Post: #1
Title: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-12-2007, 07:24 PM
Parent: #0
لدي هذه الأيام مشكلة غريبة جدا لم اسمع من قبل بأحد واجه ذات المشكلة ,أرجو أن تكون لديك ذات المشكلة ولكن لم تتاح لك الفرصة لتصرح بها,وأرجو أن تغتنم هذه الفرصة لتفضفض قليلا لان مثل هذا التصريح منك سيريحني جدا!!!
تسألني وكيف سيريحني ويفرحني حالة كونك تواجه مشكلة؟.
أقول لك نعم.. سأشعر بغبطة عظيمة إذا اتضح لي إن انك تواجه ذات المشكلة,وسيسعدني أكثر إذا علمت انك تعاني من هذه المشكلة عشرة أضعاف معاناتي منها , ربما تكون متفلسفا وقرأت بعض النتف عن علم النفس وتقول إنني مصاب بالسادية وأمراض نفسية أخرى وإلا فكيف أفرح لمصائب الآخرين؟.
أقول لك: أنت أيضا مصاب بذات الأمراض, وإلا فقل لي بربك لماذا دخلت إلى هذا البوست وأنت تعلم سلفا إنني لا اكتب إلا عن إسقاطاتي النفسية والمشاكل التي تواجهني؟؟ الإجابة بالطبع سهلة جدا وهو انك توقعت إنني سأتحدث عن احد الأمور السيئة التي تعاني منها منذ زمن طويل والتي لم تصرح بها لأحد من الناس ,وتوقعت أن يكون لدي ذات الشيء فتخرج من هنا وقد ضمنت أن احد ما يشاركك بعض البلاوي التي تحملها على عاتقك.دعنا من هذا الحديث الغير مجدي ولندلف إلى المشكلة.
مشكلتي هذه الأيام هي الخلط الكبير بين الواقع والأحلام ,وبين ما يحدث وما أسمعه وأراه وأنا في حالة الصحيان, وبين ما أراه فيما يرى النائم,وقد سببت لي هذه المشكلة حرجا بالغا ,فقبل أيام حلمت إن مشاجرة عظيمة قد وقعت بيني وبين خطيبتي (رباب) وتبادلنا فيها عبارات مؤلمة و قالت لي فيما قالت إن ارتباطها بي كان أكبر مقلب تعرضت له في حياتها !!وإنها نادمة على ذلك أشد الندم, وفي صباح اليوم التالي استيقظت وأنا بحال عظيمة من الهم والاستياء,واستمرت هذه الحالة حتى الساعة العاشرة صباحا حينما وصلتني رسالة رقيقة منها عبر الجوال خلاصتها (أنها تتمنى لي يوما سعيدا وإنها.... تشتاق إلى) الله !!!..البت دي جنت والا شنو؟ طيب ما قلتي أنا اكبر مقلب!! وفورا اتصلت عليها وقلت لها إن أسلوب الفجلة والعصا هذا لا ينفع معي ,فتارة تسيئين إلي وبعد قليل تزعمين انك تشتاقين إلي!! فبهتت المسكينة وحاصرتني بسيل من الأسئلة كيف؟وأين ومتي؟ أسأت اليك؟ ..وهنا فقط تذكرت إن تلك المشاجرة كانت في الحلم وليس في الواقع!!
وقبل أسبوع حلمت إن مديري اتصل بي هاتفيا وطلب مني أن اكتب خطابا لأحد عملائنا أطالبه بأمور معينة..وفي الصباح شخصت للمكتب وكان أول ما قمت به هو تدبيج ذلك الخطاب وعرضه على المدير للتوقيع, إستغرب الرجل مضمون الخطاب وسألني من الذي طلب منك إعداده؟ وبعد ربكة وكبكبة قليلة عاد الوعي فاعتذرت من الرجل ومزقت الخطاب بالطبع لست على درجة من الغباء بحيث اخبره إنني ألخبط بين الأحلام وبين الواقع وإلا لطردتني شر طردة ..هذه نماذج فقط عن هذا الخلط الغريب المزعج !! وتفاديا لما قد يحدث من مشاكل فقد أصبحت لا أنام إلا وقد وضعت ورقة وقلم إلى جانبي ليكون أول ما افعله عندما استيقظ هو أن اكتب كل الأشياء التي حلمت بها حتى لا يحدث تداخل في الاختصاص .
غير إن هذا الخلط جعلني أفكر انه من الممكن جدا إن حياتي هذه كلها عبارة عن حلم سخيف!! ومن الجائز إنني بعد لا أزال طفل صغير راح في غفوة تداعي فيها هذا الحلم؟ وربما أيضا إنني عجوز أشمط راح في غفوة ظهيرة فدخل في دوامة هذا الحلم؟ وربما إنني معزاة أو ناقة أو أي شيء آخر راح في حلم طويل.ربما!!
|
Post: #2
Title: Re: هل واجه أحدكم أبداً هذه المشكلة الغريبة جدا؟؟؟؟
Author: حيدر حسن ميرغني
Date: 03-12-2007, 07:40 PM
Parent: #1
عزيزي معاذ
غطتك العناية الالهية من كل شر
ربما يكون ذلك من افاعيل العقل الباطن الذي سكنته عناوين بوستات المنبر الملتهبة
...........
والله الواحد خايف يوم تجيهو جزمة طايرة من شاشة الكومبيوتر
|
Post: #3
Title: Re: هل واجه أحدكم أبداً هذه المشكلة الغريبة جدا؟؟؟؟
Author: nazar hussien
Date: 03-12-2007, 07:52 PM
Parent: #2
يا معاذ...هسي الكاتبو هنا دا وعايز رأينا فيه...نصنفو ليك كيف حلم والله حقيقة؟
كدي انت فكر فيه شوية وورينا كتبتو بعد ما صحيت والله اثناء النوم؟
وبعدين...مش تقول رجال في زقاق ضيق بدل الوزز دي
|
Post: #6
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-12-2007, 08:19 PM
Parent: #3
العزيز نزار..سلامي
| Quote: كدي انت فكر فيه شوية وورينا كتبتو بعد ما صحيت والله اثناء النوم؟ |
والله يا نزار الشغلة بقت جايطة شديد
وتعرف بعد ما جاني القولون العصبي دا بقيت انوم متاخر واحلم كتير ومن هنا بدت اللخبطة.
وهسي الواحد ما عارف نايم والا صاحي!!
ممكن تسالني تقول لي كيف زول نايم يمشي ويتحرك ويتكلم ويطلع وينزل؟
زمان حبويتي الله يرحمها لما كانت صغيره كان عندها حمار النوم
حسب الحكايات الوصلتنا قالوا كانت تقوم نص الليل وهي نايمة تشد الحمار (الحمار الاخدر ما حمار النوم) وتسوق الحمارين (الاخدر وحمار النوم) وتمشي الجروف تحش اللوبيا وترجع .
ومرات تصحي في الطريق ومرات لحدي ما ترجع تكون نايمة.
البعيد شنو ممكن الناس دي كلها نايمة وحلمانة ساكت!!
ممكن لا في انقاذ ولا في امريكا ولا اسرائيل.
|
Post: #4
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-12-2007, 08:06 PM
Parent: #2
| Quote: والله الواحد خايف يوم تجيهو جزمة طايرة من شاشة الكومبيوتر |
حاشاك يا ابو حسن
بعدين الوداك لبوستات المشاكل شنو؟
والله الزمن دا لو واحد مسكني من الكرافته دي اخليها ليهو.
|
Post: #5
Title: Re: هل واجه أحدكم أبداً هذه المشكلة الغريبة جدا؟؟؟؟
Author: محمد أبوالعزائم أبوالريش
Date: 03-12-2007, 08:17 PM
Parent: #1
هسة يعني أنا لو عندي مشكلة زي حقتك دي .... أقوم أقولها ليك بس عشان ترتاح؟
طيب نكايةً فيك ما حأقولها ليك عشان ما أريحك .... سادية .. مش كدة؟
|
Post: #11
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-13-2007, 01:39 AM
Parent: #5
| Quote: هسة يعني أنا لو عندي مشكلة زي حقتك دي .... أقوم أقولها ليك بس عشان ترتاح؟ |
كدا يا ابو الريش!!
وأنا مفتكرك صاحبي
طيب شوف تاني كان فتيت ليك نفسي
أنا عارفك بتجيني عشان تشوف حاجاتي السيئة عشان تحس انك كويس!!
|
Post: #7
Title: Re: هل واجه أحدكم أبداً هذه المشكلة الغريبة جدا؟؟؟؟
Author: فدوى الشريف
Date: 03-12-2007, 08:41 PM
Parent: #1
| Quote: والله الواحد خايف يوم تجيهو جزمة طايرة من شاشة الكومبيوتر |
هههههههههههههه
لكن برضوا انا بيجيني نفس الاحساس
بكون خايفه من حاجات زي دي
غايتو بث ربنا يثبت عقلنا
لك التحيه معاذ حسن
|
Post: #13
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-13-2007, 02:39 AM
Parent: #7
Quote: لكن برضوا انا بيجيني نفس الاحساس
بكون خايفه من حاجات زي دي
غايتو بث ربنا يثبت عقلنا |
أختنا فدوي..سلام
طيب بمناسبة الاحاسيس القاعدين تتبادلوا فيها انت واخونا حيدر
تقول البوست بتاعي دا قاعة الصداقة.
ما حصل جاك احساس بمشكلتي دي.
شاكرين مرورك ..
|
Post: #8
Title: Re: هل واجه أحدكم أبداً هذه المشكلة الغريبة جدا؟؟؟؟
Author: celecon
Date: 03-12-2007, 09:10 PM
Parent: #1
معاذ حسن ....
تحياتى ...
يازول ما كنت ماشى كويس وعيشتنا فى مشاكلك
المليانة طرفة ،،، لكنك شترتها بى دى :
Quote: اعكف هذه الايام على تاليف كتاب بعنوان (رجال في طيز وزه) ..
ألتمس رأيكم حول هذا العنوان هل سيؤدى الى فصلي من المنبر؟ |
ماتقولى كتبتها وانت نايم ... !!!
___________
أصحى يا نايم ... !!!
|
Post: #9
Title: Re: هل واجه أحدكم أبداً هذه المشكلة الغريبة جدا؟؟؟؟
Author: حيدر حسن ميرغني
Date: 03-12-2007, 10:19 PM
Parent: #8
| Quote: بعدين الوداك لبوستات المشاكل شنو؟ |
معاذ
والله ما بدخلها
لكن عناوينا دي نزوق منها كيف
|
Post: #10
Title: Re: هل واجه أحدكم أبداً هذه المشكلة الغريبة جدا؟؟؟؟
Author: احمد العمار
Date: 03-13-2007, 01:33 AM
Parent: #9
ٍ
يا معاذ ياخى الحالة العندك دى ملاريا طعلت فى الرأس
عموما امشى افحص عشان تتأكد وخذ العلاج وحتبقى كويس
ٍان شاء الله
أحمد العمار
|
Post: #15
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-13-2007, 05:02 AM
Parent: #10
| Quote: دى ملاريا طعلت فى الرأس |
ابو حميد.. سلام
يا احمد انت ما قاعد في الرياض دي؟
يا اخي الملاريا دي هنا من الامراض التاريخية زي الجدري.
عقبالنا في السودان.
|
Post: #14
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-13-2007, 04:58 AM
Parent: #8
Quote: يازول ما كنت ماشى كويس وعيشتنا فى مشاكلك
المليانة طرفة ،،، لكنك شترتها بى دى : |
celecon
سلام..
تعرف العنوان مسيطر علي شديد وما قادر اغيرو
وحاسي انو فعلا بعبر عن حال هؤلاء الرجال.
عموما سانشر الموضوع هنا خلال ايام والحاصل يحصل ..
خليك قريب وما تحرمنا من الطلة.
|
Post: #12
Title: Re: هل واجه أحدكم أبداً هذه المشكلة الغريبة جدا؟؟؟؟
Author: ناذر محمد الخليفة
Date: 03-13-2007, 01:41 AM
Parent: #1
!!!!!
| Quote: هل واجه أحدكم أبداً هذه المشكلة الغريبة جدا؟؟؟؟ |
طبعاً لا !!
شنكل :
إنت بتشرب شنو قبل ماتنوم ?! 
|
Post: #16
Title: Re: هل واجه أحدكم أبداً هذه المشكلة الغريبة جدا؟؟؟؟
Author: الشفيع عوض شوشتا
Date: 03-13-2007, 05:05 AM
Parent: #12
بس يا وهم اوع من سيرة آل .... ؟
حالتك متاخرة
سافر .!!
|
Post: #17
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-13-2007, 05:06 AM
Parent: #12
Quote: شنكل :
إنت بتشرب شنو قبل ماتنوم ?! |
بشرب مقلب
زي المقلب بتاع يوم الخميس الفات
غايتو اليوم داك شكلك كنت شارب بيرة ام جمل
قالوا بقت عندكم عااادي
بتاع البقالة يقول ليك عندنا (بيبسي,سفن ميرندا, بيرة ام جمل..)
|
Post: #18
Title: Re: هل واجه أحدكم أبداً هذه المشكلة الغريبة جدا؟؟؟؟
Author: Adrob wad Elkhatib
Date: 03-13-2007, 00:32 AM
Parent: #17
اهلنا بقولوا الجن بداوه كعبه الاندراوه
الاندراوه ده اسال منها الكبار فى البورد ما ناس نازر
|
Post: #20
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-13-2007, 08:10 PM
Parent: #18
Quote:
الاندراوه ده اسال منها الكبار فى البورد ما ناس نازر |
Adrob wad Elkhatib
سلام..أشكر مرورك الجميل
كدي نستفيد معلومة في الدنيا دي
الاندراوة دي من الله خلقنا نسمع بيها
ولحدي الان ما عارفين معناتا شنو.
حدي كبير يتبرع ويشرحها لينا وليه الاجر والثواب.
|
Post: #19
Title: Re: هل واجه أحدكم أبداً هذه المشكلة الغريبة جدا؟؟؟؟
Author: ناذر محمد الخليفة
Date: 03-13-2007, 06:15 AM
Parent: #1
| Quote: بتاع البقالة يقول ليك عندنا (بيبسي,سفن ميرندا, بيرة ام جمل..) |
|
Post: #21
Title: Re: هل واجه أحدكم أبداً هذه المشكلة الغريبة جدا؟؟؟؟
Author: ناذر محمد الخليفة
Date: 03-14-2007, 03:31 PM
Parent: #1
فوق عشان خاطر لويل كودو !!
|
Post: #22
Title: Re: هل واجه أحدكم أبداً هذه المشكلة الغريبة جدا؟؟؟؟
Author: معاذ حسن
Date: 03-14-2007, 05:56 PM
Parent: #21
| Quote: فوق عشان خاطر لويل كودو !! |
|
|