Post: #1
Title: أيوة خايف والله حاير!!!
Author: زهير عثمان حمد
Date: 12-19-2011, 10:46 PM
#
أيوة خايف بالجد خايف
بس والله خايف أيوة خايف
من زمن يفرق ولينا يعذب
ومن هجمةعواصف وحسرة تتوسد قلوبنا
من حظوظ في الدنيا قاسية
وأنا بحظي عارف
أيوة خايف
وكمان قلبي عليكي خايف
بكرة يتعود عليكي
وتقسي أقدرو ويخالف
وأنت يافرحي الممانع وأنا في أنتظارو
والله البيننا واقف
أيوة خايف
وبرضو أسف أني ما قادرأجازف
وأفتح القلب البريدك
ووأقوليك عاشق
وأنت عارفه
أيوة خايف
من طبع غريب بالالفة عامر
يسوقك لدروب الندامة
وهو غافل
أيوة خايف كسرة قليب
تأزمني عمرا طويل
ومنك أيوة خايف
والله حاير
وجد خايف
زهير
|
Post: #2
Title: Re: أيوة خايف والله حاير!!!
Author: عبدالله ابوشوارب
Date: 12-19-2011, 11:04 PM
Parent: #1
الاخ زهير
تحياتي
ايـــوة كدة ياخ ما تحرمنا من الابداع دا
|
Post: #3
Title: Re: أيوة خايف والله حاير!!!
Author: قيقراوي
Date: 12-20-2011, 09:05 AM
Parent: #2
جميل يا جميل
|
Post: #4
Title: Re: أيوة خايف والله حاير!!!
Author: Salah Abdulla
Date: 12-20-2011, 09:55 AM
Parent: #3
أبو الزهور ،، سلامات ياخي..
القصة شنو يا خوي ، مرة صحبانك قاموا بالجدادة ، ومرة الحمام طار منك ، ومرة شاعر!!!
المهم، أنا ( سمكرت ) ليك قصيدتك الفوق دي
من دربك ده تشيلها وتوديها لإسماعيل حسب الدايم ، وتقول له صلاح بيسلم عليك وقال ليك ألعب لينا الغنية دي ياخ..
وبعدين ( ففتي ففتي ) أوع تنوم بالحقوق المادية كلها براك ، ناس المصنفات حايمين..
أيوة خايف....
والله خايف....
من زمن (يفرقني منك ، ولقلوبنا يشيل) و يعذب
ومن (موجة) عواصف وحسرة تتوسد قلوبنا
من حظوظ في الدنيا قاسية
وأنا (عارفو حظي عاثر)
أيوة خايف....
(وقلبي ، برضو عليكي خايف)
(خايفو) يتعود عليكي
وتقسي أقدارو وتخالف
وأنت يافرحي الممانع
(سنيني) عدت في أنتظارو
.....
أيوة خايف...
وبرضو أسف أني ما قادر (أخاطر)
وأفتح القلب البريدك
(أو أقول لك إني) عاشق
وأنت عارفه
أيوة خايف.....
من طبعـ(ـاً) غريب، بالالفة عامر
يسوقنا لدروب الندامة
وهو غافل
أيوة خايف....
(من كسرة قليبي الليكي حب)..
(ويبقى مجروح باقي عمرو)
ومنك إنتي .... أيوة خايف
والله حاير....
وبرضي خايف
بعدين ياخ في زول في الدنيا بقول للجكس بتاعو خايف (أجازف) كمساري إنت.
|
Post: #5
Title: Re: أيوة خايف والله حاير!!!
Author: saadeldin abdelrahman
Date: 12-20-2011, 11:11 AM
Parent: #4
هي لغة العامة و فصيحة ايضا استاذنا صلاح،
مبسوطين من شوفتك والله
انطباعي كان زييك كدا لكن اظن اهتمام ابوالزوز كان بالقافية حينها
فجاء بالمجازفة عنوة و اقتدارا ( فنزلت كبس)..
تسلموا انت و هو على الاجتراح و السمكرة
|
Post: #7
Title: Re: أيوة خايف والله حاير!!!
Author: Salah Abdulla
Date: 12-20-2011, 11:49 AM
Parent: #5
أخونا سعد الدين عبدالرحمن ، كيفك يا حبيب
حبيبنا أبو الزوز ده مهتم بالقافية، ونحن مهتمين بيهو فييييي رقبتو دي
عشان كده (جازفنا) معهو النجر ده
تصدق الزول ده عندو أفكار كويسة ، ممكن يلعبها هنا ، والشباب يقوموا بواجب السمكرة وكده.
قلت لي نزلها ( كبس ) ،، والله مبالغة.
|
Post: #6
Title: Re: أيوة خايف والله حاير!!!
Author: سفيان بشير نابرى
Date: 12-20-2011, 11:20 AM
Parent: #4
صلاح عبدالله و الله انت معلم جد
تصدق أنا فكرته اعمل عمليتك
دي و حسيت انو حاجة دى فيها
لحن غنائي .
بس كمان يا خوي لو أنت عايز
مع زهير دا (ففتي ففتي) اوعه
توجهو لاسماعيل حسب الدائم
أنت يا صلاح ياخوي اغتربته من
زمن إسماعيل كان نجم ولا شنو ؟
بالمناسبة يا صلاح :- فضل
أيوب يغريك السلام و طوووالي
بيسأل منك و الله و حافظ جميلك .
|
Post: #8
Title: Re: أيوة خايف والله حاير!!!
Author: Salah Abdulla
Date: 12-20-2011, 12:57 PM
Parent: #6
حبيبنا سفيان ، أخبارك وعلومك
تصدق أنا وجهتو لـ(إسماعيل حسب التايم) هظار ساااااي
ده شعر (أخوان أخوان) مكانو هنا بس ..
لكن بيني وبينك، في قصيدة حايمة اليومين دي بتاعت أخونا آدم ، مسكتها سمكرتها ليك لمن كيفتني
لكن خفت على (العدة) يقوموا يفهمونا غلط ونبقى في حااااا ، وتُر .
وبعدين ياخ أيوب (الكسلان) ده قصتو شنو خالي النص فاضي كده
لناس قريعتي راحت ، مستعرضين فينا بضاعتهم البايرة دي؟
قول له ظبط اللياقة وتعالي شوت الفارات العاملين لينا وجع صفحة ديل.
سلام ليكم الاتنين.
|
Post: #9
Title: Re: أيوة خايف والله حاير!!!
Author: سفيان بشير نابرى
Date: 12-20-2011, 01:29 PM
Parent: #8
و الله انا تمام صلاح اخوى
| Quote: ده شعر (أخوان أخوان) مكانو هنا بس |
غريبة و بالجد أنا جانى احساس انو الحاجة دى ممكن تتصلح
و تتلحن و تتغنى كمان و انت زبطتها صح الصح .
بالمناسبة ليه ما تفتح لينا بوست بتاع سمكرة ياخ ؟
و الله كلنا سمكرجية نعجب الما بتعجبو حاجة .
Quote: لكن بيني وبينك، في قصيدة حايمة اليومين دي بتاعت أخونا آدم ، مسكتها سمكرتها ليك لمن كيفتني
لكن خفت على (العدة) يقوموا يفهمونا غلط ونبقى في حااااا ، وتُر .
|
يا صلاح استهدى بالله و متعنا بالنص بتاع آدم و بسمكرتك ليهو
و خلى و احد يجي يقول حااااا تررررر عشان نفهمو حاجة
بالله في زول يقدر يقول لينا حاجة !!؟
بخصوص فضل و الله كسل شديد بس الأيام دى شادي حيلو كويس
و السنة الجديدة حتشهد تقدم كبير .
|
Post: #10
Title: Re: أيوة خايف والله حاير!!!
Author: قيقراوي
Date: 12-20-2011, 04:03 PM
Parent: #9
Quote:
غريبة و بالجد أنا جانى احساس انو الحاجة دى ممكن تتصلح
و تتلحن و تتغنى كمان و انت زبطتها صح الصح .
|
انا برضو..
و بما اني ما صنايعي في الشغلة ..
اكتفيت بي "جميل يا جميل"
-------
كان ما لقيتو زول يغنيها .. قولوا عوووووك
(بنجازفا) ليكم .. المافي شنو!؟
|
Post: #11
Title: Re: أيوة خايف والله حاير!!!
Author: زهير عثمان حمد
Date: 12-20-2011, 09:48 PM
Parent: #10
الاخوة الكرام عبدالله وصلاح وسعد وسفيان وقيقراوي
تحياتي
شكرا علي المرور والاهتمام وكمان جزيل شكري صلاح علي التعديل الرائع علي النص متعك ربي بالعافية
لو حصلتو فنان يغنيها ما في مشكلة لكين نحن ماشين بعيد ليه ما عند أثنين بورداب معنا عاصم البناوياسر تمتام وتلاتم ناذر خليفه
دمتم لي أخوة وأصدقاء و لكم خالص ودي
|
Post: #12
Title: Re: أيوة خايف والله حاير!!!
Author: ناذر محمد الخليفة
Date: 12-21-2011, 08:47 AM
Parent: #11
!!!!
Quote: ما عند أثنين بورداب معنا عاصم البناوياسر تمتام وتلاتم ناذر خليفه
|
أهم خمسة حاجات في الجيش تلاتة : الضبط والربط ..!!
|
Post: #13
Title: Re: أيوة خايف والله حاير!!!
Author: زهير عثمان حمد
Date: 12-21-2011, 12:47 PM
Parent: #12
ناذر
تحياتي
دي تعليمات أعمل لحن للنص دا اللي المعدل المعدل ياناذر من قبل الاستاذ صلاح عبدالله
كمان عامل فيها منضبط يعني جنس حركات !!!
|
Post: #14
Title: Re: أيوة خايف والله حاير!!!
Author: Salah Abdulla
Date: 12-21-2011, 01:05 PM
Parent: #13
ناذر الفنان ،
بالله امنع الهرجلة ، واتعامل لينا مع الموضوع ده بجدية..
دي ح تكون غنية (سودانيزأونلاين)
التأليف : الشاعر العاشق زهير عثمان حمد
اللحن والأداء : الفنان ناذر محمد الخليفة.
المستمعين: يانا نحن ناس البيت ده.
حذفنا بعض الكلمات المعصلجة ، عشان تلحينك يكون ساهل ، وعقيرتك تنطلق، وكان عايز تحذف/ تضيف/ تغير/ تبدل ، قو اهيد ، مافي مشكلة.
أمسك عندك الكلام التحت ده وطقطقو:
أيوة خايف....
والله خايف....
من زمن يفرقني منك ، ولقلوبنا يشيل يعذب
ومن أعاصير العواصف،، وحسرة تتوسد قلوبنا
من حظوظ في الدنيا قاسية
وأنا عارفو حظي عاثر
أيوة خايف....
وقلبي ، برضو عليكي خايف
خايفو يتعود عليكي
وتقسي أقدارو وتخالف
وأنت يافرحي الممانع
سنيني عدت في أنتظارو
.....
أيوة خايف...
إني ما قادر أخاطر
وأفتح القلب البريدك
أو أقول لك إني عاشق
وأنت عارفه
أيوة خايف.....
من حسرة قليبي الليكي حب..
يبقى مجروح باقي عمرو
ومنك إنتي .... أيوة خايف
والله حاير....
وبرضي خايف
|
Post: #15
Title: Re: أيوة خايف والله حاير!!!
Author: سفيان بشير نابرى
Date: 12-21-2011, 03:31 PM
Parent: #14
يا صلاح اهو الورشه بقت على الهواء و اتدخلته
في تعديلك التحتو خط في نظري نبدلو في البين
قوسين و إي حرف تحتو خط يتشال.
ياناذر الموضوع دا ما تستهونو ياخ .
Quote: أيوة خايف....
والله خايف....
من زمن يفرقني منك
ولقلوبنا يشيل يعذب
ومن أعاصير العواصف
وحسرة تتوسد قلوبنا
من حظوظ في الدنيا قاسية (دنيا خاينة)
وأنا عارفو حظي عاثر(أنا عارف حظي عاثر)
أيوة خايف....
وقلبي ، برضو عليكي خايف
خايفو يتعود عليكي
وتقسي أقدارو وتخالف
وأنت يافرحي الممانع
سنيني عدت في انتظارو(سنيني عدت و حظي و اقف)
.....
أيوة خايف...
إني ما قادر أخاطر
وأفتح القلب البريدك
أو أقول لك إني عاشق
وأنت عارفه(عارف)
أيوة خايف.....
من حسرة قليبي الليكي حب..
يبقى مجروح باقي عمرو
ومنك إنتي (أنت)أيوة خايف
والله حاير....
وبرضي خايف |
|
Post: #16
Title: Re: أيوة خايف والله حاير!!!
Author: معاوية عبيد الصائم
Date: 12-21-2011, 03:54 PM
Parent: #15
Quote: القصة شنو يا خوي ، مرة صحبانك قاموا بالجدادة ، ومرة الحمام طار منك ، ومرة شاعر!!!
|
صلاح هوووووووى عندك طريقة ترسل (حلة) ابوطبلة وللا ما عندك
شان ارسل عنوان زهير ...ياخ الزول ده الشباب كل ما يوم ضاربين حلتو
وياريت (بربندى) لزوم ربط الحلة ...ولو رسلت (كمنجة)كمان تكون ما قصرت
تب .....
لك وله تحياتى
|
Post: #18
Title: Re: أيوة خايف والله حاير!!!
Author: Salah Abdulla
Date: 12-21-2011, 04:44 PM
Parent: #16
Quote: صلاح هوووووووى عندك طريقة ترسل (حلة) ابوطبلة وللا ما عندك
|
يا معاوية كيفك ياخ.
أفو يا معاوية زهير ده ما بيرسلوا له، ده بيشيلوها له عديل ياخ.
تصدق وتؤمن يا مواطن ، قبل يومين شفت عامل هندي شايل ليهو حلة المونيوم بي طبلتها
أها اللحظة ديك قررت إني أشيل لي واحدة لزهير صاحبي ده..
حارة ياخ يقوموا بالجدادة، خاصة الواطـ ـة ليل والراس مصلح وما في محل فاتح
غايتو اليوم داك صاحبي ده بيكون كابس المطبخ وهرس ليك أي عيشة ناشفة فيهو..
ياخ معقولة كم راجل عشاهم يكون جدادة واحدة بس ومحمرة كمان
دي بيفرش بيها قدورة قريبي ( قدوة عزابي من النوع الكان بيعلق أكياس العشاء والكيس الأبيض في حبل الغسيل).
|
Post: #21
Title: Re: أيوة خايف والله حاير!!!
Author: زهير عثمان حمد
Date: 12-22-2011, 09:28 AM
Parent: #16
أخي معاوية
تحياتي
أنا عندي تلاته حلل واحدة فهيو نحاس ممكن تطبخ أربعه كيلو مرو واحدة (أنا عايزة زوجة عديل )بس أنتو ما فيكم خير بورداب و لا وردابيات
ما عايزين أبو الزهراء أستقر
المهم يا صلاح بالله كدا أهم حاجة لم ترجع تزورني وأحتفال بيك بواحد من نجوم الغدالمهم لازم من الزيارة ياصديقي
شكرا معاوية علي المرور لكين أعرف ضرورات أبوالزهراء بالله
|
Post: #17
Title: Re: أيوة خايف والله حاير!!!
Author: Salah Abdulla
Date: 12-21-2011, 04:31 PM
Parent: #15
سلام يا سفيان
أبوالزهور في القصيدة دي بيخاطب الجكس بتاعو بصيغة الأنثى عديييل كده
وبعدين ياخ قصايدنا كلها للجكس ، لكن نخاطبها بصيغة المذكر وندسدس في الكلام
صاحبي ده جاكم بالباب عديل كده، قصيدة جكسية مؤنثة مباشرة لا مواربة فيها..
مبسوط منو والله.
|
Post: #19
Title: Re: أيوة خايف والله حاير!!!
Author: Ashraf El Bagir
Date: 12-22-2011, 06:06 AM
Parent: #17
يا ابو الزهور اسمع نصائح صلأح عبدالله ده كويس
بالمناسبة صلأح يمتلك صوت جميل وخاصة عندما يغني للراحل الخالدي ..
|
Post: #20
Title: Re: أيوة خايف والله حاير!!!
Author: زهير عثمان حمد
Date: 12-22-2011, 08:36 AM
Parent: #19
أشرف
أزيك طيب نحن منتظرين ملحن ممتاز وبالله ساعدونا في أيجاد ملحن كان في الداخل ولا مغترب المنبر فيهو لكين بس ألله غالب
لك كل التحياوشكرا علي المرور
|
Post: #22
Title: Re: أيوة خايف والله حاير!!!
Author: زهير عثمان حمد
Date: 12-23-2011, 10:56 AM
Parent: #20
يا جماعة وين الملحن ولا اللحن ؟ !!!!
|
|