غينيا تهزم السودان 6/صفر

أنتهت قبل قليل مباراة السودان وغينيا
بهزيمة ساحقة 6/0

انا لله وانا اليه راجعون
مفروض نقدم اعتذار عن المشاركة في غانا المزعومة هذه
أقلو نحفظ ماء الوجه

لاحول ولاقوة الا بالله

علماً بأن الفريق القومي
قد إنهزم من جنت البلجيكي بخمسة أهداف وهو ليس من فرق المقدمة
ومن الفريق النيجيري بهدفين وهو يلاعبنا بالفريق الثاني المطعم ببعض
لاعبي الفريق الأول

هو السودان لسه بلعب كورة؟


دينق.

يا دينق السودان القديم ولا الجديد

عموماً فريق بممثل هذا المستوي هل
سيصمد في النهائيات أمام فريق بمستوي الكاميرون


وما هي أسباب هذه الهزيمة الثقيلة ..؟؟؟؟

Quote: وما هي أسباب هذه الهزيمة الثقيلة ..؟؟؟؟

ده سؤال ده؟


دينق.

تستاهلوا


يلا بلا كورة للا قرف

واجعين رأسنا بي هلال / مريخ ...

يعني الأسباب الخلت الفريق ينهار كده

الحكم ظالم ؟؟
الواطة باردة شديد ؟؟؟
الأجهاد لكثرة المباريات في الأيام السابقة ؟؟
طول الموسم الرياضي ؟؟؟
عدم إنسجام ؟؟؟؟
عدم وجود خطة وتكتيك ؟؟؟
كبر أعمار اللاعبيين ؟؟
الفارق في المهارات ؟؟؟؟
وزي مليون مبرر ومبرر ؟؟ بس عايزين نسمع التبرير الرسمي ؟؟

zuhair zenaty

التحايا

Quote: فريق بممثل هذا المستوي هل سيصمد في النهائيات أمام فريق بمستوي الكاميرون

الفريق القومي لازال في طور الاعداد وخيرا لنا ان تاتي الهزيمة مبكرة من ان نفجأ بنتائج اسوا فيما بعد هذا المنتخب صمد وبقيادة مازدا مع الكاميرون اذا فلا داعي للياس والتاويل نعم النتيجة كبيرة ولكن اكرر لازلنا في مرحلة اعداد

الجهاز الفني يعرف ماذا يفعل وماذا يعمل وهو الادري والوقت لا يكفي للتاويل وغيرة
نتمني التوفيق لصقور الجديان او تماسيح النيل

غايتو يا علي مزمل كلامك ده اسمو "الانكار لما هو بادي للعيان"
وبالانجليزي اسمو "denial"

قصدك انو الحصان جاي في اللفة مش؟
الليلة اللفة دي الا تكون لفة الجريف...

يا ود الزناتي عليك الله واجع رأسك مالك فريقهم و هم حرين فيهو
يدوه 6/0 و للا 100/......
شايفك عملت الحالة واحده..يا زميل

Quote: أنتهت قبل قليل مباراة السودان وغينيا بهزيمة ساحقة 6/0

لا حول ولا قوله الا بالله
كدى شوف لينا كم لاعب من المريخ كان فى المباره دى؟

يا علي مزمل
الفريق القومي ، مفروض يكون في نهاية الإعداد
ما الإعداد التجريبي الممكن تقبل فيهو أي نتيجة
الفريق بعد ايام حايدخل معمعة النهائيات
ودي آخر مباريات مفترض يكون وصل فيها للتشكيلة النهائية
والخطط الحايلعب بيها
عموماً نتمني للفريق القومي التوفيق وقلوبنا معهم


يا دكترة هم منو إختار :
ناس المريخ
ناس الكورة
ناس السودان



يا إبن عمي وليد صفوت (إبن عمي دي طبعاً في إشارة لكلام سيف النصر أعلاه)
نتمني أن يكون كلام علي مزمل صحيح وأن يأتي فريقنا ويكتسح الجماعة في اللفة
إنشاء الله الأولي يدرن لينا مع مصر ويغلب زامبيا والكاميرون دي والله صعبة شويات


يا يوسف الولي
والله كلنا هلالاب لكن الفريق ده بيلعب بأسم السودان
وما في طريقة نزوغ منه لازم نقيف معاهو وندعمه

والله يا جماعة تيمنا ما كعب وفيه اولاد صغار ممكن يجرو اكترر من تسعين دقيقة ...
بس كيف المدرب يديرهم كويس ...
ومكونات الفريق اغلبهم هلال مريخ والاتنين انجازاتهم السنة الفاتته عالية في افريقيا ...
وكان على الكاميرون عذبناها باتيامنا السجمانة زمااان ...
ممكن تقولو حبائبنا المصريين عقدتنا ...بس الجماعة ديل بهدلناهم السنة الفاتته الهلال غلب الاهلي 3/0 وغلب الاسماعيلي 3/1 والمريخ غلب الاسماعيلي بالخرطوم وتعادل معاه بمصر ...
ومنتخب مصر اغلبه من الاسماعيلي والاهلي وشوية محترفين بيخافو ع رجلينهم ...
غايتو ما عندنا شيء نخسرو وسمعتنا واقعة في الكورة ...
سبحان الله ممكن نكون ذي اليونان... ونشيل كاس افريقيا بس قولو يااارب ...

الإستاذ زهير و النخبة الكريمة

السلام عليكم و تحية طيبة لكم جميعا

المنتخب السوداني ظهر بمستوي متدني في معسكر الإعداد والإسباب كثيرة:

الخوف و الضغظ النفسي منتخبنا تعود علي إداء مبارايات ودية مع فرق ضعيفة المستوي برغم ان مازدا كان موفق فى إختيار تسلسل المباريات الودية بداية بفريق جنت حيث توقع مازدا إن المنتخب سيفوز علي جنت حتي تكون الدفعة للمباراة القادمة منتخب نيجيريا الصف الثاني و لكن جاءت السفن ..... و من ثم اختيار اسبانيا البلد غير موفق الجو فى اوروبا بارد جدا الآن و البطولة ملعوبة فى غانا يعني كان ممكن يكون المعسكر فى جو معتدل بعيدا عن اوروبا و اجزم بان اغلب لاعبينا لم يزورا اسبانيا من قبل مما يؤثر علي عامل التركيز فى المعسكر انا عن نفسي لو ودوني بلد لإول مرة الشمار بكون قاتلني شان اشوف البلد و ممكن ده يآثر علي تركيزي ده من ناحية تسلسل المباريات و موقع المعسكر .... من الناحية الفنية اغلب اللاعبين تركوا الخرطوم و هم في حيره من امرهم مثل بهاء الدين المشطوب و مع علم مازدا بشطب بهاء الدين و التاثير النفسي دفع به في المبارايات..... هناك جانب سلبي يؤخذ علي الإتحاد العام في السودان كان يجب تغيير توقيت التسجيلات لما بعد البطولة لتجنب التاثير النفسي علي لاعبي المنتخب.

من خلال مشاهدتي لمستوي المنتخب لاحظت ان مازدا مشغول بتجربة جميع اللاعبين و عدم التركيز علي الجمل التكتيكية لاحظ إداء الفرق الاخري و فريقنا القومي الذي اقل الخطط التكتيكية و يعتمد علي لاعبين بعينهم

Quote: نشرت: 13/01/2008 - 16:27 عدد رقم 5866 • اتاح الجهاز الفني لمنتخبنا الوطني بقيادة المدرب محمد عبدالله مازدا الفرصة لجميع اللاعبين الذين رافقوا البعثة للمشاركة في المباريات الودية التي اداها في معسكره بمدينة ملقه الاسبانية· خضع نجوم الصف الاول للمنتخب الوطني لتدريبات صالة وسباحة امس وهي المجموعة التي شاركت في مباراة امس الاول امام منتخب غينيا الاول وذلك في الوقت الذي شارك فيه نجوم الصف الثاني في مباراة غينيا (ب)

من رائ الخاص اجمل مباراة لعبت حتي الآن مباراة المنتخب السوداني بالصف الثاني امام مباراة منتخب غينيا الصف الثاني موسي الزومة وبله جابر في الاطراف وامير دامر واتيرتوماس في قلب الدفاع والباشا وسيف مساوي وعلاء الدين يوسف ومهند الطاهر في الوسط وعبدالحميد السعودي وجيمي ناتالي في الهجوم وحل اكرم الهادي سليم بديلا للمعز وعادل بخاري بديلا للباشا وكرنقو بديلا لعبدالحميد السعودي· وتالق اشادت به اغلب الصحف لمدافع المنتخب الجديد اتيرتوماس

قلقي يزداد علي المنتخب يوم بعد يوم و اضف عليها الرجوع للسودان يوم الاثنين لمواجهة الإعلام و الجماهير بنتائخ خائبه كان يجب التنثيق بين إداري المنتخب و الاتحاد العام للذهاب لمكان مريح نفسيا للاعبين للتاقلم اكثر ودراسة الفرق المنافسة و التركيز علي تشكيلة المنتخب لغانا عوضا عن الرجوع للسودان.


حظ اوفر لمنتخبنا فى غانا و إن شاء يحقق الفريق نتائج مميزة إن شاء الله مع الدخول فى جو البطولة الحماسية و تركيز كل لاعب علي البطولة لإنها من الممكن ان تكون الطريق لإول محترف لنا فى اوروبا اتمني من الله السداد للمدرب، الخطة ، الحارس، لاعبي الدفاع، محركي الدينامو لاعبي الوسط ، جالبي البهجة للجمهور السوداني إن شاء الله لاعبي الهجوم.

بشويش ياجماعة الخير على الشباب ديل ...

من وجهة نظري ان هذا الجيل من اللاعبين أدوا ما عليهم تماما بحسب امكانياتهم وامكانيات البلد..
وأعادوا الكرة السودانية الى الأضواء القارية بعد اكثر من 32 عام شى يستحقوا عليه التكريم مهما حدث بعد ذلك ..وهو انجاز لم يحققة لاعبين العصر الذهبي الوهمى للكرة السودانية ..من السبعينات والثمانينات ومريخ مانديلا وهلال 87 و92 وناس فلان وعلان ..
فقط نطلب منهم أن ينستروا فى غانا ويكملوا جميلهم على الكره السودانية ويتلولوا فى الجماعة بالتعادلات او على الأقل ينهزموا بشرف ( يعنى فارق هدف وكدا) . وبعد كدا مطلوب استقبالهم فى الخرطوم استقبال الأبطال . والمقدم ما موصل ..

شكرا لهم ولا تحملوهم أكتر من قدرتهم ...

العزيز سيد
أتفق معك بأن أختيار اسبانيا في هذا التوقيت فكرة غير مناسبة
لبرودة الطقس إضافة لكونها نقلة غير عادية لجميع اللاعبين
كما أن غانا وهي في النصف الجنوبي من الكرة الأرضية ستكون دافئة
فمعسكر الامارات في كل الأحوال هو الأفضل وبقليل من التخطيط والأتصالات
كنا وجدنا العديد من الفرق لملاعبتها ...

اما الكابتن مازدا فكثير من الناس لديهم رأي فيه بأعتبار أن المرحلة
أكبر من أمكانيته وكان يمكن الأستعانة بمدرب آخر يساعده مازدا
ولكن عناد شداد يقف عائقاً امام كل المبادرات
لك شكري علي مداخلتك القيمة

ايها الافاضل .. لماذا تتوقعون من ان ينتصر السودان في الكورة والهزائم تنخر جسد البلاد والعباد بسبب الفساد والفقر والمرض ومغامرات السلطات المفروضه علي الشعب .. اليس هؤلاء الاعبيين منا نحن الشعب المهزوم بحكوماته وساسته واحزايه....ينهزم الانسان السوداني كل يوم وكل ثانية في اكله وصحته ومعاشه وحتي في عرضه وهناك من يبكي علي هزيمة كروية ...

الأنتصارات الأخيرة للكرة السودانية اعطت الكثير من الناس
دفعة معنوية هائلة رغم إنها جاءت خبط عشواء في الغالب
الأعم ، ورغم ذلك أفرح الناس كثيراً ونقلتهم من الواقع
الحياتي السئ ،،،، فكيف لناأن نحتمل هزيمتين في وقت واحد
يهزمنا المؤتمر الوطني 18/صفر ثم تأتي غينيا وتهزمنا 6/صفر