Post: #1
Title: النظام العام و مصطفى سيد أحمد !!
Author: معاذ حسن
Date: 08-04-2010, 04:47 PM
لا يوجد حدث في السودان يمكن ان يثير جنون بقر النظام العام ويصيبهم (بالشنبوته*) اكثر من ذكرى الراحل المقيم مصطفى سيد احمد أقول هذا عن تجربة شخصية – مع النظام العام وليس مع الشنبوته-
الذكرى السنوية الثالثة – على ما اعتقد-
للراحل مصطفى سيد احمد
المكان نادي الموردة بام درمان
تحركنا انا والصديق سيف (كان شيوعي والان شيوعي وسواق ركشة) تحركنا من حي الصحافة شرق الى نادي الموردة...وصلنا في وقت مناسب ...كان الاحتفال في بدايته ....الحضور كان حوالي مائتي شخص تقريبا ..من ضمنهم موسيقيون عملوا مع الراحل وشعراء وجمهور واصداقء الراحل وراجل كان يشبه مصطفى سيد احمد كثيرا ...
تحدث شعراء كتبوا للراحل ...
تغنت بنت صغيرة باحدى روائع الراحل ..فأبدعت وهردت قلوبلنا ..
هردتي لهاتي بالغنوات ...
وقت يبرد حشاك يمي ...
من التعب البلا صالح تفيقي تروقي تنجمي...
مافي زول جاب سيرة الحكومة لا بخير ولا بشر..
فجأة ...وصلت أربعة دفارات مليانه بعساكر النظام العام والا شرطة شغب الملاعب والا حرس الصيد ..ما عارف المهم القوة المسلحة بالخراطيش والهراوات والاسلحة النارية طوقت النادي ووقفت تراقب الموقف...
ما سألونا ولا نشدونا لذلك استمر الاحتفال...في مثل هذه الحالات عليك ان تتعامل مع العسكري كال###### ..اذا ما سكاك ما تجري ...
استمر الاحتفال في وجود الحصار لمدة نصف ساعة ...حتى حسبت ان العسكر قد جاءت للمشاركة والاستمتاع بفقرات البنامج ...
ولكن يبدو انهم كانوا ينتظرون تعلمات من جهة ما ...
فجأة وصلت التعلمات ..
وتلبت العساكر
وضرب غرائب الابل ..لا فرقوا بين طفلة ولا مرا ولا راجل كبير ...
زغت من عدة هراوات واخذت معسة قوية في نصف ظهري ...لا حسي موجعاني وتلبت حائط نادي الموردة الرتفع لاكثر من مرتين ونصف...جريت الى ان وصلت الى محطة (بانت) ...وركبت اول عربية وقفت لي قبل ان اسأل عن وجهتها ..انتبهت لاجد نفسي على مشارف سوق ليبيا ...
*الشنبوته- - مرض يصيب الحمير في المكان الذي يصاب فيه الانسان بالبواسير,الفارق ان الحمار المصاب بالشنبوته لا يصبر على الالم ويأكلها في اللباد كما يفعل البني آدمين وانما يصاب بالهياج فيجري بجنون ويفنجط ويركل الهواء ويضرب بقوة كل من يجده امامه بالضبط كدا زي ناس النظام العام لما تجيهم الشنبوبة.
أما سبب حساسية النظام العام مع كل ما يتعلق بمصطفى سيد احمد تحديدا فهذا شان اخر
|
Post: #2
Title: Re: النظام العام و مصطفى سيد أحمد !!
Author: abubakr salih
Date: 08-04-2010, 04:51 PM
Parent: #1
| Quote: أما سبب حساسية النظام العام مع كل ما يتعلق بمصطفى سيد احمد تحديدا فهذا شان اخر |
سلام يا اخ معاذ
الحساسية حساسية الامن الكيزانى مع الفنان مصطفى سيد أحمد، كانوا و لا زالوا يكرهونه لان الاسوياء يحبونه.
|
Post: #6
Title: Re: النظام العام و مصطفى سيد أحمد !!
Author: معاذ حسن
Date: 08-04-2010, 05:24 PM
Parent: #2
| Quote: الحساسية حساسية الامن الكيزانى مع الفنان مصطفى سيد أحمد، كانوا و لا زالوا يكرهونه لان الاسوياء يحبونه. . |
سلام يا ابو بكر
لدي خال يكبرني كثيرا
وقد ابدى استغرابه ذات يوم في اوائل التسعينات
عن سر تعلق الشباب باغاني مصطفى سيد احمد والتي أغلبها تغني بها مصطفى في الثمانينات
ولم يكن يسمعها في الثمانينات الا قلة من الناس.
الاجابة بالطبع
ان فترة التسعينات -سيئة الذكر- ....
يا اخي بلاش من الكلام البيوجع القلب.
يبدو اننا لا نزال في محطة التسعينات -سيئة الذكر-
|
Post: #3
Title: Re: النظام العام و مصطفى سيد أحمد !!
Author: معاذ حسن
Date: 08-04-2010, 04:56 PM
Parent: #1
الجدير بالذكر انني تلقيت تلك المعسة على ظهري
وكنت مدبرا غير مقبل,,
اقول هذا للامانة والتاريخ ..
أغاني مصطفى كانت ولا زالت تسبب حساسية مفرطة للعسكر عموما
وللمصابين بالشنبوتة منهم خصوصا
غني مصطفى
من المدفع طلع خازوق
خوازيق البلد زادت,,
ودي كانت البداية
ويبدو انه رحمه الله عندما غني
تّلبت العساكر والجايين اواخر
كان يقصد اولائك الذين تلبوا في نادي الموردة في الذكرى الثانية لرحيله
|
Post: #5
Title: Re: النظام العام و مصطفى سيد أحمد !!
Author: زهير الزناتي
Date: 08-04-2010, 05:12 PM
Parent: #3
كنت شهوداً علي ما فعله العسكر في ذاك اليوم سأعود وأحكي ما رأيته ....
|
Post: #4
Title: Re: النظام العام و مصطفى سيد أحمد !!
Author: Ashraf el-Halabi
Date: 08-04-2010, 05:12 PM
Parent: #1
بما إنو الحمار دا أكتر زول بيستحمل الآلام ويتسامى فوقها يبقى المصيبة دي حمانا الله حارة شديد
|
Post: #7
Title: Re: النظام العام و مصطفى سيد أحمد !!
Author: شول اشوانق دينق
Date: 08-04-2010, 05:29 PM
Parent: #4
|
Post: #9
Title: Re: النظام العام و مصطفى سيد أحمد !!
Author: طارق الأمين
Date: 08-04-2010, 05:44 PM
Parent: #7
ايام يامعاز
|
Post: #8
Title: Re: النظام العام و مصطفى سيد أحمد !!
Author: خالد عبد الله محمود
Date: 08-04-2010, 05:41 PM
Parent: #4
أها
و الشيوعي سابقاً و الشيوعي بتاع الرقشة حالياً حصل ليهو شنو ؟؟ 
|
Post: #10
Title: Re: النظام العام و مصطفى سيد أحمد !!
Author: معاذ حسن
Date: 08-04-2010, 06:09 PM
Parent: #8
Quote: أها
و الشيوعي سابقاً و الشيوعي بتاع الرقشة حالياً حصل ليهو شنو ؟؟ |
صدق او لا تصدق يا خالد
اول ما بدأ الضرب العشوائي دا
انا وصاحبي اتغابينا العرفة في بعض
أثناء ما كنت بتشعبط في الحيطة وعايز اتلب
بطرف عيني لمحت صاحبي يتشغبط ويقع ويقوم
عليك امان الله ما اشتغلت بيهو شغله...
تلبنا وهو جرى في اتجاه امبده وانا جريت ناحية (بانت)
وفي النهاية اتلاقينا في بيت العزابة واحدة صباحا,,
|
Post: #11
Title: Re: النظام العام و مصطفى سيد أحمد !!
Author: Nasruddin Al Basheer
Date: 08-04-2010, 07:57 PM
Parent: #10
تحياتي يا معاذ
كنت في الحفلة دي يا معاذ أنا وأخوي
والله حفلة كانت قمة في الانضباط والترتيب وما في أي شي
يستدعي حضور الشرطة والحضور كانوا متفاعلين من برنامج الحفلة
لكن فجأة (محمد معانا ما تغشانا) زارتنا كتيبة الكجر
البتشبه الهكر ودون إحم ولا دستور لمت ضرب في الناس
كانت ليلة جميلة في بدايتها كئيبة في نهايتها..
الشرطة هادمة اللذات مفرتقة الحفلات..
|
Post: #12
Title: Re: النظام العام و مصطفى سيد أحمد !!
Author: talha alsayed
Date: 08-04-2010, 08:14 PM
Parent: #11
يا معاذ
فى كل بلاد الدنيا
وجود الشرطى ورجل الامن مدعاه للطمانينه
الا فى بلادنا
مجرد نواجدهم مدعاة لخوف الابرياء
انا متواجد فى قطر 25 سنه
لا ارى الشرطه الا فى المرور والجوازات
وان احنجتهم
ياتوك فى دقائق لمساعدتك
|
|