الفتيات يرفضن الماديات ويطالبن الشباب بالزواج بما لديهم .

الفتيات يرفضن الماديات ويطالبن الشباب بالزواج بما لديهم !
في بكائية جاءت على لسان احداهن
بات العزوف عن الزواج من أخطر الملامح الاجتماعية، ومما ضاعف من ظاهرة العزوف عن الزواج بروز العديد من المظاهر الوافدة، مثل الغلو في المهر والشيلة وغيرها من الظواهر السالبة .. احد الشباب المبدعين كتب قصيدة جارى فيها الشاعر محمد عبد الحليم في رائعته «نأكل مما نزرع ونلبس مما نصنع».. والقصيدة التي نشرت في احد المواقع بالشبكة العنكبوتية جاءت في أعلاها على لسان احدى الفتيات التي تناشد الشباب بإكمال نصف دينهم، ليتصدى لها احدهم منتقداً النهج المادي للفتيات.
«الصحافة» عبر المساحة التالية تنشر القصيدة كما جاءت بالموقع المذكور، وللأسف فإننا لم نعرف هوية كاتبها، وتبقى الإشارة إلى أننا ننقلها كما جاءت بالموقع الاليكتروني

لي إيــدينا بنــــــــرفع ٭٭٭ والعازب كلو بيســــــــمع
نفوسنا كتير مشــتاقة ٭٭٭ للراعي دوام نتضـــــــــرع
شعارنا عريس متواضع ٭٭٭ يا أخي يا قدر اسمع أجمع
نحن البايرات في لهفة ٭٭٭ والعمـــــــــر ولـــي وودع
نحن مساكين يا جماعة ٭٭٭ وللجنة دوام نتطــــــــــلع
لو واحد قام وإتقــــــدم ٭٭٭ في لحظة نلبي ونسمع
٭٭٭
بلاش عربيــــة خصوصي ٭٭٭ مالو الكداري دا هســـع
بلاش من شبكة وشيلة ٭٭٭ بي أبســط حاجة بنقنع
البيت ما شــــــرط عمارة ٭٭٭ دي مظاهر ساكت تخدع
لي جنة نضيرة نحـــــول ٭٭٭ البيـــت الخرب البجمـــع
ما شـــــرط تجيب تلاجة ٭٭٭ كفاية الزيـــــــــــر البنقع
٭٭٭
ما دايرين كبدة وشـية ٭٭٭ بي ويكة تقيلة بنشـــــــبع
ما أصلو شــبابنا الودع ٭٭٭ ما ممكن تانــــــي بيرجــــع
أحلامنا الكانت بــدري ٭٭٭ ما عادت تانـــــي بتنفــــــع
دايرين الشاب الأغبش ٭٭٭ حتى لو فقــــــران ومقطع
لأنو الفيهو الفايــــــــدة ٭٭٭ ليهــــــــــــو دوام نتطلــــع
حياة الســــــترة أملنا ٭٭٭ ان شاء الله ربنــــــا يجمــــع
يحن الله عليــــــــــــنا ٭٭٭ ونشــــــيل أيدينا ونرفـــــع
٭٭٭
للرب شـــــكوانا بنرفع ٭٭٭ والبايـــر كله بيســـــــــــمع
في دربك يا مـــا جرينا ٭٭٭ والعين الســــــاهرة بتدمع
كم مرة ايدينا اتمـدت ٭٭٭ والرد الجــــــارح اقنــــــــــع
احلامكم والله غريبــة ٭٭٭ وللعـــــــين بتزغلل وتزلــــع
طلباتكم لينا تحيــــــر ٭٭٭ جايين تتواضعوا هســــــــــع
ما جينا زمان شن قلتو ٭٭٭ يا فقير يا مقطـــع أرجــــع
٭٭٭
ما عندك حق الســــــــفة ٭٭٭ لابس دمـــــــور ومرقع
دايرين العنــــدو مصانع ٭٭٭ لو كان لي غيروا بيركع
ما جينا زمان شــن قلتو ٭٭٭ يا فقير يا مقطـــع أرجع
في جيوبك ساكنة عناكب ٭٭٭ لو كان باعوك ما بتنفع
دايرين العنـــــــدو الفـــــلة ٭٭٭ لو كان حنكوش ومدلع
ما جينا زمان شــن قلتو ٭٭٭ يا فقير يا مقطـــع أرجع
٭٭٭
لو ماشـــي لآخر الدنيا ٭٭٭ تركــب رجليك تتبرطــــــع
دايرين العنـــــــدو البنز ٭٭٭ لو يبقى عجـــــوزاً أصلع
ما جينا زمان شن قلتو ٭٭٭ يا فقير يا مقطع ارجـــــــــع
يا البيتـــك مبني ٭٭٭ ومن غير فيضــــان يتزعزع
دايرين العنــــدو الفيلا ٭٭٭ لو كان صغيـــــر بيرضــــع
ما جينا زمان شن قلتو ٭٭٭ يا فقير يا مقطـــــع أرجــع
٭٭٭
وموكيتاً فخـــماً فاخــــــــر ٭٭٭ ونجفاً بالـــدر مرصــــع
والكندشة فريون ضــاربة ٭٭٭ وثلاجة فريــــــزر تجمع
بي فيديو كاسـيت وأتاري ٭٭٭ نتسلى لو وكتنا نضيع
ما جينا زمان شـــن قلتو ٭٭٭ يا فقير يا مقطع أرجــــع
٭٭٭
دايرين زنقيل ومقنــــــدل ٭٭٭ لو كان تمســـــاحا يبلع
والعملة الحرة ضــــــروري ٭٭٭ والمهر دولاراً يدفــــــــع
وبشرط الشــيلة العامـرة ٭٭٭ والكرسي الجابر يلمـــع
وذهباً مختوم وأســـــــاور ٭٭٭ مليانة الإيد للأصـــــــبع
وضروري الحفــــــلة بوردي ٭٭٭ والكابلي اللحنو موقـع
ونقضي عسل في أوروبــا ٭٭٭ ونطوف العالم أجمــــع
بي لندن وروما وموســـكو ٭٭٭ وفينا المدن الأربــــــــع
نلبس في الكاسي العاري ٭٭٭ ولو طلعت موضة بنتبع
وناكـــل فاكهة طـــــــازجة ٭٭٭ وبالخير نتمتع ونشـبع
أفلامـــكم والله عجيبـــــــة ٭٭٭ خلونا نحمض ونطبـــع
ما جينا زمان شـــــــن قلتو ٭٭٭ يا مبهدل أوعك تطمـع
٭٭٭
مد رجليك قــدر لحافك ٭٭٭ وشوف ليك طـورية وأزرع
لي مين تتقــــدم إنت ٭٭٭ يا قرد يا قبيح يا مبرقـــــع
كيفن بتحـــــب يا أغبش ٭٭٭ من غير شاكوش تتفرقع
لو كان بنحــــــــب الزيك ٭٭٭ ما أخير الموت الأســـــرع
لو مت وفاتك تفــــــــــرح ٭٭٭ ولو عشت حياتك تفجـع
ولو تبقى ضراعي الأيمن ٭٭٭ في لحظة بنقطع ونجدع
٭٭٭
ما قلنا الدنيا دي فانية ٭٭٭ وآمالنا مظاهـــــر تخــــدع
اختاروا العندو ديانـــــة ٭٭٭ الديمة وشـــــــو بيلمـــــع
قلتولنا خلاص انتظـــروا ٭٭٭ الحــور في الجنة بتنفـــــع
الليلة قطـــــــركم صفر ٭٭٭ والعمـــــــــــــــر ولى ودع
عجزتو قعــــدتو تقولوا ٭٭٭ واشبابنا الأغبــش أجدع
ما جينا زمان شن قلتو ٭٭٭ يا فقير يا مقطـع أرجــع
٭٭٭
ما جينا زمـــان ليه كنتو ٭٭٭ جاهــلننا زي الشــــــــفع
ما خلاص الليلـة وقعتوا ٭٭٭ من قد القفة الأوســـــــع
والليلة قطركــــــــم دور ٭٭٭ وقعتوا في وش المدفــــع
رافعين الراية البيضــاء ٭٭٭ لكن هيهـات ما بتنفـــع
رافعين لعرس جماعي٭٭٭ وفي العشرة ألف ما بنطمع
وهنياً ليكم كبدة وشية ٭٭٭ بعـــد الأضراس تتخلــــــــع


*الصحيح (الراكوبة) نقلا عن (الصحافة) لذلك جري التعديل.

سلامات يا دقم
صاحبة لينا زمان كان شعارها البترددو بمناسبة وبدون " تعال بالعِندك ابوي بسِندك, تعال بلباسك أبوي مقاسك"

Quote: تعال بلباسك أبوي مقاسك"

ودى معناتا يلبس من جلاليب ابوها
والا عندها معنى تانى يا ابو حتوت !! ؟

الدقم ازيك ياخ ...

تسقط الشيله ... يسقط الدهب .. يسقط فطور العريس ... تسقط ام العروس لوووول


......
اها بعد السقوط الكتير دا وخاصه الاخير .. ممكن نعرس

Quote: تسقط الشيله ... يسقط الدهب .. يسقط فطور العريس ... تسقط ام العروس لوووول ...... اها بعد السقوط الكتير دا وخاصه الاخير .. ممكن نعرس

الاخ نوفل سلامات اتمني بعد كل هذا يقبلن/ وفي الحقيقة هن بيقبلن بالزواج اذ ان ايقاع الحياة بقي جهنمي للرجل وللمراة معا وخصوصا المراة والمجتمع ذاتو ما بيرحم/ قاعد ينقنق.. نق.. نق.. نق.. لذلك انا شايف عودة الزواج الجماعي الكان في الزمان في الساحات العامة ممكن يكون حل.

من جهة اخري المشكلة في الشباب المغتربين اذ ان البنت بتركز عليهو كتير ظنا منها (ويا لمسكنة ظنها) انه يحمل ما خف وزنه وغلي ثمنه وهي ما تدري ان الاخو رجع من الغربة فقط بسماحة الوصف للطبيعة في بلاد الغربة/ لك الشكر ياخ.

سيد الكارو تعال نزل لي الشايلو تعال ,,, تعال بالعندك تعال
ياخى ابوى بسندك تعال ,,,

Quote: سيد الكارو تعال نزل لي الشايلو تعال ,,, تعال بالعندك تعال ياخى ابوى بسندك تعال ,,,

يعنى يا منوله اللباسات دى زياده ساى من ابو حتوت
انا برضى قلت كدا

ما معقول عروس تقول لى عريسا تعال بى لباسك

Quote: سيد الكارو تعال نزل لي الشايلو تعال ,,, تعال بالعندك تعال ياخى ابوى بسندك تعال ,,,

الاخت منال سلام تيب سيد الكاور لو شاحن برسيم الوضع بيكون كيف؟ طبعا ثقافات الطلبات عند البنات او الخريجات او الباحثات عن العريس تراجعت كثير/ من فيلا كبيرة الي راكوبة صغيرة نبنيها برموش عيينا وكدة.. لك الود.

Quote: ودى معناتا يلبس من جلاليب ابوها والا عندها معنى تانى يا ابو حتوت !! ؟

علي محمد علي بشير سلامات ان سؤالك الذي طرحته لفي غاية الاهمية بمكان حقيقة وايضا اضيف اليه ماذا لو كان مقاس جلابية ابو العروس اصغر او اكبر من العريس الذي يريد الزواج؟؟

Quote: الدقم ازيك ياخ ...

نحمدو ونكون من عبادو الشاكرين ما بطال اتا كيف احوالك ان شاءالله كل الامور بسط؟؟

Quote: سلامات يا دقم صاحبة لينا زمان كان شعارها البترددو بمناسبة وبدون " تعال بالعِندك ابوي بسِندك, تعال بلباسك أبوي مقاسك"

ود الخضر سلام ياخ ولك مدة طويلة لم نراك فيها /صاحبك هذا والنصيحة لله لو اني في مقامه ما خطوت نحو دار ابوها قيد انملة اذ ان مقولة (ابوي بسندك) (وابوي مقاسك) هذه يعني ان الرجل و-هو صاحبك- ليس طالب زواج/ بل هو طالب لجوء لكن وفي كل الاحوال الشباب خاصة زودوها شوية.

وان قلنا عليكم بالتعدد والتنوع في الزواج مثني وثلاث ورباع طبعا تعرف النتيجة سلفاهجوم كاسح ماسح ساحق ماحق من المنظمات النسوية وجماعات حقوق المراة والذي منو/ لذلك نقول تصرفو وتصرفن عن طريق الزواج وعواصف الود ودالخضر.

أخونا ود البشرى .. كبّرت اللّفة ياخ


دمت بود ،،،

[email protected]لمن يرغب بالمشاركة من الخارج

Quote: الفتيات يرفضن الماديات ويطالبن الشباب بالزواج بما لديهم .

الاخ محمود وضيوفه سلام

موضوع يرفضن الماديات دي جر رجل ساكت عشان الواحد يدخل الحلبه

بكامل قواه العقلية ومن جيب جيب جيب يفقد قواه العقلية قبل الدخول عليها.



شفنا في أصحابنا وقيل السعيد يشوف في أخوهوا والشقي يشوف في نفسوا

الأخ الدقم

تحياتي - واحدة صغيرة عرست ليها واحد كبير في السن

سالوها ليه يا فلانه عملتي كدا ؟ قالت ليهم بونسني وبورثني !!

بحيراوي

بحيراوينا سلامات : البنية قلت لي تزوجت عمك المسكين للونسة والورثة؟ قادر الله، ان كيدهن لجد عظيم، بيني وبينك في بعض العجزة والمسنين كمان ببالغو، لك الود.

ود عبدالرازق احوالك ياخ، والله انها لجهجة عظيمة، اسهل واسرع زواج لاقاني في بريطانيا، يعني من الانكليزيات، لا مقدم لا مؤخر ولا عريسنا جفل البحر، ولا فطور العريس، ولا يحزنون، تمشي الجامع بالنهار، تعقد وتمشي معاها بيتها او العكس، لكن بس المشكلة الصغيرة فارق الثقافات دا، طبعن كل ما كنت اخدر او ازرق الطلب بيكون عليك سررريع، المهم مهما كان وحسيكون احسن من المراة السودانية أنا زي شايف الله ما خلق. شاكرن لك المداخلة.

صبري طه كيفنك وفي انتظار رايكم دمت.

Quote: " تعال بالعِندك ابوي بسِندك, تعال بلباسك أبوي مقاسك"

يا جماعة خلو ود البشرى دا في حالو لو جاكم راجع تاني حيقول تعال امفكو ويدخل ابو البت دي في حته ضيقه

يا مرتضي سلام ود الخضر زول زول خفشات وقفشات لكن بصراحة مثلو الجابو دا دائر موور شرح لك الشكر.

ود الدقم المثال واضح ما بدورل مووور شرح ولا شي
البنت بتقنع في الولد انو هم ما دايرين من حاجة غير مجهودو و الوالد متكفل باي شي لدرجة حتى ملابسو ممكن يلبس معاه - ما عدا اللباسات طبعا لأسباب صحية