سر العلاقة بين الدولار والنساء !!

الدولار مذكر
واليورو مذكر
والريال مذكر
والدينار مذكر
والدرهم مذكر
والين ذكر
والفرنك ضكر
و الإسترليني راجل ... ود رجال
وحتى الجنيه بتاعنا التعبان ده ... مذكر
وأولاده - عليهم الرحمة – كانوا رجال (يملو الجيب) ..
القرش، أبقرشين، الشلن، الريال، الجنيه أب تور،
الجنيه أبو جمل ، الله يأجرنا فيكم يالتور والحمل والجمل .
ويطراكم بالخير، كان هيجتو فينا الذكرى.

الصيغة الوحيدة التي يرد فيها الجنيه مؤنثاً
عندما ينطق كأنثى جان ... (جِنية مرة الجن)
والعلاقة بين الجن والنساء معروفة ..
لا نزيد فيها عما ورد في الدين عن كيدهن وكيد الشيطان،
وأن القرآن اختص سورة باسم كل منهما (الجن والنساء) .
أيضاً العلاقة بين النساء والذهب مفهومة للجميع
فلا يذكر الذهب حتى تذكر النساء .
ولا يذكر ارتفاع سعر الذهب في البورصة العالمية.
إلا مرتبطاً بغلاء المعيشة .. أقصد غلاء المهور ..
وازدياد الطلب على جمهور النساء ..
وتعزز البنات كما تعززت الطماطم قبل ايام.

لنظرية دي بتتوافق مع موقف صديقي العزيز
الذي ظل صائماً عن الزواج خمسة وثلاثين سنة
والتفت فجأة نحو النساء فتزوج خلال هذا العام
ثلاثة من زميلاته في الشغل (يعني فطور وغداء وعشاء).
وتزامن عام زواجه من الثلاثة مع ارتفاع أسعار الذهب محليا وعالمياً
في عرسته الأخيرة سألته عن سر انجذابه نحو البنات الضعيفات (المعصعصات)
( الواحدة تسلم عليها تقول ماسكلك طاب).
فكان رده لي منطقيا وممنهجا حين قال:

( ياخ موظفات الزمن ده كلهن كدة،
الواحدة تلقاها زي القشة أم روح لابتاكل لا بتشرب،
تسألها تقول ليك دي الموضة، وهي تلقاها تلملم في القروش وتخت في الصناديق
وكلما تلم ليها كوتة قروش تسويها في غويشات وحلق ،
وتجي خاشة المكتب تكشكش في سلاسلها لا من تسل روحك).

من كلامه قدرت أفك الاشتباك بين العرس والدهب
لكن علاقة الكلام ده كلو بالدولار شنو ؟
كدي خلونا نرجع لي موضوعنا الأصلي وما نتوكر في مواضيع جانبية

حاولت أجتهد أنزل صور الحاجات التلاتة المذكورة في البوست
(الثلاثي الخطير الذهب والدولار والنساء)
فوجدت الصور المتوفرة في النت بتاعة (الدهب والدولار) وبس
صور النسوة يعميني فيهن ..
العايز يجتهد ويفتش براهو يمكن يلقاهن . .

هذه هي الصور، فتأملوا ..
1- الدولار.



2- الدهب .


3- النساء .

قريب لي مغترب بالسعودية 16 سنة وما زال ..
أخيرا أعلن رغبته في الزواج
وكان اعلانه عن رغبته في الاتصال بالنساء متزامنا مع إعلان انفصال الجنوب
اتصلت به خلال هذا العام عدة مرت أساله كل مرة عن مواعيد العرس
فكان يسألني أولاً عن سعر الدولار ..
وعندما أقول له أن السعر طالع يقول لي ..
نرفع العرس شوية.

Quote: وأن القرآن اختص سورة باسم كل منهما (الجن والنساء) .

وكذلك النمل..
والفيل .

فهل يعنى هذا شيئا ؟!

؛؛؛؛؛؛؛؛؛؛؛؛؛

إنت زعلان يعنى ..
عشان مافى سورة بإسم ( الرجال ) ؟

آمنة مختار حبابك ...
وطالما جيتي داخله تووش وبدون سلام ..
فلا شك أنك تمثلين إحدى القبائل التي يتحدث عنها البوست *

Quote: وكذلك النمل.. والفيل . فهل يعنى هذا شيئا ؟!

طيب يا بت مختار .. علاقة النمل بالفيل شنو
لو عارفة أي ارتباط غير الحكاية بتاعة (يلمها النمل ياطاها الفيل) اشرحيه ...
وبالمرة أشرحي لينا سر الحجر الذي يحمله السودانيين عندما يتصادف وجود أمرأة واحدة معهم.
وسبب استخدام نفس الحجر لرجم الشياطين حسب الاعتقاد السائد .
وبالمرة اسمحي لي اسرد ليك موقف بسيط مر علي الاسبوع الفات...
حكاية بسيطة عن علاقة النساء والجن.
قبل أيام استودعني زميلي في المكتب أمانة ..
عبارة عن غويشات دهب.
وضعتها في الدولاب وحذرت منها المدام بشدة ...
(أوع واحد يقرب من دولابي ده).
.
.

يوم الجمعة الفاتت افتقدت الأمانة ولم أجدها
لميت ناس البيت كلهم طابور وبديت اصرف في النقة
استهليت بقرآن كريم ثم حديث شريف
وحديث عن أهمية الوفاء بالامانة وشرف البورد..
وانتهيت بمآلات ضياع الغويشات في حق الأسرة التي قد تصل السجن والتشريد
.
.
المدام هدأت من روعي وقالت لي بكل بساطة: (الدهب معاهو الشيطان)
كدي قول بسم الله وأقرأ سورة الجن
ولو شالن برجعن
..
..
وقد كان.














* (المقصود قبيلة النساء عشان مافي زول يفهم غلط).

شيل شيلتك ياخونا ..
ولا أقول ليكـ أستخدم الساتر أحسن ليك

أزيك يا مسلمي
هو أنا قلت حاجة ..
يا أخ ده مجرد همس خواطر..
ليس إلا..
..
..
وبعدين يااخي تعال ..
انت محلك مش هنا..
انت محلك هنا وجه الشبه بين دولة الجنوب ودولة الشمال ..

سلامات يا عمر

Quote: وقد كان.

و قد كان شنو!؟

قريت سورة الجن، الجن رجع الدهب!؟

سؤال جاد

الاخ قيقراوي
جمعتك مباركة ياحبيب

Quote: و قد كان شنو!؟ قريت سورة الجن، الجن رجع الدهب!؟ سؤال جاد

اهلنا في السودان دائماً
لديهم اتعقاد قوي في علاقة الجن بالدهب
والأساطير العربية كثيرة في هذا المجال
حتى في أوساط أهلنا كثير ما نسمع بان فلان عثر على (قلة) من الذهب
ولكنه لم يستطع اخراجها بسبب الجن
وان الجن تعرض لشخص وجد كنز مدفون

في حلتنا رجل عجوز مازالت رقبته ملوية
دائماً ما يحكي عن الجان الذي (كفته) وهو صغير
عندما كان يبحث عن كنز أحد أمراء العنج بين بئره وحفيره

أما في موضوعي هذا فقد وجدت غويشات صديقي
تحت الدولاب وليس فوقه كما تركتها
ولا ادري علاقة الجن بذلك
ولكني مقتنع من ان جمهور النساء
هم من يصدقون كل قصص الجن والكجور والشيوخ

Quote: وبالمرة أشرحي لينا سر الحجر الذي يحمله السودانيين عندما يتصادف وجود أمرأة واحدة معهم. وسبب استخدام نفس الحجر لرجم الشياطين حسب الاعتقاد السائد .

ودى عايزة شرح !!
عشان المرة شيطان طبعا ..

Quote: وبالمرة اسمحي لي اسرد ليك موقف بسيط مر علي الاسبوع الفات... حكاية بسيطة عن علاقة النساء والجن. قبل أيام استودعني زميلي في المكتب أمانة .. عبارة عن غويشات دهب. وضعتها في الدولاب وحذرت منها المدام بشدة ... (أوع واحد يقرب من دولابي ده). . . يوم الجمعة الفاتت افتقدت الأمانة ولم أجدها لميت ناس البيت كلهم طابور وبديت اصرف في النقة استهليت بقرآن كريم ثم حديث شريف وحديث عن أهمية الوفاء بالامانة وشرف البورد.. وانتهيت بمآلات ضياع الغويشات في حق الأسرة التي قد تصل السجن والتشريد . . المدام هدأت من روعي وقالت لي بكل بساطة: (الدهب معاهو الشيطان) كدي قول بسم الله وأقرأ سورة الجن ولو شالن برجعن .. .. وقد كان.

ليك حق ..تقارن النساء بالشياطين ..
مادام بيتكم عمران بيهم ..قرقرقر


×××××××××××××××

ماشفت زول فى حياتى ..يفضح أهل بيته كما فعلت ..
لكن يا سودانيزاونلاين فيكى العجب .

Quote: أما في موضوعي هذا فقد وجدت غويشات صديقي تحت الدولاب وليس فوقه كما تركتها ولا ادري علاقة الجن بذلك ولكني مقتنع من ان جمهور النساء هم من يصدقون كل قصص الجن والكجور والشيوخ

أعتقد إنك تصدق( قصص الجن والكجور والشيوخ )
أكثر من (جمهور النساء )..

والدليل : حكايانك العجيبة أعلاه ..

الصديقة آمنة بت مختار ...

Quote: ماشفت زول فى حياتى .. يفضح أهل بيته كما فعلت ..

ماتلخبطي الكيمان ..
الصور الرمزية في القصة لا تفوت على كاتبة مهمشة أقصد مميزة مثلك

Quote: أعتقد إنك تصدق( قصص الجن والكجور والشيوخ ) أكثر من (جمهور النساء )..

أنا أقر بأني أعتقد
لكن انت البخليك تعترفي شنو؟
لولا أن أشق عليك لسالتك تفسير ما جاء في الأحاجي
عن أن ابليس أوحى لأمنا حوا أن تقنع ابونا آدم
للأكل من الشجرة المحرمة.
وبعد أن نزلا إلى الأرض ظلت تبحث عنه ليل نهار
وعندما وجدته ..
صرح لها آدم أنه كان يبحث عنها طول النهار، ثم ينام ليلا
فما كان منها إلا أن قالت (أنا ما اتحركت من محلتي النزلت فيها دي).





..
..
نعود لحكاية انخفاض سعر الدولار مؤخراً
وعلاقته بقيمة المرأة في البورصة السودانية

Quote: لولا أن أشق عليك لسالتك تفسير ما جاء في الأحاجي عن أن ابليس أوحى لأمنا حوا أن تقنع ابونا آدم للأكل من الشجرة المحرمة. وبعد أن نزلا إلى الأرض ظلت تبحث عنه ليل نهار وعندما وجدته .. صرح لها آدم أنه كان يبحث عنها طول النهار، ثم ينام ليلا فما كان منها إلا أن قالت (أنا ما اتحركت من محلتي النزلت فيها دي).

لأ عليك الله ما تشق على ..عشان ما بستحمل وكدا ..
×××××××××××

وكمان ..عايزنى أفسر الأحاجى الخيالية ؟!
ذنبى شنو إنك بتصدق كل ما يقال لك ...قرقر