زواج الصالونات......

مصطلح يجسد طريقه تقليديه للزواج منذ زمن بعيد
بإختلاف المسمى ونوع الصالون فجوهر الفكره واضح
معركه نفسيه تجتاح العديد من الاطراف من لحظة السعى للفكره
واعلان بدايتها برنة هاتف تتصاعد مدويه فى منزل العروسه المرتقبه
تدب الحياه فى جدرانه وتشعر بنبض الاسقف يتراقص طربا
فلقد بث بوق الامل نفحاته صارخا بانه سوف يتم التخلص من هذا الكائن ذو الهم الثقيل
بدأت أتفهم لماذا يكفهر وجه الزوج حين يبشر بمولوده انثى
تراه صامتا وهو من داخله ثار قلقا ورعبا وهما من تسلسل مراحل هذه الانثى على باقى عمره
ننسى كثيرا بأن ما يجب ان نحمل همه فقط هو قدرتنا على تربية اطفالنا لمواجهة الحياه كما امرنا الله
ولا نتسلل لما هو بيده ونقلق بما هو مسطور لابنائنا ونحزن لما احل بهم ونصر على ان المكتوب يجب ان يكون كما نريد
لم اكن اعرف كم هى مأساه ان اكون انثى
الا حين رأيت مدى تعاسة من حولى لوجودى
وكأنى اشارف على الموت لانى تعديت الثلاثين من عمرى ومازلت بلا زواج
لن يعلم هوية هذا الاحساس اى رجل بتاتا
فنحن فى نظرهم كائنات جباره خارقه مؤذيه محطمه لان كيدنا عظيم
القليل منهم من يعرف حقيقة المرأه وكيف يبث سحرها وينعم به وبفرحها
اغلبهم يتفنن فى تحويلها لكائن شرس تقاتل بلا معطيات وتحارب فى كل الإتجاهات
لست اقول بأن النساء ضحايا ولست أقول بأن الرجال ظالمين
لكن اتمنى ان اقول رفقا بينا فلسنا حوائط من اسمنت قابله للصمود ولسنا اقوى منكم مهما تعلمنا الصعود

.....
عوده لصالون ولطلة المأذون
وبين الصالون والمأذون ساحة قتال يتمزق فيها الإنسان



يتبع...

رانيا
سلام
زواج صالونات
زواج مطابخ
زواج دكاكيني
زواج جمهوري
ياخي فترنا ودايرين العرس
علا العين بصيره واليد قصيره

ا

Quote: لم اكن اعرف كم هى مأساه ان اكون انثى الا حين رأيت مدى تعاسة من حولى لوجودى وكأنى اشارف على الموت لانى تعديت الثلاثين من عمرى ومازلت بلا زواج لن يعلم هوية هذا الاحساس اى رجل بتاتا

فى زمنا ده يا رانيا عادى تعدى التلاتين
لكن زمان قالو لو البت وصلت 15 سنة امها بتفرش عديل وبجبرو اى راجل من العايله يغطى قدحو بسرعه

اريت كان خلونى وصلت ال 15 كان هسى اكون بقيت وزيره
لكن من ما تميت 12 سنه امى فرشت

اخى فدياس
لو كانت الفكره الزواج لما كانت الحياه بهذه الكم من التعاسه
هل انا اللى شايفه معنى الزواج مختلف ولا هل الاغلبيه شايفه معنى الزواج بمعنى مفترس





اختى منال
غايتو امى الله يديها العافيه قربت تشيل الفاتحه فوقى خلاص
:)))))

رانيه
طبعا يطرشني كان فهمت من كلامك حاجه
لكن كده خليني اقول فهمي لزول قرب على التلاتين ولسه ما جاهز للزواج
العنوسه او البوره بالبلدي لم تعد حكرا على الفتيات
فكثير من جيلي دخلوا تحت هذا المسمي ولو قدر لي ان اصل الثلاثين دون زواج فالرماد كال حماد

رانيا
اعف لي قطع تسلسل افكارك بالمداخلات دي
وواصلي ما بدات فيهو وستجديني من المتابعين
تحياتي

Quote: اريت كان خلونى وصلت ال 15 كان هسى اكون بقيت وزيره لكن من ما تميت 12 سنه امى فرشت

منال . فراش العافية ان شاء الله

شكرا رانية موضوع رائع

فدياس الحق نفسك سريع

وشكرا

ود الباوقه
بالجد شرفتنى بطلتك على موضوعى وردك
يديك العافيه

اخى فدياس
الزواج ما قطار لازم نكون فى ساعه معينه واقفين فى محطته لان لو جيه وفات يبقى خلاص ضاعت حياتنا وفرصتنا فيها
ولا لازم اكون فى عمر معين عشان استحقه
ولا لازم اكون بمواصفات معينه عشان ابقى مناسبه له
الزواج معناه اعمق من كده
واختيار الزوج والزوجه اهم من الشيله وليلة الزفاف
وبرغم حياتنا مليئه بنماذج مختلفه مازلنا بنشوف الامور بسطحيه ونحكم على غيرنا من خلالها عشان بس الاغلبيه كده
بغض النظر عن صحتها وصوابها
اتمنى تكون فهمت قصدى

معقولة بس ان يكون زواج الصالونات مدخلا لهذا البوح ؟

الانية التي نعيشها , تحتم علي البعض ان يتاخر في الزواج ..

عارفين الاسباب طبعا , ارتفاع نسبة المتعلمات , وارتفاع الوعي لدي النساء , واخير العوامل الاقتصادية وهي سبب رئيس وبعض العادات والتقاليد والتي لم تعد عائق لدي الكثيرين..

لكن في راي البسيط هي ازمة اختيار فى المقام الاول او شروط ومواصفات من الجانبين...

فيما يتعلق بالان والماضي , فانا عن نفسي لا اقبل المثول للشروط المطلوبة في الزواج حينها,الا فيما يتعلق بقناعاتي الشخصية (زمان المسألة يغلب عليها الفرض والاجبار, والان انت من يختار)..

الزواج او عدمه, مسألة قد تسبب ارق او مشكل نفسي , وهو في حد ذاته غاية سامية شرعت لنا للتكاثر وحفظ النوع من الانقراض ,وهو سكينة ومفتاح للمودة والالفة والتواد و المحبة, يقول المولي عز وجل:

((وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآَيَاتٍ لِقَوْمٍ يَتَفَكَّرُونَ ))

صدق الله العظيم
الاية رقم 21 من سورة الروم..

الم يقل عليه افضل الصلاة والتسليم : "تناكحوا تناسلوا تكاثروا فإني مباه بكم الأمم يوم القيامة"

اعتقد ان الامر عندك , فالبساطة والقناعة هي الحل في رأي المتواضع..

ننتظر حتي اكتمال السرد
كل سنه وانت طيبه يا رانيا





منال
اتعس زوجه شفتها في حياتي قالت انها سعت للزواج براااااها وهي عمرها 14 سنه
فقط عشان تلبس الزفاف .. دا سبب زواجها الرئيسي .. فتأملي






.......
فدياس امرق يمرق جلدك ما تخرب البوست .. من يجيبو سيرة العرس تجي ناطي
نحن فايتنك بالصبر يا حبيب

اخى نوفل
وانت بصحه وسلامه

هل تصدق انى واثقه وبلا فخر وغرور انى حاليا مؤهله لادارة اسره ناجحه واربى اطفال لهم شأن ومعنى وهدف
وبستغرب كيف كان حتكون حياتى لو اتزوجت وانا عمرى 16 سنه مع اول عريس دق بابى
بحمد الله انى وصلت عمرى دا وفهمى دا وليسه فى يدى اختيار الانسان البتمناه
ما حقول زواج الصغره شى سلبى وغلط لانى ما بعرفه وما جربته
ومافى وحده بتعترف بالحقيقه فى تجربتها عشان تفيد غيرها وتنصحها
بنخاف حتى ننصح غيرنا من واقع حياتنا عشان ما يتكلموا فينا ولا يقولوا ما عندها حياء ولا ادب عشان بس قررت تقول الجواها لغيرها

اخى شرف الدين
مدخلى هو ما اثار فى نفسى الحوار والتسائل
ما الذى يجبرنى لهذه التجربه المحطمه والبحسها مهينه لكونى انسانه ليها مشاعر واحلام وعقل
ما الذى يجبر رجل ان يقبل بهذه الطريقه فى زمن اصبح فيه العديد من المداخل فى التعارف بين الطرفين والتفاهم
ما الذى يجبر الامهات ليكونوا قاب قوسين حين تقف لاختيار عروس ابنها تلتزم بالكمال وحين ترجو زواج ابنتها تسعى للاكتمال
لست اناقش سبب تأخر الزواج فكلنا على علم بهذه المشكله وحلولها برغم اصرارنا على تعقيدها
اتفق معك انها ازمة اختيار
تسببت فى زيجات فاشله ونسبة طلاق عاليه واطفال محطمه
وبرضو متمسكين فى الاستمرار فيها
ليه الانسان ما بيتعلم وهو شايف غيره غرقان

الاستاذة / رانيامحمد
موضوعك هام وحيوي
لن آثاره السلبية في المجتمع ظاهرة وبائنة بينونة كبرى
لكن ما ذكرتيه هو قطرة من بحر العادات السيئة والشائنة المنتشرة في المجتمع السوداني
وليست الفتاة وحدها من يعاني
كذلك الشاب يعاني
فقط كل واحد يبكي على مصيبته وليس ليلاه
الحل في ايديناولا يستورد من الخارج
ما كان من العادات الحسنة والجميلة - وهي كثيرة في السودان- حافظنا عليها
وما كان من العادات السيئة الضارة تركناها بدون أن نحزن عليها
وما أكثرها
لكن أين الوعي بالمشكلة والجرأة على حلها بحكمة وأناة؟
أما الشباب
وما أدراك ما الشباب ؟
الدراسة في تلتلة
الشغل مثل العنقاء والخل الوفي
العرس كيف والعمل الا بالواسطة وال..... مافي داعي

أحيك على شجاعتك وأقول لك أصبري
وأسألي الفرج من .............................. الله وحده
مع تحياتي

تسارع الأم فى مرحلة التجهيز تعمدا لإلغاء مرحله التفكير
يتكاتف الاخرون فى التسخين متجاهلين احساس العروس المسكين
فهى مع اول صيحه تنتابها الاهوال
تاره سعيده وتاره مخيفه
خيالات وافكار تتقاسمها
هل هو المنتظر
ام
هو المفترض
,,,
هل هى الحبيبه
ام
الضريبه
,,,
لا اعرف ايهما البيتبادر لأذهاننا مسبقا
خوفنا من الرفض
ام
فرحنا من القبول
....
وهل سوف نُرفض ام ننول رضا الحضور
...
ماذا سوف نرتدى
كيف سوف نبدو
ما الذى يجب قوله وفعله
...
حتى اخر لحظه فى المِرأة
نكون جاهلين بما نراه
هل جميل ام تعيس
هل مناسب ام غير مناسب
...
تتردم الغرفه بالملابس المبعثره
والاكسسوارت والمعدات
نريد ان يروا الجمال فينا
وكثيرا نطمسه بأيدينا
نخاف ان يروا اعمارنا الحقيقه حتى لو كنا فى العشرين
فنحن دوما خائفين منه حتى قبل العشرين
فما بالكم بما بعد الثلاثين
نجتهد لاخفاء أعيننا فهى عمر المرأه الحقيقى
عمر تفكيرها ومعاناتها واحلامها وشقائها وضحكها وبكائها
نمتلك اجساد لا تقهرها السنين
وتكون عقولنا اصبحت اقوى واعمق انين
بجانب قلوب مليئه بالحنين
وكل هذا لا يرى من خلال فستان ومكياج فى لمحة عين
كيف نقاس بهذه السطحيه ونحن نستحق ان تكون لنا هويه
كيف نعامل كأننا معروضات مسلوبة الإراده

,,,...,,,
نخطو مجبرين لداخل الصالون
لنكون محط الانظار والعيون

يتبع...

Quote: هل تصدق انى واثقه وبلا فخر وغرور انى حاليا مؤهله لادارة اسره ناجحه واربى اطفال لهم شأن ومعنى وهدف وبستغرب كيف كان حتكون حياتى لو اتزوجت وانا عمرى 16 سنه مع اول عريس دق بابى

هنا مربط الفرس يا رانيا
زواج الفتاه في سن مبكره خطر جدا عليها وعلي اسرتها من ناحية ادارة البيت والاسرة
ما اظن تكون وصلت سن النضج العاطفي ناهيك عن سن النضج العقلي .. طفله .. مجرد طفله
لا تعرف معني الزواج ولا مسؤلياته .. بل واحيانا لم تختار زوجها بنفسها وانما فرض عليها
بعكس الفتاه وهي في سن اكبر .. بعتقد انها يتكون وصلت لمرحلة بتقدر تميز فيها تختار منو ؟ وليه ؟ وليها مطلق الحريه في كده
وبرضو بتقدر تقود سفينة الاسرة لبر الامان عن جداره ومعرفه ووعي تام .

اخى حاتم
ضاقت لدرجة لم يعد لدينا طاقه للصمود
بتمنى استسلم روحيا
البشر بقوا مرهقين نفسيا
كل شى بقى مرهق
اليوم لاول مره اقرر اعاين فى عيون البشر الماريين قدامى
حسيت بطعنه فى قلبى
صادفنى انسان عايز يقطع الشارع
والرعب ناطى من عيونه
متردد
يمشى ولا يقيف
وقفت له يمر من قدامى وانا حاسه بغصه فى حلقى من احساسه دا
وجيه بعدى زول ماشى تانى عيونه مليانه حزن غريب
منها ما استحملت وقولت مافى داعى اعاين اصلا
انا الفينى مكفينى
شنو الحاصل دا
ليه وصلنا لكده
اخبار الجرايد بائسه
القنوات الفضائيه مستفزه
حياة الناس بؤس
الما متزوج والمتزوج العندو اطفال والما عندو
الكل شاكى وباكى
اكيد دا حساب ربنا فينا
عشان ما عملنا بكتابه وشرعه
لازم كان حيجى يوم نحصد ثمار جهلنا بدينا
ونعانى والخوف من الجاى الحيكون افظع
لاننا مصممين نواصل فى الدرب الاعوج

نتوهم حوارات مسموعه بداخلنا
نفسر نظرات موجهه الينا
لعلنا نطمئن بها ونوقف هذا القلب المرتجف فى حشانا
لا اعلم هل اخجل من نفسى ام من فكرى ام من وضعى ام من مَن حولى
واتسائل من انا وماذا افعل واين هو
هو
الذى حلمت به منذ نعومة عمرى
الذى تخيلته يشد من ازرى
الذى تمنيته فى بكائى وفرحى
دوما كان هو من اهرب اليه حين تنهال عليه الدنيا قسوه
دوما الجأ إليه حين اتوه من دربى
اين هو
هذا الرجل الذى حدثته فى خواطرى
هذا الرجل الذى وصفته بأدمعى
هذا الرجل الذى زرعته بين أضلعى

اقف لاعود منسحبه
فلست انا من ينتظرون
لست انثى تنتظر رجل اينما يكون
لست امرأه هزمتها الظنون
لست اخاف من ما اكون


اعلم انك أتى يامن صبرت عليك بجنون
واثق بأن ربى يقسم الخير لكل انسان لو رضينا بالمقسوم

سرد جميل و شجاع و يصلح رواية. قلم أنيق ومُنمّق ,

متابعين .

سرد جميل و شجاع


الله يعرس ليكن ويعرس لي

اخى عبد الحميد
و
اخى حاتم

سعيده بتواجدكم وردكم

سرد جميل و شجاع


الله يعرس ليكن ويعرس لي

الاخت الفاضلة رانية


لك التحية الطيبة و التقدير


ليك وحشة .. !!

اخى الطيب
لك كل الامتنان معطون بالعبير

لكن علامات التعجب دى حيرتنى شديد
:)))

Quote: فدياس امرق يمرق جلدك ما تخرب البوست .. من يجيبو سيرة العرس تجي ناطي نحن فايتنك بالصبر يا حبيب

نوفل
رجيتك وفي انتظار عينييك كملت الصبر كلو

هتفت البنت العرس العرس

فهتف الولد الفلس الفلس

ســــرد مجنــــون.. وحـــــقيقة لا تهدأ.. منبهر بما أقرأه

حبيبة سودانية ( رانيه ) ...بت شجاعة ..كريمة..سباقة لعمل الخير ..
أها وضحت الجواها بكل أريحية ....نتمنى ليها الخير من جوه قلبنا ....
.
.
.
للذين لايعرفونها هي من أنشط أعضاء شيخ المنابر السودانية ( سودانت )
محلهم في الخرطوم كان قبلة لأعضاء سودانت وكانت تخدم القاصي والداني بكل
ماتملك باريحية دون كلل أوملل دون من أو أذي ...جزاها الله خير الجزاء ..
نسأل الله العلي القدير أن يرزقها الزوج الصالح التقي ...

تحياتنا للجميع .

الأخت رانيا

خواطر جميلة و نقطة نظام مهمة تقود إلي تساؤلات أهم...
مؤسسة الزواج و صمودها بتوادد و تراحم قائم علي الإختيار
بحصافة....
حصافة هنا بقصد بيها تروي و عدم القبول بزوج الواحدة ما مقتنعة بية
من جواها(دي مهمة)... فقط عشان تعرس و تريح دماغها من الكلام!!
لأنه بعدها تفاصيل الحياة الزوجية و المسؤليات أجسم
من شروط بسيطة وضعها المجتمع للزوج اللقطة.
يعني لو الإثنين خطوط متوازية في الطباع حتكون الحياة نكد و أخير عدمها
مثلاً واحد إجتماعي من الدرجة الأولى والآخر يحب الإنغلاق على نفسه ما تيسر
واحد بيحب مشاهدة التلفاز و الآخر قراءة الكتب... الخ
و تفاصيل صغيرة ممكن تعكر صفو الطرفين لو بدأو مشروع
الأسرة عشان يتخارجوا من مأزق العزوبية و السلام.
أحييك علي قرارك الشجاع

عذرا للإطالة
و ربنا يجمعك بنصف آخر حسب مواصفاتك.
آمين.

سلامات يا رانية الواعية

امرأة بمثل ذكائك تهز عش اجعص رجل

الرجاء يريدونها غشيمة مسكينة الا نادرا

وذي ما قلتي في عمرك دا ستكونين افضل في فهمك للدنيا وتربية الاطفال ايضا لديك وظيفة
تتكسبين منها ...

انا دائمة معجبة بيك وبشخصيتك ولطفك انت مثال للبت السودانية الشابة المنجزة العندها شخصية
انتم جيل سنحت له فرص كثيرة ليقوى ويفهم الحياة وينضج
ولكن للاسف الزواج وغيره الى الان ينظر اليه بصورة شكلية جدا
ودا سبب الكوارث الحاصلة اسع
مودتي

رانيا صباحات الخير والسرور
اعجبنى هذا الطرح الجرىء ومايحملة من مضامين واعية
قطعا الزوجة صغيرة السن هوائية وتتملكها العاطفة بشكل كبير
عدا متوسطة السن التى تنحو الى العقلانية وتغليب الرأى والحكمة
وتأخر الزواج فى بلادى يندرج تحت شماعة الظروف الاقتصادية والتدنى المعيشى
وعليك بالمثل ( كل تأخيرة وفيها خيرة) وصباحات العشم جايات رانية امنياتى بالتوفيق.

اخى نور الدين
لو عملوا اتسبيان بين الشباب فى المجتمع لاكتشفنا ان عدد الشباب العازف عن الزواج ووضعه الاقتصادى ممتاز اضعاف من عدد الشباب العازف عن الزواج لعدم الامكانيات
زى ما قولت هى شماعه
لان الزواج ما من شروطه الاساسيه القروش
الزواج قبول واشهار
الناس ما قادر حتى تتصور ان ممكن شخص يعرس بابسط الطرق
اكيد فى شباب بيشتغل وبيقدر يعيش يومه بيومه وحاله ميسور
اكبر طامه هى تكاليف الاعراس الغير منطقيه ومقبوله
لو تم الغائها حنحل مشكله ربع الكميه وفى الربع اللى ما عنده شغل دى بقى نمسك فى الحكومه لانها السبب لكن الباقى مشكلته نفسيه ودى حنحتاج لدكاتره واخصائيين بالكوووووووووووووم عشان يعالجونا منها
:)))))

دكتوره نجاه
خجلتينى والله بكلامك الرائع
وخجلتى حروفى زاتو انها ترد عليكى وتلقى كلام مناسب لما قولتى
اتسمرت فتره طويله متأمله ردك الكتير عليه وعلى شخصى البسيط
انا ماسكه قوى فى النادر
مهما حاولت انى اسلم رويحتى لتيار بلقى نفسى عاااااااااااااااااااااضده وبترفض تستلم
حتى لو نفسى استسلم ما قادره استسلم
جواى بتكون فى حرب بينى وبين الانا وبين العقل وبين القلب وبين الواقع وبين الحلم وبين الواجب وبين المفروض وبين التمنى وبين الحقيقه وبين الناس وبين السنين
لحسى ما عارفه نتيجه الحرب شنو
هل حستسلم ولا حصمد
النهايه خير دليل على التجارب وبرغم من كده ما مفروض تكون الزام للغير
يعنى فى ناس حاربت وفازت وفى ناس حاربت وخسرت والعكس صحيح
غايتو انا املى فى ربنا كبير لانه وصانا ان لا نقنط من رحمته
ولو عشت يوم فى عمرى زى ما بتمنى ومع البتمنى حكون فعلا انجزت فى حياتى

اختى فردوس
كفيتى ووفيتى
وفعلا اغلب الشباب والشابات بيفتكروا ان علاج الحصار هو الانتحار
فى بعض منهم بيستسلم وبيمشى حاله وبيعش حياه بلا طعم ومعنى
وفى بعض منهم بيكون حظه جميل وبتطلع الامور مكسب
وفى بعض منهم بيعالج مشكلته بالبدائل منها الحلال ومنها الحرام
وفى بعض بيفضل الطلاق والانفصال
وفى وفى وفى وفى
طيب ليه من الاول ما اجنب روحى كل الاحتمالات دى واختار بساس ممكن يكون نسبة نجاحه اكثر من فشله
لان فى كتير ممكن تختار بساس وبرضو تفشل
مافى مقياس معين لكن فى قياسات ثابته
اخلاق الانسان ودينه وفكره وديل براهم ما كافيين
لازم يكون فى عاطفه
الحياه محتاجه توازن عشان تكون مستقره
مافى حياه كامله فى حياه مكتمله بالطرفين
مافى سعاده دائمه فى نفوس سعيده
شاكره ردك الراقى وكلامك البلسم
يديكى العافيه

اخى الغالى عليه جداااااااااااااا رضا
انت من اوائل الشخصيات السعدت بمعرفتها فى حياتى لمن دخلت النت
كنت خير اخ وصديق لى وحتى برغم السنين الانقطع التواصل فيها
كانت الذكرى الطيبه خير دليل ورفيق
ودا البنتمنى دايما يكون بينا وبين الناس كلهم
مهما اختلفنا فى ارائنا وافكارنا ومبادئنا وديانتنا واحاسيسنا نجتهد ذكرنا يكون طيب
لان الذكرى الطيبه حتى لو الانسان فارق الحياه ذكرته بتفضل وراه يتحكى بيها الناس ويترحموا عليه بيها يا يلعنوا فيها لو كانت ما طيبه
الكلمه ما شى ساهل مفروض نستخف بيه
ممكن نجرح ناس بدون ما نحس بسبب حرف اتقال بلا اى وعى منا وحتى بدون ما نعرفهم حتى
ما عواره ولا هبل اننا نتعامل باحترام وتقدير وحب لغيرنا حتى لو ما بنعرفهم
فى زمنا دا بقيت حتى الابتسامه بتفسر كانها عملية نصب لغرض خفى
السعاده مافى الزواج ومافى الاطفال ومافى المال ومافى الشغل ومافى المنصب ولا السلطه
السعاده فى الرضى وفى التعامل الطيب وفى النفوس الصافيه

اخى محمد
لو كل انسان ترك العنان لما يريد البوح به بدون ان يتوقف فيما قد يظنه الغير فيه ولا يخاف من التفاسير الخاطئه لما يحاول طرحه حننبهر ونتعلم ونفهم بعض بطريقه اسهل
حتكون حياتنا اكثر مرونه واكثر رحمه
شى صعب تحس انك عايش وخاتى سكين فى رقبتك
لا قادر تتنفس لا قادر تعبر لا قادر تعيش
والسبب انسان زيك
ربنا سبحانه وتعالى ما خلقنا محاصرين ولا جبناء ولا بدون عقل ولا قلب
يبقى كيف انسان زينا هو اللى يخلق فينا هذا الكم من الرعب والحزن والدمار لهويتنا
مافى انسان فينا كامل ومافى انسان فينا خالى من العيوب
كان مفروض دور الانسان للانسان يكون ايجابى
يدينا دافع نحسن من ذاتنا وشأننا واخطائنا
مش يجبرنا نكون بشر محبوس داخل وجدانه حتى ابسط شى وهو الرأى بيخاف يصرح به
فقدنا السعاده عشان فقدنا ذاتنا وكينونتنا
وحفضل اموت وانا باحثه عنها بدل ما اموت وانا عايشه بدونها

أخت رانيا
كلامك فيه حكم
وملاحظات قوية
عن سلوك الناس
وهي لاتدري
لكن ...
لا تدعي سلوك الناس
يؤثر سلبا على شخصيتك
كوني النجمة
كوني كشجرة النخيل
لا تتأثر بالرياح والمعاول
أما الحاصل
فهذا هو ما جنن عبد القادر
وأنصحك بعدم متابعة الاخبار في الفضائيات
لأنها مجرد ( أخبار الحوادث)
في خطة مدروسة
للوصول بالمشاهد العربي
الى الحالة التي وصفتيها
التعود على الدمار والقتل والخراب الخ
أما حياة الناس
فتختلف من انسان الى آخر
وهناك متشابهات
علينا التدقيق في اختيار الصديق
علينا التروي
قبل كشف ما في الصدور
للناس الآخرين
علينا التركيز في اصلاح نفوسنا
قبل اللهث وراء كشف عورات الناس
علينا التضرع والانكسار
الى رب الانام

بدلا من التذلل لبشر مثلنا
لاينفعوا ولايضروا
وأخيراً
من سار على الدرب وصل
فهل عرفنا الحق
حتى نعرف أهله ؟
هناك أناس بيننا
يعيشون حياة طيبة
بدون ضوضاء أو صخب
بدون بهرجة أو فشخرة
بعضهم حياته بسيطة
بعضهم من الموسرين
لانهم عرفوا ربهم حقا
ولأنهم أحبوه حقا
فلا يتأثرون بما يفعل الجهال
أو الضائعون والتائهون
في الحياة الدنيا
ألاحظت ..... ؟
أسماها الله تعالى (الدنيا)
ونحن نتعلق بها ونقاتل من أجلها
وننسى الآخرة الباقية
إما في الجنة
وإما في النار
حفظنا الله واياك
من شر الناس

Quote: فنحن فى نظرهم كائنات جباره خارقه مؤذيه محطمه لان كيدنا عظيم القليل منهم من يعرف حقيقة المرأه وكيف يبث سحرها وينعم به وبفرحها اغلبهم يتفنن فى تحويلها لكائن شرس تقاتل بلا معطيات وتحارب فى كل الإتجاهات لست اقول بأن النساء ضحايا ولست أقول بأن الرجال ظالمين لكن اتمنى ان اقول رفقا بينا فلسنا حوائط من اسمنت قابله للصمود ولسنا اقوى منكم مهما تعلمنا الصعود

بس الكلام دا معقول يا رانبة
هى الام
هى الاخت
هى الابنه
هى الزوجة
هى وهى وهى ووووووو.......الخ
كيف أن تلصقى تهمة الظلم والنعت بالظالم الى
الابن
الاب
الزوج
الاخ
الحبيب
وال وال وال ووووو...الخ

مع خالص مودتى

اخى صلاح الدين
لم الصق تهم
فنحن لا نعيش فى عالم مثالى
نرى فى عالمنا الاخ يقتل اخوه والاب يغتصب ابنته والام تبيع جسدها
وبجانب ذلك نجد الاخ يضحى من اجل اخته والاب يفنى عمره لاسرته والام تبيع راحتها لسعادتهم
لان هذه هى الحياه والواقع
لو كانت المصطلحات تحمى نفوسنا من الشرور لكانت حياتنا اجمل واسعد

اخى حاتم
هذا هو مربط الفرص
سلوك الناس
عقول الناس
احساس الناس
الناس
والساس هو الدين
والدين والناس ما بقوا متلاحمين
ودا الما خلاهم متراحمين
وخلقوا اجيال متنافرين
المشكله ما انا ولا هى ولا هو ولا الفات ولا الفات فات
المشكله شكلها اقدم من كده
وبتتسع مع مرور الوقت
ما حنقدر نخاف الدين اللى وضح ان حيأتى زمان ويكون الماسك على دينه كالماسك جمر من النار
والبخاف منو هل دا زمنا ولا الجاى افظع
وكان حسى ماهو ونحنا متمزقين كده لمن يبقى افظع حيكون حالنا كيف
غايتو داعيه ربى ما احضر الزمن دا ويحفظ ذريتى واهلى وامته ويرحمهم من الزمن دا