من الدمازين مالك عقار ..لن اقابل البشير وايقاف الحرب صعب

في لقائه بالقوي السياسية والادارة الاهلية
الحركة الشعبية . حرب جنوب كردفان ستجر السودان الي الهاوية
عقار ..لن اقابل البشير وايقاف الحرب صعب
الدمازين :حسين سعد
3أغسطس 2011
اوصد رئيس الحركة الشعبية بشمال السودان والي النيل الازرق الفريق مالك عقار الباب امام مقابلته لرئيس الجمهورية المشير البشير .واقر بفشل محادثات اديس ابابا ووصف الاوضاع في ولاية جنوب كردفان بالخطيرة وانها ستجر السودان الي الهاوية .في وقت وجه فيه عقار شرطة ولاية النيل الازرق لبسط هيبة الدولة بالولاية .وقطع الفريق مالك عقار في تنوير قدمه للاحزاب السياسية بالنيل الازرق ورجال الادارة الاهلية والمكوك والمثقفين والطلاب والشباب والمراءة بمركز مالك الثقافي امس بالدماذين بعدم مقابلته للرئيس البشير واضاف (لن اقابله كرئيس للحركة الشعبية)وزاد (no way)وقال عقار (يبدو ان الرئيس غير مقتنع بانني رئيس حزب مثله ) لكنه عاد وقال انه سيقابل البشير كوالي للنيل الازرق في اي زمان ومكان .واوضح عقار الذي كانت القيادات السياسية والشعبية تقاطع حديثه بالهتافات قائد قائد ياعقار ان ضرب الناس وتهديدهم و(قلع)عرباتهم لن يحل المشكلة وانما يذيدها وتابع (حل الازمات بالتجزئه غير جيد )واردف(اي نظام يسلك هذا الطريق نحن ضده ) وزاد (نحن مع السلام لكن بكرامتنا )وقال ان السودان القادم اذا مافيه النيل الازرق هو مافي ) واوضح (سنتقاسم نصيبنا في الحكم والثروة من رئاسة الجمهورية الي الوزارات والمحليات حتي ترزية القصر الجمهوري )وحول الاوضاع في جنوب كردفان قال رئيس الحركة الشعبية الحرب مستمرة في جنوب كردفان وستجر السودان الي هاوية وهناك احتقان في النيل الازرق وتوتر وتململ في بيقية انحاء السودان الاخري )وتابع موجها حديثه للحضور(لازم تعرفوا هذا الواقع تماما عشان ما يجيبوا ليكم الكلام تحت تحت )وقال (الحرب لازم توقفوا )وشدد (اذا استمرت الحرب ايقافها صعب ) وقال عقار ان لغة (لحس الكوع )لن تفيد بلادنا التي بحاجة الي الحوار والتسامح ) واضاف الحرب جربناها ونتيجتها كانت انفصال الجنوب وتابع (الحرب كويسة للناس الشافوها في السينما )وقال عقار (لن نخاف من الحرب واذا فرضت علينا كثرة البتابت عيب) واردف محاولات ابراز العضلات وفرض القوي لن تجدي وردد(اي زول عنده قوته )وزاد (تكورك في راسي اكورك ليك في راسك ) وشدد اذا لم نجيب علي سؤال كيف يحكم السودان ونضع الية لذلك السودان (بنفرتقو ) وقال رئيس الحركة الشعية بلادنا بحاجة الي ترتيبات دستورية جديدة وموقف واضح من المعتقدات والوحدة والسلام والاقتصاد وتقاسم الثروة والسلطة وزاد (الناس فتحت ) واردف نحن محتاجين الي دولة تعترف بالاخر و(تشيل ) الناس كلهم المسلمين والمسيحيين.وقال (الناس البقولوا السودان دولة عربية اسلامية هم دعاة لتشتيت ما تبقي من السودان )واردف دولة شمال السودان يجب ان تبداء( صاح) .ووصف الاوضاع الاقتصادية بانها متدهورة ومتراجعة وقال يجب ان ننزع السلاح جميعا لبناء بلادنا وتابع (لو في زول شايل سلاحوا انا سلاحي ما بختوا )وردد(هذه بلبصة )ووجه الوالي مدير شرطة الولاية لحفظ الامن وبسط هيبة الدولة وقال عقار موجها حديثه لقيادات الشرطة (اذا وجدتم اي قوة عسكرية او امنية غير الشرطة اوقفوهم اخنقوهم )وزاد (اذا وجدتم عقار نفسه في غلط دقوه )واوضح هذا الحديث قد يعجب البعض ولايرضي الاخرين لكن اقول لكم البريدوا يريدوا والما بريدوا حايريدوا وشدد (اذا كانت هذه هي الحرب فالتكن )واردف (لن اسمح باهانة اهلي في النيل الازرق )وقال اذا قبلت اهانتكم بسبب كرسي السلطة بسيبوا )

<a href="http://174.36.244.211/cgi-bin/sdb/2bb.cgi?seq=post&board=340" target="_blank">http://174.36.244.211/cgi-bin/sdb/2bb.cgi?seq=post&board=340

الكلام دا مافيه أي غلط، وكلام حقاني،، وناس الحكومة لو عايزين يفرضو الأمور بالقوة ستكون هذه هي النتيجة،،

مشكلة الحكومة هي التصريحات والتلميحات المهينة للآخر،،

ياناس الشعوب دي عانت من الفقر والتهميش وكفاية لحدي هنا،،


ناس الحركة: خيار الحرب دا خيار غبي ولا يخدم مصالح شعب أي منطقة لأن الضحايا هم الأبرياء دايماً،،

ناس الجنوب نالوا حقوقهم بالتفاوض بعد سنوات من الإحتراب وملايين من الموتى،،

يامالك عقار موقعك كوالي تابع لحكومة البشير يتعارض مع وضعك كرئيس لحزب يسعى لإسقاط الحكومة، فلن يستقيم عقلاً أن تأتي بمنجزات تحسب لحكومة المركز وانت تحاربهم،، وبعدين طلع من رأسك حكاية جوبا دي حتى لا نبدأ توتر بين دولتين بسبب صراع داخلي،،


عموما : لو رجعتم لصوت العقل فلا مشكل يستعصي على الحل،،


ورمضان كريم،،

رمضان كريم يا نزار

ألأخت تراجى
رمضان كريم وكل سنة والجميع بخير
ونقول " بأى حالة عدت ياعيد " والتحية
لكل الشرفاء والشريفات الذين قرنوا القول
بالفعل وهم يتصدون للدفاع عن المدنيين العزل .

الأخ عبد اللطيف بكرى
شكرا على المرورو والتعليق.
كما تعلم الحرب فرضت على الحركة الشعبية
وحين امتص الثوار الهجوم الغادر فى كادقلى
وبقية الجبال جنح النظام الى الحوار فى أديس
أبابا وكان الاتفاق الايطارى الذى تنصل منه النظام
على لسان رئيسه .. وها هو يرسل الرسائل للحوار داخل
السودان !!! الكل يعلم نوعية الحرب القادمة والحرب وسيلة
وليست غاية من أجل دولة المواطنة . الحركة الشعبية أعلنت تمسكها
بالاتفاق الايطارى وعلى من حشر نفسه فى هذا الجحر أن يخرجه ويعود الى رشده.

مال قاله عقار كلام سليم وعديل
لحل مشاكل السودان
اما الدجالين من بقية الموتمر الوطني يريدون تفتيت السودان

الأخ ذو اليد سليمان مصطفى

أهل الانقاذ يصنعون أصنام العجوة
ويعبدوها ويدبجوا لنا الخطب والفتاوى
وعندما يصيبهم الجوع يأكلوها بلا حرج وحياء .