تعرضت الي إحتيال من كاتب صحفي شهير ....رأيكم ؟

بما أن الموضوع خاص إلا أن الشخصية المعنية تعتبر عامة ..

من قادة الرأي أوهكذا يسمونهم..

هذا زمان الشفافية والوضوح كل شئ أصبح في الهواء الطلق..

القصة ومافيها أنني تعرضت الي إحتيال من كاتب صحفي شهير وصديق مقرب
ماكنت أتوقع إطلاقاٌ أن يصدر منه هذا السلوك المشين

كاتب وأنت تقرأ له تكاد تجزم بأن الطهر والعفاف والفضيلة والاخلاق تكسو
الرجل من أعلي راسه حتي أمخص قدميه بل هو ملاك يمشي بين الناس ينشد الحق
والجمال وينبذ الكذب والفساد وأكل اموال الناس بالباطل..

فكيف يا سيدي تنهي عن خلق وتأتي بمثله عار عليك أن فعلت عظيماً...

دهشت بل صدمت من هذا الموقف السخيف وتجدني أشعر بالاسي والاسف وأنا اسطر
هذة الكلمات التي كل حرف فيها يعتبر مهمة شاقة لاتقل عن تسلق الجبال
في حق صديق كنت أحترمه وأقدره حتي الامس وبيننا ود خاص وذكريات ماكنت أحسب أن
الخيانة تعرف طريقاً الي قلبه يوماً ما وأنه لايستحق كل هذا التقدير..
شخصية لو ذكرت إسمها سيصاب الكثيرين مثلي بالصدمة والاحباط..
فما أقسي وأدهي وامر ان ينافق الكاتب نفسه قبل أن ينافق القراء
فيصبح مجرد قلم متملق وكاذب يخضع القراء ويفترص فيهم السذاجة والغباء..
فهذا أن دل إنما يدل علي أنه إنسان مريض ومتناقض غير متصالح مع نفسه البته..

القضية المحورية هنا ليست المال فالمبلغ ليس بكبير ولايعني الكثير بالنسبة لي
رغم انه ذو قيمة عبارة عن تكلفة قطعة أرض سكنية لكن ليعلم الناس الي أي درك
نحن وصلنا في السودان إذا كان أمثال هؤلاء هم قادة الرأي ففي من نثق إذن..؟؟
وقد يتسأل سائل بأن الموضوع بسيط وعادي لايحتاج الي هذة الضجة وقد يحل الموضوع
بعيداً عن هذا المكان وربما الرجل ظروفه قد لاتسمح ويحتاج الي وقت وفرصة كافية
لتدبير المبلغ وربما لديه ظروف خاصة بل بالعكس فهو ليس مواطن عادي
أو صحفي مغمور بل شخصية تطرح نفسها في العمل العام وصاحب مكانة إجتماعية وله حضور
ماشاء الله تبارك الله و مستطيع ومقتدر لكنه أناني وإنتهازي لايريد السداد بعد ان
مارس كل الاكاذيب وتمادي في الكذب والمبررات الواهية وانتفت كل أساليب المراوغة والوعود الجوفاء
ما تبقي هو إصراري وعزيمتي القوية في إسترداد حقي حتي لو كان داخل أحشاء
أو في بطن حوت فنحن قوم نكره الظلم والاستحقار والخيانة والاستفزاز..

اردت ان أشركك معي في هذا الامر وأطرح عليك هذا التساؤل لو كنت مكاني ماذا تفعل..؟
مع العلم بأنني أرفض بشدة اللجوء الي اسلوب إغتيال الشخصية وحتي لانتهم بالغيره والحسد
ونوصف باننا من أعداء النجاح وغيره ..

هل تؤيد فضح هذا الكاتب في الهواء الطلق حتي يكون عبرة لغيره مادام الامر يستدعي ذلك
أم السترة واجبة وعفا الله عما سلف حتي لو كلف ذلك الخسارة النفسية والمادية ؟

أم نكتفي بملاحقته قانونياً بالادلة والمستندات..ويبقي الجرح أليماً فالقانون في السودان لايشفي غليل المظلومين ؟


رايكم..؟

Quote: رايكم..؟

سلام ايهاب اسماعيل
الراى ان تكتفى بما كتبته اعلاه و لا تزيد حرفا
و حاول ان تجعله بطريقة او باخرى ان يطلع للتو و الحين على البوست قبل ان تكتر الكتابات التى قد توقر الصدور و تورث مزيدا من العناد
فامثال هؤلاء لا يردعهم القانون بل يخافون من الفضائح و شيل الحال

Quote: فامثال هؤلاء لا يردعهم القانون بل يخافون من الفضائح و شيل الحال

للاسف هم كذلك..حالة عجيبة..قول يا لطيف

أخي الأكرم :
تتبع الأدلة القانونية ، لأن الفضح على الإنترنيت ،
يعقد انتزاع الحقوق ، وربما يدخلك في مأذق الإشانة ،
في حالة فلتانه من حبائل القانون ..
تتبع أخي الأكرم نصيحة المحامي وأختار الجيدين
الذين ليست لهم علائق مشبوهة بكل الأطراف .
ولا تترك حقك القانوني أبداً
*

Quote: ا لراى ان تكتفى بما كتبته اعلاه و لا تزيد حرفا

نِعم الرأي ...

Quote: هل تؤيد فضح هذا الكاتب في الهواء الطلق حتي يكون عبرة لغيره مادام الامر يستدعي ذلك أم السترة واجبة وعفا الله عما سلف حتي لو كلف ذلك الخسارة النفسية والمادية ؟

نعم ... ليكون عبرة لغيره من الحرامية والنصابين ... حتى ولو كانوا كتاب وحملة أقلام ...

ما في حاجة اسمها عفا الله عن ما سلف ... تلقاهو محتال على ناس كتيرين غيرك ...

أكتب لينا اسمه هنا خلينا نشيل ليك حاله ...

تحياتي

Quote: ما في حاجة اسمها عفا الله عن ما سلف ... تلقاهو محتال على ناس كتيرين غيرك ...

شكراً علي التضامن وأتمني ان اكون الضحية الاولي والاخيرة.

سلام يا إيهاب إسماعيل
وعيد سعيد

اسمع كلام أستاذ عوض و أستاذ الشقليني
(لهم التحية و تبريكات العيد)

و بعد يقرأ الكلام دا مباشرةً (ياريت لو الليلة) طوالي رسل
رسالة لبكري أبو بكر اسحب البوست دا .
و لو الزول دا رفض نهائي يحل المشكلة يمكنك أن تتبع الإجراءات
القانونية لو كنت تملك مستندات تثبت حقك هذا .

يا إيهاب ربما الكتابة هنا و فضح الرجل تريحك نفسياً لكن صدقني
ذات الراحة النفسية ستنقلب عكسياً و تعيش بسببها ضغط رهيب خصوصاً
حينما يتعرض هذا الشخص لهجوم من الناس هنا و حينها ربما أنت
نفسك تفقد حقك و تنقلب القضية لإشانة سمعة ضدك .

إيهاب يا اخوي مالك ياخ !! ركز اول مرة اشوفك محموق لدرجة
تفقد التفكير و تتصرف تصرف زي دا !!؟

و كل سنة وانت طيب .

الزميل: ايهاب:


هل الموضوع متعلق باسكان الصحفيين.
كان يمكن ذكر التفاصيل دون ذكر(احتيال)،لان (الطرف الاخر برئ حتى تثبت ادانته).

سلام

غايتو أنا لو حصل لي نفس اللي حصل ليك دا حا إكون تصرفي كالتالي

إذا القروش دي أنا قنعت منها أو فقدانها ما بأثر على مادياً

بفضحو هنا و في كل مكان بدون ذكر إسمه يعني الناس تعرف هو منو بدون ما أنا أذكر إسم أو أي شي يوضح شخصيته

إذا كنت محتاج للقروش بشوف لي محامي شاطر ياخد لي حقي ..


تحياتي و إحترامي

إيهاب سلام ..

غايتو ما عارف ..

لكن أنا قبل كدة تعرضت لي محاولة إحتيال من زول بي نفس مواصفاتك دي ..

لكن حقي قدرت أقلعوا بعد جرجرة شديدة وملاواة وطرق كتيرة ..

وبعد داك إكتشفت إنو كتيرين غيري ضحية لي نفس الزول ..

بس الفرق أنا ما سكت وديلاك سكتو ...

نصيحتي ليك ..

حقك ما تخليو حتى لو 100 جنيه تقلعوا على داير مليم بي كل الطرق المشروعة و(الغير مشروعة) ..

وأنصح بالطرق الغير مشروعة ..لأنها بتختصر ليك الوكت والزمن وبتجيب ليك قروشك بي سرعة ..!


زولك دا عندو ضهر .. لكن إنت الظاهر عليك ما عندك ضهر وناوي تنجلد في بطنك ...

الطرق الغير مشروعة بتعفيك من الجلد وبتقلع ليك قروشك والطرق المشروعة حا تجلدك في بطنك ..!!

إتز يور جويس ..!!

Quote: هل تؤيد فضح هذا الكاتب في الهواء الطلق حتي يكون عبرة لغيره مادام الامر يستدعي ذلك أم السترة واجبة وعفا الله عما سلف حتي لو كلف ذلك الخسارة النفسية والمادية ؟

من ستر مسلما في الدنيا ستره الله في الدنيا زالآخرة

((اللهم أسترني فوق الأرض..وتحت الأرض..ويوم العرض))
((اللهم أستر عوراتي..وآمن روعاتي))

يا إيهاب، سلامات

أنا مع الناس البقولوا فتوهو هنا علشان
يتعظ لسببين:
1) السبب الأول هو علشان يكون عظة للناس وعقاب أدبي
ليهو.
2) السبب الثاني:حتى لا يخدع أناس آخرين راجع مداخلة
ناذر الخليفة.

وأقترح أن ترسل لنا اسمه رباعي على ماسنجر أي زول
عايز يعرف دا منو

تحياتي

فوووووووووووووووووووق

غايتو يا صحفي الغفلة تعبت معانا
عامل فيها الود حريف وشفت ومقرم
الليلة ح نقطعها ليك في رأسك

النذير يا حبيب
عيدك سعيد

الحل الذى طرحنه مريح نفسيا و (يفش) الغبينة
لكنه ربما يتسبب فى ضياع مال اخونا ايهاب الى الابد
فمهما كانت قوة ادلة ايهاب فسوف يجتهد (المشار اليه) و لا نقول السارق فى الدفاع عن سمعته
ربنا بتلفيق شئ ما ضده فالرجل واضح انه فى مركز قوى و متنفذ و يده طويلة و قوية
فليعرف ذاك الشخص ان الامر سوف يبذل للراى العام ان لم يضع الامور فى نصابها
و ان لم بجدى فالذهاب للقضاء

Quote: النذير يا حبيب عيدك سعيد الحل الذى طرحنه مريح نفسيا و (يفش) الغبينة لكنه ربما يتسبب فى ضياع مال اخونا ايهاب الى الابد فمهما كانت قوة ادلة ايهاب فسوف يجتهد (المشار اليه) و لا نقول السارق فى الدفاع عن سمعته ربنا بتلفيق شئ ما ضده فالرجل واضح انه فى مركز قوى و متنفذ و يده طويلة و قوية فليعرف ذاك الشخص ان الامر سوف يبذل للراى العام ان لم يضع الامور فى نصابها و ان لم بجدى فالذهاب للقضاء

حبيبنا البروف عوض
كل سنة وإنت طيب يا زول ياراقي

فعلاً أتفق معك بأن الشخص المشار إليه يدو طويلة
وأضيف عليها كمان عينو قوية
وشكلو كدا كوز النوع أبو كديس، لكن لا أظن
بأن مال أخونا إيهاب سيرجع إليه، وإيهاب
مما كتب هذا البوست شكلو كدا قنع من قروشو


مع فائق تقديري الذى تعلمه

مساء الخير إيهاب..

عليك بالقضاء وإتباع الطرق القانونية بلا كلل أوملل..

لاتستلم لأن الرجل مدعوم أو متنفذ أو يده طويلة فما ضاع حق وراءه مطالب..

أنا شاهد على قصة إحتيال مماثلة حدثت لأخي ومجموعة من أصدقائه وبواسطة صحفي أيضاً..

لم يستسلموا وطرقوا كل الوسائل القانونية الممكنة حتى رجع لهم حقهم كاملاً غير ناقص..

أنصحك أيضاً بأن لا تكتب إسمه هنا إلا إذا كنت تملك من الأدلة والبراهين القانونية مايكفي لدعم إتهامك له وتشهيرك به..

تحياتي

Quote: عليك بالقضاء وإتباع الطرق القانونية بلا كلل أوملل.. لاتستلم لأن الرجل مدعوم أو متنفذ أو يده طويلة فما ضاع حق وراءه مطالب.. أنا شاهد على قصة إحتيال مماثلة حدثت لأخي ومجموعة من أصدقائه وبواسطة صحفي أيضاً..

للاسف القضاء في السودان معطوب..
وقضيتنا ليست الفلوس بل ليعلم الناس حالنا البائس..

سلام
ايهاب وضيوفه كل عام وانتم بخير
بقينا نودي ونجيب
وخليت مجموعة من الصحفيين المعروفين اصبحوا مشكوك في امرهم
عشان كدة لازم تقول اسم الزول عشان هو ذاتو يجي يبرئ نفسه

Quote: لازم تقول اسم الزول عشان هو ذاتو يجي يبرئ نفسه

الاخ عبد الخالق..كل سنة وانت طيب

لا لا يأخي ليس كلهم هنالك شرفاء جديرون بالاحترام لهم التحية والتقدير..

ايوة يا ايهاب
هنا معانا مجموعة من الصحفيين
اول حاجة الظن حيمشي عليهم
عشان كده اما كان تعمل ما تريده دون اثارة هذا البوست
او تعلن عن الشخص دة
اقول ليك حاجة انا خمنت وقلت احتمال الصحفي ده فلان


يا زول التعميم ده مضر بالببوست وبالصحفيين
اما ان تعلنه جهارا
او تسحب البوست

Quote: [أنا مع الناس البقولوا فتوهو هنا علشان يتعظ

الاخ النذير سلامات وكل عام وأنت بخير..

ربنا يصلح الحال ويجيب الفيهو الخير..

Quote: [((اللهم أسترني فوق الأرض..وتحت الأرض..ويوم العرض)) ((اللهم أستر عوراتي..وآمن روعاتي))

اللهم أسترنا جميعاً يارب..

Quote: [ أنا قبل كدة تعرضت لي محاولة إحتيال من زول بي نفس مواصفاتك دي .. لكن حقي قدرت أقلعوا بعد جرجرة شديدة وملاواة وطرق كتيرة .. وبعد داك إكتشفت إنو كتيرين غيري ضحية لي نفس الزول ..

هم بالله الناس البي مواصفات دي جشعين لهذة الدرجة..
حالة تجنن..علي السودان السلام إذن..

Quote: [ زولك دا عندو ضهر .. لكن إنت الظاهر عليك ما عندك ضهر وناوي تنجلد في بطنك ...

مثلي لا يجلد علي بطنه ياأخي..

أنا غلبان ما عندي ضهر..عندي وجع ضهر فقط..

Quote: إذا القروش دي أنا قنعت منها أو فقدانها ما بأثر على مادياً بفضحو هنا و في كل مكان

رغم ان الحق أبلج إلا اني أعطي الطرف الاخر فرصة ليراجع نفسه ويصحح خطأه..

كلما وقعت ضحية إحتيال أطلقت ضحكة مجلجة و تذكرت صديقي حامد عثمان..
مخرج تلفزيوني..كان يؤبخني دائماً باني احسن الظن في من لايستحقون اكثر من اللازم..

الاخ فيصل

نعم المتهم برئ حتي تثبت إدانته وأنا أملك مايؤكد
إتهامي له وما يدينه وأملك من الادله ما يجعلني
ان اقول عنه بكل ثقة ماتم إحتيال صريح وواضح..

خلي بالك من الحفر...

Quote: إيهاب يا اخوي مالك ياخ !! ركز اول مرة اشوفك محموق لدرجة تفقد التفكير و تتصرف تصرف زي دا !!؟ و كل سنة وانت طيب .

وأنت طيب اخ سفيان..

الموقف مستفز ومثير للغضب والاشمئزاز والقضية ليست فلوس..

أسف لو كنت أنفعلت بعض الشئ ..

الهدف ليست إشانة سمعة لشخص بقدر ماهي حالة إستياء من
تصرف مرفوض من شخص في موقع يجب ان لا يصدر منه مثل هذا الموقف..

Quote: < لأن الفضح على الإنترنيت ، يعقد انتزاع الحقوق ، وربما يدخلك في مأذق الإشانة *

مسكينة السمعة أصبحت مبتذلة هذة الايام حتي المحتالين لديهم قناعة بان سمعتهم توزن بالذهب ه..

يا ايهاب الجاتك في مالك سامحتك، بعض الشيء،
عندك ما يثبت حقك من مستندات، عليك بالقضاء،
__
أما لو ما عندك ما يثبت، استخير شيطانك، والحل الآمن أعملو..

Quote: أما لو ما عندك ما يثبت، استخير شيطانك، والحل الآمن أعملو..

يجازي محنك يا ياسر..

كل عام وأنت بخير..

القصة ومافيها أنني تعرضت الي إحتيال من كاتب صحفي شهير وصديق مقرب
ماكنت أتوقع إطلاقاٌ أن يصدر منه هذاالسلوك المشين

كاتب وأنت تقرأ له تكاد تجزم بأن الطهر والعفاف والفضيلة والاخلاق تكسو
الرجل من أعلي راسه حتي أمخص قدميه بل هو ملاك يمشي بين الناس نشد الحق والجمال
وينبذ الكذب والفساد وأكل اموال الناس بالباطل. (إنتهى الاقتباس)

وما هو الغريب يا إيهاب إسماعيل؟؟
مش إنت ايهاب اسماعيل الصحفي الكوز بتاع ألوان حسين خوجلي قبل إغلاقها بسبب انقسام الجبهة الإسلامية أواخر 1999 بسبب الصراع داخل تنظيمكم؟
ما دام المذكور صحفيا وصديقا مقرباً، على حد وصفك، فإنه لا بد ان يكون أخوك في الله وفي الجبهة الإسلامية وزميلك في العمل الصحفي الدعائي لنظام الجبهة الإنقلابي الفاشي منذ 30 يونيو 1989، أي انه كوز...والسلوك المشين من شيم الكيزان لأنهم تربوا في كنف تنظيم فاسد ومفسد.
ولعلمك ليس هناك كوز (وأنت كوز وتعرف الكيزان جيدا) يمكن وصفه بأنه ينشد الحق والجمال وينبذ الكذب والفساد وأكل أموال الناس بالباطل....بل العكس تماما: هم أعداء للحق والجمال منافقون يتنفسون الكذب ويحتالون ويأكلون أموال الناس بالباطل ويبطشون ويقتلون، ويتلونون كما الحرباء، تماما كما فعلت أنت إيهاب إسماعيل: كنت تعمل صحفيا في ألوان الساقطة، التي كانت تلعب دورا فاعلا في الآلة الإعلامية لنظام الجبهة الإنقلابي الفاسد والفاشي وفي الدعاية السياسية والتضليل الجماعي، وتتشدق الآن بالدفاع عن الحريات الصحفية وحرية التعبير والديمقراطية.

Quote: مش إنت ايهاب اسماعيل الصحفي الكوز بتاع ألوان حسين خوجلي قبل إغلاقها بسبب انقسام الجبهة الإسلامية أواخر 1999 بسبب الصراع داخل تنظيمكم؟ ما دام المذكور صحفيا وصديقا مقرباً، على حد وصفك، فإنه لا بد ان يكون أخوك في الله وفي الجبهة الإسلامية وزميلك في العمل الصحفي الدعائي لنظام الجبهة الإنقلابي الفاشي منذ 30 يونيو 1989، أي انه كوز...والسلوك المشين من شيم الكيزان لأنهم تربوا في كنف تنظيم فاسد ومفسد. ولعلمك ليس هناك كوز (وأنت كوز وتعرف الكيزان جيدا) يمكن وصفه بأنه ينشد الحق والجمال وينبذ الكذب والفساد وأكل أموال الناس بالباطل....بل العكس تماما: هم أعداء للحق والجمال منافقون يتنفسون الكذب ويحتالون ويأكلون أموال الناس بالباطل ويبطشون ويقتلون، ويتلونون كما الحرباء، تماما كما فعلت أنت إيهاب إسماعيل: كنت تعمل صحفيا في ألوان الساقطة، التي كانت تلعب دورا فاعلا في الآلة الإعلامية لنظام الجبهة الإنقلابي الفاسد والفاشي وفي الدعاية السياسية والتضليل الجماعي، وتتشدق الآن بالدفاع عن الحريات الصحفية وحرية التعبير والديمقراطية.

عادل علي وضعت إيهاب في موضع صعب جدا بعد أن لمحت تلميحا لا يفوت علي جاهل من هو الصحفي المقصود وهنا ليس أمام إيهاب إلا أن ينفي بأن الشخص ليس هو المقصود لأن السكوت سيكون تأكيد لما ذهبت إليه. وربنا يكضب الشينة!

دا فلم هندي ...

انت داير تستخدم البورد دا للضغط والتهديد والوعيد؟

يا قول اسمو؛ يا شيل البوست ... بلاش لعب عيال ...

نحن ياما اتشاتمنا هنا واتوجهت لينا التهم ... ما استغلينا البورد دا الإستغلال الإنتهازي السوقي دا ...

(بكري ابوبكر الزول دا لو ما قال قروشو كم وعند منو والمناسبة شنو كموضوع عام للنقاش؛ امسح البوست دا!)





... المهم ....

والله بعد كلام عادل على، إنو أخونا إيهاب
صاحب البوست طلع ظاطو كوز، الموضوع على
قول تبارك طلع فيلم هندي

يا إيهاب ما سمعت نصحية الثعلب المحتال
للغراب في كتب الإبتدائي بتاعت بخت الرضا
التى قدمها لنا البورفيسور عون الشريف قاسم؟!

ونصيحة الثعلب للغراب:
ناداه يا غراب ما ظلمتكَ --- بمثل ما عاملت قد عاملتكَ
ظلمت انساناً* عليك ما اعتدي --- وما فعلت اليوم تلقاه غدا
المال لا يخرجُ عن كف الفتى --- إلا من الباب الذي منه أتى

غايتو يا إيهاب قروشك دي لو حلال بترجع ليك
لكن لو شلتها من الشعب السوداني، فهذه عدالة السماء

وبعد كلام اخونا عادل على أتوقع أن يكون
الكوز المشار إليه هو "حسين خوجلي"
ظاطوووووووووو
-----
* الإنسان هنا هو الشعب السوداني

سلامات يا ايهاب

من الافضل ان تشرح لينا كيف حدث هذا النصب واين قطعة الارض
حتى يستفيد الناس من قصتك

عايزين نعرف الكيفية بالله..

وهل غيرت الملكية قبل استلام كل المبلغ؟

اكثر الناس تعرضا للنصب يحدث في بيع وشراء الاراضي.
يمكن يتحول البوست دا لبوست مفيد جدا
لماتعرض قصتك.

Quote: من الافضل ان تشرح لينا كيف حدث هذا النصب واين قطعة الارض حتى يستفيد الناس من قصتك عايزين نعرف الكيفية بالله..

سوف أشرح كل هذة التفاصيل في بوست منفصل
أشرح فيها للناس كيفية وقعت ضحية للاحتيال
وأتمني أن أستطيع أن أكشف للناس أيضاً
الشخص المتهم أذا ما توفورت الشروط القانونية
اللازمة..

تحياتي..

Quote: يا قول اسمو؛ يا شيل البوست ...

يا تبارك أنا لو قادر اقول إسمو بالبساطة دي ما كان
فتحت البوست ده وطرحت هذا التساؤل علي الناس..

الموضوع بجد صعب وفيهو تعقيدات قانونية وتبعات متعلقة
بالطرف الاخر أضعها دائماً في الحسبان..

والمنبر فيهو تجارب سابقة متعلقة بالتهشير وإشانة سمعة..

الاخ عادل علي ...

كل عام وانت بخير.. أفتقدك مسجل غياب الفترة الماضية لعل المانع خير..

لم تجيب علي السؤال المطروح في البوست أو تقدم اي إستشارة
يمكن أن تفيد سوي إنطباع ووجهة نظر مسبقة تؤثر عليك
دائماً في إبداء رايك بشفافية..

تحياتي..

حسب نصيحة بعض الاصدقاء والمتداخلين
سوف أبداء اولي الخطوات القانونية
ضد هذا الشخص..
وسوف اقوم بفضحه هنا في هذا المكان في الهواء
الطلق حال توفرالشروط القانية اللازمة لدلك..

جزيل الشكر لكل الذين تضامنوا معنا
ومعاً لفضح كل براثن الفساد وإعلاء كلمة
الحق والشفافية..

وكل عام وأنتم بخير..

كدي يا إيهاب أول حاجة الزول الأسمو عبد الخالق أمن الله دا ما تسمع كلامو ..!

الحاجة التانية كدي رسل لي في الماسنجر إسم زولك دا بعد داك أنا بوريك تعمل شنو ..

لم تجيب علي السؤال المطروح في البوست أو تقدم اي إستشارة
يمكن أن تفيد سوي إنطباع ووجهة نظر


إيهاب يبدو انك لا تعرف معنى الإنطباع ولا تعرف ماذا تعنى عبارة "وجهة نظر"....
أولاً، حقيقة انك كوز كنت تعمل في صحيفة ألوان الساقطة ليست انطباعا ولا وجهة نظر.
ثانياً، حقيقة أن ألوان حسين خوجلي، التي عملت فيها أنت إيهاب إسماعيل حتى إغلاقها بسبب انقسام الجبهة الإسلامية، لعبت دوراً مهما في الآلة الإعلامية لنظام الجبهة الإسلامية الإنقلابي القمعي ليست انطباعا ولا وجهة نظر.
ثالثا، حقيقة انك شاركت (بحكم عملك كصحفي فيها) في كل ما اقترفته هذه الصحيفة الساقطة ليست انطباعاً ولا وجهة نظر.
رابعا، زيف ادعائك الدفاع عن الحريات الصحفية وحرية التعبير ليس انطباعا ولا وجهة نظر...وزيف ادعائك يكمن في أن تشدقك بالدفاع عن الحريات الصحفية وحرية التعبير لم يبدأ إلا بعد إغلاق ألوان...الصحيفة الصفراء التي كانت معولا من معاول تقويض الديمقراطية وبوقا لنظام الجبهة الإنقلابي القمعي وأهم أدواته في الدعاية السياسية والتضليل الجماعي والتشويه.
خامساً، الغش والفساد والإحتيال والتضليل والكذب غيض فقط من فيض قيم وسمات متدنية تجري في دم أتباع الجبهة الإسلامية قصراً ومنشية.
أخيرا، فيما يتعلق بادعائك التعرض للإحتيال: المتهم بالإحتيال كوز (قطع شك)...وضحية الإحتيال المزعوم كوز...لذا من الأفضل أن تستشير كوزا آخر، لأنكم تعرفون طرائق بعضكم جيداً!