Post: #1
Title: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 04:38 PM
Parent: #0
هذه الصور لأحدى المعارك الطلابية في التسعينات
لا أذكر التفاصيل و لكن أعتقد الغلبة كانت للكيزان
|
Post: #2
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 04:44 PM
Parent: #1
البداية
المفاوضات و التحديات
|
Post: #3
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 04:45 PM
Parent: #2
فشل المفاوضات و إندلاع القتال
|
Post: #4
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 04:47 PM
Parent: #3
وقف العدائيات
تنظيم الصفوف و حصر الغنائم و إحتساب الشهداء
|
Post: #5
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 07:31 PM
Parent: #4
يا خوانا ما في واحد من جيل التسعينات يورينا الكان حاصل شنو؟
و النهاية كيف؟
|
Post: #6
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 08:31 PM
Parent: #5
فاتني أن أذكر أن هذه الأحداث جرت في جامعة الخرطوم
في الميدان الغربي
و تظهر كافتيريا الهندسة على خلفية الصورة الأخيرة
|
Post: #7
Title: Re: صور لمعركة طلابية من تسعينات القرن الماضي
Author: وليد محمد المبارك
Date: 02-26-2007, 09:25 PM
Parent: #6
يا محمد نحن ناس تسعينات
لكن جميلة ومستحيلة دي شعرا ما عندنا ليه رقبة
|
Post: #9
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 09:57 PM
Parent: #7
يا شفت ....
الفلم على ما أعتقد هو نفس السيناريو و الإخراج مع إختلاف المسرح و الأبطال
-إستفزاز
-وعيد
-سيخ ...أطواق...ارجل كراسي
-تكبير
-هجوم
أعلاه الثيمة الرئيسية, الإختلاف بيحصل أحيانا إذا كان الطرف الآخر مستعد (زي أحداث 91 ), في الحالة دي بيضاف للعناصر أعلاه:
-جري شديد
-إحتماء بمسجد الجامعة
ثم
-تدخل الإحتياطي و الأمن
-تعليق الدراسة
أكيد الفلم دا مر عليك
|
Post: #8
Title: Re: صور لمعركة طلابية من تسعينات القرن الماضي
Author: fadlabi
Date: 02-26-2007, 09:33 PM
Parent: #1
محمد
ألذ حاجة لسع في شباب خالط في المدرجات جهة الكافتريا
بعدين ما شايفين حاجة
ما كنت تنزل تصور من قريب
أو زوم ياخي عامل كمرتك القديمة دي 
|
Post: #10
Title: Re: صور لمعركة طلابية من تسعينات القرن الماضي
Author: وليد محمد المبارك
Date: 02-26-2007, 10:12 PM
Parent: #8
كيف يا محمد
كتييييييييييير
مرة علي
شاركة في مظاهرة واحده وبالصدفة
كنت مع فرد في النيلين
قامت المظاهرة
كنا جوه مرقنا بره ( اصلوا لا عاجبننا الكيزان ولا المعارضنهم )
قامت المظاهرة مرقت بره
قمنا دخلنا جوه
اها ونحن جوه العنكبة حصلت
فجأة كده دخلو ليك خمسة انفار مسكو ليك واحد دهجوه ليك جنس دهج
اها الموقف ده ما حق سياسة لكن حق حقارة
يعني خمسة رجال لامين ليهم في زول بدقوا فيه
ولا في زول قال بغم
اها انا والمعاي شالتنا ليك الهاشمية
نحن كنا 3
دورنا ليك في الجماهة دق نضيف
فكو الزول وشتتو
لكن وحاتك ملو ليك الجامعة بنبان والله انا حلقي لحدي هسع مشروق وعيوني حمر
اها مرقنا من الشكل مع الكيزان
بقينا في البنات الدايخات نص البنبان وعندهم ازمة
والرجال شتتوا قبيييييييييييييييييييييييييل
تخش جوه البنبان تشيل البت ( كلهن كانو سمان ) وتطلع بيها في كلية اداب طابقين
وتاني تنزل
في الاخر قما طلعنا السطوح حق اداب فوق
ياخ فوق في كترت مكنات حقت لمبات نايلون
شبكنا ليك الجماعة من فوق بالمكنات دي بس اطفال الحجارة
واللمبات سنينة بتعوق
لمن قاموا فتحو
فتحو بي ونحن طوالي شتتنا
من اليوم داك انا بقيت من ما تقوم المظاهرات بمشي بيتنا طوالي
الحاجة الكنت مستغرب ليها
الناس الكتااااااااار السو المظاهرات ديك كلهم مشوا وين ؟
تصدق انهم سوها وجروا وخلوا البنات بي وراهم!!
|
Post: #11
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 10:42 PM
Parent: #8
تعرف يا فاضلابي
أنا بديت أتذكر الأحداث
يخيل إلي إن الموضوع بدا من برة الغربي و جو تموهو هنا
وناس الهندسة ما كانوا منفعلين بل كانوا مستمتعين بالعرض العسكري و الإدارة الداخلية الأخدوها الكيزان
وعلى ما أذكر كانوا بيشاغلوا فيهم بفارغة الميري (أقيف كويس يا ميت , أمنع الكلام....و كدا)Quote: ما كنت تنزل تصور من قريب
أو زوم ياخي عامل كمرتك القديمة دي |
يا خي أقوليك التسعينات و إحنا طلاب , أين لنا الديقيتال و الزووم, بعدين كان ممكن أنزل قريب -بي كمرتي القديمة دي- لكن في مجموعة من البرلومات ِسنة ناعمة شبكني النبي فوقك كان تنزل تخلينا , قلت سمح ما قايل بعد 12 سنة بجي فاضلابي يزرزرني كدا
بعدين ياخ إنتوا ناس معلمين ما تكبرها و تعمل ليها إنهانسمنت زي ماعملت لي تفتك دي
|
Post: #12
Title: Re: صور لمعركة طلابية من تسعينات القرن الماضي
Author: معتصم الطاهر
Date: 02-26-2007, 11:06 PM
Parent: #11
| Quote: لكن في مجموعة من البرلومات ِسنة ناعمة شبكني النبي فوقك كان تنزل تخلينا , |
برلومات فى خامسة معمار ؟
ديل إلا جيت طارحهم معاك ؟
|
Post: #13
Title: Re: صور لمعركة طلابية من تسعينات القرن الماضي
Author: fadlabi
Date: 02-26-2007, 11:10 PM
Parent: #1
لقيتك حريف
كشفته من مكانو المصور منو
لكين هو الكان في خامسة و هن جن للخلط ساااااي
أو إحتمال الإتنين مشوا هناك يخلطوا
|
Post: #14
Title: Re: صور لمعركة طلابية من تسعينات القرن الماضي
Author: وليد محمد المبارك
Date: 02-26-2007, 11:17 PM
Parent: #13
زنقوه
|
Post: #15
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-26-2007, 11:38 PM
Parent: #14
الواد سيد الشغال لما قالوا ليه الأطباق دي ماضيها نابليون قال:
-ساب الجيش و المماليك و الإنجليز و راح يمضي اطباق
هسي إنتوا خليتوا الكيزان و السيخ و الجري و الهلمة دي كلها و بقيتوا في البرلومات السنة ناعمة ديل.
جات كدا, أنا عاوز موقع كويس للتصوير , و البنيات لما شافوا السيخ خافن و ما قدروا يقطعوا الميدان , إتدسوا هنا , و الله كريم
بعدين إنتوا المصحيكم لي أسة شنوا؟
|
Post: #16
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 10:31 AM
Parent: #15
| Quote: ما في واحد من جيل التسعينات |
؟؟؟
|
Post: #17
Title: Re: صور لمعركة طلابية من تسعينات القرن الماضي
Author: وائل طه محى الدين
Date: 02-27-2007, 11:37 AM
Parent: #1
-المعركة دي ما غابياني....
- كانت في الميدان الغربي ....
-أعتقد أنها نشبت في 1995
-مامتأكد من سببها...
- لكن أجزم إني شاركت فيها...
- الطلبه كانوا في الجزء الغربي للميدان والكيزان في الجانب الشرقي...
- الكيزان إتهزموا في الأول ...
- بعد داك جابوا (مدد) من المسجد...
- كانوا بقيادة الناجي عبد الله - حرامي الزيت-
- وأيضاً عبد الباقي الظافر من الإقتصاد- أسى هو في أمريكا جاه لوتري _
- والكوز محمد المجذوب - أب يد معووجة - ...
- يوم لا يُنسى ...
|
Post: #20
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 01:18 PM
Parent: #17
وليد ذاكرتك ما شاء الله عليها
لكن ما أعتقد إنها بدأت في الغربي
كان في أحداث سابقة في الشرقي أو المين
أما السنة فغالبا كانت 94
و قد تكون 95 زي ما قلت
المهم
عندك فكرة عن النهاية , كانت كيف؟
|
Post: #21
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 01:24 PM
Parent: #20
| Quote: - الطلبه كانوا في الجزء الغربي للميدان والكيزان في الجانب الشرقي... |
يعني الكيزان ما طلبة ولا شنو؟
| Quote: -لكن أجزم إني شاركت فيها... |
مذكر لون قميصك ؟
عشان فاضلابي يقدر يشوفك
|
Post: #18
Title: Re: صور لمعركة طلابية من تسعينات القرن الماضي
Author: ابوعبيدة حسن محمد
Date: 02-27-2007, 11:41 AM
Parent: #1
باشمهندس /محمد بشرى
اسعد الله اوقاتك بكل خير ،،
ناس اوائل التسعينات موجودييين 00
بس الواحد بحاول يتذكر دي ياتو واحده في
المعارك ، في زمنا طبعاً ذي ما عارف كان في حوالي
تسعة او عشرة معارك بين 90- 94
مقسمة لفترين واحدة في عهد مدثر التنقاري والتانية في عهد مامون حميده00
|
Post: #22
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 01:47 PM
Parent: #18
ما ممكن؟
أبوعبيدة الدبيب شخصيا
وين يا عمك؟
على حسب رواية الشباب الفلم دا يكون بعد تخرجكم
Quote: في زمنا طبعاً ذي ما عارف كان في حوالي
تسعة او عشرة معارك بين 90- 94
مقسمة لفترين واحدة في عهد مدثر التنقاري والتانية في عهد مامون حميده00 |
فاكر المعركة بتاعة حل الجمعيات في عهد إتحاد المحايدين , لما كنا برالمة, دي كانت - على ما أعتقد- أول مرة الكيزان يتدقوا و يطردوا من الجامعة و البركس .
فاكر مين الخلى نعالوا و جرى حفيان؟
طبعا بعدها جات محنة مقاطعة الإمتحانات و عملية فلق الصباح بقيادة مامون حميدة.
ياااااه زمن يا عمك.
أشوفك في بوست الصحافة عندي صور و ذكريات جميلة.
|
Post: #19
Title: Re: صور لمعركة طلابية من تسعينات القرن الماضي
Author: حمد فتح الرحمن
Date: 02-27-2007, 12:32 PM
Parent: #1
Quote: - كانت في الميدان الغربي ....
-أعتقد أنها نشبت في 1995
-مامتأكد من سببها... |
محمد تحياتي
اذا توقع وائل دا صحيح المعركة دي بتكون بي سبب الاعتصام بتاع اطلاق المعتقلين مرتضي و مهيد و ماجدولين ، قبل المتحانات بي اسبوع .
اليوم داك الجبهه الاسلامية استعانوا بي طلاب معهد شروني ،
و فعلا المعركة كانت ماشة لي صالحهم ،
لغاية ما اتدخلو طلاب هندسة ،
و كملوها طلاب الجبهة الديمقراطية بي الملتوف و الاطواق .
|
Post: #23
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 02:00 PM
Parent: #19
| Quote: المعركة دي بتكون بي سبب الاعتصام بتاع اطلاق المعتقلين مرتضي و مهيد و ماجدولين |
حمد تحية طيبة
إحتمال كبير كلامك صحيح.
لكن نقطة الملتوف دي ذكرتني حاجة تانية
معركة المولتوف كانت في منطقة المين و شارع الجامعة
و كانت نسبة مشاركة الطالبات عالية وفعالة من الطرفين
أخوات نسيبة و عضوات الجبهة الديمقراطية.
رايك شنو في فرضية إنو المعركة دي كانت بسبب زيارة البشير و اللقاء الكان في الميدان الشرقي؟
|
Post: #24
Title: Re: صور لمعركة طلابية من تسعينات القرن الماضي
Author: حمد فتح الرحمن
Date: 02-27-2007, 03:12 PM
Parent: #23
| Quote: رايك شنو في فرضية إنو المعركة دي كانت بسبب زيارة البشير و اللقاء الكان في الميدان الشرقي؟ |
ما اعتقد يا محمد لانو طردة البشير المظاهرة اتحركت من كافتريا العلوم مكان النشاط في الوكت داك
و الاحتياطي المركزي كان قافل الحتة البين الاندرلاب و الميدان الشرقي .
لما الطلاب اتحركو ماشين علي مكان اللقاء ناس الاحتياطي الغبيانين فكوا فيهم بمبان ،
في ناس شفوت جدا شالو الملتوف قبل ما يسخن و ينفجر وسط الطلبة و رجعوهو جوة خيمة البشير ،
اها الوزراء و السفراء الكانو معاهوا قاموا طلعوا ، و هو قعد يتلفت و يقول في شنو ؟ في شنو ؟ و بعديها قام مشي و قطع الخطاب بتاعو .
المعركة اتنقلت بعد كدا لي شارع الجامعة و ما اظن الميدان الغربي حصلت فيهو حاجة اليوم داك .
| Quote: معركة المولتوف كانت في منطقة المين و شارع الجامعة |
لو الذاكرة كويسة اعتقد انو معركة الملتوف بدت بين اداب و الميدان الغربي ، لما خشو طلاب هندسة ضد الكيزان .
بتذكر المين كان فاضي و طلاب شروني جو خاشين بي بوابة المين و لاقوني في ملف جم قانون ، اكلوني ليك علقة بي السيخ قعدت تلاتة يوم معسم ما قادر امشي .
لو الصور دي ما احداث الاعتصام بتاع المعتقلين ، ممكن تكون واحدة من معارك القبول الخاص او الانتخابات .
|
Post: #25
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 03:20 PM
Parent: #24
ماشاء الله على ذاكرتك يا حمد
طيب ذكرني زيارة البشير كانت سنة كم؟ و إعتصام المعتقلين سنة كم؟
كان الذاكرة الخربة دي تشتغل تاني
|
Post: #26
Title: Re: صور لمعركة طلابية من تسعينات القرن الماضي
Author: وائل طه محى الدين
Date: 02-27-2007, 03:50 PM
Parent: #1
- طردة البشير كانت في خريف 1995 ....
- وما وصلت الغربي إتحركت من كافتريا علوم للشرقي ...
- الكيزان (طبعاً ما طلبة) شكلوا كتائبهم في شارع الجامعة بعد نهاية الطردة ...
- فعلاً المعركة ربما كانت في أحداث معتقلى الثورة...
- متأكد إني شاركت فيها - ماكنت طالب - كنت بذاكر في المكتبة المين وممتحن شهادة -
- شارك فيها (عاصم شرزم) والمرحوم (بشير مردس)...
- فعلاً بدأت من جهة آداب وإنتقلت للغربي ...
- في طلبة جوا من هندسة وعززوا موقفنا...
- لكن ما كان فيها مولتوف خالص ...
|
Post: #27
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 05:54 PM
Parent: #26
تعرف يا وائل الموضوع إتعقد
أنا كنت شايل الكاميرا في الجامعة في النصف الأول من 94 لأغراض الرابطة الإجتماعية
و في النصف التاني من 95 لأغراض مشروع التخرج
أتمنى من الزملاء مدنا بآرائهم
و أخص الإخوة جعفر بشير أبو آمنة و محمد علي البشير
و تحياتي لك يا وائل على الذاكرة
| Quote: متأكد إني شاركت فيها - ماكنت طالب - كنت بذاكر في المكتبة المين وممتحن شهادة |
والشلاقة
|
Post: #28
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 05:56 PM
Parent: #26
مكرر
|
Post: #29
Title: Re: صور لمعركة طلابية من تسعينات القرن الماضي
Author: khaleel
Date: 02-27-2007, 06:33 PM
Parent: #28
محمد
تفاصيل المعركة بالكامل موجودة في بوست اليوم الحار وما بندار يوم الهندسة والمعمار
اطلق عليها لقب ام المعارك وكان يقود الكيزان صديقي هشام توفيق ( شوارسكوف)
|
Post: #30
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-27-2007, 11:09 PM
Parent: #29
راجعت البوست يا خليل
أم المعارك دي في بداية التسعينات
و الصور دي زي ما قالوا الشباب غالبا 95
مشكور على الحضور
و بالمرة أستأذنك عندي مجموعة صور لدفعة 90 في الكلية و الداخليات عندي الرغبة أوردها عندكم .
|
Post: #31
Title: Re: صور لمعركة طلابية من تسعينات القرن الماضي
Author: وائل طه محى الدين
Date: 02-28-2007, 07:02 AM
Parent: #1
محمدالبشرى ....
- الموضوع بسيط شديد ...
- المعركة كانت قبلها في مطرة وبعدها بيوم كذلك مطرة
- إذن في فصل الخريف 8 ، 9 غالباً ...
- وهي في 1995 قبل سبتمبر المظاهرات بتاعت المعتقلين ...
- يعني قبل 13 ، 14 ، 15 سبتمبر 1995 (أيام المظاهرات)
- إذن غالباً شهر 8 ..............
|
Post: #32
Title: Re: صور لمعركة طلابية من تسعينات القرن الماضي
Author: حمد فتح الرحمن
Date: 02-28-2007, 07:52 AM
Parent: #1
Quote: - إذن في فصل الخريف 8 ، 9 غالباً ...
- وهي في 1995 قبل سبتمبر المظاهرات بتاعت المعتقلين ...
- يعني قبل 13 ، 14 ، 15 سبتمبر 1995 (أيام المظاهرات)
- إذن غالباً شهر 8 .............. |
| Quote: و في النصف التاني من 95 لأغراض مشروع التخرج |
محمد
كلامك و كلام وائل دا باكد انو دي كانت بتاعت اعتصام الطلاب المعتقلين لانها كانت قبل امتحاناتنا بي اسبوع ، و انت بتقول مشروع تخرج يعني قبل الامتحانات طوالي ، و ائل بقول شهر 8 او 9 و هي اعتقد انها دي نفس شهور الامتحانات .
| Quote: لكن ما كان فيها مولتوف خالص ... |
ابدا يا وائل
لو تتذكر جرايد الجبهة في االيوم التاني نزلت منشيتات مطالبة بالانتقام من اتنين من طلاب الجبهة الديمقراطية ( ذكرت اسمائهم ) لانهم اطلقو قنابل الملوتوف علي الطلاب .
|
Post: #34
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-28-2007, 07:28 PM
Parent: #32
على كدا نتفق على تاريخ و أسباب العكة
-1995
-إعتصام لإطلاق سراح الطلاب المعتقلين
يلا أفيدونا بذكرياتكم
عن تفاصيل المعركة دي وغيرها في مسيرة الجامعة
يا ريت لو تكون عندكم معلومات عن تزوير الإنتخابات التم في دار الإتحاد و الكيفية أعتقد في 93-94
متابعين
|
Post: #33
Title: Re: صور لمعركة طلابية من تسعينات القرن الماضي
Author: ابوعبيدة حسن محمد
Date: 02-28-2007, 09:59 AM
Parent: #1
تعرف يا محمد انا في الاول اعتقدت انو الاحداث دي كانت ايام مقاطعة الامتحانات ورفض الطلاب الدخول والجلوس للامتحانات ، ولكن يبدو انو الصور دي بعد الاحداث ديك بسنوات طويلة لانو شايف شكل المباني حتى متغيره ومختلفة شوية 00
بس تعرف يا محمد بشرى الطلبة الايام دي يبدو انهم اصبحوا شوية مسالمين ، لاني زرت الجامعة خلال إجازتي الماضية لاكمال إجراءات تسجيل ابن اختي قبل حوالي خمسة شهور لقيت الطلبة بلعبوا ( تنس الطاولة) بطريقة بتاعة محترفين كباااار 00والجامعة فيها كمية من طاولات التنس تقدر بحوالي 15 طاولة، وكمان يبدو اللعب فيها برسوم لكل شوط من اللعب 00
على الهامش كده :
حاولت افتش في الصور دي على (احمد حسين وابو جولة )بس ما شايفهم 00يا ربي يكونوا وين الوقت ده ؟!!
|
Post: #35
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 02-28-2007, 08:07 PM
Parent: #33
أيام المقاطعة الطلاب الكيزان كانوا بعيدين عن الصورة
حتى البيشارك منهم بيحاول يضارى زي عادل محكر بتاع أداب كان مغطي وجهه بي شال و يدل العساكر على طلاب أولى آداب المفروض يمتحنوا أول يوم
أيام المقاطعة الشغل كان بي ناس الأمن وإشراف مامون حميدة
| Quote: حاولت افتش في الصور دي على (احمد حسين وابو جولة )بس ما شايفهم 00يا ربي يكونوا وين الوقت ده ؟!! |
زي ما قال فاضلابي الصور ما واضحة لكن أكيد الإتنين الشليقين ديل في المدرجات الفي الصورة التالتة.
الوحيد الظاهر تحت عمود الإنارة التالت اللابس قميص أحمر أو وردي دا أنور داكوتا بتاع مدنية
|
Post: #36
Title: Re: صور لمعركة طلابية من تسعينات القرن الماضي
Author: خالد عويس
Date: 02-28-2007, 08:23 PM
Parent: #35
حمد
في معركة طرد البشير، أذكر أن الطيب سيخة (وزير الداخلية آنذاك) حاول (يتخارج) بسيارته (لاندكروزر) - شارع الجامعة، وأمطره الشباب بالحجارة. وأذكر جيدا أن الزجاج الأمامي تحطم، وأضطر سائقه للسير بعكس اتجاه السير.
|
Post: #37
Title: Re: صور لمعركة طلابية من تسعينات القرن الماضي
Author: حمد فتح الرحمن
Date: 03-01-2007, 10:03 AM
Parent: #1
المعركة دي يا محمد حسب ما اذكر قامت بعد اعتقال مجموعة من طلاب الجبهه الديمقراطية بعدد من الجامعات ، من جامعة الخرطوم كان في مرتضي ( هندسة ) مهيد ( اسكول ) ماجدولين ( زراعة ) ، وقتها دعا التجمع الوطني لي اعتصام مفتوح قبل الامتحانات بفترة ، و التزم الطلاب بالاعتصام .
حاول طلاب الجبهه الاسلامية فك الاعتصام بدخول القاعات ، اتذكر اول قاعة حاول طلاب الجبهه دخولها و فك الاعتصام بيها كانت قاعة عبيد ختم ، و من هنا كانت بداية اول معركة بين طلاب الجبهه الاسلامية و باقي الطلاب ، و المعركة دي ما كان وصلو طلاب معهد شروني الديني المعروفين بي المشاركة في معارك الجبهه الاسلامية الطلابية في جميع الجامعات ( الظاهر الجبهجية حاولو يعرفوا قوتم بدون الشراونة ) . المهم بدات المعركة بين طلاب الجبهه و طلاب باقي التنظيمات ، استخدمت فيها الاطواق من قبل طلاب التنظيمات و الجنازيير من طلاب الجبهة ، و انتهت معركة عبيد ختم بهزيمة فادحة للجبهجية و انسحابهم لداخل مسجد الجامعة ( المقر الدائم ) .
بعدها واصل الطلاب الاعتصام زي ما كان ، و الامور ماشة مستقرة و الجامعة شبهه فاضية من الطلاب الما ملتزمين تنظيميا ، هنا قام الكيزان كالعادة بالاستعانة بالشراونة ، الجماعة ديل جو داخلين الجامعة في خطوات عسكرية و بي تكبيرات عبر بوابة المين لغاية ما مشوا عملو خطوة تنظيم في الميدان الغربي مكان ما انتا صورتهم ( هكذا اعتقد ) .
المهم و قتها يا محمد شجر المين كان مقطع و الخشب مليان في جنبات المين ، المين كان فيهو مجموعة بسيطة من الطلاب الشطار المتجهيين لي المكتبة ( بالمناسبة انا منهم ) . اخوك طالع من قانون ماشي بالمين ، قابلتا عساكر شروني في وشي طوالي و كنت اول طالب قابلوهو في الجامعة ، بعديها عيني ما شافت الا النجوم ، فتحتا عيوني في الكلينك ، اصلي ما قدرتا افتح قدام الجكس ، و كانت النتيجة تلاتة يوم راقد في داخلية حسيب بعالجو فيني اولاد سادسة طب ، المهم و انا لسه في الكلينك جا بوكس بتاع امن شايل الطلاب المحروقين بالملوتوف و دخلوني وسطهم ، بتذكر واحد جبهجي جا قعد جمبي اضانو مقطوعة من تحت الظاهر في شظية قطعتا ليهو ( تقول لي مافي ملوتوف يا وائل ؟ ) .
الاعتصام يا محمد كان ناجح جدا و انتهي باطلاق سراح الطلاب المعتقلين ، بعدها الناس خشت الامتحانات .
خالد عويس
لو تتذكر طردة البشير بدات بعد الاركان الشدوها التنظيمات في المين ، و كان اخر متحدث علي موسي ، المسيرة نحو البشير بدات بي هتاف من علي ( الجامعة جامعة حرة ، و العسكر يطلع برة ) ، و كانت قصة اطلاق البمبان الغبية من ناس الاحتياطي المركزي الاتسببت في فشل الزيارة .
فعلا سمعتا انو الطيب سيخة اترجم بي الحجار ، هو العوير قايل الطلاب الواقفين في شارع الجامعة جبهجية ، و قام نزل القزاز شوية و طلع ليهم اصبعينو اللتنين ( علامة النصر ) ، بعدها قام شارد ورا البشير .
|
Post: #38
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 03-01-2007, 05:47 PM
Parent: #37
يا حمد ياخي جهحهتنا شديد
بي كلامك دا
| Quote: الجماعة ديل جو داخلين الجامعة في خطوات عسكرية و بي تكبيرات عبر بوابة المين لغاية ما مشوا عملو خطوة تنظيم في الميدان الغربي مكان ما انتا صورتهم ( هكذا اعتقد ) . |
الحاجة الأنا متأكد منها وعلى حسب تسلسل الصور حكاية الجمعون و تنظيم الكتائب دي كانت آخر حاجة تقريبا و بعد نهاية المعركة
| Quote: و الجامعة شبهه فاضية من الطلاب الما ملتزمين تنظيميا |
ودي برضو ما معاك فيها لأنو على ما أذكر الجامعة-على الأقل الهندسة - كانت مليانة.
بما إنك متأكد من كلامك -لازم تكون متأكد بعد العلقة الفاهمة الأكلتها-
حا تتراجع فرضية أن سبب المعركة هو الإعتصام
تعرف أحسن حاجة نستعين بي كوز أكيد بكونوا موثقين
ما بتعرف ليك واحد؟
|
Post: #39
Title: Re: صور لمعركة طلابية من تسعينات القرن الماضي
Author: fadlabi
Date: 03-01-2007, 06:22 PM
Parent: #1
لو في سبتمبر 95
أنا متذكر الأيام ديك تمام
أخوك كان جوة
ومن الحاجات المضحكة أثناء ما بكسروا فيني سمعتا زول بقول أنا عايز بخاخ أزمة
و فقعتها ضحكة كبيييييرة لأنو الصوت ما بيغباني
كان برلومك طلال عبد الباسط
حتى الشباب الإعتقلوهم و الغواصة الجاب خبرهم (وا فضيحتاه كان من النيلين)
مع إنو إكتشفوه بعد زمن
بالمناسبة ماجدولين ساكنة جمبي هنا في أوسلو
ممكن أخليها تحكي ليكم زيادة عن الأيام ديك
|
Post: #40
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 03-01-2007, 06:36 PM
Parent: #39
يعني برضو ما متأكد
| Quote: بالمناسبة ماجدولين ساكنة جمبي هنا في أوسلو |
أقول ليك عايزين كوز تقول لي ماجدولين
| Quote: ممكن أخليها تحكي ليكم زيادة عن الأيام ديك |
مرحب بيك و بيها , يا ريت تحكوا لينا عن تجربتكم.
يا خوانا معقول مافي كوز هنا
|
Post: #41
Title: Re: صور لمعركة طلابية من تسعينات القرن الماضي
Author: غباشي
Date: 03-02-2007, 03:04 AM
Parent: #1
ود البشري .... إزيك يا باشمهندس
الميدان الغربي ده زكرني أحداث اكتوبر 2002 و بسببها الجامعة قفلت ستة شهور كاملة كانت كفيلة بأن تجعلنا خريجين ... لكنها أخرتنا ستة شهور كاملة ... و الأحداث كانت بسبب عودة الإتحاد ... المهم المناوشات إستمرت ليها زي يومين و بعد داك شوف الطامة الكبرى ... ناس هندسة سنة رابعة كان عندهم محاضرة بتاعت إقتصاد هندسي مع د.أبو الجوخ و إنت عارف عمك أبو كتاب 800 صفحة بالإنجليزي ... المهم شادي الجماعة من الساعة 3:00 لحدي الساعة 6:00 مساء (و الجامعة بيغادي مولعة) .. لما خلاص بقى ياخد الأتندنس و الناس جزء منها طلع فإذا بقوة من الإحتياطي المركزي تقتحم قاعة بروفيسور دفع الله الترابي بالمباني الجديدة (ظاهرة أعمدة في صورك) و طلبوا من الدكتور يتخارج ... المهم تم إعتقال كل الطلبة الموجودين داخل القاعة و الجمعون بتاعهم كان في أرض الحرام (الميدان الغربي) بمحازاة السوق الشعبي و على شاكلة الأسرى تم إقتيادهم في صف طويل رافعين إيديهم فوق ريساننهم و على بوابة النشاط طوالي ... (إتخيل القطر ده طويل كيف) و بعد داك ركبوهم العربات و تم توزيعهم علي مكانين ... حسب رواية المعتقلين آنذاك .. واحد في شارع البلدية و التاني بالقرب من حديقة القرشي (الخرطوم3 مجازا) و هاك يا الجلد و الضرب و الكسر و الحقارات ... .. ولي عودة لأحكي لكم بعض الطرائف التي صاحبت الضحايا في المعتقلين (شارع البلدية) و (الخرطوم3 ) ...
|
Post: #42
Title: Re: صور لمعركة طلابية من تسعينات القرن الماضي
Author: غباشي
Date: 03-02-2007, 03:10 AM
Parent: #1
لكن إتخازك لمبنى معمار برجا للمراقبة كان موفق !!! و للا شكلك كنت خالط في الإستديو و القيامة قامت ؟ 
|
Post: #43
Title: Re: صور لمعركة طلابية من تسعينات القرن الماضي
Author: غباشي
Date: 03-02-2007, 03:24 AM
Parent: #1
أبوعبيدة
| Quote: الطلبة بلعبوا ( تنس الطاولة) بطريقة بتاعة محترفين كباااار 00والجامعة فيها كمية من طاولات التنس تقدر بحوالي 15 طاولة، وكمان يبدو اللعب فيها برسوم لكل شوط من اللعب 00 |
قصدك بلياردو ؟ ... لأنو بالجد كل ضل شجرة بقت فيها طربيزة بلياردو !!!
في زمننا (1998-2003) كانت في طربيزة ( البنق) الفي الأندرلاب بس ... بعد داك بدأ تسلل البلياردو في سنواتنا الأخيرة و أشهر واحدة في هندسة شمال كفتريا هندسة (بينشات معمار)... و الزمن داك ساعة البيلياردو برة كانت بـ 10 الف جنيه (جنيه قديم) عشان كانت تعتبر خاصة بالحناكيش و أولاد الحنان
|
Post: #44
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 03-02-2007, 03:51 AM
Parent: #43
غباشي
كيفك يامعلم
إن شاء الله الزنقة إنتهت
طيعا حكاية يسوقوا الطلاب من القاعة دي بالغوا فيها و تخلوا تماما من المنطق
لكن قولي لي بقت على دي , المنطقي شنوا في بلدنا
المهم ..
في إنتظار ذكرياتك و شاكرين المرور و المشاركة
| Quote: لكن إتخازك لمبنى معمار برجا للمراقبة كان موفق !!! و للا شكلك كنت خالط في الإستديو و القيامة قامت ؟ |
الكورة واطة يا عمك
|
Post: #45
Title: Re: صور لمعركة طلابية من تسعينات القرن الماضي
Author: غباشي
Date: 03-02-2007, 04:13 AM
Parent: #1
| Quote: إن شاء الله الزنقة انتهت |
حبيبنا و الله لسة مزنوق لكن الموضوع مسخن و جدير بالمشاركة دون تردد
| Quote: طيعا حكاية يسوقوا الطلاب من القاعة دي بالغوا فيها و تخلوا تماما من المنطق |
المنطق بيقول انو لازم يكون في معروضات لأنو الجامعة جايطة ليها أكتر من يومين و الشغلانية جابت ليها إعنصامات عشان كدة جات في المساكين ديل و السبب د.أبو الجوخ
طبعا زي ما انت عارف العصريات دايما وقت ميت في الجامعة شباب الداخلية بيرجعوا ينوموا و بقية الشباب بيكونوا خالطين , و الجوعة بتكون حاصلة .. و الجكس بيكون راجي ا
تبرد عشان المواصلات و كدة يعني كل العصافير مضروبة بحجر واحد طالع من نبلة فاهمة ... عشان كدة يا حبيب المعروضات تم التحصل عليها بعد عناء البحث خصوصا القاعة جديدة و مكانها شوية (غميس) يعني القاعة زاتها مريبة و على العليها فيها اسم الترابي
| Quote: الكورة واطة يا عمك |
لاعبين مع أفارقة و للا شنو؟
|
Post: #46
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 03-02-2007, 04:39 AM
Parent: #45
| Quote: لاعبين مع أفارقة و للا شنو؟ |
أبدا وحاتك
بس الحكم كان جمبنا
(بالله ما تقولي لي الحاكمها منو ’ عشان ما حأوريك)
بالمناسبة ما بتعرف ليك كوز يكون حاضر الأحداث دي يجي يورينا الكان حاصل
|
Post: #47
Title: Re: صور لمعركة طلابية من تسعينات القرن الماضي
Author: Tragie Mustafa
Date: 03-02-2007, 04:51 AM
Parent: #45
محمد البشرى وزوار بوسته الكرام
بوست ممتاز جدا وشكرا للتوثيق للعنف الطلابي في ظل الكيزان.
وحقيقي امتعتوني جدا بذكرياتكم الجميله.
وكله كوم ووليد المبارك كوم
وعتيلهم (للبنات السمان كوم) في النيلين,والله ضحكتني ضحك يا وليد.
قلت لي جابوا لكم الفلايت او القطايع.....
عشان ثاني تتسكع بهناك.
تراجي.
|
Post: #48
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 03-02-2007, 12:33 PM
Parent: #47
سعدنا بمرورك يا تراجي
طبعا وليد شفت
و عتالي
|
Post: #49
Title: Re: صور لمعركة طلابية من تسعينات القرن الماضي
Author: حمد فتح الرحمن
Date: 03-02-2007, 05:10 PM
Parent: #48
Quote: يا حمد ياخي جهحهتنا شديد
بي كلامك دا |
قصدك العلقة اثرت في ذاكرتي و لا شنو يعني ؟
| Quote: الحاجة الأنا متأكد منها وعلى حسب تسلسل الصور حكاية الجمعون و تنظيم الكتائب دي كانت آخر حاجة تقريبا و بعد نهاية المعركة |
ما يمكن اتلخبتو في الطريق و تاني رجعو اتنظمو في الغربي استعدادا لام المعارك
Quote: ودي برضو ما معاك فيها لأنو على ما أذكر الجامعة-على الأقل الهندسة - كانت مليانة.
بما إنك متأكد من كلامك -لازم تكون متأكد بعد العلقة الفاهمة الأكلتها-
حا تتراجع فرضية أن سبب المعركة هو الإعتصام |
شوف يا محمد ما دام الصور قبل الامتحانات معانها بالتاكيد معركة المفصولين
| Quote: تعرف أحسن حاجة نستعين بي كوز أكيد بكونوا موثقين |
موثقين شنو يا محمد قول مربوطين ، اقول ليك واحد اضانو مقطوعة تقول لي موثقين
| Quote: بالمناسبة ماجدولين ساكنة جمبي هنا في أوسلو |
خلاص عليك الله يا فاضلابي سلم عليها و علي قريبنا هيثم النوش
|
Post: #50
Title: Re: صور لمعركة طلابية من تسعينات القرن الماضي
Author: غباشي
Date: 03-02-2007, 09:36 PM
Parent: #1
من الطرائف يا ود البشرى إنو ناس هندسة الذين تم اعتقالهم كانو (ميكانيكا ومساحة) يعني أخوك جلى منها بسنة واحدة و إنت جليت منها بكم سنة كدة .
يعني لو كان في كبسولة الزمن كان بقينا دفعة في المعتقل و بدل ما انت مراسل من برج المراقبة .. كان بقيت مراسل حربي عدييل
|
Post: #51
Title: Re: صور لمعركة طلابية من تسعينات القرن الماضي
Author: ابوعبيدة حسن محمد
Date: 03-03-2007, 07:35 AM
Parent: #1
الغالي غباشي 00
تعرف منظر الطاولات منتشرة هنا وهناك والطلبة هايجة ومايجة حول الطاولات وكل واحد منتظر الدور بتاعو كان منظر مدهش بالجد
وغريب 00فما عرفت المقصود بالموضوع ده شنو !1
يبدو انو خلال السنوات الجاية ح يكون في كمية من الخريجين المحترفين في ( تنس الطاولة والبلياردو والسباحة والرماية وركوب الخيل)
نواصل
|
Post: #52
Title: Re: صور لمعركة طلابية من تسعينات القرن الماضي
Author: غباشي
Date: 03-06-2007, 05:16 PM
Parent: #1
حبيبنا أبوعبيدة
زي ما قلت حيطلع جيل موهوب في شتى المناشط و بالفعل هم محظوظين لأنهم بيتمتعوا بوقتهم .. و اضيف ليك معلومة هم بالرغم من صغر سنهم عارفين حاجات كتيرة ... يعني ما شفع ساكت زي ما بنقول ...
و الله يا حبيبنا عندي معاك كلام كتير انت وود البشرى بس ربك يسهل ... أشوفكم لي قدام
|
Post: #53
Title: Re: صور لمعركة طلابية من تسعينات القرن الماضي
Author: اسماء الأمين
Date: 03-06-2007, 08:21 PM
Parent: #52
جيل التسعينات
جيلي انا
ازيكم
محمد البشري
كيف حالك
مالوا بوستك ده عامل ذي البركس( في اول التسعينات طبعا)
لانه بعد داك قلبوه شي تاني
ما شايفة واحدة جات حايمه عليكم ولما شفت ناس ابوعبيدة
قلت اهو في ناس بعرفهم
طبعا بالنسبه لينا نحن دفعة 90-91 نكسة المقاطعة خلتنا
مجهجهين خصوصا بعد فصلنا عام كامل بقينا نلاوز اي كركبة
يا بيت جاك زول ما جبانين لكن الشفناه كان لايحتمل ونحن برالمة
لما تشوف في قلب داخلية البنات واحدة بتعرفها تماما وبعيده
كل البعد عن الاحداث يعني بالواضح شهادة عربية يعني طناش
ما ناقشة الحاصل وتنضرب قدامك من عسكري وبي بسطونه يبقى
حتعمل شنو اكيد حتهرب لانه حتحس الشغلة ماشة بدون فرز الكعه
تجي محل ما تجي .
لكن بعد الشفناه داك ماتبنا على طول لانه جاء اعتصام
ناس اتحاد المحايدين في مكتب المدير ولو فاكر لما قطعوا
التلفون والكهربه والمويه من المكتب وناس الاتحاد مقفولين
مع المدير والناس كلها كانت معسكره في هندسة وحول مكتب المدير
وخش عليهم الاحتياطي وبعد داك الناس اتشتتوا وناس الاتحاد الما
انقبض كب الزوقه من ناس الامن عارف الخلعة سوت فينا شنو انا
وصحاحبتي المعاي لقينا نفسنا جوه مكتب المدير والناس مارقه منو
بعد داك ناس الاحتياطي رموا البنبان جوه صالات المكتب
واذكر انو الهادي ود اداب كان جوه وطلعنا قدامه وقال يالا كل زول
علي اتجاه عارف الحصل شنو لقينا العساكر صف من باب المكتب لحدي
مسافة عشرة امتار وعينك ما تشوف الا النور وقعوا فينا ضرب انا
غايتو اسكيرتي الجنز نفعني وعمل حمايه لكن راس البسطونه
جاني في كتفي وفي راسي وربك ستر ونجري ونقع لحي ما وصلنا
مباني الجغرافيه في اداب لقينا اسامة ادريس ود الاتحاد واقع في
النجيلة وتعبان من الازمة وغير كده اكيد هارب من ناس الامن
فمن غير ما نشعر انا وصاحبتي صرخنا اسامة ادريس العساكر ضربونا
خلاص كانه اسامة قادر افك نفسه لكن دي ما كانت توبه نصوحة
من ديك وذي ما قلت ليك تاني كان ضرب شباك في الجامعة تلقاني في البيت
اها ونسيت الموقف التالت كان ونحن ماشين علي الجامعة الساعه اتنين
عز الضهر ومارقين من الداخليه وكانت وقتها البركس قلبوها داخلية بنات
وبعد ما وصلنا المسجد نشوف الحركه قلبت اتجاهين وبكاسي ترفع ناس وبكاسي ترمي
بنبان والموظفات اللي في مبنى الادارة (داخلية قانون سابقا) يصرخوا يابنات خشوا جوا
بضربوكم وفعلا لقينا نفسنا جوا الجامعه والناس تجري في كل اتجاه ونجدتنا
كانت من زملاء فلسطينين ازكر اسماءهم عيسى وبسام لانه كانوا معانا في اداب
وبعد ما لقينا الامان سالنا الحاصل شنو قالوا في مظاهرة بدات من النيلين
والسودان وخشوا السوق العربي والجماعة جوا عشان ناس الخرطوم ما يتحركوا
بس ما فاكره سبب المظاهرات كان شنو.
لا حولة قديتكم قد بي كلامي ما اصلوا النسوان كلامن كتير
لكن بيني وبينكم سيرة الجامعه لما تجي الواحد لسانه ما بقيف من الحكي
لانها ذكريات حلوه رغم مرارت الاحداث .
لكن ما قلت لي يا محمد البشرى انا حاسه اني بعرفك
لانه معرفتي بي ابو عبيدة ومحمدعلي البشير قويه جدا
وبدات من اول ايامي في الجامعة وثالثهم عبدالرحمن
حسن ود اقتصاد وكمان حاسة اني عرفتك مع السماني عجبنا
اخو صديقتي التي افتقدها تماما وشديد جدا الرساله عجبنا
ونسيت اقول ليك انا من ناس اداب والدفعة الكانت في وش
المدفع في المقاطعة .
اها يا اخوانا بجي راجعه تاني انشاء الله .
تحياتي
اسماء الامين
|
Post: #54
Title: Re: صور لمعركة طلابية من تسعينات القرن الماضي
Author: محمد البشرى الخضر
Date: 03-10-2007, 10:55 PM
Parent: #53
مرحب بيك يا أسماء
و آسف على تأخير الرد
ماشاء الله على ذاكرتك
لكن يبدو النظر محتاج مراجعة| Quote: ما شايفة واحدة جات حايمه عليكم |
يعني ماشفتي مداخلة تراجي فوق و لا عندك راي
أحداث المقاطعة كانت مأساة حقيقية , و أكتر ناس عانوا منها دفعتكم -أولى آداب
كان عندهم أول إمتحان , الأمن جاب لوري و قفوه بالخلف علي سلم الداخلية -أعتقد مبنى عطبرة ب
و كانوا بيرموا الطلاب في اللوري زي العفش و السياط تلهب الظهور
| Quote: لكن ما قلت لي يا محمد البشرى انا حاسه اني بعرفك |
كانت شلتي من آداب ناس وضاح السمين و عمر توتي و السماني و بكري و فضال حمدي أعتقد ديل دفعتكم
السماني عجبنا في أمريكا , ولو زرت بوست الهندسة(اليوم الحار) تسمعي لسه تسجيل من الكورال
دي صورة فيها السماني عجبنا في كافتيريا هندسة
تحياتي لك و الشكر على المرور و إستعادة الذكريات
|
Post: #56
Title: Re: صور لمعركة طلابية من تسعينات القرن الماضي
Author: اسماء الأمين
Date: 03-11-2007, 02:54 AM
Parent: #54
محمد البشري
والله مشكور علي الصور
والذكريات الحلوة دي
السماني فعلا في امريكا وكنت على اتصال
بالاخ محمد البشير ومحمد هو دلوقت في السودان
بالنسبه لشلة اداب دي
السماني محمد علي ود الدروشاب
بكري ود المناقل
وعمر توتي القصير
ومالك نسيت الشمباتي
بالمناسبه الشمباتي قابلته في الرياض
قبل سته سنين .
وياسيدي طالما بتعرف ديل يبقى فعلا
واكيد بعرفك لكن في حاجات كتيرة طشت من الذاكرة
عموما لك التحية وواصل في الذكريات
وكتر من الصور
اسماء الامين
|
Post: #55
Title: Re: صور لمعركة طلابية من تسعينات القرن الماضي
Author: nabta
Date: 03-11-2007, 01:29 AM
Parent: #1
المعارك تتشابه وهذه الصور يمكن أن تكون لاى من معارك الطلاب ضد الجبهه الاسلاميه لان المعارك كانت غالبآ ما تبدأ بعيدآ ناحية علوم ثم تنتهى نتيجة تراجع أحد الطرفين فى الميدان الغربى .لكن ما لم يكن يخطر فى بالي أن هناك من يهتم بتصوير المظاهرات وكان الاعتقاد السائد أن جهاز الامن هو من يصور وذلك لندرة كاميرات التصوير وعدم توفر الامكانيات رغم أن التنظيمات الوطنيه كانت تدرك أهمية تصوير مثل هذه الاحداث وربما لو كانت تدرى أن هناك طلاب قد صوروا المظاهره ربما اتصلت بهم وذلك لاهمية التوثيق لكل تنظيم
أحيي الاعزاء حمد و وائل على هذه الذاكره الحديديه وأتفق معهما على أن الصور لمعركة معتقلى الثوره سبتمبر 95 وأعتقد أنه اليوم الثانى حيث كان هناك ضرب بالملتوف على طول المسافه من كافتريا علوم وحتى آداب وحينما تم التراجع الى الميدان حيث أخذت الصور لم يكن هناك ملتوف وأعتقد أن الذين فى الصوره التالته فى وسط الميدان هم الكيزان المدعومين بطلاب شرونى والامنجيه أما الطلاب فقد فى آخر الميدان من جهة هندسه
محمد على الحسين
|
Post: #57
Title: Re: صور لمعركة طلابية من تسعينات القرن الماضي
Author: غباشي
Date: 03-13-2007, 03:52 AM
Parent: #1
أسماء الأمين
أنا عكسيك تماما إلا في عكة واحدة حضرتها و نجيت منها بحسن التدبير
يعني أي عكة بتحصل أنا يا بكون داكي او بكون اتخارجت قبليها (شفتي دعوات الحجة) و جاييك أحكي احداث أكتوبر 2002
من الطرائف يا ود البشرى ناس ميكانيكا و مساحة المعتقلين .. عندنا ولدنا اسمو محمد العربي عندو صلعة كبيرة ... كان ساكن في داخلية ابو دجانة (تهراقا سابقا) المهم صاحبنا تندس عند الدكتور و إتخارج برة قام واحد من الشباب تندس و لحقو برة راجينو احد فردتهم لسع ما تندس .. المهم صاحبنا ده قال للعربي خشاك ننتظرو جوة بدل ما مشحوطين برة كدة .. وقاكوا دخلوا تاني القاعة و الجماعة كبسو
العربي كان تبع معتقل الخرطوم 3 , قال ليك الجماعة لمو ليك فيهو كسر و شلاليت و هو شابكم ليك (و الله ما عملت حاجة) و الجماعة بيقولو ليهو ( والله بصلعتك الكبيرة انت البتحرش الشفع ديل ) المهم بيدقو فيهو لحدي الساعة 3 صباحا في النهاية قاموا فكوهوا و طلعوهو الشارع ... صاحبنا داير يمشي على السوق العربي و راسو جاييط راح ماسك ليك الإتجاه العكس و مشى لحدي ما لقى نفسو جنب محطة الغالي
شفتو الشلاقة ... عشرين متر بس من الداخلية ... و اكل علقة و ضرب مشوار دبل أنصاص الليالي
نواصل إن شاء الله
|
|