Post: #1
Title: (قروب) (المواسير ) بتنقط في الفيس بوك ..
Author: tmbis
Date: 07-24-2011, 09:05 AM
قرات قبل شهور .. قيام ثوار الخارج .. بمختلف تنظيماتهم ..
من ثوار دارفور ..
ونمور وين كدا ما عارف ..
واسود شنو كدا ..
(وضبان) شنو كدا ما عارف الضكـر ..
ومهمشين ومهمشات ووين كدا بي السايبر ..
قريت عن المواعيد المحتلفة لكل منهم في تنظيم ثورته الخاصة به .. الخاصة به بس ..
يعني يكون هو براهو ولا شريك لـه ..
ثورات الجماعات دي بمختلف توجهاته كان يتم الاعلان عنها في الفيس بوك وفي المواقع الالكترونية .. على شالكة:
- يوم السبت الجاي الساعة كدا .. كل زول يجيب معاهو ساندوتشاتو ويبقى مارق .. نحن مارقين نسقط النظام ..
- يوم الخميس بعد نفطر في امواج .. نشيل شنطنا ونمشي نقفل شارع واحد علشان نسقط النظام ..
|
Post: #2
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 09:19 AM
Parent: #1
مع العلم انو كل الثوار ديل كانو بيعلنو عن مناسباتهم الرسمية والثورية في موقع الفيس بوك .. اسوة بي ثوار ميدان التحرير ..
يعني على وزن:
المصريين (اعلـن) مننا في شنـو ..؟
طيب كويس ..
الثوار ديل كان ممكن ثوراتم دي تنجح .. وتتشكل برلماناتهم ..
يعني مثلا ..
العاملين ليهم ثورة في ميدان عقـرب بتاع كندا .. ممكن يعينو رئيستم طوالي .. ويجونا بي سيرة بي اي خطوط طيران
يجونا ... قاشرين .. والواحد فيهم لابس ليهو طاقية زي بتاعت جلبيرت .. يا بتاعت سلفاكير ..
والعاملين ليهم ثورة في ميدان الليق بتاع امريكا .. يبقو مارقين بس .. ما عايزين منهم ابو النوم ..
ثوار المجلس البلدي الفي بريطانيا .. يجونا مشكلين حكومتم ويجيبو لينا معاهم (الشوكات) بتاعت ساعة بغ بن الشهيرة يجيبو لينا الشوكات بس .. ما عايزين منهم اي حاجة تاني .. كان ما لقو طريقة (للشوكات) يجيبو لينا (الزمبلك)
اما اصحابنا الثوار بتاعين فلان دا جلابي وفرتكان دا .. اضانو حمرا شديد .. فديل حقو طوالي يشوفو ليهم طريقة بتاعت ريش نعام .. الواحد يعمل منو تاج زي بتاع الهنود الحمر داك .. ويرقصو رقيص الحرب على ان تنقل الجزيرة الوثائقية احتفاليات .. تسلمهم الرئاسة بعد قلب الحكم في السودان .. ولحظة انهم يتجلبطون بالرماد في جسدهم العاري .. ووجوههم .. وذلك على طريقة المحاربين الشجعان لدى القبيلة ..
يللا فوق دا كلو .. ناس الخرطوم ديل يقعدو في صمة خشمم .. ينتظرو ليك الجماعات ديل كلهم يجو من بره يكبوهم لينا جوه الخرطوم علشان يحكمونـا .. اصلو ناس جوه ديل بقو قاعدين سااكت ..
|
Post: #3
Title: Re: (قروب) (المواسير ) بتنقط في الفيس بوك ..
Author: عبدالعزيز حسين عبدالرحيم
Date: 07-24-2011, 09:24 AM
Parent: #1
خليك من حق الشهور خلينا في حق يوم السبت
شفت الهكر خلانا نزازي بي وين ؟
 انا شمتان
انت بي سببك ملاسي وأساسي ديل الدخلهم شنو ؟
عندي مفكر طاشي كان جاك ماري بي جاي أعمل انكز
|
Post: #4
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 09:38 AM
Parent: #3
ووين الكلام دا يا عبد العزيز ؟؟
والله اخوك ليهو فترة قاعد ساكت .. لكن للضمان كدا قالو انا كنت مرشوش في بورد الهكـر وفي واحد مستمتع بي اسمي .. وممتع نفسو ..
عليك الله شفت ليك زول يكون قاعد في شغلو ما بيفتح النت زاتو .. يترشه من عدة مناطق مختلفة من العالم ..
من الرياض .. ومن امركيا .. ومن بعض الدول العربية المجاورة ...؟
معناته الواحد بقى عالمي عديل كدا ( هنا في وش ضاحك )
بعدين ان اجني وجـن حته ما بكتب فيها يقوم الواحد يكون بكتب معاك في حتة واحدة .. وإنت مسخن معاهو وواقف ليهو في حلقو
يقوم يمشي الحتة التانية .. البكتب فيها هو .. يجيب سيرتك ..
يعني هو عارفك ما مسجل معاهو وما قاعد تكتب معاهو .. ولا دي اخلاقك الكتابية ظاطاااا ..بتسمح ليك تعمل كدا
في داعي يمشي يرشك ؟؟
الواحد ما يبقى راجل ويرش هنـا بي اسمو .. شنو لابس ليهو نضارات شمسية وشايل ليهو كدوس .. وعلبة سلسيون ويعمل في (حركـات)
|
Post: #6
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 10:21 AM
Parent: #5
سلامات يا عبد العزيز .. والله شكرا عديل كدا
لكن بيني بينك البوست دا انا فاتح ليهو صيوان عديل بي هناك ..
السارفه .. سما سندعو ساجحه ..
نحن نشيل العدية دي ونمشي بي هناك ..
ياخ الواحد يكون قاعد زي ما قلنا في صمة خشمو ومرات خشمو زاتو ما صاميهو .. يجو المبدعين .. يتجاذبو اطراف الحديث عنك ..
..
حسع يعني طـه جعفر دا لما يكتب بالليل بكون مبدعين يعني ؟؟
|
Post: #7
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 10:42 AM
Parent: #6
كنت بتوقع في كل لحظة خلال الايامات القليلة الفائته .. ركزو لي في الفائته دي لانو فيها الفائته عديل كدا
يعني لازم تستفئدو من الحركة دي ..
كنت بتوقع انو ثورة المياة المعكره تولد احساس قوي من ثوار بره تيار قوي جدا ينادي بي ثورة الموية العكرانة .. او ثورة المواسير
يعني بصورة اوضح .. اشوف لي كم ثوري كدا يعلن عن انو ماسورة كبيرة ..
ومستعد يضحي بي نفسو .. وينقط موية صافية .. وينزل السودان في الايامات دي ويقود ثورة
لكن ووين ؟؟
والله ولا حنفيه من الحنفيات دي شايفو اجتهد .. ورسل لي ناس جوه ديل (جلـب) ..
يعني بي صورة أوضح قاعدين ضاربين موية الصودا دي .. ومكسرين فيها تلج .. والناس هناك تشرب في الربوب دا .. وفي واحدين البروب دا زاتو لو لقوهو نعمة والله ..
|
Post: #8
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 12:21 PM
Parent: #7
في كل عام تتكرر مشكلة عكورة المياه في نفس هذا الموسم من السنة ..
موسم الدميرة ..
وفي كل عام تتفاجا الحكومة بي المطرة .. وبي الدميرة زي التقول ناس الحكومة ديل .. ما ترابلة وما مزارعية أولاد مزارعية ..
في كل مرة تتفاجا الطرق والأرصفة والبشوارع بي موية المطرة .. والجو زي الوكت دا يبقى جو فول .. ومعصية .. وفي واحدين يجهجهو ليك رمضان ..
..
في كل عام والحنك الواحد هو .. انعدام الشب .. أو بخور التيمان مافيش .. لكأن ما الشب دا .. شاب علي شي ما ..
ياخ الشب دا كان مشو محلات التيمان الفي سوق امدرمان دي .. ممكن يدوهم شب يروب ليهم موية المحيط الهادي بي حيتانو .. واخطبوطاتو ..
طيب ياخ انت بلد بتقع في منطقة موية عكرانة كل سنة .. والبحر دا من ما الله خلقنا نحن في سيرتو .. لو المشكلة شب .. اعملو حسابكم من بدري .. وكتر شوالات الشب ..
ولو المشكلة .. ماسير جربانه وروحه محرقاها .. فاعتقد انو عندكم فترة طويلة جدا علشان تغيرو بيها المواسير دي ..
يعني عملتو مية وخمسين الف كبري .. وشقيتو مية وخمسين الف ترعة للري .. غالبكم ماسورتين تلاتة من المواسير دي تغيروها ..؟
إذن تبقى المسالة ما مسالة مواسير .. مسالة اهمال .. واستهتار بي روح المواطن .. وعدم خوف ولا مبالاة ..
|
Post: #9
Title: Re: (قروب) (المواسير ) بتنقط في الفيس بوك ..
Author: عمر صديق
Date: 07-24-2011, 12:48 PM
Parent: #8
سلام ياتمبس
وعودا حميدا
رغم انو في تعابير عندك وود الصائم في بوستات اليوم تخلي لا الواحد مسطح عديل كدا
لكن نعمل شنو مع لغات المثقفين دي
|
Post: #10
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 01:52 PM
Parent: #9
Quote: رغم انو في تعابير عندك وود الصائم في بوستات اليوم تخلي لا الواحد مسطح عديل كدا
لكن نعمل شنو مع لغات المثقفين دي |
سلامات يا كمندان ..
والله مع المطرة الصابة دي يا كمندان اتوقع اي حاجة مننا .. المثقفاتية ديل ما بيعرفو يتعاملو مع المطرة دي بي شكل جاد .. 
|
Post: #11
Title: Re: (قروب) (المواسير ) بتنقط في الفيس بوك ..
Author: tmbis
Date: 07-24-2011, 02:16 PM
Parent: #10
تستفزني دايما عبارات الثورة قادمة ..
فلنخرج يوم كم وعشرين الجاي ..
فلنحتج على شنو كدا ما عارف .. وغيرها من الاكلشيهات الضعيفه جدا ..
تستهواني دائما علاقة الشعب بتلقائيته ..
نفس الشعب الذي هتف وصوت للشجرة هو نفس الشعب الذي يستنكر الآن .. الآن .. ربوب المياه .. وانعدامها .. لا تقف من خلفه جهات لتحرضه .. حرضه الصبر على المصائب .. حتى وصل به الحال إلى أكبر مصيبة يمكن أن تحدد العلاقة بينه وبين قيادته ..
عندها لن تقف هناك عوائق ولا ارواح ستحفظ ..
من خرج من أجل أهل بيته .. ليوفر لهم جرعة ماء فهو على حق .. وإن مات من أجلها فهو على حق ..
عندها لن توقفه كل جيوش الدنيا ,
إن كانت ثورات الفيس بوك الكاذبة التي ليس لها علاقة بنبض الشارع والمواطن البسيط المغلوب على أمره .. إن كانت فاشلة وساهمت بقدر كبير في دعم الجانب الحكومي .. لعدم ارتباطه بالواقع .. أحذروا ثورة العطاشى
فليس لهم اسماء على الفيس بوك .. وليس لهم مواقع الكترونية .. أو اسماء مستعارة ..
صلحوا المواسير دي .. خلو الناس تشرب موية زرقا .. ما قلنا ليكم اعملوا لينا فيها (تانكي) يا موز بي لبـن ..
|
Post: #12
Title: Re: (قروب) (المواسير ) بتنقط في الفيس بوك ..
Author: معاوية الزبير
Date: 07-24-2011, 06:29 PM
Parent: #11
Quote: تستهواني دائما علاقة الشعب بتلقائيته ..
نفس الشعب الذي هتف وصوت للشجرة هو نفس الشعب الذي يستنكر الآن .. الآن .. ربوب المياه .. |
المصدر يا تمبس
هذا بعد السلام عليكم طبعا
|
|