دعوة لمقاطعة الكوارع والكمونية بسوق صابرين

وانت فى سوق صابرين تتمنى ان تسمع مقاطعة الكوراع والكمونية فالكوارع فى سوق صابرين تنقسم الى مثنى وثلاث ورباع وفى قول اخر خماس طيب نجىء للشرح مثناها يعرفها الجميع وهى وطيات البقر والضأن اما الثلاث فوطيات العنبلوك (التيس) الرباع وطيات الجمل (الابل) وكلمة رباع كناية عن كبر حجمها فى حالة الخماس وطيات الديوك والدجاج يتمتع جراحى شفخانات صابرين بخبرة عملية التشريح خاصة فى عمليات الدجاج(الفراخ) تكون البداية وصول الفراخ فى نوبات عصبية أو موت سريرى ومن ثم رميها فى براميل ماء ساخن ويتابع العملية طلاب السنة السادسة فى كلية صابرين الطبية وبعد معط الريش يتسابق جراحى صابرين اخفاء الفراخ الملط خوفا العيون وليس القانون , نأتى الى مرحلة التشريح وتتم فى الخفاء ويكون الناتج كوم للاجنحة والارجل والصدور واكيد ده لا غبار عليه بس الاكوام الباقية تجنن اولها للرؤوس وثانيها للرقاب وثالثها للكمونية ورابعها للكوارع وخامسها للريش وبسؤلنا خبير بالسوق عن كوم الريش قال ده لزوم درء الشبهات وجعل العيون تتأكد المعروض فراخ .
نمشى لكوارع العنبلوك صغيرة الحجم شحيحة اللحوم تتميز بوجود الصوف بسبب تخوف جراحى صابرين من التشويهات نتيجة حدة المشارط فربما تجعل الكوارع عود ساكت .
فى حالة كوارع الجمال تجد تربيزة العرض تئن من الحمولة ويتحمل المتخصيين الصعاب من اجل ان تكون الكوارع تعجب الزوار وعلى فكرة من الصعب ان تجدها متوفرة فمكنات الشاورمة خير ملاذ .
طبعا كوارع الضأن معروفه ولا تحتاج الى شرح واسألوا عنها بعد صلاة العشاء وذكرتنى بزول كان معانا فى الحى تلقاه جارى لصلاة العشاء وبعد الامام ما يسلم يكون اول زول طالع ولافى شمال وبعد مرور ساعه تكون الامور استوت عنده ويبدا فى العواء ( بعد العشى مافى اختشى ) بس كوارع ضأن صابرين تضم كرعين بنات الضأن وللناس المعارفين مافى مشلكة بحكى النعاج يا احباب من اكثر اللحوم المعروضة فى صابرين بسبب تقلها فى الميزان وشحمها ومفارقة القطعان حيث يقوم اصحابها بحجزها فى زرايب للتشحيم بعد ان اصبحت لا لبن ولا جنى متوقع نرجع لموضوع كوارعها فتكون قوية تستحمل النيران وعلى الخشوم توعد بوجع الاسنان وفى البطون تهيج المصران وان كترته فيها بتمشى احمد شرفى بدون اسئذان .
بالنسبة لكوارع البقر فى صابرين العجالى ممنوع وان وجدته شيل معاك كوم ليمون اصلوا بدلعوه وبقول عليها ده راجع التصدير والبعرفه انا وارد بيطرى امدرمان بعد الكشف والنتيجة يا جنون او غرقان
بالله عليكم الله مش دعوة مقبولة

وكمان ما تنسوا سوق الرحمة بالخدير
سوق الرحمة قديما كان بمنطقة القماير بمحمية الخدير وبعد ترفيعها سميت حى الشاطىء وللعالمين ببواطن الامور كانت محمية الخدير لا تعرف النوم بالنهار الستائر الشوالية (فحم- عيش) تحمى الرواد سخونة الشمس الا انهم ينكوون بحرارة الحلاقيم ######ونة الامعاء اكيد فى جماعة عرفت القصد وبين الفنية والاخرى بجىء الموتر وبعده الكومر وفى الليل زوار المحمية يتمتعون بالتجوال والبحث عن عصير البلح البقول ليه (بكرى) .
سوق الرحمة عبارة عن رواكيب وضل شجر مداه قريب والكمونية والكوارع هما بيرقر وهوت دوق الناس الهنا الغريب فى السوق يتحول الفشفاش الى كبده ولحم الرأس كباب حلة والعلامة المميزة وجود عيون مطفيه واضنين بتعوم بجانب جزيرة للصوف ولا ننسى جحافل الذباب البتلاقيك من الباب وحومان الصقور الدايره الغده والفطور اما بالليل فتحبو الفيران والجقور وفى بعض الاقاويل قالوا شافوا الصبره بتحوم اما عن الكمونية فهى سيدة الموقف وما عليك فى حالة الشراء تجنب لسعات الذباب المولد جنيا بفعل بقايا السوق .
الكوارع متل بتاعت صابرين متميزه بوجود شرابات من الصوف علشان الناس القاعدين مشكلتهم العمى العرقى والغشاوه بفعل الهريسة الفى المريسة لكن القاسم المشترك تعدد النوع .
الاسعار حسب المزاج متروكه للمشترى وما بين البائع والمشترى المزاج
الان كما تدرون رحلت محمية الخدير الى شمال صابرين وحسب الاقوال ما اتغير الحال بس التجار الشطار فاتوا سوق صابرين للناس المفتحين .
بالذهاب الى الخدير الموزعه الوزير اصبح سوق الرحمه متعدد المعروضات ودخل فيه تحويل رصيد ومقاهى اخرالليل وشيشه تصلك الى محلك ..
سوق الرحمة القديم ازيل والان فى الخدير اصبح السوق يعتمد على كمونية وفراخ وكوارع صابرين
مش لى حق ادعوا للمقاطعة
تحياتى