أطالب إتحاد الكرة للتدخل لوقف سفر المريخ للسعودية حماية لسمعة الكرة ال

والله انا خايف مريخكم دا يمرمط سمعة الكرة السودانية
الأتحاد نارو ملهلبة حمراء اليومين ديل
شاهدت مباراتو مع الهلال السعودي فى المملكة ومسح بيهو الواطة
أطالب إتحاد الكرة للتدخل لوقف سفر المريخ للسعودية حماية لسمعة الكرة السودانية
ضرورى بالله
مانى شمتان لكنى خايف ليس على المريخ لكن شفقان من لسان السعوديين على ( الزول) الكلمة التى يحبون إطلاقها على السودانيين هناك
ما ح يفرقوا لا بين مريخابى لا هلالابى
بس أى زول لابس طاقية ح يفولو ليهو " سبعة بالله يازول؟؟ إنتو ما عندكم كورة فى السودان؟؟؟؟؟)

اللهم لا نسألك رد القضاء ولكن نسألك اللطف فى عدد الأهداف

إنتو الجابكم شنو؟ قروش وجمال الوالى ما مقصر معاكم !!!!

بس عايزين أى حاجة تمسحوا بيها موقفكم مع الدورى الافريقى أو منافسة سيكافا الدفعتو فيها دم قلبكم

الليييييييييييييلة !

الله يستر

اوافق بشدة
مش كفانا مرمطة الأردن .؟؟؟؟
رمضان كريم يا محمد النيل

غايتو تانى يوم السودانيين ح يكبو الزوغة من اشغالهم مريخاب على هلالاب
يا جمال الوالى رفقا بالوصيفاب
قروش المؤتمر كملن ول شنو؟
الظاهر البترول قرط
الله يستر من فيز الخروج بدون عودة
باقى فى كفلاء كدا عكاليت تغيت من الشغل يدقوا ليك مغادرة طوالى

عناوين الصحف الرياضية السعودية بعد المباراة:
إنحسار ملحوظ لعدد لابسى الطواقى فى الشارع العام
السودانيون يتمردون من أشغالهم
السودانيون يعلمون السعوديين الإضراب
منشور من الديوان الملكى يطالب الاجانب المضربين عن العمل الرجوع فورا الى أعمالهم
وزير الخارجية السودانى يتدخل ويطالب الحكومة السعودية إنها تديها صنة الجماعة ديل مغلوبين على أمرهم أقصد مغلوبين سبعة

الصحف فى اليوم التالى لقرار الملك:
أغلبية السودانيين يرجعون للعمل بعد أن وضعوا على طواقيهم هلال لزوم الفرز وكدا يعنى
القلة وهم مريخاب ما زالوا معتكفين تجنبا من شماتة الهلالاب السودانيين
الملك يشكر السودانين كون أغلبهم هلالاب

ياخى عناوين كتيرة خلاس

Quote: اوافق بشدة مش كفانا مرمطة الأردن .؟؟؟؟ رمضان كريم يا محمد النيل

الله أكرم يا عمر
الجماعة ديل عشان يعملوا حاجة دخلو نفسهم فى ورطة
ديل نظموا سيكافا الفرق التعبانة مرتين وفشلوا يشيلوا الكاس
يقوموا يلعبوا مع الاتحاد الجداوى ذاااااتو؟
يا خى هم لو بيعتبروا إنهم فريق عريق كيف نفسهم تسمح ليهم إنو يكونوا حقل تجارب للإتحاد؟
ياخى الاتحاد فريق خطير أنا شفت لعبهم

غايتو الإقترح على ناس الإتحاد إنو يعزم المريخ دا بيكون هلالابى خبيت
تلقاهو هسى بيضحك تحت تحت قافل خشمو بى يدو عشان الاتحاد ما يغير رأيه
باقى أصلو السعوديين بيثقوا فى السودانيين شدييييييد
هههههها

يا جماعة الاتحاد دا برشلونة السعودية
ممكن يغلب برشلونا زاتها
وبرغم هلاليتى لا اعترف إنو الهلال بتاعنا احسن فريق فى الوطن العربى بعد ان رأيت اتحاد جدة
والمصيبة الكبرى انو كل السودانيين او الغاليية العظمى منهم بتشجع الاتحاد
واغلبية السودانيين معروف إنهم هلالاب
يعنى غير ما يحسوا ح يلقوا نفسهم بيشجعوا الاتحاد
حتى لو ضحوا بطواقيهم فى اليوم التالى

سلامات

جمال الوالي شكلو فقد البوصلة.....قصة إنو البلد كلها تتكلم عن الهلال وتفوقو عربيا وإفريقيا عملت لوثة في راسو......يقبل وين يعني....حتي أتوبونج حلل قروشو


حسام البدري طلع منها بدري....المصري نجييييض عارف الموضوع فيهو بهدلة

Quote: جمال الوالي شكلو فقد البوصلة.....قصة إنو البلد كلها تتكلم عن الهلال وتفوقو عربيا وإفريقيا عملت لوثة في راسو......يقبل وين يعني

تحليل سليم يا دكتور ياسر
دى Miscalculation من جمال الوالى
الغيرة على الهلال أعمت بصيرة إدارتهم وصحافتهم ومشجعيهم
لك التحايا

يا عزيزي فرصة طيبة للاعبين لأداء مناسك العمرة ...



دمت بود ،،،

سلام النيل

المريخ ليهو كم سنة بقى فريق محلى ...
عايش جوة بالون صانعو الاعلام بتاعو
لمن يطلع برة بتفرقع البالون
وتبقى الحسرة

سمعة اكثر من السواها مازيمبى فى الزريبة ما اظن


تحياتى محمد ورمضان كريم

الكرة السودانية اصلا ما فيها عمار لا هلال لا مريخ لا بطيخ كلو علي بعضو ما يسوى
اي شي. بينما الفرق في العالم كله تتذوق حلاوة رفع الكؤوس نجد ان فرقنا
السودانية تذوق جمهورها مرارة رفع ضغط الدم عشان كدا انا بشوف انه احسن نلت لتنا
جوة البلد لا هلال لا مريخ يطلعوا برة عشان يمثلوا السودان ويمرمطوا سمعتنا اللهي
اصلا اصبحت ممرطة.


تحياتي للجميع

يا رب بركة رمضان


تورينا فيهم فضيحه تخليهمكل لاعب بي قوون

وكل قوون احلي من التاني


اتحادي

تحياتي حسن سنادة ورمضان كريم

Quote: سمعة اكثر من السواها مازيمبى فى الزريبة ما اظن

وحقت الوحدات الأردني نسيتها ولا شنو ياخ

الصادق

التعديل لحزف الوجه الضاحك

http://174.36.244.211/db/attention/010_Smile.gif http://174.36.244.211/db/attention/010_Smile.gif

الأخ محمد تحياتي ورمضان كريم
أنا هلالابي حتى النخاع، لكني لم أدخل دوامة التعصب الأعمى الذي تشهده الساحة الآن،
الهلال والمريخ عنوان الكرة السودانية شئنا أم أبينا، ولا نستطيع أن نلغي أحدهما على حساب الآخر،
وبرغم تفوق الهلال الظاهر في هذه المرحلة، إلا أن المريخ يمكن أن يجرّع الهلال الهزيمة في أقرب لقاء بينهما، لاعتبارات عديدة
أقلها أن المباراة بينهما تخضع لظروف ليس من بينها الحالة الفنية لأي من الفرقتين،
وبخصوص سفر المريخ لملاقاة الإتحاد السعودي،
فا سيدي طالما تم الترتيب لذلك من قبل إدارة المريخ،
فليس أمامنا سوى تشجيع اللاعبين على تقديم كل ما لديهم لإداء مباراة عالية المستوى والتفوق بإذن الله على فريق الإتحاد السعودي
فيا جماعة خلونا نرتقي شوية بي تشجيعنا لعلنا نخرج من المرحلة الحرجة التي تمر بها كرة القدم في السودان.
أعلم أن ما أوصل حال التشجيع والتعصب الأعمى لدينا هي الصحافة الرياضية التي باتت تحسب على الرياضة السودانية،
لكن علينا أن نعي هذه النقطة جيّداً ونفوّت الفرصة على المنتفعين من هذا الصراع الذي يجافي المنطق السليم والحس الرياضي المعافى
والأخلاق الرياضية،
بالله ماذا سيستفيد الهلال من سوء حال المريخ والعكس؟؟؟ ياخي قوة أي من الفريقين هي قوة للطرف الثاني ودافع للحاق بالآخر وهكذا.
سأشجع المريخ بقوة وأتمنى من كل قلبي أن يحقق نتيجة طيبة في هذه المباراة، وهو ما أفعله دائماً متى ما شاركت فرقنا في المنافسات الخارجية.
والله الواحد يشفق على حال البلد المايل ده، نلقاها من الكيزان ولاّ من منو ولاّ منو؟؟
تحياتي وآسف للإطالة.

يانادر

جمعة مباركة

Quote: أنا هلالابي حتى النخاع، لكني لم أدخل دوامة التعصب الأعمى الذي تشهده الساحة الآن، الهلال والمريخ عنوان الكرة السودانية شئنا أم أبينا، ولا نستطيع أن نلغي أحدهما على حساب الآخر، وبرغم تفوق الهلال الظاهر في هذه المرحلة، إلا أن المريخ يمكن أن يجرّع الهلال الهزيمة في أقرب لقاء بينهما، لاعتبارات عديدة أقلها أن المباراة بينهما تخضع لظروف ليس من بينها الحالة الفنية لأي من الفرقتين، وبخصوص سفر المريخ لملاقاة الإتحاد السعودي، فا سيدي طالما تم الترتيب لذلك من قبل إدارة المريخ، فليس أمامنا سوى تشجيع اللاعبين على تقديم كل ما لديهم لإداء مباراة عالية المستوى والتفوق بإذن الله على فريق الإتحاد السعودي فيا جماعة خلونا نرتقي شوية بي تشجيعنا لعلنا نخرج من المرحلة الحرجة التي تمر بها كرة القدم في السودان. أعلم أن ما أوصل حال التشجيع والتعصب الأعمى لدينا هي الصحافة الرياضية التي باتت تحسب على الرياضة السودانية، لكن علينا أن نعي هذه النقطة جيّداً ونفوّت الفرصة على المنتفعين من هذا الصراع الذي يجافي المنطق السليم والحس الرياضي المعافى والأخلاق الرياضية، بالله ماذا سيستفيد الهلال من سوء حال المريخ والعكس؟؟؟ ياخي قوة أي من الفريقين هي قوة للطرف الثاني ودافع للحاق بالآخر وهكذا. سأشجع المريخ بقوة وأتمنى من كل قلبي أن يحقق نتيجة طيبة في هذه المباراة، وهو ما أفعله دائماً متى ما شاركت فرقنا في المنافسات الخارجية. والله الواحد يشفق على حال البلد المايل ده، نلقاها من الكيزان ولاّ من منو ولاّ منو؟؟ تحياتي وآسف للإطالة.

لقد اسمعت اذ ناديت حيا

تحياتي ياصديقي

Quote: سأشجع المريخ بقوة وأتمنى من كل قلبي أن يحقق نتيجة طيبة في هذه المباراة، وهو ما أفعله دائماً متى ما شاركت فرقنا في المنافسات الخارجية

تسلام اخة نادر ..

وان شاءالله المريخ سوف يقدم مبارة جميله

مودتى ...

شئ مؤسف .. إلغاء رحلة المريخ لجدة !!

.

.

اكتر حاجه كيفتني في البوست دا، ردود اخواننا المريخاب ناس هارون دياب و خالد درق التي اتت علي استحياء دي

هاهاهاهاهاهاهاهاهاهاهاهااها

احييييييييييييييييييييييي انا

اللهم اني صائم

Quote: أطالب إتحاد الكرة للتدخل لوقف سفر المريخ للسعودية حماية لسمعة الكر

محمد النيل
تحياتى
إتحاد الكرة كايس البتدخل لإنجاح سفرة المريخ للسعودية
اليعثة كان فى مقدمة حشودها ومن أرسلت أسمائهم للسعودية لإستخراج
الفيزات وعمل الحجوزات مجدى شمس الدين وعائلته الكريمة والطريفى الصديق
حسب ماورد فى أحد المنتديات الرياضية .. يعنى ناس الإتحاد نجهتهم ببوستك دا
يا صاحب البوست .. عمرة العشرة الأواخر طارت .. لهم أجر المحاولة والنية
واصلة.

شئ مؤسف .. إلغاء رحلة المريخ لجدة !!

HHHH 3MLTHA YA NILO

نادي المريخ: تأشر لينا لي جدة ....وتقوم( ترمينا) في أمبدة

منقول من صحيفة كفر ووتر

للصحفي المريخي عبد المجيد عبد الرازق






حروف كرويه
قرار الاعتذار حفظ ماءوجه المريخ
واحدة من الاشياء التي تحفظ للدكتور كمال شداد قراره بعدم المواقفه علي اي دعوة توجه لاي نادي خاصة الهلال والمريخ من دول الخليج الا بابراز العقد ووضع مزايا للفريق منها ان يكون المقابل المادي مجزي وان تتم الاقامه في فندق لايقل ان الخمس نجوم وذلك حفاظا لكرامه الانديه بعد اصبحت العديد من الفريق تسافر الي الخليج بدعوات دون شروط ومنها من يكون نصيبه الاقامه والاعاشه فقط وربما اكثر من مباراة .
وعلي العكس تماما نجد الانديه المصريه تحدد لائحه لاي دعوة حسب الدولة واذكر في العام 1994 تمت دعوة الهلال والزمالك لاداء مباراة علي كاس دبي الذهبي بمناسبه العيد الوطني لدولة الامارات والتي انتهت بفوز الزمالك في الزمن الاضافي بعد ان تعادل الفريقان في الزمن الرسمي وعقب المبارة طلب نادي النصر اداء مباراة امام فريق الزمالك فطلبت البعثه مائه الف دولار مع الاقامه في فندق خمس نجوم وتخصيص خمسه اجنحه ورفضوا التنازل لتزاما بالائحه النادي وغادر وا الي القاهرة.
اتجهت ادارة النصر لبعثه الهلال فتم الاتفاق علي عشرة الف دلار فقط وتم الحجز للفريق في فندق عادي وسط دبي وخسر الهلال النتيجه بعد ان ابعد المدرب العراقي انور جسام اللاعب طارق احمد ادم من التشكيله وحدث خلافات ومشاكل وتعرض المدرب لهتافات من الجاليه التي حملته مسئوليه الهزيمه.
قصدت من هذه المقدمه التعليق علي ماسطره الاستاذ كمال حامد في زايته( انتباهة رياضيه) بصحيفة الانتباهة الصادرة امس وتحت عنوان(مباراة دكاكينيه) بعد ان كشف حقيقه الدعوة التي قدمت للمريخ من نادي الاتحاد ووضح انها ليست دعوة بالمفهوم المعروف وان المباراة ستكون في ملعب النادي وبدون جمهور وبدون طاقم تحكيم رسمي او بمعني اخر انها عباراة عن تقسيمه بين الاتحاد والمريخ حسب ماقاله الاستاذ كمال لان اللعب ممنوع خلال العشرة الاواخر للشهر الكريم.
كشف الاستاذ كمال معلومات خطيرة وهو صادق بعد ان وقف علي ذلك بنفسه ووجد ان ادارة نادي الاتحاد بعيدة عن الموضوع وان شخصان فقط يقومان بالمتابعه احدهما سوداني في رابطة المريخ والاخر موظف في نادي الاتحاد بجانب القائمة الكبيرة لطالبي التاشيرة من المريخ والاتحاد ومنهم قيادات بارزة .
وقد لمست من تصريح للاستاذ محمد جعفر قريش سكرتير نادي المريخ ان التذاكر لم ترسل ممايعني ان اصحاب الدعوة ربما يحملون المريخ ثمن التذاكر وتطرق الاستاذ كمال لمستوي الفندق وهودليل علي العشوائيه التي صاحبت هذه الدعوة ولكن يبقي السؤال كيف وافق مجلس المريخ علي هذه الدعوة وبهذه الطريقه المذله واتمني ان يرزوا لنا العقد الخاص بالدعوة.؟؟
وكيف وافق اتحاد الكرة علي هذه الدعوة ووصل به الحال الي الموافقه علي قطع برنامج المنتخب الذي يستعد لاخطر مباراة من اجل ان يشارك لاعبي المريخ يفي المباراة (الدكاكينيه)؟؟.
نحمد الله ان انقذ المريخ من مرمطه وذله ورغم ذلك ننتظر كشف الحقيقه .
حروف خاصة
بدعوة من المجلس القومي للصحافة والمطبوعات تشرفت امس بتقديم تجربتي في العمود الصحفي لورشه العمل التي ينظمها المجلس للصحفيين الشباب .
وكان شرف لي ان يشارك معي في طرح تجبارهم الاستاتذه محجوب عروة وابوبكر وزيري وامال عباس والدكتور عبد اللطيف البوني .
كان النقاش رائعا من المشاركيين وكان تركيزي علي مطالبه الصحفيين بالموضوعيه والصدق والحياد في كيابه العمود.

يا حبايب ده كلام زولكم


لبدتو تب مش