استقالة من المشاركة في هذا المنتدى -

الاخ العزيز بكري
الاخوة الاعزاء
اليوم طالعت ألفاظا لا تليق بشخصي من خلال بوست للاخت تراجي حول لقاء في كندا, ولمست فيه إساءة شخصية لي ولكل المحترمين في هذا البيت الكبير, وها أنا أعلن انسحابي وعدم مشاركتي منذ هذه اللحظة وسأوقف من الان كل مشاركاتي من مقالات ومداخلات وأخبار كنت أرسلها لهذا الموقع..
وأشكر لك اخي أبوبكر كل ما قمت به وما تقوم به من أجل إرساء لثقافة وأدب الحوار بيننا كسودانيين شتت بيننا السبل..
وأشكر كل الذين يحترمون الحوار المعافى ..
والى اللقاء في مكان آخر علما ان سودانيزأونلاين كان هو البيت الذي ارتاح عنده واتحدث فيه موصلا رسالتي لكل العالم..
خالد ابواحمد

بريد الكتروني
[email protected]
[email protected]

ألأخ الفاضل خالد أبو أحمد

أسمح لى أن أعطيك بعض المقتطفات من ردود أحد المتداخلين فى إحدى مقالاتى:

Quote: واحد من هذه الارتال واذهب مثل نفسك لا تمثل السودان الذي هو بلد الرجال والصناديد وليس فيه مقام للمخنثين وان عدتم عدنا دكتور محمد احمد سيد

Quote: فالاموال التي تجمع فيها فى مدينة نيويورك اخي الكريم هى منصرفات الداعرات ومحتسي الخمر فى منهاتن وبروكلن تاتي اليك لشراء معتقات الخمر او ادوات الدعارة

واحب أن أذكرك بأن الرسول (ص) قال لسيدنا على فى إحدى وصياه(أعفو عمن ظلمك، ,واصل من قطعك،وأعطى من حرمك)

يعنى إنت يأبو أحمد عايزنى أقدم إستقالتى من النت كله بتلك الكلمات النابئة. يأخى أهديك هذا البيت الذى أعلم أنه فى مخليتك:-

إٌذا غامرت فى شرف مرموم
فلا تقنع بما دون النجوم

استاذي العزيز خالد أبو أحمد ..لك التحية والتقدير ..

مثلما قال اخي اسامة من قبل هناك الكثير والأسواء من
هذا قيل هنا في هذا المنبر ..
ولكن كون ان تذهب أخي خالد ليس هو الحل ..
كون ان تمضي يعني افساح المجال للأفكار الغثة ان تفرخ
هنا وهناك بكل مشين ومعيب ..
عرفتك حقانيأ لا ترضي الخطأ و الاستحقار ..
لكنك يجب ان تظل هنا ..في هذه الدار ..
هناك اشياء جميلة في هذا المنبر مع بعض القبيح
لكن من أجل هذا الجميل يجب ان تواصل العطاء ..


تقديري الدائم لك أخي خالد أبو أحمد ..

لو المضايقات او الزهج تجعل العضو يستقيل من المنبر ويتركه

نهائياً لتركته انا قبلك ,, ومن قبل كتبت بوست توقفت عن الكتابة

وتاني جيت راجع وبرضوا زهجان من حال المنبر ولكني صابر علي اي

حال اخي تراجع عن قرارك وارجع المنبر تاني روق شوية واخد ليك راحة

يوم يومين وتعال راجع

المحترم خالد ابو احمد

حرام عليك ان تنهزم للقبح

لست انت من يترك هذا المنبر

وانت رجل لك رساله.

كتبت لك في نفس البوست :

Quote: عبد الرحمن عزاز شكرا لك الاخ خالد ابو احمد ارجوك لا تترك هذا المنبر انت رجل ليس سهلا وتحمل رؤيه وقلما محترم اختلفنا او اتفقنا اكن لك الاحترام الجماعه المخضرمين بيوصوني دائما انه اتجاهل مثل هذه الاشياء نفس العباره اقولها لك انا وانت حديثين في عالم الانترنت عشان كده بنستاء ونتألم لكن الاخوة المخضرمين قالوا زي ده عادي بنفس نصيحتهم انصحك هذا المستوى ولا ترد عليه وبس لما تشوف اسمه اعمل قفذ بالزانه ونط مداخلته ولا تتألم مثله في كل مكان الجمهورين عندهم ناس زي ديل كانوا متلحنهم في البورد الشيوعين عندهم ناس زي ديل متلحنهم في البورد الانصار الختميه ال ال ال.........الخ اذن هي ضريبة العمل العام وندفع ثمنها بكل اريحيه. فلا تقلق. ولك الود المهم انت ما تغادر. تراجي.

لا تغادر

لا تهزم لهم.

في هذا المنبر

تعرض لاكثر من هذا

وللاسف كله بايدي دارفوريه وانا معتبره من اكبر مناصري قضية دارفور بالمنبر.

حتى يتاكد للجميع

ليس كل دارفوري ضحيه بل بعضهم قتله

وليس كل شمالي قاتل بل بعضهم ضحيه.

يتأكد لي كل يوم ان ما يحدث في دارفور ثلاثه ارباعه سببه ناس دارفور انفسهم

بالجهل

بالقبليه

بالتنازع على السلطه

بضيق الافق

بعدم القرأه الصحيحه للصراع

و

و

و...الخ

الخلاصه

مزيد من التشرزم

مزيد من الضياع

مزيد من تشتت الجهود.

ولهم الله اهل دارفور الغلابه.

لكن ارجع واقول لا تغادر يا ابو احمد

واذا غادرت ساغادر معك فان كنت مقتنع ان صوتي افضل اخراسه فغادر.

ولك الود.

وتشكر يا اخي للموقف الشجاع, والتحيه لناس بورتسودان وانسباء ناس بورتسودان.

تراجي.

الاخ خالد ابواحمد
لوك الصبر يأخوي....

معزتي
المناضلة تراجي

Quote: لا تغادر لا تهزم لهم. في هذا المنبر تعرض لاكثر من هذا وللاسف كله بايدي دارفوريه وانا معتبره من اكبر مناصري قضية دارفور بالمنبر.

انا...انا ....انا ....انا .... دي بتجيب ليك الهواء.....كدي عايني للرد بتاع اخونا محمدين الذي اعتبره ويعتبره الكل من الفاهمين في هذا المنبر.....درس صغيروني في التواضع

Quote: ليس كل دارفوري ضحيه بل بعضهم قتله وليس كل شمالي قاتل بل بعضهم ضحيه. يتأكد لي كل يوم ان ما يحدث في دارفور ثلاثه ارباعه سببه ناس دارفور انفسهم بالجهل بالقبليه بالتنازع على السلطه بضيق الافق بعدم القرأه الصحيحه للصراع و و و...الخ الخلاصه مزيد من التشرزم مزيد من الضياع مزيد من تشتت الجهود. ولهم الله اهل دارفور الغلابه.

دي اعترافات وافادات وتصريحات خطيرة.....اقول معك ولهم الله اهل دارفور الغلابه بين مطرقة الحركات الدارفورية وسندان الحكومة الجنجويدية.
معزتي

الاخ د.محمد علي المشرف

شكرا لك :

Quote: انا...انا ....انا ....انا .... دي بتجيب ليك الهواء.....كدي عايني للرد بتاع اخونا محمدين الذي اعتبره ويعتبره الكل من الفاهمين في هذا المنبر.....درس صغيروني في التواضع

والله لو التواضع يمشى على قدمين فهو يعلم من يمثله حقا.

لم آتي بشيئا من عندي

ان جاء وقت الشتيمه والاتهام بالاصوات الدارفوريه كنت من اول المشتومين

وان جاء وقت الاتهام بالعنصريه كنت من اول المتهمين

ولست من صنفت نفسي باني من اقوى الاصوات الدارفويه بالمنبر ولكن انتم.

انا ادافع عن قضايا الانسان في كل مكان

ولكن تقاعس الغالبيه عن نصرة ناس دارفور

جعلكم تصنفون هذا مجننا بقضية دارفور وذاك مكرهنا بقضية دارفور.

لم افعل سوى استلاف اللفاظكم

والهواء ما فايتنا في هذا المنبر.

Quote: اخونا محمدين الذي اعتبره ويعتبره الكل من الفاهمين في هذا المنبر

وبعدين معاكم في سياسة فرق تسد دي ما عايزين تسيبوها مع الدارفورين

هل تعلم كم منكم يعيد علينا ان محمدين هو الفاهم بس؟؟؟؟؟؟؟؟

وهل احتاج شهادات مثل هذه منكم؟؟؟؟؟؟

محمدين له منهجه ولي منهجي ولغيري منهجه

وحسه كل المعاراضين شايف منهجهم واحد,وله حيطتكم القصيره الدارفورين

وعايزين تفتوا بس!!!

يا زول دارفور دي منطقه جغرافيه كبيره قالوا لكم قدر فرنسا

يعني ما ممكن الناس تعزف نغمه واحده

فينا الريفي و الحضري

المزارع و الراعي

مناطق سهليه ومناطق جبليه(راجع نظرية بن خلدون عن اخلاق الناس وتناغمها مع التكوين

الجغرافي لمناطقهم)

يسار ويمين

حملة سلاح ومناضلين بالوسائل الديمقراطيه

واخيرا مناضلين حقيقين ومناضلين كي بورد.

فكيف تعتقد انه ممكن نتكلم نفس اللغه؟؟؟؟؟

تخريمه:

كامل تقديري للاخ محمدين ولكن تثبيت لمحاولة استغلال

الاخيرين لاختلافنا في الطرح لضربنا ببعضناالبعض .

لك الود تراجي.

اختي الرائعة تراجي

Quote: ولست من صنفت نفسي باني من اقوى الاصوات الدارفويه بالمنبر ولكن انتم.

وانتي مستمتعة باستعمالها وكمان قاشرة بيها بالرغم من قولك:

Quote: وبعدين معاكم في سياسة فرق تسد دي ما عايزين تسيبوها مع الدارفورين هل تعلم كم منكم يعيد علينا ان محمدين هو الفاهم بس؟؟؟؟؟؟؟؟ وهل احتاج شهادات مثل هذه منكم؟؟؟؟؟؟

....يازولة شوتي سااااااااكت السودان ده كلو شايت والله يحفظك من العين ويحفظ اولادك.

Quote: كامل تقديري للاخ محمدين ولكن تثبيت لمحاولة استغلال الاخيرين لاختلافنا في الطرح لضربنا ببعضناالبعض .

ذي كلامك ده يااختي تراجي بسموه الوسواس الخناس .......وفي رواية اخري بسموه انك عاوزة توصلي رسالة لاخي محمدين انو انا بستغل شخصه الكريم لمارب رخيصة....
معزتي واحترامي لك وللاخ محمدين والاخ ابواحمد.

اخي د. المشرف

شكرا لك مره آخرى

مشكلتي مع الدارفورين ويبدو السودانين عامه

انكم بتحاول تجاملوا على حساب حاجات كثيره

وانا بختلف وبقول للاعور اعور في عينوا

حتى لو ادى هذا لان اصير عوراء انا نفسي.

Quote: ذي كلامك ده يااختي تراجي بسموه الوسواس الخناس .......وفي رواية اخري بسموه انك عاوزة توصلي رسالة لاخي محمدين انو انا بستغل شخصه الكريم لمارب رخيصة.... معزتي واحترامي لك وللاخ محمدين والاخ ابواحمد.

اولا :

الوسواس الخناس اتعوذ بالله منه.

ثانيا مآرب رخيصه او غاليه ما مهم

المهم انه انا لا اتهم احد بقلة الفهم

لا انت ولا محمدين

وكل واحد عقله في رأسه بيعرف خلاصه.

ولك التقدير على اهتمامك بتوضيح الصوره.

وشكرا لك للدعوات الحلوه للصغاري.

وكل عام وانت غرقان في الحب.

اليوم الفالنتين خليك من السياسه.

لك الود تراجي.

Quote: اليوم طالعت ألفاظا لا تليق بشخصي من خلال بوست للاخت تراجي حول لقاء في كندا, ولمست فيه إساءة شخصية لي ولكل المحترمين في هذا البيت الكبير,

الأخ الفاضل خالد...

الما بعرفك بجهلك .


تحياتنا للأسرة الكريمة .

منو الماشي دا؟

ابو خالد؟!
افو افو افو افو...


عيب عليك والله عشان شيوتين كلام كدا تفك البيرق...

تقعد في قلب المابيك
البيشتمك تفتح ليه بوست تبهدلو
والبريدك تريدو

يا جماعة منو يعمل لينا اغنية

يا خواتي الجري دا مو حقي ... المدفع السكلي

ابشر يا ود عمي ساكت..
وكان مشيت والله الزول الشتمك دا حيكون ضاحك الى الاباط..
هل تريد ذلك؟

معقولة دى ؟!!

الزول الجميل اللاقيتو فى البحرين داك يمشى يخلى المنبر ؟!!

يازول قول كلام غير ده بالله!!

اسمع :

اولادك الحلوين ديلك كيف بالله يارب يكونوا وامهم بخير



تعال وحقك على ..

Quote: ليس كل دارفوري ضحيه بل بعضهم قتله وليس كل شمالي قاتل بل بعضهم ضحيه. يتأكد لي كل يوم ان ما يحدث في دارفور ثلاثه ارباعه سببه ناس دارفور انفسهم بالجهل بالقبليه بالتنازع على السلطه بضيق الافق بعدم القرأه الصحيحه للصراع ...الخ الخلاصه مزيد من التشرزم مزيد من الضياع مزيد من تشتت الجهود. ولهم الله اهل دارفور الغلابه.

للتوثيق فقط !!!

khalid abuahmed
الصححفى لا يلقى بسلاحه ويبقى مقاتلا ما بقى حيا
أنت صاحب قضية إستمر مقاتلا من أجلها
وثق كما قيل فى المأثور من يبصق فى إتجاه السماء سرعان ما يتطاير الرذاذ على وجهه
تحياتى لك
جنى

الرجاء من الأخ خالد إعادة النظر في قراره أعلاه.

و له كل الود و التحية..

Nasr

ممكـن يا أسـتاذ خـالـد ماتستسلم?
وكمان تضـحـك ?

كـل عيـد والحـب هـو الأصـلح ..

مـني عـوض خـوجـلي

الاخوة الأعزاء الافاضل الأماجد
أسامة خلف الله – محمدين – بقال- تراجي – أمنة مختار- بيان – نادية مختار- محمد علي بشير - جني – كوستاوي – منى مختار-
جميعا أحبتي لكم فائق الشكر والتقدير على الموقف الانساني النبيل من الانسحاب من هذا المنبر الكبير والعظيم, وقد احتفيت بحديثكم العذب وكلامتكم (الرطية) ..
وها أنا أعود والعود أحمد ..
فقط أرجو ..ارجو .. أن نستظل بالكلمة المهذبة التي تحترم ذاتنا كبشر ,, نعم نحن بشر لا نرضى بالاستفزاز والاساءة إن وجدت لكن الكلمة الطيبة جواز سفر الى قلوب الناس..
نختلف نعم .. من الطبيعي ان نختلف..
نتفق .. نعم لا ضير لكن اذا كنا نطمع في حل مشاكلنا ,, هل تنفع الاساءة والتجريح...؟؟

أكرر شكري لكم جميعا
خالد

الاخ خالد ابو احمد

تحياتي

وحمد لله على تراجعك من قرارك.

الاخبار الحلوه انو انا ومحمد آدم تصالحنا.

والشكر لكل الوجوه الخيره التي رفضت اختلافنا بذلك الشكل المرفورض.

ولانك محضر خير احببت ان ابلغك بنفسي,

شكرا لكل الخيرين.

تحياتي لنجلاء و الاولاد.

تراجي.

ألأخ العزيز خالد

وكانك إستمعت لود اللمين وهو يترنم " لآزم إنت...إنت تجبر بالخواطر"

قالوا إن الناس مقامات ، فمنهم من يتكلم عن الناس ويوالى ذلك جل إهتمامه، ومن يتحدث عن أفكارهم وذلك أرقاهم.

لا يضيرك تدنى من إختار الشتيمه والتجريح كأسلوب حوار.....فهو وحده الذى يكتوى بأثارها النفسيه.

واعتبر هذا بوست ترحيب بك للمرة الثانية. ولك كل التقدير لاحساسك المرهف وجبر الخواطر. أخوك أسامه خلف