قناة فضائية لله يا معارضة.. عشان الحاجات تبقى كويسة..

،

عشان الصوت والصورة تصل للكل داخل البلد أولاً،
وعشان الناس تعرف شيء عن الحاصل،
وعشان الحركة تكون موحدة في المدن والأرياف..
عشان صوت الشارع يصل للعالم،
عشان نحمي المساكين البطلعو الشارع بدون ضهر ديل..
عشان نجبر باقي القنوات الفضائية تنتبه لما يحدث، ويلقى الصوت صدى أبعد..
وعشان
وعشان ...
طالما الثورة مرتقبة وعايزنها تمشي صاح.. وتقوم للبلد تاني قائمة.
،
وعشان واهم من يظن أن الانترنت وحده يكفي عن باقي الوسائل..
وعشان غياب صوت المعارضة (راديو، تلفزيون، .. غيرو)، هو ما أتاح لإعلام الانقاذ القوي والمدروس، أن يجعل الشعب، ييأس من الخلاص، ويقنع من خيراً في المعارضة..
وعشان الصوت والصورة أسرع وأكبر أثراً من باقي الوسائل..
وعشان الجرايد ما بتصل لكل الناس في بلادنا الكبيرة.. ولا كل الناس بتقرا
وعشان النت متاح ربما لأقل من 5% من شعبنا الفضل..
،
،

،
من أجل ثورة جد جد،
الإعلام أولاً
وثانياً
وأخيراً..
،

أدناه كان في معرض رد على الزميل "أبو الحسين" في واحد من بوستاته قبل الانتخابات 2010*:

Quote: كتب أبو الحسين: Quote: Quote: ..... أنا مستاء جداً لما يحدث من إعلام الكيزان (الشروق والنيل الأزرق)... كل هذه الحشود الجماهيرية والإستقبالات الكثيفة والآن قناة الشروق تُذيع في تدشين حملة المؤتمر الوطني بجبل أولياء!!! ولا حتى خبر عارض في نشرتهم!!! مالهم كيف يحكمون... ... وانا من سنين مستاء من أحزابنا الكانت معارضة، والصالحت بعد داك، والمشاركة هسع في الانتخابات، وبعد ده ما وعت لضرورة الإعلام ودوره الهام في عملها السياسي، وهي تشوف بي عينا قدرة إعلام الانقاذ الذي استطاع أن يهز عروشها في عدة مناسبات ويهدد حتى مكانها داخل الخريطة السياسية للبلد. معقول يا ابو الحسين كل الاحزاب دي ما قدرت تجهز للانتخابات دي عدد "واحد" قناة فضائية وهي التي تعرف مسبقاً أن أهل الانقاذ -الذين حولو كل مقدرات الشعب وثرواته لصالحهم الخاص، ناهيك عن القنوات الاعلامية التي يفترض فيها القومية- تعرف أنهم لايمكن أن يسمحوا بأن تُستخدم هذه الوسائط ضدهم، وأنهم لو استطاعوا لمنعوا حتى مثل هذه الصور-المفزعة لهم- التي تقوم انت بنشرها هنا الان. هل فعلاً أحزابنا عجزت عن فعلٍ كهذا كان كفيلاً بأن يزلزل الأرض تحت اقدام المؤتمر الوطني، وهي -أحزابنا غفر الله لها- تملك من الكوادر والكفاءات في صفوفها من هم قادرون على إدارة مثل تلك القناة أو القنوات وإنجاحها ناهيك عن إمكانية هذه الاحزاب في استقطاب الخبرات من كل ارجاء الارض، وهذا الفضاء الرحب متاح للجميع، والريموت كفيل بأن يحسم مسألة "الشوف". فلماذا تغابت هذه الاحزاب عن اهمية الاعلام؟ وكيف قررت الخوض في الانتخابات بلا حتى محطة إذاعية من فصيلة FM تستطيع من خلالها الوصول إلى قواعدها وتأكيد أنها حية ما تزال وأنها على قادرة على المجابهة وعلى قدر تحديات المرحلة؟ واكيد شح الموارد ليس هو السبب المقبول لتتعلل به. كيف نبكي اليوم ونستاء من قنوات فضائية صنعت خصيصاً لهذا اليوم الذي تم الإعداد له من أزمان بعييييدة، وطول الزمن ده ما انطرح اقتراح من أحزابنا العظيمة عن كيف تجهز حالها لمجابهة الغول الإعلامي للمؤتمر الوطني؟ ،

،____________________________
* Re: بالصور.. كسلا تخرج في موكبٍ بهيج لاستقبال مُرش...ن مولانا السيد المير
،
،

Quote: ، من أجل ثورة جد جد، الإعلام أولاً وثانياً وأخيراً.. ،

دي النجيضة يا بدري

و الني للنار

يا بدري
سلامات
والله ياخ انت بتنفخ في قربة مقدودة، وقد سبقتك في النفخ في نفس القربة بتقديم دراسات شاملة،
ولكن دون جدوى..

كيف يا بدري

اخبارك والمعاك


ياخ الموضوع ده انا قريته اكتر من مرة في اون لاين
ومافي زول اشتغل بيه الشغلة

Quote: ياخ الموضوع ده انا قريته اكتر من مرة في اون لاين ومافي زول اشتغل بيه الشغلة

وليد يا حبيبنا،
كيفك والعيال والحال الما عاجبنا؟

للأسف يا وليد كلامك صاح.. والموضوع في ناس كتاااار نضمو فيهو واصواتم انقرشت..
لكن طالما النت ما زال عزيز على غالبية الشعب،
وطالما قنواتنا محتكرة،
وطالما في أصوات الناس عايزاها تصل للجميع،
يبقى لابد من إننا نعيدو تاني وتالت ولغاية ما يبقى واقع..
واجعاني العزلة يا وليد لي مجموعات شجاعة تطلع هنا وهناك عشان تغير حالها وحال البلد المايل، وتلاقيهم الحكومة بكل عتادها ولؤمها وقسوتها،
والناس تفتكر إنو شوية بوستات وصفحات فيس بوك حا تعرف بيهم وحا تجيب ليهم المؤازرة وتقوي صفهم..
هيهات هيهات..
،
،
الناقصنا شنو يا ود المبارك؟
سودانيز دي براها مليانة إعلاميين يكفو 10 قنوات..

Quote: والله ياخ انت بتنفخ في قربة مقدودة، وقد سبقتك في النفخ في نفس القربة بتقديم دراسات شاملة، ولكن دون جدوى..

نادوس العزيز،
الشوق من هنا لا عندك..
،
نعمل شنو عاد يا حبيب، ياهو نعيد ننفخ وننفخ، ونعيش علي العشم..
ولو قلنا خلاص نقنع، معناهو برضو نقنع من كل حاجة، ومافي داعي يمرقوا الناس بهناك لمواجهة الرصاص والتعذيب والقتل المفتوح..
معارضتنا مقدودة يا صاحبي، ولكن خلينا ننفخ فربما شرارة منسية تحت كل ذاك الركام..
وانتو أهل الشأن طبعاً، لو كان قومي يعقلون، وأكيد أن ما قدمته من دراسات سيأتي أكله ذات فجر قريب.
فلا تبتئس يا رجل وواصل سيرك،
وتعال تاني ننفخ..
،

Quote: دي النجيضة يا بدري و الني للنار

شكراً يا قيقراوي،

غير معقول أن يخرج الناس للشارع في امتداد ناصر، ولا يسمع بهم حتى جيرانهم ناس أركويت..
تخيل مقدار الخذلان الذي يصيب الناس جراء ذلك؟
وتخيل كيف سنهدي الذئب كل يوم لحمنا، ويكون أشجعنا هم الـ"قاصية"، إن لم نخلق ما يوحِّد الهبة الشعبية.
،
يعني لا محمية بسلاح ولا محمية باعلام،
كترتوها على الشعب المسكين..
،
،

،
*
الضوْ بكَى
بكَى ما بكَى ..
بكَّاهُو يرْجعْ لِي ورا
بكَّاهُو رادِي الدنْدَهُوبْ الغادِي
و أم دُرمان تغنِّي حبيبتي آه
وودادي وين وحَبيبي وُوبْ
والباقي كلُّو مقابلاتْ
ضِدْ القوانينْ البدِيلَة
مع القوانين العديلة
اليَسْوَى ما يسْوَى الرَزِيلة
جهنمْ الجنَّة الفَضِيلة
**
ولا خَتَرْ في بالُنْ الحالْ الكَدَرْ
لا علَّمُنْ سِيلْ الجبالْ الشَاتْ
مواريث القَبيلة مع الحجرْ
لا حِكمةْ البحرْ الكَسَرْ
ما ليهُو مُسْلِمْ لا الكَفَرْ


_____________
* من قصيدة "الضو وجهجهة التساب" لحميد..

حذف للتكرار..

Quote: Çعشان نحمي المساكين البطلعو الشارع بدون ضهر ديل

Quote: عشان الصوت والصورة تصل للكل داخل البلد أولاً، وعشان الناس تعرف شيء عن الحاصل، وعشان الحركة تكون موحدة في المدن والأرياف.. عشان صوت الشارع يصل للعالم، عشان نحمي المساكين البطلعو الشارع بدون ضهر ديل.. عشان نجبر باقي القنوات الفضائية تنتبه لما يحدث، ويلقى الصوت صدى أبعد.. وعشان وعشان ... طالما الثورة مرتقبة وعايزنها تمشي صاح.. وتقوم للبلد تاني قائمة. ، وعشان واهم من يظن أن الانترنت وحده يكفي عن باقي الوسائل.. وعشان غياب صوت المعارضة (راديو، تلفزيون، .. غيرو)، هو ما أتاح لإعلام الانقاذ القوي والمدروس، أن يجعل الشعب، ييأس من الخلاص، ويقنع من خيراً في المعارضة.. وعشان الصوت والصورة أسرع وأكبر أثراً من باقي الوسائل.. وعشان الجرايد ما بتصل لكل الناس في بلادنا الكبيرة.. ولا كل الناس بتقرا وعشان النت متاح ربما لأقل من 5% من شعبنا الفضل.. ، ،

الابن الكريم بدرى:

طالما الدراسات موجودة والكوادر موجودة ، بقى فاضل التمويل ، وعلى المغتربين السودانيين المساهمة الفعالة بالتبرعات

كدى رتبوا الموضوع دة واشتغلوا عليه والوطن بستاهل برضو

واطلب نقل البوست للربع الجديد لمواصلة السعى

تحياتى

ده موضوع مؤرق الجميع
وادقت ليهو صدور كثيرة ولكن لاحياة لمن تنادي
وياريت يضخ حماس وجدية ومثابرة في هذا الامر
فالاعلام هو واحد من اخطر الاسلحة التي يستعملها الموتمر الوطني في تغبيش الوعي
وتمرير خطابه البائس...

كيكي سلام مطبوق،
هو في الحقيقة ما مؤرق للجميع وإلا كان تمّ من أقلاها أقلاها من قبل الانتخابات..
في 2008 قابلت صاحب لي شيوعي هنا في الإمارات وقعدنا نتكلم ويحكي لي عن استعداداتم للانتخابات، قمت سألتو عن المسألة دي، فتفه لي الموضوع ولقيت إنو حتى ما قاعدين يناقشوهو في اجتماعاتم التحضيرية، لا كحزب ولا كأي شي تاني.
ضحكت وشارطو علي النتايج، وقال لي إنو لو فازوا الكيزان حا يخلي البلد، وفازوا الكيزان زي ما اتوقعت ليهو -ما عايز اقول اتنبأت لأنو الموضوع كان ظاهر حتى من غير عنوانو- ولم يترك صاحبي البلد، ولم يتحدث حزبه عن ضرورة الاتفاق بين كل اطراف المعارضة على توحيد الخطاب من خلال نافذة إعلامية موحدة، تحقق هدف الجميع في إسقاط النظام..
في العام نفسه اي 2008، وفي إجازتي السنوية، صادفت المسيرة الشهيرة للمعارضة والانضرب فيها ياسر عرمان، وفي مساء نفس اليوم كنت مع مجموعة ممن شاركوا في المسيرة والناشطين السياسيين، وبدت الونسة، وقمت علي شلاقتي اتكلمت عن ذات النقطة، وده بعد اجبروني على المشاركة، وكنت كلمتهم انهم ما حا يرضو كلامي، وفعلاً تفهت كل مجهوداتم الما مدعومة باعلام يخاطب الجماهير مباشرة، ويلمس عصب الناس الرهاف..
بقيت مضحكة باقي الليل، واتمسخرو فيي بدعوات زي: بالله شوفو المغترب بتكلم لينا عن شنو؟
وإنو يا زول نحنا ونحنا ونحنا، وما عارف شنو.. (اصلو يانا نحنا السودانيين اهل نحنا الكذابة، الما تجيب غير البلاوي)..
"وكان ما كان وبتنا كلنا ناء وغريب" زي ما قال الشاعر..
،
،
احزابنا دي لو ما بتتعلم ما بتَغِير؟ ولا بتبغر؟
ده شنو ده ياخ..
،

أشكرك أستاذة مهيرة،
وما كنت أعنيه دائماً وأستغرب له إننا ما ناقصين شي، ولو أحزابنا إدعت المسكنة وقالت إنها ما عندها حق القناة، أو حق الإذاعة كنا حنعذرم،
يبقى الشي التاني نحنا اليتامى ديل، معقول ما عندنا قدرة برضو على تجاوز أحزابنا وتولي ذمام المبادرة؟
طيب كيف عايزين المساكين الهناك يتولو المبادرة الصعبة وأم نزيفاً بره نيابة عننا وعن الجميع؟
وانتي هبشتي العلة في لحما الحي، لي متين نحنا نقعد ننادي ونرجا في الأحزاب ولينا زمن عرفنا البيهم والعليهم؟
ولي متين نقعد نحرش في المساكين ديلاك عشان يعملو كل شي نيابة عننا، ونعتقد إنو مجرد توصيل فيلم لليوتيوب، أو فتح بوست ده حا يكون كفارة لي تقصيرنا؟
ببساطة، لو نحنا فعلاً أغلبية، وإنو الناس البره ما هينين، وبافتراض إنهم هم الأقدر -مادياً- على الأقل، فيكفي إلتزام كل معارض بعدد واحد دولار شهرياً، لتقوم قناة فضائية ملء السمع والشوف..
،
الوسيلة التانية، زي ما المواقع الالكترونية دي قامت بمبادرات شخصية، برضو القنوات دي ممكن تقوم بنفس الطريقة، ولكن يختلف الأمر قليلاً من ناحية التمويل، إذ يلزم في حالة القنوات أن تأتي المبادرة من رأسمالية وطنية حقيقية، وألا تكون أعمالها تدار من داخل البلد حتى لا تخضع للضغوط، وعلى حد علمي ما أكثرهم ومعظمهم مناهضين للإنقاذ، أو على الأقل داعمين للديمقراطية، وممكن حتى تكون جزء من استثماراتهم في المستقبل..
،
أشكرك مرة أخرى على التوصية باستمرار الخيط..

حبابك ومرحبابك أخي باسط،
،
تعرف يا حبيب، غض النظر عما يتقال عن اكتوبر ومارس وابريل، أنا عندي راي إنو نحنا حتى استقلالنا نلناهو بالبارد، وبالبراااحة..
في نضالات نعم، لكن عمرو ما كان في تحرك شامل اختار فيهو شعبنا ده الموت على العيشة النكد، ولا حتى قياداتنا، واتحدى زول يوريني جرح طالو في مكابدة المستعمر..
خلونا نواجه الحقيقة دي..
وعشان كدي دايماً كلام قادتنا -غير العسكريين- ممزوج باللين، لمن تحس فيهو طعم الهوان..
وقادتنا العسكريين زاااتم، تجيهم الحرة والرجالة ساعة يكون "استعداء" لي ولاد ذات البلد، يتحرفنو في القسوة تجاه بعضهم، مننا وفينا، ولمن يظهر العدو الخارجي الحقيقي، تشوف المحن البنشوف فيها لينا سنين دي..
(ومنذ الحملة لم يعرف هذا البارود غير صدور الأبناء،
أين نصيب الأعداء من هذه الذخيرة؟)
تساؤل سقته قبل سنوات طويلة ولم أجد الإجابة..
،
،
قناة واحدة يا محسنين، ربما تصبح مهر هذا الوطن..
،

خلينا نواصل النفخ يمكن الان بعد ما شافوا فعالية الاعلام ودوره في ثورات الربيع العربي، ودعني اعيد ما سبق ان تم اعادة نشره هنا في نوفمبر 2005،

Quote: عفواً إن بدأت بالحديث عن نفسي، ولكن هذا ما إقتضاه سياق هذا الموضوع، فقد خدمتني ظروف عملية أورثتني كم هائل من المعلومات حول إنشاء وتأسيس وتشغيل القنوات الفضائية التلفزيونية، حيث أنه في العام 95م قد تم إنتدابي وإلحاقي بالفريق الذي تولى تأسيس المؤسسة القطرية للقناة الفضائية، والتي أصبحت فيما بعد قناة الجزيرة الفضائية، وذلك لتولي مهمة إعداد الدراسات المالية والإقتصادية بما فيها دراسة الجدوى الإقتصادية. وهو أمر يقتضي إلمام بجوانب تقنية وتشغيلية متعددة، عملت كل جهدي بالحصول عليها من مصادرهابمساعدة من المسؤليين عن المؤسسة الناشئة حينها. وقد تكررت التجربة وبإتقان أكثر في مشروعات القنوات التي من المتوقع أن يبدأ بثها تباعا خلال الربع الأخير من هذا العام والربع الأول من العام القادم، وهي الجزيرة الدولية "الناطقة بالإنجليزية، الوثائقية، والأطفال". ومعايشتي لهذه التجربة وما حققته من نجاح يتجاوز كل التوقعات، مع قناعتي والتي أعتقد أنها قناعة يشاركني فيها كل الشعب السوداني، بعقم أجهزة الإعلام السودانية بشكل عام والقناة السودانية بشكل خاص، ومحدودية مساحة قناة النيل الأزرق التي حصرت نفسها في ضرب واحد من الإبداع وهو الغناء. هذا بالإضافة إلى مسؤوليتنا جميعا تجاه جيل كامل من أبناؤنا الذي ولدوا أو هجروا قبل أن يكتمل تكوينهم الوجداني والثقافي. أقترح إنشاء قناة فضائية سودانية مستقلة، معنية بالثقافة السودانية ونشرها، وسأحاول أن أوجز هنا بعض النقاط الأساسية من واقع الدراسة التفصيلية التي بحوزتي الآن، وآمل من الجميع المشاركة إسهاما في نجاحه: إسم المشروع: قناة تلفزيونية فضائية الشكل القانوني: شركة مساهمة عامة، تسجل في السودان وإذا تعذر ذلك يمكن أن تسجل في أي من دول المهجر. راس المال: يطرح الإكتتاب أسهم القناة، بمجرد الفراغ والإنتهاء من إجراءات التسجيل. الكادر البشري: يمكن إستقطاب عدد كبير من السودانيين العاملين في القنوات العربية والدولية.

،
حزنت والله يا عبدالجليل أن تبادر بكل هذه الجدية ولا تجد حتى من يحاول أن يستزيد..
المعارضة عرفناها، معقول نكون شعب ما جادي للدرجة دي؟
بس ما حا أحبطك وأحبط روحي، وتعال نحاول تاني ربما الستة سنوات الحسوم الأعقبت محاولتك دي، والانتهت بتقسيم الوطن لاتنين قابلين للزيادة، ربما علمت الناس حاجة..
،
يا معارضة..
يا عالمين،
عايزين شنو أكتر من كدي، أهو ببساطة ممكن يتأمن جانب الدراسة وحساب الكلفة وما يليه.. ولسه يا ما في ناس وكوادر حا تظهر..
والمشروع مساهمة عامة..
وأسهم،
والحشاش يملا شبكتو.. (أول مرة استخدم المثل ده في محلو بالضبط)..
،
(1)*
الضوْ بكى
بكى ما بكا
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين وحبيبي وُوُوب !
والباقي كلُّو مقابلات ..
والنشرة مافي ولا خبرْ عن بلدُو ..
عن شِدَّة عَناهو عن البحر
عن سر نَفي ..!
ودِي الوكْتِ لندن ماب تبين ..
حالاً دَحِين زيْ حالُو فِي .؟!


(2)*

مـــــا علَّــــــــمُن

ما علَّــــــــمُنْ

والألَّمـــــــــكْ .. ما ألَّــــــمُنْ

مـــــا ألَّــــــــمُنْ .. ما ألَّـــــــــــــمن

___________________________
* المقطعين من قصيدة " الضو وجهجهة التساب.. شكراً حميد

بدري اليأس
مهيرة
نادوس 2000

ياريت تبعثوا لي بعناوينكم البريدية علي الإيميل

[email protected]

لدي ما انقله إليكم في هذا الإطار .. دمتم

الاخ بدري سلام
الاعلام سلاح اقوي من الرصاص
تجربة اذاعة نوبية عبر الانترنت و قريبا عبر الستلايت
الرجاء المتابعة و افادتنا باراءكم و مقترحاتكم لتطوير العمل
الاذاعة تبث باللغة العربية و النوبية
علي الرابط
http://www.nubianradio.net/
الاخ نادوس محتاجين لخبراتك في هذا المجال

نبيل محمد حامد

الشكر أجزله أخ نبيل على مشاركتنا جهدك الكبير في إنشاء إذاعة نوبية تُعَرِّف بالفن والتراث النوبي، وتطرح مشاكل المنطقة وتساهم في بلورة الحلول، وتوصل صوت الشعب وتدعم حقوقه.
وأكيد ستكون فاعلة أكثر حين تبث عبر أثير السودان حتى تقوم بدورها على الوجه الأكمل، فالنت عزيز في بلدنا..
وعقبال إذاعتنا القومية الحقيقية والوطنية التي تبث عبر الهواء مباشرة ولكل الناس في الحضر والبوادي، من أجل بعث الحس الوطني الحقيقي وغرس قيم المواطنة والديمقراطية وحقوق الإنسان.
ومن أجل إعادة الثقة للشخصية السودانية ومحو ما لحق بها شوائب وما طالها من تشويه، ببعث روح التسامح والتعايش والسلام والمحبة والعمل الجاد من الفرد للجميع ومن الجميع للفرد.
ونرجع من تاني نغني ونقول "بلدنا سَمِحْ.. وزولي سمح.. وكل الناس هناك سمحين.."
،
وأثني قولك:

Quote: الاعلام سلاح اقوي من الرصاص

وكون المعارضة تغفل أمراً هاماً كهذا ولمدة 22 عاماً هي عمر النظام الكريه وآلته الإعلامية الجهنمية، فتلك هي الغفلة التي لا تغتفر والغباء بعينه..
إذ كان من الممكن تطوير فكرة إذاعة التجمع التي كانت تبث من أسمرا، فإن كان الأمر مجرد غباء فهو ما لن تسامحهم فيه البلد ولا الأجيال التي شُوِّهت وظلمت وغُيِّبت وجُهّلت مع سبق الاصرار والترصد..
أما إن كان ذلك عن عمد، وهو الاحتمال الأقرب للحقيقة، فتبقى الغفلة الحقيقية هي أن ننتظر منهم دوراً فاعلاً في هذا الأمر.
،
،

الوعي بالديمقراطية ومطلوباتها ومستحقاتها، لا يخدم مصالح الكثيرين، ولا يعمل من أجله كثير من المنادين بها. للأسف..
،

الضو بدري إلياس يا قريبي... سلامات وتحايا نواضر...

وصلني رابط هذا المقال عبر الفيس بوك... وشكراً لقبول الإضافة بي غادي...

حقيقي يا أُستاذ هذا الموضوع مهم وللغاية كمان... والشواهد على الضرر الواقع علينا من عدمو كتيييييرة... منها ما اقتبسته عاليه...

وانا معك أُناشد الرأسمالية الوطنية لتبني هذه الفكرة... وأُبشرك حسب ما وصلتني البُشريات بأن هُناك قناة ختمية فضائية ستبث قريباً أرجو أن تصدق هذه البشريات... وهي بالرغم من محدوديتها لكنها ستهز هذه البركة الساكنة...

صادق مودتي...

كيفك يا ابو الحسين يا حبيب،
وأول شي الولد مبروك ويتربى في عزك، دابك استحقيت اللقب..
،
وبركة يا زول الجراك الرابط جابك لينا، وسعيد إنك مريت المرة دي، لأنك في فورتك وحماسك في البوست المعني، شخت لي وعملت رايح
وما هببتو لي..
تاني طوالي بشرك لك بالفيس بوك..
،
كنت أتمنى لو كانت الفضائية المبشَّر بها خاصة بالاتحاديين، وهو الماعون الأوسع، أكثر من كونها خاصة بالختمية فقط..
فقناة خاصة بالطريقة، وإن كان إنشاؤها في حد ذاته إضافة، ولكني لن أتوقع أن تكون غير نسخة ختمية من "ساهور".. والله أعلم.
وفي كل الأحوال أتمنى نجاح قناتكم الوليدة وان شا الله تكون نفاج لصوت الاتحاديين، وشباب الحزب بالذات، لدعم الديمقراطية داخل التنظيم وتقديم المثال لبقية الاحزاب..
،
ايدينا يا ولد
أيدينا للبلد..
،
،

شكراً أخ طارق عمر مكاوي على مرورك من هنا،
،
بعثت لك الإيميل على المسنجر الداخلي هنا وبرضو على ايميلك.
في إنتظار ما ستنقله لنا،
وشخصياً اتفاءلت بكلامك، وأرجو أن يصدق ظني..
،
،

العزيز بدرى
يازول اصلو ما تقيف
الموضوع مهم جدا ولازم نبدا فى يوم من الايام والافضل نبدا الان
خبرات نادوس مهمة جدا ومطلوبة
ايضا طارق ونبيل قدمو افادات جيدة
فى البورد خبرات اعلامية كثيرة ياريت نسمع منهم

الباشمهندس ابوبكر سيد احمد
له باع طويل وتجارب
سوف اتصل به للمساهمة فى هذا البوست

أستاذنا محمد سيد أحمد
تسلم ياخي على المرور والتشجيع،
وايد علي ايد تجدع بعيد، وبعيد شديد لو في عزيمة ورغبة حقيقية..
وزي ما قلت الخبرات الإعلامية مالية البورد ومالية المنافي، وكلهم عايزين الفرصة عشان يساهموا في شي حقهم ويهمهم،
وطال انتظار الجميع للإيد البتتمدة وتبادر، لكن للأسف واضح إنو الرجاء والأمل ضعيف فيمن كنا نحسبهم سباقين، ويهمهم الأمر أكثر من غيرم،
ولهذا من المفترض أن تأتي المبادرة من هؤلاء، وتفعيل خبراتهم لقيام هذا المشروع، الذي هو استثماري أيضاً، وذو جدوى اقتصادية، بجانب كونه أداة إعلامية فعالة لاستراد عافية وطننا المسلوب.
وما حك جلدك مثل ظفرك..
،

Quote: الباشمهندس ابوبكر سيد احمد له باع طويل وتجارب سوف اتصل به للمساهمة فى هذا البوست

تحياتي للباشمهندس أبوبكر ولاحظت غيابه هذه الأيام أرجو أن تطمئننا على صحته..
ويا ريت نشوف مساهمتو هنا فكما قلت للرجل تجارب ثرة وخبرات عديدة يمكن الاستفادة منها.
،
،
(نبنيك أكيد
نبنيك هوا
نبنيك أيوا سوا سوا
من أو جديد
نبنيك جديد..
.....
بي ايد أبوي على ايد اخوي
على ايدي انا
على ايد وايد
تجدع بعيد
في اللجة من راس ميضنة
...)*
،
____________
مقاطع من قصيدة الخلاص لـ(حمّيد) طبعاً..
،

،
أشكر كل من اتصل علي مشجعاً على الاستمرار في هذا الخيط،
وكل من زودني ببعض الأفكار التي تدعم قيام هذا المشروع.
وكذلك كل من أبدى خيبة أمله في تبني الاحزاب لفكرة مماثلة.
،
،

عرفت من خلال هذا البوست أن بعض المبادرات قد صدرت من بعض الشجعان، وبصورة فردية
فغير إذاعة النوبيين التي قامت بمبادرة من د. نبيل، فهناك إذاعة سودانية حرة، إذاعة قومية تتكلم بلسان الجميع كانت قد سبقت الجميع، بل واستطاعت أن تبث عبر الـ fm داخل السودان
وبمبادرة أخرى من الإعلامي: أحمد أبنعوف..*
وهنا رابط الموقع الذي من خلاله يمكن الاستماع للإذاعة..
http://www.sudaneseyouth.net/forum/viewforum....d7173e893425092bc484
،ـ
معاً من أجل المزيد من الجهود من أجل قناة/قنوات سودانية حرة ومعنية بالإنسان ووطن جديد..
،
_______________
* احمد عثمان (عثمانوف)، إعلامي سوداني مقيم بأمريكا..

،
كنت أتمنى أن أسمع صوت الكثيرين، ممن تعلو اصواتهم كل مرة مطالبين بالانتفاضة هنا..
وكذلك أصوات الإعلاميين.
وكل أهل الهم الواحد..
،
ولكن..
.
.
تستمر المناداة..
،

،
لو كانت لنا قناة حرة،
لما استطاع النظام إلصاق صفة العمالة والارتزاق بهذه البساطة والمجانية لكل من يعارضه،
ولما صدقه المواطن المسكين..
عذراً "فاروق ابو عيسى" ودام نضالك
نحن نريد قناة فضائية لنساهم في دحض مثل هذه المزاعم فهل أنت معنا؟
،
ولو كانت لنا قناة فضائية حرة
لما استطاع النظام اعتقال من شاء وقت من شاء
وتعذيب واضطهاد من شاء وقتما شاء
المجد لكل من اعتقل وعذب بسبب المظاهرات الأخيرة
ويللا هيلاهوب سوا
،
قناة فضائية يا معارضة..
لأجل كلنا..
،

Quote: ¡ عشان الصوت والصورة تصل للكل داخل البلد أولاً، وعشان الناس تعرف شيء عن الحاصل، وعشان الحركة تكون موحدة في المدن والأرياف.. عشان صوت الشارع يصل للعالم، عشان نحمي المساكين البطلعو الشارع بدون ضهر ديل.. عشان نجبر باقي القنوات الفضائية تنتبه لما يحدث، ويلقى الصوت صدى أبعد.. وعشان وعشان ... طالما الثورة مرتقبة وعايزنها تمشي صاح.. وتقوم للبلد تاني قائمة. ، وعشان واهم من يظن أن الانترنت وحده يكفي عن باقي الوسائل.. وعشان غياب صوت المعارضة (راديو، تلفزيون، .. غيرو)، هو ما أتاح لإعلام الانقاذ القوي والمدروس، أن يجعل الشعب، ييأس من الخلاص، ويقنع من خيراً في المعارضة.. وعشان الصوت والصورة أسرع وأكبر أثراً من باقي الوسائل.. وعشان الجرايد ما بتصل لكل الناس في بلادنا الكبيرة.. ولا كل الناس بتقرا وعشان النت متاح ربما لأقل من 5% من شعبنا الفضل.. ، ،

شكرا على هذا البوست

وأضم صوتي لصوتك

تعالوا نتفاكر لإنشاء قناة تلفزيونية للتغيير

الأخ بدرى الياس
لك التحية
هؤلاء ذبحوا التعليم للتجهيل ومن ثم سلطوا إعلامهم
للتضليل الذى أدى لإستلاب عقول البعض وتغييب
عقول أخرين فى متاهات الأمانى والوعود المعسولة
التى دأبوا على التبشير بها طوال سنينهم العجاف
مما مكنهم من نهب وسرقة أموال دافع الضرائب السودانى
وباعوا كل المؤسسات الحكومية والأراضى والعقارات لتصب
فى جيوبهم .
لذا لا بد من وجود قناة فضائية تكشف زيف ونفاق هؤلاء المنسوبون
زورا وبهتانا الى البشرية وتعمل على ترتيق النسيج الإجتماعى
ونبذ العصبية والقبلية وتسهم فى الإجهاز على نظام الإنقاذ المتهالك
المترنح .
الى الأمام دوما أخى بدرى الياس

سلام يا صحاب

تعرف يابدري

المحزن انه ومع التحول من الانالوق في بداية تسعينات القرن الماضي الى الديجتال فان تكاليف الأجهزة والأنظمة الخاصة بصناعة التلفزيون تقل بمعدلات كبيرة.....
وكذلك تكلفة إيجار الحيز الفضائي ورسوم up/downlink....