الحمدلله الذى أذهب عنا هذا الأذى ..

و"عنا" هذه ضميرٌ يرجع لى كواحد من جماهير الشعب السودانى..
من ضمنهم فى هذا المنبر ..
ايمان بدرالدين و ياسر طيفور ومحمد عبدالرحمن وعمر فضل المولى وملايين عددا ..

ومنا استاذنا "كبر" وبهاء بكرى وعصام جبرالله ومحمد النيل والعوض وصبري الشريف

دي زنقة جماعية

ويوجد ذات العمار وناس كتاااار ..

وكلنا تفرقت بنا السبل نحو ذات الغايه ..
تباينت الدروب نحو ذات الوطن وكيف يكون ؟!
البقى شيوعى والبقى حزب امه والبقى اتحادى وحق ومستقل ومحايد الخ ..

وهناك سفيان وحبيب نوره وأمانى العجب وسعاد تاج السر وعبدالله عبدالله ..

ومنا المشوطنين ناس تبارك وجنى وبشاشا وصديق ..
والمساخيت ناس ودشيقوق ..
وثلة من الفنانين
سلمى الشيخ سلامه
ومحمد السنى
وخطاب
وعقيفى
وعماد عبدالله و
عيييييك

أها ..
كلنا اتلمينا وغيرنا ..
عشان حاجه واحده اسمها السودان ..
عاوزين وطن بسيط جدا وديمقراطى ..
لا فساد ولا معتقلات ولا متاجره بالدين ولا مظاليم لا مظالم ..

وطن شامخ وطن عاتى ..
وطن خير ديمقراطى ..

الكلام ده قالو واحد شيوعى اسمو محجوب شريف ..
لكن لمن قالوا كان قدامو السودان لا حزبو الشيوعى ..
وزى ما قال هاشم صديق :

يا بلد ..
لو ما أكون منك وليك ..
معناى شنو واصبح منو ؟!!

وقمنانحن جينا ..
جينا للسرقنا ..
دمنا وعصينا ..

وفى إختلافه, كان الطرق واحداً أحد
السودان الوطن الواحد
ما قد كان وما سيكون ..

وكان من بيننا من يخذل فينا
ويخذل عنهم ..
من يساوم ما أحببنا بالذى هو أدنى ..
من ارتضى الدنية لوطنه وأهلة أن يحكمهم اللصوص ..
ومنا من تخاذل ..
ومنا من خان دماء الشهداء
تلك الدماء التى ضمخت هذا التراب الذى نحج إليه..
كما ومنا الموتورين من رحمة هذا الوطن الرحيم ..

والآن تبين خيط الوطن الأبيض ..
واستبان سواده ..
الآن تمايزت الصفوف تماما ..
والحمدلله أن أذهب عنا سوء الذين لم يكونوا معنا فى ساحة الوطن الجميل ..
قليذهب من يشاء لمن يشاء, فإنا ذاهبون صوب هذا الوطن, وإنا لملاقيه

أذى جسيم جدا يا حسن ...


الحمد لله,,,


جميل أن تتمايز الصفوف وجميل أن نعرف معادن الناس,,


تحياتى,,

Quote: وبهاء بكرى

محمد حيدر

ياخوى الوغد ده كان فى اللسته انا ماداير معاكم،،،

ورحمة الوطن وسعت كل شيء يا صديق ..
فما بالك ببهاء بكرى ..
سودانى دوغرى ونضيف و .. ديمقراطى؟!

الحمد لله

الحمد لله

يا صاحبي


و ...

نحنا البيدنا القدرة
عدالت العوج ..
كم جانا سيل و الدنيا لليل
صرفنه و الفجر انبلج .


الحمد لله

سيد سفيان نابري ..
ومن الآن خلعنا عليك وصف السياده ..
فلا سيادة إلا للذين هم راحلون إلى وطنٍ سيكون
كل من فيه سادة ..
وفى حضرة وطن كريم

أخوك السيد محمد المشرف..
قريب جدا منك صوب ذات الغايه ..

يا أيمن يا صاحب ..
نحن شعب اوسطى يا أيمن ..
والبهوات دول خارج اطار الوطن الحر والديمقراطى ..
وبخذلوا فينا من أجل حفنة من سيادة مزعومة ..
ستنتهى الى غير رجعة ..


هل يعلمون ذلك ؟!!!

كن بخير يا صديق,,,


وقد يأتونك ويسألونك عن المصادر!!!!


الله فى,,

فى مقال كاتبو شوقى بدرى عن هؤلاء السادة,,


حاول تقراه وتتخيل,,


تحياتى لك و للشباب الهالف كاست..

Quote: والحمدلله أن أذهب عنا سوء الذين لم يكونوا معنا فى ساحة الوطن الجميل .. قليذهب من يشاء لمن يشاء, فإنا ذاهبون صوب هذا الوطن, وإنا لملاقيه

تعيش يا مشرّف, فأنت تشرّفنا بطرحك فى كل يوم.
بوركت يا رجل

المكاشفة وصـل وإفـشـاء الـســـر فـنـاء كما قال صديقي الغائب أبو زر الغفاري..
الآذي لم يذهب يا مشرف بل يعيد إنتاج نفسه و سنقبل به على مضض أو نذهب نحن .

أو كما قال حسني مبارك هو الشعب رايح فين

سيذهب الأذى وتبتل العروق بوطنية دافقة يا صديقتى السيده عفراء سند
وما أجمل أن ننفى كما أباذر بين الله وبنو أمية ..
وما أجمل أن نموت إنحيازا للجمال ..
لله ..
للوطن ..
وقد مات كل أؤلئك القاعدون عن قومة الحق ضد لصوص الدين
وهاهو أباذر باق فيك وبعد قرون ..

..
هو حسنى مبارك راح فين ؟!

السيد عبدالله شمس الدين مصطفى
وقد سبق أن أصدرنا مرسوما بخلع لقب السياده لكل الذين هم راحلون صوب الوطن ..
فيا صديقى ..
لو فى طريقه الناس تجمد فى هذا الموسم النشاط الحزبى ..
ولنجعله موسما خالصا لوجه الوطن ..
ويتلمو الناس من حاصف لى قاصف ونحو اقتلاع اللصوص ..
وبعد ذاك ..
سنجد جميعا فسحة للنشاط المعافى ..
فى وطن معافى ..
وشعب معافى ..
و ..
هذه الارض لنا ..

يا أيمن ..
وجميع الهاف كاست بطرفنا يسلمون عليك ..
بعضهم تجاوز الروضه
وبعضهم فيها ..
وبعضهم ينتظر ..
وما بدلوا تبديلاً ..

عاوزنهم لمن يكبروا يكونوا أسياد وفى أوطانهم ..
وعندها لن يهمهم كثيرا
منو الكان شيوعى
ومنو حزب أمة
ومنو اتحادى

المهم ما يقوموا يلقو نفسهم بلا وطن ..
مع انو ابوهم بى حزبو يحمدالله وحيد يغالب غربتو !!!

دى الفكره ..
الناس تتلم كلها صوب أن تكون هذه الارض لنا
فليعش سوداننا ..
لا سودان الساده والقتله واللصوص ..

ما غريبه طبعا يا محمد المشرف
ان قوائم الوطنين بتاعتك هذه تخلوا من كل

اسحاق
ومحمدين
وأدروب
وتيه
ودينق
وشول
وعقار
ادروتا
وحواء

ليس غريبا انه ذهنك لم يستحضر ايا منهم لتضمه لقوائم شرافئك الوهمين؟!


الجنوب ذهب ولم تتعلموا شيئا
على فكره ابناء الميرغني و المهدي هؤلاء افضل منكم!
لانهم بس انتهازيه!

انتو اخطر لانكم عاملين فيها معارضه وانتو عنصرين اقصائين ودعني اضيف مفلسين!


انتم لا تملكون شيئا لتقدموهوا لهذا الشعب افضل منا
ورغم كده مطنقيعن وعايز تواصوا اوهامكم انكم اهل الفهم.

طظ في فهمك
وطظ في معارضتكم ذاتها!



الكيمان انفرزت بالجد ولكن ليس لهؤلاء فقط
بل لكل المدعين من امثالكم.



اللهم اذهب هنا الاذى الحقيقي يا ربي من هذه المعارضه البائسه.

السيده تراجى ..
شكرا لابداء الرأى ..

ولى رأى واضح فى لحاق جماهير الشمال الجغرافى بحركات الهامش ..
وعلى ذلك نحاول لم الشتات الحاصل ..
لنكون شركاء أصيلون فى التغيير ..
لا أسرى للتاريخ الاجتماعى ..

شكرا ..

عجزت الاحزاب السودانية ومن خلال تحالفاتها المؤسسة على ما هو أدنى من الحد الأدنى المطلوب لانجاز الحراك الجماهيري الفاعل .. عجزت تماما عن تقديم مشروع سياسي بديل يلهم جماهيرها الثورة ويقدح فيهم شعلة النضال الوطنى ضد الشمولية والخراب الوطنى الشامل والذى حاق بالوطن ..

وعندما نتحدث عن الاحزاب السودانيه فاننا فى الواقع نتحدث عن هيئاتها القياديه .. ولربما أفرادا بعينهم فى حالة بعض الاحزاب .. اذن فنحن لا نتحدث عن مؤسسات حزبية تتمتع بعلاقات قيادية ناتجة عن تسلسل منطقى ومتدرج من القاعده الى قمة الهرم القيادى لتكون تعبيرا أمثل عن طموحات وأهداف الجماهير ..

وما بين الحد الذى هو أدنى من الحد الادنى للتحالفات السياسيه, وبين العلاقات القياديه المشوهه داخل مؤسساتنا الحزبيه .. تم ارتهان هذا الوطن وطموحات جماهيره للمزاج الفردى أو الاسري والمدعوم بالسطوة الدينيه أو التاريخيه لهذه لقيادات ..

وبذلك دخلنا تلك الدوامة الشيطانية فى منتصف الطريق نحو الوطن .. فأدركنا نصفه !!
وعلى قدر أهل العزم تأتى العزائم ..

وعند النصف من الدوامة, وعند النصف من الوطن ..
تسسللت منا تلك القيادات وآثرت استمرار الحال كما هو عليه ..
وطن منقوص يحكمه اللصوص ..
وهو أفضل عندهم من ثورة تهز فى آخر المطاف اركان سيادتهم المزعومة على الشعب السودانى ؟!!
ومن عجائب الامور أن هتف لهم من هم فى غيبوبتهم يعمهون :
أن عاش ابو هاشم !!..

وطنا البى إسمك كتبنا ورطنا....
ما هو سودانا بنحبو ..وبنعشق تراب واطاطو,,لدرجة الهيام
أخونا محمد حيدر المشرف
الله يديك العافيه
بس ما تلهلِب لينا نيران الشوق فى قلوبنا
ونتذكر سودانا الزمان الكان مساحته مليون ميل مربع
وجنيهو أبوجمل الكان بساوى :-
3.75 دولار أمريكى
12 ريا ل سعودى

تفتكر يا أخوى محمد , حبوبتى الله يرحمها مش ليها حق لمن كانت بتقول لى:-
يا ولدى يا حليل الإنقليز!!!!!!!

السيد عبدالله عبدالله

يا أستاذى

رزازاً يبلل أغانى الخليل
أصدق كلامك حقيقه وبخاف
أخاف الطريق اللى ما بودى ليك
وأعاف الصديق اللى ما بهم بيك
معاك انتظارى.. ولو بالكفاف

وجميع الأغانى اتكالن علينا نحن أولا, وحتى يكون لنا ذلك التراب
ذاك التراب وزمانو الاجمل من زمان الانجليز ! وأجمل من ...

وفى الوقت الذى تتحطم فيه أصنام التوريث فى الربيع العربى ..
يورث أهل الانقاذ أبناء زعماء الاحزاب الطائفية التى انقلبوا على حكمها الشرعى ..
ويقينى اللا شيء سيوقف حركة التأريخ ..
ولعلها لو يفقهون لعلامة ..

Quote: ولنجعله موسما خالصا لوجه الوطن ..

السيد محمد المشرف
كتبت:

Quote: ولى رأى واضح فى لحاق جماهير الشمال الجغرافى بحركات الهامش .. وعلى ذلك نحاول لم الشتات الحاصل .. لنكون شركاء أصيلون فى التغيير .. لا أسرى للتاريخ الاجتماعى .. شكرا ..

جماهير الشمال الجغرافي وتعلم تماما انك لست ناطقا باسمها ولا تثملها
وانها لا تنتمي جميعها لحزبك تحديدا بل رافضه له.

وسميت حركات التحرر التي تحرك البلاد حاليا بحركات الهامش!!

ونسيت انه بقبلها حركة تحرير كوش هذا اذا عملنا ما عارفين لاين ينتمي مؤتمر البجا!

لما قلنا مهمشين

ظليتوا تنبحوا بانه الشمال كله مهمش!!

في اول منعرج وصفتنا بحركات الهامش للتميز!!



شمالك الجغرافي الفي مخيلتك ده بالله حدد لينا حدوده.

امثالكم يصفهم اخوتي ثوار كوش بضحايا الاسلام عروبيه!!و الاستلاب!





عقلك الباطن يغلبك ويعبر عنك باكثر من كلماتك
ونحمد الله ان منحنا القدره للقراءه ما بين السطور.









----------------
شايفه هاف كاس دي واجعاك لسه!
نسيت اقول انه شعب شمال السودان المولد هذا كله هاف كاس ايضا!
يعني ما تعتبرها مسبه!ياها واقع.
وبرجع لك في بوست البندر بهدؤ.

ازيك يا حبيب
ان شاء الله طيب في عضامك ديل

********
*********

رحمة عوض

نعم ..
تعالوا جميعا لوطن سواء ..

تحياتى ..

تراجى ..

اتمنى الا ترجعى لبوست البندر ..
وكلامك الهنا ما فهمتو والله ..
وثقى تماما من أنى لن أنجرف لعداوات لا تليق ..

طارق جبريل ..

ياخ والله فى اللحظة دى بالتحديد زهجان من شخصنة القضايا ..
ومن ضيق الافق الكارثى ..
ومن بعض الاشياء ..
وتانى انا كويس مافى عوجه ..

كيفك يا الحبيب ..
التقول ما صدقت زول قريب يسألنى مالك ؟!
وبس ياها
"الشكيه لى أب روحا ندية يا عزيزي "

طارق الجبلابى ..

وبذهاب هذا الاذى عنا ..
آن أوان تمايز الصفوف تماما ما بين مشروعين, بين وطنين
وطن بالفيهو نتساوى ..
سودان شمالى متحد وديمقراطى, دولة مساواة وحرية وعدالة إجتماعيه
أو سودان مرهون للاجندات الاقصائيه والثقافات الآحاديه والصراعات التأريخية ..
فمن لا يريد السودان الأخير ..
فليعمل من أجل تحقيق الأول ..

تحياتى

الحمدلله الذى أذهب عنا ألأذى ..

الأخ محمد

تحياتى لك يالحبيب وأنت تحلم بوطن خير ديموقراطى

Quote: اسحاق ومحمدين وأدروب وتيه ودينق وشول وعقار ادروتا وحواء

أطالب المهندس بكرى بأن يعطى هؤلاء الاخوة باسويرد حتى يكتمل تمثيل كل السودانيين بالمنبر

قلتوا لى الزولة ديك اسمها منو مرة تانية ؟

اظن اسمها عوضية ................ برضو ادوها باسويرد

الاخ العزيز حسن حماد
تحية طيبه ..

فى الواقع لم أفهم إشارة إكتمال التمثيل الموجهه الى بكرى ابوبكر ولكن ..
دعنى أنتهز فرصة إقتباسك لاشارة السيده تراجى مصطفى لتوضيح خلفيات ورؤي سياسية كانت وراء طرحى فى هذا البوست ..

أولا وباستقراء الوضع السياسي ومنذ مهزلة إنتهاء "مهزلة نيفاشا" وفشل مشروع انجاز التحول الديمقراطى .. والذى كان هو المشروع السياسي الوحيد الذى حقق التفافا وطنيا حول الحل السلمى لاستعادة الوطن وانتشاله من الهوة التى رماه نحوها أهل ما يدعى بالانقاذ .. باستقراء هذا الوضع نجد أن لا بديل يمكن أن يتميز بالفاعلية ويمتلك أدواته الا التحالف العريض بين الاحزاب القومية والحركات المسلحه فى أطراف السودان الجديد الغربيه والجنوبيه والشرقيه ..

هذا هو: تحالف يضم كل الحركات المسلحة والاحزاب القومية لانجاز مشروع قومى ووطنى نحو سودان حر وديمقراطى ودولة حقوق وواجبات وحكم دستورى يكرس للعدالة الاجتماعية والمساواة ..

ثانياَ .. وبتحليل مكونات هذا التحالف المقترح نجد أن الكثير من العوائق الفكرية والثقافية يمكن أن تشكل التحدى الرئيس لانجاز هذا التحالف المهم جدا ..

منها ما نتحدث عنه هنا, وهو خوف القوى التقليدية من انجاز التغيير الجذرى مما يجعل سياسيا محنكا مثل الصادق المهدى يقف محذرا من نجاح ثورة الهامش ويكون موقفه من هذا أكثر جذرية من مواقفه تجاه النظام ..

ومنها بالتأكيد مشاركة مولانا محمد عثمان عن بعض الاتحادى الديمقراطى للنظام الحاكم ..

ومنها عدم وضوح رؤية الحزب الشيوعى تجاه تحالف كاودا ..
ويمكن انسحاب القول على المؤتمر الشعبى ..

هذا هو حال أحد مكونات المشروع السياسي الذى أطمح له .. ولى آراء عديدة عن جوهر الاختلافات سأتمها هنا ان شاء الله ..

وكل ذلك فى مقابل انجاز المكون الآخر للتحالف المقترح لصيغة ثورية تم الاعلان عنها .. وهو فى موقع متقدم جدا نحو الثورة السودانية مقارنة بالاحزاب السودانية ..

ويمكن أن تتمثل رؤيتى فى حتمية استناد الثورة السودانية على ساقين ..
الاحزاب القومية وحركات الهامش المسلحة ..
والا ستواصل الثورة السودانية قعودها الكسيح او مشيها الاعرج فى أحسن الأحول نحو غاياتها
ثم ولن تدركها ..

هذا هو مختصر شديد لرؤيتى السياسية ..
ولن يقعدنى عن طرحها حالة الاستقطاب الجهوى الحاده التى تغشي العيون والبصائر ..

تحياتى واحترامى ..