موقع جديد يهتم بالفن (نرجو المشاركة)

في خطوة للارتقاء بالفن السوداني و قضاياه, عنت لي فكرة افتتاح موقع جديد تحت مسمى كي كلت (كيبورد كلشر) Keyboard Culture
ارجو من الاخوة المهتمين الاشتراك للمساهمة في الموقع و اخص الاقلام المهتمة بقضايا الفن السوداني وهمومه.

اضررت لاستخدام الحساب الخاص بوالدتي للترويج للموقع نسبة لعدم امتلاكي لباسوورد خاص بي للدخول لسودانيز اون لاين
و دمتم
مازن عمر
http://kcult.com

سلام يا مازن
التحيه لك وانت تهتم بامر الفن السودانى
ياخ مالك فارقت الفيسبوك وقروباته
حاولت اتصل عليك ايضاً

تصفحت المجله وهى رائعه keep on

شكرا يا محمد على الرد و المتابعة و مشاهدة المجلة :D
بخصوص قروبات الفيس بوك, بقت ما عندها معنى او موضوع, تفاعلاتها ضعيفة و معظم اعضاءها غير مهتمين

و دي الحاجة اللي خلتني ابادر بي عمل موقع يخص قضايا الفن والفناين و الساحة
على العموم هاك ده حسابي في فيس بوك للتواصل :)
شكرا ليك كتير
http://facebook.com/korgster

Quote: بخصوص قروبات الفيس بوك, بقت ما عندها معنى او موضوع, تفاعلاتها ضعيفة و معظم اعضاءها غير مهتمين

يا مازن انت زول لسه فلى ربيع الشباب وقدامك درب طويل بعدين احنا ح نعتمد على الزيكم فى احدات التغيير واستلام راية الاجيال القادمه
طولة البال مطلوبه ولا تيأس واعمل الانت مقتنع بيهو ولا تهتم بالمحبطين
والله انا كنت فعلاً شايفك متفرد وعليك ختيت امل كبير فى اثراء الساحه الفنيه بالجديد المتفرد
ما تهتم بكلام المحبطين واذا كان هنالك بعض من يثبط الهمم فتأكد ان هنالك ايضاَ اضعاف من يشجعون المثابرون والطموحيىن
انت شخص طموح وهذه المجله التى انشائتها ما هى الا دليل بسيط
فامضى الى الامام ونحن نشد من اذرك


==============
تحياتى لك وللاسره

up

شكرا ليك كتير يا محمد على الدعم, والله انت ما عارف انا مبسوط كيف
و زي ما قلت بحاول اخد التعليقات والنقد بصورة منطقية و بناءة, والا ما كنت عملت المجلة, اللي واحد من اهدافها النقد البناء والتحليل المنطقي
لكن حكاية فيس بوك دي هلكانة شوية, و فكرة منبر خاص للموسيقيين السودانيين يكون متفرد عن فيس بوك و الليميتيشنس (limitations) (معليش ما عرفت ترجمتها بي العربي) هههههه
بتاعت فيس بوك, هي فكرة دؤوبة وان شاء الله تاخد ولو القليل من اهتمام اصحاب الرأي في الوسط الفني
بي المناسبة في عضو هنا اسمو محمد مرتضى حامد, كان لميت فيه انكته لي عليك الله
شكرا ليك مرة تانية

up

سجلنا
سلامات

جايكم تمامة عدد

شكرا يا فيصل و باسط على المبادرة
ان شاء الله نكون عند حسن الظن

مازن

لقدام يا فنان ...بالتوفيق ..جيتك تب


تحياتى للاسرة

شكرا يا معاوية على المتابعة
و اتمنى من الراغبين بكتابة مقالات في المجلة, انو يشوفوا المقال المكتوب عن الموضوع ده, و كيفية طلب عضوية كاتب
و شكرا ليكم كتير

سـلام يا محمد.. بداية أحي فيك روح المبادرة والإهتمام بقضايا الفن السوداني، وفي الحقيقة كلامك أعلى البوست عن الهدف من الموقع أو المجلة هو للإرتقاء بالفن الخ شجعني على زيارة الموقع، وقبل أن أطلب الإشتراك أو المشاركة عندي بعض (الملاحيظ).. فمن ناحية عامة شي كويس الإهتمام بالأخبار الفنية، لكن لا معنى لإعادة نشر الأخبار الخاصة مثل (إشاعات) مرض حرم النور ومونيكا؛ أولاً لأنها لا تسهم بشئ ولا تضيف للفن أو لأهداف المجلة، وثانيا لأنها زي ما قلت منقولة من جريدة أخرى لأن أغلب وربما كل الجرايد لها مواقع على النيت متاحة للجميع.. فالأهم إذن أن تركز المجلة على تحليلات وأراء الكتاّب ومشاركاتهم الخاصة و الإهتمام بالأخبار (الفنية) للفنانين مثل إصدار عمل جديد أو رحلة فنية الخ وليس أخبارهم الخاصة والإشاعات عنهم كالمرض والزواج والطلاق الخ.. الحاجة التانية لا أرى ضرورة لوضع شرط بالمساهمة اليومية للمشاركين فالناس تختلف ظروفها ومشغولياتها، أحياناً لا أستطيع أن أقرأ إيميلاتي أو أرد عليها بشكل يومي ناهيك عن كتابة موضوع فني وذو قيمة كل يوم..فلو استطاع المشاركون الكتابة كل يوم حتى لو أكتر من موضوع يكون جميل وزيادة خير لكن لو لم تسمح الظروف فلكل أعذاره.. عموماً أرجو لك كل التوفيق، كما أرجو أن أتمكن من المشاركة معاك (كل يوم:)..بمحاولة الإسهام في إصلاح شأن الفنون عموماً في السودان ما دمت لا أستطيع الآن المشاركة بمحاولة إصلاح حال السياسة أو الإقتصاد أو الخدمات العامة وغير ذلك من شؤون سوداننا الحبيب.. (ملحوظة) أخيرة.. ما الفائدة من تعريف حسين الصادق بأنه (سوداني مسلم جعلي؟!!)

بعد السلامات يا عيسى
كلامك ضحكني شديد, ما لأنو مضحك, لكن لانو وراني اخطائي في الشروط الموضوعة و كدة
انا حا اعدل قوانين الكتابة على المجلة و اسهل الامر على من يرغب في المشاركة
بخصوص مواضيع الاشاعات, فهي المواضيع الوحيدة الفنية اللقيتها في الانترنت عن اخر الاخبار الفنية في السودان, و,إن كانت فعلا لا تضيف ما هو مفيد, بل كانت حركة مني في محاولة اضافة مقالات للمجلة
و اوعدك ان شاء الله بعدم تكرار مثل المقالات دي
المشكلة انو انا ما قاعد في السودان ولا قريب من السودان, و جلب اخر الاخبار الفنية فيه صعوبة بالنسبة لي
لكن بعد كدة خلاص ما حا اكتب عن اخر الاخبار زااااتو ههههه بخليها لأعضاء الادارة الاقرب من الاحداث (الموجودين في السودان و بقرب الفنانين)
اتمنى انك تشاركنا في الموقع لعموم الفائدة و لمحاولة تكبير المنبر ليكون الوجهة الاولى للباحثين عن اخر الاخبار الفنية و التحليلات المنطقية (زي ما انت قلت) عن اخر الاغاني و الالبومات و ما شابه

شكرا ليك كتير مرة تانية
مازن

تم تهكيرالموقع
متين هو اصلو لاحول ولا قوة الا بالله

يبدو أن الموقع تم تهكيره ...

ولا يهمك يا مازن
كنت عاوز احذرك منهم لكن نسيت
معايشه مثل هذه التجربه تصقلك وتقويك
ولتعلم كيف ارعبتهم بمجله
انهم اعداء الفن اعداء الانسانيه

اهلين يا مازن
ولا ناظم ولا انا تشابه علي البقر اقصد الاسماء
والله مشتاقين شدييد
والله لكن زمن سنيين
انت ما عرفاك حتكون متذكرني ولا لا
آخر مرة اتلاقينا في دبي في بيتكم في ش الرقة

سنة 2003

اتمنى ليك التوفيق
توقعني زبون مستقبلي بعد زوال الهكر
باقي زمان كان عندنا اهتمامات فنية
نحاول نزيل صدا السنين

وربنا يوفقك





خالتو صفية

ندعمك بشده ابننا مازن وبالتوفيق

بما تيسر

محمد الطيب يوسف و ايمن مبارك ابو الحسن :

شكرا على المتابعة و فعلا تم تهكير الموقع,
لكن حاليا يتم نقل الموقع على سيرفر اخر بحماية اعلى

محمد زكريا:

العتب علي انا , لانو ما اخدت كل الاجراءات الازمة للحماية قبل نشر الموقع

صفية محمد:

شكرا ليك كتير يا خالتو على الرد والمتابعة,
بتزكر كويس ايام دبي و مشتاقين بالاكتر
تمام التمام, اول ما يعود الموقع العضوية بتكون مفتوحة و نتشرف بي وجودك معانا

طارق ميرغني:

شكرا يا طارق على المبادرة و اتمنى اكون عند حسن ظنكم

بي المناسبة, جميع المواضيع الموجودة في الموقع و قائمة الاعضاء والمقالات في المجلة موجودة و لا خوف عليها

اول ما يتم نقل الموقع ستظهر كل البوستات والموقع كما كان عليه قبل التهكير

و دمتم
مازن

الفنون واجهة الشعوب والفنون حضارة الشعوب

شكرا ماذن وربنا يوفقك ونحن من خلفك سائرون

دمت عافيه

يا سلام عليك يا مازن ياخ
فرحت بيك شديد وانبسطت منك خالص
وما تحزن موقعك حيرجع ليك وقالو العترة بتصلح المشى ..

فى الاول لما شفت البوست قلت سناء الصباغ دخلها فى الفن شنو كمان ...
ولما لقيت صفية مساعد كمان قلت ده كورال كلو نشاز ...
( اصلو الاتنين ديل كان ببوظو كورال بيطرة ) ... اسأل الوالدة من الكلام ده

تحياتى للوالد و الوالدة ...

خالك ديـــــــدو ....

الإبن العزيز مازن
لك التحايا والأماني بالتوفيق

غايتو نحن عودنا في الموضوع عود مره (حسب تقسيم التركات بالطريقة الإسلامية)
لكن نشد من أزرك ... وندعم برفع البوست بإعتباره أضعف الإيمان .............
تحدثت معك قبل كم سنة لو تذكر
وعا########ي جداً لغتك العربية الرفيعة

ويكون كويس لو غيرت الصديقة سناء الصورة في البروفايل بصورتك لحين الإنتهاء من هذا البوست حتي يكون التفاعل كاملاً
خاصة وأنه نادراً ما نقرأ لأبنائنا وبناتنا في هذا المنبر.

(((((الأخ)))) ناظم او في رواية أخري مازن .... بالله في البداية ركز لي علي الأخ دي ... من أمبارح عايز أدخل وأشارك واشجع بس خايف من يا خال ويا عم ... وأنا ما زي خالتك صفية وخيلانك عبد الدائم وعاطف مكاوي ...

اولاً تشكر علي المجهود والتوثيق للفن السوداني ... وهو شئ عظيم خاصة لو علمنا بأنك قد قضيت معظم سنوات حياتك خارج السودان ... الكثير من الفاشلين لا يفعلون شئ سوي ترصد النجاحات ... مثل هذه الأشياء ستقابلك كثيراً ولكنها حتماً ستجعلك أكثر قوة ومعرفة ودراية ... بالمثابرة سينجح الموقع وبالتأكيد سندعمك ونشد من أزرك ...

خالك/عمك زهير الزناتي ..

جزيل الشكر موصول ليكم يا عماد, عبدالدائم, عاطف و الاخ (الصغير) زهير,

شكرا يا عماد على المبادرة و ان شاء الله موفقين جميعا في رفعة الفن, بعد ان دمره جشع الفنانين والجري خلف الشهرة بأي ثمن

الخال عبد الدائم, والله حبوبتك سناء دي عارف زاااتو الدخلها في الفن شنو, غايتو كان بالغت بتشيل معاك في الغناء, لكن مع الزهايمر ده ما حافظة ولا غنية
كورال البيطرة ده بنحللو في مقال منفرد, لانو ما بنلقى ليهم فرصة حسي

عاطف, بتزكر كويس لما اتلكمت معاك, ان شاء الله تكون كويس انت والاسرة الكريمة, تحياتي ليكم كلكم, وان شاء الله ننمي الموقع (بعد ما يرجع) .

ابوووو شنب, لعلك بخير يا اخوي, انت و المدام و العيال, طبعا عجبتني جدا فكرة بوست عزاء هنا, و داير منك تصريح عشان انسخ الفكرة للموقع,
و شكرا ليك على المبادرة والمتابعة , زي ما قال خالي عبد الدائم, العترة بتصلح المشي :)

و اخيرا بدينا الموقع من اول و جديد
والمرة دي اقوى و اعزم ان شاء الله
محتاجين لاعضاء جدد, من لديهم رغبة بالكتابة في المنابر, و ايضا عند افتتاح المجلة قريبا

العضوية مجانية و مفتوحة حاليا, وهي نوعان, العضوية العادية و هي لكل من يريد ان يشارك في المواضيع و يضيف تعليقات, زيادة على معرفة اخر الاخبار والتواصب مع الفنانين

والعضوية الفنية, وهي للفنانين و الشعراء و اصحاب المواهب, امن راد انا يتواصل مع جمهوره و المشاركة بآخر اعماله الفنية, بالاضافة لترك التعليقات على التحليلات الفنية وميزات اخرى مستقبلية

منتظرين مشاركتكم يا جماعة, الموقع فكرته بسيطة وغير متوفرة للقنانين والجمهور في السودان, و ده كله في اطار الارتقاء بفن بلدنا العظيم

http://kcult.com