الونسة سودانية و بمزاااااااج

الونسة سودانية و بمزاااااااج


12-11-2007, 08:39 PM


  » http://sudaneseonline.com/cgi-bin/sdb/2bb.cgi?seq=msg&board=355&msg=1207641512&rn=52


Post: #1
Title: الونسة سودانية و بمزاااااااج
Author: محمد البشرى الخضر
Date: 12-11-2007, 08:39 PM
Parent: #0

ارحمنا يا رب من هزة راس الهنود وسغالة البنغال و الإنجليزي المخلقن اللذي لا غنى عنه
إن شئت ان تأكل او تركب تاكسي او تقضي غرض هنا

جدا خرمان لونسة سودانية خالصة
بكل بهاراتها و توابلها
و بالتاكيد شمارها
حافلة بــ
التشبيهات
الأمثال
التنظير
المحسنات البديعية
المؤثرات الصوتية المصاحبة
التنظير
ولا انسى
شيل حال الحكومة و أصحاب الأموال و رؤساء الأندية والغنايات
وكل العناصر الأساسية و المساعدة لأنتاج ونسة سودانية بمزااااااج
ويا حبذا لو توفرت كباية شاي او جبنة
وموضوع دسم يحلو الخوض فيه و التنظير

Post: #2
Title: Re: الونسة سودانية و بمزاااااااج
Author: عبد المنعم سليمان
Date: 12-11-2007, 08:49 PM
Parent: #1

Quote: جدا خرمان لونسة


الخرم قسم

الساعة 11 بالليل وده جاي خرمان لونسة


____

يا حليل خرمة خضر حسين اخوي زي الوقت ده
ما جيتنا في تشادينا يا محمد؟
ما حنجيكم في بوركينوفاسيكم يا محمد

Post: #8
Title: Re: الونسة سودانية و بمزاااااااج
Author: محمد البشرى الخضر
Date: 12-11-2007, 09:12 PM
Parent: #2

منعم يا عمك
Quote: يا حليل خرمة خضر حسين اخوي زي الوقت ده
لولا اختلاف الخرمات لبارت حاجات كتيرة

Quote: ما جيتنا في تشادينا يا محمد؟
لا متلومين بالحيل
ادينا خاترك
بعدين تشايك الوهم دا مقيمنك ليه بتمانين ألف بس ليه
هسي عليك الله التمباك الصرفتو على راسك بس المبلغ دا بجيبو
معقول بس


ونسة جانبية...
جاتنا نيلة في حظنا الهباب
تشرك للبلوم و القمري يجيك ودأبرك بصلعته طاير

Post: #3
Title: Re: الونسة سودانية و بمزاااااااج
Author: محمد البشرى الخضر
Date: 12-11-2007, 08:51 PM
Parent: #1

ونسة تكون مليانة بي نوع
"شفت كيف؟"
"يا سيدي ليك"
"كويس معاك"
للاستحواذ على انتباهك و بريك لمونسك يرتب افكاره و ياخد نفسه
فترنا من ناس " واخد بال حضرتك " و ملينا " شفت إشلون "
وكرهتها عديل بتاعة " زين ارباب " مع الهزة الشهيرة

Post: #4
Title: Re: الونسة سودانية و بمزاااااااج
Author: عبدالكريم الامين احمد
Date: 12-11-2007, 08:56 PM
Parent: #3

هلا يا محمد
وحليلنا وحليل الونسة السودانية
وياريت لي جناح طائر عشان اطير بب لاحسن زول بونس في العالم (ونسة سودانية)
زول صحبي كده الله يطراه بالخير مستعد يونسك اربعة وعشرين ساعة ونص
مستعد يخليك تضحك ووتركز في ونسته الطاعمة والمتعددة المواضيع
وفيها مقدرة(موغلة) في الانتقال من موضوع للتاني بدون ما تحس بالنقلة
وممكن يربط ليك الونسة في بدايتها مع نهايتها
يعني يحكي ليك عن فلان وما يتم الونسة لكن برجع ليك تاني بطريقة تخليك دائما متشوق لباقي الونسة

Post: #9
Title: Re: الونسة سودانية و بمزاااااااج
Author: محمد البشرى الخضر
Date: 12-11-2007, 09:23 PM
Parent: #4

كيكي يا عمك
جدا مشتاقين و عاتبين
زولك البتحكي عنه شخصية محورية في أي شلة
لطيف و لا تحلو الجلسة من دونه ليس لأنو خفيف الدم و باعث للضحك فقط
لكن وزي ما تفضلت سلس الحديث وواسع المعرفة وله قدرة على الإفتاء و التنظير في مخنلف المواضيع
انا اكتب وفي بالي عزيز علينا هو الآن بطرفكم في الدوحة
كانت لا تحلو جلستنا أو تكتمل إلا بوجوده
وحتى في غيابه غالبا يكون هو محور الحديث

كيكي
تختلف المفردات و تتباين العناصر بإختلاف الخلفيات و المشارب
يعني شكل ونسة الكمبو غير ونسة القهوة غير ونسة الترعة حتى لو كان الموضوع نفسه
زي ما كلام البركس غير كلام المين رود , ولا كيف
يلا بالله يدك معانا في ونستنا دي بالأمثلة و الشرح

Post: #5
Title: Re: الونسة سودانية و بمزاااااااج
Author: Muna Khugali
Date: 12-11-2007, 08:59 PM
Parent: #3

خلاص امشي الخرطوم..
واقعد مع أهلك في المساء..
وياريت الجيران يكونوا قاعدين..

كل سنه وانت طيب..

Post: #10
Title: Re: الونسة سودانية و بمزاااااااج
Author: محمد البشرى الخضر
Date: 12-11-2007, 09:27 PM
Parent: #5

Quote: خلاص امشي الخرطوم..
واقعد مع أهلك في المساء..
وياريت الجيران يكونوا قاعدين..
يا ريت لو باليد

Quote: كل سنه وانت طيب.
وانتي طيبة و بألف خير

لو ما كنتي جيتي الونسة دي
كنت قلت ونسة الضكير للضكير النوم اخير

Post: #6
Title: Re: الونسة سودانية و بمزاااااااج
Author: عبد المنعم سليمان
Date: 12-11-2007, 09:00 PM
Parent: #1

محمد وكيكي
عارفين الكفلاء ضايقوكم
اصبروا بس .. غربة وبتعدي



___
ونسة خارج النص

كيكي
ما اتصلت تاني ؟

Post: #7
Title: Re: الونسة سودانية و بمزاااااااج
Author: Kamal Karrar
Date: 12-11-2007, 09:03 PM
Parent: #1

ود البشرى إزيك يا قريبي...

الظاهر عليك خرمان لونسة من نوع: "قلت لي كيف يا جان؟؟ لكن ما بالغوا عدييييييييييييييل.. يا أخي ديل ثاني أنا أباريهم..ونسة تقيلة جنب باب الشارع.. وجنبك جركانة موية مندية..وصحن فول أصبح "بوشه" في رحمة أجواف حرى بلهيب شطة البوش..والراديو..على الترابيزة وما في واحد سامع منو حاجة.. ونسة كلها غلاط محبب للنفس ومكاواة وألقاب.. يندر أن تترك مجالا للأسماء الحقيقية.. ونسة مدنكلة كلها وعود..غير منجزة ولكنها على الرغم من ذلك ونسة بمزاااج..
يا ريت لو لقيت شلة ناغم لينا طوااالي
فتك بعافية يا جان...

Post: #12
Title: Re: الونسة سودانية و بمزاااااااج
Author: محمد نور أحمد
Date: 12-11-2007, 09:52 PM
Parent: #7




شنو ياااااااااااا عمك ..
تمييز عنصري حتى في الونسة ..
أصبر كان ما جبت ليك الهوا مع الجماعة ..
يعني هسع مافي طريقة إلا نقلع الشئ اللابسنو ده حتان نتونس معاكم ..؟؟









يا عمك .. تسمح بونسة جانبية ...


Quote: ما جيتنا في تشادينا يا محمد؟
ما حنجيكم في بوركينوفاسيكم يا محمد

صاحب الكوت ده مطلوب للجنة بتاعت انفستيغيشن..
اليجي يشرح كلامه ده .. ولا الليلة الا يعرق بي صلعته..





سلامات لكل الحلوين الهنا .. ما عدا صاحبنا حتى تتضح الرؤية ..


Post: #19
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 06:31 AM
Parent: #12

محمد نور يا عمك
تمييز بتاع مين يا , القصة شوية مشاغلة وكدا
اتفضل يا حبيب
ياخي داير اسألك انت الفي بروفايلك دا دكتور الشريف مبسوط ولا واحد تاني
تسلم يا حبة

Post: #18
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 06:01 AM
Parent: #7

كيمو يا عمك
Quote: ونسة تقيلة جنب باب الشارع.. وجنبك جركانة موية مندية..وصحن فول أصبح "بوشه" في رحمة أجواف حرى بلهيب شطة البوش..والراديو..على الترابيزة وما في واحد سامع منو حاجة.. ونسة كلها غلاط محبب للنفس ومكاواة وألقاب.. يندر أن تترك مجالا للأسماء الحقيقية.. ونسة مدنكلة كلها وعود..غير منجزة ولكنها على الرغم من ذلك ونسة بمزاااج..
ياخ بالغت
جننتنا جن و خصوصا العيد على الأبواب , مالك علي ياااخ
كلامك دا ما بقولوه لي زول مغترب و خصوصا الحتة دي
Quote: وصحن فول أصبح "بوشه" في رحمة أجواف حرى بلهيب شطة البوش
ميتين البرياني زاتو ياخ
تسلم يا عمك ولا تطول علينا

Post: #11
Title: Re: الونسة سودانية و بمزاااااااج
Author: الأمين عثمان صديق محمد
Date: 12-11-2007, 09:47 PM
Parent: #1

ايش فيك انت يا ود البشرى
تبي المسنجر كلمنالك بكري وعودناه

Post: #20
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 07:32 AM
Parent: #11

اللمينز يا عمك
شنو الليلة شغال بالجلف إديشن
المسنجر قصته قصة و آخرها لسة
تعال يا عمك احكي لينا عن ونساتكم زمان
الغلاد و الدقاقة

Post: #13
Title: Re: الونسة سودانية و بمزاااااااج
Author: wd al geran
Date: 12-11-2007, 09:54 PM
Parent: #1

Quote: تختلف المفردات و تتباين العناصر بإختلاف الخلفيات و المشارب
ولد دا ..

تراكا مُثقف







عاين ..

انا ما عِندي ليك ونسة هسي ..

لكن بس جيت اقول ليك إنتا زول مُريح وبوستاتك كلها ظريفة.
شفتا كيف

Post: #14
Title: Re: الونسة سودانية و بمزاااااااج
Author: Rawia
Date: 12-11-2007, 10:01 PM
Parent: #13

Quote: لكن بس جيت اقول ليك إنتا زول مُريح وبوستاتك كلها ظريفة.
شفتا كيف



ود الجيران ازيك

كلامك صاح

وانا مازعلانة من شي الا اني اكتشفته مؤخرا

بس ادي احنا فيها

Post: #15
Title: Re: الونسة سودانية و بمزاااااااج
Author: عامر تيتاوى
Date: 12-12-2007, 00:45 AM
Parent: #14

Quote: التنظير

الذ حاجة ده البظبط الونسة وبمزااااااج

Post: #16
Title: Re: الونسة سودانية و بمزاااااااج
Author: سلمى الشيخ سلامة
Date: 12-12-2007, 01:46 AM
Parent: #15

اها ود امى
النحكى ليك
اولك يا بادى شفت الحبوبات لمن يجن من الاستبالية؟
يا بت اجرى جيبى لى الموية المشوار قطع نفسى
والسلالم طايرة فى السما
عاد
(صنه)
البت صلاتى على محمد
حلاتا
وحلات وليدا جابوه ساعتنا المشينا شان وكت الرضاعة حلاتو
يا بت الموية ريقى نشف مشيتى تجيبيها من البحر؟
وما قلت ليكم اجى يا يمة
عاد الكعك دا انواع واشكال الحلاوة بالعلبة الكبيرة
والناس دى اها اها كيمان كيمان داخلين ومارقين
واهل الولد برى
انتى يختى مالن شايفين روحن كدى ؟
اجى اجى
يا بت الموية
وعاد يالله بجيك وتسالنى مرت اخوها قالت كدى جات ودخلت وهاجت فينا
ـ يلا يلا عاوزين نغير ليها لو سمحتو
تجيك يا يمة الجاتنى فى ابوى عليك الله شفتى دمها تقيل كيف ؟
وخلاس يادنيا مافيك الا انا
وتدخل واحدة تانية
ـ يا بنات جيبن المنقد وختن لى البن والجبنة بى جاى لا الصينية دى ما سمحة هسى ناس (محمد البشرى)بجوا للقهوة وديل المغتربين لازم عاد قهوة مخسوسة
اجرى فسراع من الدكان جيبى سكر كان بقى مافى والحبهان فى العلبة فى البترينة وما تنسى تجيبى الزنجبيل
وتبدا الونسة الماخمج
القطيعة التحت تحت عشان البنات ما يسمعو
وتسمع تحت تحت
برى يايمة حال التكرهكن او تسمع حال بناتنا او فى مرحلة اخرى
ـ يا ولد دحين البنية اضانا ماصفرت ؟
يا حليل الونسة الدقاقة والقهوة فى الحوش

Post: #17
Title: Re: الونسة سودانية و بمزاااااااج
Author: Ahmed Yousif Abu Harira
Date: 12-12-2007, 05:44 AM
Parent: #16

يا قريبك..
خد واحد ونسه مدنكلة من سلمى الشيخ سلامة...
قطيعة ووصف وبيان وتشويق وآآكشن وفواصل محببة..
الحالة دي لسه الجبنة ما دورت
ومكوناتها لا زالت قيد البحث والتفتيش..


يلا ونسونا

Post: #28
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 08:32 AM
Parent: #17

أبو حريرة يا عمك
ونسة سلمى زي ماقلت غنية بمعظم العناصر
محسنات تشبيهات تشويق و آكشن
و حتى المداعاة (تجيك الجات لي أبوي ) دي مبالغة
وكويس إنها خلت من التنظير
يلا يا عمنا ادينا من نضم البطاحين
أظنو ونستكم كلها يا شيخ العرب و يا عمدة و هيييييع
ولا كيف ؟

Post: #25
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 08:25 AM
Parent: #16

سلمى الشيخ
الله عليك و يغتيك
هيجتي شوقنا
خلصت مداخلتك وطوالي إتصلت على الوالدة , سألتها بتعملي في شنو قالت كانت بتحاسب سيد اللبن
و ماشة تكمل وريق الخدرة في ضُل الشاتي
سألتها قهوتك جهزت قالت لي لسة ليه بتسال؟
لا شعوريا جاوبتها انا دايرها بدون جنزبيل
مع خلعتها آخر ما سمعتو منها كان " سجمي سجمي ...فنشوك؟"
قفلت التلفون من الضحك
ضربت ليها تاني شرحت ليها الحاصل
حلفتني ابلغك سلامها يا سلمى
اها يا سلمى
أمي بتسلم عليك

Post: #40
Title: Re: الونسة سودانية و بمزاااااااج
Author: سلمى الشيخ سلامة
Date: 12-13-2007, 02:31 AM
Parent: #25

تسلم امك الجابتك ود امى
ما قلت لى داير ياتو نوع من الونسة ؟
عارف زمان
طبعا خالتك حضرت زمن حفروا البحر
النونسك بالمشاطة
بسم الله
امى نفيسة قامت من الصباح الله يرحما ويغفر ليها
اليوم داك جمعة ولازم يكون يوم جمعة ليه ما بعرف ؟
المهم يا سيد امك وابوك
من الدغش شدت الدوكة وعاست ديك يالكسرة الماخمج
وبعد داك حتى سوت لينا الشاى باللقيمات
وبعد ماشربنا الشاى لسه الواطه دغش رسلتنا لى سوق الموردة
نجيب السمك والرغيف الشمسى
جينا من هناك عل دكان عمك على اليمانى اشترينا صندوق البحارى والبن الحبشى
لقيناها سوت الفطور حق المشاطة
وقالت كده رفعت اصبعها السبابة تحذير
ـ الحاجات الفى راس النملية ديل مافى زول يهبشن دا فطور المشاطة
يلا بعد شوية اتلمن اخواتها كلهن (كانن اربعة اخوات )
وهاك ياقهوة ويا ونسة ويا قطيعة
اول مالمشاطة جات العصيدة فيها السم
تانى تجو (لانهم قالو المشاطة لخباته بتشيل الكلام وتحوم بيهو )
اها
نتلاقى بعدين فترت

Post: #58
Title: Re: الونسة سودانية و بمزاااااااج
Author: سلمى الشيخ سلامة
Date: 12-14-2007, 02:08 AM
Parent: #40

جيتك تانى يا ود البشرى
يلا النسوان حبوباتى اتلمن وجابن البنابر واتحكرن ديك يالحكيرة
وقالن كدى جابن المنقد الصغير حق القهوة
والشرقرق والجبنة المنضوم فيها السكسك والفناجين المابمرقن الا للضيوف المهمين
واحدات اتكن فى العنقريب الصغير
وقدامن عنقريب المشاطة مفروشة فوقو ملاية من نوع السجاد ليه ما بعرف
المهم
الونسة بدت بالبن المقلى
يتكرفن (دى بتعرفا)
ويمدن القلاية لبعضن
ـ والله عاد بن التريدكن يا بنات امى
ـ اها ما سمعتن
ـ برى اضانا طرشا ووطاتنا خرشا
ـ هيا يالسمحة (ودا طبعا كلام الودع )
ـ العزبا الفى الحوش الورانى شوف عينى جاها عريسا هايش وكباب درايش
ـ النبى ؟ لكن عامن اول ما ابت الولد الاتقدم ليها
ـ هى لكن ما نجيضة ، اول المفلس بتسويى بيهو شنو ؟ اخير لها هسى ما صبرت
والله والله قالو الشيلة باللورى
ـ اجى؟ للعزبا ؟ يايمة بناتنا الصغار ما لقنو جنس دا
وقالت كدى واحدة لفحت الكلام
ـ يا يمة حال بناتنا حال العزبات
ـ يبرن يا يمة ويستبرن بناتنا يقعدن لمن بموتن مع رجالن مالن متعولقات ومتبشتنات ؟
والقهوة دورت يا فردة
والمشاطة جات وقومى يالمشاطة الفحى الكلام من النص
وقولن كدى يا النسوان العوة وقفت قرون قرون
ـ سجمك اتى يا نقالة الخبارات وحات شيخى الليلة الا يمرقنك كرعينك
ـ ما قلت ليكن من الاول كلام الودع دا خلنو هسى امكن ما صحى

وفى نوع القطيعة الدقاقة داك (دا مزاج الونسة فى بيوت الاعراس )
ـ اها العريس من وين يااتى قالو ؟
ـ برى ، وحاتك مقطوع من شجرة اظنو ، زول جاب خبر اهلو مافى
ـ اسمعى النحدسك ، قالو اهلو ما رضيانين شان كدى جا براهو
وقالت كدى واحدة (دقت ردفها )
ـ برى برى حال اليابا البنات ، ونان وكتين اهلو ما رضيانين القومة والقعدة فى شنو ؟
ـ برى وحاتك امها دى شدة ما فرحانة لمن الواطة دى ماشايلاها
ـ المعنى يعنى قالت ، لا كرفته ولا برنيطة
ـ كيفن يعنى ؟
ـ الكرفته ماياها امه والبرنيطة اخواتو لمن يشهلن ويشوف حال امو
ـ يعنى هبو هبو لا ام لاابو ؟ ودا بتسوى بيهو شنو الغبيانه اول العز ما اهل
ـ هه العويرة دى انتى من زمن الاهل ؟ احسن كدى
ـ حسنة وين بت امى ؟ الزول ما ياهو ما ببقى براهو
ـ اخير غايتو
ـ خيار ام خير حسنتو شنو ؟ هسى يعنى جا براهو ؟
ـ ما ترى البتشوف فيهو عينك دا
ودخل الطباخ فى النص
ـ اسمعن انتن يا بتاعات الشمار وشيالات الحال ، مالكن ومالا ؟ ولدا يهز ويرز
ـ شوفى كمان ناقص الرجال بتكلم معانا
ـ انا ناقص الرجال ؟ هوى يا انتى بتعرفينى من وين ؟ يا كشما مشا ؟ اجى قال ناقص قال ؟ تعالى تمينى
ـ انا اتمك انت ؟ يتمك على اخوى ضرب وموت ، شوفى الخلقة الما صابحتا امها
والونسة بعد دقاقة بقت عفاراتا قايمة
وبقينا فى الحجز
وبى هناك قاعدات ناس الشمار الجد
ـ يا انتى دا مش اخو العريس ؟
ـ يا بتى قالو ما عندو لا ام لا ابو
ـ احى ما عنده اخو ؟

Post: #68
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 06:53 PM
Parent: #58

حبابك يا سلمى

أديتي ونستنا دي زخم جميل و طعمتيها لينا بي نفس امهاتنا الجميل
وبمناسبة الطباخ دي ذكرتيني زكريا أشهر طباخ في أمدرمان
لا تكتمل المناسبة و يطيب أكلها مالم يخرج من تحت يد زكريا وأولاده
وبالنسبة لي دي
Quote: يتكرفن (دى بتعرفا)
تكوني قاصدة (يتقريفن"
يعني رامياهن الخرمة و كدا يقوموا يستمتعوا بريحة البن و يصبروا بيها قبل القهوة ولا انا غلطان


جارين بنابرنا قريب عليكم و رامين إضنينا لي ونستكم

Post: #24
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 07:57 AM
Parent: #15

تيتاوي يا عمك
Quote:
Quote: التنظير




الذ حاجة ده البظبط الونسة وبمزااااااج
في الإجازة الماضية كنت راكب حافلة من أركويت للسوق العربي
مع تقاطع المك نمر مع شارع القيادة الحركة وقفت قريب ساعة
و النقة بدت
وهاك يا تنظير
الواحد مما يبدا ليك بــ" الحكومة كان مفروض ....." طوالي بستعد لإستقبال التنظير
وطبعا ما قصرت فكيت لي كم تنظيرة ومعاها قشرة على شاكلة " حكومة الإمارات لما يكون في شغل في الشارع بيجهزوا طرق بديلة "
و " الناس برة بقت شنو ما عارف" و " دبي بقت مدينة عالمية و ...." نظام الود مغترب و كدا
لكن للامانة كانت ساعة ممتعة جدا بالذات لواحد خرمان ونسة زيي

طبعا متخيل بعد نزلت من الحافلة موضوع الونسة بقى عن مغتربين الزمن دا البركبوا المواصلات

Post: #22
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 07:41 AM
Parent: #14

كتر خيرك يا راوية و مشكورة كتير
بس حنكتينا في موضوع المسنجر

Post: #21
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 07:37 AM
Parent: #13

ود الجيران شنو يا عمك
تفلق
Quote: ولد دا ..

تراكا مُثقف
و تداوي
Quote: إنتا زول مُريح وبوستاتك كلها ظريفة
يا عمك إنتا قايلني تراجي

Quote: شفتا كيف
اها وبعدين
يلا اديني رايك في التنظير الفوق دا و علق لي بالله على " إختلاف المشارب" لأنها عاجباني من امبارح

Post: #43
Title: Re: الونسة سودانية و بمزاااااااج
Author: wd al geran
Date: 12-13-2007, 08:09 AM
Parent: #21

الونسة نقلناها تِحت عشان ما نخرب الرصة ..

Post: #23
Title: Re: الونسة سودانية و بمزاااااااج
Author: طلحة عبدالله
Date: 12-12-2007, 07:53 AM
Parent: #1

محمد البشري ..
Quote:
من هزة راس الهنود وسغالة البنغال

ياخ ديل عليهم جنس سماجة لا حولااااااااا ..
هازول حرم ما تنضم تاني ..

Post: #26
Title: Re: الونسة سودانية و بمزاااااااج
Author: Dina Faisal
Date: 12-12-2007, 08:30 AM
Parent: #23

غايتو يا خالك الفترة الفاتت ديك كلها

نشيل ونكشف لفرقة نتونس بيها معاك ما لقينا

قلنا خلاص نستنى كورس الكورة ينتهي وبعداك نخش الكورس الجاي

Post: #30
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 08:52 AM
Parent: #26

آل فيصل يا بت اخوك
انا ذاتي مما شايفك بقيتي شاعرة وتقدمية ما عاجباني
اظنك فترة غيابك ديك عملتي ليك دبلوم شعر ولا حاجة
مرحب بيك في كورس الونسة دا

Post: #34
Title: Re: الونسة سودانية و بمزاااااااج
Author: Dina Faisal
Date: 12-12-2007, 10:19 AM
Parent: #30

وانت يعني وقت شايف شعري ودردقتي دي
ما تجي تدردق معاي
غايتو سنسلس خلاس

Post: #47
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 08:21 PM
Parent: #34

والله ما سنسلس يا بت أخوك ولا حاجة
لكن القصة وما فيها
نحنا ناس مكنيكية ساي وفي قصة الشعر و الأدب دي عودنا عود مرة*
وكان للدردقة بعد شيل حال نص البورد تاني ما بقدر أدردق على الملأ
بكونوا خاتنها لي

* عود مرة دي ما حقتي
ما يجيني جندراوي يشبكني ذكوري و بطيخ

Post: #29
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 08:43 AM
Parent: #23

طلحة يا عمك
Quote: ياخ ديل عليهم جنس سماجة لا حولااااااا
بالله واجعنك برضو
Quote: هازول حرم ما تنضم تاني
حرامك ما دايرين نوقعو الواطــة
لكن ما تخلينا ننفش شوية

ونسة خاصة لطلحة تنظيرات....
طلحة ياخي بنقدرك للدرجة التخلينا نتجرا و نقوليك
طول بالك يااااخ و برد نفَسَك

Post: #27
Title: Re: الونسة سودانية و بمزاااااااج
Author: حسين محي الدين
Date: 12-12-2007, 08:30 AM
Parent: #1

محمد
تحايا عطرة
وبعد الجبنة دي حقو تدينا missed call ان شاء الله

كل الود

Post: #31
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 08:57 AM
Parent: #27

هلا حسين
ليه مسكول؟
نجيك عديل شايلين جبنتنا
بس ان شاء الله تكون قصة سوركتي وقعت ليك

تسلم يا حبة

Post: #32
Title: Re: الونسة سودانية و بمزاااااااج
Author: محمد البشرى الخضر
Date: 12-12-2007, 09:03 AM
Parent: #1

علي قول منعم
الكفيل دا ضايقنا
نقضى ليه شوية شغلات و نجي نكمل الونسة السودانية
بمزاااااااااج

عايزين نماذج ونسات مختلفة
شباب تفاتيح
حناكيش
شابات لوحدهن
مختلطة
ونسة كيزان
ونسة مثقفين
ونسة مثقفاتية
مكانينية
عساكر
وكدا

كويس معاكم
لغاية بعدين
جااااااو

Post: #33
Title: Re: الونسة سودانية و بمزاااااااج
Author: عبدالكريم الامين احمد
Date: 12-12-2007, 09:55 AM
Parent: #32

Quote: ونسة مثقفين
ونسة مثقفاتية
مكانينية

هلا يا ابوحميد
الثلاثة ديل بالله احجزهم لاخوك لحدي ما اجيك برواقة كده..
بالذات المثقفاتية ديل(ناس قوس قزح خلف مدارت الشفق البمبي)

Post: #48
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 08:38 PM
Parent: #33

Quote: الثلاثة ديل بالله احجزهم لاخوك
يا سيدي لك التقدير
لتاتينا بما في جعبتك من تصاريف القدر
وذخيرة معرفية عن هذه الأطياف الثلاث
الحائرة في مدارات الحياة الموغلة في القسوة
و لك التحية وأنت تساهم في رفد ونستنا و تشاركنا إنتاج معرفتنا
كن بخير
ولك يا صديقي ودي اللذي تعرف


أخخخخخخ
قوم نفسي
ياخي الكلام دا بستحملوه كيف

Post: #35
Title: Re: الونسة سودانية و بمزاااااااج
Author: طلحة عبدالله
Date: 12-12-2007, 10:35 AM
Parent: #1

ود البشري
Quote:
طلحة ياخي بنقدرك للدرجة التخلينا نتجرا و نقوليك
طول بالك يااااخ و برد نفَسَك


حاضرين يا عمك بس بالك لشنو يعني .. ؟؟؟

Post: #36
Title: Re: الونسة سودانية و بمزاااااااج
Author: الأمين عثمان صديق محمد
Date: 12-12-2007, 08:29 PM
Parent: #1

Quote: اللمينز يا عمك
شنو الليلة شغال بالجلف إديشن
المسنجر قصته قصة و آخرها لسة
تعال يا عمك احكي لينا عن ونساتكم زمان
الغلاد و الدقاقة
عملا بمبدأ توزيع اللهجات في مواجة الهجمات اثناء الونسات
ادخل ليك المرة دي بي ايجيبت ادشن وارمي ليك حاجة جاتني طازجة
قال ليك يا عمك الصعايدة مشوا اشتكوا لي حسني مبارك
قالوا لي : يا ريس احنا تعبنا من الجماعة بتوع مصر دول ، شغالين علينا نكات عمال على بطال
حسني قال ليهم : طيب راح اسالكو سؤالين لو جاوبتوا عليهم صح ح اشوف لكو حل للموضوع دا
سألهم : معركة بدر الكبرى كانت بين مين ومين ومين اللي انتصر فيها ؟
قالوا : كانت بين المسلمين والكفار وانتصر فيها المسلمين
سألهم : مبارة الكاس السنة اللي فاتت كانت بين مين ومين ومين اللي اخد الكاس ؟
قالوا : بين الاهلي والزمالك والاهلي اخد الكاس
يقوم واحد ناطي ويقول ليك
يعني على كدا الزمالك ح يلعب مع الكفار على التالت والرابع



دي اول رمية في صاج حبنا
اسمع اوعا من زيت اولين
خليك في زيت العربي دا
مقرمش من برا ولذيذ من جوا

Post: #37
Title: Re: الونسة سودانية و بمزاااااااج
Author: نادية عثمان
Date: 12-12-2007, 09:54 PM
Parent: #36

انا زااااااااااااااتى والله !!

Post: #38
Title: Re: الونسة سودانية و بمزاااااااج
Author: Mustafa Mahmoud
Date: 12-12-2007, 11:18 PM
Parent: #37


Post: #52
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 09:21 PM
Parent: #38

وكل سنة وانت طيب يا دكتور
العفو والعافية

Post: #50
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 09:11 PM
Parent: #37

Quote: انا زااااااااااااااتى والله !!
حبابك
اتفضلي و جري ليك بمبر اقعدي
قهوة سلمى جاهزة

Post: #49
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 08:44 PM
Parent: #36

Quote: دي اول رمية في صاج حبنا
اسمع اوعا من زيت اولين
خليك في زيت العربي دا
مقرمش من برا ولذيذ من جوا
هلا اللمينز يونيفيرسال
دي بالغت فيها

Post: #39
Title: Re: الونسة سودانية و بمزاااااااج
Author: Mohamed Elbashir
Date: 12-13-2007, 01:12 AM
Parent: #1


سلامات الحبوب ود البشرى
تعرف زى ونستك البتفتش ليها دى الأ تمشى تلم ناس وضاح و بشكه و الشرزمه الكانت مجككه بالناس أيام القطينه ديك
المهم بمناسبه بهارات الونسه السودانيه كان عندنا أخونا سنجك دجال نمره واحد تقول تشاشى فى بهارات الونسه و المشكله يقعد هو و أخوانو و كلهم دجالين و عارفين أنهم بدجلو على بعض, أها قام أخونا دا فى قعده أنس مع واحد من أخوانو الفطاحله و عاوز يطلع بيهو العالى بنظام يبدا ليهو القصه و ياخد صنه فى النص عشان التعليقه وشد الأنتياه وكده, وقام ياسيدى أخد الصنه فى حته حاره و معاها "شفت كيف؟" و طبعا أخوه طلع حريف و قام جلاهو طوالى فما كان منه الأ أن جاوب على نفسو بنفسو "أها كيف؟" وواصل الونسه.

تحياتى للاسره الكريمه

محمد على

Post: #54
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 09:43 PM
Parent: #39

يا سلام يا محمد علي
رجعتنا لأيام ندية و تريانة بالحيل ايام القطينة رغم شدتها إلا انها كانت جدا ظريفة
لما كان اقصى همنا غمدة عين و صحن فول قليل عطرون مع زيادة عيش
بشكة بيني و بينو عشرين كيلو فقط وعلى تواصل وفي هنا أيضا علاء الدين مستر ود معمار
مادام جيت والله جابك* أدينا من معيتك من بهارات شلة الهندسة
ناس دبشك و محمد صلاح و السنجك وبلال ويا ريت لو عرجت على إقتصاد شوية - لو ما فيها مشكلة وكدا


* جيت والله جابك دي من الإفتتاحيات المهمة في الونسة و مبرر قوي لخلق الموضوع
حير ذكرها قدام شوية

Post: #41
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 06:48 AM
Parent: #1

اهلا بكل الأحباب
آخد لي زوغة من الكفيل و اجيكم واحد واحد

__________________________________________

من ضروريات الونسة مخاطبة المونس - بفتح النون - بلقب او بصفة
ودي تعتمد على خلفية المونس - بكسر النون - وشكل العلاقة بين الطرفين
مثلا....
شباب تفاتيح وفرد ممكن يتبادلوا .. يا مان , جان , فردة , حبة , بشكة ....إلخ
شباب تفاتيح غير فرد .. يا سيد , يا أبو الشباب , اخونا/ أخينا..
مثقفين .. عزيزي , أخي الفاضل , سيدي الكريم..
ميكانيكية .. يا عمك , يا حاج, يا عمنا, يا أرباب , يا بلف ..
كيزان .. يا شيخنا, يا مولانا..
عساكر .. يا كومندان , سعادتك..
مثقفاتية .. يا أيها الراقي , يا سيد النهر المتدفق عطاء , يا روح الفهم , يا (القيامة الرابطة)
تقدميين .. يا انسان , يا صاحب , يا صاحبنا اللذي كان ..
جكس .. يا إنتي , يا دي , يا هناية
خالاتك .. يا ولدي/بتي , يا ود/بت أمي , حبيب/ة قساي , عشاي..
أعمامك .. يا ابني/بنتي , يا ود / بت اخوي, المنعول , يا فقُر..
أهل عوض .. اللخو , يا جنا , ود عمي ..
بورداب (مناضلين) .. يا جسور , يا امير , يا عمدة , يا ناظر..
بورداب (شعراء/أدباء/فنانين/صحفيين..) .. يا مبدع, استاذنا , يا فنان, يا وريف, يا رائع ..
بورداب (سليقة ساي) .. يا عمك, اخونا , حبيبنا...

متونسين و نواصل..



Post: #42
Title: Re: الونسة سودانية و بمزاااااااج
Author: Ahmed Yousif Abu Harira
Date: 12-13-2007, 07:15 AM
Parent: #41

Quote: من ضروريات الونسة مخاطبة المونس - بفتح النون - بلقب او بصفة
ودي تعتمد على خلفية المونس - بكسر النون - وشكل العلاقة بين الطرفين
مثلا....

نضيف إلى ذلك اكليشهات ومقبلات رائجة عندنا..
فمثلا ناسنا الكبار هناك عادة ما يفتتحون الونسة اذا كانت تتعلق بتجربة شخصية فيها مغامرة وآآكشن بقولهم: "والله يا فلان ماني قايل روحي بلاقيك واحدسك" عبارة ياعمك تحمل الكثير من التشويق والتوقعات..
هنا يكون المونس - بفتح النون - قد فغر فاهه وشد انتباهه مع حوقلات وبسملات وتهليلات تتخلل حكي المونس - بكسر النون - حسب سير الآكشن.
-------
دحين آآآ ود البشرى والله ماني قايل روحي بلاقيك واحدسك
انا هسع مسافر ولمن ارجع براجع بوستك ده أكان فضلت فيه روح لا حد الزمن داك..

وإلى ذلك الحين قنبو عافية
(او) stay tuned ، حسب زعم بشاشا

Post: #44
Title: Re: الونسة سودانية و بمزاااااااج
Author: wd al geran
Date: 12-13-2007, 08:47 AM
Parent: #42


Quote: و علق لي بالله على " إختلاف المشارب" لأنها عاجباني من امبارح

وين يا قريبك ..

كدي قبال ما نشوف حكاية المشارب دي ..
النحكي ليك دي الاول ..

تعرف يا مان .. كان عندي ليك واحد صحبي
ما افضّلو عليك زول سِندالة صاح .. وصاقعة جد ..

اها الزول دا كان شغال مكنيكي في المنطِقة ..
و ونستو كلها - الله يطراهو بالخير -
كانت بالرندوق ولُغة المكنكة ..



يعني مثلاً مرة في واحد صحبوا جاهو مرض
- الله يكرِمك ويكرِم السامعين - في حتة صعبة شوية ..


اهااان انا قُمتا سألتو ..
حسين وين يا مان .. مُدة ما شايفينو ..

قال لي حسين عندو سخانة في العادِم ..


شفتا كيف ..



اهااان .. دا ما الفِلم ..

الفِلم إنو الزول دا كان قوي قوة غريبة جِداً ..
تعرف كيف ..


اقرِّب ليك المنظر يا مان ...

شفتا الصامولة الكبيرة بتاعت لِستك الهينو الكي واي؟
دي عشان تحِِلا إلا تركِّب فيها مفتاح العجل ... وبعد دا تراذيها بي تُقلك كلو حتين تمشي معاك .. شفتا كيف

اهان .. شفتا الصامولة دي .. وهي مُصدّية .. زولنا دا كان بيحلها بي يدو ..
قق قق ..


اهااان .. دا برضو ما الفلِم ..

كدي النخلّص الفي يدنا دا ونجي نحكي ليك الفلِم ..




Quote: يا عمك إنتا قايلني تراجي

شنو يا قريبك .. إنتا ما مركِّز معانا والا شنو؟

اكان غلبتك اسأل واحد من الجماعة الفوق ديل وهو بوريك


تحياتي يا زول يا نقي.

Post: #56
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 10:51 PM
Parent: #44

ود الجيران يا عمك
جننت الميكانيكية جن
طبعا هم و الصنايعية عموما زي ماقلت كلامهم كلو من بيئة شغلهم
يعني يقوليك
جر شفاطة او شفط هوا معناها مات
قسم معاي يعني أفهمني او جاريني
سلك المكنة تفيد افهمنا أو أدينا كنجالات
أب كرنك للزول العندو مشكلة في رجله
طافي لمبة عندو مشكلة في عين واحدة
كشافة مرسيدس ..بت شديدة
بلك دا للزول الحقنة او الما دسيس
على يدك أو حاجة كدة زي مافي يعني رويدا رويدا
دردق ..شتت او كسح
حتى تشبيهاتهم
في الكوتشينة تلقى الجوز الغالب بكاوي المغلوبين يقوليهم خليناكم تقوموا و تقعدوا زي البساتم
ويقوليك مكنتك خفت او جابت زيت أو فيها دخنة كناية عن التعب او الكبر دخل
وأيضا غير الزيت و دي خليها

متونسين يا عمك وراجين الفلم

شايفك كمان تطرقت لنوعية منتشرة في عالم الونسة
قصة الدليب و المبالغة
يعني حلة الصامولة المصقرة بالإيد دايرة ليها دللللل كبيرة
نجيها لقدام

Quote: اكان غلبتك اسأل واحد من الجماعة الفوق ديل وهو بوريك
النصيحة غلبتني
خلي بالك الواحد مكنتة خفت
أها يا الجماعة الفوق , اللي يحب النبي يزق و يفهمنا حاجة



Post: #55
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 10:27 PM
Parent: #42

عمنا أبوحريرة
درب السلامة ياعمك
تمشي وتجي بالسلامة تحدسنا
ونكمل سوا الونسة في الإفتتاحيات و القفلة

Post: #45
Title: Re: الونسة سودانية و بمزاااااااج
Author: Ammir Mohamed
Date: 12-13-2007, 11:01 AM
Parent: #1

وين يا حقنا

شايف راوية باكمبا بختك يا عم أيامك ساكوبيز بس ما تكون مشرك ليهم بصورة البلي الفي البروفايل بتاعك دي .. الدامات أصلهم أبو ورقة وأنت خليك صنديد وتقعد إبراهيم عطاوتفشلنا معاك ..


Quote: ود الجيران ازيك

كلامك صاح

وانا مازعلانة من شي الا اني اكتشفته مؤخرا

بس ادي احنا فيها



بمناسبة الكفيل يا مان قالو عندكم صعايدة السعودية (حوطة بني تميم) واحد حوطي مشى المستشفى قالوا ليه أعمل إكس راي في الطابق التاني وتعال ... صحبك دخل الأسنسير واتخيل إنو ده مكان الأشعة بدا يقلّع هدوموا ...لمن الأسنسير فتح جات واحدة تركب لمن شافتوا منفكو صرّخت .... قام صحبك قال ليها ..لا تقولين سرطان!! ..

فوتك بي عافية

أمير

Post: #46
Title: Re: الونسة سودانية و بمزاااااااج
Author: نادر السوداني
Date: 12-13-2007, 08:12 PM
Parent: #45

ازيك يا محمد بوستك دمو خفيف تعرف يامعلم احلا ونسة مع سواقين
التاكسي بتاعين مصر لامن كان اخوك يا دوب جديد في مصر
أول ما اقيف في الشارع تلقي التكاسي جوة العربية زي مروحة الطربيزة
كل واحد منهم يتمني زبون خصوصا لو كان شكلو أجنبي او غريب
ومن قولة تاكس تلقي صحبك ركن جنبك وبلا اي تردد وتبدا
الونسة التملقية / اول جملة // رايح فين يابية // وطبعا هو عاوز يسمع
اللهجة وبتركيز شديد // إزا نقشك يبقي انت سهلتة ليو المهمة // ولو
طلعت نجيض في اللهجة تبدا اول مرحلة الشك .........يبدا المشوار
يتكلم عن الزحمة واسعار البنزين وكل هدفة معرفة حاجة واحدة انت
من ياتو بلد وعلي زالك تحدد الهبرة حقت المشوار وبدون ادني شك
في كلمة ولا حرف جوة جملة الكلام طلعت منك حدد ليو انت من وين
لكن لسة شاكي وعاوز يعرف
ياتي السؤال التالي // حضرتك من فين يابية // اول مايسمع // سوداني
يبدا في عصر زاكرتة // يا سلام علي السودان وشعب السودان نحن يابية شعب
واحد والتاريخ بيقول كدة تعرف يابية كل حبايبي السودانيين الفي عين شمس
حتي بص دة شريط سوداني ادهولي واحد من حبايبي السودانيين // صحبك
يشقل الشريط وتبدا الموسيقي ومن خلال سمعي للشريط انت عارف يا مان نوع الشرايط
حقت الحفلات المسجلة في الشارع اكو وزقاريد وصوت مطرب ما تعرف بيقول في شنوا
وانا... طبعا طبعا جميل ياسلام جميل عاوز باي شكل اصل واتحلة من قددة المخ دي
وعندة الوصول وياتي وقت الدفع // الجملة الاخيرة دايما بتكون// ما تخلي يا بية وهي تعني // خلي
عندك دم وادفع كل ما بجيبك ..........................................................................لك كل الود

Post: #51
Title: Re: الونسة سودانية و بمزاااااااج
Author: Muna Khugali
Date: 12-13-2007, 09:13 PM
Parent: #46

اهم حاجه في الونسه..المسرح..
يعني هي قعده في كافيه..ولا عند اصحابك في بيتهم..
ولا قعده في البيت وفيها جبنه وبخور تيمان..
وأقول ليك كلام..ان مشيت لزول في المستشفي ولقيت الناس قاعده في الصاله ولا في في اي مكان فيها..الونسه طبعا بتتخيل انها تكون كلها مرض وممله..
تصدق ابدا..ممكن حتي وهي في المرض فجأه كده تقلب..وتبقي المستشفي محل المواعيد الجايه للونسه الممتده..
واسه ونستنا دي ذاتها حلوه بس مافيها نوع تعال سمعت آخر خبر..
ولا فستانك ده اشتريتيه من ياتو محل..
وطبعا ممكن واحده متفلسه بدون فهم ترد علي السؤال الأخير ده بمط الكلام وترفيع الصوت الأخير كده..

والله اشتريته من British Home Story وطبعا تكون قاصده store


نكمل باقي الونسه في وقت تاني..

Post: #60
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 10:53 AM
Parent: #51

اللذيذة عند السودانيين ما بقيفوا كتير في حكاية مسرح الونسة دي
ممكن يدوروها في أغرب الأماكن
في بص في حراسة في ضهر لوري ما مهم
المهم الونسة في حد ذاتها
النسوان طبعا أحلى مكان للونسة عندهم خشم الباب مع التقديم
تلقي الراجل ركب العربية و دورها ولسة الحنك مدور
- يا دي شفتي سعدية سوت شنو؟
- مالها؟ ما قالت نازلين الإجازة السنة دي
- كدي إنتي أسي مارقة بضرب ليك تلفون
- لا لا ما مشكلة , أها قولي في شنو؟
- طبعا هي ملت الواطة السنة دي نازلة الإجازة و يومها كلو في السوق تجهز حالها و...
(هنا يجي الولد) " ماما ماما , بابا قاليك يلا "
- دقيقة قوليه جاية, اها
- ياختي الرجال ديل مستعجلين كدا ليه لاحقين شنو ؟ أها كنا وين آي يلا بقت دايرة ليها دهب و راجلها أظنه بعد التذاكر و الهدايا بقى ماعندو طريقة . قومي يا الغبيانة شي...
(يرتفع صوت بوري العربية مع صياح الرجل) -يا ولية شنو الحكاية الواطة صبحت
- تطير عيشتي ان شاء الله , خلاص الراجل دا هاج بضرب ليك أول ما أصل تتميه لي

دا نموذج لي قصة مسرح الونسة يامنى
لما تجي تاني نحكي عن الشخصية المتفلسفة و اللي بتدي الونسة طعم (بي وراها بالتأكيد)
في انتظارك

Post: #59
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 10:21 AM
Parent: #46

أهلين الفنان نادر
ونسة سواق التاكسي زي ونسة الحلاق مفروضة عليك
ودايما إنت بتكون تحت رحمته تماما وهو يوجه الونسة ويقودها
هنا أغلب التكاسة بتان - بشتون أفغان/باكستان - ونستهم واحدة
يقوليك " سوداني واجد زين , مِسري خربوط "
مسري دي تطلق على كل حلبي مصري كان أو شامي
ويمد ليك كيس النسوار , تقول ليه لا شكرا يقوليك "كيف؟ سوداني ما ياكل "
النسوار دا عندهم زي التمباك بتاعنا
في السودان سواق التاكسي ونسته محفوظة ولا تخرج عن التالي
يسب لبتاع الحركة و للبلدية و للشوارع و الخريف و لعموم الحكومة
ولا ينسى يدي ناس الأمجاد و الهايسات و الركشات حقهم من السببي
وفي الآخر يسب ليك إنت لما يجي الحساب

Quote: تلقي التكاسي جوة العربية زي مروحة الطربيزة
الغريبة إنت دمجت التشبيهين سوا
في العادة يقوليك تتلفت زي سواق التكس
وأيضا يقال تتلفت زي مروحة الطربيزة
يحلو الكلام عن التشبيهات في الونسة السودانية
نجيها لي قدام

Post: #57
Title: Re: الونسة سودانية و بمزاااااااج
Author: محمد البشرى الخضر
Date: 12-13-2007, 11:12 PM
Parent: #45

أمير يا ردفة
ضحكتني بإبراهيم عطا دي لكن ما غيروها بقت داريو كان
دقييييييييقة يا عمك
يابوي باكمبا شنو كدي أديها صنة وخت الكورة واطة
ذكرتني عزيز علينا ما افضله عليك ملقبنه بوليد الدرابة
كورتو دايما عالية و مصرجة و لما يستلم الونسة دايما نحن في حالة مضايرة
وخصوصا إذا كان في شخص غريب او جديد علينا
تحياتي يا عمك


Post: #53
Title: Re: الونسة سودانية و بمزاااااااج
Author: الأمين عثمان صديق محمد
Date: 12-13-2007, 09:28 PM
Parent: #1

الرمية التانية
عارف يا ود البشرى كان معانا واحد ياخي دا قداد بن فقاع بن دجال الفقري
هو ما صاحبنا ولا حاجة لكن ود عم واحد من الفرد ومستغل صلة قرابتو ويجي يبرانا
مرة واحدة في حياتو مشى عمرة والله قدانا بي عميرتو دي جنس قد
ياخي كلو ما نجي نتونس كان جبنا سيرة البحر ساكت
يمسكنا ليك الباخرة مشت بينا والباخرة ميلت والباخرة كانت عايزة تغرق
وميناء سواكن وميناء جدة وباعبود والفنار
وفي النهاية عشان نصدقوا يقوم يحلف لينا عارف حليفتو كيف
وحات الكعبة الطفت فيها
وانحنا الوقت داك ناس عنقالة مافينا زول عندو جواز سفر ساكت
اها اول من جيت البلد دي قلت للكفيل عن اذنك يومين كدا اسوي لي عمرة
بس خلصت العمرة من هنا وبي ملابس الاحرام واقرب كبينة اتصالات وطوالي اتصلت ليك على الفرد
قلت ليهم اللمينز يحيكم من الاراضي المقدسة وقولوا لي صاحبكم دا يشوف لي حليفة تانية
انحنا الكعبة طفناها

Post: #61
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 11:16 AM
Parent: #53

Quote: انحنا الكعبة طفناها
مر يا اللمينز
وما بتفوت
القشرة عندنا ليها مكانة كبيرة في ونستنا
وتلقى الواحد/ة يحاول يحشر قشرته في الحوار بأي طريقة
حتى شكلها بكون ما متسق مع الحوار
في بوردينا دا الأمثلة كتيرة - لكن مافي داعي

Post: #62
Title: Re: الونسة سودانية و بمزاااااااج
Author: الأمين عثمان صديق محمد
Date: 12-15-2007, 11:34 AM
Parent: #1

الرمية التالتة
ود البشرى زح
اوعا الزيت يرشك
ابعد لي ورا
ايداهوووووور

Post: #63
Title: Re: الونسة سودانية و بمزاااااااج
Author: طارق جبريل
Date: 12-15-2007, 11:51 AM
Parent: #1

محمد كيفنك
تعرف نفسي اقعد في التكل
واخت بنبري جنب امي (رحمة الله عليعا)
وقدامي شاي بي لبن مقنن وصحن لقيمات
وهي تقطع في بصلتهاوبالمقصوصة تصوت في حلتها
وتحكي لي عن جيتم للخرطوم في الخمسينيات
وعن قطر كريمة والتصاريح
وعن موسم القمح وحش التمر
وعن النيل.......


محبتي الاكيدة

Post: #66
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 12:12 PM
Parent: #63

طارق جبريل يا عمك
رحمة الله على الوالدة و على كل أحبائنا اللذين فقدناهم ولكن يحيون في قلوبنا
Quote: تعرف نفسي اقعد في التكل
واخت بنبري جنب امي (رحمة الله عليعا)
وقدامي شاي بي لبن مقنن وصحن لقيمات
وهي تقطع في بصلتهاوبالمقصوصة تصوت في حلتها
وتحكي لي عن جيتم للخرطوم في الخمسينيات
وعن قطر كريمة والتصاريح
وعن موسم القمح وحش التمر
وعن النيل.......
حاليا جيب بنبرك واقعد في راكوبة سلمى
ولو عملتها جندرية وقالت الجلسة نسائية
تعال برة تحت الشجرة تلقانا متكلين
تحياتي

Post: #64
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 12:00 PM
Parent: #1

المؤثرات الصوتية
الوناس او الحكاي لا تكتمل متعته أو متعة مونسيه - بفتح النون - إلا باستخدام المؤثرات الصوتية المصاحبة للحكي
لتقريبها المعنى المقصود و تعيش المستمعين في جو القصة
يقوليك
- أداهو كف تاااااااح صنة ليه أضانو
- تن تن تن اتخمخمنا مشينا
- زيييييييط فتحت باب العربية و ركبت
- دخلنا تووووووووش
- فرترب تلب الحيطة
- وقع ببببب
- كرنقو شات ليك الكورة تييييييييييف قنبلة جوة الشبكة
- اداهو عكاز في نص راسو كععععععع
- جب جب جب زعطنا ليك الصينية في دقايق
- فوووووووو جا ماشي ليك فينا
- كو كرو قفل الباب بالمفتاح
- شوووووووو صبت فينا المطرة
او نحوهن

Post: #65
Title: Re: الونسة سودانية و بمزاااااااج
Author: وليد محمد المبارك
Date: 12-15-2007, 12:04 PM
Parent: #64

وفي نص الونسة السودانية الدقاقة

جا واحد مرخابي جمجارة وقال

زوووووووووووووووووووووووووووووووووووووووووووووووووووووووووووووووووووط



سيد اللبن ...سيد اللبن

وهو يقصد الهلال تحديدا


Post: #67
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 12:24 PM
Parent: #65

اللمينز الوصيفابي
Quote: اوعا الزيت يرشك
ابعد لي ورا
ايداهوووووور
الشفت بتاع "لو"
Quote: في نص الونسة السودانية الدقاقة

جا واحد مرخابي جمجارة وقال

زوووووووووووووووووووووووووووووووووووووووووووووووووووووووووووووووووووط



سيد اللبن ...سيد اللبن
احلى ونسة و جدال كان ولا يزال في موضوع الكورة
كنا شلة منقسمة الولاء بين الناديين
كنا نقضي الساعات تلو الساعات في الغلاط والمكاواة
نقاش ذة إتجاه واحد لا يقبل الإعتراف او التنازل
لا حجة او منطق فقط غلاط و صوت عالي
والي الدين ولا زيكو
إنتو فلقتو فرتقتوها, طيب إنتو ما شلتو الكورة عديل و جريتوا
غلبناكم غلبتونا
وااااك عييييك لعلعلعلع
بس يا ها الحالة صبيحة أي مباراة وحتى ما شاء الله
لكن نتفارق و في القلب رضا و محبة لم يعكرها علو الصوت و حرارة النقاش
و للامانة دا كان أحلى مافي الكورة
نتشارك حق الحافلة او جالون البنزين للعربية سوا
نتفارق قدام البوابة البعض شمالا و الآخرون جنوبا
نتلاقى بعد المباراة و الخاسر مبوز و المنتصر لسانه شبر
نتعشى سوا و نودع بعض بكل محبة
عمرنا يوم ماحد أهان الآخر او قلل من شانو او من تيمه
ما عارف الحصل شنو أسي الخلا الكلام في الكورة يبقى شين و مثير للمشاعر بالشكل الحاصل أسي ده

Post: #69
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 07:35 PM
Parent: #1

سلمى العزيزة لفتت نظرنا لجانب مهم في الونسة السودانية
في إيرادها لعبارة " تجيك الجات لي ابوي"
من اشهر عبارات المداعاة
- إنت/ي بالنيني
- الضريب شقاق العناقريب
- تجيك الطاوية* حبالها
- تجيك الكِشة
- تجيك اللهية التلهاك
- يديك الكود ووجع اللغود
- القُر الينفخك
- تعرف السرقة
- العمى اليلايسك
- النعامة التزوزيك
- سفر البن دق و حريق
- قطر عجيب يودي ما يجيب
- يدقدك عضامك
- اللواية التلوي رقبتك
- الصلعة المقابلة الحر
- يبرك فيك جمل
- الجن اليركبك
- "شنو كدا" مورلي
- يدقدق عضامك
- ما تلقى اللي يصلي عليك
- المِر اليقتلك
- يمِلك في النار
- الحمى التهرسك

و نحوهن

*الطاوية لا علاقة لها بالطي الوصيفي للملفات

Post: #70
Title: Re: الونسة سودانية و بمزاااااااج
Author: رأفت ميلاد
Date: 12-15-2007, 08:21 PM
Parent: #69

يا عمك ليه ما بترسل لينا ى المولد ده

كان مافى مسنجر .. شوفنا حايمين وين وخت لينا لنك .. دى صعبة !!

ولا المريخ السبب

أطلع فوق أشوف الحاصل شنو وأنزل ليك تانى

سلام

Post: #71
Title: Re: الونسة سودانية و بمزاااااااج
Author: محمد البشرى الخضر
Date: 12-15-2007, 09:01 PM
Parent: #70

يا عمك
مريخ بتاع مين
دقيييييقة يا
القعدة دي مدورة من زمن كرنقو (تيييييف)

Quote: أطلع فوق أشوف الحاصل شنو وأنزل ليك تانى
حبابك
إلا خلي بالك وانت طالع اللمبة الفي بير السلم مطفية و الدرابزين مكسور
ألزم الحيطة

Post: #72
Title: Re: الونسة سودانية و بمزاااااااج
Author: محمد البشرى الخضر
Date: 12-16-2007, 08:38 AM
Parent: #1

هناي البراي

غالبا ما يتواجد في اي شلة او مجتمع ونسة شخصية على شاكلة هناي البراي
بحب يتصدر الونسة و يستلمها و يستحوذ على الإهتمام
ودايما صوته عالي و يقاطع الآخرين
لا يهدا له بال إلا إذا أصغى له جميع المونَسين
احيانا لا يتردد في الإدعاء او إضافة بعض التوابل لقصته في سبيل جعلها ممتعة ومثيرة للإهتمام
و يلبس لكل جماعة او شلة الطاقية المناسبة و المثيرة لهم
يعني مع ناس النكات تلقاه جحا عديل
مع الجادين كمال عباس بس
يفتي للمولانات ويسكسك مع التانين
المهم يكون في السنتر
خطورته الحقيقة بتظهر في حالات الإنفراد
المونَس أو المبري - على الأصح - في الحالة دي ما عندو طريقة تمويه ابدا
لأنه بيكون محاصر بأسلحة من نوع " بالك معاي, رايك شنو, فهمتني , اها انا قت شنو" وكدا
وقد يصل الأمر إلى الجر باليد و اللكز بالكوع لو حس منك تجاهل او في بوادر سرحان

عندنا نموذج زي دا كان بحيرنا عديل
اولا أي نكتة نكون سمعناها من زمن حفروا البحر يحكيها ليك يقول ليك واحد خالا لينا حصل ليه كيت و كيت
أي شكلة هو كان البطل و كسر الدنيا كلها
ولما يجي موضوع الجكس و الخلط صاحبك كازانوفا زمانه , و ياتا دي الما بتدردق من أول نظرة
و كان لحق فتح حنكه ياها الغمرت وودوها الحوادث
زولنا مشكلته إنو كان بنسى
بفكها فيك الليلة ويقابلك بكرة وتاني يفكها فيك برواية مختلفة
في البداية كنا بنحكو لكن مع قوة عينو فترنا وبقينا نفوت عادي

رغم إنه براي و قداد واي حاجة
لكن والله جدا خرمان ليه و له بريه
له التحية من على البعد


يا خي الغربة دي حارة بشكل

Post: #74
Title: Re: الونسة سودانية و بمزاااااااج
Author: wd al geran
Date: 12-16-2007, 10:31 AM
Parent: #72

وين يا بلد

Quote: شايفك كمان تطرقت لنوعية منتشرة في عالم الونسة
قصة الدليب و المبالغة

دليب بتاع ماذا يا مان .. الكلام دا زي ما بقول ليك كِدة.

اهان هاك دي ..

مرة الدنيا كانت اعياد ضحية ذي الايامات دي كِدة ..
الله يعيدو علينا وعليكم بالخير والصحة والبركة ..

ما اقول ليك الكلام دا كان سنة 90 والا سنة 91 ما متأكد ..
المهم صاحبنا دا كان داير يشتري خروف الضحية ..

مهم بالمناسبة اقول ليك هنا إنو زولنا دا كان
ساكن في حِتة كدة بين الحِلة الجديدة والسجانة ..

اهااان .. قبال العيد بي يومين كِدة زولنا رِكِب عجلتو
وشاقق بي جِهات ابوحمامة - السوق الشعبي وإنتا ماشي بي زلط جبرة
لحدي ما وصِل زرايب جبرة البي ورا ديك ...

اهااان .. شيلك خوتك .. شيلك خوتك ..
بعد مُجابدات مع اعمامك العرب اسياد الخُرفان
زولك رِسى ليهو علي خروف مدوعل كِدة ..

أهااان .. انقر الخروف دا وصِل كيف؟

إنتا مُتخيل المسافة من زرايب جبرة لحدي الحِلة الجديدة؟


الخروف مُش عِندو طفقة كِدة في بطنو فوق في الرُكُن جنب الضهر؟

اهااان .. زولنا جا طابق الخروق من الطفقة ديك بي يد ..
وسايق العجلة باليد التانية من جبرة لحدي بيتم في الحِلة.


شنو ليك

Post: #79
Title: Re: الونسة سودانية و بمزاااااااج
Author: محمد البشرى الخضر
Date: 12-17-2007, 08:49 AM
Parent: #74

ود الجيران يا عمك
سمح خلاص ولا تزعل
ما دللللللللللل
لكن خليني احكي ليك عن تلاتة أشقاء في الحلة إتنين منهم مرضانين بالدليب و نجارين عديل
و بساندو بعض دايما و التالت ما عندو الحركة دي و بتضايق منها بل بحكها معاهم و يحرجهم
لما يكون موجود في القعدة دايما بحاولوا يتجنبوا الشطحات ما امكن
لكن أخوانك يعجبوك
مما نلقى فرصة زي دي و الأخ التالت متواجد بنفتح ليهم مواضيعهم المحببة
و نجرجر فيهم و نعيد النقاش في نجرات سابقة ونستفزهم حتى ينفعلوا جميعا او احدهم و ينسى أخوه الحكاك
ويبدا يدافع و يزيد في النجر , عندها يستلمه أخوه ونكون جدا مستمتعين نحن بالبهدلة
كان الونسة تدور عن الثراء و القروش ذات قعدة على لستك الدكان في ليلة قمرية و الكهرباء قاطعة كالعادة
وكان حاضر اخاهم الأوسط و هو نجار كبير ذو باع في الشغلة و لا يستحي و الأخ الحكاك
طوالي نسى نفسه وبدا يتكلم عن المرحوم جده لما فتحو الوصية بتاعته لقوه طالب إبراهيم مالك و أبو العلا ملايين مململة
دا غير حاج الصافي - صاحب أراضي الصافية - لسة ما تم ليه باقي حق الأرض
وعلى الشاكلة دي صاحبنا داشر فينا و اخوه يتململ
في النهاية هاج فيه : ياخي حرام عليك جدك دا مات طقم سنون ما قادر يركبه و نضارته رابطها بي خيط
تقول لي عندو و عندو.
داك رد ليه : ما دا كلو من الجماعة الأكلوا قروشو ديل.
وإحنا طبعا إنفقعنا بالضحك

أها شفت جنس النجري دا

كان لقينا فرقة لي قدام بحكي ليك دليبة ودالبربري و الكلب الوولف

Post: #73
Title: Re: الونسة سودانية و بمزاااااااج
Author: محمد البشرى الخضر
Date: 12-16-2007, 10:25 AM
Parent: #1

باب التشبيهات و التمثيل

الونسة الطاعمة يندر ان تخلو من تشبيه او تمثيل او الإتنين معا
وليست بالضرورة تكون عندها علاقة بخلفية مستخدمها
فعدد من أشهر التشبيهات صارت متداولة بين مختلف فئات المجتمع
ورد أعلاه كما تفضل نادر تشبيه يتلفت زي سواق التكس او مروحة الطربيزة
وأيضا
- وش زي طربيزة اللحام ..للوش المليان حبوب
- طويل زي يوم السبت
- قبيح ككو حليمة بس
- نخرة كلب في السقط
- جراي التقول مركب كرونة كلب
- أحمق زي أبو الدقيق
- حاقد كدا التقول جمل
- شباب زي الورد
- اعمى ومسكوه عكاز
- مسيخ زي موية الترمس
- لايوق ويكة بس
- سريع زي ودابرك
- صبرة
- واقف فينا زي الألفة
- تقوموا وتقعدوا زي البساتم
- راميك جمل
- زي قلم الرصاص المبري من الجهتين
- تتمتم و تقطع زي المكنة الكربريترها وسخان
- شديد شدة الحرامي السرق الساوند والحفلة مدورة
أو السرق ملاية الحاجة و هي بتكوي فيها
- زي ديك العدة
- زي كلب ام سرة أو السرة
- لافي صينية
- البصيرة (الوصيفة) ام حمد
- كلام الطير في الباقير
- عزومة مراكبية
- ماشي على عجل الحديد
- قاطع وش و خالط زيت
- فيك دخنة

وغيرهن

Post: #75
Title: Re: الونسة سودانية و بمزاااااااج
Author: على محمد على بشير
Date: 12-16-2007, 10:38 AM
Parent: #73

قر قر قر قر قر قر قر قر قر قر قر

يا عمك الدور دا ما خايل فيك
سبت الكوره وجيت فتحت ليك صالون اجتماعى وكدا
صدقنى ما لايق عليك
واخير منك احمد الريح فتحو ليك بيت بكاء عديل كدا

بطل حركات ولم الفرشات واطلع لى بره وتعال لينا بى هناك
ننتف ليك ريشك دا

ههههههههههههههههههههههههههههههههههههه

Post: #76
Title: Re: الونسة سودانية و بمزاااااااج
Author: محمد البشرى الخضر
Date: 12-16-2007, 10:54 AM
Parent: #75

علي بشير يا ظريف
كدي قول بسم الله
راجع تاريخ بداية الونسة دي

إنتوا مدسين من يوم كرنقو و ظهرتوا الليلة دايرين تعملوا لينا ضكر بط
وقايلين البورد كان واقف ولا شنو
أنا شهر حداشر دا كلو مدور براي ما لاقي فيكم واحد
البهبشو كلو يعمل حميل و رايح
اليتكلم عن الصور و عن السياسة و عن الشعر
الكورة الله واحد أبيتوها
جيتوا الليلة بقيتوا أسيادها
حليلكم
الزعيم يبكيكم و يضحكم
المهم ياخوي
جر ليك بمبر و اقعد
شايف الصفوة أبوك قالوا ما بتشبهم
تاني قرقر

Post: #77
Title: Re: الونسة سودانية و بمزاااااااج
Author: على محمد على بشير
Date: 12-16-2007, 11:08 AM
Parent: #76

Quote: البهبشو كلو يعمل حميل و رايح
اليتكلم عن الصور و عن السياسة و عن الشعر
الكورة الله واحد أبيتوها




Quote: شايف الصفوة أبوك قالوا ما بتشبهم


زمان فى عالم الرياضه سالوا كمال شداد بانو المدربين انتقدوا مدرب المنتخب
البولندى وازاريك
فرد شداد على المزيع
- الانتقد وازاريك منو .. مازدا والا احمد بابكر
واوعك تقول لى ناس زعيط ومعيط
ومن يومها اصبح كل مدربى السودان فى نظر شداد ناس زعيط ومعيط

اسع انا بسألك
منو القال الكلام دا

Post: #78
Title: Re: الونسة سودانية و بمزاااااااج
Author: رأفت ميلاد
Date: 12-16-2007, 11:47 AM
Parent: #76

ود البشرى سلام .. والقصة ونسة

زكرتنى مدنى .. والونسة بفلوس .. ما بالمعنى يعنى ..
كان فى ناس ظراف زى زراع رحمه الله وعمك جحا وغيرهم ..

الناس ديل مرحب بيهم فى جلسات السمر يطعموها .. وطبعآ العشا والشربة ويمكن فيها عصرا .. يعنى ناس أخصائيين ونسة . وتسع هم ووين وين وتكوسم .

الشوايقة فى السوق الجديد بحرسوا لواريهم بالليل ويدوروا العشا وبقعدوا فى دايرة كدة فى الو اطة .. أها كنا نمشى نتغز وسطم عشان الصنف البجيبوه من البلد كارب .. لما تكبوا ما بصل الوا طة .. بس دليباتم رهيبة والبطولات كلها فى البلد .. يعنى مافى شهود .. بقينا فى مدنى لما زول يرمى ليه واحدة كبيرة بتقول ليه .. ودى حصلت فى مدنى هنا ولا فى البلد ..

أمشى وأجى أحكى ليك عن جنينة كعكاتى

بالمناسبة با خوى الطقى ده شنو ؟ .. حالة نفسية ولا مستعصية ولا عقاب من عند الله

Post: #80
Title: Re: الونسة سودانية و بمزاااااااج
Author: محمد البشرى الخضر
Date: 12-17-2007, 09:06 AM
Parent: #78

رأفت يا عمك
و الشوايقة ديل كانوا بجاملوكم ساي ولا بدفعوكم
بالمناسبة دي ذكرتني مرة أيام العطالة كنا اتنين أنا وعزيز علي متكلين في محل بتاع باسطة وحاجة باردة بالنهار
كان عندو بزيانوس - ايامه اللسة بي صندوق خشب ديك
بدون ما نشعر نجيب قزازتين و نشربن و نجيب غيرن و النقة مدورة و جمبنا صندوق نخت فيه الفاضي
لما جينا نحاسب لقينا الصندوق إتملا
عاينا لي بعض و خجلنا
من اليوم داك تاني ما طلعنا بالنهار و قعدنا قعدة زي دي لغاية ما اشتغلنا

Quote: بالمناسبة با خوى الطقى ده شنو ؟
ما قال ليكم معتز السم القدر عشاكم
حيطقطقكم طقطقة الزعيم للوصيف في الممتاز
بس اوعكم من الفاولات و اللعب العنيف
في النهاية "ولدنا"


في انتظار كعكاتي وخبر الجنينة

Post: #81
Title: Re: الونسة سودانية و بمزاااااااج
Author: wd al geran
Date: 12-19-2007, 10:28 AM
Parent: #1

ِشنو يا ناس

الواطة فلـّللت؟

Post: #82
Title: Re: الونسة سودانية و بمزاااااااج
Author: رأفت ميلاد
Date: 12-19-2007, 05:00 PM
Parent: #81

Quote: و الشوايقة ديل كانوا بجاملوكم ساي ولا بدفعوكم
ياخى كنا طلبة .. ونحن جابرنا شنو غير الملح .. لا والله كانوا مضيافين وبحرقم الغنا شديييد ويقوموا ينقزوا وكل واحد جكسو فى البلد طبعآ.. طبعآ الفنانين من عندنا وياهو الشير .. بس ما كانوا مقصرين المقف حمب الحلة ..

لكن البزيانوس عندكم .. نحن كنا بنملا الصندوق لكن عزومات للبنات فى الدكان الورا مدرسة جمال عبد الناصر لما كنا براملة فى الفرع بالصباح .. كان عندنا صاحبنا برضو من أولاد مدنى لاعب كورة .. شييين كده .. كان الوحيد البشرب على حساب البنات بعرفم ولا ما بعرفم .. يمشى ليهم يقول ليهم داير قزازة بزيانوس تصلح لى وشى .. وكان خارتنا ومحبوب من البنات ..

برجع ليك لى كعكاتى




شايف الطقى متورط مع عادل .. الله أدا


يا زول كل سنة وإنت طيب ويخلى ليك الوليدات وأم الوليدات بتنا المريخابية

Post: #83
Title: Re: الونسة سودانية و بمزاااااااج
Author: محمد البشرى الخضر
Date: 01-01-2008, 03:44 PM
Parent: #1

شباااااااااب
كيف تمام
سعيدة عليكم السنة الجديدة
ها روستوا كيف؟