Post: #1
Title: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-10-2008, 04:14 PM
Parent: #0
اولا نرحب بكل الاعضاء الجدد و نتمنى التوفيق للراغبين في العضوية ولا زالوا حبيسي قوائم إنتظار عمك
اهديكم بعض النصائح و الفنيات من واقع الفترة اللتي قضيتها في البورد
و اتمنى من اخوتكم الأعضاء القدامى ان يرفدوا البوست بنصائحهم المستمدة من خبراتهم و تجاربهم
ابدا للاعضاء الجدد بشوية مواضيع بيض كدا
اولا الإقتباس
لما تكون عايز تقتبس من مداخلة غيرك جزء من الحديث عشان ترد عليه او تستعين بيه او ساي بس
و بعد ضغطك على زر اقتباس , بظهر ليك ويندو بالشكل دا غالبا
تقوم تظلل الخارم بارم دا كلو وتديه البحر و تلصق الكلام العايز تقتبسه من المداخلة الأصلية و تضغط اوكي وكدا
اهم حاجة الكود بتاع الكوت تتاكد انه مقفول
كيف يعني ؟
يعني زي ما الكود بادي بي كلمة quote بين قوسين مربعين يكون مقفول بـ /quote بين قوسين مربعين برضو
لو ما كدا البوست حيجوط و يبقى شكلو ما انزل الله به من سلطان
دا موضوع الكوت بالنسبة للخطوط و الألوان و الصور و الفيديو و المزك
راجع اللنكات دي
اكواد
و الجهد المقدر لأخونا لؤي
وفاءً بوعدي .. بوست الخطوط والألوان والصُّور والأغنيات
لؤي طبعا زول فنان بمعنى الكلمة وكفى
و بالمرة عشان خاطر ناذر بحب الحركة دي - حركة جبيب اللينكات - اوصي بمراجعة :
موجهات وتكتيكات ضرورية لبرالمة المنبر الجدد ..
تكتيكات أوتومسفيرية للكتابة في المنبر (أمثلة حية وتطبيقات) !!!
ناذر دا برضو زول فنان وكان نجم البورد في احدى السنوات السابقة لكن عندو عيبين تلاتة
اولا كرهنا بالموصلي
ثانيا حركة يجيب ليك البوست ولا اللنك جوة البوست بتاعك - ورد ذكرها فوق
تالتا عندو ذوق سيئ في اختيار الوان القمصان البظهر بيها في التلفزيون و الحكمة طوالي بستضيفوه كانو قاصدين يحرجوه
ما علينا
نواصل في النصائح و الفنيات...
|
Post: #2
Title: Re: فنيات , تكتيكات و نصائح... لطالبي العضوية و الأعضاء الجدد
Author: salma subhi
Date: 06-10-2008, 04:53 PM
Parent: #1
سلام وتحية...
| Quote: فنيات , تكتيكات و نصائح |
راجع وتابع بوست....أسابيع البورد!!
تقديري أخ محمد
|
Post: #4
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-10-2008, 05:32 PM
Parent: #2
اختنا سلمى...| Quote: راجع وتابع بوست....أسابيع البورد!! |
مالك صعبتيها عليهم
بوست نصو مشفر و النص التاني لو ما تابعت كم يوم بتروح
للامانة لا انصح العضاء الجدد يبدو بيه
اما اعزائي المتصفحين فاخير ينسوا الموضوع
بمناسبة اللامناسبة دي نفتقد بوستاتك المميزة وكدا
|
Post: #3
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-10-2008, 05:25 PM
Parent: #1
اخوانا طالبي العضوية , المتصفحين , اعزاءنا القراء
قبل ما ابدا النصايح في شوية حندكة
You don't know what you miss
تخيل انك بتتصفخ في البورد لقيت موضوع دسم و فيه حوار جيد و اراء مختلفة و انت عايز تدلي بدلوك فيه
او تكون هلالابي نار منقد قريت واحد مريخابي بغالط انو الهلال ما يستاهل يشيل الدوري الأخير عشان الحكم ما عارف شنو
او قريت واحد واقع افتاء في موضوع من صميم تخصصك و يشيل و يلبس في الباقين العمة
او واحد ناقل موضوع تكون انت كاتبه و تعبان فيه و غير ليه كلمتين تلاتة في الأول و قاشر بيه و خاتي اسمه
او في بوست بتاع ذكريات عن الجامعة او المدينة او المدرسة و الشله كلها بتكتب و جايبين سيرتك
او لقيت واحد - او واحدة - دفعتك او صاحبك من سنين ما لاقيته كاتب هنا او خاتي صورتو وعاوز تتواصل معاه
بكل براءة تضغط زر رد - عامل فيها ما عارف حاجة
تجيك دي ناطة
يا سلاااااااااااام حارة ياخ
دي بالمناسبة صفحة الرد عاملة كدة - للعلم فقط
لا ولسة شوف إنت محروم من شنو كمان - عزيزي القارئ
سمعت بالمسنجر , يازوووووووول دي حكاية تانية
كدي كحل عينك بمنظر ما اظنك شفتو قريب
وشوف كمان
اها المسنجر دا براه قصة إن الله هون لي قدام بديك طرفها
نواصل ...
|
Post: #5
Title: Re: فنيات , تكتيكات و نصائح... لطالبي العضوية و الأعضاء الجدد
Author: لؤى
Date: 06-10-2008, 06:33 PM
Parent: #1
أخي محمّد البُشرَى
سلامات
شُغُل نضيف
ووالله فنّان إنت
وُدّي
أنـا في البـعـيـد مُـشـتـاق لهـمـسـة من الوطن يا نـسـمـة
|
Post: #6
Title: Re: فنيات , تكتيكات و نصائح... لطالبي العضوية و الأعضاء الجدد
Author: mohmed khalail
Date: 06-10-2008, 06:42 PM
Parent: #5
ابو حتحوت
لكن ناذر ده بستفتو بستفتة السنين
وبعدين ..قلت لي (العرس ما منعني امشي هناك مرض شنو البمنعك)
والله يا عمك دي قلبت فيها الهوبه عدييييل
بس ما تكون لابس جلابية والهواء شديد
|
Post: #9
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-10-2008, 07:44 PM
Parent: #6
محمد خليل يا عمك...| Quote: وبعدين ..قلت لي (العرس ما منعني امشي هناك مرض شنو البمنعك) |
متين قلت ليك ( الليلة اغالطك غلاط)
جيب دليلك
جيب الإقتباس
جيب اسانيدك
جيب جوازك
جيب ...
اعلاه في سياق ضرب المثل لكيفية الغلاط و اللياقة المتبعة في البورد
سيرد ذكرها لاحقا...
|
Post: #8
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-10-2008, 07:39 PM
Parent: #5
ابو اللول يا عمك...يا راجل بطل تواضع
احنا عنقالة ساي
بمناسبة التشكيل دا يا عمك
جدا واجعاني قصة انو اليوزر نيم بتاعك مكتوب غلط بالألف المقصورة
حسي عليك الله كان لمت فيك ايمان صالح في حملتها المشهورة على الأخطاء الإملائية حتتصرف كيف؟
|
Post: #7
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-10-2008, 07:35 PM
Parent: #1
اها يا عزيزي المتصفح
الطريق للحاق المولد اعلاه يمر - فقط - بعمك بكري
و عمك صاحب مزاجات
طبعا الحديث فيما يلي موجه للمتصفح - طالب العضوية - العادي الغير معروف
و اللذي ليس علما في مجال الإعلام او الصحافة او الشعر او الإدب
او ليس من دفعة بكري في الجامعة ولا يقيم في امريكا - اريزونا تحديدا , و ليس من الحلفاية
هذا العضو العادي يحتاج للحصول على العضوية لترشيح و تزكية من اعضاء آخرين يفضل ان يكونوا من ذوي الحظوة او وثيقي العلاقة بعمك
يعني يا المتصفح العادي ما تضيع وقتك في تدبيج الإيميلات و الرسائل ساي
إيميل واحد لشخص وثيق الصلة بعمك و يا حبذا لو كان من المذكورين اعلاه كفيل بفعل ما تعجز عنه آلاف الإيميلات
نقطة تانية مهمة و فعالة و هي إذا تيسرت لك مقابلته شخصيا فمن السهل حينها الحصول على العضوية
ودي دايرة مقص لإحدى رحلتي الشتاء و الصيف السنويتين للخرطوم و يا حبذا لو كان طلب العضوية بعد او اثناء لقاء البورداب
يمكن توسيط بورداب الخرطوم في الأمر
هذا لا ينفي امكانية الحصول على العضوية عن طريق الإيميل و احيانا من رسالة واحدة كما حدث للبعض - في النهاية ارزاق
(في بعض النصائح و التكتيكات فعالة و مجربة لكن ليس من الحكمة طرحها على الملا فقد تلحق البوست الزينين)
اتمنى عزيزي المتصفح ان توفق في سعيك وتنال العضوية
وترى هذه الرسالة السحرية
الآن انت جاهز لتنطلق
نواصل معك كعضو جديد
|
Post: #11
Title: Re: فنيات , تكتيكات و نصائح... لطالبي العضوية و الأعضاء الجدد
Author: دينا خالد
Date: 06-10-2008, 08:10 PM
Parent: #7
يااا عمكـ ياخ البركة بالشوفة
وحمدعلى سلامتك مفتقدنك وكدا !
شايفة موضوع الماجستير ماشى كويس وانتقلت للبراكتيكل !
| Quote: تقوم تظلل الخارم بارم دا كلو وتديه البحر و تلصق الكلام العايز تقتبسه من المداخلة الأصلية |
لقيتك بتاع تلتلة لكن الاسهل انك تدوس ال ري سيت وكل الكلام بمشى براهو لاتظليل
لا غرامة !
| Quote: اولا كرهنا بالموصلي |
سيف الجامعة وانت الصادق ،، لكن الباقى عن ناذر دا اتقطعت فيهو ! لووووووووووووول
Quote: اها يا عزيزي المتصفح
|
انت قاصد خضر حسين خليل !!! مش كدا ؟ كلمهم عدييل كدا كلمهم ما تخجل
وحذرهم هم ذاتهم عاااادى ممكن يتحول الواحد منهم لى متصفح مرة اخرى
وبقدرة قادر يبدا من المداخلة رقم واحد ( ود المايقوما نموذجا )
وذلك اذا ارتكب احدى الموبقات الكم ما عارف ::::
1- ان يرطن برطانة اهلو الملولوة ديك فيظهر الضعة والانكسار المنكورين ..
2- ان يتشالق فى فنيات البورد وفتحها فى البوستات
3- ان يعود مريضا مرتين
4- ان يهوب ناحية المتبريين من لسانهم
وكدا وكدا
وستكون عزيزى البرلوم فى غضب الله اذا تدرعك او تدرعتك احد قدامى البورداب من العتاقى
فاحذر لدغاتهم وامشى جنب الحيط عند مرورك باحد النجوم اللامعة
تقرا البوستات لمالها او لجمالها او لحسبها البوردى او لنسبها لنجوم البورد فاظفر
بذات الصور والفيديو تربت يداك
ـــــــــــــــ
البشرى ؟ حقى وين ! داير تقنعنى انو الحصصص دى مجانية ؟
|
Post: #20
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 04:53 PM
Parent: #11
دندونتو وكدا
الله يسلمك ياخ ومشتاقين
شايفك متألقة في الصور
قصة الريسيت معاك حق فيها لكن انا عشان اعتدت على الشورت كيز الموضوع بياخد 0.037 ثانية معاي Ctrl+A و Ctrl+X وكدا
Quote: وذلك اذا ارتكب احدى الموبقات الكم ما عارف ::::
1- ان يرطن برطانة اهلو الملولوة ديك فيظهر الضعة والانكسار المنكورين ..
2- ان يتشالق فى فنيات البورد وفتحها فى البوستات
3- ان يعود مريضا مرتين
4- ان يهوب ناحية المتبريين من لسانهم
وكدا وكدا
وستكون عزيزى البرلوم فى غضب الله اذا تدرعك او تدرعتك احد قدامى البورداب من العتاقى
فاحذر لدغاتهم وامشى جنب الحيط عند مرورك باحد النجوم اللامعة
تقرا البوستات لمالها او لجمالها او لحسبها البوردى او لنسبها لنجوم البورد فاظفر
بذات الصور والفيديو تربت يداك |
عزيزي العضو الجديد
نصيحة لله كلام خالتك مفراكة دا تظلله وتديه البحر برضو
شنو تمشي جمب الحيط
دي نصايح مثبطة للهمة و لها اثر العطرون في الدماغ يا انتي
العضو كامل الأهلية يمشي و يقدل في نص البورد في عين اجعصها سينير
البورد دا ما حق زول - حتى الان حسب نظرية ود جبر الله
المهم يادندونتو باللاي ادينا نصائح مفيدة
خلي الناس تستفيد ياخ
اموت وافهم قصتك مع الحق دي شنو؟
(وش اب شنب بدخن ايامو الكان لسة بشنب)
|
Post: #14
Title: Re: فنيات , تكتيكات و نصائح... لطالبي العضوية و الأعضاء الجدد
Author: salma subhi
Date: 06-10-2008, 10:26 PM
Parent: #7
Quote: تخيل انك بتتصفخ في البورد لقيت....
وبكل براءة.....وعامل فيها ما عارف حاجة |
| Quote: تلصق الكلام العايز تقتبسه |
مثلاً...
Quote: للامانة لا انصح العضاء الجدد يبدو بيه
اما اعزائي المتصفحين فاخير ينسوا الموضوع |
بعد ده تقوم تجاوب وممكن تكون إجابتك في صميم الموضوع
done
أها بعد ده دايرهم ينسوا برضو!!
واصل واصل أخونا محمد
متابعين
وما زلنا نستفيد!
تقديري
|
Post: #21
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:04 PM
Parent: #14
اختنا سلمىQuote: واصل واصل أخونا محمد
متابعين
وما زلنا نستفيد! |
بطلي التواضع دا ياخ
انتي استاذتنا ومنك استفدنا الكتير اتمنى انك تضيفي لينا في البوست من خبراتك و انطباعاتك عن البورد الكتير
عزيزي العضو الجديد....
لما الواطة تسخن و العجاجة تقوم و البورد يبقى كلو حروب و معارك و حاجة جدا تعيسة و مزعجة
شوف وين اختنا سلمى كاتبة و انخ بعيرك هناك (نصيحة ذهبية)
|
Post: #12
Title: Re: فنيات , تكتيكات و نصائح... لطالبي العضوية و الأعضاء الجدد
Author: العوض المسلمي
Date: 06-10-2008, 08:31 PM
Parent: #1
ود البشري ياعمك سلام
حصص المجانيه زمان كانت وين؟
يعني فتحت بوستات واتعلمنا منكم بعد ذلك
يعني دي دروس مجانيه ولا الموضوع فيه ان؟
انا واثق ..ولكن حمودي البقنعو منو؟
وبالجد موضوعك ده يستحق بوست ماجستير 
|
Post: #22
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:16 PM
Parent: #12
المسلمي ياعمك
ازيك ياخ
اها وقت جيت يلا احكي للشباب ديل تجربتك ايامك الجديد و اديهم فكرة عن بداياتك
نصيحة فضية....
الدنيا ما طايرة عزيزي العضو الجديد
اقرا اكتر مما تكتب في الأول و افهم ما بين السطور جيداالناس هنا عندها المحن وباطن حديثها غالبا لا يشبه طاهره
وعموما شيل رجلك من البنزين (فاكرها يا العوض)
|
Post: #13
Title: Re: فنيات , تكتيكات و نصائح... لطالبي العضوية و الأعضاء الجدد
Author: النذير الطاهر عثمان
Date: 06-10-2008, 10:09 PM
Parent: #1
الاخ محمد البشري الخضر
شكرا لنصائحك المفيدة وعلي درس فنيات وتكتيكات استخدام البورد.
ولك ودي.
|
Post: #23
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:17 PM
Parent: #13
مرحب بيك يا النذير و مبروك العضوية
اتمنى تكون بوستات الآخوان الفنانين لؤي و ناذر افادتك
|
Post: #15
Title: Re: فنيات , تكتيكات و نصائح... لطالبي العضوية و الأعضاء الجدد
Author: كمال سالم
Date: 06-10-2008, 11:25 PM
Parent: #1
ود البشرى بالله البوست ده أرفعو لكليه أو جامعه ,, كلنا محتاجين للكورسات
دى , وممكن تستعين بمساعدى تدريس زى أختنا دينا .
مستعدين لدفع المصاريف بالسودانى أو الدولار أو اليورو , وممكن تكون المحاضرات
عبر المسانجر , بس فى حالة المحاضره سوف يقدمها مساعد التدريس مستعدين
لركوب الاهوال والسفر لأى دوله يقام فيها الكورس ,,
أستاذى لك حبى ,,
|
Post: #24
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:24 PM
Parent: #15
كمال يا عمك...Quote: بس فى حالة المحاضره سوف يقدمها مساعد التدريس مستعدين
لركوب الاهوال والسفر لأى دوله يقام فيها الكورس ,, |
عاد جنس دفيق و حتحته.... مبالغة
لكن خايف عليك بالجد يا عمك
الأيام دي معليش اعفيني يابا
نصيحة ماسية...
عزيزي العضو إن كانت لك رغبة في الحنك ,الدفيق أو الحتحتة فحاول ما تظهرها عاملة
و جيبها بي فوق فوق , وإن كان في بعض الحالات الإستثنائية يفضل انك تختها دج عديل كدة (مزيد من التفصيل لاحقا)
|
Post: #16
Title: Re: فنيات , تكتيكات و نصائح... لطالبي العضوية و الأعضاء الجدد
Author: Maawya Hussein
Date: 06-10-2008, 11:52 PM
Parent: #1
سلام يا ود البشري
سؤال مهم
في خاصيه الرد عندك خيارين
1 رد
2 اضف رد
متين استعمل الخاصيتين !!!
باعتبار اني داير ارد علي الموضوع الاصلي ... ومفروض يكون في بروتكول معين للردود ولا بتحصل حقارات مرات !!!
الحاجه التانيه
اشرح لينا .. ملفك وعدل
ممكن اعدل مشاركتك ؟؟؟
ونخدمك في البوستات ان شاء الله
|
Post: #25
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:36 PM
Parent: #16
مغربي يا عمك...
دا نظام FAQ ولا شنو؟
عارفك زول معلم و بتاع
يلا ادلي بدلوك وخلينا نستفيد كلنا
|
Post: #17
Title: Re: فنيات , تكتيكات و نصائح... لطالبي العضوية و الأعضاء الجدد
Author: AWAD MAHMOUD OSMAN
Date: 06-11-2008, 01:59 AM
Parent: #1
Quote:
اولا نرحب بكل الاعضاء الجدد
اهديكم بعض النصائح و الفنيات
من واقع الفترة اللتي قضيتها
في البورد
|
ودالبشري سلامات
شكرا علي الترحيب والارشادات وتسلم يارب
|
Post: #26
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:38 PM
Parent: #17
هلا اخونا عوض و مرحب بيك
مبروك العضوية
تحياتي
|
Post: #18
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-11-2008, 10:05 PM
Parent: #1
| Quote: نواصل معك كعضو جديد |
Here we go...
عزيزي العضو الجديد
مبروك حصولك على الباسويرد السحري جواز مرورك لعالم عجيب عجيب
ومفتاح صندق الدنيا بالنسبة لمن يشاء وصندوق بندورا للبعض
تخيل انت قاعد في امبدة ممكن تحنك ليك دامة شديدة في فلاديلفيا
تشبكها ورود و بتاع و يا شفيفة و يا كلماتك بتعمل شنو فيني و يا حرفك بطلع عيني و كدا
المهم عزيزي العضو الجديد
النرد على تعليقات الاخوان و نجي نكمل الحكي
|
Post: #19
Title: Re: فنيات , تكتيكات و نصائح... لطالبي العضوية و الأعضاء الجدد
Author: عمر صديق
Date: 06-12-2008, 00:06 AM
Parent: #1
الاخ ود البشري شكرا لك علي هذه النصاائح الغالية
Quote: وستكون عزيزى البرلوم فى غضب الله اذا تدرعك او تدرعتك احد قدامى البورداب من العتاقى
فاحذر لدغاتهم وامشى جنب الحيط عند مرورك باحد النجوم اللامعة
تقرا البوستات لمالها او لجمالها او لحسبها البوردى او لنسبها لنجوم البورد فاظفر
بذات الصور والفيديو تربت يداك
|
ورايك شنو في التطبيق دا
|
Post: #30
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 06-12-2008, 05:46 PM
Parent: #19
هلا اخونا عمر صديق ومرحب بيك
| Quote: ورايك شنو في التطبيق دا |
والله ياعمك الآراء بتختلف من زول لي زول طبعا
لكن عن نفسي ما كنت ح آخد الكلام دا على محمل الجد
باعتبار انو الباسويردات هنا متساوية و ليها نفس الصلاحية
و المثل بقول البلدغك عضيهو في نص راسو
و البدرعك احدر ليه في الضلمة
وكدا
|
Post: #32
Title: Re: فنيات , تكتيكات و نصائح... لطالبي العضوية و الأعضاء الجدد
Author: دينا خالد
Date: 06-12-2008, 09:48 PM
Parent: #19
ووووووووووووووووووووو
ود البشرى ؟ ؟؟؟؟
|
Post: #27
Title: Re: فنيات , تكتيكات و نصائح... لطالبي العضوية و الأعضاء الجدد
Author: ASHRAF TAHA
Date: 06-12-2008, 05:41 PM
Parent: #1
| Quote: - حركة جبيب اللينكات - |
دي الله يكتلني لي هسة ما عرفتها
|
Post: #28
Title: Re: فنيات , تكتيكات و نصائح... لطالبي العضوية و الأعضاء الجدد
Author: عبدالفتاح أبوشيمة
Date: 06-12-2008, 05:42 PM
Parent: #1
ود البشرى الله يديك العافية
قول آمين
|
Post: #29
Title: Re: فنيات , تكتيكات و نصائح... لطالبي العضوية و الأعضاء الجدد
Author: طلحة عبدالله
Date: 06-12-2008, 05:43 PM
Parent: #1
عزيزي القادم الجديد
لو لاقتك المفردة دي : (جرجير) فلا تستانس ولا يسيل لعابك لذكر أحدي مكونات (السلطة) لانك ستكتشف خلال تجوالك بين بوستات وردود ومداخلات المدعو ود البشري أن الكلمة من ( جرجرة ) .
دي مساهمة مني في الحصة دي ..
|
Post: #31
Title: Re: فنيات , تكتيكات و نصائح... لطالبي العضوية و الأعضاء الجدد
Author: Elawad
Date: 06-12-2008, 06:03 PM
Parent: #1
والله حصص تمام و طبعا دا درس مهم للأعضاء الجدد:
Quote: Quote: أستاذى لك حبى ,
الأيام دي معليش اعفيني يابا
|
لأنه في المنبر دا كان شكرت عضو من الجنس الآخر ممكن تخسر من سمعتك نسبة تتراوح بين 5% لي 65% أما إذا شكرت عضو من نفس الجنس فأنت تخاطر بنسبة 100% لي 250% من سمعتك.
تحياتي ود البشرى... بأمانة كدا ما جابتني الدروس... جابني الشمار قلت أشوفك قاعد تتآمر على البورد كيف يا ولد يا شقي إنت.
|
Post: #33
Title: Re: فنيات , تكتيكات و نصائح... لطالبي العضوية و الأعضاء الجدد
Author: كمال سالم
Date: 06-13-2008, 01:39 AM
Parent: #1
وووووووووووووو
ودالبشرى ؟ ؟؟؟
ــــــــــــــــــــــ
ود البشرى بالله تانى ماتفلت وتطلع الحاجات ؟
شايف مساعد التدريس بحذرك .
|
Post: #34
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-01-2008, 03:27 PM
Parent: #1
نعيد الترحيب باخوانا الأعضاء الجدد ونواصل
وللمتصفحين و طالبي العضوية ابشركم يبدو ان ليبيا قد فتحت
مرحبا بكل يحترم هذه القوانين
ما عليك إلا ان تتعهد باحترام اللائحة وكدا
وفرصة بالمناسبة لمن يرغب في نيك نيم آخر من الأعضاء القدامى - انصح باختلاق اسماء معقولة
و البعد عن الأقارب وكدة
|
Post: #35
Title: Re: فنيات , تكتيكات و نصائح... لطالبي العضوية و الأعضاء الجدد
Author: بشير جبريل علي
Date: 07-01-2008, 04:05 PM
Parent: #34
يا ود البشرى ..كيفك ياعمك
أنا نفسي أجدد الباسووود ..
أعمل ..شنو؟
أفتينا طال عمرك ..
بشير
|
Post: #36
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد خليل ساني
Date: 07-01-2008, 04:10 PM
Parent: #34
الحبيب ود البشرى
سلامات يا لذيذ
تسلم على الحاجات الحلوه دي
تتصور الناس الجدد ديل محظوظين
أنا شخصيا لمن اشتركت فى مارس الماضي
ما لقيت زول ينور ليّ الطريق ببوست زي ده
أو يمكن ما فتشت فى أرشيف المنبر
بس إجتهادات من حبيبنا هارون دياب معاي
ومساسقه وعكلته من صحبك لمن عرفت الدرب
تخريمه خشنه
________________
صحبك حموووووودى العسل عندو صور تحفه
فى أبراج الحمام بارك حأنزلها فى بوست رحلة العمر
ما تنسى رأيك وتعليقك مهم جدا مع إنى عارفك ما بتتوصى
|
Post: #37
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-01-2008, 04:19 PM
Parent: #1
عزيزي المتصفح و طالب العضوية
وعزيزي العضو القديم الراغب في نيك نيم آخر
يبدو ان ليبيا لم تفتح بعد
فعمك استدرك وصلح العنوان كالآتي:
مرحبا بكل من يحترم هذه القوانين من الاعضاء السابقين
وقت السيرة جات احب انبه عزيزي العضو الجديد للحتة بتاعة العناوين
يا قول هناي " لكل داء دواء يستطب به .. إلا الحماقة أعيت من يداويها"
اها يا عزيزي العنوان دا هو الحماقة نفسها القال عليها
كل الكلام البتكتب داخل البوست ممكن تعيد النظر فيه تعديلا و تصحيحا و حذفا
إلا العنوان كالرصاصة كان طلعت تاني ما بترجع
او كحكم وصل آخر درجات التقاضي غير قابل للنقض او الإستئناف
يعني يا حبة لو غلطت في العنوان شربت زيت زي الما حصل شي
ما بتعدل ولا بتصحح
و البريفيلج دا عند عمك فقط
ونادرا ما يستجيب للنداءات بتعديل العناوين
فعشان ما تقع في الغلطة دي و تبقى في الجرسة تمهل و اعد البصر كرتين تلاتة قبل ما ترسل كتابتك وكدا
عموما القاعدة الذهبة بتقول " شاهده قبل نشره "
|
Post: #38
Title: Re: فنيات , تكتيكات و نصائح... لطالبي العضوية و الأعضاء الجدد
Author: Maawya Hussein
Date: 07-01-2008, 08:56 PM
Parent: #1
يا ود البشري والله انا جادي في سؤالي الفوق داك
ملفك دي بتعني شنو ؟؟ مكتبتك ولا البروفايل
ممكن اعدل مشاركه زول ؟؟
ودبلوماسيه الردود
خلينا نستفيد
|
Post: #39
Title: Re: فنيات , تكتيكات و نصائح... لطالبي العضوية و الأعضاء الجدد
Author: بشير جبريل علي
Date: 07-01-2008, 09:10 PM
Parent: #38
| Quote: ملفك دي بتعني شنو ؟؟ مكتبتك ولا البروفايل |
الأخ: معاوية تحياتي ..إنابة عن ود البشرى ..أستأذنك وأستأذنه
حسب علمي ..ملفك تعني بروفايلك ..لكن لايمكن أن تعدل بوست أو
بروفايل شخص آخر ..وجرب يا معاوية أفتح بروفايل أي شخص آخر
وأعمل كلك في ملفك .. بفتح معاك ملفك أنت مش ملفو هو؟
مع خالص تقديري
بشير
|
Post: #40
Title: Re: فنيات , تكتيكات و نصائح... لطالبي العضوية و الأعضاء الجدد
Author: Maawya Hussein
Date: 07-01-2008, 09:18 PM
Parent: #39
شكرا بشير علي التوضيح وكنت زمان خايف اهابش براي اتقرص
بس بالنسبه لي ملفك دي انا ضغطت علي ملفك الفي ردك انت جاني بروفايلك انت ..
اتعلمتا حركتين الليله ود البشري باقي ليك موضوع الردود ياخ
|
Post: #41
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-02-2008, 07:47 AM
Parent: #1
Quote: ووووووووووووووووووووو
ود البشرى ؟ ؟؟؟؟ |
ووووووووووووووو
دندونتو ! !!!!
اشرف طه يا عمك...
تبرا يايابا
بجيك ليها لي قدام
ابشيمة ...ابيت
تعال استلمني يلا
طلحة تنظير....
ياخ ما تدي الإخوة الجداد نبذة عن التنظير السليم و فكرة عن اكبر المنظراتية عبر التاريخ
عزيزي العضو الجديد...
اخونا طلحة خير نموذج لشخصية سيتم تناولها لي قدام باذن الله
وهي شخصية الكاتب ذو الإتجاه الواحد او الموضوع الواحد و تعرف اصطلاحا بالفرمالة 
العوض ...
يعجبني فيك انك في الصورة دايما و ما بتفوتك المطايب
كمال سالم...
وحاة النبي سكاك سك
روق يا عمك واحلى
|
Post: #42
Title: Re: فنيات , تكتيكات و نصائح... لطالبي العضوية و الأعضاء الجدد
Author: بشير جبريل علي
Date: 07-02-2008, 08:16 AM
Parent: #41
| Quote: بس بالنسبه لي ملفك دي انا ضغطت علي ملفك الفي ردك انت جاني بروفايلك انت |
طيب بعد جاك بروفايلي إضغط علي ملفك التحت بروفايلي ..بجيك بروفايلك أنت ..
ليه لأنك ..لمن تمشي بروفايلي وتضغط ملفك دا بعني أنك عايز تعدل ..ولأن لا يمكن التعديل في بروفايل غيرك عشان كدة بوديك بروفايلك ..يعني بقول ليك مسموح ليك تعدل هنا في حقك ..ههههههههه
سلامات معاوية ..
ياخ أنحنا عناقلة ..ساكت أنت سيد الشي ذاتو...
وشكرا
|
Post: #43
Title: Re: فنيات , تكتيكات و نصائح... لطالبي العضوية و الأعضاء الجدد
Author: عبدالفتاح أبوشيمة
Date: 07-02-2008, 04:09 PM
Parent: #1
Quote: ابشيمة ...
Quote: قول آمين
ابيت
تعال استلمني يلا
|
بالله عليك الله يا أبوحتّوت
دا رد تردّه على واحد برلوم زيّي
معليش الكيبورد اللّي بيتحنضل زي دا نديه الكلام الموجّه للناس
العمد والأركان والأعمدة حقّة البورد
سيفي سلّيتو!!!
ولو إني عارف انت ما فاضي لينا؛ أقول ليك خللي البرالمة زيّي يستفيدوا منه
يا شباب أهم حاجة الملافظ سعد؛ وسيفك(كيبورديك يعني) كان سلّيتو لا نوبي لا عربي ما
بدخّلنّوا بيته.
تاني الله يديك العافية يا ود البشرى؛ وقول آمين.
|
Post: #44
Title: Re: فنيات , تكتيكات و نصائح... لطالبي العضوية و الأعضاء الجدد
Author: sami Alzubair
Date: 07-02-2008, 05:10 PM
Parent: #1
ياعمك والله ما مقصر مع الشباب وكدا
لكن شايف اعمامك جمركوا البوست
حالتو ما جاك ودشيقوق ولا واحد من الهمباتة
...
اهم حاجة يا عمك ما الاكواد
الاهم منها المصطلحات
يعني مثلا واحد يخش البوست يلقي الكلام كلو
الخور،المستنيرين،كبشروا،شرحوا،عشان خاطر الباندوث،...الخ
ده كوم ومصطلحات عمك بشاشا ديك كوم
غير كلام ناس محسن خالد والجماعة الادباء ديل.
اها
تلقي الواحد خشي البوست وزي ما دخل زي ما طلع
وافتكر انوالناس بتتكلم رندوك ساي
فيا عمك كلم ناذر واب شنب وكيكي وتمبس وباقي الشباب
اعملوا القاموس ده
ولا جيب لينك البوست الكان بدا فيهو كلام زي ده
ونزلوا لينا هنا(وش اب شنب الاخدر البدور ظاتو)
...
شوتة:
نقشت اسبوع من اجل ابنائي ولا اشرحو ليك هناك
|
Post: #45
Title: Re: فنيات , تكتيكات و نصائح... لطالبي العضوية و الأعضاء الجدد
Author: كمال سالم
Date: 07-03-2008, 10:02 AM
Parent: #1
ود البشرى صباحاتك بيض ,,
إنت سميتو ( سك ) وأنا بسميهو بحث .
بحث عن الحقيقه ,,
يمكن يوم نعتر لينا فى دقسه ,,
|
Post: #46
Title: Re: فنيات , تكتيكات و نصائح... لطالبي العضوية و الأعضاء الجدد
Author: جدو
Date: 07-03-2008, 03:56 PM
Parent: #45
ود البشرى يا عمك
ما قصرت مع الشباب تب..
بس وصيهم يبعدوا من بوستات الحجة والكتاحة عشان ما يطفشوا فرد طفشة..
أسع السناير ذاتهم بقوا يكشفوا من بعييييد ..ولسان حالهم يقول : أبعد عن الشر وغنيلو...
...
|
Post: #47
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-03-2008, 04:17 PM
Parent: #1
عزيزي العضو الجديد...
في العديد من الأفكار المواضيع العايزين نتناولها ولأني زول ما مرتب فالحاجة الفي بالي ح اكتب عنها
و يمكن قبل ما تكمل تجي نقطة تانية وممكن نرجع للأولى بعدين - او ما نرجع ما مشكلة
ح انتاول بداية موضوع كبير شوية
هو المقصات او الكماين و يطلق عليها احيانا الشرك او التيراب
يعني عايز تجيب رجل شخص او جماعة معينة
او عايو تبعدهم و تطفشهم وما داير خلقتهم تعرض عليك
او ممكن يكون ما عندك شخص معين قاصدو
او متوقع ردود افعال معينة من ناس بعينهم
او عايز تتاكد من حاجة
اها الأساليب المستخدمة لتحقيق الغايات اعلاه هي موضوع الحديث القادم
نكمل بعد الصلاة
|
Post: #48
Title: Re: فنيات , تكتيكات و نصائح... لطالبي العضوية و الأعضاء الجدد
Author: احمد محمد بشير
Date: 07-03-2008, 04:18 PM
Parent: #1
حبينا ود البشري
يديك العافية علي الشغل الجميل دا
وجاني في جرح
بالذات الشغل بتاع الاقتباس دا ما كنت قاعد اعرفوا
بس يا ملك
ورينا كيدا:كيف نرفق اوراق ومستندات مصوره باسكنر في البوست
والف الف عافية.
|
Post: #49
Title: Re: فنيات , تكتيكات و نصائح... لطالبي العضوية و الأعضاء الجدد
Author: حنين للبلد
Date: 07-03-2008, 08:22 PM
Parent: #1
بوست مهم جدا..مكانه فوق
|
Post: #50
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-05-2008, 06:26 AM
Parent: #1
عملا لي الله
نتكلم في حاجة مفيدة حتى نرجع لفلم المقصات
الصور و ما ادراك ما الصور
من اللنكات اعلاه الموضوع واضح لكن في تيب تبين كدة قد تكون لهم فائدة
اولا حجم الصورة و الفورمات تبعها
مواقع رفع الصور بتحدد حجم معين و فورمات معينة
حجم اقل من 90Kb مناسب و فورمات jpg & jpeg معقولة لأغلب مواقع الرفع
لتقليل حجم الصورة و تغيير فورماتها توجد العديد من الوسائل
و لكن لأن المعني بالشرح هنا هو عزيزي العضو الجديد على عالم النت و الصور نتكلم عن ابسط وسيلة و اكثرها شيوعا
باستخدام برنامج الرسام Paint المتوفر مع اكسيسوريز الويندوز
بعد فتح الصورة المراد تصغيرها على البينت في قائمة Image اختار Resize/skew
راعي اختيار نفس القيمة للطول و العرض لنسبة التصغير عشان تحتفظ بالتناسب بين ابعاد الصورة
ما تتفلسف و تخت قيمتين مختلفات بعدين الصورة تتكعوج
(حتى لو اتفلسفت و عايز ترجع الأصل قبل ما تـ save أضغط Ctrl+z أو Undo)
بعد ما ظبطت ابعاد الصورة احفظها باختيار save as من قائمة file راعي اختيار الفورمات المذكورة فوق
بكدا الصورة جاهزة للرفع
اذا حابب ترفع في سودانيز اون لان يوجد لنك تحميل الصور فوق بوديك على صفحة التحميل
Tip:
روابط الصور المحملة على سيرفر سودانيز اونلاين بتخلي الصورة في السنتر و عليها عنوان الموقع ولا يمكن حفظها في الجهاز - باخوي و اخوك- نطام حماية و كدا
إذا الحكاية دي ما عاجباك - او مبري منها زيي كدا - تقوم بدل ما تاخد الرابط الجاهز تلقى في واحد تاني بقول ليك لوضع الصورة في البروفايل
تشيلو زي ما هو و تستخدم "اضف صورة " الموجودة في مربع الكتابة - بجانب ناس اقتباس و ضع خط و الجماعة ديك
بعض المواقع لتحميل الصور :
http://sudanesehost.com
http://www.nile-love.org
|
Post: #51
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-05-2008, 11:23 AM
Parent: #1
عزيزي العضو الجديد ....
في موضوع مهم - من وجهة نظري - حبيت اطرحه
هو موضوع الإدانة لموقف او كلمة او تعدي او غيره
كتير ح تفابلك هنا عجاجة و عوا بين عضوين او جماعتين او اكتر
وفي خضم الكعة قد تقرا كلام جارح جدا فيستفزك و بكل اريحية تدخل و تدين الطرف الصدر منو الكلام المعني
الطرف المتضرر حيحمد ليك موقفك جدا و يشكرك عليه - عادي
المشكلة وين ان الطرف الأنت ادنت موقفه او تصرفه اسهل حاجة ح يرد ليك وكنت ين حضرتك من زمان لما فلان قال لي و هناي فعل لي
وما تجي داخل من النص بدون ما تلم بخلفيات الموضوع و بتاع و هناي و تبقى في اليحلك
و بصورة تانية برضو اذا في عضو توقع منك تتضامن معاه او مع الراي العام في موقف معين
يقوم يلم فيك في حتة تانية ما عندها علاقة بالموضع و يسالك ليه ما شفناك كتبت او سجلت موقفك هناك؟
وليه ما و ليه هناي و ليه بتاع , سؤال الملكين بس
انا شخصيا ما قاعد تفرق معاي و بعتير انو كل عضو هنا راشد و مسؤول عن كلامه ما من حق حد يسالك ليه وما ليه
و لو عايز ادين حاجة بدينها لأنو بعبر عن نفسي و رايي ما علي بالآخرين تقبلهم و رايهم شنو عن تصرفي
وان كان في نوع من المنطق في الجزء الأول من الكلام بتاع انك حقو تلم بخلفيات المشكلة - لو كانت عندها خلفيات - قبل ما تبدي رايك
اما حكاية ليه ما وقفت معاي و بتاع دي فانسى
انا شخصيا لو حد غلط علي عندي خيارين يا رديت ليه و جهلت فوق جهله
او ضربت صفحا و نسيته
وفي الحالتين لا احتاج او ارغب في دعم من احد - كما اسلفت كلنا راشدين و نملك نفس الآكسس و مستوى الباسويرد
بالتالي ارى نفس في حل من حملات التضامن
عزيزي العضو الجديد اعلاه راي شخصي لا اكثر
نواصل - إن الله هون
|
Post: #52
Title: Re: فنيات , تكتيكات و نصائح... لطالبي العضوية و الأعضاء الجدد
Author: ناهد بشير الطيب
Date: 07-05-2008, 11:37 AM
Parent: #1
ود البشرى ...حقوا البوست ده يثبتوه فوق ....
وفوق من اجل الكل
|
Post: #53
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-05-2008, 11:37 AM
Parent: #1
نقطة اخرى
عزيزي العضو الجديد...
وانت فرحان بالباسويرد و العالم الجديد اتمنى ان لا تنسى ان العالم دا عالم سايبري لا اكثر
ولا يصلح كرفرنس او ستاندر للعالم الحقيقي
لا تأخذ مراجعك عن العالم الحقيقي من هنا - او على الأصح لا تعتمد عليها تمام الإعتماد
هنا الوضع فيرشوال و الكل يتحكم فيه و يخلق و يختلق ويرسم من الصور ما يشاء
حتى الأسماء الحقيقية و الإنطباعات اللتي تولدها لديك هنا لا يعني ان هذه هي الشخصيات الحقيقية على ارض الواقع
ممكن عادي تقرا لواحد ليل نهار يكتب عن حقوق المراة و الإستنارة و بتاع و يكون في واقعه الحقيقي المراة لاتعني اكثر من متاع مملوك له
ممكن تقرا هنا من يلعن سنسنفل جدود الحكومة و في الواقع يرسل خطابات الشكر و التاييد للمشير
وقس على ذلك
كمان هنا في جاكات معينة اتمنى انك ما تاكل منها
يعني ما كل لقاء لبورداب كان رائع و دافئ و جميل و بتاع
و ما كل من كتب معجبا بنثر او قصيدة فاهم الكلام القراه
وما كل من ادان موقف و تصدر في لعنه مقتنع حقيقة بالخطا الحاصل
باختصار هذا ليس عالما حقيقيا
وحتى لا تحبط او تحس بالخذلان تعامل معه على هذا الأساس عزيزي العضو الجديد
|
Post: #54
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-05-2008, 11:52 AM
Parent: #53
| Quote: حتى الأسماء الحقيقية و الإنطباعات اللتي تولدها لديك هنا لا يعني ان هذه هي الشخصيات الحقيقية على ارض الواقع |
محتاج اوضح هنا ان المقصود ليس الأسماء الوهمية وكدا
لا بتكلم عن الأسماء الحقيقية لأصحابها و الشخصيات الراسمنها لنفسهم و في الواقع خلاف ذلك
على سبيل المثال انا مقدم نفسي هنا على اني زول تفتيحة و ظريف و بتاع لو قابلتي في الحقيقة - ولا احبذ - ح تلقاني زول بيض و دمي تقيل و ما تقدر تكمل عشرة دقايق ونسة معاي
خد عندك مثال تاني اب شنب او حمممودي العسل اخونا محمد عبد الماجد
طارح نفسه هنا زول وجيه و حبيب و بتاع جكس و حنكو سنين
لو شفته شناة السنين عليه و لو اتكلمت معاه حنكو عاضي و حكايته بطاله خلاص - اخير انا
فس على ذلك عزيزي العضو الجديد
وشوف كم واحد وواحدة فاكنها فيك هنا
دي ما مشكلة كلو واحد يرسم الصورة الهو عايزها دا سايبر مفتوح
و من رحمة ربنا اتاح لينا فرصة نعيش فيها بالشكل الحابين نكون عليه
الفكرة انك يا عزيزي ما تاخد الموضوع على محمل الجد تصدق الصورة المطروحة هنا مالم تقابل الشخص او تتعرف عليه بشكل واقعي
وكدا
|
Post: #55
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-05-2008, 12:11 PM
Parent: #1
مغربي يا عمك...| Quote: ممكن اعدل مشاركه زول ؟؟ |
ياخوي انت قايل روحك آدمن هنا كمان
مالك على مشاركة الزول كمان
بشير جبريل...دناقلة قصدك ... من وين؟
اب شيمة...| Quote: يا شباب أهم حاجة الملافظ سعد |
و اهم من الملافظ الكلام الموزون وفي محله
يديك العافية و ما تقول آمين
ود الزبير...| Quote: الاهم منها المصطلحات |
جاييك ليها لقدام ابوي - ان الله هون
كمال سالم...Quote: بحث عن الحقيقه ,,
يمكن يوم نعتر لينا فى دقسه |
اها وقووول عترت , وبعد دا ؟
مشي حالك يابا
غمض عينك تاكل ملبن
جدو يا عمك...| Quote: بس وصيهم يبعدوا من بوستات الحجة والكتاحة عشان ما يطفشوا فرد طفشة.. |
في دي ما معاك ابوي
العضو الجديد يكابس محل ما يعجبو حتى يشتد عوده و يحدد مساره و اتجاهو
انا بفضل انو يخش و يدقش كويس كان سلك فبها وإلا يشيل الوردة الحمرا ويقع بوستات الغاوون - وما اكثرها
هلا احمد محمد بشير و مبروك العضوية
شرفت البورد و سعدنا بك
في اللينكين اعلاه خاصة بوست لؤي في شرح وافي
بالإضافة للتيب الوردت فوق
يا بلد ...
انتي المهمة و مكانك فوق والله
مثال جيد عزيزي العضو الجديد على كسير تلج على خفيف - لي قدام نتكلم عن كسير التلج على تقيل
دكتورة ناهد ...
مشكورة ياخ وكلك ذوق
|
Post: #56
Title: Re: فنيات , تكتيكات و نصائح... لطالبي العضوية و الأعضاء الجدد
Author: عبدالفتاح أبوشيمة
Date: 07-05-2008, 05:53 PM
Parent: #1
Quote: يديك العافية و ما تقول آمين
|
آآآآآآآآمين
|
Post: #57
Title: Re: فنيات , تكتيكات و نصائح... لطالبي العضوية و الأعضاء الجدد
Author: عمرو كمال ابراهيم
Date: 07-06-2008, 03:07 AM
Parent: #56
ود البشرى
كنت وين لمن اشتركنا
يعنى تعمل بوست زى ده... بعد ما بقينا نوصف للناس بالتلفون
بالغت معانا عديييييييييييييييييييييييييييييل
|
Post: #58
Title: Re: فنيات , تكتيكات و نصائح... لطالبي العضوية و الأعضاء الجدد
Author: محمد البشرى الخضر
Date: 07-07-2008, 06:17 AM
Parent: #1
فوق عشان هناية
|
Post: #59
Title: Re: فنيات , تكتيكات و نصائح... لطالبي العضوية و الأعضاء الجدد
Author: sami Alzubair
Date: 07-07-2008, 06:23 AM
Parent: #58
يا شفاف
محاضرة المصطلحات الساعة كم
المداخلة برعايةمكرونة نوبي وكدا
ــــــــــــــــــــ
التلفون امبارح ما اديتني ليهو
|
|
