كيفية أستيراد اللوارى والقلابات والتراكترات .. هل من يمتلك أى معلومة؟

هل من يعرف عن كيفية أستيراد اللوارى والقلابات والتراكترات .. والمعدات الزراعية مثل الحاصدات والدساكى .. وبقية مدخلات الأنتاج الزارعى؟

بريمة

اللوارى والقلابات اقل من عشرة سنة عادى تدفع الجمارك واكتر زى موديل 99 تعمل استثنا بامليونين ونص + الجمارك اقل من شهر انا


اشتريت موديل 99 ودفعت 22 مليون جمارك + الاستثنا


تحياتى بريمة

من واقع مهنيتي بادارة الهندسة الزراعية وزارة الزراعة وفيما يخص المعدات الزراعية من تركترات والاليات تختلف القصة من غرض الاستيراد اذا كان الغرض هو بقصد التجارة وادخال كمية تجارية من المعدات تبدا من ان يكون المستثمر في هذا المجال ان يحصل علي وكالة من الجهة المصنعة وان يوفر خدمات ما بعد البيع من صيانة واسبيرات والشرط الاخر هو الحصول علي شهادة اختبار واجازة لهذه الالة تفيد انها صالحة وفق ظروف السودان وخالية من العيوب الهندسية ويسمح له بادخال عينة واحدة للاختبار ويتم اختبارها بادارة الهندسة الزراعية وتخضع للاختبار المعملي والحقلي وتكون تحت الرقابة لفترة 300 ساعة بغرض اختبار التحمل للتركتر و150 ساعة بالنسبة للمعدات الاخري يحصل بعدها الوكيل علي شهادة c وتقرير وافي عن كل الملاحظات التي تم رصدها اثناء الاختبار ولا يسمح له بادخال الالة اذا ظهر بها اي خلل فني او هندسي الا بعد اجراء التعديل اللازم بواسطة الشركة المصنعة بعدها يسمح له يادخال 25 وحدة يرتفع هذا العدد الي 50 وحدة بعد الحصول علي الشهادة bوالتي يحصل عليها بعد التاكد من توفر خدمات ما بعد البيع ليحصل بعدها علي الشهادة A,والتي بموجبها يسمح له بموجبها ادخال اي عدد من الاليات
علي الاستعداد الكامل للمساعدة والمشورة في موضوع الاليات الزراعية انا عمل مهندس زراعي بادارة الهندسة الزراعية

بالنسبة ليك انت مافي أي مشكلة ..
جيب أي حاجة و أدفع أي حاجة .. و دخل أي حاجة ..

أمورك سااالكة ..

العبار بريمة بلل.

أول حاجة لازم نحدد الأختصاصات.

أنت راعي ولا مزارع؟

عاجل الى من يقومون بشحن امتعتهم ومعداتهم من أمريكا وكندا!

بريمة
نصيحة لوجه الله تعالي
اذا ما كان عندك نية تزرع بنقو جلى الفكرة

Quote: من واقع مهنيتي بادارة الهندسة الزراعية وزارة الزراعة وفيما يخص المعدات الزراعية من تركترات والاليات تختلف القصة من غرض الاستيراد اذا كان الغرض هو بقصد التجارة وادخال كمية تجارية من المعدات تبدا من ان يكون المستثمر في هذا المجال ان يحصل علي وكالة من الجهة المصنعة وان يوفر خدمات ما بعد البيع من صيانة واسبيرات والشرط الاخر هو الحصول علي شهادة اختبار واجازة لهذه الالة تفيد انها صالحة وفق ظروف السودان وخالية من العيوب الهندسية ويسمح له بادخال عينة واحدة للاختبار ويتم اختبارها بادارة الهندسة الزراعية وتخضع للاختبار المعملي والحقلي وتكون تحت الرقابة لفترة 300 ساعة بغرض اختبار التحمل للتركتر و150 ساعة بالنسبة للمعدات الاخري يحصل بعدها الوكيل علي شهادة c وتقرير وافي عن كل الملاحظات التي تم رصدها اثناء الاختبار ولا يسمح له بادخال الالة اذا ظهر بها اي خلل فني او هندسي الا بعد اجراء التعديل اللازم بواسطة الشركة المصنعة بعدها يسمح له يادخال 25 وحدة يرتفع هذا العدد الي 50 وحدة بعد الحصول علي الشهادة bوالتي يحصل عليها بعد التاكد من توفر خدمات ما بعد البيع ليحصل بعدها علي الشهادة A,والتي بموجبها يسمح له بموجبها ادخال اي عدد من الاليات علي الاستعداد الكامل للمساعدة والمشورة في موضوع الاليات الزراعية انا عمل مهندس زراعي بادارة الهندسة الزراعية

صاحب البوست لك التحية
باشمهندس رهف
سلام عليكم
لى إستشارة
درجنا فى القضارف على الزراعة مستخدمين الدسك العريض الذى يحرث حراثة سطحية
لا تتغلغل الى باطن التربة مما يسهم سلبا فى فشل الزراعة وضعف الإنتاجية
وطبعا الحرث العميق بإستخدام التراكترات الكبيرة مكلف جدا ولا قبل لنا به
ألا توجد آلة حرث عميق تستخدم مع التراكترات العادية وكم تستغرق من الوقت
لحرث مائة فدان مثلا وكم تستهلك من الجازولين لحرثها.
[email protected]

الأخت رهف
سلامات ..

سؤالى ليس بغرض التجارة .. بل بغرض الأستثمار الزراعى .. مثل 3 قطع تراكتر، 2 ديسكى، 1 قلاب ولورى .. من أين يستوردها الشخص أو هل يشتريها من السوق المحلى؟

هل هناك تمويل للمعدات والآليات الزراعية وماهى مداخله؟


أظن أنت وشخصى زملاء دراسة فى كلية الزراعة جامعة الخرطوم .. دفعت ناس حمدتو عبدالفراج.

بريمة

الأخ حسن سناده
سلام ..

Quote: اللوارى والقلابات اقل من عشرة سنة عادى تدفع الجمارك واكتر زى موديل 99 تعمل استثنا بامليونين ونص + الجمارك اقل من شهر انا اشتريت موديل 99 ودفعت 22 مليون جمارك + الاستثنا تحياتى بريمة

ألف شكر على الأفادة القيمة ..

هل أفهم أن اللوارى والقلابات من موديل 99 يسمح لها بالأستجلاب؟ .. وماذا عن موديلات البصات .. هل يسمح لها من موديل 99؟

لاحظت من خلال مداخلتك أن الجمارك والأستثناء تعادل أو أكتر من سعر اللورى أو القلاب! .. ما قالوا بلد زراعى ويشجع مدخلات الأنتاج الزراعى !

شيئ فوق التصور ..

بريمة

الأخ عبداللطيف
سلامات ..

Quote: بالنسبة ليك انت مافي أي مشكلة .. جيب أي حاجة و أدفع أي حاجة .. و دخل أي حاجة .. أمورك سااالكة ..

عارفك من أهل الحظوة .. وبجاهكم نلوك .. كلم لى الجماعة قول لهم الزول دا جاى مزراع ساكت وماشى يسكن فى أقصى الدنيا فى الخلاء، ما يعملوا لى مشاكل.

بريمة

العبار دينق
سلام ..

Quote: العبار بريمة بلل. أول حاجة لازم نحدد الأختصاصات. أنت راعي ولا مزارع؟

العبار، طبعاً أنت هنا زول أسبليطة ساكت .. هل تعلم أن تربية الحيوان وزراعة المحاصيل، يعنى الأنتاج الحيوانى والزراعى .. فى عرفنا كزراعيين، كلها أنواع من أنواع الأنتاج الزراعى.

يعنى لو بقيت راعى أو مزراع .. أحتاج لنفس مدخلات الأنتاج .. تربية البقر عايزة زراعة علف وترحيل وحصاد.

بريمة

جنى
سلام ..

عاجل الى من يقومون بشحن امتعتهم ومعداتهم من أمريكا وكندا!

يا أخى بوستيك مفيد جداً .. لدى سؤال: كيف يشحن الناس من أمريكا للسودان مع وجود الحظر التجارى؟ هل الناس ديل يشحنوا لناس فى السعودية حتى يتجاوزوا الحظر ولا شنو؟

بريمة

محمد عمر الفكى
سلامات ..

Quote: بريمة نصيحة لوجه الله تعالي اذا ما كان عندك نية تزرع بنقو جلى الفكرة

لا يا أخوى .. أنا بزرع تنباك .. وعارف محل أسوقه ..

أنتم .. خلاص .. قلبتوا من الصاعود للبنقو عدييل كده .. والله دى عوجة، شوف دينق، أظن الجنوب فيه متسع لزراعة الأفيال.


بريمة

Quote: بريمة نصيحة لوجه الله تعالي اذا ما كان عندك نية تزرع بنقو جلى الفكرة

العبار بريمة بلل.

ياهو أخونا محمد عمر الفكي أداك النجيضة.
يا تزرع بنقو يا تعمل نايم.
أها كلامك شنو؟

Quote: العبار، طبعاً أنت هنا زول أسبليطة ساكت .. هل تعلم أن تربية الحيوان وزراعة المحاصيل، يعنى الأنتاج الحيوانى والزراعى .. فى عرفنا كزراعيين، كلها أنواع من أنواع الأنتاج الزراعى. يعنى لو بقيت راعى أو مزراع .. أحتاج لنفس مدخلات الأنتاج .. تربية البقر عايزة زراعة علف وترحيل وحصاد.

العبار بريمة بلل.

ده كلام مثقفاتية ساكت. أنت زول راعي ولا دخل لك بالزراعة التجارية أبدا. يمكن تزرع لك شوية أعلاف لأغنامك الشوية ديل.
لكن زراعة تجارية. أحسن تخلي العيش لخبازو. بعدين أعمل حسابك لو ما أنت بقيت كوز درجة أولى أحسن تعمل نايم من المشروع ده.

برضو يا العبار دينق قاعد تخلط ..

Quote: العبار بريمة بلل. ده كلام مثقفاتية ساكت. أنت زول راعي ولا دخل لك بالزراعة التجارية أبدا. يمكن تزرع لك شوية أعلاف لأغنامك الشوية ديل. لكن زراعة تجارية. أحسن تخلي العيش لخبازو. بعدين أعمل حسابك لو ما أنت بقيت كوز درجة أولى أحسن تعمل نايم من المشروع ده.

أنا لدى مهنتين: راعى وزراعى بالممارسة التقليدية .. وزراعى بالتعليم .. ودمج الخبرتين ربما يساعد فى تطوير الممارسة التقليدية .. ويؤدى إلى أنتاج حقيقى.

أنا وجدت أن خلط خبرات غير متجانسة والتوفيق بينها يؤدى إلى تميّز فى أداء المهنة .. فمثلاً أنا خبير بيولوجى، وخبير برمجة .. هذين المجالين أنتجوا شيئ جديد يسمى المعلوماتية الحيوية .. البيوأنفورمتك لا يستطع عليها أىّ أنسان ما لم يكن يجمع تلك المتباينات ..

وبالتالى أرى سقل الموروث الرعوى .. بالبروفشن الزراعى يؤدى نقلة نوعية ..

ما يعميك الحسد، كدى ساعد فى كيفية أنجاز هذا المشروع .. وإن شاء الله يكن لك نصيب بقدر عطاءك.

بريمة

العبار دينق

Quote: بعدين أعمل حسابك لو ما أنت بقيت كوز درجة أولى أحسن تعمل نايم من المشروع ده.

يازول نحن أبناء هذا الوطن السودان .. وهمنا أكبر من أحزاب وحكومات ومسميات .. هذه الآليات سوف تنتج من أجل الأنسان السودانى وفى كل مكان .. فى أماكن تواجد الحكومة، فى أماكن تواجد الحركة الشعبية، وفى أماكن تواجد حركات دارفور .. بلا تمييز ... وهذه الرسالة تتفهمها الحكومة والحركة والحركات .. لابد أن تتقدم حياة المواطن حتى فى ظروف الحرب.

تانى عندك خوف أو شوشرة .. أنت تخاف لأنك تعتبر الأخرين أعداء ..

بريمة

العبار بريمة.

وفي رواية أخرى.

Jack of all trades

أنا بعرف ناس دخلو في تجارب مشابهة وفي النهاية خسرو قرووش كتيرة ووقت مبالغ فيه.
اتمنى لك التوفيق. بس ما تجي بعدين تكب الجرسة.

Quote: عارفك من أهل الحظوة .. وبجاهكم نلوك .. كلم لى الجماعة قول لهم الزول دا جاى مزراع ساكت وماشى يسكن فى أقصى الدنيا فى الخلاء، ما يعملوا لى مشاكل. بريمة

بريمة ................سلام
انا لك من الناصحين
كان ماشى تطق صمغ والا تزرع دخن وحاتك مع حكومة
القلع دى لو زراعتك دى شالت عيار 24 قيراط تطلع
مطالب حق الخيش...
مدخلات انتاج شنو؟البتوفرها الحكومة؟
غيرك كان اشطر..خليك فى امريكتك دى اضرب
الهوت دوغ والبتزا والكنتاكى الى ان يقضى
الله امرا،،،

الاخ بريمه تحياتي
ربنا يوفقك
و كمان ما تتجاهل كلام دينق التحت دا

Quote: أنا بعرف ناس دخلو في تجارب مشابهة وفي النهاية خسرو قرووش كتيرة ووقت مبالغ فيه. اتمنى لك التوفيق. بس ما تجي بعدين تكب الجرسة.

العبار دينق

Quote: العبار بريمة. وفي رواية أخرى. Jack of all trades أنا بعرف ناس دخلو في تجارب مشابهة وفي النهاية خسرو قرووش كتيرة ووقت مبالغ فيه. اتمنى لك التوفيق. بس ما تجي بعدين تكب الجرسة.

أنا ليس صاحب المشروع .. أنا صاحب فكرة المشروع ..
والسبب وراء هذا المشروع أن الأهل فقدوا ثروات هائلة من جراء الحروب .. تلك الثروة تعرضهم للمخاطر فى ظل الوضع الراهن .. وفى ظنى الخيار الأقرب لهم بعد الرعى هو الزراعة ..

من قبل يا العبار تبنيت مشروع ونجح نجاح منقطع النظير .. ويتواصل نجاحه .. أهلنا حينما رحلوا من مناطقهم فى وسط جنوب كردفان إلى مناطق خور أبوحبل شمال جنوب كردفان، كانوا لا يعرفوان شيئ عن زراعة الطمام .. والخضروات .. وفى الحقيقة هم يستحقرون زراعة الطمام ومن يقوم بزراعتها علماً أنهم يأكلونها .. كان علىّ كسر هواجس نفسية عجيبة حتى أتمكن من زراعة الطمام بينهم لتصبح مزرعتى مزرعة نموذجية .. وحينما راوا سهولة زراعتها وكثرة أنتاجها وفترة موسمها هى بعد موسم الزراعة بالنسبة لهم تبناها بعضهم الذين يتعبرون أنفسهم فوق العادات والتقاليد القبلية .. اليوم أهلنا فى منطقة البقلتى فى خور أبوحبل هم أكبر مزارعى وتجار الطمام فى منطقة ريفى القوز والدبيبات وما جاورهما .. ويصل أنتاجهم مدينة الأبيض حيث يأتى تجار الطمام حتى قريتنا لأخذ المحصول من الحقول ..

هذه المرة مصمم على بيع أبقار البقارة زت .. وتحويلها إلى بنى مستقرة، حتى يتعلم أبناءنا ونتفادى الموت المجانى.

بريمة

الأخ صديق الموج
سلامات ..

Quote: بريمة ................سلام انا لك من الناصحين كان ماشى تطق صمغ والا تزرع دخن وحاتك مع حكومة القلع دى لو زراعتك دى شالت عيار 24 قيراط تطلع مطالب حق الخيش... مدخلات انتاج شنو؟البتوفرها الحكومة؟ غيرك كان اشطر..خليك فى امريكتك دى اضرب الهوت دوغ والبتزا والكنتاكى الى ان يقضى الله امرا،،،

يا صديق، أنا لا أتدخل فى الأمكنة التى تجعلنى فى مواجهة الأقوى، أخوك ليس لدية ضلوع للمعافرة .. لا تدرى أن البعير الأجرب يبارى القطيع من بعيد لبعيد، اصحاب القطعان يضربونه .. لكن يصر البعير الأجرب أن يرعى جوار تلك القطعان حتى يقلل الحشرات الضارة التى تتهاوم حوله .. سوف أفتح أماكن زراعية جديدة وبعيدة كل البعد عن المناطق المأهولة .. وفى هذه أصبح دعماً للأقوى وليس خصماً عليه ..

بريمة

طيب من زمان ما تقول كدا وتريحنا ..... قطعت نفسنا ياخي بي (أنحن في جنوب كردفان)

المعدات دي ماشة هبيلة ولا مزارع ولاية الخرطوم؟

ولا لسه ما قالوا ليك الشركاء؟؟

عموما، الجمارك حسب موقع الشريك في المؤتمر ...

وكمان حجم الخدمات التي قدمها المستورد للمؤتمر.

Quote: يا أخى بوستيك مفيد جداً .. لدى سؤال: كيف يشحن الناس من أمريكا للسودان مع وجود الحظر التجارى؟ هل الناس ديل يشحنوا لناس فى السعودية حتى يتجاوزوا الحظر ولا شنو؟ بريمة

الصلاة فيها السر والجهر ما تجيب للمنبر الكتاحة
00966503731717
جني

Quote: هذه المرة مصمم على بيع أبقار البقارة زت .. وتحويلها إلى بنى مستقرة، حتى يتعلم أبناءنا ونتفادى الموت المجانى.

الاخ بريمة
تسلم
التفكير الذي تحدثت عنه هو اول خطوة في الطريق الصحيح فانا من البطانة وعندما انظر للانسان هنالك اجده يشقي هو كي يسعد الحيوان والمحصلة ما قلته اعلاه

فانا الان اسير كما تقول به انت الزراعة والرعي العلمي وغيره وهذا هو طريق الانتاج وتغيير الواقع الحقيقي
ولك الود والتقدير


________________________
ما ممكن اهلك في كردفان واهلي في البطانة يظلوا رعاة حفاة طول عمرهم

دينق وود الموج
الزول دا خلوه
اهلنا قالوا
المكتولة ما بتسمع الصيحة

ول أبا بريمة

تحياتي

التفكير في الإنتاج الزراعي بشقيه النباتي والحيواني هو من الحلول الإستراتيجية التي يلزم أن تتبناها الدولة

قبل المواطنين، ذلك لسن تشريعات تخدم ذلك التوجه، حاليا التشريعات الموجودة أما معطلة بسبب الفساد والإفساد

أو ناقصة أو معلولة لا تخدم أي شئ، عليه أنصحك نصيحة مجرب، أقع البكماء.... أراضي سكنية... مستودعات.. مصانع

أي حاجة حتى ولو ميدان كورة.... بعدين بعد عمر مديد أو الورثة سيدعون لك بالخير.

وكلام دينق ما كلو شين!!!

مجدى

سلامات ..

Quote: الاخ بريمه تحياتي ربنا يوفقك و كمان ما تتجاهل كلام دينق التحت دا

آمين .. ونسأل الله يتقبل دعاءك ..

دينق يرى أى إنسان عايز يرجع السودان هو خسارة لمشروع حروبه الأسفيرية.

بريمة

حامد
سلام ..

Quote: طيب من زمان ما تقول كدا وتريحنا ..... قطعت نفسنا ياخي بي (أنحن في جنوب كردفان) المعدات دي ماشة هبيلة ولا مزارع ولاية الخرطوم؟ ولا لسه ما قالوا ليك الشركاء؟؟ عموما، الجمارك حسب موقع الشريك في المؤتمر ... وكمان حجم الخدمات التي قدمها المستورد للمؤتمر.

يازول أنا رايح أفضحك ..

يا أخوانا وأخواتنا، نحن البقارة خسرنا كثيراً فى مسألة أنفصال الجنوب .. وهناك مناطق باكلمها فى جنوب النيل الأبيض ذهبت إلى الجنوب ..

أها، من ضمن المناطق الشالها الطوفان منطقة أخوى حامد، هو جنوبى بالميلاد، ولكن شمالى الهوى ..

أنتهى به بالمقام أن يكن عائش وجدانياً فى الشمال ومتنكر لأصوله الجنوبية ..


دينق، الله يرحم أبوك لم عليك الجنوبى المتنطع دا ..

بريمة

الأخ محمد عبدالله الطندب
سلامات ..

Quote: ما ممكن اهلك في كردفان واهلي في البطانة يظلوا رعاة حفاة طول عمرهم

الرعى حرفة ممتّازة بكل المقاييس .. وأنا واحد من الناس أرى، من خلال الرعى أننا حافظنا على ثقافتنا وتراثنا وأصالتنا.

لكن المشكلة جاءت من كثرة الحروب .. والرعاة لا يقبلون فى بهائمهم، أطفال صغار لم يبلغوا الحلم بعد يموتون دفاعاً عن بهائمهم فى حال نهب المتمردون لها .. وجود الثروة الحيوانية أصبح يدفعنا نحو التسلح ومزيد من الأحتراب .. هذه هى الحالة التى أحاول تغييرها بشتى السبل .. حتى نخرجوا من فكى رحى الحرب ..

يدك معنا فى قراءة واقعنا أهلنا المتقلب ..

بريمة

محمد عمر الفكى
سلام ..

Quote: دينق وود الموج الزول دا خلوه اهلنا قالوا المكتولة ما بتسمع الصيحة

بكلام المكتولة ما بتسمع الصيحة، يعنى أن أهلك لم يقتلوا بعد .. نحن أهلنا قتلوا منذ عام 1985م، ضربة "قردود أم ردمى" فى جنوب كردفان بواسطة المتمرد عبدالعزيز الحلو والجنوبى رياك مشار .. 86 رجل من اهلنا فى المنطقة تم إما ذبحهم أو رميهم فى براميل الماء وهو يغلى .. ومنذ ذلك الحين وحتى اليوم يموت أهلنا ..

جزء كبير من الموت يتم فى الثروة الحيوانية .. دعونا نستبدلوها بشيئ أخر، الزراعة أو التجارة ..

بريمة

جنى
سلام ..

Quote: الصلاة فيها السر والجهر ما تجيب للمنبر الكتاحة 00966503731717 جني

كلامك مفهوم ..

لكن لو تكرمت تشرح لينا .. كيفية الأستيراد وملابساته .. مثلاً بالنسبة لى أرى أن التراكترات والأليات الزراعية الهولندية غالية جداً .. وكذا المعدات الألمانية ..

أرى دول مثل الصين والهند وكوريا ممكن تكون رخصية .. لكن ليس لدى معلومات عن أسماء الشركات أو حتى طرق الشحن والتخليص ..

أخوك زول ساكت فى الحتة دى .. والبقارة عايزينى نقوم بهذه المهمة.

بريمة

Quote: بريمة ................سلام انا لك من الناصحين كان ماشى تطق صمغ والا تزرع دخن وحاتك مع حكومة القلع دى لو زراعتك دى شالت عيار 24 قيراط تطلع مطالب حق الخيش... مدخلات انتاج شنو؟البتوفرها الحكومة؟ غيرك كان اشطر..خليك فى امريكتك دى اضرب الهوت دوغ والبتزا والكنتاكى الى ان يقضى الله امرا،،،

كلام ود الموج دا امسكـ فيهو بي يديك وعركيك واسنانكـ ..

كلام صحيح 100 ميه ...

ياخي ديل مدخلات إنتاج زراعيه بيشيلوا فيها ضريبة قيمه مُضـافة ...!!


أبعد أبعد أبعد عن الحكاية دي شديد ......... وبعيد ..

ول أبا حماد
سلامات ..

Quote: أراضي سكنية... مستودعات.. مصانع أي حاجة حتى ولو ميدان كورة.... بعدين بعد عمر مديد أو الورثة سيدعون لك بالخير. وكلام دينق ما كلو شين!!!

والله .. شايفكم كلام العبار دينق .. عجبكم شديد .. يا أخى حماد، نصيحة العبار دينق مثل نصيحة أبليس لسيدنا الخضر، حينما رأى أبليس الحيطة عايزه تقع فى الخضر الذى كان يغض فى نوم عميق فى ظلها، ركضاً زعيم الشياطين ركضاً ليفيق سيدنا الخضر من نومه .. وحالما تحرك الخضر، سقطت الحيطة فى مكانه .. فسأل الخضر أبليس من أنت أيها الرجل الفاضل، قال له زعيم الشياطين، أنا ابليس ولو تركتك وسقطت فيك الحيطة سوف تدخل الجنة وتكون خرجت من يدى .. هذى هى قصة العبار دينق .. عايز يضممنا إلى شلة العبابير فى واشنطن وكلام العبابير ما بينفع مع زول بقارى مثلى ..!

مسألة الأستثمار صعبة شوية على البقارة وغير مفهومة بالنسبة لهم .. وأقتراح محل نظر ..

بريمة