النادي السوداني..تأبين زيدان بيكون ضييق عليهو قبرو

عبر السهرة المملة جداً المسماة مراسي الشوق تابعت مقتطفات لي حفل تأبين - زي ما سموهو - للفنان الراحل زيدان إبراهيم أقامه النادي السوداني بدولة الأمارات ..
قبل التعليق على المقتطفات عايز أعلق على الثنائي عمر الشاعر والتجاني حاج موسى والظهور حد الملل بعد وفاة الفنان زيدان إبراهيم ..وكأنهم بيتاجرو بي روح الفقيد أكتر من إنهم بيعرفو بيهو وانا هنا ما بقصد المقابل المادي بقدر ما بقصد هذا الظهور الإعلامي المكثف لإعادة وحكي معلومات وقصص حكوها في حياة المرحوم في برنامج تلفزيوني قدموهو مع بعض في ثمانينيات أو تسعينات القرن الماضي ..
نفس الكلام ..نفس الأغاني ..نفس الأيييي شي .. فهو قديم يعاد لكن لا جديد يذكر..
الحاجة التانية الموضة الإسمها حفل تأبين دي ..!! كل الناس بقت تنتظر بتين الفنان يموت ومن ثم تبدأ النشاطات الثقافية والحراك الثقافي والحراك التجاري لي أقمشة الدمورية والحراك التجاري لي محلات طباعة البانرز والبروشورات ومصممي الأدوب فوتو شوب ..غير أن الأكثر نشاط وحراك هم الفنانين المدسوسين والشعراء المدسوسين أو كما يعرفهم الجميع بي فنانين قدر ظروفك وأسميهم انا بي صدقني ما بحرجك ..
نرجع لي موضوعنا الأساسي..حفل تأبين النادي السوداني ...
نفس المشاهد ..بانر وخلفية وصورة زيدان وشخبطات وكلام كتير على البنر ..
نفس الوشوش الأبنت زيدان في نادي اللعوتة هي نفس الوشوش الأبنت الفقيد في نادي الخرطوم هي نفس الوشوش اللي أبنت الراحل الفنان في مجموعة ترياق المسرحية ..غير أن الجديد في هذا التأبين والمختلف عودة شروق ابو الناس وود المغربي الكبير الما بعرف إسمو (أخو سامي المغربي أظنو محمد )..
تسجيل باهت أصوات أقل ما توصف بي أنها قبيحة ووالله أظنها حركت المرحوم في قبره وبدلاً أن تكون تأبين له ربما قلقلته أكثر من سؤال منكر ونكير داخل قبره ..
لييي كده يا جماعة ؟؟؟؟ أغاني زيدان دي ما أي زول مسك المايك ممكن يغنيها ..والأخطر إنو ده تأبين يعني إستعادة لي روح الفنان عبر أعماله وترسيخ ألحان واداء الفنان عن طريق اخرين يقدرو يقدموهو بي صورة جميلة مش يعولقوهو ..
ما أي فنان يموت يقومو يلمو لينا أهل الثقافة والفن في أوضة ويربطو ساوند ويجي أي زول ليعدد ماثر الفقيد وقصة جمعتني به وهو إنسان ليس كباقي الأناسين ..
ثم يبدأ الحديث بي نبرة حزن وإعتصار دمعات بي الرجالة أو شحوب اللون وكتل الحيل ثم ما يبدأ وفي أقل من ثواني بعد ما قدم العرض ده يبقا هاشاً باشاً يجبجب في المسرح ويحتو قرض ويحكي نكات ومواقف طريفة كمان ..
مسرح جايط وأي زول يقالد في التاني ويتضاحك ويتراقص وكأنه مبتهج بي موت زيدان لا حزين عليه ..
أصوات نشاز وفرقة موسيقية باهتة المعالم وكأنها في صبحية ...
الكلام ده ما للنادي السوداني بس بل بينطبق على كل حفلات التأبين اللي قدموها من يعتقدون أنهم يعيدون تكريم زيدان وروحه من بعد موته لكن النادي السوداني اللي شاهدت منو المقاطع ..
أما أسوأ ما في هكذا حفلات تأبينية الشعراء البيجوك شايلين ورقة فيها قصيدة للفنان المرحوم ثم بي الرجاااااالة كده يمعط راسو وصوفو ومخو عشان يعتصر اسماء أغاني الفنان الراحل عشن يدخلا في جملة مفيدة من شاكلة بعدك فراش القاش طار وفي بعد يا غالي انا بقيت حمار وقصر الشوق اتقلب ترتار ...
مع إنو والله الشاعر ده انا متأكد لو قلت ليهو عليييك الله بس من كل أغنية جبتها في قصيدتك دي اديني مقطع مقطعين بي اللحن يكون ما حافظهم ...
زمان النسوان في الحلة بيسكو المرحوم ده لمن يحيروهو ليك زاتو ..تلقاهن لافحات تيابهن وماشات بيت البكا يقولوا ليك الليلة التالتة ...
بكرة يتلملمو تاااني بي لقيماتهن ويقولوا ليك هيي الليلة السابعة ..
بعد كم ييوم يشيلو شاي بي اللبن يقولوا الخمسطاشر ..
تاني اسوعين تلاتة يتلملمن وينطلق بيت البكا من جديد ولمن تمشي تكتشف إنو ده الأربعين وعايزين يعيدو فتح البكا ..
هكذا أصبحت منتدياتنا الثقافية ومجموعات ناس ثقافة ثقافة من شاكلة مجموعة وهج الطيف ومجموعة إندياح وتجمع الدواية والحبر ونادي مثقفي فن الرسم المائي...
أصبرو شوية يا ناس وختو الكورة واطة ...
المرحوم ما طاير ..قااااعد في قبرو ...
روووقو شوية وما تستعجلو الظهور التلفزيوني عشان يقولوا فلان كرم الراحل فلان وفرتكان صاحب الراحل العظيم وانا يكفيني فخرا كنت ساكن معاهو وانا كان بيحبني..
أدوووووها صنة المراحيم ديل ياخدو نفس شوية في قبورهم وأسرهم تستوعب قصة موتهم دي وبعد داك إتفقو كللللكم في حفل سنوي للتأبين تكرموا فيهو الراحل تعملوا ليهو صدقة جارية تدو أسرته ما يعينهم تجيبوا اعمالو وتوثقوها في أشرطة أو سي ديز ..
تعملوا حاجة عليها القيمة وتطلعوا كتاب عن سيرة الراحل وبدل ما أي زول يجي يحكي براهو نكتب كلامهم ده في بانفلتز أو كتيبات أو أي حاجة دائمة لينا ولي الجيل البعدنا ..
أو لي خلااااص روحكم محراقاكم فأعملوا هكذا تكاريم في حياة هؤلاء الفنانين وليس بعد موتهم ...


تخريمة :
أها يا طلحة ده نقد ما فيهو أييييي لبس مع إنو شروق كانت حادة على زيدان ..

غايتو اصحاب الفنان المرشح يحضرو حالهم إذا بيريدو. . .

قريته امس يا عمر واتوقعت مناقشة كتيرة للفكرة , اتفاجات الان بانك اول متداخل في الموضوع , واضح جدا انه "اخوك" كورته فكت شديد ^_^

Quote: قريته امس يا عمر واتوقعت مناقشة كتيرة للفكرة , اتفاجات الان بانك اول متداخل في الموضوع , واضح جدا انه "اخوك" كورته فكت شديد ^_^

والله يا اساسى نفس الشعور , مع انه ود الفاروق لعب ماتش كبير فى البوست دة , لكن الناس شكلها بقت تلاوز من سيرة التابين والحاجات دى

________________________

وصلت سريع كدة , مشيت بفاكس ولا شنو !
ولا الشركة موفرة ليكم كمبيوترات فى الباركينق

الله اكبر يا ابو حميد ^_^

لكن تصدق دا مكان كويس " النادي السوداني بالامارات " نكمل فيهو باقي ونسة الغداء

تصدق يا عمر الفاروغ من بعد عزومة بناديها ديك مافي زول هببو لي الا اخوي احمد التجاني بعزومة كاربة في استيك هاوس قبل نص ساعة اخوك للان مخلوع
لو ما " اللفافة" بتاعة المناديل الصبنتها في جيبي دي مافي زول كان حيصدق اني اتغديت في المكان داك , الكويس انه اللفافة لقيت فيها شوك وملاعق وسكاكين ^_^
والالز انه المناديل زاتها فيها شعار الاستيك هاوس , قلت لي ديك شوربة شنو يا ابو حميد ^_^

للتوثيق

الزول دا لاقاك وين يا ابو حميد ^_^

يا ود الفاروق وزي ما قلت ليك إتا زول رويسو ملآن شديد والله .. ممكن عادي أراهن بيك في وسط كبار
شفوت النقد الفني حتى لو كان فيهم عوض بابكر ومصعب الصاوي ..الخ .. وبالنسبة لناس كابو وطارق
شريف ..الخ .. فديل لا خيار أمامهم إلا أن يتواضعوا ويتعلموا منك ..
(أتنبأ ليك بمستقبل باذخ) ...

لكن طالما جبت إسم شروق فموضوعك لا يخلو من روج ومكياج وثوب وإلا فأثبت لي انو شروق أبو الناس
كانت في البرنامج بدون الحاجات دي .

Quote: للتوثيق الزول دا لاقاك وين يا ابو حميد ^_^

والله يا اساسى بعد نشرك الموثق دة , الواحد بيحمد ربه انه " العدو" ما متباع البورد

*بوست ود الفاروق زى الاستحما كدة

Quote: والله يا اساسى بعد نشرك الموثق دة , الواحد بيحمد ربه انه " العدو" ما متباع البورد

يا حليلها " قواتي الصديقة " قايلاني خائض في الكسرة والويكة حتى المرفقين ^_^

Quote: *بوست ود الفاروق زى الاستحما كدة

هو الحمام دا اكتر من يرفع بوسته براهو تاني يوم يبقي كيف ؟ ^_^

العزيز عمر الفاروق.....
لك كل الحق فى كلما تطرقت اليه...فى هذا البوست...

مفهوم التأبين هو تخليد واستعاده لما قدم المؤبن خلال زمن عمره ..فى اعادة ترتيب واضافه..ان كان فنا..او شعرا.اوتشكيلا..
او علما ينتفع به...لكن الظاهره اصبحت سلالم للصعود وللظهور..دون التطرق لجوهر البروفايل الشخصى الذى فيه
كل تفاصيل المحتوى ودلالات المعرفه لتطوره عبر تلك السنوات الى ان اصبح رمزا وعلما واشاره..
فى موضوع الراحل محمد ابراهيم زيدان..هنالك سعى حثيث مضطرد للظهور الاعلامى والصداره فى اعطاء كل
اجزاء المعرفه عنه...زبدون معرفه..فالعلاقه بين الشعراء والملحنين فى سياق العادى لكن هنا نجد لها تأطيرا يزيد عن الحد

زيدان بدأ فى 1960 مشواره الفنى وهنالك نفر من اساتذة بيت الامانه..والاعلاميين واكبوا مسيرته وساندوه..وقدموا له كل المساعدات..
ثم هناك دور نادى العباسيه الثقافى فى مسيرة زيدان ودور زيدان فى نشاط النادى الفنى والثاقافى..ثم هنالك حلقة وصل ربطت بين الشاعر
محمد جعفر عثمان..وربطت بين زيدان وعمر الشاعر والتجانى حاج موسى..بدايات عام 1970..واثر هذا الربط...
اغنيات عمر الشاعر التى قدمها لزيدان ملحنه لها سنوات ..عدا فى الليله ديك.....وهى لا تتعدى 4 او خمسه الحان..والتجانى الحاج موسى قدم
3 قصائد لزيدان فقط...فمتابعة التجانى وعمر الشاعر لزيدان قطعا لن تلقى مساهمات كثيفه وكثيره لمجموعات اصطحبت زيدان حتى شب واظهر
مواهبه..ليس حصرا..اللواء عوض احمد خليفه..الاستاذه الطيب عبد الرحمن مبارك محمد سعيد احمد كرم الله..دسوقى محمد خير ذو النون بشرى السر
محمد عوض وعلم الدين حامد وسيد المعتصم..و ومحمود و عصمت العالم وسيف الدين حمد النيل...والكابلى وعمر عبد العاطى والتجانى الكارب ودكتور حسن عمر...
وعوض دكام...والفاتح الهادى...واحمد زاهر...ومجموعة ميز اولا كسلا بالعباسيه. ومصطفى السبكى ..و...وكل هؤلاء يشكلون بوابات المعرفه لزيدان ابراهيم وجوانب حياته
منذ سكنه الاول بالعرضه جنوب الى ان استقر نهائيا فى العباسيه..منذ ستنيات القرن الماضى .. وهم تعمدوا كل ذلك فى كل اللقاءت التلفزيوينه التى تمت منذ فتره..
الاعلام دائما ياخذ بالاسهل ..وكان هنالك دائما عمر الشاعر والتجانى حاج موسى...فى اعادة وتكرار ممل وجاف وفقير فى مادته...وهما الذان اغفلا ذكر محطات مهمه فى
حياة زيدان اولها ..من الذى قدمهم لزيدان..؟؟؟ وماهو دور النادى الثقافى بالعباسيه ..؟؟وما هو دور من سبيقوهم معرفة بزيدان...؟؟.وقيدا كل عمر زيدان الفنى....بربط شعرهم والحانهم فقط..
وقطعا هذا مداعة للاسف..والاسف الشديد..
الاخ عمر الفاروق.....
كما ذكرت ان الملل هو الطابع السائد فى ذلك الاحتفال...وهى البرامج التلفزيونيه التى تناولت زيدان وذكرت فيها افادات جافتها الديبلوماسيه والحرز والادراك
السليم..ثم دائما توظيف مرجعيتهم فى كل شىء فى محاور استجداء لا يفيد..وذر رماد ستكشف ابعاده...
رحل زيدان الى عوامل اخرى ليرحمه الله ويعطر قبره......فماذا هم فاعلون....بعد...؟؟؟اااا

Quote: لكن الناس شكلها بقت تلاوز من سيرة التابين والحاجات دى

أنت زاتكـ كورتكـ فكت يا أبوحميد ..
الناس بقت تلاوز من عمر الفاروق زااااتو !!

والله يا أساسي إنت بقيت بيضة نعامة عديييل كده..معقولة وصلت مرحلة بعض أعضاء سودانيز الكل ما يكون قاعد ليهو في حتة سمحة يقوم يتململ وبتيييين يا رب تطلعني من الحتة دي عشان الحق افتح بوست:).
لكن بيني وبينك المحل ظابط..
أما فيما يتعلق بي البوست الباير فوالله انا زاتي لمن إتهجمت وفي النهاية عرفت دقستي وين.. كان مفروض في العنوان أقول البشير يرقص في تأبين زيدان والنادي السوداني بالغ.
بعدين شايفك لااابد بي الكنز الإسمو أحمد تيجاني ده شكلو ساعي ليك برادو

تخريمة:
يا أحمد تجاني ما بلقى عندك 12 ألف ريال لحدي السنة الجاية أرجعا ليك?

الاخ عمر الفاروق عامك سعيد وربنا يعيده عليك بكل الاماني الطيبه

كلامك ميه الميه والعصارة هنا فأعملوا هكذا تكاريم في حياة هؤلاء الفنانين وليس بعد موتهم ...

احي اصدقائ واحبائ برابطة الصحافة بالخرطوم والفنان الجميل فيصل عبداللطيف الذين كرموا العملاق عثمان حسين

في السعودية كانت لفته بارعه وتوثيق جميل لهم مني التحايا القلبيه وكل من شارك في هذا العمل الكبير الذي

يليق بفنان قامة مثل الراحل المقيم ابوعفان كما يحلو لنا...

وانا اناشد كل المهتمين باهل الفن ان يكرموا هؤلاء الفنانيين الذين افنوا زهرة عمرهم لاسعادنا

انا كانوا احياء ربنا يطيل في عمرهم وانا ماتوا علينا ان نترحم عليهم ونكرمهم

لك الود اخ الفاروق

والله يا عمر الفاروق جنس الشغلانيات ده كرهتنى غنى مصطفى سيد احمد
اى واحد فى وقتها كان عامل لينا فيها رمزى >>> بوست موفق جدا

Quote: ما أي فنان يموت يقومو يلمو لينا أهل الثقافة والفن في أوضة ويربطو ساوند ويجي أي زول ليعدد ماثر الفقيد وقصة جمعتني به وهو إنسان ليس كباقي الأناسين .. ثم يبدأ الحديث بي نبرة حزن وإعتصار دمعات بي الرجالة أو شحوب اللون وكتل الحيل

شمت بتاع عقد الجلاد ما كان فى شايل عوده؟

Quote: بعدين شايفك لااابد بي الكنز الإسمو أحمد تيجاني ده شكلو ساعي ليك برادو تخريمة: يا أحمد تجاني ما بلقى عندك 12 ألف ريال لحدي السنة الجاية أرجعا ليك?

والله يا عمر الفاروق كان كنز ما عارف , انا زول زى زيك (بس عندى اى فون) , اكل الطعام وامشى فى المولات والهايبرماركتس
الحكاية وما فيها اننا بنتقابل كنا بانتظام فى المقاهى بالامسيات ولكن مؤخرا الود اساسى بقى ما بيقدر على قعاد
القهاوى والشيشة لذلك كانت هذه اللمة اليوم نهارية (غداء عمل)

اما بخصوص ال 12 الف , بتلقاها عندى بس ما تصادف مواعيد قسط مدارس الاولاد ولا رمضان ولا العيدين
ولا قبل اجازة الصيف او بعدها ولا تجديد الاقامة او تجديد الجوازات ولا قسط ايجار البيت