كتير اتناسا إيديا .. الراحل المقيم خوجلي عثمان

كتير اتناسا إيديا .. الراحل المقيم خوجلي عثمان


11-28-2005, 11:50 AM


  » http://sudaneseonline.com/cgi-bin/sdb/2bb.cgi?seq=msg&board=347&msg=1190265494&rn=0


Post: #1
Title: كتير اتناسا إيديا .. الراحل المقيم خوجلي عثمان
Author: Rakoba
Date: 11-28-2005, 11:50 AM




Save @ PC




كتير بتناسا ايديا
واسيبا عنيه فوق ايديك
وادي عيونك أحلى كلام
تعيد بيهو يوم عيدك
وكل القصة لو عارفه
أنا الزول الصحي بريدك
بريدك
حكاية الريدا بيناتنا
حنينة بجيبا ليكي غناي
زي ما قالو ليك رياد
حكايتي بطالبا الهداي
وحاتك وانت بي جنبي
بحسك انتي في جواي
جمال ماخد شموخ بلدي
وسحاب ليهوا الزرع رجاي
بريدك
ويوم بي صدفة نتقابل
ويبادرك من عيوني سؤال
تعملي انتي زي ناسيا
ويداعب خاطري حسن الفال
تمد إيديها يارب لي
تفوت تنساني لا لا محال
تهمس ليكي كلام الريد
غناوي تفرح الأطفال
أنا بريدك
كتير بتناسا ايديا
واسيبا عنيه فوق ايديك
وادي عيونك أحلى كلام
تعيد بيهو يوم عيدك
وكل القصة لو عارفه
أنا الزول الصحي بريدك
بريدك


Post: #2
Title: Re: كتير اتناسا إيديا .. الراحل المقيم خوجلي عثمان
Author: معتز تروتسكى
Date: 11-28-2005, 12:12 PM
Parent: #1

راكوبه يافرده
ووااااااااااااااى كتير
وااااااااااااااااااى شديد
ماجرستنا وخليتنا دردق فى الواطه..
عليك دينك شوف الكلام ده كيف
Quote: كتير بتناسا ايديا
واسيبا عنيه فوق ايديك
وادي عيونك أحلى كلام
تعيد بيهو يوم عيدك


والقصيده زاتها تمسك فيها وتخلي شنو...

كدى النشم نفسى ونجيك رغم انو الاغنيه ماقادر اسمعها ولا حتى دايره تنزل معاى
هى عندى لكن النفس البشبعها شنو ما دنيه وخصوصا من الزى ناس خوجلى ديل..

وشوف الصدف راكوبه صاحبى
الايام كمان انا واقع ليك فى خوجلى ده كيف..
ياخى يخلى القرايه تخش بى مزاج..
من اغانى الشفيع لى اغنيهو..
ربنا يرحمو
واه يابلد
انساكى كيف انا والشوق معاى عدى السنه..
انساكى كيف وانسى الحلوين الفيها كيف..
يااااااااااااااه..

Post: #4
Title: Re: كتير اتناسا إيديا .. الراحل المقيم خوجلي عثمان
Author: Rakoba
Date: 11-29-2005, 02:06 AM
Parent: #2

أخونا معتز
سلامات
القصيدة رائعة، وأداء الراحل خوجلي فيها بالعود كان أروع، صوت قوي ودافئ، يسافر بك لاماكن كثيرة في الذاكرة..
الأغنية بنسق ريل بلاير، وإذا ما فتحت قول "عوووك"
والله يخليك دايما في حالة "الخوجلة" دي غير بيهو مرة مرة من ناس الرز والفار
تسلم ياجميل على المرور

Post: #3
Title: Re: كتير اتناسا إيديا .. الراحل المقيم خوجلي عثمان
Author: ودالعباسية
Date: 11-28-2005, 12:14 PM
Parent: #1

والله يا حبيب سبحان الله ،،

الاغنية دي نزلتها قبل يومين فى منتدي عكس الريح ،،

Post: #5
Title: Re: كتير اتناسا إيديا .. الراحل المقيم خوجلي عثمان
Author: Rakoba
Date: 11-29-2005, 02:12 AM
Parent: #3

عباسية
تحياتي

ما غريب من زول جميل وذواقه زيك، واصل يا حبيب،وماتنسى تدينا أخبار الحفلات ديك

Post: #6
Title: Re: كتير اتناسا إيديا .. الراحل المقيم خوجلي عثمان
Author: saadeldin abdelrahman
Date: 12-10-2005, 03:39 PM
Parent: #1

برييييييييييييييدك.


يا راكوبه في تسجيل جماعي لي قلب مالو اليوم (عود)...
الواضح فيهو صوت الراحل المقيم/ مصطفى...
والصوت الثاني بقى لي زي فقيد الفن والشباب/ خوجلي عثمان...
اما الثالث فخمنت فيه (كشعب لا تغلبه النظريه) وقلت ده الخالدي!
مقطع

يا طبيب انا سائلك....اظن انه الخالدي
ما رأينا جمالك في عجم وفصاح...اجزم انه الراحل/ مصطفى
رمشك انت يزين....اعتقد انه الراحل / خوجلي

ارجو تصحيحي

تسلموا راكوبة و ودالعباسية.

Post: #7
Title: Re: كتير اتناسا إيديا .. الراحل المقيم خوجلي عثمان
Author: عصمت العالم
Date: 12-10-2005, 04:09 PM
Parent: #6

العزيز راكوبه...


هذا انتقال فريد .وارتحال على اجنحة المدى.فوق غمام غياب الايامزحيث الدفء يستشرى ويحضن كل زمان الشوق..بذلك الحنين ..والعيون تستريح فى حدق العيون.والايادى الحرير مدفونة فى تلك الاكف الاعتلاج..وصوت الراحل المبدع المخملى يطرز سموات الكون بمصابيح الشجن وعذوبة اللحن وغفوة الاحساس الانسجام..لنرحل عبره الى تلك المواقع الكواكب النجوم...
ما اروعك وانت تغلق كل المنافذ إلا من ذلك البصيص الذى يتسلل الى اعماق دواخلنا وهو يدلق ويسكب كل ذلك العطر ويلون علينا ويشكل مشاهد الحياه...لنرى ونحن فى غفوة الارتحال كل تلك الصور الخيال وهى تتراقص فى عربدة النشوه اما ابصارنا فيحتضنهانظرنا ويغلق عليها رموش العيون.ويتدثر بوشاح تلك الرقه الترف .وهى ترش لهفة نداوة الاحساس ...فنرحل فوق ذلك الزورق الذى ينساب فوق مياه النهر والقمر يداعبنا بشعاعات ضيائه البلور...فنمضى ونحن نتوه فى اغفاءة الشجو الشجن...على اخضرار حلم المساء الوردى

كل الامتنان وانت تسعدنا بكل ذلك العطاء الدفق..

عميق تقديرى

Post: #10
Title: Re: كتير اتناسا إيديا .. الراحل المقيم خوجلي عثمان
Author: Rakoba
Date: 12-11-2005, 03:31 AM
Parent: #7

العالم عصمت
تحياتي

اسعدني جداً مرورك من هنا، وصوت الراحل المقيم خوجلي يبعث في النفس الطمأنينة والراحة، وهذا اللحن من أجمل الألحان التي تغنى بها، إضافة إلى مجموعته الفريدة.
كل الود

Post: #9
Title: Re: كتير اتناسا إيديا .. الراحل المقيم خوجلي عثمان
Author: Rakoba
Date: 12-11-2005, 03:28 AM
Parent: #6

أبو السعود
سلامات
التسجيل بطرفي أيضاً ومرات كتير برضو بحتار زيك ، إلا إني شغلت نفسي أكتر بالاستمتاع بيها، وأنا وجدتها في الإذاعة.
وإنشاء الله تسنح الفرصة وننزلها هنا

Post: #8
Title: Re: كتير اتناسا إيديا .. الراحل المقيم خوجلي عثمان
Author: JAD
Date: 12-11-2005, 01:54 AM
Parent: #1

الأخ العزيز راكوبا ..

فائق الشكر والامتنان ..


ورحم الله الراحل خوجلي عثمان .. وأنزل على قبره الضياء والنور والفسحة السرور ..

آمين ..

Post: #11
Title: Re: كتير اتناسا إيديا .. الراحل المقيم خوجلي عثمان
Author: Rakoba
Date: 12-11-2005, 03:32 AM
Parent: #8

حبيبنا جاد
نطلب معك من العلي القدير الرحمة والمغفرة للراحل خوجلي عثمان بقدر ما اعطى لنا من فن وجمال.
ومعاً في مشروع تكريمه الذي افرد له مساحة سابقة في هذا المنتدى، عبر موسيقارنا الموصلي.