عمـارة (وجه النهار) والشـدر الكُبار

ثمة جلبة غير عادية تحدث في هذه العمارة التي تميزت بالهدوء فهي تقع في ذلك
الحي الهادي .أصوات تعلو وتنخفض جعلت الفضوليون من السكان يسترقون السمع ويختلسون
النظر إلى مصدر تلك الضجة الغير معتادة,محاولاتهم حذره في تقصيهم الحقيقة, فكل شيء
هنا يحدث خلسة,شقة في الطابق الثاني كانت مصدر تلك الأصوات:

ـ ########!
ـ إحترمي نفسك يا سميره....واللهِ واللهِ....
ـ الله يكسر رقبتك, لو كنت بتعرف الله ما كان جيت بي لبسك الرسمي لمحلات مشبوهه زي دي..وكان إحتر....
ـ سميره أوزني كلامك..دا مكان محترم والناس العايشه هنا كلهم ناس مسؤولين في الحكومه ودكاتره و...
ـ لو كانو زي ما بتقول يبقى على البلد دي السلام, ولو أي مسؤول عامل ليه صاحبه يبقى غي....
ـ بلاش قلة أدب معاك, صاحبه في عينك..الناس دي كلها متزوجه وأنا.....

عمارة (وجه النهار) عماره عاديه من أربعة أدوار لا شيء يميزها عن نظيراتها المنتشرات في ذلك الحي
سوى أسلوب الحياة الذي ينتهجه سكانها, فالبهوات الذين يدفعون الإيجار لا يزورونها إلا والشمس قد
توسطت قبة السماء, ويغادرونها قبل الضياء الأخير.

يتدخل أحمد أخو سميرة الذي حضر معها ضمن القوة الهجومية التي باغتت جنابو في موقعه البديل:
ـ يا جنابو الراجل محللاتنلو أربعه, أكان إنت متزوج خجلان مالك.... أعلِنو كان سميره رضيانه التقعد
مع وليداته. وكان مادايره ربنا قال أمسكوهن بمعروف أو فارقوهن بمعروف.... كلامي وقعلك؟
ـ يا أحمد اخوي أنا ما عملت حاجه تغضِب ربنا..أنا اتزوجت....
سميره مقاطعه:
ـ زواج سري؟
ـ إنتِ مالِك؟
ـ ملاّله تملك..قسيمتك وينه؟

فايزه ويكلكس صديقة سميره التي أخبرتها بأن زوجهايتردد على عمارة (وضح النهار)وهي التي وضعت خطةالكمين

لجنابو..هي موظفة قديمه فاتتها كل قطارات الزواج فأصبحت وكالة أنباء متنقله تجيد الشمارات بكل الألوان.
ساكنة الشقةتقف محشورة في إحدى زوايا الصالة تراقب الموقف في ذهول بعيون دامعة..فايزه ويكلكس تتجول في الصالة
وكلما مرت أمام المسكينه حدجتها بنظرة فاحصةثم تمِط شفتيها قائله: بِس.

في هذا الجو المتوتر فتح الباب بهدوء ودخل رجل في محياه مهابه, شعره الفضي والتجاعيد التي ترسم خريطة وجهه تقول
إنه في أواخر عقده السادس..يقفل الباب خلفه بذات الهدوء وقد اتجهت إليه أنظار الحاضرين في ذلك المشهد الذي هو
أقرب للدراما منه للواقعية....يتقدم نحوه جنابو مهللاً وكأنما أتته نجدة من السماء:
ـ مرحب مرحب سعادة الوكيل.. إتفضل إتفضل سعادتك..مرحب ياجار..سلم على الجماعة ديل سميره أم أولادي وأحمد أخوها,
وفايزه صديقتها و.........



ونتابع

في الإنتظار

جاييك يا فارس يا رائع

مشكور على التواصل


والشكر موصول لأبو ماهر

شايف رسايلو في الجوال تتخابت

أوعى تكون عندك نوايا في وضح النهار!
وبالمناسبة العماره دي حقيقية, وحأكشف ليك صاحب آخر دراما
بس روق المنقه.


فارسنا ما نسيتك جاييك....أمانه الموضوع ما طوييييييييل.

ـ شرَّفتنا واللهِ يا سعادتك.....دي سميره القلت ليك عليها, دايماً ذاكره بالخير
أم أولادي ..طبعاً...
تقاطعه سميره:
ـ قال أم أولادي قال....دي من راسك ولا من كرّاسك؟..عرفتني هسه أم أولادك..لوكان بتقدر
العُشره كان عملت ليك صاحبه.. يا..
ـ سميره احترمي نفسك واحترمي سعادتو دا ....البت دي بت محترمه واهلا ناس محترمين.
ـ هي لو محترمه بت سغيره زي دي تتسافه ليها مع زول عُمرو خمسين سنه وعِندو خمسه شُفع,
وتقول لي محترمه يا ما...
ـ سميره إنتِ ط.......
ـ تِمها..تِمها
ـ طايره والبعرِفك ذاتو طاير معاك

يتدخل سعادتو....ذلك الزائر الوقور الهاديء:
ـ يا جماعه باركوها.. ألعنو الشيطان.. ياخوانّا المسائل دي بتتحل بالهداوه مش بالإنفعال.

عمارة وجه النهار إتفق قاطنوها أو لم يتفقوا فهم من كبار الموظفين وقد اتخذوها مهرباً من
رتابة الحياه الزوجية وإزعاج البيوت كما يدعون, فاتخذ كل منهم عشرينية تؤانسه في ما تبقى من المهد إلى
اللحد, وقد لعبت الصدفة أو لعب المتصادفون دورهم في أن تكون قاطنات العماره متقاربات في السن.

يسترسل سعادة الوكيل في الحديث:
ـ ياخوانّا الرسول عليه أفضل الصلاة والسلام قال..
تقاطِعه فايزه ويكلكس بصفاقه:

ـ أها إنت يا القرضاوي عُرفي ولا مسيار؟


ونتابع

متابعة حذرة


راجيين باقي الحكي

يادوووووب عرفت الشحتفة ما كويسة وحاتك

كن بخير والأسرة

حبيب نوره وحبيبنا
الشوق ليك بحر والله
عمك يا الحبيب بقى يغيب عن المنبر
شهر شهرين ويجي مشاتِر
هرِمنا.....هرِمنا يا الحبيب


لك التقدير

متابعة بتركيز عالي شديد


تحياتي محمد

يا مراحِب يا مراحِب

حباب ود البدري

جاييك يا درش...الجراب مليان خبارات

لك التقدير على هذا التواصل

وصلتني رساله من صديق عزيز من أمريكا يقول فيها(العُرفي عارفِنُّو..مِسيار يعني على الماشي ولا شنو؟)
وهي كذلك تقريباً.

زواج المسيار منتشر في منطقة الخليج,يقولون من الناحية الشرعية لا غبار عليه, فهو موثَّق ومُعلن,
ولكن (مبيت) الرجل عند المرأة غير وارد, وذلك بناءً على الأتفاق الذي يتم بين الطرفين, قد يأتي
الزوج في أي وقت يشاء ولكن المبيت لا. وظروف المرأة هي التي تحتم ذلك وتجعلها تضع هذا الشرط, فقد
تكون أرمله وقد ترك لها زوجها أطفال ولا تريد رجلاً يتحكم في حياتها, ولا تريد لأطفالها أن يعانوا من
سيطرة الزوج, وفي نفس الوقت هي مازالت شابة وتخاف الفتنة وفي حاجه لرجل....في أغلب الحالات إن لم
تكن كلها تكون الزوجه لها بيت,وارثه, أو صاحبة وظيفة كبيرة.


من أرادهُ منكم مسياراً فليتزوج.

فايزه ويكيلكس تحافظ على قوة الإندفاع وتواصل الهجوم:

ـ أها ياسعادة الوكيل.. الدايماً راسي وتقيل.. ما جاوبتني على سؤالي؟

سعادة الوكيل يُخرج منديلاً من جيب بدلته ويمسح حبيبات عرق تجمعت على جبهته رغم
برودة الجو..وبهدوئه المعهود يوجه كلامه لفايزه بينما نظره مع جنابو:

ـ آسف يا أستاذه .. دي خصوصياتي وأنا حر فيها....ثم تانياً ما حصل لي الشرف بمعرفتك
قبل كده.. ثم تالتاً(إزّاي) تحشري نفسك في حاجه ما بتخُصِك!
ـ لالالالالا يا سعادة الوكيل..أيِّ حاجه إلا زعلك.. بعدين أطمِّنك الشرف حصل.. وبمناسبة إزّاي دي
حفلة عيد الميلاد العملتها ليْ سوسن برشلونه في شقة مصر الجديدة كنت حاضراها!

(سعادة الوكيل ياخُد ليهو جفله)

تواصل فايزه ويكيلكس الهجوم على طريقة أطرق على الحديد وهو ساخن:
ـ وبعدين أزيدك عِلِم يا سعادة الوكيل سوسن برشلونه سكرتيرتك سابقاً وزوجتك الثانية حالياً
الإشتريت ليها شقه مصر الجديده.. دي تبقى بت خالتي....بعدين الأموره بتاعة (وضح النهار) دي
حتشتري ليها في شرم الشيخ ولا وين؟



نتابع.....الموضوع سخَّن!

قال
من أرادهُ منكم مسياراً فليتزوج.

سجمى يا ود المكى انت بقيت قالع ايدك الله اكفينى شرك

اوع تكون سعادة الوكيل......

سجمى يا ود المكى انت بقيت قالع ايدك الله اكفينى شرك








(الكلام دخل الحوش)

محمد سلامات

لما شفت العنوان وشفت حبيب نورة قلت أجهز صور السمغ

Quote: زواج المسيار منتشر في منطقة الخليج,يقولون من الناحية الشرعية لا غبار عليه, فهو موثَّق ومُعلن, ولكن (مبيت) الرجل عند المرأة غير وارد, وذلك بناءً على الأتفاق الذي يتم بين الطرفين, قد يأتي الزوج في أي وقت يشاء ولكن المبيت لا. وظروف المرأة هي التي تحتم ذلك وتجعلها تضع هذا الشرط, فقد تكون أرمله وقد ترك لها زوجها أطفال ولا تريد رجلاً يتحكم في حياتها, ولا تريد لأطفالها أن يعانوا من سيطرة الزوج, وفي نفس الوقت هي مازالت شابة وتخاف الفتنة وفي حاجه لرجل....في أغلب الحالات إن لم تكن كلها تكون الزوجه لها بيت,وارثه, أو صاحبة وظيفة كبيرة. من أرادهُ منكم مسياراً فليتزوج.

لكن كلامك الفوق ده جديد عندى

ياحبيب نورة سمعت الكلام الفوق ده

يعنى المرأة هى التى تطلب المسيار

يالله نحن فى انتظارك يالسمحة

الزوجه لها بيت,وارثه, أو صاحبة وظيفة كبيرة.







ياود حماد أبقى جاهز
البيان بالعمل.

مرورك أسعدني

تم اختيارِهِ معيداً في الجامعة لنبوغه وذكائه في ذلك العلم الصعب.... آدم شاشينا....وقد تم إبتعاثه لجامعة
إيست إنجليا لعمل دراساته العليا في الفيزياء النووية....ولأنه راجل بخاف ربنا تزوج من خواجيه هديّه ورضيّه
ولكنها لم تتحمل سلوكه الأفريقي أكثر من سنه, فأردفها بأُخرى تختلف عن تلك بأنها أكبر سناًوأقل طموحاً,واستثمر
شاشينا آخر بويضتين عندها قبل أن ينقطع عنها الطمث بغير رجعه,فرزقهما الواهِب العطّاي ولد وبنت ما أحلاهما..
ثم عادت الأسرة للسودان بعد أن حقق دكتور شاشينا رسالاته بتفوق يحسد عليه وفي زمن قياسي..وبعد سنتين قضتهما
في دهشه من كل شيء صادفها بدأ الملل يتسرب إليها, فالحياه هنا رتيبه، والبرامج روتينيه, وارتباطنا بالأسرة
الممتده أصابها بصدمه..فناس العوض جايين (الأستباليه) راقدين في الصالون,والعازه عندها عمليه جات معاهها الحله كلها
وعووووووك....أصبحت المسافة بين النزاعات تضيق شيئاً فشيئاً إلى أن أصبحت عاده يومية.

رجع البروف آدم شاشينا من الجامعة ذات يوم فوجد الدار خلا..ظنَّ أن الخواجيه وعيالها في النادي ولكن مرّت ساعات
ولم تحضر....إنزعج ..دخل غرفتها التي لم يدخلها منذ زمن فوجد رساله صادمة تقول فيهاإنها غادرت إلى بلد الضباب....أخذت
عيالها وعلى البرتش إير لاينز تركت أفريقيا ومن فيها خلفها....خرج البروف من الغرفة مترنحاً....إتصل بالسفارة,..
وحقوق الإنسان ,والمتنفذ الذي ساعدها على الهرب, ولم يصل لنتيجة.

طبعاً ناس الفيزيا ديل أي واحد عندو فيوز ضارب(عدا الذين هم أعضاء في المنبر), وإذا أُضيفت ليهو مشكلة زي دي
يبقو فيوزين.

إستسلم بروف آدم شاشينا لواقعه المرير خاصةً وإن المتنفذ هدده بعظائم الأمور إن هو جاب السيره دي في الحلم,وإن
عليه السفر لبلد الضباب إذا عاوز يحل مشكلة أولاده.....فكر البروف وقدَّر وقال يازول (بِت عمَّك, خزنة جيبك ومطمورة عيبك)
رسَّل البلد, رسَّلو ليهو واحده (خام)..... يجي من الجامعة زهجان وراسو يكاد ينفجر من النظريات والمعادلات, يلقى
كلتوم ريحته بصل بصل, والشُفع(خريانين) في الموكيت, ومن المغرب ولّعت حُفرة دُخّانه وعزمت جيرانه.. وآآآآآآآآآخ.

بمساعدة زميل وجد البروف ملاذاً آمناً في عمارة (وجه النهار)
خاصةً وإن الإستلطاف الذي كان بينه وبين تلك البرلومه الإقليميه قد بدأت تلوكه الألسن والأسنان,وقيل إنه قد تحول إلى
حُب جارِف..وحُب أرزل العُمُر دا بِحوِّل صاحبو لمشروع دِلاهه.

طرق خفيف على الباب....إنفتح الباب....أطل رأس رجل ستيني فصاح جنابو:
ـ مرحب يابروف....بروف شاشينا اتفضل.
دخل البروف بطريقه تجعل من يتابعه يعتقد بأنه قد بدأ حياتِهِ (حرامي) إن لم يكن يعرفه...في منتصف العقد السادس من
العمر,طويل أخضر قيافه, شعره على أجناب الرأس ولكن جمعه في المنتصف لستر التصحُر الحاصل بفعل السنين,مستعملاً مواد
مُثبِّته..... تفرس بروف شاشينا في وجوه الواقفين ثم قفل راجعاً ......خرج وأغلق الباب وراءه.

فايزه ويكيلكس فاصل وتواصل:

ـ لكين يا سعادتك الأموره دي تستاهل ناصيه في كافوري.

سعادة الوكيل يبدو عليه الإنفعال ويخرج من وقاره:

ـ يا جنابو الأشكال دي بتجيبوها من وين..لو إنتِ بتعرفيني أنا ما بتشرَّف بمعرِفتِك.
ـ لكن ياسعادتك بعرفك زي جوع بطني...إنت ما راجل سهام دُبي سابقاً وطليق.....

يتدخل جنابو بحدَّه:
ـ يطُق حنكِكِ..إنت جابوك هنا بتاعة فِتن ومشاكل....إتفضلي.....
سميره تشِب في حلِق جنابو:
ـ نتفضل كلنا.. بس تسلمني ورقتي هسسسسسسسسسه

سعادة الوكيل يتجه نحو الباب ...يخرج ويصفق الباب خلفه بطريقه أحدثت دوياً هائلاً إرتجت
معه كل شبابيك وأبواب العماره..هذا الدوي سمعه سكان وجه النهار آخر وأول مرة عندما انفجر
صاروخ إكسوسيت مُرسل من عرض البحر الأحمر في مصنع الشفاء للأدوية الحيوانية والبشرية.
صوت الخفير يصرخ أسفل العمارة....لوحِظت عملية هروب محدودة لبعض سكان وضح النهار.


أكيد....أكيد حنتواصل

Quote: ما شفت العنوان وشفت حبيب نورة قلت أجهز صور السمغ

ياراجل سمغ شنو
البوست ده طاهر وطول عمرو ح يفضل طاهر

Quote: لكن كلامك الفوق ده جديد عندى ياحبيب نورة سمعت الكلام الفوق ده يعنى المرأة هى التى تطلب المسيار

لالا دي جديدة يا أبو علي إلا يفتينا فيها مولانا ود المكي

لالا دي جديدة يا أبو علي إلا يفتينا فيها مولانا ود المكي



الخير الداني في مدونة الشيخ جابر القحطاني
ـــــــــــــــــــــــــــــــ

الصمغ العربي لعلاج أمراض العصر(البياض بالبطاقة الإئتمانيه فقط)

ا. البدانة.
2. السكري.
3. الإمساك الحاد.
4. الكُلي والمسالك البولية.
5. الضعف الجنسي.

ملحوظة:
ـــــ
مجموعة(صُباع أمير) يمتنعون!

Quote: وحُب أرزل العُمُر دا بِحوِّل صاحبو لمشروع دِلاهه.

سمعت الكلام ده ياكوستاوى ، عارفك بتاوق بى جاى

واصل السرد الرائع ياودالمكى

وبالمناسبة عندك فكرة العمارة دى فيها شقة فاضية للايجار

تعرف يا ود حمادهنالك (هكر)قوي في المنبر هذا الصباح
ورغم محولاتي الثلاثة لتصحيح كلمة لم أكتبها أصلاً, فقد اضطُررت
لإزالتهاولم أفلح في إدخال الكلمة البديلة.

سامع تِحت تِحت الغفير عايز يِأجِّر أوضتو....لكن حكايةشقه فاضيه
دي حلم صعب المنال.

لكن لخوتنا الإنت عارِفه يا ود حماد إتصلت بالمحامي الماسك العمارة
داير حقو خمسسه ألف يورو..وحيخُتك في لستة الحجز على2113م....لأنه
في واحد من المؤجرين المسافة بينو وبين (البكري) بِقت قصيرة..طبعاً
الراجل بيحسبه كويِّس.

ولا أقول ليك قوله....خليني مع الغفير ما بكون داير ليهو أكتر من
من خمسه(باكو) ريال سعودي.. لأنه مابيعرف اليورو دا بياكلُو بالعصيده
ولا بيشربو إسكِتو.


جاييك ياحبيب بس خليني أشوف قصة الهكر,إنتايه ولا ضكر؟

صوت جلبه في سلم العمارة يزداد إرتفاعاً كلما استمر مُحدِثوها صعوداً....فُتِح باب الشقة ودلف منه للداخل
الناطور(مَسَاعد) يتقدمه آخر....لم يهتم الداخلون بقفل الباب خلفهم.

بدأ كصبي مع تاجر عُمله....دولار ,ريال,شيك سياحي هي أول(قصيدة) يرددها في بواكير صِباه, فقد تعلم
في مدرسة السوق العربي.. مدرسه فصولها البرندات والنواصي....إشتهر من خلال وسيلة رخيصة..غنّايه!!
فعندما أقام حفلة حصوله على (المليون التالت) قطعت له أغنيه بالمناسبه يقول أحد كوبليهاتها:

راقي المزاج يا ناس
لابس الديباج يا ناس
سيد الأبراج يا ناس
حاتم كُرباج يا ناس
وضع حاتم كُرباج على (جبين) تلك الغناية خمسمائة دولار عداً نقداً في تلك الليلة.
في بدية العقد الخامس من العمر,قصير القامة,ممتليء الجسم,يرتدي جلابية رمادية زرارها الأعلى مفتوح
على عراقي بلون بيج,يضع على رأسِهِ الضخم طاقية مطرَّزة وقد لفَّ حول عنقه شالاَ من نفس لون وتطريز الطاقية,
ينتعل شبشب بني يبدو انه لم يذق طعم الورنيش منذ أن فارق المصنع , عندما يتحرك يتقدمه شيئان.. كرشُه
وشفته السفلى التي تحتوي (سفَّه) تدفعها للأمام لأكثر من بوصة,ولا تكاد تخلو من سفّه إلا ليودع أخرى مكانها.
... ذلك هو حاتم كُرباج....مالك عمارة وجه النهار ....(المليونيرات الجُدد).

ـ آ ناس.. الأبواب دي كان (بَرزعوها) كَدِي كان جيتو لِقيتوها؟
جنابو يقفز للأمام راسماً على وجهه إبتسامه مصطنعة بلهاء لامتصاص ثورة المالِك:
ـ كَديْ روِّق المنقه يا حتُّومي...قول السلام عليكم أول حاجه

فايزه ويكيلكس حاضره لمثل هذه المواقف ومن زاوية فمها ترسل قذيفه:
ـ السلام سُنه وردُّو فرِض..لا إحترام للبيت , لا فهم لا إتيكيت.

ـ فايزه.... (صيحه قويه من جنابو)




خليكم معانا

قال
من أرادهُ منكم مسياراً فليتزوج.

سجمى يا ود المكى انت بقيت قالع ايدك الله اكفينى شرك

اوع تكون سعادة الوكيل......
انا ماعايز انحرف بالبوست واغتس حجرو
لكن صحي منو سعادة دي ؟؟
نص جميل زي ده عايزين تشترو لينا ؟؟

مرحب حباب أبو السهروردي

شرّفت الدار واللهِ

طبعاً سأغادر لأرض ال633 ألف ميل ميل مربع بعد
يومين تلاته, وداير لي زول أأجِر ليه البوست دا
بدون خلو رِجل.(يعني لحدِ ما تبقى مسافر).

إن أسفت على شيء فإنني لن أكون يوم 16/6 في
مسرح قطر الوطني.. سأكون هناك في موقعِ ما
جنوب كوستي شمال الرنك ربما......ربما,ربما.

تحياتي للعمالقه موسى الأمير ومصطفى ومجموعة الشباب
الذين يزيد بهم (عرس الزين ) ألقاً وإبداعاً.

كل الود

Quote: بيشربو إسكِتو

ود المكي اللذيذ ياخي كده انا فهمته حاجه

بس حبيب نوره ياربي برشامه

طبعا يهزر وبخفف في دمي ( وش مبسوط بيك )


ياخي انتو مبدين عديل وجد الواحد ساكن معاكم هنا عديل في عالم الخيال الواقعي في زمن مافي وقت


احترامي وتقديري

متابع يا ود المكى ...

رمزية عالية فى بعض من النص وطعن فى الفيل ( عديل ) فى بعض .

وليم أندريه
يامن خلدت إسم الغزال الأسمر
ذلك الفنان الإنسان الرائع
له الرحمه


ولك التقدير على المرور العطِر

الأستاذ الفاتح الرشيد
مرورك له قيمة
ويحفزني للمحافظة على قوة الإندفاع

أبشرك الأمين البدوي(كاكوم) إستلم العقد
فقط يقوم بترتيب أموره, وسيكون في الدوحة
خلال هذا الأسبوع.

لك تقديري

ـ إتفضل إتفضل يا حتومي....تعرف سعادة الوكيل الأيام دي أعصابو بايظه شويه....أظنك قريت في الجرايد
خبر سقوطو في إنتخابات النادي....كمان ما تنسى إنو مضروب في الأسهم.. ومشاكلو مع المره الكبيره
يعني أمورو كلها على بعضها جايطه....بعدين الباب كان في شوية هوا ساعد في....

ـ يا جنابو علي الحرام أنا الأبواب دي جايبه من أزبانيا..يعني بالشي الفُلاني..الناس....

ـ كدىْ عليك الله أقعد يا حتومي..أعملو حاجه بار..... ولا أقول ليك يا مَساعَد أختِف رجلك على الدكان جيب
ليك إتنين حاجه بارده..ولا خليهم خمسه , الجماعه ديل....

ـ بقنِّب إلا الجماعه ديل مالُم واقفين كَدِي..إن شاالله خير...المو....

ـ الموضوع بسيط جداً يا حتومي (جنابو ينتحي بحاتم كُرباج جانباً..الحوار الداير بينهما وسوسه لم يصل
مضمونها للواقفين) حتومي يتجه نحو أحمد أخو سميره قائلاً:

ـ هاااا اللَّخو إتَّ تابعلك حريم مِتِل فحل المُراح وما قادر تحل ليك مشكله هوينه زي دي؟....علي الحرام
أم العيال (الرِضويه)اللَّتا من جيبي دا....هاك يا جنابو دفتر الشيكات أكتب ميَّة جنيه..و....
سميره بانفِعال شديد:
ـ خلّي شيكاتك عندك....أنا ما جيت عشان ورقه ########ه زي دي....أنا جايباني ورقة طلاق..وعايزاها هسسسسي.
ـ آخوانا باركوها علي الحرام تاني فوق راسه خمس.....
سميره بِحِدَّه:
ـ ولا مليون!

ـ الكترابل..(هكذا ترجم مساعد خُلعة المليون).

فايزة ويكيلكس.. المتحفزه كالكوبرا التي توشك أن تلدغ:
ـ هااااا يا هنايْ..... اللا فهم لا رايْ
شوف غناياتك البِتغريهِن شيكاتك
جابو فزع بِقى وجع ...... بِس.

جنابوبانفِعال:
ـ فايزه..قفِّلي بوزِك دا.

فجأة يلج الباب المفتوح شاب يضج حيويه وألق ....يصفق ويصفر ويغني في آن,يبدوإنه يحفظ لحناً جديداً:

يرضيك بُكايْ ونحيبي
ألمي وشقايْ ياحبيبي
لو اشتهيت تعذيبي
برضو المسامح ربي

صلاح فيُّومي.....تخطى العشرين بقليل....شيك...حذاء أبيض,منطلون أبيض,قميص برتقالي..يواصل دراسته
الجامعية في الأهليه..ظهر في ذلك البرنامج الشهير وقد وجد تشجيعاً لا بأس به من الدكتورين(الدكتاتورين)
وثناءً طيباً من الإعلامي المخضرم.. أما مُقدم البرنامج الذي حول نصف القوة الدافعة للتنمية لمغنيين
ومُغنيات فقد اعتبره حصانه الأسود للخطه العشرية القادمة.

صلاح فيُّومي هو من وقف مع شقيقته عندما قاطعتها الأسرة بكاملها, وقد نجح في الضغط على جنابو لتحويل
العقد العرفي إلى شرعي, وقد درج على زيارة شقيقته بانتظام من وراء الأسرة دعماً لمعنوياتها ريثما
يفعل الزمن فعلته وتعود مياهها لمجاري الأسرة. خاصةً وقد أصبحت زوجه شرعيه وإن كان لرجل متزوج..
فالصدمة كانت كبيرة على الأسرة وقد ألزمت والدها سرير المستشفى أسبوعاً.

كانت الأسرة تثق في أن المستقبل لها خاصةً وأنها تتصدر فصلها منذ أن بدأت تمسك بالقلم وحتي وصلت
إلى أشهر وأقوى ثانوية للبنات على مستوى العاصمة.

العروس الباكية والتي وقفت كل تلك الساعات باكية مزعورة إندفعت قفزاً لترتمي على صدر أخيها صارخة:
ـ صلاح أخوووووووي أنا ما اتبهدلتَ.

حاتم كرباج يقذف سفته في الموكيت دون وعي وهو يتجه لباب الشقة قائلاً:
ـ أرح آمساعد.

up .........up

دهشة المشهد أصابت الجميع بالوجوم.... دقائق من الصمت فرضها ذلك الإندفاع الجنوني لتلك الصبيّة التي
ما شاركت خلال ذلك الموقف الدرامي إلا بدموعها, كانت تبدو (كفرخِ طيرٍ أصابهُ وابِل)...إندفعت صارخة فأعطت
الموقف بعداً جديداً.

سميرة لا تقبل أن يأتي من يسرق منها الموقف بتلك الطريقة الدرامية, فالراهِن إن كان من إخراج فايزه وِيكِلكس
فهي بطلتِهِ.... جنابو (راضي) أصابها بطعنة غادرة من الخلف , وهو آخر من تتوقع منه ذلك , وعليها أن لا تترك
حبلها على القارب.

راضي وسميرة عاشا قصة حب صادقة أرادا تتويجها برباط مقدس.... رفضت أم سميرة فقد مات زوجها باكراً وترك لها
أطفالاً صغار (إنكفت) عليهم وقادت قصة كفاح نادرة جنت ثمارها بأن شهدت تخرجهم جميعاً من الجامعات, وقد تم تكريمها
كأم مثالية على مستوى الولاية.... كانت تريد لها أن تعمل خاصةً وإنها قد تخرجت حديثاً من كلية الصيدلة, كما إن
لها رأيها في العريس.....تزوجت سميرة رغم أنوف الجميع!! فقاطعها الجميع!!

فلاش باك.... الموقف يُذكِّر بتلك الشاعرة المرهفة التي تزوجت مع اعتراض أهلها على العريس....فقاطعها الأهل وقُدِّر
أن يفترِقا فخسرت الإثنين....وعاد الطليق ليعيد المياه لمجاريها فرفضت ....وترجمت ذلك في قصيدة غناها ترباس, جاءت
عبارة عن عرضِحال صادق:

صدِّقني ما بقدر اعيد
رحلة غرام بالشوق بدت
رحلة عذاب دابه انتهت
كيف تاني ترجع من جديد

من عمري أهديتك كتير
أخلصت ليك وانت بتغير
الغيره كم أعمت قلوب
مُزدانه كان و الشوق نضير

ـ راضي.... أنا ما عايزه معاك أيِّ مفاهمة....أديني ورقتي هسَّه وِتْلَم على الداير تِتْلَم عليهو.

فايزة ويكِلِكس وهي تنظر (لفيومي أخوان) من زاوية حادة:
ـ شبهينا وِتْلاقينا...... يلاّ برا لمَّه.

ود المكي ابداع يمشي على الأرض
------
ربنا يخليك لينا
نحن في انتظارك الشمار وصل بدري.

طوله شديده يا فيصل
يبدوا أن الصين والسفر الكتير أخدوك مننا
كم سألنا عن أخبارك خاصة طلتك بِقت نادره في المنبر

شوق بحر والله
وعلى أمل أن نلتقي الأسبوع القادم في الحلفاية بإذن الله

لك تقديري

Quote: بدوا أن الصين والسفر الكتير أخدوك مننا كم سألنا عن أخبارك خاصة طلتك بِقت نادره في المنبر شوق بحر والله

نحن اكثرا شوقا لكم
سعادتك أنا موجود في السودان ولم أسافر قريبا ولكنها كثرة المشغوليات
نحن في انتظاركم بشوق متدفق

سعادتك
يومك وردي

تدفق وانهمر فأنت بحر عميق لايضيره شئ بأن يجود ببعض نفائسه

تحريمة

حا تلاقي فيصل في الحلفاية واللا في العمارررررررررررة؟
عموماً لاقيتو في الحلفاية في العمارة في الحالتين انا الضائع
له ولك اجازة سعيدة في الحلفاية النضرة
كم اسعدني شوفتك والعزيزة ناجية بزيارتكم الكريمة بالامس ( حلاة الدنيا عليكم ) وهذا ما جعلني اثق بانك ما ح تجي حايم بي عند العمارة


لك خالص مودتي

لك التقدير أسامة على هذا المرور الأنيق
وأكيد الموضوع يُفترض أن يصل لنهاياته المنطقية, خاصةً وإنني عمِدتُ على تناول
ثلاثة قضايا هي:

1. ظاهرة زواج البنات الصغيرات من (الشياب)الذين يكبرون آبائهن سناً, لكون
الواحد منهم (ذو مال), أو صاحب وظيفة كبيرة.
2. زواج المتزوجين من وراء ظهر (المره الكبيرة) .
3. الزواج رغم أنف الأهل, وربما يحصل إنفصال, ولا تجدي الندامة.

هذه القضايا طرحتها من واقع ولم أبنِها على خيال أو إفتراض , فأنا أعرف نماذِج
من كل حالة, ولا أدري إن كنت موفقاً في الطريقة التي أخرجتها بها أم لا؟؟

كنت سأشرك الآتين لتحليل هذه الظواهر, وإن كانوا من خارج المنبر:

أ. الأستاذه ساندرا عبد الرحمن بركات(ماجستير علم نفس).
ب. الدكتور عادل المساعده (علم إجتماع) وهو متابع.

وبالتأكيد آراء المتابعين. وأوأكِّد إن عمارة (وضح النهار) هي حديث المدينة!!


ولكن؟

بإذن الله وتوفيقه سأغادر اليوم لأداء العُمره ومن هناك إلى الوطن.


عندما أستلم الحجر الأسعد بإذن الله سأدعو فيما أدعو لكل من ينتمي
لهذا المنبر ( بالصحة والعافية والسِتر, وأسأله عزَّ وجل أن يرزق الجميع
نقاءً وصلاحاً فيما يعلنون وما يسرّون,وأسأله أن يغسل القلوب من الغِل والبغض,
وأن تسود المحبة بين الجميع).


وحتى نلتقي بإذن الله

Quote: حا تلاقي فيصل في الحلفاية واللا في العمارررررررررررة؟ عموماً لاقيتو في الحلفاية في العمارة في الحالتين انا الضائع -------

المهم نتلاقى ولو في الرملة الدقاقة يافردة
الاخ أسامه متى حضورك؟
أتمنى أن يكون قريبا. وأتمنى الا يكون مثل حضورك الأخير
حيث سرقك سباق الخيل منناالى أن تمنى الواحد مننا أن يكون حصانا.

Quote: بإذن الله وتوفيقه سأغادر اليوم لأداء العُمره ومن هناك إلى الوطن.

ربنا يوصلكم بالسلامة ويحفظكم من كل شر
تحياتي للاسرة الكريمة

الحبيب فيصل
وصاحب السعادة

اكان اتلاقيتو في الرملة الدقاق مافي مشكلة
نحنا خايفين من الخشنة والخرصانة (حيث العمارة)

والله يا فيصل لما شفت ردك مت من الضحك
وعادت بي الذاكرة الى زمان بعيد نضحك ونلهو بلا حدود
والله يا حليلك ويا حليل اي حاجة
زمن اللحمة بي المتر وجوز الحمام 3 فرد
وعمك سليمان بتاع الفول لما فتحي يقول ليهو كتر الفول لانو معانا 10 ضيفان

المشكلة ما في سبق الحصين وبس ، اهلك ديل هناك بحتفوا بالواحد احتفاء امبراطوري
ادرك حجم مشغولياتك ولكن هذه المرة ما بنخليك ولك نصيب الحصان (اقصد الاسد)
سعدت كثيراً بهذه اللحظات

سعادتو

اشاطرك هذه المأساة ، ما يحدث في السودان كلها اشياء دخيلة علينا ، الله يجازي اللكان السبب
تمنياتي لك بسلامة الوصول ، وعليك الله ما تمشي تعملها لينا ملكال وتخلينا معلقين بيجاي
وطبعاً المرة دي يمكن يطالبوك بي تاشيرة

متابعين الى ان نلتقي بخير

Quote: عندما أستلم الحجر الأسعد بإذن الله سأدعو فيما أدعو لكل من ينتمي لهذا المنبر ( بالصحة والعافية والسِتر, وأسأله عزَّ وجل أن يرزق الجميع نقاءً وصلاحاً فيما يعلنون وما يسرّون,وأسأله أن يغسل القلوب من الغِل والبغض, وأن تسود المحبة بين الجميع).

تقبل الله منك وبارك فيك أخ محمـد.

Quote: طبعاً سأغادر لأرض ال633 ألف ميل ميل مربع بعد يومين تلاته, وداير لي زول أأجِر ليه البوست دا بدون خلو رِجل.(يعني لحدِ ما تبقى مسافر).

ما عندك أى مانع . أنا مستعد أأجرو منك
وأعاهدك أن يكون فى الحفظ والصون
فبوست مثل هذا لا يمكن أن التفريط فيه بسهوله

بعدين ود أخوك أولى ليك من الغربا


متابعين بمتعه وشغف

تحياتى للجميع بأرض الوطن

Quote: وعمك سليمان بتاع الفول لما فتحي يقول ليهو كتر الفول لانو معانا 10 ضيفان

الحبيب أسامه
والله أنا خائف أخونا فتحي يكون كان بيملح عمنا سليمان في قريشاتو