Post: #1
Title: حـــرر نفســـــــــك ..!!
Author: Tabaldina
Date: 09-20-2011, 11:19 PM
..
.
حرر نفسك
م. شريفنا
+++++++++++++++
أرفع راسك
زلزل أسرك
أصلك شعباً صعباً كسرك
وحد بأسك
انت المجد مقاسو مقاسك
والقهروك زوالم شمسك
كل الأيدي وكت تتماسك
تكتب نصرك
تهزم ليلك وظلمة حبسك
حرر نفسك بي إيديك
عندك زودك وحمرة عينك
ودخري الحوبة شبابك زينك
علي هتافك
أدي شراع الهنا مجدافك
خلي الخوف يخشاك ويخافك
ويبقى رماد البينو وبينك
كل الدنيا بتسأل عنك
يا مبدع ثوراتك وينك؟
انت الزيّك ما بتذل..!!
كم من ظالم ظلمك وولى
أنا متفائل بيك وبحلم
بل متأكد ما بتتخلى
ما بتتفرج تفضل ساكت
وحفنة تقبقب في خلق الله
أنا متفائل بيك وعارف
إنك يوماُ ما بتتخلى
تبقى حديث العالم كلو
إذاعة .. إذاعة …. جريدة ..جريدة
مجلة مجلة
يملا الشاشة ثباتك
وضو عافيتك
وعلمك وقلمك وجلابيتك
وقدلة ولدك وجدلة بتك
ونيلاً قلدك جنب طابيتك
ما من بيتك يا الحبيتك
كل من ظلمك ولا تربيتك
قدرتك إنت وإمكانيتك
شامخ تبني ديمقراطيتك
وعزة بلدك ورفعة شانك
يا متعدد وواحد ابداً
تحيا العشرة البين أديانك
وسلم حقيقي يزيدك عددا
ويبقى عنان السما عنوانك..
---------------------------------
يا وطن عزّ الشدايد ..
|
Post: #2
Title: Re: حـــرر نفســـــــــك ..!!
Author: محمد المسلمي
Date: 09-21-2011, 00:07 AM
Parent: #1
الاخ تبلدينا الف حمد لله علي السلامة
|
Post: #3
Title: Re: حـــرر نفســـــــــك ..!!
Author: Tabaldina
Date: 09-21-2011, 00:31 AM
Parent: #2
..
.
تسلم يا زعيم
بالامس الاول سجلت ليك زيارة فى الموقع الجديد
ولكن علمت لاحقا من ابو السيد انك خارج البلاد ..
___________
ترجع بالسلامة ..
تلقى كيلو اللحمة بقى ب 10 جنيهات ..
والبنزين ب 3 جنيه .. :)
وحلم الجعان عيش .. قرقر قرقر قرقر
|
|