Post: #1
Title: المنبر يا جماعة في الورشة وقالوا قاطع وش نحاس!!
Author: هشام هباني
Date: 08-04-2011, 04:38 PM
غايتو القصة بتاعة المنبر ده بقت حاجة بايخة جدا في غياب المعلومات و اي تصريحات من شيخ بكري سيد البص وشكلو كده بقى اشبه لي ببص من بصات السجانة المكعكعة ديك وقام خسر في نص كبري الحرية جوار مجزرة الشعب وقاموا جروهو بركابو لحدت المنطقة الصناعية واتلمت هناك جمهرة من الفضوليين والميكانيكية والاسطوات المخضرمين بشخصوا في العلة الميكانيكية فمنهم من يقول والله قاطع وش نحاس واخرين بقولوا ضارب بوبينة واخرين بقولوا كاسر جربوكس واخرين بقولوا الدينمو ما بيرمي واخرين بقولوا الكربريتر داير نضافة تشفيط وهلم جرا ومتخيل تحتو ميكانيكية عرقانين شغالين مليانين وشيخ بكري واقف محتار والركاب بعاينو من الشبابيك ومتحيرين في الحصل للبص وبرضو شغالين نقة جو البص المسخن وشايفين سيد البص ادخل جو مكتب في الورشة اطلع وامرق واطلع وامرق ومحتار وراسو ضارب وما قادر اقول اي حاجة للركاب والركاب ناقين نقة الطير في الباقير ومحتارين وشايف بعض الركاب بحاول انزل من البص شان ادى نصيحة لسيد البص لكن سيد البص ما شغال بيهم ابدا وبعضهم قال متبرع بتكاليف تصليح في ورشة تانية ومكربة لكن سيد البص ما داير اي مشورة ولا داير اي مساعدة وبرضو الركاب داقين النقة كلام الطير في الباقير ويقترح بعضهم لزة للبص ولكن سيد البص رافض اللزة وبرضو شايفين سيد البص مرة ادخل المكتب ومرة امرق مرة اضحك ومرة ابوذ ومرة اعاين للركاب بحيرة واستحياء...والركاب لا زالوا كلام الطير في الباقير
والسخانة تلحم والشمش قربت تغيب.......................................
|
|