( أقين اب كرعين ) سياحة في نكات زمااااااااااااااااااان

لما كانت الناس بسيطة
ووسائل الأعلام محدودة
والأنس والسمر متعة ما بعدهما متعة
الكلام دا من التمانينات ولي وراء

بمقاييس اليوم تبدو في معظمها البساطة ( التي لا أتمني أن تصل درجة السذاجة )
وخائف تكون وصلت
لكن المهم
علي قدر بساطة الناس كانت النكتة وقتها
ولم يكن مدي الإنتشار متسع كاليوم
حيث لم تكن هناك موبايلات ذات رسائل نصية تنقل النكت بسرعة شديدة بين عدد كبير
ولم تكن هناك فرق كوميدية كالتي اليوم
حتي التلفزيون وقناته الواحدة كان محدود الإرسال بثاً وتغطية
وكذلك الكهرباء
وكانت وسائل الترفيه
الراديو
والسمر

عربي جاء الخرطوم لغرض وركب تكسي الخرطوم ( الأصفر )
قضي غرضو ورجع أهلو
بعد كم سنة
جاء الخرطوم تاني لغرض ما
واقف في الشارع داير يركب وسيلة مواصلات
مر بيهو بص ابو رجيلة ( المواصلات العامة وقتئذ ذات اللون الاصفر )
أها العربي كان واقف بعيد من المحطة
أشر للبص والبص ما وقف ليهو
قال ليهو ( يعني كبرتو ونسيتونا ؟؟؟؟ )

،،،،
،،،،
ما قلت ليكم قمة البساطة

وقد كان ( ود نفاش ) هو القاسم المشترك
في معظم النكات لحين من الوقت زمانئذ ( الحقوق محفوظة لقيقراوي )

اخونا فادي
تحية وسلام ورمضان كريم والعيد مبارك عليك مقدما
.
.
بالاضافة للغلوتيات والتسدر ورسم البيوت في الوطا واقول ليك دا بيت ناس منو
شيخ الجماعة كان جاك بتدي شنو ؟
تقول ائ حاجة
اقوم اقول ليك
شنو كدي ما تعرف ولا بغازيك وعمك شنطح وجاب البقرة وشنو كدي ما تعرف
غايتو فعلا كانت متعة وبساطة وحولب لب وكم الخط

Quote: بالاضافة للغلوتيات والتسدر ورسم البيوت في الوطا واقول ليك دا بيت ناس منو شيخ الجماعة كان جاك بتدي شنو ؟ تقول ائ حاجة اقوم اقول ليك شنو كدي ما تعرف ولا بغازيك وعمك شنطح وجاب البقرة وشنو كدي ما تعرف غايتو فعلا كانت متعة وبساطة وحولب لب وكم الخط

ود البوش
عليك الله بالراحة علينا
مداخلتك مكثفة جداً ومركزة
تعرف دي تديها برميل موية تكون لسه طاعمة
فرتقها ياخ
وركز علي بعض الجوانب البريئة

Quote: ود البوش عليك الله بالراحة علينا مداخلتك مكثفة جداً ومركزة تعرف دي تديها برميل موية تكون لسه طاعمة فرتقها ياخ وركز علي بعض الجوانب البريئة

يا فادي
جبنا ليك المركز وعليك بجردل الموية واللخ
.
.
كلو كان برئ حتى التسدير كان برئ جدا
طيبة وبساطة ومحنة وبراءة

ومن نكات تلك الفترة


واحد جاء الخرطوم لأول مرة
لفت نظره بوليس المرور الموجود في كل التقاطعات بصفارته وإشارات يديه المتواصلة
ولما رجع بلده سأله الناس بشغف عن الخرطوم
فأجابهم
الخرطوم بلد تمام
مجانينهم ملبسنهم أبيض وموزعنهم في الشوارع





_________________

سلامات يا فادي

Quote: واحد جاء الخرطوم لأول مرة لفت نظره بوليس المرور الموجود في كل التقاطعات بصفارته وإشارات يديه المتواصلة ولما رجع بلده سأله الناس بشغف عن الخرطوم فأجابهم الخرطوم بلد تمام مجانينهم ملبسنهم أبيض وموزعنهم في الشوارع

جميلة يا عاطف
والأجمل إنو الناس زمااان كانت تجي الخرطوم وترجع لي أهلها
لأن الأقاليم زمااااان كانت ما بتنفات
زمن ياخ

إقتباسة مركزة جداً

Quote: كتب يوسف بدري و نحن صغار في الاوليه كنا نحكي القصص و النكت علي ودنفاش و كنا نظن انها شخصيه خرافيه . الي ان شاهدته بلحمه و دمه و هو يعمل في المحطه الوسطي في امدرمان و في بار ليمينيوس اليوناني الملاصق لقهوة شديد من الجهه الشماليه و اسمه الاصلي موسي ناصر و يسكن فريق الدومه في ود نوباوي و هو جار لاشهر ظرفاء امدرمان كمال سينه الذي تأثر في صباه بود نفاش . و بما ان موسي هو خال اصدقائنا و جيراننا محمد و عبدالرحمن احفاد الشيخ دفع الله صاحب القبه المشهوره في وسط امدرمان . و السيد عبدالرحمن كان يستدعي موسي و يساله عن حال امدرمان و البلد و ماذا يقول الناس . و لقد قال للسيد عبدالرحمن مره ( الناس يا سيدي قالوا انته خليت درب ابوك ، ابوك كان بياكل القرض و متكرب بالبرش انته يا سيدي بقيت ساكن في صرايه و تشرب المويه البارده و راكب رولزرويز ) . و السيد عبدالرحمن لم يكن يغضب و يقول له ( قول للناس يا موسي الزمن اتغير، انا كان اتكربت بي البرش حسه ما في زول بسمع كلامي ) . كل امدرمان كانت تحب و ترحب بود نفاش . عمنا هريدي كان صاحب الدكان في الركن الشمالي الغربي لجامع امدرمان العتيق و هو من اشهر تجار امدرمان و كان قديما يجالسه الاستاذ احمد محمد صالح الشاعر . و عندما صار عضو في مجلس السياده و هذا بمثابة رئيس الدوله منعته مراسيم القصر من الجلوس امام دكان هريدي . و كان يطلب من السائق ان ياخذ تخريمه كبيره و هو في طريقه الي القصر مارا امام دكان هريدي و يطلب من السائق ان يهدئ السرعه او يتوقف قليلا . و ينظر متحسرا الي المجلس و يقول ( نعمل شنو ، ما منعونا ) . هنالك مثل سوداني ، فعندما تريد ان تتكلم عن ضخامة شئ فيقال ( ده و الله حمار هريدي ما يشيلو ). و كان للعم هريدي حمار ضخم بشكل غير اعتيادي . و اقنع ود نفاش عندما كان صغيرا العم هريدي بان ياخذ الحمار الي ابروف للاستحمام . و الحمير وقتها تزود بسرج جميله و لجام و فروه مرعد و تؤخذ الي الحلاقين مثل اعمامنا اولاد ايوب و العم عبدالعزيز والد سيد عبدالعزيز شاعر الحقيبه . و اشتري ود نفاش كرتله (نوع من اليانصيب ) و طلع الحمار في الكرتله و بعد مده اتي البعض لتهنئة العم هريدي فعندما سؤل ود نفاش عن نتيجة الكرتله قال لهم ( عم هريدي كسب الكرتله ) . العم هريدي كان كذلك متذوقا للنكته و يحب القفشات . و قبل العيد و في يوم الوقفه كان الناس يعرضون البضاعه في الترابيز الضخمه امام المتاجر . فنصب احد معارف العم هريدي تربيزه امام متجره و كان يبيع شباطة طهران و هي شباطه مخلوفه من المطاط ، كانت في رجل اغلب الناس في بداية الخمسينات حتي النساء . فاتي رجل عجوز و بدأ في تقليب الشباطه و صاحب الشباطه بعيد و كرر عملية التقليب لمده طويله . فساله عم هريدي عن طلبه . و عرف انه يريد شبط لحفيده و عندما سؤل عن مقاس حفيده لم يعرف و لم يعرف سنه بالظبط . بل قال (في المدرسه هو بقرا جزء عم ) فقال العم هريدي ( اها الشباطه دي كلها من قد سمع و لي فوق ! ) . في احدي المرات عندما خرج السيد عبدالرحمن من القبه بالسياره كان موسي ود نفاش يقف عاري الصدر باسطا يديه . فنزل له العم باب الله الملازم للسيد عبدالرحمن و بالاستفسار قال ود نفاش ( قالوا سيدي اتبرع للصليب الاحمر بي 500 جنيه ، الصليب الاسود ده عاوز ليه 5 جنيه بس !! ) . ود نفاش اشترك مع صديق و اشتروا كومر من النقل الميكانيكي ملجن بي 170 جنيه و قاموا باصلاحه و الحقوه بدائرة المهدي و بعد دفع البنزين و اجرة السواق يتبقي لهم مبلغ يقارب الجنيه يكفي لمصاريفهم . و لكن عندما استلم السيد الصديق مسئولية الدائره تخلص من كل السيارات المستأجره . فذهب ود نفاش و صديقه للباخره الطاهره التي كانت ترسو جنوب الصهريج و شاهد السيد عبدالرحمن نازلا السلم حافيا و في صحبته خواجه الماني . و قال السيد عبدالرحمن لود نفاش ( يا موسي يا ولدي ده يوم جميل جدا ، الخواجه ده اسلم علي ايدي ) ، فقال ود نفاش ( مافي فايده يا سيدي ، انته الليله دخلته واحد الاسلام و السيد الصديق مرق اثنين !! ) . شقيقي يوسف بدري كان متشددا في تدينه منذ صغره و قبل ان يبلغ الثامنه عشر كانت له لحيه كثه و قال له ود نفاش مره في بيتنا ( يا يوسف يا ولدي الدقن دي شنو ؟ ) فرد يوسف بحده ( رجاله ) فضحك ود نفاش و قال ( يا يوسف يا ولدي الصوف ده كان فيهو رجاله كان بقوم في ...؟) . و صار هذا مثلا امدرمانيا مرادفا للمثل الاخر ( الشعر كان عزيز ما بقوم في ...) .و هذا ما يردده اهل الصلع . سمعت من عمي محمد بدري و الذي هو صديق لود نفاش ان والدة موسي جرته للسيد عبدالرحمن عندما كان صغيرا لكي يعطيه الفاتحه لكي يوقف جنه و شيطنته . و عندما ذكرت الوالده انه يدخن السيجاره الخضراء صفعه السيد عبدالرحمن و اطار سنه فطلب من العم باب الله ان يعطيه خمس جنيهات . و عندما قبض موسي الخمس جنيهات ادار وجهه قائلا ( واحده تانيه بي جاي يا سيدي ) . فضحك السيد عبدالرحمن بشده و قال ( الله ينعلك يا مطموس ) . قديما في امدرمان كان من يتبول او يتبرز في الطريق يؤخذ الي التمنه او الظبطيه و يغرم ريال و تلك كانت سياسة برمبل الذي استمرت حتي بعد خروج الانجليز و هنالك قصة القروي الذي حضر لامدرمان و اكل ربيت بقرش و عندما قضي حاجته اعتقله البوليس وبعد رجوعه لاهله سالوه امدرمان كيف فرد ( و الله كويسه بس تاكل بي قرش و ....بريال !! ) . و بينما ود نفاش يتبول احس بشرطي يقف خلفه فانتقل بضعة امتار و واصل و عندما طلب منه الشرطي ان يتبعه الي المركز قا ل ود نفاش امام الناس الذين تجمعوا ( انا بلته لاني شفته البوليس قاعد يبول ، اهو ده بولو اهو ) ، و عندما انكر البوليس قال ود نفاش ( اها يا جماعه في زول ببول في محلتين ؟ ) فاسقط في يد البوليس و ترك ود نفاش في حاله . في سنة 1960 حضرت محاكمه لود نفاش في مجلس القضاة الاوسط جنوب المجلس البلدي و مجلس القضاة يتكون من قضاة في الدرجه الثالثه من اعيان امدرمان منهم عمنا عبدالرحيم محمد خير صاحب مصنع الريحه و عمنا الصايغ و اخرين . ود نفاش كان قد قبض عليه و هو يدخن سيجاره . و اذكر القاضي و هو يقول له ( ما حتخلي شراب الدخانه ؟ ) ، فرد موسي ( اي حاخليها ، هي ذاتها بقت تعمل لي ضربة قلب ، الا يكون عندي قلبين واحد للدخانه بس ) . و ضحك الجميع و حكم علي ود موسي ب150 قرش غرامه ، تدافع البعض لدفعها . موسي كان يدخن بطريقه مميزه و هو عادة يضع السيجاره خلف ظهره و يتمشي ثم يشفط نفس . السواري الذي قبض علي موسي من المؤكد لم يكن من ابناء امدرمان . و موسي لم يسمع حوافر الحصان و عندما قال السواري ( جيب السيجاره دي يا زول ) ، قال موسي ( اتفضل بس قول لي انته حصانك ده ملبسه ربر ؟ ) . في حوادث ودنوباوي 1970 و القتل و الرصاص كان شقيقي بابكر بدري مع عبدالرحمن ود الشيخ في ودنوباوي بدافع الفضول و عندما لعلع الرصاص هربوا و احتموا بمنزل خاله ود نفاش في ودنوباوي و عندما تاخر ود نفاش بدات النساء في العويل والبكاء و صار المنزل في حالة مأتم و في المساء حضر ود نفاش و لم يكن داريا بالحاصل فلقد كان في حالة مقيل مع بعض الاصحاب في ابروف . فزجر النسوه و طلب منهم ان يكفوا عن البكاء فقالوا ( هي ما كنا قايلين قتلوك في الحرابه ) فقال ( يكتلوني في حرابه ليه انا ود النجومي !!

Quote: مر بيهو بص ابو رجيلة ( المواصلات العامة وقتئذ ذات اللون الاصفر )

فضل
رمضان كريـم

يا سلام يا فضل ياخـي علـى الزّمن الـجّميـل
وأهديك أبو رجيلة

تـحاياي

لاحظ في تلك النكات

البصات منتظمة

وشرطة المرور في أحسن زي

والبجي الخرطوم بقضى غرضو ويرجع

لأنو الريف لم يزل عامرا


الباقر

Quote: لاحظ في تلك النكات البصات منتظمة وشرطة المرور في أحسن زي والبجي الخرطوم بقضى غرضو ويرجع لأنو الريف لم يزل عامرا

مش كده بالله يا الباقر

يا حليل زمان وسنين زمان

الفنان الجميل لؤي

رمضان كريم والله أكرم

هديتك مقبولة

وصورة ابو رجيلة مشحونة بالذكري

ومستفة أشجان لأيام خلن

مشكووووووور يا راقي