Post: #1
Title: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-17-2011, 04:55 PM
واحد مشوكش بس روحو رياضية جدا وما حاقد ابد ابدا
لو قلت عنك بأنك قبيحة فقد كذبت أيتها الجميلة، لكنك وللأسف الشديد إنسانة انتهازية
باعتني لأول مشتري وبأبخس الأثمان.. هذا قدري وأنا أؤمن بالأقدار، ولولاها لما أحببتك،
فكما يقولون (الحب أعمى) وهذا ما حدث لي بالفعل، ولو كنت أملك أمر نفسي لما أحببتك
... ولأحببت صديقتك هالة فهي تفوقك في كل شيء، في الخلقة والأخلاق، لكنني ماذا أفعل مع حظي
العاثر الذي رماني في امرأةٍ لا يوجد في قاموسها شيءٌ اسمه المشاعر والأحاسيس النبيلة.....
لكنكم لو تعرفون باعتني لمن لازداد كرهكم لها؟
باعتني لمغترب يكبرها بعشرين سنة يقال بأنه طيار.. ويعني شنو طيار؟ ما سواق طيارة زيو
وزي بقية السواقين الماليين البلد، لو كان بسوق طيارتو لمطار هيثرو أو غيرو يعني يفرق
شنو من السواقين البسافروا بورتسودان والأبيض ودنقلا؟ علي الأقل ديل بسافروا لمدن سودانية
نحبها ونحب ناسها.. وتانياً هو مغترب وين يعني؟ مغترب في فنزويلا ولا تركيا ولا كوبا ؟
ما مغترب ليهو في دولة أقامت علاقات تجارية مع إسرائيل.. يعني ممكن يكون شغال سواق طيارة
إسرائيلية وما بعيد يكون انضم لجمعية الصداقة السودانية الإسرائيلية بتاعة ناس تراجي مصطفى
البتكتب في منبر سودانيز أونلاين المنبر بتاع المعارضين بتاعين الضللة، البقى مسيطرين عليهو
الكيزان..
يعني شنو عريسك أب كرشة ده لو ساقك الخليج وعشت في الخير والنعيم؟ هل ممكن يحبك أكتر منّي؟
ما أظن.. عريسك أب صلعة الأشتر ده ما قادر يرقص معاك كويس، الموسيقى كانت في جيهة ورقيصو كان
في جيهة، عليك الله ده حاتتفاهمي وتتناغمي معاهو كيف؟ زول ما قادر يتناغم مع الأغنية معقول يتناغم
مع إنسانة شافها في بيت الجيران؟ عريسك ده قايلاهو لو طوّل خلاص، بعيش ليهو أكتر من خمسة أو ستة
سنوات؟
والله أنا خجلت من الفنان الجابو ليك في حفلتك.. فنان أشتر وما بعرف يغني، الحفلة كلها كانت عبارة
عن أغاني هابطة.. أغاني كلها أغاني جبجبة.. وأنا ما أظلم الفنان ربما يكون متضامن معاي وكان عاوز
يقول الليلة دي ما ليلة السقوط الأخلاقي وسقوط العهود والمواثيق بس، بل هي ليلة سقوط الفن السوداني
الأصيل.. وأنا في الأول نويت أخرب الحفلة لكين من لقيت فيها الفنان الأشتر ده قلت مافي داعي، الحفلة
براها خربانة وأحسن الناس تتفرج على ذوق العريس التعبان. عليك الله لو كان عندو ذرة من الذوق، كان
ممكن يرقص ويبشر ويسكسك سكسكتو الشتراء دي؟
وأمك البلباصة البتحب القروش كانت تزغرد كل دقيقتين ومستلمة الحفلة التقول حفلة عرسها، نست كل
القروش الأكلتن مني، القروش الكسبتهن بتعبي وعرق جبيني.. نست كان كل يومين تلاتة ترسل لي أخوك
الصغيّر القاعد يجي الطيش في المدرسة.. يجيني في كل مرة: قالت ليك أمي عاوزة ليها خمسين ألف..
قالت ليك أمي عاوزة لي مية ألف.. نست كل شيء.. نست الفواكه والسمك واللحمة والكوارع والباسطة
وعصير التانك الكنت بجيبها ليهم كل يومين تلاتة..
أما أبوك الضلالي ده فعندي معاهو حساب طويل عريض.. المنافق كان طوالي ينادي لي تعال يا
أيمن يا ولدي.. بالله في زول بشكوش ولدو؟ أنا كان ما سجمان أناسب لي زول كوز.. ديل انقلبوا علي
شيخهم ما بنقلبوا علي أنا المسكين! بس أنا بتمنى الحكومة دي تتقلب وأبوك ده يروح في ستين داهية ..
وإن شاء الله بركة الشيخ العليش كلكم يسوقوكم لاهاي، وأنا من هسه مع محكمة الجنايات الدولية قلباً
وقالباً.. إن شاء الله تطلّع روحكم يا مجرمين يا البتشوكشوا أبناء شعبكم.. وبعد كده نحن ما حا نسكت
على الظلم والتهميش.. وأقولها ليكم بالفم المليان.. حلايب مصرية.. ونحن مع حق تحرير مصير جنوب
السودان.. وبنتضامن مع كل حركات التحرر في العالم..
الناس قالوا عوض حايبكي ويتأثر، لكين لما شافوني في الحفلة عرفوا إنو عثمان ولد ليهو
سبع.. لا بهموا شاكوش ولا بهموا ضياع القروش.. هيييع أنا أخوك يا رشا..
ونحن ناس أهلنا ربونا علي القناعة والصبر عند المصائب.. بس عندي كلمة للعريس إن شاء الله لما ترجع
الخليج تلقى روحك فنشوك بسبب الأزمة المالية العالمية.. يا سواق الطيارة يا متفلفس يا أبو نظارات..
وإنت يا العروس.. أنا ما بحقد عليك، لكين بتمنى من الله، أصلو ما تضوقي سعادة مع عريسك أب كرشة ده..
وفي النهاية بقول ليك إن شاء الله لما تكونوا مسافرين الخليج ما تلقوا حجز إلا في سودانير.. عشان
تلحقوا أمات طه..
الله أكبر عليكم.. يا أعداء الحب
http://www.facebook.com/groups/79843035126/
|
Post: #2
Title: Re: واحد مشوكش بس روحو رياضية و ما حاقد (منقول)
Author: صديق مهدى على
Date: 09-17-2011, 05:07 PM
Parent: #1
اصبحنا واصبح الملك محمد معاناما تغشانا
|
Post: #3
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-17-2011, 05:19 PM
Parent: #2
| Quote: اصبحنا واصبح الملك محمد معاناما تغشانا |
أهلا بيك أديبنا الكبير
شرف لي إنك تشرف البوست
|
Post: #5
Title: Re: واحد مشوكش بس روحو رياضية و ما حاقد (منقول)
Author: صديق مهدى على
Date: 09-17-2011, 05:25 PM
Parent: #3
ما جبت جديدانا أصلا أديب لكن نعمل شنو مع اللذين لا يتسع صدرهم لقبول الاخر
|
Post: #4
Title: Re: واحد مشوكش بس روحو رياضية و ما حاقد (منقول)
Author: خالد عبد الله محمود
Date: 09-17-2011, 05:23 PM
Parent: #1
| Quote: عريسك أب صلعة الأشتر ده |
أنت زول داير مشاكل يا أبوحسين بالإنجليزي .. 
|
Post: #6
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-17-2011, 05:27 PM
Parent: #4
| Quote: ما جبت جديدانا أصلا أديب لكن نعمل شنو مع اللذين لا يتسع صدرهم لقبول الاخر |
صادق يا صديق
|
Post: #7
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-17-2011, 05:29 PM
Parent: #4
| Quote: أنت زول داير مشاكل يا أبوحسين بالإنجليزي |
يعني يا خالد المية سطر ديل ما أخدت منهم إلا الحتة دي..؟؟؟؟
يا خ بطل المشاكل بالله
|
Post: #8
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-17-2011, 09:56 PM
Parent: #7
*
|
Post: #9
Title: Re: واحد مشوكش بس روحو رياضية و ما حاقد (منقول)
Author: محمد عبد الماجد الصايم
Date: 09-18-2011, 07:51 AM
Parent: #8
غايتو الزول دا بالغ معاكـ في قصة أب كرشة وأب صلعة دي!!
|
Post: #10
Title: Re: واحد مشوكش بس روحو رياضية و ما حاقد (منقول)
Author: وليد عبد اللطيف
Date: 09-18-2011, 08:01 AM
Parent: #9
ابوحسين .. سلامات
ياخي انت راجل عسل وفاكهة عديل
صاحبنا معاوية ود الصايم قال مان تومان
قلنا خلاص البوست بعد ما الشكله تنتهي بعدين نشوف الحاصل فيهو شنو
ياخي دخلت للان بضحك لنكاتك الجميلة
بارك الله فيك
|
Post: #11
Title: Re: واحد مشوكش بس روحو رياضية و ما حاقد (منقول)
Author: Fadl Karrar
Date: 09-18-2011, 08:08 AM
Parent: #9
والله يا أبو حسين فكيت لي زهجة من الصباح
اسعد الله صباحاتك
قول لي المشوكش :
في جماعة لسه ما رشيتهم
أولاً المأذون العقد ليهم
ثانياً بتاع الصيوانات أو النادي
وما تنسي الطباخ
حقيقي روحك رياضية وما حاقد
|
Post: #12
Title: Re: واحد مشوكش بس روحو رياضية و ما حاقد (منقول)
Author: هويدا شرف الدين
Date: 09-18-2011, 10:02 AM
Parent: #11
والله دا شاكوش صعب شديد ، الخلاهو يعبر كل التعبير دا
|
Post: #13
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 10:12 AM
Parent: #12
| Quote: غايتو الزول دا بالغ معاكـ في قصة أب كرشة وأب صلعة دي!! |
بالغ معاي كيف يا زول .... أنا سواق كمان .....؟؟؟؟؟؟
عارف دي حالتو روحو رياضية و ما حاقد كمان
يعني لو كان غير كدا كان عمل فيه شنو ...!!!
|
Post: #14
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 10:14 AM
Parent: #13
Quote: ابوحسين .. سلامات
ياخي انت راجل عسل وفاكهة عديل
صاحبنا معاوية ود الصايم قال مان تومان
قلنا خلاص البوست بعد ما الشكله تنتهي بعدين نشوف الحاصل فيهو شنو
ياخي دخلت للان بضحك لنكاتك الجميلة
بارك الله فيك |
أخونا وليد و عليكم السلام
صاحبك قال كلام أكبر منو و أنا منتظرو إجي إقول Game Over علشان نشوف لينا شغلة تانية
مشى ساكي العرس منو و الطلقوها منو
بارك الله فيك و في والديك يا رب
تحياتي و إحترامي
|
Post: #15
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 10:17 AM
Parent: #14
Quote: والله يا أبو حسين فكيت لي زهجة من الصباح
اسعد الله صباحاتك
قول لي المشوكش :
في جماعة لسه ما رشيتهم
أولاً المأذون العقد ليهم
ثانياً بتاع الصيوانات أو النادي
وما تنسي الطباخ
حقيقي روحك رياضية وما حاقد |
أخونا فضل كرار سلام
أسعد الله يومك كلو ياخ
المشوكش ياخوي أنا ما عندي معاه أي معرفة
و بعدين الزول دا ما حاقد علشان كدا إكتفى بالقليل
لكن لو كان زول حاقد كا رشانا نحن ذاتنا
تحياتي و إحترامي
|
Post: #16
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 10:20 AM
Parent: #15
| Quote: والله دا شاكوش صعب شديد ، الخلاهو يعبر كل التعبير دا |
أهلاااااااااااااااااااااااااااااااااااااااااان هويدا
يعني ما تجي إلا مع بوستات الشواكيش و لا كيف ....!
أها تاني نقعد نفتش أخبار الشواكيش و نفتح بيها بوستات
تحياتي و إحترامي
|
Post: #17
Title: Re: واحد مشوكش بس روحو رياضية و ما حاقد (منقول)
Author: هويدا شرف الدين
Date: 09-18-2011, 10:58 AM
Parent: #16
بعد ما خلخلت قلبي و فيني ما خليت مُرُوَه
جيت تقول البينا خوه
خوه ايه بتبكي سيدا؟
و خوه بتسهر ليالي؟
الاّ دي الخوه الجديده
و الكلام القلنا سوا بي دموع الشوق كتبتوا
و الزمن شن فينا سوا ؟
شوفوا الزمن شن فينا سوا؟
انت ما زولي العرفتو
و الوداد ما بدورلو قوه
و البفوز بي هواك بختو
جيت تقول الريده خوه آه
جيت تقول الريده خوه
بعد ما خلخلت قلبي و فيني ما خليت مروه
|
Post: #18
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 11:03 AM
Parent: #17
| Quote: جيت تقول الريده خوه |
و الله إتلوم شديد
علشان تعرفن عمايلكن يا بنات حواء
ليكم الله يا أولاد آدم
|
Post: #19
Title: Re: واحد مشوكش بس روحو رياضية و ما حاقد (منقول)
Author: هويدا شرف الدين
Date: 09-18-2011, 12:33 PM
Parent: #18
أبو الحسين
غايتو نتفسح شويه في بوستيك دا ونشطح عن الشواكيش
اولا الشاكوش عند طب الأسنان
كلية طب الأسنان
لمن يحصل تسوس بالشكل ده في حياتنا يا(.......) لازم نقلع اسباب التسوس من جذوره... التخدير الموضعي لآلمنا ما بحل المشكلة...ومحاولة التقويم فشلت معاك للاسف..ودايما بتركب لي ضرس ما ضرسك..عشان كده الجسر امتد وزاد بيناتنا ...وقدر ما حركت فكي معاك برضو مصر تجيب لي التهاب في اللثة ...انتي بقيت حشوة مؤقتة لقلبي وانا محتاجه حشوة دااااااااااااااايمة
|
Post: #20
Title: Re: واحد مشوكش بس روحو رياضية و ما حاقد (منقول)
Author: Abdlaziz Eisa
Date: 09-18-2011, 01:03 PM
Parent: #19
لك الشكر يا ابوحسين
ادخلت المسرة في القلوب
تحياتي
|
Post: #21
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 01:15 PM
Parent: #20
| Quote: غايتو نتفسح شويه في بوستيك دا ونشطح عن الشواكيش |
إتفسحي كتيييييييير و أشطحي على راحتك
الشاكوش شاكوشك أقصد البوست بوستك
تحياتي
|
Post: #22
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 01:18 PM
Parent: #21
Quote: لك الشكر يا ابوحسين
ادخلت المسرة في القلوب
تحياتي |
الله إسلمك
إن شاء الله دائماً المسرة في القلوب
تحياتي و إحترامي
|
Post: #23
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 05:37 PM
Parent: #22
*
|
Post: #24
Title: Re: واحد مشوكش بس روحو رياضية و ما حاقد (منقول)
Author: الشفيع وراق عبد الرحمن
Date: 09-18-2011, 06:57 PM
Parent: #23
حلوة
وانا عجبتني دي:
| Quote: البقى مسيطرين عليهو الكيزان.. |
ازيك يا ابوالحسين
|
Post: #25
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-18-2011, 08:01 PM
Parent: #24
Quote: حلوة
وانا عجبتني دي:
Quote: البقى مسيطرين عليهو الكيزان..
ازيك يا ابوالحسين |
أهلا أخونا الشفيع
ياخ الراجل في مصيبتو دي كلها متذكر سودانيز أون لاين
غايتو الكيزان دي إنت داخل فيها
تحياتي و إحترامي
|
Post: #27
Title: Re: واحد مشوكش بس روحو رياضية و ما حاقد (منقول)
Author: هويدا شرف الدين
Date: 09-19-2011, 06:22 AM
Parent: #25
كلية علوم التغذية
(...............) انت سببت لي تسمم في حياتي ..وعلاقتنا دي ناقصة فايتمين.. ولازم تنتهي لأنو الاستمرار فيها غير صحي على الاطلاق
وبعدين انا زهجت من المحاولات الفاشلة لتعقيم علاقتنا.. و زهجت من تطهيرك لجروحي القديمة...وبقى عندي عسر في هضم شخصيتك...حتى شهيتي للونسة مع الأولاد اتسدت
كفانا مواد حافظة يا دا
|
Post: #26
Title: Re: واحد مشوكش بس روحو رياضية و ما حاقد (منقول)
Author: Fadl Karrar
Date: 09-19-2011, 06:14 AM
Parent: #1
Quote: أما أبوك الضلالي ده فعندي معاهو حساب طويل عريض.. المنافق كان طوالي ينادي لي تعال يا
أيمن يا ولدي.. بالله في زول بشكوش ولدو؟ |
Quote: الناس قالوا عوض حايبكي ويتأثر، لكين لما شافوني في الحفلة عرفوا إنو عثمان ولد ليهو
سبع.. لا بهموا شاكوش ولا بهموا ضياع القروش.. هيييع أنا أخوك يا رشا.. |
شاكوش دا واللا باتريوت
زولك نسي أسمو ذاتو
أبو الزفت
|
Post: #28
Title: Re: واحد مشوكش بس روحو رياضية و ما حاقد (منقول)
Author: ابراهيم قناوي
Date: 09-19-2011, 06:59 AM
Parent: #26
أبو حسين يا زول يا رايع
كل سنة وانت طيب
ويعود علينا وعليكم بالخير والبركة
والله صحبك دة حسادتو فايتة الحد
وذكرني قصيدة بتاعة
واحد من جهابذة حلمنتيش
اسمها تو ليت too late
بحاول اجيبها هنا
لكن في الأول بحب أطمن أي واحد يتشوكش
وأقول ليهو أثبت كما ثبت المشوكشين
من قبلك
وزي ما المثل قال:
الرجال كالمسامير ... لا تزيدهم الشواكيش إلا ثباتاً
سلامي لك وشكراً لهذا الصباح الجميل
|
Post: #29
Title: Re: واحد مشوكش بس روحو رياضية و ما حاقد (منقول)
Author: ابراهيم قناوي
Date: 09-19-2011, 07:05 AM
Parent: #28
القصيدة الرائعة لأحد جهابذة حلمنتيش
وهو يحكي عن شاكوش جااااااااااامد
Too Late
محمد الجاك الصراف
(المتشعلق بن المنبرش)
آاااه على قلبي
وعلى أملا حملته دهور
قطعت بحور
سواد الليل علي ليلين
صبرت كتير
و راجي النور
يا قطعة البلور
ويا رنة الطنبور
ويا سنتر بنات الحور
ويا صاحبة مسز شنتور
ويا قصبة جروف أهلي
عليك اسم الله يا حاني
علي ما تجور
شفتك يوم ،،، عجبتيني
و قلت أقول
أنا الفي أولى داير أخطب؟؟
دا ما معقول
بقيت ساكت
فرحان بيك
أحدث زول و أدس من زول
و دا عاد حبا أصيل و عريق
لف و دار عليهو الحول
لكن صحيح الدنيا ما بتصفى
و تروق لي زول
لو ربطو معاك.. محلول
أتقدم و أتراجع و أتردد
لاااامن حصل محصول
إتمحن.. وقف
سكر مدلول
وفكر مشلول
و قلبو المجرح بالملح مكيول
يا اللينة
يا شتيلة فريع البان
ويا أملا بنيتو عليك..
وعشت زمان
أفكر فيهو لامن بان
بقيت للحسرة و الأهات
يا درة دامر المجذوب
ويا زينة الطالبات
و يا أمل السنين الفات
و يا طفلي الرضيع المات
إتحسرت و إتبهدلت ما خليت
ودمع العين نزل
وقت قات لي.. أووووه
Too late
ضيعني الدكتور عشا البايتات
وعاد خطبوك لي زولا عريض و كبير
وعلمو كتير
و لابس ليهو نضارات
عربتو تسوي حي وا ليل
و حافظ الكيميا في راسو
وحاكي أشنابو نص رباط
دا عاد شغال و باني البيت
رضيتي بيهو طوالي
و ما قلتيلو
Oooh too late
بعد الحصل
قالت لي يا مولانا أدعو لينا معاك
يجازيك الله يا فلانة
زماني الفات
و دايراني أجيب إبريقي و أتوضأ ؟؟
و أفرش الفروة و أتمكن
و أصنقر ليك للدعوات ؟؟
و تقول لي أدعو لينا معاك ؟؟
زمان ما كنت بادعو ليك
و أفكر فيك
لكن الليلة بدعو عليك
بركة البغدادي ود جابر
و كيتن فيك يا فلانة
أبوك لا يرضى لا يخاطر
ومما تجيبي سيرة الخطبة في خشمك
يعاين ليك يحمر فيك ويتكربن
و يشيل كرباجو و يتكرب
يمسكك من طريف التوب
طرفو طوييييييل نازل حدا العرقوب
و أمك عاد تقول حي ووب
و تتعارض
سجمنا الليلة يا أبو فلانة
و يقول ليها يا فلانة
كان عارضتي طلقانة
تقول ليهو لا لا خليتك
براك زعلان
و تقعد تك
و يجرك كر على الديوان
و تصرخي جااااك بلا خجلة
التقول شيطان
لامن يسمعوا الجيران
ينطوا الحوش و يدقوا الباب
و يتطانش التقول طرشان
يكسروا الباب يدخلو عليه
يقول ليهم حلفت يمين
اليصلني قريب هدي السكين
يزحوا بعيييييد
يختوا الخمسة في الإتنين
و تسمع جيت و تسمع واي
و يابا كفاي عليك الله
و تسمع جو و تسمع حي
و تسمع حي حي .. و حي حي ووب
و تسمع جيت و تسمع واي
و يابا كفاي
و تسمع جو و تسمع حي
و حي حي ووب
و تسمع جيت و تسمع واي
و تسمع جيت و تسمع حي
و تسمع جيت و تسمع جو
دميعاتك يصبن جو
و أمك برة تنبح هو
و وقت ينقطع سوطو و يفتر تب
يملص ليكي مركوبو
يقوم فيك كب
و يمسكك طب
و يكفتك تاااااخ
و يكنكش فيك
و يخنقك خنقة بت ال ك ل ب
(تعديل ك ل ب لتفادي الشخوت)
|
Post: #30
Title: Re: واحد مشوكش بس روحو رياضية و ما حاقد (منقول)
Author: ابراهيم قناوي
Date: 09-19-2011, 07:15 AM
Parent: #29
ودة واحد برضو مشكوكش والقصيدة كتبها أحد الشعراء يصف حال صديقه الذي كان طالبا في جامعة الخرطوم ،
وقد وقع هذا الطالب في حب أحدى زميلاته ولم يفصح لها بحبه لأنه كان خجولا جدا ،
وقد نصحه أصحابه بأن يفصح لها عن مشاعره فأبى لأنه كان يظن أنه وسيم وظريف وأن
البنت لن ترضى بغيره. حتى أتى أحد المغتربين وتزوجها وأداه شاكوش
(بمعنى آخر ادتو شريط كما كان متعارفا في ذلك الوقت).
في الليلة ديك القصة ذاتها بقت عليك
يا عبدو وأدوك الشريط
يوم قلنا ليك أنضم معاها وكلّما
أبيت تسمع كلامنا وبقيت لميض
وقلت أحسن أكون تقيل أنا ما جميل
وبقيت تقيل لامن سقوك موية الغسيل
وجيت تنطط زي زمان وتباري بقعور الشجر
كايس كراسي الخيزران ..
وقعدته يا زينة الرجال.. كهربجي قال
رفعوا الستار والبت تجي ومرات تقيف
ومعاها يا زول ولداً حريف
والوقفة كانت وقفة ولف
صاحبنا بالاحساس عرف
سألته والناس كلّموك
ووقعت في شارع الزلط
تبكي وتجعّر والعيون اتورّمت
ويد القميص ضهر القميص كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت دايرين ننوم
يا أخوانّا لأ أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات زولنا يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
في علاقة بين يوم السبت وعين الحسود؟!
ومقارنات بين الجهل والجمال!!
وسوء الإختيار
قال شينة قال ...!
قال شينة قلنا كلام صحيح
وخطيبها زاتو ولد قبيح
بس ياخي قوم الدنيا صبحت
دايرين ننوم
قام تاني جاب سيرة البحر
وقام تاني جاب سيرة البحر
تحياتي لك يا أبو حسين وللمارين
|
Post: #31
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-19-2011, 09:54 AM
Parent: #30
شكراً ليك هويدا
و بالله كملي معاك كل الكليات
شكلو كدا الشاكوش دا وقع ليك في جرح..!!!
تحياتي و إحترامي
|
Post: #32
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-19-2011, 09:56 AM
Parent: #31
أخونا فضل كرار سلام
ياخ إنت الزول في المصيبة دي كلها ما ريحتو...؟؟؟؟
أسي شاكوش زي دا ما بنسيك إسمك ..؟؟؟
تحياتي و إحترامي
|
Post: #33
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-19-2011, 10:02 AM
Parent: #32
اخونا إبراهيم قناوي سلام
كل سنة و إنت طيب و ربنا إحقق الأماني إن شاء الله
| Quote: الرجال كالمسامير ... لا تزيدهم الشواكيش إلا ثباتاً |
ياخ دا كان زمااااااااااااااااان
أسى و الله شاكوش و تلقى الواحد ماشي في الشارع و إتكلم براهو
أما ناس حلمنتيش ديل شكلهم كدا كوووووووووولهم مشوكشين
غايتو أبدعوا في حكاية الشواكيش دي
تحياتي و إحترامي
|
Post: #34
Title: Re: واحد مشوكش بس روحو رياضية و ما حاقد (منقول)
Author: ABUHUSSEIN
Date: 09-19-2011, 07:42 PM
Parent: #1
*
|
|