بمناسبة بداية الدوري الممتاز ... دعوة لترقية الطرح في الشأن الرياضي بالبورد

كل سنة و الجميع بخير
ينطلق الأسبوع القادم الدوري الممتاز بإذن الله
حبيت انتهز المناسبة دي وادعو محبي الكورة و الناديين العريقين لتناول موضوعي
بعيد عن الإسفاف و المهاترات والإساءات الشخصية وكل ما من شانه أن يسيئ للقيم اللتي من أجلها خلق التنافس الرياضي في المقام الأول
عموما التغيير قد يكون صعبا لكن لابد منه
كلكم و قراء الموقع لا بد تأذوا بما فيه الكفاية الموسم الماضي من التناول الغريب لأمر الهلال و المريخ بل وحتى المنتخب الوطني
اتقد ان الوقت قد حان لنتوقف و نرى الأمر من زاويته الصحيحة
المسألة لا تعدو ان تكون منافسة رياضية لا هي سياسة لا قبلية لا أي شيئ آخر
منافسة في الملعب تدور بكل احترام يبارك فيها المهزوم للفائز بكل ود و روح رياضية
بدون إعادة الماضي و سرد المحن اللتي دارت وتدور
فقط نرجو التوقف عن كل ما من شأنه ان يسيئ و يحط من قدر الآخر
بداية اتمنى أن تختفي ألفاظ كـ" البعيوات " و " الجريوات " *
وأن نخرج من دائرة الفعل ورد الفعل
فعند نعتنا الآخر بما لا يحب نسيئ لفريقنا أيضا, إذ لا يوجد ما يمنعه من رد الإساءة بأسوأ منها
اتمنى ان تلقى هذه الدعوة قبولا لدى محبي الهلال و المريخ و أن تنقل للمنتديات الخاصة بالناديين أيضا
عسى و لعل


* بديلا لمصطلحي "بعيو" و " جريو" أقترح استخدام " زعيم" و " وصيف"

سلامات يا محمد البشرى

لا أشيد فقط بفكرة المقال؛ بل أتعهد بالالتزام بها، ولا بأس (بل لا غنى) عن المناكفات،
وكلنا يعرف الفرق بينها والإساءات.

لا يفوتني أن أحمل الإعلام الرياضي معظم مسؤولية هذه الإساءات المتبادلة، وأعتقد أن
لنا -كلنا- من التعقل ما يكفي لأن (نعتق) أقلامنا من أساليبه المتواضعة.

لا فائدة إذا كان الحضور الرياضي في منبرنا وجه آخر -ربما أكثر سوءا- مما يرد بالصحف
الرياضية، وليس من المعقول أن ننتقدها ونحن نقتدي بنهجها.

اتمني ان نتعهد جميعا بهذا ، شكرا محمد البشرى ، لنسعي لتعليم الصحف الرياضيه وكتابها ، ان مناصرة فريق لا تعني كره الآخر ، واعزازنا للاعبي فريقنا ، لا تعطينا الحق في النيل من لاعبى الفريق الآخر ..... انها كرة قدم لا اكثر ولا اقل

رقم صفر تحياتي

Quote: ان مناصرة فريق لا تعني كره الآخر ، واعزازنا للاعبي فريقنا ، لا تعطينا الحق في النيل من لاعبى الفريق الآخر ..... انها كرة قدم لا اكثر ولا اقل

تسلم فقد اوفيت وكفيت
لاعبي الفريق الآخر ديل هم لاعبي الفريق الوطني وقد يكونوا لاعبي فريقك في المستقبل
و انصار الفريق الأخر ديل هم اخوك او ابوك او جارك او زميلك في العمل او الحزب و خلافه
ولا يستقيم نعتك ليه بأوصاف لا ترضاها لنفسك

ود الريح يا عمك

Quote: لا يفوتني أن أحمل الإعلام الرياضي معظم مسؤولية هذه الإساءات المتبادلة، وأعتقد أن لنا -كلنا- من التعقل ما يكفي لأن (نعتق) أقلامنا من أساليبه المتواضعة.

في السودان كنت مغرم بمتابعة الصحف الرياضية و بدخل الإستادات بصورة منتظمة
النعوت دي ما لاقتني إلا في المنتديات الإلكترونية
أتفق مع حديثك تماما في وجوب عدم الإقتداء بالصحافة الرياضية وإن كان واقع الحال يشي بأن المنتديات فاقت الصحف في سوء و قسوة النعوت و الألفاظ

Quote: بداية اتمنى أن تختفي ألفاظ كـ" البعيوات " و " الجريوات "

لا لا ما دايرين.
اجمل مافي هلال مريخ يا محمد البشرى البرنامج دا.
وكرة القدم اصلاً كدا.
واسأل عن ميلان والانتر ، ارسنال وتوتنهام ، ريال مدريد وبرشلونة ، روما ولاتسيو ، مانشستر سيتي ومانشستر يونايتد ، بورتو ولشبونة ، اتحاد جدة والاهلي ، الهلال والنصر (ما داير اقول اهلي زمالك أبيت)

وحتلقى البنعمل فيهو دا عاااادي جداً.

ممكن تطبق الكلام دا على شريحة معينة بس ما بتقدر توصلو للشارع..ياخي ناس كتار ما عندهم علاقة بالكورة أصلاً بس بعرفو هلال مريخ. وكضاب البقول ليك بنفتش في هلال مريخ الكورة والمتعة. الدوري الانجليزي والشامبيز ليق الاوربي بعمل في شنو؟؟

والبخلي حجة عشة جارتنا (ربنا يطول في عمرها) البخليها توزع الزلابيا لمن المريخ يغلب وتفتش في الهلالاب الشاردين منها يومها داك شنو؟

بعد النضمي والجرس دا بسحب كلامي وأقول : أثني على كلامك وموافق وأي حاجة

............

ملحوظة 1: ليه دورينا مخالف الناس؟ يعني ليه يبدا شهر 2 ؟
ملحوظة 1 ونص: رفعنا التكلفة معاك والتحية ولك ودي والحاجات دي. لو داير نديك منها قول

مرحب بيك يا محمد يوسف الزين
واشكرك على رفع الكلفة فقد ارحتني وكدا
ياخوي انا متحدثت عن المناكفات و المكاواة واللي هي روح وملح المنافسة
ولا غنى عنها كما تفضل ودالريح
اقصد الإساءات و التحقير و اللتي تختلف تماما عن المكاواة و المناكفة
بعدين ياخي حتى في الاستاد ياها حدها رشاشات و صهاينةو جابت ليها وصيفاب الأيام الأخيرة
حصل سمعت امك و ابوك و بعيو و كلب و خروف و الكلام الغريب دا
يعني كان وصلنا مرحلة الاستاد نكون ما قصرنا زاتو

وكان لحجة عشة قول ليها بختك حتوفري حق الزيت و الدقيق السنة دي

بالنسبة لموضوع بداية الدوري دي تسال منها عمك طلحة تنظير هو المختص بشؤون الإتحاد العام و عنده حق التوزيع الحصري لشداد في دبي والإمارات الشمالية

مرحب بيك تاني

ياعمك
يعني بدل نقول الضلالاب نقول هلال المساكين المعدمين ..
مو صاح ...
ياخ انتو أساسا كرشاشات المتكلمين ليها شنو ..
من كاساتكم الخارجية واللا من أستاداكم العصرية ..
قوموا نوموا واللا اعلموا حاجة كدا واللا كدا بلا طرح بلا بلح ..

هل تنفع الاساليب الفاسدة نادى المريخ على استعادة البطول... الغائبة منذ 5 سنوات

أبوعلوة
ما فهمت قصدك من إيراد بوست الأخ المجمر واعتقد أن لا علاقة له بالموضوع المطروح
المجمر هلالابي قح لكن اشهد له بعدم استخدامه لأي لفظ - ركز لي على لفظ - يمس نادي المريخ أو انصاره
بعدين ياخي الفكرة ما هلال مريخ
لأنو كلنا متضررين من الشتائم و الإساءات المتبادلة حتى على مستوى لاعبي المنتخب
محتاجين نعالج الموضوع بنظرة أشمل
محتاج اسمع رايك يا ابوعلوة

الأخ/ محمد البشرى تحية طيبة

نسبياً ألفاظ " الجريوات " و " البعيوات " تعتبر ألفاظ من المدينة الفاضلة مقارنة بالقيح الذى ينتج يومياً ويتم تقيؤه فى هذا المنبر عن المهاترات السياسية بدعوى النضال فى هذا المنبر ... على أقل تقدير فهى مناكفات محببّة من الجانبين .... ولولم تصل مرحلة ذلك القيح فلا تثريب عليها ....فمرحباً بجنينة الحيوانات.
قلت لىَ رابط هشام المجمّر ما فيهو لفظ واحد يمس المريخ العظيم ؟! طيب ماذا يعنى لفظ الأساليب الفاسدة الوارد فى العنوان؟! ما لم تكون بتقيس هذا اللفظ بمقاييس قيح المناكفات السياسية لمناضلى البورد ... بعدم ذلك بقولوا عليه tends to lower Al-Mareikh in the opinion of the public , hence it is a tortfeaser.
تحياتى

طلحة يا وجيه
خليني من إنجازاتنا و استاداتنا
انجازنا واحد مافي غيرو , نطلع عارضتكم كل سنة و ننومكم اليوم داك بلا عشا
اديني رايك في موضوع البوست
مش حقو الناس تاخد خطوة إيجابية لوقف الإساءة على الأقل

إنتقل للآخر

أها يا عــ م ــك


أنا غايتو راقد لي فوق راي


في ناس كده (*) لمن تشوف ناس كده (*) سلوكا بتضرب
بغض النظر عن قال شنو ولا المناسبة شنو ظاااااطو

أها دي أساس البلاوي
لمن زول يبني كلامو على (أحقاد) زول تاني
يعني الكلام (كلو) يكون غبينه بس .. لا أكتر ولا أقل


ياخي ما دام هو حاقد .. خليهو في حالو وتعال قول كلامك أنت ده


**** التعديل عشان الـ ك في (كلو)
_،_،_،_،_،_،_،_،_،_،_،_،_،_،_،_،
فهمتو حاجة .. ؟؟

ود الصايم
الحاصل دا ليس حكرا على سودانيز اون لاين بل أغلب المنتديات البتم فيها تداول أمر الكورة
و في منتديي جماهير الهلال و المريخ ايضا
وحسنا فعل مشرفوا منتدى كورة عندما حظروا عددا من الألفاظ من التداول
و القصة تتجاوز الأفراد و علاقاتهم
والأمر والله لو شئنا بسيط
ننتقد النادي المنافس و جمهورو و صحفييه وإدارييه وأي حاجة - حتى ميضنة الجامع الشترا ديك -
و نكاويهم و نشبكهم القاعد و الهوبة و الصفاقسي و كل شي
بس بدون كلام جارح بدون شتيمة لأنها تلقائيا حا تترد لينا
صعبة دي

Quote: أنا غايتو راقد لي فوق راي

العديل راي و الأعوج راي برضو

كلام واضح يا أبوحميد
اي زول بفهمو إلا الما عايز يفهم ..
صاح خلي الزول الحاقد في حقدو وقول كلامك انت الماحاقد ..
دي دايرة ليها درس عصر ..

Quote: في السودان كنت مغرم بمتابعة الصحف الرياضية و بدخل الإستادات بصورة منتظمة النعوت دي ما لاقتني إلا في المنتديات الإلكترونية

طبيعة المنتديات الإلكترونية ومساحة الحرية التي يتمتع بها الكاتبون فيها هي ما
جعل ما يكتب في المنتديات أسوأ مما يرد في الصحف التي تخضع لمساءلة المجلس
القومي للصحافة والمطبوعات، الذي سبق وأن تدخل قبل عام وبضعة أشهر وقدم
دعوى قضائية مطالبا فيها بسحب التراخيص عن خمس صحف رياضية والغاء السجل
الصحافي ل 9 صحافيين. لكن محكمة الصحافة والنشر شطبت الدعوى بعد وساطة (!)
من اتحاد الصحافيين. ولك يا محمد البشرى أن تخمن مآل الحال لولا تلك الوساطة.

Quote: بيعة المنتديات الإلكترونية ومساحة الحرية التي يتمتع بها الكاتبون فيها هي ما جعل ما يكتب في المنتديات أسوأ مما يرد في الصحف التي تخضع لمساءلة المجلس القومي للصحافة والمطبوعات،

يعني يا ود الريح ناس كبار و على درجة من الوعي تسمح لهم بإستخدام النت يحتاجوا لرقابة جهة ما
مؤسف

قضية إيقاف الصحف و شطب الصحفيين رغم حلها بالوساطة - على الطريقة السودانية
إلا انها أدت الغرض و خففت من حدة المهاترات و الخلافات ذات الطابع الشخصي الكانت سائدة حينها
بقت مشكلة المصداقية و الحيادية في التناول

أتمنى أن لا نحتاج لمثل قرار المجلس القومي للمطبوعات بشأن البورد

ود البشرى
دا كلام عقل.. آمل أن يلتزم به الجميع.

بالله ..

خلاص عرفتو شغلتكم الموسم ده ح تكون مهببة ؟؟


ما دايرين .. وما دايرين .. وستظل الجريوات جريوات .. والبعيوات بعيوات ..
والزعيم زعيم...





وهي شن طعما اكان ما فيها جريوات زيكم ..

يا (أنبياء البتاع كده شنو داك)

شايفك بقيت تجي جااااااهز بي صورك


أخبار الـ شنو داك شنو



** أها يا أبو حتوت
جنس الحقد الدفين ده يعملو ليهو شنو

معتصم ياخ ما عارف اقول ليك شنو
تغلبونا نغلبكم دي ما جديدة وليها زي ستين سبعين سنة مدورا
لكن الجديد و الغريب كلامك دا
هسي في ذمتك الصورة اللفحتها ديك و اتبوبرت بيها قبل ما يقعدوك الجماعة في علبك
الزمن داك كان في جنس الكلام البايخ دا ولا ما كان عندها طعم الكورة
هسي إنت في كلامك عن جريوات و بعيوات اولادك - ربنا يحفظهم - مافيهم واحد هلالابي
ترضى إنك تكون وصفته بجريو و ما إلى ذلك
خليهم اولادك, معارفك مافي زول عزيز عليك فيهم
خليك منطقي - سوري حتجيب المنطق من وين - خليك اي حاجة كويسة و قول رايك بعيد عن المكابرة


بالمناسبة....
ما تقول نسيت أرفع ليك جنازة البحر الليلتك الليلة
لكن انشغلت بس

شكرا عمنا جعفر
القصة مش مطالبة بالإلتزام بل يا ريت تكون قناعة وسأبدا بنفسي و اتجنب إستخدام أي لفظ لا ارضى سماعه
لفريقي او جمهوري - ما عدا وصيفـ/ـاب

... لماذا يقبل البعض بأن "يشيل وش القباحة" وهو يكتب بأسلوب متواضع لأجل
ما يسميه الدفاع عن فريقه أو للنيل من الفريق الآخر؟ ما يكتبه الواحد منا يحسب
عليه هو وحده، ولا يتضرر من أثره أحد غيره. ولن يشفع لمن "ساء أسلوبه" أنه
ينال رضا البعض لأنه نال من الفريق الآخر أو أنه رد الإساءة بمثلها.

من المهم (جدا) أن نتفق (كلنا) على أن الهلال والمريخ بريئان مما يفعله أو يكتبه
البعض باسميهما، وأن نتفق (كلنا) على أن في أنصار كليهما الصالح والطالح.

هذا الاتفاق الذي أتمناه هو أحد دعائم نبذ التعصب الذي يجعل من صاحبه مفارقا
للمنطق وهو يتحدث عن ناديه وكأنه رجل صالح!

ود الريح

والله إنت أكوس زول

كلامك نجيييييييض

ياخ ناس المريخ ديل الا يجيبو اعضاء محترفين


في واحد كدا بيكتب ليك بالاحمر والخط العريض وكلام كدا بتاع ثوار ما بتاع كورا


والباقين حسب مزاج مزمل ابو القاسم

عمك ود البشري رائد أدب التنظير..
كتبت :

Quote: مش حقو الناس تاخد خطوة إيجابية لوقف الإساءة على الأقل

خطوة بتاعت الساعة كم يا عمك وقدر ما تعدل خطوتك تلقي تحتهاقزاز عرقي مكسر ..
لو زنقت زول في كضبة رماها ساي طوالي يجيء يقول ليك الما محترم والمنافق ويشتم امك وأبوك وأهلك وجدودك الميتين والحيين ..
تقول لي خطوة وفستان زفاف ..
غايتو أنا يا عمك أية كورة مصرجة من النوع دا جاتني برجعا بي دربا طوالي و...
(ملودي) سنينة لزوم الحش لمليء الشبكة وكدا .
حاشية للحنكايش :
الملود تستعمل لحش القش والذي منو ..

لكن بيني وبينك نحن برضو عندنا زول اشتر كدا اسمو تاج السر الزول دا كتاب لكن عناوينو زي عناوين جريده الدار



علي ما اظن هو البجيب لينا الهوا

ود الريح حتة رد الإساءة دي خلينا نقيف فيه شوية
الحق يقتضي التوقف عند الإساءة نفسها واللتي لا عذر لها - يمكن بشكل او آخر ان تجد عذرا للرد



طلحة تنظير
مافي حد قال مرر الكذب أو أقبله
بل بالعكس جدا أحبذ الوقوف على المعلومات و التأكد من صحتها وضد إلقاء الكلام على عواهنه
لكن طرحي هنا واضح جدا و دعوتي لا تحتمل اكثر من وجه
والخطوة الإيجابية تحدثت عنها اعلاه - عن نفسي لن أسيئ - وأتمنى أن لا اقرأ إساءة من الآخرين لي أو لغيري
واعتبرها اضعف الإيمان ياخ



مغربي
كيفك يا معلم
الأخوين الذكرتهم اعلاه سواء دكتور عبد الماجد أو تاج السر لو وجهنا لهم الحديث شخصيا - واعتقد حدث من قبل
اجابتهم حتكون واحدة: نحن نرد الإساءة
طيب الحل شنو , الناس كلها تتوقف عن هذا الطرح المثير للمشاعر السلبية و خلينا في رشاشات و صهاينة الزمان ديك
ودا لا بد يكون عن قناعة بانك تسيئ لفريقك ايضا

يا حبيب كورة بدون (تدني وسطحية) في الطرح ما دايرنها زاتو
الكورة لو ما كان فيها انحطاط دي ما كورة زاتو
كلامك دا بلو واشرب مويته
والتزم بيهو براك اوباما

مع مداخلة اساسي دي لاحظت حاجة غريبة
كل الوصيفاب المتداخلين إما يرفضون الفكرة أو يتحفظون عليها
شنو يا خوانا الحكاية
عاجباكم الحالة دي يعني يا (صفوة)

Quote: الحق يقتضي التوقف عند الإساءة نفسها واللتي لا عذر لها - يمكن بشكل او آخر ان تجد عذرا للرد

لو كنت يا محمد تعني ما يحدث بين بعض الأعضاء من إساءات شخصية؛ فإني أتفق معك
عموما، وإن كنت "من جانبي" مقتنعا بأن الانحدار لذات التواضع في لغة التخاطب يجعل
من مبدأ "البادئ أظلم" ثانويا.

يا عمك
من الآخر كدا وبدون قلب هوبا ..
احترمك انت ومن لف لفك جدا لأنك لا تسىء ولا عزاء لمن يحترف الإساءة معتقدا أنه هلاكو زمانو .
بس ..

بمناسبة مستوانا المتواضع في غانا: مسؤولية كل من يتطلع لأن تظهر منتخباتنا
وفرقنا بمستوى فني جيد في المشاركات الخارجية أن يحارب -بقدر استطاعته-
الظواهر السالبة في وسطنا الرياضي، لذلك أعتقد أن من واجب كتاب المنتديات
ترك الاقتداء بصحافة المهاترات والمبالغات "لدرجة التفوق عليها في السوء"!

كيف يرضى الواحد منا لنفسه أن يكون مقتديا بمن أسهموا في تواضع مستوى
النقد والتحليل الفني بمبالغاتهم التي لا ينكرها إلا مكابر؟ بل كيف يرضى الواحد
منا لنفسه أن ينافح باستمرار عن أي قلم أيا كان صاحبه؟ ألا يعلم هؤلاء أن أولئك
-مثلنا- يصيبون ويخطئون "ربما عن عمد"؟

بحسب رأيي: كل من يحمل على عاتقه مهمة الترويج لأحد الصحفيين مسؤول عن
تواضع هذا الصحفي لأنه سيكتب واثقا من تبنى البعض لوجهة نظره حتى لو
خالفت المنطق والحقيقة وحتى لو تعارضت مع المصلحة العامة.

Quote: منافسة في الملعب تدور بكل احترام يبارك فيها المهزوم للفائز بكل ود و روح رياضية بدون إعادة الماضي و سرد المحن اللتي دارت وتدور فقط نرجو التوقف عن كل ما من شأنه ان يسيئ و يحط من قدر الآخر

Quote: ود البشرى دا كلام عقل.. آمل أن يلتزم به الجميع.

Quote: لا أشيد فقط بفكرة المقال؛ بل أتعهد بالالتزام بها، ولا بأس (بل لا غنى) عن المناكفات، وكلنا يعرف الفرق بينها والإساءات.

شكرا لك

شكرا لك انت يا دكتور شهاب
اسعدني مرورك واتفاقك معي

رائد أدب التنظير وثقافة الجرجير من (جرجرة)..
عايز تتحاذق موش كدا يا عمك :

Quote: كل الوصيفاب المتداخلين إما يرفضون الفكرة أو يتحفظون عليها شنو يا خوانا الحكاية عاجباكم الحالة دي يعني يا (صفوة)

لانو بالواضح المافاضح انت ومعاك اتنين بس (عارفم انا) الملتزمين ..
الباقين ماشين علي حل شعرم ...
يعني ماعندهم ضمان ..
وعليه ...
فتش ليها في دكان الغافل ياجنا ..

Quote: رائد أدب التنظير وثقافة الجرجير ..

وبعد يومين يجي يقول بعمل في ماجستير ..

( سغير ) وجاهل .. وبقولوا كمان عوير ..

اعمل حسابك من طلحة ده لانو زول خطير ..

وبرضو نحنا الصفوة والكبير كبيييير ...

Quote: وبعد يومين يجي يقول بعمل في ماجستير .. ( سغير ) وجاهل .. وبقولوا كمان عوير .. اعمل حسابك من طلحة ده لانو زول خطير .. وبرضو نحنا الصفوة والكبير كبيييير ...

طبعا ما فهمتك بالضبط قاصد شنو
عموما ما قاعد اقيف كتير في محاولة فهمك

Quote: ( سغير ) وجاهل .. وبقولوا كمان عوير ..

الكلام دخل الحوش

سـ غ ـير وجاهل مشيناها

كمان عوير دي ...

يا ربي قاصد شجرة عوير؟؟؟

النجيضة .. النار ولعت

حلوة تتحاذق دي يا عمك
خليه كلامي أنا وراجع المداخلات الفوق
شوف الوصيفابي القال خير منو غير دكتور شهاب

عموما الموضوع ما كنت عاوزه ياخد شكل معانا ولا مع غانا كالعادة
ببساطة ممكن ننتقد نكاوي نعمل السبعة وذمتها بدون إساءة و بس
الحاجة دي صعبة يا خوانا

Quote: انت ومعاك اتنين بس (عارفم انا)

Quote: الباقين ماشين علي حل شعرم ... يعني ماعندهم ضمان ..

؟؟ ?? ؟؟ ?? ؟؟ ?? ؟؟

الأخ/ المحترم محمد البشرى
هل يسلم الظل والعود فاسد او (اعوج) كما يقولون ؟؟
النظام فاسد لذلك الوسط الكروى ملئ بالفساد والمريخاب الجدد هم قادة الفساد الكروى!!
ومواجهة هذا الفساد بالصلابه والصدق والقوة أمر مطلوب أكثر من الحوار الراقى !!
ولا استبعد أن يتجه البعيوات فى هذا العام لشراء جميع المباريات التى يشاركون فيها أو يشارك فيها الهلال (لاعبين وحكام) حتى يمنعوا الهلال من الحصول على كاس الدورى الممتاز للمرة السادسه، بعد أن فشلوا باستخدام (الكاش الذى يقلل النقاش) فى جلب هداف كان لا يشق له غبار مثل (طمبل) الذى اصبح (طمبج) مثلما سموه حينما كان فى قمة مستواه!!
فشلوا فى الحصول على كاس الدورى الممتاز حينما تآمروا على السودان وحرموه من محترف واحد هو (طمبل) .. وفشلوا حينما اتجهوا للحرب النفسيه القذره الواضحه معالمها فى قضية (ولدهم) المعز محجوب وولدهم (قودوين) وولدهم (عمر بخيت) !!
هل سمعت من قبل بصحفى أو مشجع يتغزل فى لاعب يرتدى شعار الفريق المنافس له ؟؟

الله يكرمك شبهت هذا الموقف بامراة عديمة الأخلاق تتغزل فى زوج صديقتها امام اعينها لأن زوج صديقتها اكثر وجاهة من زوجها ( لا أريد أن اوصف الموقف بأكثر من هذا الوصف بشاعة)!!
افسدوا الوسط الكروى فى موضوع (بصمة) علاء الدين وافسدوا الأتحاد بقيادة (شداد) حتى انه تستر على قضية تزوير ثابته ومنع وصولها لساحة القضاء!!

هل تذكر كيف (تحرش) صالح سنار لاعب الهلال السابق (بكلاتشى) حتى طرد من الملعب، لماذا ؟؟
كى لا يشارك كلاتشى فى آخر مباريتين فى الدورى الممتاز وحتى يذهب لقب هداف الدورى (لجنازة) البحر العجب !! مع ان استمرار (العجب) فى الملاعب فيه ضرر لهم وهزائم مذله داخل ملعبهم وهزائم مؤلمه للمنتخب القومى ، فالفرق بين منتخبنا والمنتخب المصرى يساوى الفرق بين (العجب) و(زيدان) فى القوة واللياقة البدنيه والعمر!!

تفتكر (صالح سنار) من نفسه تحرش (بكلاتشى) وفكر فى اخراجه من الملعب بالبطاقة الحمراء؟؟
الفساد .. رأيناه بأعيينا خارج الحدود فى لقاء الاسماعيلى الذى لم يشارك فيه هداف خطير مثل محمد فضل ولاعب حصل على لقب أفضل لاعب فى افريقيا فى آخر بطولة اسمه (محسن عبده ربه .. ولاعب مثل (سيد معوض) دفع فيه مبلغ مليون دولار قبل أن تبدأ المباراة، لا ندرى حقيقتها هل كانت ثمنا له ام ثمنا لعدم مشاركة الثلاثه لاعبين ؟؟

والفساد ظهر بصورة جليه ومقززه فى مباراة الأسماعيلى الثانيه بالخرطوم ورشوة الحكم البتسوانى!!
متى انحاز حخكم افريقى للسودان قبل (الكاش الذى يقلل النقاش) ؟؟

يجب محاربة هذه الظواهر اولا ثم الأتجاه لترقية الحوار فيما بعد!!
فنظام فاسد لابد أن ينعكس فساده فى جميع المجالات خاصة المجالات التى سيطر عليها كنادى المريخ!!
وكلما ارتفع طابق نحو السماء كلما ذهبت الأخلاق والقيم نحو الحضيض!!

أهلا يا تاج السر
احييك على حديثك عن محاربةالفساد واختلف معك في قصر هذا الفساد على المريخ أو المريخاب - أوالحديث عن قيادتهم له
لم اتحدث هنا عن حوار راقي
لكن يؤذيني جدا نعت الهلال بالجريو و العوانس و غيرها من الألفاظ الكريهة
وقطعا تؤذي إخوة لي وصف المريخ بالبعيو أو الرشوة أو غيرها
فما لا أقبله لنفسي لن أقبله لغيري
لذا كانت هذه الدعوة لنكف الأذى عن انفسنا و غيرنا
ولن يفسد طرحك - في محاربة الفساد - أو يقلل من شأنه يا تاج السر أن تتوقف عن إطلاق لفظ البعيوات مثلا
قرأت لك اكثر من مرة و في مختلف المواضع إحترامك واعجابك بالدكتور كمال عبد الوهاب
هل يقبل منك كمال عبد الوهاب ان تصف فريقه أو احبابه بالبعيو
جرب استبدل في عنوان بوستك القادم كلمة البعيو بالمريخ - أو بالوصيف - لن يتأثر البوست سلبا
بل على الأقل قد يقرأه من كان يصدمه العنوان و يجرحه الوصف من القراء و هم من تستهدفهم و تريد إيصال رسالتك إليهم


في شأن واقعة تحرش صالح سنار بكلتشي , اذكر انني استنكرت مقال لأبوشيبة أو اسماعيل حسن - لا اذكر - به تلميحات لشبهة تواطئ في الكروت الحمراء اللتي اخذها لاعبين إثنين من فريق الأمل عطبرة في مباراتهم امام الزعيم
و بنفس المنطق أجدني هنا لا اتفق معك في اتهام صالح سنار بتعمد إخراج كلاتشي بضغط من او لفائدة المريخ , مثل هذا الحديث يحتاج لدليل قوي كإعتراف اللاعب مثلا

أشكرك على المرور والإدلاء بدلوك يا تاج السر

الاخ/ محمد البشرى
تحية طيبة
واختلاف الراى لا يفسد للود قضية .. وكل كلمه اكتبها متأكد من صدقها 100 % وفى مجال كرة القدم يصعب احضار الدليل المادى لكن للناس عقول ولو أجرى تحقيق جاد حول كل النقاط التى اثيرها لتكشفت الكثير من الحقائق .. ودورى كاعلامى تسليط الضوء على اماكن الفساد والمطالبه المستمره بالتحقيق، وعلى اصحاب الشأن اتخاز القرار.
موضوع كلاتشى مع صالح سنار يستدعى سؤال سهل، لماذا لم يتعمد (صالح سنار) استفزاز (قودوين) مثلا؟؟
وهل رايت الفرحه التى عمت (البعيوات) بعد طرد (كلاتشى) رغم ذلك خاب مسعاهم!!
لأنهم كانوا يسعون لتعويض بطولة الدورى بهداف الدورى!!
اما حول هذه النقطه ، كتيت:-

Quote: قرأت لك اكثر من مرة و في مختلف المواضع إحترامك واعجابك بالدكتور كمال عبد الوهاب هل يقبل منك كمال عبد الوهاب ان تصف فريقه أو احبابه بالبعيو

اعجابى (بكمال هبدالوهاب) لا أخفيه و(المريخاب الجدد) لا يعرفون كمال ولم يشاهدوه فى الملعب ، علينا ان نميز بين (اصلاء) المريخ .. حينما كان المريخ يلفب (بالشواطين الحمر) ولا ينازع فى (زعامة) الهلال المطلقه من خلال (خرقة دلقان) .. وبين (المريخاب الجدد) !

لو لم يكن هيمنة المريخاب الجدد على (المريخ القديم) لما كان لاعب مثل (كمال عبدالوهاب) بعيدا عن اى مجال (ادارة، تدريب) او خلاف ذلك من المجالات !!

سلامات يا محمد البشرى وتاج السر حسن

هذه إضافة لحواركما الجانبي عن الاتهامات غير المؤسسة:

مسألة الاتهام برشوة الحكام يتبادلها بعض أنصار الهلال والمريخ من حين لآخر،
وعلى وجه الخصوص إذا كثر الحديث عن تحامل حكم مباراة لأحدهما على منافسه.

هذا { كلام في الهواء } لا دليل لأصحابه عليه، فضلا عن أن التواطؤ إذا ثبت فهو
عار على المتورط فيه { كفرد } في المقام الأول، خاصة إذا أثبت ناديه اهتمامه
بأخلاق التنافس بمحاسبته وإبعاده وإبعاد كل من يثبت ضلوعه في ممارسات تتنافى
مع أخلاق التنافس الشريف، كما فعل النادي الأهلي المصري الذي حاسب أحد
المسؤولين عن قطاع الشباب فيه بعد أن ثبت ضلوعه في حادثة تزوير متعلقة
بلاعب أراد الانضمام للزمالك {شريف أشرف}.

لن يقنعني أحد بأن جماهير الهلال أرقى وألطف من جماهير المريخ ولن يقنعني
غيره بالعكس، فكلاهما ينتميان لذات المجتمع الذي غرس في كل واحد منهم
صفات متباينة لا يد لانتماءه الكروي فيها، وعلى ذات المنوال فإني قد كفرت
بتعبيرات ذات رواج في صحفنا الرياضية على شاكلة { أدب الهلال } و{ قيم
المريخ }! فالأدب والقيم النبيلة لا ينتسبان لجهة أيا كانت بل لهما منبع صاف
متاح للجميع، ينهل منهما من شاء من أهل الهلال وأهل المريخ وغيرهما،
ومن هؤلاء وأولئك من يعمد لمصدر القبح فيلطخ نفسه بأدرانه { وما أكثرها }.

الهلال والمريخ في أيد غير محترفة، جاءت ل{ سدة الحكم } فيهما بوسائل لا
تختلف كثيرا عما يدور في بلادنا الفقيرة على صعيد الممارسات المتحضرة في
العمل العام، ومع ذلك فهم يشكرون على جهدهم وبذلهم ولا يحاسبون على
الأخطاء الإدارية والإجرائية غير المتعمدة { بحجة أنهم متطوعون }، لكن لا
عذر لأحدهم إذا سعى لتجاوزات لا أخلاقية سعيا وراء مكسب لن يكون شريفا
ولن يشرف صاحبه.

... ومرحبا بالمناكفات إن ابتعد أصحابها عن الاتهامات غير المؤسسة والإساءات
البالغة لواحد من ناديين يسعدان الملايين في وطن لا يكاد يعرف الفرح لولاهما.