quote: ياسلام عليها اللحمة رخصة وطاعمة - ما حرمة عاد ههههههههه - |
كل سنة وانتو كلكم بخير، وخرفانكم ليها "سامان" أبو كديس..
|
Post: #10
Title: Re: هيا ..الخروفة !!
Author: بابكر التوم
Date: 11-01-2012, 09:43 AM
Parent: #9
كل سنة وانت طيب يا ابوحتوت
قلبى معك ياحبوب وحمد الله على السلامة (....) دى زى بتاعة ولى الشفت
كنا بعدين من سودانيز الايام الفاتت
ـــــــــــــــــ
دا اسمو عبوور يامعلم كتيرين بدقسوا الدقسة دى بس صاحب الخروف
مفروض ينبهك لانو سعروا بختلف معقول السوق مافية سودانيين سماسرة
لكن طلعت فردة خرفان استرالية ههههههههه
|
Post: #11
Title: Re: هيا ..الخروفة !!
Author: عادل الباهي عبدالرازق
Date: 11-01-2012, 10:14 AM
Parent: #10
Quote:
قلت يا معلم بس تنوم بيها واعمل رايح, اها بقيت متابع
في السلخ ويدي في قلبي أكان طلعت حامل أقبل وين
|
ود البشري
كل عام وأنتم بالف خير
والله لو طلعت حامل كنت اليوم داك تشوف زنقة أصعب من زنقتي
في كامب الغجر مع الشايب عبدالقادر
|
Post: #12
Title: Re: هيا ..الخروفة !!
Author: saif massad ali
Date: 11-01-2012, 10:18 AM
Parent: #11
لاحولة ولاقوة الا بالله
حتي السعية
|
Post: #13
Title: Re: هيا ..الخروفة !!
Author: طارق جبريل
Date: 11-01-2012, 10:46 AM
Parent: #12
دي ميزة انك تكون بيطري يا عمك
|
Post: #14
Title: Re: هيا ..الخروفة !!
Author: طلحة عبدالله
Date: 11-01-2012, 10:47 AM
Parent: #12
والله مع إني ما فاهم أية حاجة من النقة الكتيرة الفوق دي لكن للضمان كدا كفارة يا جرجير وما تشوف شر ..
وقوم لف كالعادة .
|
Post: #15
Title: Re: هيا ..الخروفة !!
Author: abas
Date: 11-01-2012, 10:47 AM
Parent: #12
حبيبنا كل سنة وانت بخير
ضحية الخروفه زي ما قلت مافوقها شيء بس ما تكون وصلت مرحلة الحمل
ولا تكون خامل
ولو اشتريتها بي اكتر من 550 يكونو غشوك تب
|
Post: #16
Title: Re: هيا ..الخروفة !!
Author: محمد البشرى الخضر
Date: 11-01-2012, 10:51 AM
Parent: #12
جيت يا عوج الدبر يا العوقة والله جابك انا كايس ليك من أمس
قريت ليك في البوست المحذوف قلت تتحداني ادخل اصبعي في عينك وتتحداني اشتم جدك
طيب: اولا دا اصبعي في عينك و رجلي كمان مش اصبعي فقط مش قلت معاوية صادق ومافي دخان من غير نار
جا معاوية أقر بكذبه و انت بقيت تتلفت وتتضارى ورا كلام خايس زيك ناس الأمن سربوا معلومة ومش عارف ايه شوف ليك جحر انحشر فيه يلاّ بخجلتك لو بتعرف تخجل
ثانيا بالنسبة لجدك معاك حق لو اتحديتني لي بكرة ما بشتمو ليك لسبب بسيط انت ما شتمت جدي وإلاّ كان العين بالعين
انت شتمتني انا ما قصّرت معاك أكرمتك فيها بالزيادة يا عوج الدبر
|
Post: #17
Title: Re: هيا ..الخروفة !!
Author: ياسر نجيلة
Date: 11-01-2012, 11:03 AM
Parent: #16
ود البشري ... تحياتي
وعيد سعيد لك .... والمتداخلين ...
======================
نصيحتي ليك لما تمشي تشتري ضحية ..
حاذر ماتلبس جلابية ... خليك في البنطلون ...
عشان تعرف " تدنقر " وتشوف تحت ... نوع السامان 
|
Post: #19
Title: Re: هيا ..الخروفة !!
Author: osman righeem
Date: 11-01-2012, 11:25 AM
فوق
__________________________________
2012 دي معاك ما كويسه
2012 دي عندها سامان
|
Post: #18
Title: Re: هيا ..الخروفة !!
Author: تماضر الخنساء حمزه
Date: 11-01-2012, 11:17 AM
Parent: #1
| Quote: المهم بي جاي بيجاي لقيت واحد كدا قلبي ارتاح ليه من اول نظرة قلت بس ياهو دا زولي - خروفي - |
بعدما طلعت خروفة، كدا بتكون عرفت سبب الراحة ^_^
|
Post: #20
Title: Re: هيا ..الخروفة !!
Author: محمد البشرى الخضر
Date: 11-01-2012, 01:17 PM
Parent: #18
كل سنة وانتو طيبين يا شباب
و القابلة على امنياتكم إن شاء الله
وعليكم السلام MOHAMMED ELSHEIKH
أفتّش شنو يا ابوحسين ما هو أول ما قلبوها المسائل جات فوق و لفتت نظري
ياصبري لا ما خجل ولا شي انا استوثقت و سألتهم كم مرة و الردود كلها إيجابية فما خليت ثغرة يتراجعوا بيها, و د الجاب الشماتة انو ما قادرين يشنفوا بعد شكّروا وكدا
هلا جنابو وكل سنة وانت طيب
يا شفت بالنسبة لي مافي شي اتغيّر, بوستاتي بتاعة الكورة و الضحك ياها ديك تسمع في كلامي دا
الإتغيّر فقط سقوط بعض من كنا نظن فيهم الإحترام و انكشافهم على حقيقتهم
لكن دا ما يمنع برضو نقول أححححح :)
هلا أبو علوة
يا ابو الريش كالعادة ح أقول ليك أبى يدخل راسك أوكي دي تقديراتك
أنا داخل راسي
هلا بدري وكل سنة وانت طيب - بالله جملة زي دي لو اتكتبت ايام الأزمة الجندرية الكانت مدورة مش كانت ودتني الآخرة ههههههه
كل سنة وانت طيب بابكر وين يا زول ؟
عبور كيف يعني؟ مش نعجة ولاّ حاجة تانية
الأسترالي مريح و خواجة و الخواجة أحلى زي ما عارف هههههههههه
ود الباهي كل سنة وانت طيب
صحي كلامك صاح لو لاقدر الله طلع حامل كنت ح أخش في موضع حرج من وزة ما
عوج الدبر اديناك حقك قبيل بارسل
وين يا ود جبريل
ياخي بالغت!! يعني عرفة السمان من عدمو عايزة ليها قراية خمسة سنة !!
كفر الله سيئاتك يا تنظير و كالعادة لف انت دا
وين يا عبس كل سنة وانت طيب
550 ههههههههه لا كان كدي غشوني غش السواد
سلامات نجيلة كل سنة وانت طيب
مشيت بي بنطلون والله لكن ما في شي خلاني ادنقر سويت الجك لست بتاع شراية الخروف كلها زي ما علمونا ليها في السودان
السنون و الأضان و الضنب و الضهر و الفخد ما خليت شي عدا السمان لأنو باي ديفولت في السودان ممنوع ضبح الماعندو سمان ما زي الجماعة ديل
لكن كان الله حيّانا تاني أول شي هههههههههه
ابو رغيم يا عمك كل سنة وانت طيب
لا والله 2012 دي زابطة وامورها تمام معاي
الإبتلاءات ما ها شر بل خير كتير
أقلّاها بتوريك المعدن الحقيقي للناس وبتفرز الصفيح من الدهب
هههههههههههه
تماضر بالغتي ما انتبهت ليها من زاويتك دي فعلا كلامك صاح
لكن كويس على الأقل ما ح يجيني اطرش يطلّعني gay كعادة البورد دا
كل سنة وانت طيبة و شنو الغياب دا
|
Post: #21
Title: Re: هيا ..الخروفة !!
Author: بابكر التوم
Date: 11-01-2012, 09:22 PM
Parent: #20
ياعمك يسأل منك الخير والله
موجودين والله ماين الدوحة والخرطوم الفترة الفاتت
| Quote: عبور كيف يعني؟ مش نعجة ولاّ حاجة تانية |
ياها زاتها س والله أعلم فى السودان بسموها كدا عبوور مش الخروفة ههههههههه
|
Post: #22
Title: Re: هيا ..الخروفة !!
Author: Ashraf el-Halabi
Date: 11-01-2012, 10:23 PM
Parent: #21
ود الصايم شابكك العربي العربي طلعت حنكوش ساكت!
|
Post: #23
Title: Re: هيا ..الخروفة !!
Author: محمد عبد الماجد الصايم
Date: 11-02-2012, 04:37 AM
Parent: #22
كااااااااااااگ
+ كااااااااگ@ الحلبي
|
Post: #24
Title: Re: هيا ..الخروفة !!
Author: حمد عبد الغفار عمر
Date: 11-02-2012, 09:38 AM
Parent: #23
كل سنة وإنتو طيبين
والله صحي كاك + كاك
عبور هي النعجة الما بتلد
|
Post: #25
Title: Re: هيا ..الخروفة !!
Author: اساسي
Date: 11-02-2012, 05:10 PM
Parent: #24
كامل التضامن مع خضر الطيب
|
Post: #26
Title: Re: هيا ..الخروفة !!
Author: محمد البشرى الخضر
Date: 11-05-2012, 02:35 PM
Parent: #25
يا حلبي عربي حموودي دي له فيها مآرب أخرى وكدا
حموودي كاكي سمح
يا حمد ما بتلد يعني الـ (مال حليب) ديل بزار ساكت
أسئس .. ()
|
Post: #27
Title: Re: هيا ..الخروفة !!
Author: النذير حجازي
Date: 11-05-2012, 02:52 PM
Parent: #26
سلام يا ود البشرى والجاتك في نعجتك سامحتك لووووووووول
بالجد سعدتُ بلقاءك والتعرف عليك بالأمس
|
Post: #28
Title: Re: هيا ..الخروفة !!
Author: محمد مصطفي مجذوب
Date: 11-05-2012, 03:30 PM
Parent: #27
ود البشري
سلام وكل عام وانت بخير .. وان جات متأخرة شوية اخوك كان بعافية شوية والحمد لله ربنا ستر
عموما انا الشماته والضحك من خمسمشكل بتاعتك كتلوني عديل ..
خروف شنو ونعجة شنو يا زول .... نحن هنا في البني ادمين .. نوع ده عاملين لينا عقدة في حياتنا انا بتتباكي ليك علي خروف 
وكمان بكل عين قوية تقوم تخم ال evidence من ال Crime Scene وجاي تتفشر .. وين عاد ...انا شخصيا اكان جيتك ضيف .. اكان ما جبت لي شهادة مشفوعة باليمين لحمكم ما دبورو إلا توديني KFC
|
Post: #29
Title: Re: هيا ..الخروفة !!
Author: محمد البشرى الخضر
Date: 11-05-2012, 07:07 PM
Parent: #28
هلا يا النذير هلا والله
سعدنا بمقابلتك و تشرفنا
يا دكتور يا دكتوركل سنة وانت طيب يعود عليك بالصحة والعافية إن شاء الله
وسلامتك الف سلامة اجر وعافية ان شا الله والله ما سمعنا اعف لينا
و يا دكتور انت تعال بس, يمين خروفك يرجاك حي تتاكد منو اول و تدينا الأوكي حتى نضبحو
لكن الدورة دي بوديه المسلخ تجربة النضافة و غسيل الحوش الدخلت فيها كانت قاسية بعض الشيئ
|
Post: #30
Title: Re: هيا ..الخروفة !!
Author: محمد مصطفي مجذوب
Date: 11-06-2012, 04:58 AM
Parent: #29
ود البشري ... تحياتي مرة تانية وتالته
| Quote: وسلامتك الف سلامة اجر وعافية ان شا الله والله ما سمعنا اعف لينا |
سلمك الله من كل بلاء وابتلاء ...ما عليك لوم .. الدكاتره هنا شالوا من قدامي الورقة والقلم وطق الحنك ده هسع شئ تحانيس وشئ دسديس
حكاية | Quote: يا دكتور انت تعال بس, يمين خروفك يرجاك |
ياها المحريه فيك ... اصلوا الكرم حارسك من ورا .. وشوفتك ومباشرتك السمحه كفوني لامن شبعت ..ديل براهم بالدنيا
وتسلم يا اب ضراع
|
Post: #31
Title: Re: هيا ..الخروفة !!
Author: ismeil abbas
Date: 11-06-2012, 03:20 PM
Parent: #30
الجميل محمد البشرى..............لك التحية وكل عام أنت وأسرتك الصغيرة والكبيرة بخير.
والله ضحكت لما المعاى بقى يعاين لى.....حكى جميل.
| Quote: يا سلااااام ياخ طيب ما شربت زيت |
بس أوعه يكون زيت خروع...برجع ليك لو ربنا سهل......إحترامى وتقديرى.
|
Post: #32
Title: Re: هيا ..الخروفة !!
Author: Haytham Abdulaziz
Date: 11-07-2012, 07:59 PM
Parent: #1
ود البشرى مبروك عليك العيد..... و مشتاقين ياخ.....
Quote: لما قلبوا على بطنه عايز يبدا سلخ الرجل بلا اعاين ليك لبيضو بقى لي غريب كدا وزي الفيه حلمة
هيا خينا دا شنو؟ قال لي هدا مال حليب !! حليب شنو يا معلم!! كيف إنت مايشوف هدا حرمة. حرمة كيف يا خينا انا يشتريه ريّــال. شو ريّـال إنت مايشوف (سَمان) مال هو مافي. يا الله طلع خروفة وما عندو (سَمان) دي مصيبة شنو دي
وياربي الأضحية تجوز بالنعجة ونسيت ليكم كلام الإبتدائي داك كلو, جري على اسلام ويب و فتحت الأسئلة لقيت قالوا شروط الأضحية بالضأن كذا وكذا ولا فرق بين الذكر و الأنثى, الحمد لله دي سلامة |
لا الحمدلله ومبروك الخروفة ... والجاتك في سامانو سامحتك ... و إقريط على كدا...
| Quote: السنون و الأضان و الضنب و الضهر و الفخد ما خليت شي عدا السمان لأنو باي ديفولت في السودان ممنوع ضبح الماعندو سمان ما زي الجماعة ديل لكن كان الله حيّانا تاني أول شي هههههههههه |
يا معلم المرة الجاية أعمل شيك للسامان أول شي... يعني تجي من البيت وفي رأسك السامان قبل الضنب و الأضان.....
__________________________
عاين بمناسبة خروفتك دي .. قاليك مسطول إسمو مبروك ....
مشى الزريبة يجيب خروف العيد.. اها عمك إشترى الخروف وجايي شاقي ليك الحلة.....
لاقتو بت الجيران .. قالت ليهو مبروك الخروف ... صاحبك قاليها (سميرة البايرة)
|
Post: #33
Title: Re: هيا ..الخروفة !!
Author: البحيراوي
Date: 11-07-2012, 08:31 PM
Parent: #32
اها بقيت متابع في السلخ ويدي في قلبي أكان طلعت حامل أقبل وين
الأخ ود البشرى
تحياتي وعيدك بخيت - يا زول العبور دي ما بقولوا ليها حامل ممكن تقول داره ولا ماخد.
غايتو الضحية الجاية الله يحيك وتتأكد من الخروف من مرحلة مبكرة وبشرط مسبق من صاحب الزريبة
بحيراوي
|
Post: #34
Title: Re: هيا ..الخروفة !!
Author: محمد البشرى الخضر
Date: 11-09-2012, 05:36 PM
Parent: #33
سماعين يا عمك كيفك ابوي
الله يديم الضحكة و يبعد الأحزان عننا جميعا
تعبير شربت زيت دا انا ما قادر اذكر بالضبط علق معاي من وين لكن إما من الجيش أو المنطقة الصناعية
هو بيدي معنى قريب لي اكلت نيم أو أكلت هوا أو اتسيّكت
وين يا هيثم عزيز يا وجيه وين يا قريبك
كيف دا كلامك .. تاني كان ربنا حيّانا اول شي بتأكّد منو
يا بحيراوي يا عمك عاد احنا كان بنعرف ناس دارّة و ماخد وعبور كان بقينا في جنس دا
لكن اتعلّمنا غايتو
تسلم وكل سنة وانت طيب
|
|