أيهما اكثر غيظا ان تكون هلالابى وولدك يطلع مريخابى أم أمة وولدك إنقاذى

قدر ما إجتهدت عشان ولدى يطلع هلالابى مثلى فشلت
جريت وراهو حللت الأسباب
حاولت إقناعو ما فى فايدة
.........

فى النهاية إستعملت إسلوب خبيث

مسكت فى أخوهو الصغير بقيت أجيب ليهو لبسة الهلال الكاملة
رقم 10 مهند الطاهر

لكن عشان ما أظلم الولد الكبير ويقوم يتحسس كنت برضو بجيب ليه لبسة المريخ
بكون شايل اللبسة من السوق على مضض زى الحاجة الكعبة
بمدها ليه كدا بإحساس الزول الداير يتخارج من حاجة بطالة

المهم بقيت أشرح للولد الصغير عن لبسته وعن رقم 10 وعن مهند الفنان
واتحدت عن تاريخ الهلال وبطولاته وفوزه الكتير بالدورى اكتر من المريخ
ان الهلال فريق الأكثرية وكدا يعنى
شوية شوية الولد الكبير إبتدأ يتأثر لانه بسمع عن حاجات ما قعد يسمعها فى المريخ
مكنة مكنتين الولد الكبير قال لى يا بابا أنا عايز فنلة الهلال
عايز رقم 8 بتاعت سيدا
قلت ليهو وكمان عارف إسم الدلع بتاعو؟؟؟

المهم الفكرة إنتصرت و الولد بقى هلالابى رجع لاصلو

ليس لانو ما عندو مبدأ لكن لخبرتى ومعرفتى لللهلال ولفارق العمر
و فى النهاية لو الأبو مقنع الإبن ح يتابعو

لكن بينى وبينكم كنت مغيووووووظ لما ولدى خل درب الهلال وبقى مريخابى
وسعدت كتير لما بقى هلالابى


........

دا كان فى الرياضة

وأما فى السياسة

الصادق المهدى شعورو شنو؟؟
وهو زعيم حزب الامة
ليس مثلى وانا لا إمتلك أى نصيب فى نادى الهلال غير التشجيع
هل فشل المهدى رغم حكنو القوى فى إقناع إبنه لعدم المشاركة مع المريخ ( آسف اقصد مع المؤتمر الوطنى) ؟؟؟

وطالما ان الحزب ملكية أسرية منذ عهد الزعيم عبد الرحمن المهدى
لماذا فشل الصادق المهدى فى حتى عدم إقناع إبنو أن المشاركة فيها مضرة لابيه

يا عبد الرحمن ياخى كون إنقاذى كما شئت لكين دسها ياخى
بس عشان ابوك

صدقنى والله حارة لما تشوف ولدك يطالع عكسك

اكعب حاجة إنو ولد الفار يطلع كديس



لكن يا الصادق طلعت زول ما مقنع ابدا

علا تكون رضيان و داسيها

إن شاء الله بس تكون راقد ليك فوق راى؟؟؟؟

كان ح يكون أنبل لو شجع الموردة ( افصد لو عبد الرحمن دخل الحزب الشيوعى)
على الأقل كنا نقول يا سلااااام الود بفى تقدمى عايز يحارب التقليد الطائفى الاسرى
وأكيد ما كا ن حيتهموهو بالمنفعة المادية لانو الحزب الشيوعى على قدر حالو وناس ام رقيقة ساكت
ناسا غبش

الله يكون فى العون