ليه الحفلات فى السودان حدها الساعه حداشر؟؟؟؟

لست فارغا.. وماعندى موضوع.. ولكن نحن السعوديه البلد المعروف بططبيقه للشرع
ويمنع الاختلاط نحن من الجاليه السودانيه وغيرنا نقيم حفلاتنا حتى قريب موعد
الفجر ليس تهاونا من البلد الكريم الذى نقيم فيه ولكن تقاضيا لما هو غير ضار
وتقديرا لظروف الوافدين الى هذا البلد .
اجى راجع لى موضوع البوست
الحفل حدو الساعه 11 فى الزمن الذى تغير تماما... بقا انسان السودان زيو زي باقى
انسان الدول المتحضره بساهر الى الساعه 12 عكس زمان النوم بعد المسلسل مباشرة
دا اذا كانت الكهرباء مى قاطعه الان تغير الوضع تماما اتمنى ان يعاد النظر فى كثير من الاشياء
نحن لم نطالب بشى جديد عاوزين السودان بتاع امس شكرا
-------
اتو رايكم شنو

الاخ خالد لك التحية

موضوع الحفلة لحدي الساعه 11 ده بدعة ظهرت فى زمن الانقاذ

وتحديدا مع انشاء النظام العام يعنى لو انته عريس على بال ما تصل

مكان الحفل وتتقبل التهانئ اكون الفنان الدافع فيهو كاشات غني ليك

بالكتير فاصل وسكت عن الغناء المباح وكان سالته عن السبب

الاجابة انو الساعه 11 جات بس كده هل الكلام ده قانون؟؟

حاجه اتعودو عليها الناس فى ظل بطش النظام العام ؟؟

لكن السؤال عن الحاجات الزي دي ما بتلقي ليهو اجاب تقنعك فى السودان

زي ما يقول ليك لحمة يوم السبت والاربعاء مافي السبب شنو؟ ما معروف؟؟

Quote: لست فارغا..

حاشاك حاشاك الفارغة اب احمد

سؤال وجيه ومشروع يا خالد اخوي

يسلم راسك انت اللي المحاله خريف
اب قدحا مبرز ما بضاريه صريف
ركازة البميل كان حبشى و لا شريف
جرديق العرب لا عند حدود الريف

هييييييييييييييييييييع كع

Quote: حاشاك حاشاك الفارغة اب احمد

اخوى الطيب والله والكلمة دى عجبتنى انا بكره الفارغه
والليله اعزرنى انى اتكلمت معاك بى رسميه شديده

..
.
البلد بلاها خربانة
والله يرجعو لزمن GMH
وزمن الــ BN ..
والله البلد مش تفقد هويتها
تفقد عواملها الوراثية

_______

خلوها مغتغتة يا المحرب
فأنها نتنه ..

Quote: البلد بلاها خربانة والله يرجعو لزمن GMH وزمن الــ BN .. والله البلد مش تفقد هويتها تفقد عواملها الوراثية _______ خلوها مغتغتة يا المحرب فأنها نتنه ..

الاخ تبلدينا كلامك على العين والراس ولكننا نطمح بان تعود الحال بما كانت عليه
بامننا وقميمنا واخلاقاياتناوسلوكايتنا لك خالص الود

Quote: وتحديدا مع انشاء النظام العام يعنى لو انته عريس على بال ما تصل مكان الحفل وتتقبل التهانئ اكون الفنان الدافع فيهو كاشات غني ليك بالكتير فاصل وسكت عن الغناء المباح وكان سالته عن السبب الاجابة انو الساعه 11 جات بس كده هل الكلام ده قانون؟؟

الاخ خالد انا لا ارى مبرر لهذا القانون نحن فى السودان نمارس حياتنا بشكل
طبيعى فى المكاتب والوزارات شنو المانع يخلو الناس تفرح... ليه هم حا يقلبوا
الحكومه الشعب السودانى شعب جميل وشعب مجامل وكادح بى النهار اتمنى ان تتاح
له الفرصه ان يتنفس الهواء الجميل فى البلد الجميل

Mazaj Alhakooma

Quote: Mazaj Alhakooma

دانيا المكى مزاج شنو لابد من مراجعة هيك قوانين فى البرلمان

شيخ العرب كيف حالك

Quote: ليه الحفلات فى السودان حدها الساعه حداشر؟؟؟؟

ده طال عمرك المشروع الحضاري
يعني نوموا بدري وما تعملوا لينا لخبته...


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

Quote: يعني نوموا بدري وما تعملوا لينا لخبته...

الشايقى كيفك يارجل عليك الله الناس الببتهجو ديل فى من وراهم شر
يعنى زول داير يفرح بى عرسو يمشى يعملو خارج العاصمه عشان
يفرح ويفرحوا بيهو اهلو المساله عاوزه تفاوض يا استاذ

Quote: يفرح ويفرحوا بيهو اهلو المساله عاوزه تفاوض يا استاذ

المشكلة يا أبو أحمد تفاوض منو؟؟؟


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

فوق

Quote: يتنفس الهواء الجميل فى البلد الجميل

الاخ خالد الهواء الجميل فى البلد الجميل .. كان دايرو اقع البطانه

عندك من ابودليق لحدي ريره والصفية والهواد بطولو و عرضو

دي امكان الفرح الجد والحفلات الصاح مع ضوء القمر ولعب السوط ونمة الدوباى

والدلوكه والنحاس الحار حيث لانظام عام ولا زول امغصك واكتم فرحتك

لكن يا اخوي فى الخرطوم محل الرئيس بنوم والطيارة بتقوم .. المغص كتير

Quote: الاخ خالد الهواء الجميل فى البلد الجميل .. كان دايرو اقع البطانه عندك من ابودليق لحدي ريره والصفية والهواد بطولو و عرضو دي امكان الفرح الجد والحفلات الصاح مع ضوء القمر ولعب السوط ونمة الدوباى والدلوكه والنحاس الحار حيث لانظام عام ولا زول امغصك واكتم فرحتك لكن يا اخوي فى الخرطوم محل الرئيس بنوم والطيارة بتقوم .. المغص كتير

ابوخلود هناك الوضع مختلف تماما داير اديك قصه مره كنا فى النديوات
وسط البطانه كنا مرحلين وجونا ضيوف رشايده فى طريقهم الى كسلا ضاربين
ام هبج كلوه يعنى شاقين بى النص المهم فضلة خيرك بعد ما اكرمناهم
عندنا شريط ربابة وقنا كدى عرضنا والله سوينا البدع هناك ياخوى الوضع
مختلف.... كما وكيفا ونوعا وشكلا... لك التحيه

وقعوا هنا لادانة الاعتداء على بيت الفنون
http://www.sudaneseonline.com/petitions

الاخ/خالد

تحياتي؛؛؛

Quote: ولكن نحن السعوديه البلد المعروف بططبيقه للشرع ويمنع الاختلاط نحن من الجاليه السودانيه وغيرنا نقيم حفلاتنا حتى قريب موعد الفجر ليس تهاونا من البلد الكريم الذى نقيم فيه ولكن تقاضيا لما هو غير ضار وتقديرا لظروف الوافدين الى هذا البلد .

اظن هناكـ فرق بين حفلة في الهواء الطلق
وداخل الحيشان (في السودان)؛

وبين حفلة داخل قاعة مُغلقة (في السعودية).

Quote: موضوع الحفلة لحدي الساعه 11 ده بدعة ظهرت فى زمن الانقاذ

خطأ القرار ده عملوا نميري في اواخر عهده ولا زال ساريا حتى الان

الانقاذ زادت عليهو تصريح الحفلة يعني تدفع لناس المحلية ولا الامن ما عارف عشان تعمل حفلة

كلامك خالد اخوي كبير جدا والحديث عن لماذا الساعة 11 موضوع له عدة ابعاد

ساعود اليك يا العزيز

الاخ خالد

لك التحايا

الظاهر انه الحكومة عاوزة تضبط حركة المرور فى الشارع حتى لا تفاجأ بإنقلاب عليها

يعنى اى واحد متحرك فى الشارع بالليل بيكون انقلابى فقالوا نقفل الاتجاه دا

و الخواف ربى عياله

و تسلم

اخوي شيخ العرب ود العز
11 عشان الجماعة الساجدين الراكعين العابدين ما بنوموا الليل ( سراي الليل) ( ليل بدون إزعاج)
في رواية أخرى ، أمر محلي يستوجب معاقبة مخالفه دفع غرامة ويا ريت لو كان فنان مصادرة كل اجهزته
روايه ضعيفة الحد من التجوال والتجمهر بعد الساعة 11
رواية أضعف عشان المحليات والبوليس يطلعوا قرشين من التصاديق
فتك بعافية
الشفيع ابراهيم

وخاصة انه معظم الحفلات حاليا تقام في قاعات مغلقة ونوادي بعيدا عن السكن يعني مافي ازعاج
وما معقول العريس يخسر ليهو مبلغ وقدره في فنان يغني ليهو ساعة واحدة بس

المحرب عساكم بخير

سلامات أستاذ خالد
الساعة حداشر بالجديد يعني الساعة 10 بالقديم
القرار دا إتخيل لي في ولاية الخرطوم لانو في مناطق كتيره خارج العاصمة الحفلات للصباح
عموما القرار دا انا شايفو معقول للحفلات الفي الأحياء عشان مسالة الإزعاج.

خالص الإحترام

Quote: ليه الحفلات فى السودان حدها الساعه حداشر؟؟؟؟

الأخ خالد المحرب ..
سلامات ..

وليه الساعة 11 ما تكون 10 ؟؟


ليه زمنّا مشاتر دون خلق الله ؟؟؟

__

تحياتي ..

عاجل ... إغتيال الطالب محمد موسى عبد الله بحر الدين

خالد المحرب,

من بتين حكومتنا دي بتراجع قوانين و لا بتدرسه؟ بعدين هو لسه في برلمان؟

Quote: عاجل ... إغتيال الطالب محمد موسى عبد الله بحر الدين

للفقيد الرحمه واتنمى ان لايفلت الجانى من يد العداله

Quote: الأخ خالد المحرب .. سلامات .. وليه الساعة 11 ما تكون 10 ؟؟ ليه زمنّا مشاتر دون خلق الله ؟؟؟ تحياتي ..

الاخ طيبان هى فعلا الساعه 10 وليس 11
يعنى الجداد مابنوم فى المواعيد دى
تحياتى

Quote: سلامات أستاذ خالد الساعة حداشر بالجديد يعني الساعة 10 بالقديم القرار دا إتخيل لي في ولاية الخرطوم لانو في مناطق كتيره خارج العاصمة الحفلات للصباح عموما القرار دا انا شايفو معقول للحفلات الفي الأحياء عشان مسالة الإزعاج. خالص الإحترام

الاخ مرتضى ات عارف مرات فى ناس بحتفل تحت البطانيه لما الحفله
تكون عند الجيران ومطلع عنقريبو فى الحوش تلقاهو يرقص تحت البطانيه

Quote: وخاصة انه معظم الحفلات حاليا تقام في قاعات مغلقة ونوادي بعيدا عن السكن يعني مافي ازعاج وما معقول العريس يخسر ليهو مبلغ وقدره في فنان يغني ليهو ساعة واحدة بس المحرب عساكم بخير

الاخ بكرى عباس نعم حصل تغيير كبير صالات ونوادى وبعدين الناس بتكون مرتبطه الى الساعه 10
التجار والعوائل لان فى حركة بقت بى الليل مازى زمان وعليه ما ممكن الساعه 11 بدرى خالص

Quote: في رواية أخرى ، أمر محلي يستوجب معاقبة مخالفه دفع غرامة ويا ريت لو كان فنان مصادرة كل اجهزته روايه ضعيفة الحد من التجوال والتجمهر بعد الساعة 11 رواية أضعف عشان المحليات والبوليس يطلعوا قرشين من التصاديق فتك بعافية الشفيع ابراهيم

والله الكلام دا اخى الشفيع انا ارى ان يعاد فيه النظر
ودا امكن مطلب شريحه كبيره فى المجتمع وبعدين بكون فى توازن
الشعب السودانى امزجه مختلفه اخى الكريم شكرا

Quote: الاخ خالد لك التحايا الظاهر انه الحكومة عاوزة تضبط حركة المرور فى الشارع حتى لا تفاجأ بإنقلاب عليها يعنى اى واحد متحرك فى الشارع بالليل بيكون انقلابى فقالوا نقفل الاتجاه دا و الخواف ربى عياله و تسلم

ود ابسن قال اللعوج راى والعديل راى لكن ياحيدر
قصة برنامج بتاع فرح ينتهى الساعه 11 مى راكبه لى فى راسى

Quote: كلامك خالد اخوي كبير جدا والحديث عن لماذا الساعة 11 موضوع له عدة ابعاد ساعود اليك يا العزيز

منتظرين يااستاذ القانون تدينا رايك من ناحيه قانونيه

Quote: خطأ القرار ده عملوا نميري في اواخر عهده ولا زال ساريا حتى الان الانقاذ زادت عليهو تصريح الحفلة يعني تدفع لناس المحلية ولا الامن ما عارف عشان تعمل حفلة

الاخ محمد ابراهيم كيف اخبارك الغريبه نميرى الله يرحمه
ويحسن اليه اخر حكمه بدا يتخبط

لابد من الغاء القوانين المقيده للحريات وبدون اى مقابل

Quote: اظن هناكـ فرق بين حفلة في الهواء الطلق وداخل الحيشان (في السودان)؛ وبين حفلة داخل قاعة مُغلقة (في السعودية).

الاخ بشير الفرق شاسع بين الصالات والمغلقه والحيشان
هناك صقريه علالة رابطه ورقيص البنوت القديم والحديث
ولكن برضو عاوزين الزمن المطلق بدون قيود

الاخ خالد ,

يجب إلغاء موعد نهاية الحفلات لأنه من متعلقات القوانين العرفية (الطوارئ)

لك التحية

أحمد الشايقي

أبو أحمد

سلام

فرتقة الحفلة الساعة 11م ليها فوائد و ليها أضرار

أها نجي للفوائد :

1. النوم بدري و مفعول ( د. نجيب ) لا يزال يعربد في المخيخ و أم التلافيف.
2. أعطاء فرصة للعرسان لتكملة باقي الليل فيما يخصهما ( ما تحكها شديد )
3. أغلب الناس بتجي بأمجاد .. و ناس الأمجاد بيحبوا يفرتقوا بدري عشان عندهم ترحيل مدارس و موظفات و خلافه.
4. أغلب أطباق العشاء لا يغطي حاجة بطون بعض الإكيلة ، فيفرتقوا ليتموها في البيت و لا يغيب عن فطنتك أن الجائع لا يستطيع أن ينقز في أغنية .. فكل همه في عصافير البطن

أما الأضرار :

1. الفنان بيجي الساعة 9 أو تسعة و نص و هو قابض ثمن حفلة ، فإذا به يغني أربعة أغاني أو ستة في فاصلين و فجأة يصمت المايك و تجد الفنان ( فص ملح و داب ) ..
2. ليلة العمر التي ينتظرها العروسان و أهلهم .. تمتد فقط لساعتين.
3. ذات مرة ضاع التصديق ، و رفض الفنان يغني ، و عندما وجدوا التصريح كانت الساعة العاشرة و الربع ، يعني الحفلة 45 دقيقة بس.
4. أي حفلة مربوطة بزمن محدد تجد الناس متوترة تعاين للساعة و مرة تعود لجو الحفلة ..

تخريمة : ولدي ال في أمريكا قال لما يتزوج حيعمل زواجو في السعودية ( و أشار للفنان مرزوق )

Quote: أها نجي للفوائد : 1. النوم بدري و مفعول ( د. نجيب ) لا يزال يعربد في المخيخ و أم التلافيف. 2. أعطاء فرصة للعرسان لتكملة باقي الليل فيما يخصهما ( ما تحكها شديد

اهلا ياريس د نجيب دحين زولو بنوم الا كان التمرجى زود الجرعه لى المريض
مانى حاكها لكن لكن خلاص الايام كملت ربنا يقويهم

Quote: أما الأضرار : 1. الفنان بيجي الساعة 9 أو تسعة و نص و هو قابض ثمن حفلة ، فإذا به يغني أربعة أغاني أو ستة في فاصلين و فجأة يصمت المايك و تجد الفنان ( فص ملح و داب ) .. 2. ليلة العمر التي ينتظرها العروسان و أهلهم .. تمتد فقط لساعتين

عليك الله الضرر رقم 1 مابليغ
والضرر رقم 2 ليلة العمر فى ناس جاينها من الخليج وامريكا واوربا

Quote: . أي حفلة مربوطة بزمن محدد تجد الناس متوترة تعاين للساعة و مرة تعود لجو الحفلة .. تخريمة : ولدي ال في أمريكا قال لما يتزوج حيعمل زواجو في السعودية ( و أشار للفنان مرزوق ) فى داعى لى التوتر الناس جايه تفرح ولدنا الفى امريكا انشاء الله لما يجى تكون كل العقبات زالت بعد التحول الديقراطى القادم والسودان ينعم بالوحده والسلام شكرا على المداخله المفصله

Quote: الاخ خالد , يجب إلغاء موعد نهاية الحفلات لأنه من متعلقات القوانين العرفية (الطوارئ) لك التحية أحمد الشايقي

الاستاذ احمد الشايقى شكرا على الافادة والراى القانونى

Quote: ليه الحفلات فى السودان حدها الساعه حداشر؟؟؟؟

الأخ خالد بالمناسبة فى اشياء دقيقة قد لا تخطر ببال الكثيرين ، تعرف ان هذا التشريع شبه اصبح عادة مسلم بها بلا مبرر كما ذكرت
ولربما ان بعض الاجيال التى نشأت والبلد على هذا الحال لربما لم تعرف ان الحفل سابقا كان صباحى .
مثل هذا التشريع يريد نفض الغبار عنه ولربما ان العيدي لم يجرؤ على مناقشته للاعتقاد الذى نفيته هنا:
'

Quote: لست فارغا.. وماعندى موضوع..

فحاشاك كما قال الاخ شيقوق لست فارغاً ولكنك صاحب ذاكرة حية ، تنبش فى أشياء تناسيناها بفعل الادمان عليها او ربما التعود

موضوع هذا البوست هام جداً ومثله العديد من التشريعات التى اصبحت عادة وتناساها الآخرين
يجب ان ترتفع الاصوات لرفضه ولمعاملة المواطن السودانى بإعتباره قيم على نفسه ووقته ويدرى كيف يدير ذلك ، ولا تتدخل الحكومات فى مثل هذه الاشياء اللهم الا ان كانت هنالك حالة طوارىء معلنة

شكرا الاخ خالد فالموضوع حيوى وهام ويجدد ذاكرتنا لاستسلامنا وخنوعنا لمقاومة القهر الذى تمارسه هذه السلطة التى لازالت لا تأمن على نفسها

سهل

الاح خالد والله سؤال جيد ومهم وياريت اكون فى ليه اجابه

وفى رأى انا انو ده شكـل من اشكال القمــع للشعب السودانى

الاستاذ عادل سهل

Quote: يجب ان ترتفع الاصوات لرفضه ولمعاملة المواطن السودانى بإعتباره قيم على نفسه ووقته ويدرى كيف يدير ذلك ، ولا تتدخل الحكومات فى مثل هذه الاشياء اللهم الا ان كانت هنالك حالة طوارىء معلنة

الله يخليك فعلا الموضوع حيوي للغاية - المحرب دا مسلط علمت انه عندما يكون راكب سيارتو اللاندكروزر الفارهة متجها لاي من مدن المملكة لا يرضى من اى حد معه في السيارة ان يربك صمته لان تلك هي لحظة التامل والتفكر في مثل هذه المواضيع التي تستحق ان نتفكر في اسبابها جميعا - اهي شرعت لدواعى امنية ام سياسية ؟

عبرك احيي الاخ اب احمد شيال التقيلة

اطيب الاماني

Quote: الله يخليك فعلا الموضوع حيوي للغاية - المحرب دا مسلط علمت انه عندما يكون راكب سيارتو اللاندكروزر الفارهة متجها لاي من مدن المملكة لا يرضى من اى حد معه في السيارة ان يربك صمته لان تلك هي لحظة التامل والتفكر في مثل هذه المواضيع التي تستحق ان نتفكر في اسبابها جميعا - اهي شرعت لدواعى امنية ام سياسية ؟ عبرك احيي الاخ اب احمد شيال التقيلة

والله الطيب انت الوحيد البتقرا افكارى تحياتى

Quote: الاح خالد والله سؤال جيد ومهم وياريت اكون فى ليه اجابه وفى رأى انا انو ده شكـل من اشكال القمــع للشعب السودانى

الاخت محاسن شكرا للمرور والسوال انا مقتنع بيه كما تفضلتى سيدتى الفضلى
انا ارى فيه شى من الاجحاف لهذا الشعب المجامل والمرقام

Quote: الأخ خالد بالمناسبة فى اشياء دقيقة قد لا تخطر ببال الكثيرين ، تعرف ان هذا التشريع شبه اصبح عادة مسلم بها بلا مبرر كما ذكرت ولربما ان بعض الاجيال التى نشأت والبلد على هذا الحال لربما لم تعرف ان الحفل سابقا كان صباحى . مثل هذا التشريع يريد نفض الغبار عنه ولربما ان العيدي لم يجرؤ على مناقشته للاعتقاد الذى نفيته هنا: '

الاستاذ عادل سهل يازول اولا اتمنى ان اجى الدوحه الاقيك والاقى احباب كثر واكون سبب
لتلاقى ناس كتار فى الدوحه ...
الشى التانى الفهم العميق الذي لمسته منك لموضوعى الذى طرحته وعنوانه الحفلات ولكن احمد الله
اننى لست من الهيافه بمكان ولكن ارى انو فيه شى من الظلم لهذا الشعب الجميل

Quote: والله الطيب انت الوحيد البتقرا افكارى تحياتى

انت لكن يا العشاء ما كتاب مكشوف بشفافيتك وسماحتك ودواخلك النقية

هيييييييييييييييييييع

Quote: انت لكن يا العشاء ما كتاب مكشوف بشفافيتك وسماحتك ودواخلك النقية هيييييييييييييييييييع

وانت قلبك عارفو ابيض وكلك حسن نيه يا سلام ياخ

لك التحية /أخي خالد
انت بتنادي وبتطالب بي/سودان أمس!!

تمنيت لو كان اسفك علي ما ضاع ومات من قيم كانت متفردة بيها
بلدنا .ولكن أن تاسف علي( الحفلة تنتهي الساعة كم) والله شئ محزن.
اخي خالد
الحفلات!!
اختلاط ورقيص وتبرج وعري وسكر
وتصوير والكثير الكثير. وكم من حفلة تمت فيها جريمة قتل!
يعني من المستحيل أن تنتهي حفلة بدون مشكلة
هذه هي الحفلات التي تأسف على عمرهاالقصير وما أظن في زول
ينكر الأشياء دي لأنه ده واقع الحال (بدون ان نتطرق الأن لمسألة الحلال والحرام)

نحن في زمن الفتن اخي خالد اليس كذلك؟؟
جنبنا الله جميعآ الفتن ما ظهر منها وما بطن
مع تقديري

Quote: تمنيت لو كان اسفك علي ما ضاع ومات من قيم كانت متفردة بيها بلدنا .ولكن أن تاسف علي( الحفلة تنتهي الساعة كم) والله شئ محزن. اخي خالد الحفلات!! اختلاط ورقيص وتبرج وعري وسكر وتصوير والكثير الكثير. وكم من حفلة تمت فيها جريمة قتل! يعني من المستحيل أن تنتهي حفلة بدون مشكلة هذه هي الحفلات التي تأسف على عمرهاالقصير وما أظن في زول ينكر الأشياء دي لأنه ده واقع الحال (بدون ان نتطرق الأن لمسألة الحلال والحرام)

الاخت الفاضله رشا بابكر تحيه واحترام
وجهة نظرك على العين الراس

ذكرت امور كثيره ليس لها علاقه بموضوع البوست
تحياتى

تحياتي أخي /خالد

لعل هذه الأمور الكثيرة والتي ذكرتها في مروري
هي جوهر الموضوع
أنت والأخوة المتداخلين على قناعة
بأن نهاية الحفلة الساعة حداشر
هو قمع ومصادرة للحريات
وإذا كان لابد من حفلة
فليكن عمرها قصيرآ
فذلك افضل
والله المستعان
لك تقديري

وكم من حفلة تمت فيها جريمة قتل!
يعني من المستحيل أن تنتهي حفلة بدون مشكلة

مااعتقد انه كلامك صحيح 100% يااخت رشا.. احيانا بتحصل مشاكل ومادائما حتي لو حصلت احيانا بتداركوهاوبتنتهي

والحفلة تواصل ...

لك(كسرة في الكاف) ولكم جميعا كثير الاحترام ..

أخونا خالد والله حمنا البورد دا كلو ما لقينا لينا موضوع نقيف فيه

بحثنا عن الموضوع دا لقيناه غطس

الموضوع ليه مشجعين ومتابعين خارج البورد ، سألونى عن الحاصل فيه

مشيت نكتوا ليك من الآخر ، لانه زى ما قلت فى مداخلتى الاولى موضوع حيوى وجدير بالنقاش

ومع بشاير توقيع السلام بتاع دارفور بالدوحة قلنا بالمرة الجماعة يشوفوه يقوموا يضعوا احد الاجندة

لكن النجيضة زى ما قال ود الصايم ، لو كان هو أحد اعضاء اى من الوفود ، كان دفن كرعينه وحلف لو ما ادرجوه فى الاتفاقية ما يوقع

خلينا ندوره وين ونشوف رايه فى الموضوع شنو

فعلى بال ما نرفعه من جديد لنا عودة أكثر جدية

تحياتى ياخالد وشاكر على تواصلك الجميل ، وتلفونك الذى اسعدنى كثيراً

دمت يارب

سؤال

والغريب انو الناس بقت تساهر
يعني بعد تنتهي حفلة 11 دي ممكن الشباب يمشوا ليهم مطعن ويقعدوا يتعشوا ويتونسوا لقريب الصباح دي

والبمشي البيت ممكن يفتح التلفزيون ويقعد في السهرة

يعني الناس اصلا مساهرة مساهرة
ما يخلوهم يساهروا في الحفلة
على الاقل يتنفسوا شوية بعد وجري النهار كلو

حتى الفرح في بلدنا ياخي محددين... ليهو زمن محدد .. ساعتين بس !

اكتر من كدا .. اوعي تفرح .. بنجلد العريس والفنان .. ..... والمعازيم .... وربما الاطفال ...

دا كلام دا ...؟

الأخ خالد المحرب ..
والله لو كان للأنقاذ من (انجازين) يحمدان لها فهو قرارها بتوقف الحفلات او الغناء بعد الساعة حداشر لأنك لايمكن ات تتخيل ياأخ خالد كمية الأزعاج التى تصدرهاالآلآت الموسيقية اضافة لأصوات المغنيين المشاترة التى تزيد الطين بلة والتى تصك اذنيك وتقتحم عليك خصوصيتك وانت راقد فى عنقريبك وتحاول ان ترتاح . منتهى الأزعاج ومنتهى قلة الذوق وعدم مراعاة لخصوصية ولحرمة الجيران .(فى دى ناس الأنقاذ ليهم حق) .
اما الثانية فهى اجازة يوم السبت ..
مع تحياتى .

التحايا لصاحب البوست ،،،

فعلا سؤال يحتاج لى اجابة شافية ،، ومبرررات ،،

على حسب المداخلات انه جزء من قانون الطؤاري ،،ولكن لحدي هسى نحن فى حالة طؤاري ؟

وزي ما قالت احدي الاخوات هنا ،،

انه الناس بعد الحفلة بتمشى تساهر فى اي مكان تانى ،، طيب ليه ما يخلو الناس

تبتهج فى احلى ليلة فى عمرهم ،،

وسؤال لى اخت رشا ،، معقول اي حمناسبة ولا حفل بكون فيها جرئمة قتل ولا مشكلة

احتمال انتى حظك نحس واي حفلة مشيتيها حصلت فيها مشكلة ،،، لكن كلامك دا ما صحيح

نهائ ،،

يا اخ قلقو تحياتى ليك ،،

الان كل المناسبات داخل صالات ولا نوادي يعنى مافى ازعاج للجيران ولا لى الناس النايمة

فى بيوتها ،،

حتى اذا حصل الكلام دا والحفلة كانت فى الحله ،، من زمان قبل الصالات والنوادي دي

الحفلات ما بتكون فى الشارع ولحدي الساعة 3 صباحا وكل الجيران وجيران الجيران بكونو

فى اشد الفرح والبهجة ،، هى مناسبة واحتمال تكون اول مناسبة ليهم وعايزين يفرحو

بيها ويبتهجو ،،ليه ما يخلوهم يفرحو ؟

لانه الناس دي ما شافت فرح من سنة 89

ونطالب بى شدة لى الغاء هذا القانون ،،

تحياتى

Quote: الحفلات ما بتكون فى الشارع ولحدي الساعة 3 صباحا وكل الجيران وجيران الجيران بكونو فى اشد الفرح والبهجة

الأخ ودالعباسية ..
والله بكونوا بس ممكونين وصابرين..حيسووا شنو ؟ يعنى حتشتكى جارك ؟
وبعدين ياود العباسية بالمقابل ليه ماتتم مراعاة حقوق الجار ؟ وفيهم المريض وفيهم الطالب وفيهم الشيوخ والأطفال الذين لا يطيقون السهر وفيهم من يود ان يرتاح بعد طول عناء اليوم , فللناس ظروف ومشاعر يجب ان تراعى .
لكن ياود العباسيةماقلت لى شنو فى اجازة يوم السبت ؟ رهيبة. مش كدة
مع تحياتى .

الاخ خالد
حياك الله وبياك
النظام العام اسم مطور لهيئة الامر بالمعروف والنهي عن المنكر
والمضايقات التي تعملها الهيئة هنا في السعودية وتزعج الحكومة يعملها النظام
العام هناك ولكنها لا تزعج الحكومة طالما انو الكرسي ثابت
والنظام العام تنظيم ناتج لتحالفات داخلية وخارجية وبعيد كل البعد عن السودانيين
وطبائعهم حيث تربوا علي النظام وعشقة

Quote: اتمنى ان يعاد النظر فى كثير من الاشياء نحن لم نطالب بشى جديد عاوزين السودان بتاع امس شكرا

لا اقول ما قاله المعري
امس الذي مر علي قربه.. يعجز اهل الارض عن رده
ولكن اقول لك ان السودانيين قادرون علي رد امس واول امس لكن بالهم طويل شوية

شيخ العرب حبابك

نحن عندنا حدها الفطور...
او ينقطع الصوت...

بتبدأ الساعة 11 بالليل وتنتهي مع مواعيد الفطور الساعة 11 بالنهار

ولو البوست دا انتظرني لي باكر بجيب ليك صور ناس البكه والبشيره والدلوكه

مرحب حباب شيخ العرب ود المحرب..
الغريب في الموضوع مسألة(الخمسين ألف) بتاعت تصديق الحفلة..
ما معروف بتندفع من الأساس عشان شنو..
والقروش بتدخل تحت أي مسمى في بند ايرادات الدولة؟؟1

أسد بطحان
خالد المحرب
تقبل تحياتي وسلامي
سؤالك في محلو؟
وبالرغم من ايجابيات انهاء الحفل مبكراً
لكنني أرى بأنه تحكُم في خصوصيات البشر ليس إلا
مودتي لك ولاهل بيتك الكرام

الاخ بكرى شكرا لترحيل البوست الى المنبر العام
فعلا انا لما فتحت البوست قبل كم شهر كنت امتعض
من هيك تصرفات فيها كبت ولا تعالج شى .....و للمصلحه العامه
يفترض ان تكون هناك مراعاة لمثل هذه الامور المهم انا كنت خارج الرياض
وسوف ارجع الى كل المداخلات الجديده بعد قليل شكرا ياريس والتحيه الى الود
طارق الامين

Quote: من هيك تصرفات فيها كبت ولا تعالج شى .....و للمصلحه العامه يفترض ان تكون هناك مراعاة لمثل هذه الامور المهم انا كنت خارج الرياض وسوف ارجع الى كل المداخلات الجديده بعد قليل شكرا ياريس والتحيه الى الود طارق الامين

يسقط قانون النظام العام ان كان هيك بمستوى اللا دستورية وان كان هيك مهينا لكرامة الانسان

Quote: يسقط قانون النظام العام ان كان هيك بمستوى اللا دستورية وان كان هيك مهينا لكرامة الانسان

لا حولولله تلفونك الان مس كول وبس
اكيد همبربك ضارب هييييييييييييييييييع
اعمل حسابك من النظام انا منتظر منك رد ناو

امشي يا سجم الرماد انا الان في السودان ببلع في العنكوليب سااااااااى ام عبد الله تنقي وانا اقرش كلم الاربابة تنقي ليك ينقي ..........

Quote: امشي يا سجم الرماد انا الان في السودان ببلع في العنكوليب سااااااااى ام عبد الله تنقي وانا اقرش كلم الاربابة تنقي ليك ينقي ..........

العنكوليب لزوم الطاقه احى انا بس انت ليه ماداير تدينى التلفون هسع تيه دى
جيب التلفون يا................ انا منتظرك عندى شغل بدرى داير انوم

Quote: خالد المحرب تقبل تحياتي وسلامي سؤالك في محلو؟ وبالرغم من ايجابيات انهاء الحفل مبكراً لكنني أرى بأنه تحكُم في خصوصيات البشر ليس إلا مودتي لك ولاهل بيتك الكرام

ياسر ودعلى ودنايل عليكم السلام
دى استعباد للعباد ليس الا

Quote: مرحب حباب شيخ العرب ود المحرب.. الغريب في الموضوع مسألة(الخمسين ألف) بتاعت تصديق الحفلة.. ما معروف بتندفع من الأساس عشان شنو.. والقروش بتدخل تحت أي مسمى في بند ايرادات الدولة؟؟

دى حاجه محيره جدا مفروض مايكون فى اى بند زى دا طالما صدر قرار بتوقف الحفله الساعه 11
والا معاتو مافى مشكله يا اخى دا كلام فارغ

Quote: شيخ العرب حبابك نحن عندنا حدها الفطور... او ينقطع الصوت... بتبدأ الساعة 11 بالليل وتنتهي مع مواعيد الفطور الساعة 11 بالنهار ولو البوست دا انتظرني لي باكر بجيب ليك صور ناس البكه والبشيره والدلوكه

حباب نزار ات عارف انا مره مشيت قرى عندنا ولدنا متزوج هناك والله يا نزار سوينا البدع
وات عارف قرى قريبه من المصفا لكن هناك البجى يقول كلام بلقا كلام تانى سوط لى الصباح
الشى التانى انا دايرك ترسل لى تلفونك لانى عندى شغل فى السته شهور الفاتت دى كنت بجى البحرين تلاته يوم فى الاسبوع وما زلت

Quote: الاخ خالد حياك الله وبياك النظام العام اسم مطور لهيئة الامر بالمعروف والنهي عن المنكر والمضايقات التي تعملها الهيئة هنا في السعودية وتزعج الحكومة يعملها النظام العام هناك ولكنها لا تزعج الحكومة طالما انو الكرسي ثابت والنظام العام تنظيم ناتج لتحالفات داخلية وخارجية وبعيد كل البعد عن السودانيين وطبائعهم حيث تربوا علي النظام وعشقة

والله ياالشامى دا فعلا واقع لكن الحكومه بعد الانتخابات انا كنت متوقع
منها تغيير كتير من الامور التى وضعت بدون دراسه كانما الشخص الذى يضع
هذه القوانين جاى من المريخ

Quote: حاتم كاهن

حباب حاتم شكرا على المرور نوخ جمل تشبع لحم

Quote: التحايا لصاحب البوست ،،، فعلا سؤال يحتاج لى اجابة شافية ،، ومبرررات ،، على حسب المداخلات انه جزء من قانون الطؤاري ،،ولكن لحدي هسى نحن فى حالة طؤاري ؟ وزي ما قالت احدي الاخوات هنا ،، انه الناس بعد الحفلة بتمشى تساهر فى اي مكان تانى ،، طيب ليه ما يخلو الناس تبتهج فى احلى ليلة فى عمرهم ،،

الاخ ود العباسيه والله رايك دا يتماشى مع ناس اغلبيه حتى الذين يصلون الصبح حاضر لكن نقول شنو لى ناس المشروع الحضارى الجديد

Quote: الأخ خالد المحرب .. والله لو كان للأنقاذ من (انجازين) يحمدان لها فهو قرارها بتوقف الحفلات او الغناء بعد الساعة حداشر لأنك لايمكن ات تتخيل ياأخ خالد كمية الأزعاج التى تصدرهاالآلآت الموسيقية اضافة لأصوات المغنيين المشاترة التى تزيد الطين بلة والتى تصك اذنيك وتقتحم عليك خصوصيتك وانت راقد فى عنقريبك وتحاول ان ترتاح . منتهى الأزعاج ومنتهى قلة الذوق وعدم مراعاة لخصوصية ولحرمة الجيران .(فى دى ناس الأنقاذ ليهم حق) . اما الثانية فهى اجازة يوم السبت .. مع تحياتى .

الاخ قلقو اظن الاثنين واقعات ليك فى جرح ههههه
مرات صاح بكون فى عزاء فقد كبير والحفله شغاله
ولكن دى ما بتم الا لمن يكون الجيران ما بعرفوا بعض
واجازة يوم السبت دى فيها شى من المعقول لواكبة العالم الخارجى
شكرا على ياسيدى وتحياتى لك

Quote: حتى الفرح في بلدنا ياخي محددين... ليهو زمن محدد .. ساعتين بس ! اكتر من كدا .. اوعي تفرح .. بنجلد العريس والفنان .. ..... والمعازيم .... وربما الاطفال ... دا كلام دا ...؟

سمريه شكرا على المرور الرفض الرفض لتصرفات عساكر النظام العام
ولا بد من اعادة النظر فى مثل هذه القوانين او ازاحة هذا الشعب باكمله
وتبديله بشعب تانى

Quote: والغريب انو الناس بقت تساهر يعني بعد تنتهي حفلة 11 دي ممكن الشباب يمشوا ليهم مطعن ويقعدوا يتعشوا ويتونسوا لقريب الصباح دي والبمشي البيت ممكن يفتح التلفزيون ويقعد في السهرة يعني الناس اصلا مساهرة مساهرة ما يخلوهم يساهروا في الحفلة على الاقل يتنفسوا شوية بعد وجري النهار كلو

شبيكه ات الناس البضعو القوانين ديل ماعارفين الشعب دا داير شنو
بمعنى القرار بتاع النظام العام بجيب لى الحكومه الهوى والنقه والسب
وحاجات كتيره يعنى خلاص بقت على الحفلات شكرا

الاخ خالد
والاخوة المتداخلين


اعتقد أن القرار عشوائي وغير مدروس، كالكثير من القرارات التي ابتلينا بها

يعني الناس ديل عملوا الحفلات لحدي 11 بالليل فقط
عشان يجوا يعملوا حاجة اسمها اوفر نايت Over-Night
الناس العندها قروش تدفع حق تصريح للاوفرنايت دا وتستمر الحفلة الى الفجر
شفتوا التقنين للطبقية والفوارق المادية دا كيف؟

عندك قروش تساهر
ما عندك تنخمد تنوم من 11
ولا عزاء للمفلسين

Quote: الاخ خالد والاخوة المتداخلين اعتقد أن القرار عشوائي وغير مدروس، كالكثير من القرارات التي ابتلينا بها

الاخ اشرف السر ات عارف انا عندى احساس انو اى زول دستورى بجى يعمل قرارات وبس
بدون ما يشاور عليها مرتو فى البيت

اسئله كتيره تدور فى ذهنى
1 البلد دى ما كانت كدا
2 ياربى منو السبب

بلد بى المساحه دى بى التنوع دا وبى الاثنيه دى
معقول يتوحد بى هيك عقول






وانا قصدت ادى مساحه بين السؤال والجواب
داير جواب واقبل الراى الاخر حتى اقتنع
والاسئله كتيره بس الاتنين ديل بخلنى اسال باقى الاسئله

تمام يا ابو احمد

تحياتي ليكم جميعا...


الموضوع .. سبب ضيقا للجميع ...


وشلهتة للعرسان والأهل ..


لكن .. هنالك من يقول ان المطربين .. موافقون علي ذلك ..


لأن الواحد منهم يغني 45 دقيقة ويقبض ملاييين

الحفلة وزمنها امر يرجع فقط لاهل الحفل والمدعوين
تحديدها بلساعة حداشر بدعة انقاذية تسلطية يجب الغاءها مع كل عفن الانقاذ..

والله يا ود المحرب الحتة دي واجعاني في قلبي
يا دوب تسلم علي الناس تلقى الجبجبة انتهت

والله ما عارف ياخالد
انا معاك انو التحديد ب الساعة 11 على اطلاقو ما سليم
ممكن فى الصالات المغلقة والاماكن معزولة الصوت
والحدايق البعيدة من المناطق المفتوحة
ما يكون فى تحديد لنهاية الفعاليات بغض النظر عن نوعا
لكن فى المناطق السكنية
والنوادى وسط المناطق السكنية
لازم يكون فى موعد اقصى والساعة 12 انسب
لانو برضو الحرية بتنتهى لما تبدا حرية الاخرين
وما ممكن نعاقب السكان بى ذنب انو منازلم ملاصقة لى نوادى او مكان احتفال
********
المشكلة انو معظم النوادى بتقع وسط احياء سكنية

Quote: والله ما عارف ياخالد انا معاك انو التحديد ب الساعة 11 على اطلاقو ما سليم ممكن فى الصالات المغلقة والاماكن معزولة الصوت والحدايق البعيدة من المناطق المفتوحة ما يكون فى تحديد لنهاية الفعاليات بغض النظر عن نوعا لكن فى المناطق السكنية والنوادى وسط المناطق السكنية لازم يكون فى موعد اقصى والساعة 12 انسب لانو برضو الحرية بتنتهى لما تبدا حرية الاخرين وما ممكن نعاقب السكان بى ذنب انو منازلم ملاصقة لى نوادى او مكان احتفال ******** المشكلة انو معظم النوادى بتقع وسط احياء سكنية

الاخ رغيم عثمان لك تحياتىوشكرى على المرور

Quote: والله يا ود المحرب الحتة دي واجعاني في قلبي يا دوب تسلم علي الناس تلقى الجبجبة انتهت

السنجك كيف الحال
معقوله بلاهى عليك ياطارق من المغرب يقولوا لى الناس مافى حفلات
نعمل استفتاء رايك يا السنجك لى حاجات كتيره ههههههههه

Quote: الحفلة وزمنها امر يرجع فقط لاهل الحفل والمدعوين تحديدها بلساعة حداشر بدعة انقاذية تسلطية يجب الغاءها مع كل عفن الانقاذ..

هذه امور شخصيه ترجع الى اصحاب الشان دا كلام صاح تدخل الحكومه فيه قمة الاضطهاد

Quote: تمام يا ابو احمد تحياتي ليكم جميعا... الموضوع .. سبب ضيقا للجميع ... وشلهتة للعرسان والأهل .. لكن .. هنالك من يقول ان المطربين .. موافقون علي ذلك .. لأن الواحد منهم يغني 45 دقيقة ويقبض ملاييين

الاخ احمد حنين كيف اخبارك سمعت انك اشتغلت قريب من عندنا فى شارع الصناعات
فى اى بلد فى الدنيا الحفله بتبدا الساعه 11 ونص يااخى الزمن تغير والناس اتغيرت

شيخ خالد ازيك عساك والوليدات بخير
عرفنا ان الحفلات حدها الساعة 11 كما نص عليهو قانون النظام العام
طيب ... كل الناس فى السودان بقت تتغدى الساعة 5 المساء بدل 2:30 او 3 بعد العودة من العمل مياشرة
ياربى ده برضو نص عليهو قانون النظام العام ؟؟؟؟؟"
ارقد عافية

Quote: شيخ خالد ازيك عساك والوليدات بخير عرفنا ان الحفلات حدها الساعة 11 كما نص عليهو قانون النظام العام طيب ... كل الناس فى السودان بقت تتغدى الساعة 5 المساء بدل 2:30 او 3 بعد العودة من العمل مياشرة ياربى ده برضو نص عليهو قانون النظام العام ؟؟؟؟؟" ارقد عافية

الاخ الفاتح السلام عليكم ورحمة الله
انشاءتكون بخير والعيال
شكرا على المرور وتحياتى عبرك الى الاخت سوما

الأخ الفاضل خالد المحرب وضيوفه الكرام
مع احترامي لآراء معارضي تحديد نهاية الحفلات بالساعة 11 مساء ، أعتقد أن قرار إنهاء الحفلات عند الساعة 11 قرار حكيم جدا للأسباب التالية :-
- معظم الدول المتحضرة تطبق نظام عدم الإزعاج بعد العاشرة او الحادي عشرة مساء ..مثلا في اليابان ممنوع هبوط وإقلاع الطائرات في طوكيو بعد الحادي عشرة مساء وتعمل البلديات جاهدة لمحاربة الـ Noise polution. حكى لي صديق أنه في ألمانيا إذا تسببت في إزعاج جارك بعد العاشرة مساء فمن حقه يطلب الحماية من الشرطة . علماً بأن حفلات الأعراس تقام في صالات خاصة والفنادق ولا تتعدى فترتها ساعتين مهما كان العريس غنيا.
- مراعاة حالات المرضى وكبار السن والأطفال وحقهم في الاستمتاع بنوم هادئ عميق
- مراعاة حالات الذين تستوجب طبيعة اعمالهم النوم مبكرا والقيام مبكرا وحقهم في نيل قسط معقول من الراحة والهدوء لمواصلة أعمالهم في اليوم التالي .
- معظم الحفلات تستعمل مايكروفونات مزعجة وتقام على أرض مثيرة للغبار مما يضر بصحة الناس خاصة المصابين بالربو (الأزمة) .
- في بعض الحالات تقام في الحي اربع او خمس حفلات في ليلة واحدة ولكم أن تتخيلوا كمية الإزعاج الناتج من المايكروفونات والغبار.
- ألا يمكن لأصحاب الفرح أن تبدأ حفلاتهم من السابعة حتى الحادي عشرة مثلا ؟ أليست اربع ساعات كافية للبهجة؟
- يقال أن حرية الفرد تنتهي عندما تبدأ حرية الآخرين - كما أشار الأخ رغيم - فلماذا االدفاع عن حرية استمرار الحفلات لساعات متأخرة وإنكار حرية من يريد من كبار السن والمرضى ومن يود النوم مبكرا حق الاستمتاع بنوم هادئ.


مع تحياتي ومودتي ووافر احترامي

توضيح..!.
حفلات الطائفة الاسلامية حتى الساعة الحادي عشر مساءاً.
اما حفلات الطائفة المسيحية حتى الساعة السادسة ونصف صباحا لليوم الثاني.
واحياناً تستمر لمدة15ساعة او اكثر. والتوضيح الاخر..!.
تحصيل رسوم الحفل من ادارة امن المجتمع (النظام العام).
رسوم تصديق الحفل داخل المنزل او في ساحاة خارج المنزل (70)جنيه وبالمجاملة(40)جنيه .
رسوم تصديق الاندية والحدائق والمسارح (150) وبالمجاملة (100) واذا امكانيتك ضعيفة (75)جنيه.

Quote: توضيح..!. حفلات الطائفة الاسلامية حتى الساعة الحادي عشر مساءاً. اما حفلات الطائفة المسيحية حتى الساعة السادسة ونصف صباحا لليوم الثاني. واحياناً تستمر لمدة15ساعة او اكثر. والتوضيح الاخر..!. تحصيل رسوم الحفل من ادارة امن المجتمع (النظام العام). رسوم تصديق الحفل داخل المنزل او في ساحاة خارج المنزل (70)جنيه وبالمجاملة(40)جنيه . رسوم تصديق الاندية والحدائق والمسارح (150) وبالمجاملة (100) واذا امكانيتك ضعيفة (75)جنيه.

الاخ ذو اليد شكرا على المرور
زمان ايام المظاهرات فى عهد نميرى لغلاء الرغيف
كانو المتظاهرين يرددو القصه ما قصة رغيف
هسى من كلامك القصه ما قصة ظبط الشارع

Quote: مراعاة حالات المرضى وكبار السن والأطفال وحقهم في الاستمتاع بنوم هادئ عميق - مراعاة حالات الذين تستوجب طبيعة اعمالهم النوم مبكرا والقيام مبكرا وحقهم في نيل قسط

الاخ الفاضل جعفر اسماعيل لك التحيه وشكرا على المرور والمداخله
انشاء الله ياجعفر حكومتنا تكون بتراعى لى المواطن زى ناس اليابان ديل
لكن بينى وبينك هم لمن عملو القرار بكونو قاصدين مراعاة المواطن ؟؟؟


لك التحيه