ما حا يقدروا يعملوا لي محمد حسن عالم حاجة

مضحك جدا ما يردده منسوبي الوطني بسودانيزاولاين بعد مشاهدة فيديو قصف نافع علي نافع بجامعة الخرطوم في عقر داره بالندوة التي اقامها الطلاب الاسلاميون بجامعة الخرطوم. المضحك ترديدهم لترهات حول شجاعة نافع و سعة صدرة للنقد في اشارة غير ذكية لديمقراطية منابر المؤتمر الوطني في تقبلها للنقد لكن المضحك اكتر محاولة البعض الاخر تصوير ما حدث علي انه خدعة من المؤتمر الوطني لإيهام عوام السودانيين بديمقراطيته و تقبله للاخر في اشارة اخري غير ذكية لوسم الباسل محمد عالم بتهمة الاصطياد في بحيرة المعارضة لصالح المؤتمر الوطني .

دعونا نقرأ الامر في سياقو يا سادة, الندوة كانت في جامعة الخرطوم و الجامعات والمعاهد العليا السودانية تتميز عن غيرها من المنابر بثقافة اركان النقاش حيث يتصارع الرأئ و الرأئ الاخر في مواجهة عامة تحسب نتائجها لصالح ترجيح كفة رأي علي اخر و فورا. محمد عالم معروف بنشاطو المعارض و معرف انو طلع من المعتقل قبل شهور من حادثة قصف نافع . إذن طبيعي انو تتاح ليهو (او لغيرو من التنظيمات المعارضة) الفرصة للنقاش إعتمادا علي ثقل نافع و ثعلبيتو بالاضافة لذخيرتو العالية جدا من الشتم و السباب, و حتي يحقق الركن - الندوة - شروطها كاملة بالرأئ و الرأئ الاخر و يخرج الاسلاميين بجامعة الخرطوم بركن سياسي ناجح.

القراءة الرشيدة بتقول انو نافع اتي للندوة و في ذهنه ما حدث لغندور في بيت الامة الاسبوع المنصرم و من الطبيعي انو اعد للمتوقع من الحجارة و زجاجات المياة الفارغة عدته بجيش من الامنجية يحذر الطلاب منه بعضه البعض. المباغته كانت في قصف محمد عالم العلني له في سابقة شبيهة بحادثة المنصة ( إغتيال السادات) , لم يكتفي محمد عالم بالهجوم فقط لكنو اكد خلال حديثو ( وسلاح ما بنرفعو لكننا حا نسقطك في الشارع السوداني).


حديث محمد عالم كان فعلا في سياقو, تحدث عن الغلاء الطاحن - نظام القبول للجامعات - مستقبل الخريج - مقتل الطالب محمد عبدالسلام - التجاوزات المتعلقة باولاد نافع ( محمد - عبادة) في دخولهم لجامعة الخرطوم إبتدأ من مستواهم الاكاديمي وصولا لتخرجهم و ما ينتظرهم من مستقبل باهر بفضل ابوهم في مقارنة واضحة بين ابناء متنفذي المؤتمر الوطني و ابناء عامة الشعب.

اذن اي حديث عن انو محمد عالم بنفذ في سيناريو لصالح المؤتمر الوطني حديث ساذج و اي حديث عن سعة صدر المؤتمر الوطني و منابر الاسلاميين بجامعة الخرطوم, حديث لا تسنده الوقائع الشاهدناها في الفيديو.

نقطة اخيرة فيما يخص ما سيحدث لمحمد العالم علي ايدي امنجية نافع علي نافع بعد حديثه الشجاع الاطرب كل من شاهد الفيديو من السودانيين بإستثناء منسوبي الوطني , في تقديري لن يحدث له شي , فمن الغباء ان تعتقل اشهر من واجه نافع علي نافع و رد عليه بلغته نفسها و في محفل طلابي عام, من الغباء اعتقال محمد عالم الان فمن ناحية اعتقاله سيثير زوابع لا قبل للمؤتمر الوطني بها في الوقت الحرج الحالي إذن من الاسلم للوطني انو يكسب سمعة جيدة بقبوله للرأئ الاخر, كذلك اتوقع ان تتجاهل الامر صحف المؤتمر الوطني و فعالياتو و تصريح قياداتو بعكس ما حدث مع حادثة بيت الامة. فغندور تم تضخيم ما حدث له للنيل من حزب الامة. و هجوم محمد عالم من الاسلم و الاذكي إستغلالو لصالح ديمقراطية الانقاذ.

دكتور نافع ده مكتبو ما كان بدى للاسلاميين عشان يجتمعو فيهو .. خوااااف .. وبعد ما جا السلطه .. الكلام بقى تلحسوا كوعكم وما عارف شنو .. وكلمات كتيره جدا جدا جدا .. ده تأريخ .. وهذا زمانك يا مهازل فامرحى .. محمد حسن عالم , حزب البعث العربي الاشتراكي خريج جامعة النيلين كلية الهندسة .. اول حاجة في مجموعة من الحاجات الاتكلم عنها دكتور نافع و المقامات محفوظة ,, الدرجة العلمية دي لو كانت اخدها في زمن الانقاذ ما كان قلناهو ليهو ذاتو لانو في زمن النقاذ ياما اخد الناس درجات عليمة في الوضو و ما عارف شنو , انحنا الشعب السوزداني ليهو فضل انو انت قريت علي حساب الشعب السوداني و اكلت علي حساب الشعب السوداني في الداخليات و اخدت درجة الدكتورارة من جامعة الخرطوم علي حساب الشعب السوداني الانت حرمتو ابسط حقو و التحية للشهيد محمد عبدالسلام الـ عشان المرتبة جريتوهو من داخلية النصر و الزول الكتلو اسه معتمد في الدولة الاسمها السودان بتقيموهو و بترقوهو , اللي جر محمد عبدالسلام من الطابق الرابع بي راسو لحدي الواطة و كتلتوهو و بتتكلموا عن الاخلاق و الاسلام ؟ والله الاسلام برئ منكم براءة الذئب من دم ابن يعقوب . ما عندي اي علاقة بيهو (محمد عبدالسلام) لكن بنقول إذا الشعب يوما اراد الحياة فلابد ان يستجيب القدر.
البنعمل فيهو انحنا ده كلو في تقديري كلام فارغ, مسألة انو نخش ليك و نناقشك و نثبت ليك انو انت كعب , و المصحف الشريف انت مقتنع بي جوه نفسك انك اسواء من وطئت قدماهو الثري .. اسواء من وطئت قدماهو الثري ( تصفيق ) و اكتر انسان ضيع الحقوق في البلد دي لكن الكلام ما مفيد .. النهاية و الفيصل بيننا و بينك الشارع السوداني ده. وسلاح ما بنرفعو ...........واذا انت لهتك السلطة والعمارات الشاهقة ا الشارهة تقريبا ...في بري عن انك تقرأ التاريخ جيدا ....انا كنت اتمنى ان انو نافع على نافع البتكلم لينا هنا عن الاجندة الخارجية انت ما قاعد مع الناس في همشكوريب وفي دنقو المحس الناس بتعاني زيتا طالع الناس ما لاقية اتكلم لينا عن لقمة العيش الليلة الكليو بتاع السكر بي 53 جنيه في بلد فيها 200 مليون فدان صالحة للزراعة اتكلم لينا عن العيشة البقت عاملة زي الاضان وبي 300 جنيه نحن جعانين تجي انت تقيف لينا هنا وتقول شنو وبتاع يا شيخنا الشعب الجعان دا هو الحا يسقطك ... انت الليلة ما عايش اي معاناة انت اولادك الاثنين اللي قرو جامعة الخرطوم لي الليلة قرو قبول خاص ... ما بتخجل ......
ما بتخجل اولادك بقرو قبول خاص والشعب السوداني 90 في المئة منو ما لاقين اقرو وانت اولادك بقرو قبول خاص من قروش الشعب السوداني وين الاخلاق ولدك محمد نافع اتخرج من الجامعة وراكب عربية بي 200 مليون انا هسي مهندس كهرباء خريج جامعة النيلين عاطل ما لاقي شغل ومؤهل اكتر من ولدك ولد مربت تلاتة سنين في كلية الهندسة هنا وبعد دا كلو حا يتخرج ويتعين ولدك عملو ليهو منظمة خاصة عشانو محمد نافع وانا من اكفأ خرجيجين الهندسة قاعد عاطل .... انتهي

100%

كنت قد كتبت في بوست سابق التالي

Quote: منذ الان فصاعدا استعدوا يا قيادة الوطني فكما حشدتم عسسكم و زبانية امنكم لترهيبهم و تدجينهم سابقا في الاحياء و الجامعات ، استعدوا لردهم عليكم في كل ندواتكم و فعالياتكم الشعبية لتجييش الشعب السوداني خلف سياساتكم و احلامكم لانفسكم ، فقد شب هؤلاء الشباب عن طوق احزابهم وقياداتهم التاريخية ، كفروا بهم و بكم و هم الان يسعون حثيثا لاسقاطكم . سيستعينون عليكم بالزجاجات الفارغة و الطوب الاحمر و الدراب و الطين و كل ما ستطاله اياديهم البيضاء، سيطردونكم من كل المنتديات و الفعاليات الجماهيرية ولن تجدوا ملاذ لكم الا خلف الشاشات البلورية و احسبها خير عاصم لكم من غضبتهم.

و ها هي الاحداث تؤكد عبقرية شباب السودان و مهارتهم في استخدام الاسلحة لمنازلة المؤتمر الوطني





___
الكوت من بوست البدق حمادة، انا ادقو دقة ، انا اقطع لحمو ، حتة حتة

نتمنى يا خدر انو يسلم . وياريت ما يعملوا ليه حاجة وربنا يسلموا لي امو الولدته ..

Quote: ما حا يقدروا يعملوا لي محمد حسن عالم حاجة

هم لو عاوزين يعملوا حاجة ح يعملوها ؛
بس ما ح يعملوا ليهو حاجة ؛
بس ما للاسباب الذكرتها فوووق.

________

تحياتي ياطارق.

سلمات يا فنان يا رائع..
تحليلك للحدث في محلو ..

Quote: سلاح ما بنرفعو لكننا حا نسقطك في الشارع السوداني

دي عبارة من شدة نفاذها وقوتها أثرها يتعدى المخاطب بها ..
لإنو أي دكتاتور يعلم أن ظهره محمي ويتوسد السلاح..
الشارع وحده الذي يرعبه ويسيح ركبه..
هذا الشاب الشجاع بالتأكيد أعاد الثقة للشباب بهذه المواجهة المنطقية القوية..

..
قلت لي كانو عاملين حسابم من الطقيع بالشباشب ..
طلع ليهم قعو (ضفدع) ضكر اتناول زولم بلسانو!
يمكرون ويمكر الله.
..

غايتو الآيباد جاب تمنو..
مودتي.

التطور شمل كل تقنيات الأشياء
إلكترونية أو شغل عنقالة ساي
صار كل شي ذكياً يا خدر !! .
هذا صوت عالي وصادق النبرة
لا مجال لحبس صوته حالياً بالطرق التقليدية
تحت الحزام بس
وهو أكثر إيلاماً
وأثبت نجاحه " من حولنا " !!

قلت لي كانو عاملين حسابم من الطقيع بالشباشب ..
طلع ليهم قعو (ضفدع) ضكر اتناول زولم بلسانو!
يمكرون ويمكر الله.

----------------------------------------------------

يمين دي قلبت فيها هوبة .... يا دوب استوعبت معني كلمة كنكوج لانه أصابني فى كونكوجي هههههههههههههههههههه

Quote: غايتو الآيباد جاب تمنو..

هههههههههههههههه

Quote: اذن اي حديث عن انو محمد عالم بنفذ في سيناريو لصالح المؤتمر الوطني حديث ساذج

يامولانا ما يمكن من اعد اتلطبخة دي من ناس المؤتمر الوطني يفوق في سذاجته ناس المكتب الاعلامي للإتحادي الاعدوا السي في لود مولانا

عزيزى خدر

شاب فارس واثق من نفسه,ومن قدرات شعبه

Quote: سلاح ما بنرفعو لكننا حا نسقطك في الشارع السوداني

عباره بليغه تدل على استيعابه لتاريخ النضال الجماهيري,وثقته فى استنهاض

القوى الحيه فى مجتمعنا السودانى.

هل هو ابن حسن العالم القيادى البعثى السودانى فى عراق السبعينات?
مع ودى

Quote: Quote: يامولانا ما يمكن من اعد اتلطبخة دي من ناس المؤتمر الوطني يفوق في سذاجته ناس المكتب الاعلامي للإتحادي الاعدوا السي في لود مولانا

سلامات يا باشمهندس
طبخة زي دي ما بتمرق بدون ما يخت ليها نافع شخصيا البهار و نافع ما غبي . و حتي لو افترضنا انو غبي ، مستحيل يكون بالغباء البخليهو يهدر مستقبل اولادو الاتنين و يلطخ سمعتهم باتهامات زي القالها محمد عالم. او يثب علي روحو تهمة الجبن في اقامة اجتماعات الاسلاميين في بيتو او مكتبو او ... الخ من سلسلة الاتهامات الغليظة لمحمد عالم .

الحاجة التانية المهمة ، السيرة الذاتية لجعفر الصادق و بعيدا عن المكايدات الحزبية الرخيصة من المستحيل انو يكون صاغها المكتب الاعلامي للاتحادي الديمقراطي . مستحيل انا طارق ده اصدق انو حزب الحركة الوطنية و مؤتمر الخريجين يجلس علي قمة مكتبو الاعلامي كوادر قليلي الخبرة كما هو واضح في السي في المنشورة في الانترنت . في تقديري انو السي في دي صاغها اتحادي متحمس او احد مريدي الختمية قليلي الخبرة و اللي من حيث لا يدري تسبب في اذي للمكتب الاعلامي للاتحادي الاصل.

Quote: التجاوزات المتعلقة باولاد نافع ( محمد - عبادة) في دخولهم لجامعة الخرطوم إبتدأ من مستواهم الاكاديمي وصولا لتخرجهم

بافتراض صدق المعلومات التي أوردها المتحدث:
1- أين التجاوز في دخولهم للجامعة؟!
2- أين التجاوز في مستواهم الأكاديمي؟!
3- أين التجاوز في تخرجهم؟!

مولانا خدر سلام مايزعج الانقاذ هو الشخص الذي لا يحمل السلاح، لان من الصعب جهجهة بكااااته مثل المهندس الذي اتمني ان لا تكون خطبته المقتضبة خطبة الوداع، بصراحة قال كلام شخصيا لم اكن اتوقعه قط وليس بالضرورة ان يردون له الصاع الان ممكن بعد شهر او سنة وبطرق غير تقليدية مثل ان تصطدمه سيارة عابرة او ينط عليه حرامي في البيت وياذيه، تلبيس جناية او تهمة، اطلاق اشاعه بانه مختل عقليا وقفز من البنطون الخ. لكن اي الشاب تحدث وكان يحمل مشروع البوعزيزية. big thanx mate

Quote: Quote: التجاوزات المتعلقة باولاد نافع ( محمد - عبادة) في دخولهم لجامعة الخرطوم إبتدأ من مستواهم الاكاديمي وصولا لتخرجهم بافتراض صدق المعلومات التي أوردها المتحدث: 1- أين التجاوز في دخولهم للجامعة؟! 2- أين التجاوز في مستواهم الأكاديمي؟! 3- أين التجاوز في تخرجهم؟!

كلية الهندسة جامعة الخرطوم لا تسمح بالتربية ثلاثة سنوات يا ملاسي
انهارت سمعة جامعة الخرطوم بسبب القبول الخاص يا ملاسي
التجاوز فى التربين هو تجاوز فى التخرج
استغرب جداً الدفاع عن نافع
اذا صدق الترابي فى كلمة فقد صدق فى وصفه للنافع بقوله " ان قلبه ابذاً من لسانه"
لا يستحق ان يوصف بانه من فصيلة البشر
لم ارى فى حياتي سودانيا يفوقه فى سوء الادب وانعدام المروءة واللؤم وهى كلها تنم عن مدى جبنه فالشجعان الواثقون من انفسهم لا يتفوهون بساقط القول وبدئ الكلام امام الرجال
جني

Quote: انهارت سمعة جامعة الخرطوم بسبب القبول الخاص يا ملاسي

القبول الخاص ليس حكراً على جامعة الخرطوم و لا على أولاد نافع.

Quote: كلية الهندسة جامعة الخرطوم لا تسمح بالتربية ثلاثة سنوات يا ملاسي

لو كان ربت تلاتة مرات يبقى بتسمح.
التربيت تلاتة مرات – إن صدق الإدعاء – يحسب
للجامعة التي أصرت على ذلك رغم إنو الولد ولد نافع.

______
ثم ثانياً .. كم سنة قضاها الخاتم عدلان
في جامعة الخرطوم تلك التي لا تسمح؟!!

Quote: اذا صدق الترابي فى كلمة فقد صدق فى وصفه للنافع بقوله " ان قلبه ابذاً من لسانه" لا يستحق ان يوصف بانه من فصيلة البشر لم ارى فى حياتي سودانيا يفوقه فى سوء الادب وانعدام المروءة واللؤم وهى كلها تنم عن مدى جبنه فالشجعان الواثقون من انفسهم لا يتفوهون بساقط القول وبدئ الكلام امام الرجال

Quote: ما حا يقدروا يعملوا لي محمد حسن عالم حاجة

ممكن يلقوا ليهوا وظيفة......

ليه يعملو ليهو حاجة؟
مش قالوا حكومة جهاد وإسلام
طيب الإسلام قال أشد الجهاد كلمة حق فى وجه سلطان جائر
اليس نافع وحكومته جائرين؟
هم فاكرين الجهاد ده فى الدفاع الشعبي بس

أقترح عليك ياخدر - خدر الله ضراعك- أن تدعو لجمعية أصدقاء محمد عالم من الشباب للدفاع عنه في حال حدث له مكروه لا قدر الله والتواصل معه وتكوين نواة معارضة شبابية وطلابية حية الضمير فهو مشروع ونموذج للمعارضة الشبابية. أبو عزيز حرق نفسه لكن ولدنا ده قدم نفسه قربان لسلطان جائر ومتسلط. لقد غسل هذا الرصاص الحي الذي أطلقه هذا اشاب العار الذي لحق بنا بعد عبارات التحدي والقطرسة لبعض قادة المؤتمر : الدايرنا يجي يقلعنا .. وألحسوا كوعكم ... لقدأعتبروا أن الشعب مات من الهوان...

خدر الفنان سلام
لاحظت ان الاحتفاء بهذا المهندس ليس بقدر الاحتفاء بافعال واشخاص ومواضيع اقل شائنا مما فعل
الرجل قام بمواجهه واحد من اقوي رجال الانقاذ وجهها لوجه
لكن المعارضون هنا لم ينفعلوا بالقدر الكافي
ولعل تسال قد خطر ببالي
هل لانه قد صرح بانه بعثي
هل لو كان شيوعي سيختلف الامر
وكنا سنسمع عن دعوه منظمات حقوق الانسان للتدخل لانقاذه من مصير مجهول
وهل كنا سمعنا تفاصيل سيرته الذاتيه منذ دخوله الروضه والمدرسه وانضمامه للجبهه الديمقراطيه
هل كانت البوستات الخاصه به ستحتل العناوين العليا ومعظم الصفحه الاولى لاسبوع على الاقل
لماذا يحظي مناضلي الشيوعي بكل هذا الاهتمام والرعايه الاسفيريه الكريمه في حين ان نضالهم لا يتعدى طقطقه الكيبورد في المنافي البعيده
لماذا لم يهرع الذين يحملون الكاميرات ليوثقوا لنا حديث ولقاء مع هذا الرجل؟