عيال بقاره أيامكم ساكوبيس ....الحكامة قالت ليكو !!

العاجكو
على مانعوا
دول صبحوا
دول غربوا
ودول جكوا
الريشه،
بتن ماجوا
****
الساعه سته
تمت ليكو
أكل الرغيف
أتحال ليكو!

محلبى الدقاقة بسمع حسيس الناقة ** تومى الدنيا فراقه

محلبى دقيته فوق العلب دريته ** تومى المردوم خليته

بريمة

دكتور قور

سلامات ..

الشايب أب صدر مصنقر كيف النسر ** بتين تموت الصبيان يحفروا القبر
الشايب أب شيبه الله بلانى بيكا ** بتين تموت الصبيان يحدوا ليكا


----
يحدوا من الحداد

بريمة

بريمه :
قبلى أبا الكوز أوبقطيه
قلبى أبا الكوزى أبو لديه

Quote: قبلى أبا الكوز أوبقطيه قلبى أبا الكوزى أبو لديه

والله لو ممكن
شرح مبسط بس
لانى ما قدرت افهم (أبا)
بمعنى والد
ولا كــــــــــــيف
؟؟؟؟




قاسم المهداوى

ول أبا قاسم

Quote: قلبى أبا الكوزى أبو لديه

أبا معناها: كره .. والكوزى هو القطية .. اللديه هى الأثافى ..

بريمة

دكتور قور
سلام .. يا أخى أنت غير الرمية من مرمية المردوم إلى غنى الهداى ..

من أشعار السلامى:

تلل تلل تلل تلل
جمال فاطمة السلامية ما معقول
حير الناس وشغل الطيور ..

فاطمة سوت الشاى ودفقت "التفل"
جات القماري أكلت "التفل" وطلعت الشجرة كل واحدة تناجى أختها ..
ماهى فاطمة السلامية ..
ماهى فاطمة السلامية ..
ماهى فاطمة السلامية ..

أنا جيت ماشى قلت ليها مالك يا قمرية
طارت القمرية طططططت وعنت الجهة الغربية
تبعتها ومشيت شوية شوية بكل عفوية وحسن نية ..
ركت القمرية جوار بيت فاطمة السلامية
عنيت البيت شافتنى فاطمة السلامية
قلت السلام عليكم
قالت فاطمة البسلم يتفضل قدام
مرقت فاطمة شايله برش فى أيدها الشمال وكورية موية فى أيديها اليُمنية
شربت الموية وقلت ليها تسمحى لى أنا قادم لى قدام ..
قالت لى فاطمة خليك حريف وأحفظ النظام!
البجى عندنا هنا لازم يضوق الطعام
والبمشى بلا طعام دا عندنا حرام
أهديتها تحية سلام وأديتها نقطة نظام
***
فاطمة عملت الشاى فى برادها الأبيض سخيل ..
والمعلقة فضية ..
والكبايات رونق وفيها خطوط ذهبية

فاطمة أنت أنتزعت الرشاقة والأناقة من العالم نهائيييييا

شاي فاطمة فيه: حبهان .. قرنجال .. وقرفة دم ..
وكن شربته يظبط كيفك ويزول عنك الهم.
***
شاي فاطمة فيه: حبهان .. قرنجال .. وقرفة دم ..
وكن شربته يظبط كيفك ويزول عنك الهم.
***
كلكم القاعدين يكون للمعلومية ومن هنا ورايحين ..
مرضى العيون لا تودهم مستشفى الوالدين ..
ولا مكة أو الرياض
ولا المغرب
ولا المنشية
شقوا بهنا غرب .. بيت فاطمة السلامية قريب من نيالا وغرب شوية
تشرب شاى فاطمة نظرك يبقى سته فى سته ويظبط مية فى المية
الطلبة كن شربوا شاى فاطمة ما بطلعوا من العشرة الأولية
***
فاطمة جمالك ما معقول حير الناس وشغل الطيور ...
أنت يا فاطمة الريل المثالية
أمك الناقة العشارية
أبوك تور الجاموس البلقب المية
أبوك من البقر سايق فى الألفين
ومن الجمال ألف وخمسماية
ومن الغنم فات التلتمية
ومن الضأن كتير ما شوية
لو جوه ألف ضيف بقول شوية
يضبح ليهم من الفجر للعشية
يا فاطمة أنتم الكرم والجود حقكم من زمان أنتزعتوه من العالم نهائيا
***
فاطمة جمالك ما معقول حير الناس وشغل الطيور ..
فاطمة أنا منك لا أزول ولا أحول وأنسب معاك نهائيا
***
فاطمة حرسك من الجيش أربعة ألاف وتلتميه
وحرسك من الجنجويد ألف وخمسمايه
وأنت يا فاطمة نص السودان يشتغل ليك بدون ماهية
***
يا فاطمة جمالك ما معقول حير الناس وشغل الطيور
عينك نجمة السحور
ووجناتك بضون نور
***
يا فاطمة قالوا يعينونى
وزير الداخلية أو مسؤول مرسوم السودان قلت ليهم ما بدور ..
عينونى مدير بنك السودان قلت ليهم ما بدور ..
عينونى وزير خارجية السودان قلت ليهم ما بدور ..
***
قالوا لى أنت أهبل ولا مغرور ..
قلت ليهم لا أهبل ولا مغرور ..
ألم تسمعوا ماذا تقول الطيور .. فاطمة السلامية .. فاطمة السلامية.
أنت يا فاطمة فرقتينا نهائياً ..
كن أنطوكم دية مليار جنية قولوا مادايرين!
كن أنطوكم ألف ناقة قولوا ما دايرين!
كن أنطوكم تلاته ألف بقرة قولوا مادايرن!
كن أنطوكم سبعمية ألف نعجه قولوا ما دايرن!
***
وقالوا ماهى القضية؟
قال القضية فاطمة السلامية
كن تنطونا فاطمة تنتهى القضية نهائييييييييا

بريمة

ولد الكير ابوجنزير امك ميرم العيين