يـا مُـرتابة ...

يا مرتابة !

خلي ظنونكـ

وشيلي يقينكـ ليكـ ربابا

بطّلِي خوفكـ من خطواتكـ

وأنزعي منكـ كُل معابّة

قربي حبة

حبة

وحبة ...

مالكـ خايفة ؟

وخلّي رويحِكـ لي حبّآبة



...

أنا :


عايزكـ أرضي :


صحراء وغابة

عايزكـ جرفي وزرعي الشايل


ونيلنا الشامخ وكلو حنين


وكلو مهابة


أنا عايزك نخلة :

شامخة وسامقة

أرمي عليها همومي

وأسند فيها أحلامي

الليكـ تشابى



نافي مدائن


حُزني الفتّق جُرحي النازف


وداوي الخوف الساكن فيني كآبة




...

يا مُرتابة

ويا محبوبة :

ويا معطونة بعسل الدهشة!

فرّشي قلبكـ لي راكوبة

رُشي رمال القلب الفترت

ماالروح من بعدكـ

ناوية التوبة

شوارع قلبكـ تحوي شوارعي

والخطوة معاكـ دقة نوبة

ورقصة شافعة بترقص فدعة

وعبادة درويش بي لالوبة






...

يا بنية وحاتكـ :

أنا ملّيت من كُل رتابة

ما عرفت أنا الغلطان بالجد

وخطوي بشاتر وإمشي يبابا

ولا القلب الساكن فيني

أدمن حزنو في كُل غيابا ؟


دماغي خلااااص

قرّب يضرب من تعليل

ومن أسبابا

وقلمي!

قلمي الكان طوالي مرافقني


ملّ أوجاعي وملّ كتابة



يا مرتابة!



قربي حبة



حبة



وحبة ...



وأبعدي خوفكـ من خطاوتي



وما تستغربي!



ما كُلي غرابة


يا مُرتابة!


و يا جذّابة


فيكـِ بعاند وبقتل


فكرة إنو عيونكـ


لي صدّادة



يا مُرتابة!