حامد (الوهم)!! نموذج للسودانيين في السعودية!!

Post: #1
Title: حامد (الوهم)!! نموذج للسودانيين في السعودية!!
Author: معاذ حسن
Date: 12-03-2006, 02:51 PM
Parent: #0

معانا إتصال..
ألو منومعاي..
- ألو ..التلفزيون ..معاك حامد من السعودية .
مرحب بيك يا أخ حامد.
- ازيك يا غادة.. والله بشيد بالبرنامج وبهني الوالدة بغرية (اللعيت) وبهني الأخ عثمان وكل الأهل وبقول ليهم والله مشتاقين ليكم شديد...وبشكركم على البرنامج الجميل.
إذا تصادف وكنت تشاهد برنامجا مباشرا على الفضائية السودانية وكنت شاهدا على مثل هذا الحوار فابتعد حرصا على أعصابك.
لا تتوقع من شخص يتصل من السعودية أي مفيد ولعل اصدق كلمة استطيع أن أطلقها على السودانيين المقيمين في السعودية أنهم أناس (وهم) وكلمة وهم هذه في الأصل تطلق على العساكر في السودان الذين هم أيضا (وهم) بنسبة 95% منهم, ولا استطيع تحديد تعريف دقيق لمعنى الكلمة ولكنها على أي حال نقيض للزول (الراستا ).
معظم السودانيين المقيمين في السعودية كانوا في الأصل (وهم) قبل أن يهاجروا للسعودية وبعد الهجرة ازدادوا (وهما) على (وهمهم) الأصلي.
وقليل منهم كان في الأصل (راستا) إلا انه أصبح وهم بعد أن اختلط بالأعراب (الوهم) وبالسودانيين (الوهم) المقيمين هنا.
وصفة الوهم ليست قاصرة على البسطاء منهم بل تنطبق على جميع المستويات فيوجد هنا مهندسين (وهم) ومحامين (وهم) وعمال مطاعم (وهم) وسواقين (وهم) باختصار جالية كبيرة من العالم (الوهم).
يبدأ المرء من هؤلاء اكتساب صفة الوهم منذ استخراج التأشيرة فالمهنة المدونة على جواز الواحد منهم هي البداية فمثلا صديقي نادر وهو حنكوش سابق من حناكيش الأهلية لديه ماجستير في إدارة الأعمال استقدمه كفيله بمهنة (حداد) ولم يكتفي بذلك بل جعله (حداد مسلح) !!وآخر تخصصه علم المختبرات الطبية قدم بمهنة (عامل تربية نحل) وهذه بداية الطريق نحو الوهم ..يلي ذلك الوقوف في الصفوف الطويلة لإنهاء إجراءات التاشيرة,ولدى وصول الواحد من هؤلاء فأول ما يفعل هو أن يتخلص من لهجته السودانية فخلافا لكل الشعوب العربية المهاجرة يبدأ السوداني مباشرة في استخدام عبارات مثل (أبغى..والخبز..والسيارة..وهلا والله وغيرها من العبارات الوهم.
ثاني شيء هو تغيير شكله للتماهي مع أهل البلد فيعمد الواحد منهم حتى وان كان شيوعيا سابقا يبدأ في عمل لحية دائرية صغيرة يحرص أن تكون شبيهة بلحي الشعب السعودي وملوكه.ونسبة لعدم وجود ثقافة سودانية موحدة للحية فدائما ما يتشبه سودانيو الخارج في إشكال لحاهم بأهل البلاد التي ينزحون إليها فسودانيو سلطنة عمان يعمدون إلى عمل لحية دائرية طويلة على شاكلة لحية السلطان قابوس, أما سودانيو مصر فيتميزون بحلق الشوارب ملط على الطريقة المصرية في حين يميل سودانيو ليبيا إلى الخنفس مع ملط الشوارب أما أحب الأشياء لسودانيو العراق فهي عمل الشوارب الكثيفة الغبية على الطريقة العراقية.
نعود لموضوع الوهم فهؤلاء الناس وهم في تفكيرهم فلا يتردد الواحد منهم في الحكم على مليون إنسان ينتمون لفئة معينة كفئة الطالبات مثلا أو المحامين أو غيرهم لا يتردد هذا الإنسان الوهم في الحكم على كل هذه الفئة من خلال تجربة شخصية أو قصة سمعها!!
وهم أيضا وهم في مواقفهم فمثلا إذا دار حديث حول فساد الحكام حكي لك الواحد منهم عشرات القصص حول فساد أهل الحكم وحتمية زوالهم ...وإذا قابلت هذا الوهم بعد يومين ودار حديث حول التطور والتقدم الذي يشهده السودان فلن يتردد في الإشادة بالانجازات العظيمة للنظام الذي كان يسبه قبل يومين!! فإذا ما تطرقتما إلى موضوع الفساد فلن يتردد أيضا في أن يقول لك إن كل ما يشاع عن الفساد ما هو إلا دعاية من المغرضين الحاقدين!!
وهم (وهم) في خضوعهم وقبولهم للأمر الواقع لمجرد انه أمر واقع ,ووهم في أحلامهم وهواياتهم التي يأتي على قائمتها لعب الكوتشينة والنوم والمطالعة !! اقصد المطالعة فلا يذهب بك الخيال إلى كلمة أخرى !!
بقي أن أقول إنني أيضا وهم لأنني مقيم في السعودية ووهم أيضا لأنني استخدم التعميم في الحكم على كل السودانيين (الوهم).

Post: #2
Title: Re: حامد (الوهم)!! نموذج للسودانيين في السعودية!!
Author: Salah Waspa
Date: 12-03-2006, 05:10 PM
Parent: #1

معاذ كيف الحال

والله يامعاذ رأس السوط لحقني بإعتباري عشت زمان في السعودية عشرين قبل مانتغرب الغربة الخواجاتي , سنيت سنيناتي وشمرت بتشديد الميم عشان اتعنتر قلت ده واحد بكابس ورفضوا العمرة والله اشترى فيزا مطرشقة وداير يتفشى من الداخل وما أن انتهيت من قراءة بوستيك المحمبك ده حتى أدركت أنك دفعة وبل وربما ممن بسكوهم في الكشات بتاعة الإقامة .

قد أتفق في معك في بعض ما ذهبت اليه ولا يكون كل ماذكرت لتقييم الكل من أحبتنا في أرض الحرمين وخصوصا مدينتي الحبيبة الرياض , ما يجينا واحد ناطي ويقول ده ماعنده وطنية وإنتماء وحاجات من دي فحبي لهذه المدينة نابع من طول مدة بقاءنا فيها وصداقات حميمة نعتز بها وصدقني يامعاذ فيها رجالة يسدو عين الشمس ولعلك واحدا منهم .

لك حبي وتقديري

Post: #5
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 02:14 AM
Parent: #2

Quote: والله يامعاذ رأس السوط لحقني بإعتباري عشت زمان في السعودية عشرين قبل مانتغرب الغربة الخواجاتي

الاخ الوهم سابقا والراستا حاليا
صلاح
سلام..حمدا لله على السلامة..
اخوك الوهم لحدى الان.

Post: #3
Title: Re: حامد (الوهم)!! نموذج للسودانيين في السعودية!!
Author: النصرى أمين
Date: 12-03-2006, 06:03 PM
Parent: #1

الاخ معاذ
سلام ايها الرجل الجميل

تاخذ كلمه وهم ابعاد جديده عندما نضيف البها كلمة "ساى" فى النهايه

مثلا
زول وهم او ناس وهم او عالم وهم
تختلف عن
زول وهم ساى ...او ناس وهم ساى... او عالم وهم ساى (وبعضنا ينطقها ساكت)
هذه ال "ساى" او ال "ساكت" اختراع سودانى خالص نتجت لاحتياجنا
لكلمات جديده معبره

شكرا على المقال الظريف

Post: #6
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 02:18 AM
Parent: #3

Quote: زول وهم ساى ...او ناس وهم ساى... او عالم وهم ساى (وبعضنا ينطقها ساكت)
هذه ال "ساى" او ال "ساكت" اختراع سودانى خالص نتجت لاحتياجنا
لكلمات جديده معبره

الاخ النصري
سلام..والله كتير جدا قاعد افكر في كلمة ساس او ساكت دي
ويا ريت تعمل لينا بحث عن الكلمة دي اصلها شنو وفصلها شنو..يا ايخ دي تستحق رسالة ماجستير عديل كدا..
وباعتباري ساعي للاتعتاق من حالة الوهم فكنت تابعت بوست الهجرة لكندا
لكن يبدو انني ساظل وهم الى يوم الدين.

Post: #4
Title: Re: حامد (الوهم)!! نموذج للسودانيين في السعودية!!
Author: عبد المنعم سليمان
Date: 12-03-2006, 07:06 PM
Parent: #1

B]معاذ

تحياتي ..

B]
Quote: وآخر تخصصه علم المختبرات الطبية قدم بمهنة (عامل تربية نحل)

يمكن الوهم عايز يقترن بملكة نحل وهمية يا وهم !!

تحياتي

منعم

Post: #7
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 02:21 AM
Parent: #4

Quote: يمكن الوهم عايز يقترن بملكة نحل وهمية يا وهم !!

الاخ منعم تحياتي..يا اخوي ما تفرح شديد
ترتيب السودانيين الوهم كما يلي:
العساكر
ناس السعودية
ناس ليبيا
يليهم مباشرة ناس قطر.
يا وهم..

Post: #8
Title: Re: حامد (الوهم)!! نموذج للسودانيين في السعودية!!
Author: خالد عبد الله محمود
Date: 12-04-2006, 02:28 AM
Parent: #4

الأخ معاذ

أتفق معك في معظم ما ذهبت إليه و خصوصاً الناس البتصلو بالتلفزيون و سلم لي على فلان و على علان ياخ العالم فيهو ثورة إتصالات ما يتصل بيهم مباشرة أصلا ما فضل سوداني ما عندوا موبايل ( ما عايز أقول جوال عشان ما تقول لي أخدت اللهجة و كدة )

أخوك / خالد عبد الله
وهم حالياً و إن شاء الله راستا في حدود شهر 3 بالكتير

Post: #9
Title: Re: حامد (الوهم)!! نموذج للسودانيين في السعودية!!
Author: Mohammed Ahmed Saeed
Date: 12-04-2006, 02:55 AM
Parent: #8

الاخ معاذ
تحية وتقدير

لك ان تحكم على السودانيين بالسعودية بما تشاء وانت حر فى اصدار الاراء

ولن اقول لك اكثر من ان بالسعودية كافل اليتيم والارامل وامثلة يحتذى بهافى الجد والمثابرة والتطور المستمر فى الاصرار على الحصول على اعلى الدرجات العلمية والحصول على الزمالات المهنية رغم هجير الغربة المر

وعموما عزيزى حفظت شيئا وغابت عنك أشياء

Post: #11
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 03:57 AM
Parent: #9

Quote: ولن اقول لك اكثر من ان بالسعودية كافل اليتيم والارامل وامثلة يحتذى بهافى الجد والمثابرة والتطور المستمر فى الاصرار على الحصول على اعلى الدرجات العلمية والحصول على الزمالات المهنية رغم هجير الغربة المر

الأخ الفاضل محمد أحمد سعيد
تحياتي وتقديري
واسمح لي ببعض التوضيح عبارة (وهم) حسبما قصدت الذهاب إليه لا تجرد صاحبها من الفضائل الإنسانية ولا تعنى انه منغمس في الرذائل.
يعني الوهم ممكن جدا يكون إنسان كافل لليتيم ومتعلم ومجتهد وبعيد عن الرذائل.
لكن برضو يظل وهم في تفكيره واهتماماته وعاداته .
وآسف مرة أخرى ..لا اقصد أن اجرح احد ..
وتقبل ودي
أخوك الوهم معاذ حسن.

Post: #12
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 03:58 AM
Parent: #9

أخي خالد عبد الله محمود
سلام..وحمدا لله على سلامة العودة..
مبروك عليك الانعتاق من الوهم..
بس ادينا طرف خيط..وليك الاجر والثواب.

Post: #10
Title: Re: حامد (الوهم)!! نموذج للسودانيين في السعودية!!
Author: ابو جهينة
Date: 12-04-2006, 02:57 AM
Parent: #8

أخي معاذ

تحياتي

أوافقك جداً في هذه الجزئية :

Quote: نعود لموضوع الوهم فهؤلاء الناس وهم في تفكيرهم فلا يتردد الواحد منهم في الحكم على مليون إنسان ينتمون لفئة معينة كفئة الطالبات مثلا أو المحامين أو غيرهم لا يتردد هذا الإنسان الوهم في الحكم على كل هذه الفئة من خلال تجربة شخصية أو قصة سمعها!!
وهم أيضا وهم في مواقفهم فمثلا إذا دار حديث حول فساد الحكام حكي لك الواحد منهم عشرات القصص حول فساد أهل الحكم وحتمية زوالهم ...وإذا قابلت هذا الوهم بعد يومين ودار حديث حول التطور والتقدم الذي يشهده السودان فلن يتردد في الإشادة بالانجازات العظيمة للنظام الذي كان يسبه قبل يومين!! فإذا ما تطرقتما إلى موضوع الفساد فلن يتردد أيضا في أن يقول لك إن كل ما يشاع عن الفساد ما هو إلا دعاية من المغرضين الحاقدين!!

هل حقاً صرنا (وهم) ..
أم متوهمين ؟
أم دايشين ؟
أم منومين بمغناطيس اللمبالاة ؟
أم أن الغربة خلقتْ نوع من إنفصام الشخصية جعلتنا نقترب من (الوهم) ؟
هل هذه الحالة التي إقتبستها من موضوعك هو تلخيص لتخبط نفوس المغتربين بين (الذي كان مأمولاً من الغربة ) و بين ( الحقيقة المرة التي يعيشها ؟ )

كان الله في عوننا جميعاً

دمتم

Post: #13
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 04:01 AM
Parent: #10

Quote: أم أن الغربة خلقتْ نوع من إنفصام الشخصية جعلتنا نقترب من (الوهم) ؟

أبا جهينة
سلام أيها الرجل النبيل (الوهم)
في تقديري بعبارتك الموجزة أعلاه محل اقتباسي لخصت كل الكلام.
الله يكون في العون.

Post: #14
Title: Re: حامد (الوهم)!! نموذج للسودانيين في السعودية!!
Author: ابو عثمان
Date: 12-04-2006, 04:15 AM
Parent: #1

الأخ الوهم معاذ

شكرا علي هذا النثر الجميل المضحك المبكي- رغم سخرية ما كتبت الا انه يمس جوانب كثيرة من الحقيقة
انا شخصيا" وهم منذ عشر سنوات - كيف لا نصير وهم ونحن نعيش تحت هذا الضغط النفسي الرهيب حتي صارت دعواتنا ان يعيدنا الله الي اهلنا سالمين عقل علي اقل تقدير
وبعدين عارف الوهم الاكبر لما الواحد يمشي اجازه السودان وتلقاهو قاعد وسط الناس وهو سارح لا عارف يتونس ولا عارف يضحك ولا عارف يجاري الناس في اي شئ !!!!

مع تحيات اخوك الوهم

Post: #15
Title: Re: حامد (الوهم)!! نموذج للسودانيين في السعودية!!
Author: يازولyazoalيازول
Date: 12-04-2006, 04:28 AM
Parent: #14

أنا وأنت على إتفاق مئة فى المئة

وكل ما تعيش كتير فى السعودية تزداد وهماً وتوهما

شكرا

Post: #28
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 06:37 AM
Parent: #15

أستاذي هشام يا زول
الزول الظريف الجميل

مرورك شرف لي ..تسلم يا غالي

Post: #20
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 05:24 AM
Parent: #14

Quote: وبعدين عارف الوهم الاكبر لما الواحد يمشي اجازه السودان وتلقاهو قاعد وسط الناس وهو سارح لا عارف يتونس ولا عارف يضحك ولا عارف يجاري الناس في اي شئ !!!!

أبو عثمان
سلام
والله هبشت حتة بنت كلب
وهي تذبذب الحالة النفسية لمغتربي السعودية..والحيرة التي تصبيهم وتصيب اسرهم..
تجد الواحد قبل الاغتراب يعيش حياته في بلده عادية منطلقا.. محبا للحياة ...مختلطا بالناس
وحين يهاجر يجد نفسه محاصرا بقائمة الممنوعات الطويلة فيضطر للتخلي عن ما كانه,,, ويتحول إلى شخص جديد معقد .. متزمت متغلق.
وحين يعود للسودان يبدأ أهله وأصدقائه في البحث عن زولهم القديم..فلا يجدوا له أثرا.
الواحد يرجع معقد انطوائي ..صم ..بكم...
عليك الله زور أخونا رجب على هذا الرابط
رجب !! حُوشِِِْ صاحبك عني!! رجب...!!!

رجب حوش صاحبك عني رجب!!

Post: #16
Title: Re: حامد (الوهم)!! نموذج للسودانيين في السعودية!!
Author: ملكة سبأ
Date: 12-04-2006, 04:38 AM
Parent: #1

Quote: أبغى..والخبز..والسيارة..وهلا والله وغيرها من العبارات الوهم

المزعلنى مش لمن نهاجر بس حتى إذا جانا ضيف كثير ما يفرض علينا لغته ومفرداته ..

حدث ان استمعت إلى مذيع سوداني يحاور ضيفه وفي قناة سودانية بلغة الضيف ؟!!

Post: #19
Title: Re: حامد (الوهم)!! نموذج للسودانيين في السعودية!!
Author: abuguta
Date: 12-04-2006, 05:18 AM
Parent: #16

معاذ
يامحرك الهزاز
ومولع البوتجاز
فى نفسه والانقاذ

دا زول بتكلم
دا زول ساكت

نجمع الجملتين...دا زول بتكلم ساكت ..اذا كان الكلام من فضة فالسكوت من ذهب..الحكمة
يعنى الزول البتكلم خارم بارم..كلامه مو ذو فائدة..يعنى بعتبره زى الساكت
عشان كدا جاءت الكلمة مستخدمة لكل شىء ليس قيه فائدة..يقال له ساكت..كلام ساكت..وزول ساكت...واحيانا يقولون دا زول ساهى فى الكلام يعنى ما بجمع..فحذفت الهاء لكثرة الكلام..
فصار ساى...كلام ساى ..غربة ساى..هوم ساى..زى كلامك دا وهم لكن وهم ساى...امس دخلت اشيل لى عشاء من مطعم سودانى..كثير الزيائن ...شاب يجلس وسط شلة...فرن هاتفه..فرد اهلا يادكتور فلان ..فالتفت كل الحضور واوقفو الاكل..يعنى لو قال اهلا يادكتور كان بكون الزهم اقل
لكن كبر الوهمة..لان ذاك الدكتور موجود فى السودان واكبر وهم..زول مشهور وعامل عنده شعور
والناس التانين فيهم قنبور..بظهر فى الفاضئيات وملحن لهناى وهنائيات..وهم..وهم ..وهم
ابقوتة
واهم سعودى...

Post: #31
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 06:41 AM
Parent: #19

Quote:
عشان كدا جاءت الكلمة مستخدمة لكل شىء ليس قيه فائدة..يقال له ساكت..كلام ساكت..وزول ساكت...واحيانا يقولون دا زول ساهى فى الكلام يعنى ما بجمع..فحذفت الهاء لكثرة الكلام..
فصار ساى...كلام ساى ..غربة ساى..هوم ساى..زى كلامك دا وهم لكن وهم ساى

ابو قوتة
سلام يا صديقي المش وهم
لكن سكات وساي دي ما طلعت عينا ..تشريح
عليك الله بالمرة شرح لينا عبارة (هناي ) لغويا واصطلاحا..وتكون خدمة العمر.
باي يا وهم

Post: #29
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 06:39 AM
Parent: #16

Quote: المزعلنى مش لمن نهاجر بس حتى إذا جانا ضيف كثير ما يفرض علينا لغته ومفرداته ..

حدث ان استمعت إلى مذيع سوداني يحاور ضيفه وفي قناة سودانية بلغة الضيف ؟!!

ملكة سبأ المتوجه
سلام
المشكلة في تقديري مش في استخدام المذيع لغة الضيف ولكن في استجداء المديح من الأجانب
والله حاجة تفقع المرارة ...المذيع السوداني ما يصدق يلم في ضيف أجنبي الا يبدأ يسألوا عن انطباعاتو عن السودان..ويستحثه وستجديه بصورة مخجلة ويستدرجه للحديث عن أخلاق السودانيين وجمال السودان وتطور السودان..
عالم وهم...

Post: #17
Title: Re: حامد (الوهم)!! نموذج للسودانيين في السعودية!!
Author: البحيراوي
Date: 12-04-2006, 04:47 AM
Parent: #1

الوهم معاذ تحياتي

والله موضوعك جميل وأجمل ما فيه هو تناولك للمدخل الذي نسعي له دوماً في التواصل مع السودان عبر برنامج مراسي الشوق أو برامج مشابهه وما يستدعي ذلك من لغة ومحاكاة للنهج الذي يسود في البلاد التي وجدنا فيها .
ولعل هذه فرصة للولوج لمسالك غامضة من عوالم السودانيين المقيمين خارج السودان.

تحياتي

الوهم / بحيراوي

Post: #33
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 06:43 AM
Parent: #17

البحيراوي
سلام
كان في برنامج في الإذاعة قبل سنتين ما عارف لسه شغال وإلا وقف.
فكرة البرنامج ..تتصل الاذاعة على مغترب وتوصلوا مباشرة باسرتو..قال عايزين يخدمو الناس ويوفروا مكالمات مجانية..
وتعال شوف ..على الهواء مباشرة ...

حامد الوهم : ازيك يا عرفة ..والله مشتاق ليكم
عرفة: والله نحن كويسين ..كيف انت ؟.وكيف مع الغربة؟؟
يرد حامد الوهم ..وقد فخم صوته قليلا واصطنع لهجة متعبة :..والله غربة بطالة بس ربنا يرجعنا..أها المصاريف وصلتكم...وهكذا تستمر المكالمة الوهم.
عالم وهم بشكل.

Post: #18
Title: Re: حامد (الوهم)!! نموذج للسودانيين في السعودية!!
Author: عبد اللطيف بكري أحمد
Date: 12-04-2006, 05:08 AM
Parent: #1

الوهم العرضحالجي معاذ،،
ذكرني مقالك هذا قصة الوهم الأمي المشى للعرضحالجي عشان يعبر ليه عن مشكلته،، لما قرأها له في النهاية قعد زولك يبكي قال ليه والله انا ما كنت قايل نفسي مظلوم قدر دا،،

أنت برضك : لما الواحد يبدأ قراءة مقالك الوهم يزعل منك من أول سطر وتتكرضم أسارير وشو ويتمنى يلقاك في نص السطرين الأوائل عشان يخنقك،،
لكن في نهاية المقال، وعشان نأكد نحن وهم بصحيح : نتمى مقابلتك لتهنئتك على هذا السرد الرائع ،، وما يثلج الصدر : أنك معنا ههانا واهماً ،،
لك الوهم كله والإهتمام،،

Post: #22
Title: Re: حامد (الوهم)!! نموذج للسودانيين في السعودية!!
Author: عبده عبدا لحميد جاد الله
Date: 12-04-2006, 05:49 AM
Parent: #18

العزيز معاذ(الوهم)

شكراً لأنك صحيت فينا الوهم حتى لانتوهم باننا ليسوا وهم

اخوك(الوهم جداً)/عبده

Post: #34
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 06:45 AM
Parent: #18

Quote: الوهم العرضحالجي معاذ،،
ذكرني مقالك هذا قصة الوهم الأمي المشى للعرضحالجي عشان يعبر ليه عن مشكلته،، لما قرأها له في النهاية قعد زولك يبكي قال ليه والله انا ما كنت قايل نفسي مظلوم قدر دا،،

الاستاذ المحترم عبد اللطيف بكري أحمد

سلام والله من غير ما تقول عارف نفسي عرضحاجي نمرة واحد..
مرة كتبت استئناف لواحد محكوم عليه.. كلام يقطع القلب ..وفي يوم تقديمه جلست في المكتب أتخيل القاضي يبكي وينخج....بالطبع بسبب قوانين السعودية الوهم لم يتسنى لي حضور الجلسة لأتأكد من ذلك ..ولكن الحكم كان براءة.

Post: #35
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 06:48 AM
Parent: #18

عمر الفاروق
قد لا تعرف إطلاقا إنني ورغم اختلافي (السياسي) معاك إلا إنني أتابع كل ما تكتب ..
عارف ليه

لأننا الاتنين وهم ..

أما الوهم الكبير القلب الـ alt shift واتكلم في خمسة دقائق خمسة لغات فدا اكيد ...اللبناني !!؟؟ وليس أبو شيخ الدين.
لوقت طويل كنت مثل هذا الوهم أتكلم مع السعودي بلهجته ومع المصري بلهجته ومع السوري والهندي بلهجاتهم
رغم انه لا احد منهم يتكلم معي بلهجي..ولو حاول ما عندو غير يقول ليك بهزار ثقيل وسخيفآآآآآآآآآآآآآآآآآآآآآآآآيييييييييي أو يا زول.
مرة قابلت عمك قضى عشرين سنة في السعودية
ولا يتكلم إلا لهجة سودانية صرفة ومع كائن من كان !!
بديت اقلدوا ودرش سوداني وفي السوداني كمان سوداني خليج غرب شندي .ولدهشتي ..بدأ السعودي المدير يستوقفني كل مرة ويعلق على كلمات معينة بأنها كلمات بدوية سعودية قديمة مثل كلمة (يا حليلو ...والطاقه..وغيرها).
طبعا انبسطت شديد لانو دا يعتبر تعضيد لعروبتي المشكوك فيها ...

Post: #21
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-04-2006, 05:30 AM
Parent: #1

الوهم لاقى الوهم قال لي الوهم انت الوهم ..
ااااااااااااااااااااااااي وهم انت وهم انت ..
اااااااااااي وهم انت وبسكويت ..
ااااااااااي بركة الجيت بركة الجيت ..

ياخ نحن مجموعة وهمانين في المكتب فعندنا الوهم الكبير عمل عملية وهمية جدا:
المكتب اللصقو بي اليمين بتاع مصري ..واللصقو بي الشمال لبناني ومقابول واحد جنوب افريقي والعامل بتاع الشاي هندي..
زولنا كبير الموهومين ده عمل عملية في خلال دقيقة ماف زول عملا قبالو ..
كان بيتكلم مع المصري وقال ليهو :
" مش ممكن أبداً يعامولنا بي الطريئة دي "..
ولمن سألو اللبناني أي طريقة زولنا طوالي ضعط Alt+Shift وقلب عشان يرد:
" ويش أقوللك هاي الطرييئي اللي كتير محيرتني "
وواصل بعد ما غير النغمة عشان يدخل الجنوب افريقي معانا في الونسة وقال ليهو
"UnderSatnd Me"??
والغريبة بعدها مباشرة ضرب تحويلة الهندي العامل وقال ليهو :
" انت في يسوي شاي انا في انتظار مكتب انت ماف تأخير كتير "!!!

شفتو الحركة الوهمية الفي شكل كيس مقدود دي؟؟؟
في خلال دقيقة بس نحن بنتكلم خمسة لغات ..
تعجبني جداً وهمة المقارنة في الأكل:
ياخ والله اكلنا طااااااعم ..ياخ جداد الحاتي ونمرة 2 اطعم من كنتاكي..

ومااااااااا اروع الوهمة عن شوقنا لي الضل والسرير ..
الواحد مشغل الكونديشن وتحت البطانية ويقول ليك :
هييييييييه يا حليل ضل العصر بتاع الصالون والملايات مفرشة وبترش بالخرطوش..

وتكتمل الوهمة بدراً لمن تجي سيرة العودة النهائية :
يا زول والله الريال بقا بي 500 وقالوا السودان اتصلح وانا غالباً حا أرجع السنة الجاية نهائي لكن عشان ما احرق اقامتي حا انقل على كفيل تاني عشان اجي بس للحج والعمرة

Post: #25
Title: Re: حامد (الوهم)!! نموذج للسودانيين في السعودية!!
Author: خالدة البدوي
Date: 12-04-2006, 06:15 AM
Parent: #21

معاذ موضوع جميل

لكن اقول ليك حاجة دهـ هي البلد ( الوهم )

ما نحن ،،،

Quote: ياخ نحن مجموعة وهمانين في المكتب فعندنا الوهم الكبير عمل عملية وهمية جدا:
المكتب اللصقو بي اليمين بتاع مصري ..واللصقو بي الشمال لبناني ومقابول واحد جنوب افريقي والعامل

مثال ماذكرة الاخ عمر نحن امام امر واقع

حيث اننا نفهم لهاجاتهم بمختلف جنسياتهم

ولكن هم لا ،، إلا نحادثهم بلهجتهم لذلك

يأخد لسانه عليها وفي خلامنا بدون ما

نشعر نجد انفسنا نطقنا شيء ما سوداني

بالضبط مثل السودانيين في السودان تجد

ماطق السودان المختلفة تختلف لهجاتهم

لانهم اعتادوا عليها ،،،

بوست جميل يمكن سرد المواقف الطريفة

وجميع مواقف الغربة بمختلف سحناتها ..

دمتم ،،،

Post: #26
Title: Re: حامد (الوهم)!! نموذج للسودانيين في السعودية!!
Author: خالدة البدوي
Date: 12-04-2006, 06:15 AM
Parent: #21

معاذ موضوع جميل

لكن اقول ليك حاجة دهـ هي البلد ( الوهم )

ما نحن ،،،

Quote: ياخ نحن مجموعة وهمانين في المكتب فعندنا الوهم الكبير عمل عملية وهمية جدا:
المكتب اللصقو بي اليمين بتاع مصري ..واللصقو بي الشمال لبناني ومقابول واحد جنوب افريقي والعامل

مثال ماذكرة الاخ عمر نحن امام امر واقع

حيث اننا نفهم لهاجاتهم بمختلف جنسياتهم

ولكن هم لا ،، إلا نحادثهم بلهجتهم لذلك

يأخد لسانه عليها وفي خلامنا بدون ما

نشعر نجد انفسنا نطقنا شيء ما سوداني

بالضبط مثل السودانيين في السودان تجد

ماطق السودان المختلفة تختلف لهجاتهم

لانهم اعتادوا عليها ،،،

بوست جميل يمكن سرد المواقف الطريفة

وجميع مواقف الغربة بمختلف سحناتها ..

دمتم ،،،

Post: #36
Title: Re: حامد (الوهم)!! نموذج للسودانيين في السعودية!!
Author: Khalid Saeed
Date: 12-04-2006, 07:05 AM
Parent: #21

وهم عشان بصدقوا السماسره بتاعين الأراضي ..يبيعوا ليهم الوهم ...
وهم عشان بصرفوا الراتب بي هنا .. وعلى طول يحولوه السودان .. رسوم جامعات .. أقساط مليات .. فلان داير يعرس .. فلان داير يشتري شريحة جوال .. فلان مات .. فلان عيان .. فلان حيطه وقعت .. فلان ظروفه كعبة .. فلان .. فلان .. فلان ...
وهم عشان بيدفعوا في فواتير ماليهم بيها صالح .. ضرائب .. زكاة .. ترعت الرهد .. ترعت كنانه .. دمغة الجريح .. شريان الشمال .. المجهود الحربي .. الفضائية السودانية ..
وهم عشان .. بيفكروا في غيرهم قبل نفسهم ..
وهم عشان بضيعوا عمرهم في الغربة ...
وهم عشان الواحد منهم بيموت ويندفن في الغربة ....
وهم عشان ... وهم عشان .. وهم عشان .. وهم عشان ... وهم عشان ...

أخوك الوهم / خالد الأرباب
تجاوز الفصل (15) في الوهم ومتوهم يكمل كمان (15) سنة عشان يكون إجمالي الوهم (30) سنة
أهو نحنا في الآخير سوى .. ماشت على سكت وهم .....

Post: #23
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-04-2006, 05:59 AM
Parent: #1

معاذ ...

الغريبة حالة الوهم دي ما بتنطبق على السودانيين بتاعين الإمارات !!

ولا بتنطبق وانا ما جايب خبر ما عارف ؟!!!

Post: #45
Title: Re: حامد (الوهم)!! نموذج للسودانيين في السعودية!!
Author: Salah Waspa
Date: 12-04-2006, 04:46 PM
Parent: #23

أبو النيز التفتيحة

قلت رفضت عروض سمحة في السعودية عشان ما تفقد حنان و طيب أنا عندي ليك عقد عمل كارب وعروسة مقرشة بس عمرها اتنين وخمسة سنة بس

قلت شنو عليك الله يامعاذ وهم رايك شنو ياخ عايزين نفرح بي ناذر ده ونفس الوقت نقفل ليه سككه وحججه الكتيرة ونخلص العزابة من شره

تحياتي لكما

صلاح واسبة

تخريمة :

البزنس كيف ياناذر و عرضك لود الفكي كيف ؟

Post: #24
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-04-2006, 06:11 AM
Parent: #1

الغريبة حالة الوهم دي ما بتنطبق على السودانيين بتاعين الإمارات !!

دي ملاحظة ممتااااااازة جدا يا ناذر وكلام حلو خلاص..
تعرف يا مان الشغلانة في النهاية (الوهمنة )دي سببها كلللللللللو البنات ..
اييييييييييييييي الجكس.. الحسس ..
تعرف يا مان مغتربين السعودية هم المتوهمين الوحيدين الفي العالم اللمن تجي تقول ليهو كدي ورينا اولوياتك شنو في الغربة ؟
توووشك اول شي يقول ليك أعرس لي مرا واحجج امي وابوي وووو الخ
لاحظ اول شي العرس ..
الغريبة ناس الامارات ديل انا مشيت ليهم هناك ما حصل سمعتهم بيتونسوا عن العرس وعن البنات ..
طبعاً لأنو هناك الوضع عادي ..
ياخ انا عملت لي عملية (وهمية جداً هناك) وشالو حسي بيها..
الشباب اقترح انو نتعشا وكده وحينها كنت في دبي لزيارة الفرد ..
الجماعة اقترحوا مطعم كنتاكي ..
لمن وصلنا المطعم اخوك سأل الشباب :
" وين قسم العوائل ؟؟ "
ووين قسم العزاب ؟؟؟

كاااااااااااااااااااااااااااااااااااااك جماعتك فكوها فيني ضحكة وعرفوني اكبر وهم !!!!

Post: #32
Title: Re: حامد (الوهم)!! نموذج للسودانيين في السعودية!!
Author: Nasser Mousa
Date: 12-04-2006, 06:43 AM
Parent: #24

طرف الصوت وصلناولو انني تركت السعودية من سنتين
وعندي فيها ذكريات لا تنسى خاصة الرياض
لكن هونت على كل الناس بانك من اول الوهم
ولو ما عبارتك في اخر سطر انك وهم كان الدنيا فيك اتهدت
وكل البضحكوا ديل كان كشروا ليك كشيرة جد
لكن انت طلعت مفتح وما وهم
وخليتهم يعترفوا بالوهمية بتاعتهم
ويشكروك على البوست الجميل ده

Quote: تعجبني جداً وهمة المقارنة في الأكل:
ياخ والله اكلنا طااااااعم ..ياخ جداد الحاتي ونمرة 2 اطعم من كنتاكي..

ومااااااااا اروع الوهمة عن شوقنا لي الضل والسرير ..
الواحد مشغل الكونديشن وتحت البطانية ويقول ليك :
هييييييييه يا حليل ضل العصر بتاع الصالون والملايات مفرشة وبترش بالخرطوش..

بالجد ده اكبر وهمة عايشنها السودانين ( المقارانات الما عندها معنى)

Post: #27
Title: Re: حامد (الوهم)!! نموذج للسودانيين في السعودية!!
Author: البحيراوي
Date: 12-04-2006, 06:22 AM
Parent: #1

عمر الفاروق تحياتي

والله حكايتك دي بضحك خالص ، لكن في واحدة قريبة منها عملها الوهم بحيراوي ، أول مرة يمشي كوريا كان نازل في فندق حياة ريجنسي بالقرب من شارع إتاون ، وجاء طالع الأصانصير ماشي غرفته وما طلعت معاه إلا واحدة متبرجه حسب المعلوم والله الوهم بحيراوي إنصرا صرة تقول عندها جنون بقر ولا إنفلونزا الطيور ما عارف.

الوهم / بحيراوي

Post: #39
Title: Re: حامد (الوهم)!! نموذج للسودانيين في السعودية!!
Author: معاذ الدخري
Date: 12-04-2006, 07:14 AM
Parent: #27

البحيراوي / المحامي الوهم كلام معاذ حسن ينطبق عليك بل حدد شريحة المحاميين يعني كلامكم كله طلع وهم, مرة تانية ما أسمعك تقول المادة كيت و كيت , يا أخي تعال هنا في السودان عشان الوهم هنا زي الوحم تعال لينا و تعال و خلي لعب العيال .
معاذ الدخري .

Post: #30
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-04-2006, 06:40 AM
Parent: #1

عمر الفاروق ..

Quote: تعرف يا مان مغتربين السعودية هم المتوهمين الوحيدين الفي العالم اللمن تجي تقول ليهو كدي ورينا اولوياتك شنو في الغربة ؟
توووشك اول شي يقول ليك أعرس لي مرا واحجج امي وابوي وووو الخ

كلامك صحيح أنا لاحظت ناس السعودية مما يجو هنا طوالي بتكون عندهم مشكلة بتاعت تعويض الحرمان العاطفي العانوهو في السعودية .. بكون حايم معاهم في الشارع تلقى الزول بيتلفت زي مروحة الطربيزة لي الماشات في الشارع ..

يعني زي ما تقول تفكيرو كلو بيكون في راس ..........

Quote: الغريبة ناس الامارات ديل انا مشيت ليهم هناك ما حصل سمعتهم بيتونسوا عن العرس وعن البنات ..

ولا حتى لمن يجو هنا .. كمان العكس بتلقاهم لمن يجو هنا متمنين متين يرجعوا الامارات للترطيبة والبهرجة

Quote: لمن وصلنا المطعم اخوك سأل الشباب :
" وين قسم العوائل ؟؟ "
ووين قسم العزاب ؟؟؟

هو بالله الحركات دي لسع في السعودية
انا عشان زول ما وهم وشاعر إني إنسان تفتيحة و راستا حبتين ، رفضت كل العروض بتاعت الإغتراب الجاتني من السعودية رغم انها مغرية..

صنفرة :

كل شي ولا أكون (فاقد حنان) في الغربة !!!

Post: #37
Title: Re: حامد (الوهم)!! نموذج للسودانيين في السعودية!!
Author: معاذ الدخري
Date: 12-04-2006, 07:05 AM
Parent: #30

عزيزي معاذ الموهوم / أنا من الذين عادوا نهائيا من أرض الوهم و حقيقة كان عندي الفرصة لأعود مرة أخري لكن لأن الوهم يداعب الخيال فاخترت أن أكون من مواهيم السودان .
أختلف معك في ترتيب الموهومين حيث أنك وضعت العساكر في المرتبة الأولي و أنت حر في رأيك لكن في الأصل السياسيون في بلدي هم موهومين ( تكعيب ) بمعني هم في الأصل علي رأس القائمة و أخرها العساكر .
إنضبط يا معاذ كبير الموهومين وأبعد من العساكر و أسرح بعيد بعيد .
معاذ الدخري
المتحرر من الوهم .
لك ودي .

Post: #55
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-05-2006, 03:03 AM
Parent: #30

Quote:

Quote: لمن وصلنا المطعم اخوك سأل الشباب :
" وين قسم العوائل ؟؟ "
ووين قسم العزاب ؟؟؟

هو بالله الحركات دي لسع في السعودية

ناذر
في المغرب لا تستغرب
في حدائق عامة خاصة بالنسوان فقط ...يعني تجيب زوجتك وأطفالك دون عشرة سنوات وحدك معاهم الباب تنزلهم وترجع بعد ساعتين تلاتة بعد ما يكنوا هيصوا واتفسحوا...بس للأمانة في حدائق تانية غير كدا..في حدائق أيام الأسبوع فيها موزعة يعني مثلا يوم السبت للعزابة فقط...ويوم الاثنين للأسر فقط....ويوم الخميس للنساء فقط...والله نظام كويس ونحن ذاتو اتعودنا..وإلا شنو!!؟؟
برضو البنوك في فروع للنساء وفروع للرجال..والأسواق الكبيرة أيضا موزعة يوم للرجال ويوم للنساء ...
بعدين في تصنيف تاني لحاجة اسمها (المردان) ...يعني الأطفال في سن المراهقة ..اللي ما لامين في الرجال ويرى علماء الوهابية أنهم يشكلون فتنة عظيمة..ربما أعظم من فتنة النساء...أها ديل احتمال برضو ينزلو الجدول في تقسيم الحدائق والأسواق...

Post: #38
Title: Re: حامد (الوهم)!! نموذج للسودانيين في السعودية!!
Author: علي عبد الرحيم
Date: 12-04-2006, 07:09 AM
Parent: #1

العزيز معاذ: تحياتى

يا خوى الوهم ما محصور عند ناس السعودية والخليج براهم ...والله فى أوروبا فى نوع وهم

يفقع المرارة عدييييييييييييييل كدا...

Post: #40
Title: Re: حامد (الوهم)!! نموذج للسودانيين في السعودية!!
Author: ابو عثمان
Date: 12-04-2006, 07:15 AM
Parent: #1

عارف يا معاذ في وهمه كبيره نسيتها قبيل :

أي واحد وهم لمن يمشي السودان اجازه تلقاهو بين الفينة والأخري يهبش جيبه الخلفي عشان يتحسس الاقامة !!!!! ولمن يتذكر انو في السودان يخجل من نفسه!!!!!

ياخي نحن من شدة ما وهم لو الواحد طالع شقته في العماره وقابلته امرأه نازله في السلم لمن يتخلع ويقبل وجهه علي الحيطه لحدي ما تفوت !!!!تقول صاروخ !!!!

ده غير كمان لما تكون سايق وتقيف في اشاره وتلتفت يمين او يسار لو شفت أمرأه في العربيه الجمبك تلف رأسك 180 درجه عائدا" الي عربيتك في اقل من ثانيه عشان كده اي وهم عنده فلايت وغضاريف

غايتو الليله فشتينا في الوهمة بتاعتنا

يا وهم

Post: #41
Title: Re: حامد (الوهم)!! نموذج للسودانيين في السعودية!!
Author: الشيخ إبراهيم الشيخ
Date: 12-04-2006, 08:12 AM
Parent: #40

يامعز تحياتي

والله في البورد ده إنت دوحة عديل كده وكمان ساتر من الطوب والنعيل
المالي البورد ده من المتوهمين والمتوهمات الواحد بعد ما بشبع تب
حرابة ورفيس وفليق يجي يستجمع عنك عليك الله ما تنقطع وكتر لي من الوهم
أصلوا الوهم بقى كتييييييييييييييييييييير مالي الدرب.

ياوهم ياجميل

Quote: ياخي نحن من شدة ما وهم لو الواحد طالع شقته في العماره وقابلته امرأه نازله في السلم لمن يتخلع ويقبل وجهه علي الحيطه لحدي ما تفوت !!!!تقول صاروخ !!!!

ده غير كمان لما تكون سايق وتقيف في اشاره وتلتفت يمين او يسار لو شفت أمرأه في العربيه الجمبك تلف رأسك 180 درجه عائدا" الي عربيتك في اقل من ثانيه عشان كده اي وهم عنده فلايت وغضاريف

أبو عثمان ياأخوي الله يكون في عونكم لكن خليك تفتيحة واعمل ليك نظارة ملونه وبحلق تحت تحت
وكان شافوك بطريقتك خارج نفسك لانو بصراحة بالصورة ده بتتوحش وتاني الغابة ما بتلمك

Post: #42
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-04-2006, 12:01 PM
Parent: #41

الاعزاء
عبده عبدالحميد جاد
عمر الفاروق
خالدة البدوي
خالد سعيد
ناصر موسى
ناذر
معاذ الدخري
علي عبد الرحيم
الشيخ ابراهيم الشيخ

يا اخوانا الموت حق ...أنا منسحب من الموضوع دا..كمان جابت لها ضبح يا روح ما بعدك روح

والله جاتني رسالة من اخ احتفظ باسمه الزول دا زعلان شديد ويمكن هسي قاعد يطرق في السكين اصلو البلد دي بقت فوضى والضبح من طرف.

دي رسالة الاخ كما هي:-

(((((((((غريبة منك يامعاذ هذا ، وأمثالك هم الذين يهدمون اوطانهم بتعميم الأساءة لشعب السودان واسائتك بهذا الشكل لاتولد الا الضغائن والكراهية بين ابناءالشعب الواحد ا لذين اصلا هم مكتوون بنيران الحروب والفتن ، فكان الأجدر بك المساهمة بموضوع بناء وليس أشعال نار الفتنة بين بني وطنك السودان ، وانا واثق ان كثيرا من أهلك يعملون خارج السودان فيهم خالك وعمك وهكذا وانت عندما عممت اساءاتك نال منها كذلك اهلك،
فليس كل مغترب فاسد وواهم كما تقول فكثير من قادة السودان في السلطة كانو مغتربين وكثيرا من قادة الفكر والفن والعلم كانوا مغتربين
فيامعاذ
المنابر تبني ومنها ........ بمساهمات أبناء الشعب السوداني البناءة دون تمييز وفيهم المغتربين وكان الأجدر بك عرض مساهمات موجبة منك لتثري ساحاتنا الا انك نسيت كل ذلك ووقفت محاربا لبني وطنك وأري فيك مثيرا للكراهية والحقد و................... منبر كل السودانيين الطيبين بريئة منك .
ارجو ان تعود لرشدك وتعتذر علنا .
ولنا عودة)))))))

أها شفتو... لنا عودة دي معناها العودة للضبح
عشان كدي أي زول عايز يتكلم عن الوهم بطريقتو ...أنا ما مسئول
ألا هل بلغت اللهم فاشهد.

Post: #43
Title: Re: حامد (الوهم)!! نموذج للسودانيين في السعودية!!
Author: خالد عبد الله محمود
Date: 12-04-2006, 12:21 PM
Parent: #42

يا معاذ يا أخوي

ما تبقي زول ( وهم) بالجد و ما تتوقع أنو كل الناس تفهم أنت قاصد شنو؟؟

عموما أنا شايف أنو دة أحد أفيد البوستات التي قرأتها مؤخراً

خالد

Post: #44
Title: Re: حامد (الوهم)!! نموذج للسودانيين في السعودية!!
Author: luai
Date: 12-04-2006, 02:10 PM
Parent: #1

سلام يا معاذ ياوهم ..ياجميل ..
كلامك جميل ..لكن وحات رب الناس انا كنت
قايل انو نحن ناس (السعودية ) ديل برانا الوهم ..
لكن الحقيقة ..الوهم الكبير اسمو اوربا ..
الناس هنا موهومين عديل ..

ياشافي اشفينا في القبل الاربعة ..

Post: #46
Title: Re: حامد (الوهم)!! نموذج للسودانيين في السعودية!!
Author: عماد شمت
Date: 12-04-2006, 05:43 PM
Parent: #44

الزول الجميل معاذ والله ضحكت جنس ضحك.. يعني لو في زول شافني انا قاعد براي بضحك

حيقول الزول ده اكيد جن ..

تعرف انا اتذكرت واحد من اهلي جاي الخرطوم ترانزيت من البلد للسعوديه عدل ...

الزول ده لمن رجع عزبنا عزاب الله واكبر ده الحين والسياره وسكر الباب قلت ليهو

هسع الباب ده يسكروه كيف؟ بعرقي والا وسكي ..اه ده لو كان مهندس ولا دكتور كان

سكر لينا البيت كله ....

يديك العافيه معاذ ....

Post: #101
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:11 AM
Parent: #46

Quote: الزول ده لمن رجع عزبنا عزاب الله واكبر ده الحين والسياره وسكر الباب قلت ليهو

هسع الباب ده يسكروه كيف؟ بعرقي والا وسكي ..اه ده لو كان مهندس ولا دكتور كان

سكر لينا البيت كله ....

الظريف عماد شمت..سلام
واحد قريبنا قضي 23 سنة في السعودية مكرهنا البيت بجنس الكلام دا..
ومع اولادو نفس الكلام..اتصل عليهم مرة والله البنت الصغيرة قالت لي
يا بابا نحن كلامك دا ما قاعدين نفهمو!!!!

Post: #100
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:05 AM
Parent: #44

Quote: الوهم الكبير اسمو اوربا ..
الناس هنا موهومين عديل

الاخ العزيز لؤي
مع اسفارك الكتيرة ديك
مفروض انت اللي يكتب عن الوهم
لانك اكيد عايشت اصناف واصناف من الوهم.
غايتو وهم ناس اروبا داأريتو وهم السرور.

Post: #47
Title: Re: حامد (الوهم)!! نموذج للسودانيين في السعودية!!
Author: الفاتح يوسف جبرا
Date: 12-04-2006, 05:56 PM
Parent: #1

معاذ :
مرور .. متابعة .. إستمتاع

Post: #48
Title: Re: حامد (الوهم)!! نموذج للسودانيين في السعودية!!
Author: الخير محمد عوض
Date: 12-04-2006, 06:46 PM
Parent: #47

الوهمــة في القهــمـة...بالله يا مـعـأذ عاين للكلمات الرنانـة دي:
السـيارة...الغـرفـة...النظـارات (النظارات دي تحـديدا بتقـطع مـرارة
افكـاري)...الجـوال ومـرات كـدا الخلوي...الكشـخـة...(كشـخة لا ارنب)
وسـاعات (ذهبيـة) مادتديك الدرب واهم حـاجة تكـون بتســمع ابو الامين

شـفت الوهـمـة دي كـيف؟

في نوع تاني من الوهـمات اســمـة الوهمـة الفي شـكل وردة ودي خـاصـة
بالجماعـة الهاجـرو لبلاد الخـواجات ابات عـيونا خـضـر..طبعا ديل وهمتم
ما قاعـدة تسـلك مع الناس المفتحـين لانها بتكـون منقـحـة بجـدعات بتاعت
كلمات انجـليزية...طـوال بقـولو عليك زول مسـتفـز ..شفت كـيف.

اها انا بمـشي وبجي اتاوق تاني
لانو بصـراحـة كـدا الموضـوع دا متكـفي

جـاو.

Post: #49
Title: Re: حامد (الوهم)!! نموذج للسودانيين في السعودية!!
Author: Sobajo
Date: 12-04-2006, 07:28 PM
Parent: #48

معاذ يا راقي ...

اول بوست ادخلو ليك صراحة ..

ولكن ...

اضحكتنا اضحك الله سنك ..

و زي ما قالو ليك الجماعة الفوق ...

اعمل حسابك ...

لأنو في ناس وهم اول ما يصلهم طرف السوط بحسو انو براهم الوهم و بقومو يتوهمو فيك الجاري عليك ما بلحقك ...

و ادام الله توهمك ...

العزيز شمــــــت...

Quote: هسع الباب ده يسكروه كيف؟ بعرقي والا وسكي ..اه ده لو كان مهندس ولا دكتور كان

سكر لينا البيت كله ....

البوست كوم ..

و مداخلتك دي كوم براه ...

التعبير:
ارجل ترفس و الايد في البطن و قهقهة بصوت عالي و زي خمسمية خشم مفتوح ...
مع القليل من السعال بين لحظة و لحظة ...

Post: #50
Title: Re: حامد (الوهم)!! نموذج للسودانيين في السعودية!!
Author: حاتم هاشم
Date: 12-04-2006, 09:26 PM
Parent: #49

بسم الله الرحمن الرحيم

عزيزي معاذ الوهم

دخلت البوست بتاعك ده

وقعت اضحك شديدخلاص لمن قربت اقع

لو في زوول شافني كان قال الوهم ده مالو..

علي اي حال كن في الخليج في السودابيين (الوهم)..

في اروبا في الناس (المرض) وامريكا وكندا الناس (الجلاء) واسترالياالناس (الرجه)..

يعني بصراحه شديده كده يا(وهم) ياخوي الناس القاعده في السودان هم الناس الميه ميه..

مع الاعتزار لكل المغتربيين والمغتربات والمهاجريين والمهاجرات ...

سلام يا( وهم)

حاتم هاشم

Post: #105
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:24 AM
Parent: #50

Quote:

علي اي حال كن في الخليج في السودابيين (الوهم)..

في اروبا في الناس (المرض) وامريكا وكندا الناس (الجلاء) واسترالياالناس (الرجه)..

يعني بصراحه شديده كده يا(وهم) ياخوي الناس القاعده في السودان هم الناس الميه ميه..

مع الاعتزار لكل المغتربيين والمغتربات والمهاجريين والمهاجرات

حاتم هاشم صح لسانك
أتفق معك بنسبة 102%

Post: #104
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:21 AM
Parent: #49

Quote:
اول بوست ادخلو ليك صراحة

الظريف سوباجو
حنكوش كمبيوتر مان
أما أنا فقد دخلت لك بوستات عديدة
عليك الله اقبلني صاحب.

Post: #103
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:17 AM
Parent: #48

Quote: بالجماعـة الهاجـرو لبلاد الخـواجات ابات عـيونا خـضـر..طبعا ديل وهمتم
ما قاعـدة تسـلك مع الناس المفتحـين لانها بتكـون منقـحـة بجـدعات بتاعت
كلمات انجـليزية...

الصديق الخير محمد عوض
لكن دي ما وهمة عينة.

Post: #102
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:14 AM
Parent: #47

Quote: مرور .. متابعة

الاستاذ الفاتح..تحياتي
مرورك شرف ..ومتابعتك فخر
تسلم يا استاذ

Post: #51
Title: Re: حامد (الوهم)!! نموذج للسودانيين في السعودية!!
Author: محمد أبوالعزائم أبوالريش
Date: 12-05-2006, 01:45 AM
Parent: #1

الأخ معاذ

تحياتي

بدأت اغترابي في سلطنة عُمان .. وأواصله الآن في الدوحة.

قبل ذلك وأثناءه حاول معي البعض أن أجرب حظي في السعودية، ولكني كنت أرفض دون تفكير، وأظنك وضعت يدك على الجرح وفسرت لي نفوري منها. زرت السعودية (جدة) أكتر من مرة، وتزداد قناعتي أكثر في كل مرة بوهم ساكنيها، فأول مرة كان الشباب الذين نزلت عندهم يطاردوني كلما هممت بالخروج ليتأكدوا أني أحمل معي جواز سفري، وهذا لا ذنب لهم فيه، ولكن كان عندهم سؤال كأنما اتفقوا عليه، فكانوا يسألوا، وكنت وقتها آتياً من سلطنة عُمان: (عملت خروج وعودة؟)، لم أفهم المعنى دون أن أستوضح، وتعرضت لنفس السؤال عدة مرات أثناء تأدية مناسك إجراءات المغتربين في الخرطوم، ومن موظفين رسميين. لماذا تقاس إجراءات كل الدول على أساس السعودية؟ وقد عييت ليفهم محدثي أن المقيم بسلطنة عُمان لا يحتاج كي يسافر سوى جواز سفره وتذكرة السفر، وكل ما أشرح يصيح مستعجباً (أيش لون؟).

الغريبة أن هناك من يزور السعودية بتأشيرة عمرة، وبعد إكمال فترة العمرة (15 يوم) تتم إعادته للسودان في (كشة)، ويصر أن يتحدث فور رجوعه بلهجة سعودية ممجوجة لا تشبه لسانه. في وهم أكتر من كدة؟

أرقدوا عافية

Post: #54
Title: Re: حامد (الوهم)!! نموذج للسودانيين في السعودية!!
Author: hajhamad
Date: 12-05-2006, 02:30 AM
Parent: #51

الأخ معاذ تحياتي ،

في السودان ثلاثة مغتربين في الاجازة مشوا زيارة لي قريبهم و هو أيضا عندو محاولات للاغتراب ،
جاب ليهم الشاي كلهم قالوا ليهو : معلقة سكر واحدة بالله ، صاحبك اغتاظ و اعتبر ذلك حركات مغتربين و علق قال ليهم : دي حركات مغتربين لكن و الله أنا لو أشرت عمرة بس الا أشربوا ليكم مر بدون سكر.

الحاج حمد

Post: #106
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:31 AM
Parent: #54

Quote: علق قال ليهم : دي حركات مغتربين لكن و الله أنا لو أشرت عمرة بس الا أشربوا ليكم مر بدون سكر.

الحاج حمد..سلام
ذكرتني النكتة
واحد قالوا اتعب ليك الجماعة تعب شديد..لازم ترسلو لي فيزا اجي السعودية
قالوا لي يااخي السعودية انتهت وكل الناس راجعة..اصر لازم فيزا.
اول يوم وصل جده جابو لي قارورة بيبسي حجم عائلي (كم لتر ما عارف)
قام بيها بنفس واحد وتجشأ عميقا ونظر الى الجماعة بغيظ وقال:
برضو تقولو لي السعودية انتهت!!!!

Post: #56
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-05-2006, 03:06 AM
Parent: #51

Quote:

زرت السعودية (جدة) أكتر من مرة، وتزداد قناعتي أكثر في كل مرة بوهم ساكنيها، فأول مرة كان الشباب الذين نزلت عندهم يطاردوني كلما هممت بالخروج ليتأكدوا أني أحمل معي جواز سفري،

الأخ محمد أبو الريش
لو إن زيارتك هذه كانت قبل أربعة سنوات لا أدرى ماذا كنت ستقول
أيام سيء الذكر ما يسمى (خطاب التنقل) وخطاب التنقل هذا أمر أشبه ببوليصة الشحن يعني لو كنت تعمل في الرياض وعايز تسافر لمدينة تبعد من الرياض مائة كيلو لا بد أن يرفق معك كفيلك بوليصة الشحن هذه وهي خطاب من كفيلك مصادق عليه من إدارة الجوازات مدة هذا الخطاب على ما اذكر كانت تلاتة شهور فإذا تصادف أن انتهت مدته أو ضاع فأنت في مطب كبير وعرضة للقبض عليك والسجن والبهدلة ومن ثم تسفيرك نهائيا.
أما موضوع تأشيرة الخروج والعودة فدا موضوع طويل جدا..اول حاجة تسلم الاقامة لكفيلك عشان يسلمك الجواز الذي استلمه منك يوم وصولك واكيد الجواز حا يكون منتهي ..تمشي تجدد الجواز ..وعشان تجدد الجواز لازم تدفع الضرائب القديمة ..يلا خلصت من الجواز تجي تعبئ استمارة الخروج والعودة ويوقع كفيلك ويمشي الجوازات..وجائز جدا يرجع جوازك كما هو ويجيك استدعاء للتحقيق نسبة لان ادارة الجوازات اكتشفت إن تجديد إقامتك الذي قامت به ذات الإدارة قبل عشرة سنوات كان مزور!!!..

Post: #73
Title: Re: حامد (الوهم)!! نموذج للسودانيين في السعودية!!
Author: فرح
Date: 12-06-2006, 07:00 AM
Parent: #56

معاذ التفتيحه عندى اخوى زول وهم قاعد فى السعوديه كلو مره بقول لى ارسل فيزاء بتاعت خبير ثروه حيوانيه( عامل تربيه مواشى ) تجى السعوديه قلت ليهو انا برسل ليك اقامه تجى السودان انا السعوديه ما بجيها الا للحج ولا اكون امير ولا حتى فى السفاره ما بجى يا وهم

تعرف فى النهايه عمل شنو جاء السودان اجازه قال تانى ماراجع السودان قال مافى زيه عليك الله ما وهم
موضوعك فى غايه الطرافه والجمال مزيدا من الابداع
دمت

Post: #107
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:34 AM
Parent: #73

Quote: قلت ليهو انا برسل ليك اقامه تجى السودان انا السعوديه ما بجيها الا للحج ولا اكون امير ولا حتى فى السفاره ما بجى يا وهم

الاستاذ فرح..
ينصر دينك بالله شوف لينا فيزا للسودان
بس يكون معاها عقد عمل انشاء الله في شركة بترول.

Post: #52
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-05-2006, 02:15 AM
Parent: #1

وهمة كبيرة جداً من الموهوم العريس صديقي في شقة العزابة مصعب عثمان ..
مصعب ده يا جماعة من اكبر الموهومين في السعودية .. وهماتو شي مبااااالغة ..
طبعاً السعوديين هنا لمن يقولوا ليك " سَمْ طال عمرك " يعني زي ما تقول كده " سَمْ " دي زي المعناها " نعم" أو أيوة أحكي أو قول..
اخونا الموهوم مصعب ايامو الجاي جديد وكرت كرتونة مشى لي كيفلو لزوم استلام صك الغفران (الاقامة ) وكده ..
مصعب وقف فوق راس كفيلو وكفيلو قاعد في المكتب بيقوع في اوراق ..
فجأة الكفيل رفع راسو وعقال لي موهومنا مصعب :
سَمْ !!!! يعني(ايوة خير في شنو )
فما كان من موهومنا الكبير مصعب إلا وقال للكفيل:
بسم الله الرحمن الرحيم

اما اكبر وهمات اخونا مصعب فمرة كنا قاعدين بنحضر في فيلم وخرمنا لينا لي شاي ..
قلت ليهو يا مصعب ياخ اظبط لينا كبايتين شاي..
موهومنا الكبير مصعب مشى المطبخ ولمن فتح الدولاب ولقا السُكّر موجود في كيس كبير وبي كميات شال الكيس ورماها وجاني زعلان وقال لي:
ياخ البلد دي ما فيها أي نوع من المعاناة ..مشيت لقيت السكر مردوم والشاي بي الكوم ..
يا حليل زمن كوبر يقولوا ليك سوي الشاي بعد شوية يقولوا ليك شاي ماف امشي دكان حسيب جيب شاي..
تجيب الشاي يقولوا ليك السكر خلص امشي دكان ابوزيد جيب ربع رطل..
السكر تلقاهو مختوت ومربوط في كيس صغيير وجوة السكرية وبي المعلقة يحسبوهو ليك ..

واحدة من الوهمات الكبيرة لي ابو المصاعب لمن نقعد كده في تلفزيون السودان ويجيبو ليك مناظر من النيل والسوق العربي واغاني الشوايقة ..
موهومنا الكبير مصعب يقعد يبكي ويجعر ويقول لي يا عمر نحن لااااااااااازم نرجع السودان وفي اقرب وقت ..الغربة دي كلام فارغ ومضيعة وقت وما منها فايدة و و و و و
اها في اثناء الونسة ديك نتزكر إنو مفروض نمشي نجيب لينا عشا فنقوم ننزل واخونا الموهوم مصعب يدوور ليك العربية الكورولا الاخر موديل (حقت الشركة) واول ما يكرب يشغل ليك المكيف والهوا البارد يضربو ..يقوم يقول لي :
هووووووووووووووووي يا عمر والله رجعتنا صعبة ..انا كان قالوا لي تعال في السودان والي ما برجع

Post: #53
Title: Re: حامد (الوهم)!! نموذج للسودانيين في السعودية!!
Author: ابو عثمان
Date: 12-05-2006, 02:23 AM
Parent: #1

ابحثوا معي عن معاذ الوهم

ما يكون ناس القاعده لحقوه أمات طه

Post: #57
Title: Re: حامد (الوهم)!! نموذج للسودانيين في السعودية!!
Author: البحيراوي
Date: 12-05-2006, 03:23 AM
Parent: #1

العزيز معاذ الدخري فريق ركن وهم تحياتي

جميل من معاذ إنو لمانا في حوش الوهم الكبير . نمشي السودان نشتري لوري أنينه يبكي ونكتب فية ( جميلة ومستحيلة ) ( أديني رضاك قدامي سفر )
وبعد شوية الوهم يتمدد ويتفرع ونقوم نكتب ( سترك يا رب ) ( عين الحسود فيها عود)

والوهم يزداد حتي نرجع نبيع ونشتري ركشة أو أمجاد

بحيراوي

Post: #58
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-05-2006, 03:32 AM
Parent: #1

صلاح وثبة ..

Quote: قلت رفضت عروض سمحة في السعودية عشان ما تفقد حنان و طيب أنا عندي ليك عقد عمل كارب وعروسة مقرشة بس عمرها اتنين وخمسة سنة بس

بالغت والله .. عروس بالعمر دا حا تفقدني حنان وتفقدني باقس الشعر الأنا مربيهو للعرس !!

بعدين بالقصص السمعتها فوق دي إتخايل لي المشكلة ما في العروس ولا في السودانيين ..

شنكل :

فقدان الحنان دا سببو قوانين السعودية ذات نفسها !!!

Post: #59
Title: Re: حامد (الوهم)!! نموذج للسودانيين في السعودية!!
Author: عبد المطلب خضر عبد المطلب
Date: 12-05-2006, 04:28 AM
Parent: #1

الو .. الو ...الو......................................
الو .. الو
السلام عليكم .. السلام عليكم..السلام عليكم
عليكم السلام .. عليكم السلام.. عليكم السلام
التلفزيون ..التلفزيون....التلفزيون ......................
ايو معاك .. برنامج (...........).........
منو معاي فلانه .. فلانه.. فلانه...................
لا ..معاك فلانه .......
ازيك يافلانه .. كيف حالكم ان شاء الله كويسين ؟.............................
مرحب الحمدلله الله يسلمك....
والله بشيد بي برمامجكم..................................................
...............................................................
ممكن اشارك ؟؟؟.....................................

Quote: يا زول والله الريال بقا بي 500 وقالوا السودان اتصلح وانا غالباً حا أرجع السنة الجاية نهائي لكن عشان ما احرق اقامتي حا انقل على كفيل تاني عشان اجي بس للحج والعمرة

والاوهم من ديل الواحد يعمل خروج نهائي ..بعد الناس ينسوهو ..يقوم يتصل .. اها اخبارك
عملت شنو ؟
يقول ليك والله البلد زي الزفت ..شوفو لي اقامه انا جاي راجع تاني

اها زي دا بدخل الشفقه فى نفوس الاوهام.. ويبقوا يرازوا في محلهم وما قادرين يتخارجوا..

والوهمه بتاعة الناس البتلقاهم قدامك..
يقولوا .. ياخي انتو جايين بعد شنو؟
بعد ما السعوديه انتهت..
البلد دي انتهت خلاص..

يقولوا كده وهم مكنكشين فيها كنكشه

بلاهي ماتنسى اخوانك في الوهم وباص لي خيط خالد دا لو وصلك..

التوقيع : عبدالمطلب الساكي الوهم لا هو وصل ولا قادر يرجع

Post: #108
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:37 AM
Parent: #59

Quote: والله بشيد بي برمامجكم..................................................
...............................................................
ممكن اشارك ؟؟؟.....................................

عبد المطلب خضر
ممكن تخفض لينا صوت التلفزيون شوية عشان نقدر نسمك..

Post: #60
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-05-2006, 04:56 AM
Parent: #1

أهداء خااااااااااااااااااااااص لي حبيبنا ناذر ..
ولي كل الموهومين من ابناء بلادي اسمعوا أجمل وهمة فقدان حنان ..
صدقوني حاتموووووووتوا من الضحك ..
خصوصاً لمن تسمعوا " حنان شئ"

يا حليل الحنك عند السودانيين والله ..
هيييييييييييييييييه دنيا

بالمناسبة ختيت ليك وهمة شديدة كنت عملتها لي مديرنا ان شاء الله تكون حصلتها
تخريمة :
يا ناذر بعد ما سمعت الوصلة واستمتعت خلاص عشان ما نجهجه العزابة الحا يسمعو الصوت ديل..
أصلو بعيد عنك البيسمع الصوت حا يقتنع بي الاضان البتعشق قبل العين
با لمناسبة خالد أسة بيكون مرطب ترطيبة السنين والنوع البيكون بقا يفط سنة ويقرا سنة ..
بس الذ حاجة " نبقى حنان شئ"

Post: #61
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-05-2006, 05:23 AM
Parent: #1

ود الفاروق

البوست بتاع معاذ كوم وتسجيلك دا كوم تاني

صنفرة :

أعمل لينا بوست إسمو العتيدي (الوهم)!! نموذج للسعوديين في السعودية!!

Post: #63
Title: Re: حامد (الوهم)!! نموذج للسودانيين في السعودية!!
Author: Sobajo
Date: 12-05-2006, 05:45 AM
Parent: #61

يا ناذر ... الظاهر البلد أسيادها وهم ......

العتيبي ... و ام عبد الله ... و عبدالاله مدير المدرسة ...

بس كان لحقت يا ناذر تغتبرب ووديت ولدك المدرسة ...
اتاكد من انو يكون شاطر عشان ما تضطر عبد الاه يحسن ليه درجاتو ...

صنفرة :

اهم حاجة انو المواعيد شرعية ... (بعد صلاة العصر )....

Post: #62
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-05-2006, 05:28 AM
Parent: #1

الضحك شارطني من التسجيل دا

عمر إنت ما بتخاف ولا شنو

شنكل :

تم لينا القصة .. خالد نجح ولا زولنا إنضرب بمبة ساكت
ما قلت ليكم كلو ولا فقدان الحنان في البلد ديك

Post: #64
Title: Re: حامد (الوهم)!! نموذج للسودانيين في السعودية!!
Author: معتصم دفع الله
Date: 12-05-2006, 05:48 AM
Parent: #1

تحياتي يا معاذ ..

يمكن من الأشياء الملفتة هي تعودنا على غير لهجتنا السودانية حتى فيما بيننا حينما نكون مع بعض في جلساتنا العادية ..
وأكثر الأشياء أنك تكون على الدوام متوهم وواهم وزول وهم ساي ..

خارج النص ..

ممكن أهدي ..

واحد وهم سااااي ..

Post: #109
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:41 AM
Parent: #64

Quote: يمكن من الأشياء الملفتة هي تعودنا على غير لهجتنا السودانية حتى فيما بيننا حينما نكون مع بعض في جلساتنا العادية

الصديق معتصم
ترى هذى من اكثر الامور اللي ما احبها.

Post: #65
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-05-2006, 05:52 AM
Parent: #1

سوباجو ..

Quote: بس كان لحقت يا ناذر تغتبرب ووديت ولدك المدرسة ...
اتاكد من انو يكون شاطر عشان ما تضطر عبد الاه يحسن ليه درجاتو ...

أنا زاتي لو قدر لي إغترب حا إغترب أنا وولدي بس وأخلي مرتي في السودان ..
ولو ولدي طلع بليد حا إتصل بي عبد الإله عشان يحسن ليهو درجاتو ..

شنكل :

سمعت نكتة الكمين يا سوباجو ؟ بس أعكسا

Post: #71
Title: Re: حامد (الوهم)!! نموذج للسودانيين في السعودية!!
Author: Sobajo
Date: 12-05-2006, 06:28 PM
Parent: #65

Quote: سمعت نكتة الكمين يا سوباجو ؟ بس أعكسا

ما سمعتها يـــا نــــاذر ..

لكن الحاجة العارفها انو عبد الاله دقس ...!!!

Post: #66
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-05-2006, 06:04 AM
Parent: #1

Quote: أنا زاتي لو قدر لي إغترب حا إغترب أنا وولدي بس وأخلي مرتي في السودان ..
ولو ولدي طلع بليد حا إتصل بي عبد الإله عشان يحسن ليهو درجاتو

Post: #67
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-05-2006, 06:15 AM
Parent: #1

هاكم الوهمتين ديل:
ايام كده كان فتحوا السفر لي مصر والرحلة بالقطر والباخرة ما كانت مكلفة ..
أها عندنا شباب من الحلة اتلموا كده وقالوا بدل يقعدوا عطالة يشمو يجربو مصر دي فيها شنو ..
الشباب بدا الاجراءات ودخلوا الجوازات واشروا ليهم ..
شتشاء الظروف يقوموا مجموعة من الشباب يتخلفوا من السفر لي مدة اسبوع ..ويقوم اخونا الإسمو وليد القرد ده يسافر قبل الشباب بي إسبوع (لاحظ بالقطر)
المهم بعد اسبوع الشباب حصلوا وليد في القاهرة ..
أها وليد الجا قبالهم بي اسبوع بس شبكم ليك :
اها بالله كيف السودان وكيف الأهل واخر اخبار الحلة شنو والبلد ان شاء الله ما اتغيرت واخر الشمارات شنو ..
المهم واحد من الشباب قال ليهو :
والله يا وليد ناس اللمين قبل يويمن جاه حرامي!!!
وليد قال ليهو :
يا لهويي ..يا لهوي ..يا لهوي

(لاحظو زولنا قعد اسبوع بس حالتو)

وهمة تانية لمن كنا في الثانوي عندي صاحبي اسمو اسامة النوع الكان عامل فيها عايش وهمة إنو زول مبدع وممكن يبقا ممثل مصري..
مرة قال لينا انا بقلد سعيد صالح تمااااااااااماً وقرر يدينا المشهد بتاع سعيد صالح في مسرحية العيال كبرت تقريباً
فقام أسامة بدا المشهد وقال بي نفس صوت سعيد صالح :
" مين إللي أااب الأورتة "
طبعاً اسامة كان قصدو يقول " ميين اللي قاب التورتة" ..
من الضحك انا والصديق غاندي بي صوت واحد قلنا ليهو :
" أنا إللي إبت الأورطة " ..

تخريمة :
نكتة وهمانة وقديمة ..
السوداني عامل فيها بيتكلم مصري وعايز ينبز اولاد بمبة فقال لي واحد :
" إنت إرد ولا أأو "
" يعني انت قرد ولا ككو "

Post: #112
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 03-02-2007, 04:08 PM
Parent: #67

Post: #68
Title: Re: حامد (الوهم)!! نموذج للسودانيين في السعودية!!
Author: عبد اللطيف بكري أحمد
Date: 12-05-2006, 06:40 AM
Parent: #1

ياخوانا معاذ وين؟؟

Post: #69
Title: Re: حامد (الوهم)!! نموذج للسودانيين في السعودية!!
Author: othman mohmmadien
Date: 12-05-2006, 10:37 AM
Parent: #68

في وهم من بره أسود ومن جوه أخضر
ما هو
سوداني مخزن قات
نكته أو قلوتية على سبيل االسخرية - نتاج يمني
اليمن
يملآ السوداني باطن خده قاتاً
يرتدى الزنة "الجلابية" اليمنية أو العمانية
وينسف كل ما يملك ثقافته عرفه وقريشاته الدخلن في بلد غالب الدخل فيها محدود وضنين
وتصبح هنالك علاقة بينه والكمبيوتر في أن الاثنين بيخزنوا

Post: #110
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-12-2006, 05:46 AM

Quote: في وهم من بره أسود ومن جوه أخضر
ما هو
سوداني مخزن قات
نكته أو قلوتية على سبيل االسخرية - نتاج يمني
اليمن

الاخ عثمان محمدين..سلام
وهاك نكتبة بنغالية سخيفة ومتداولة
يقول ليك ( سوداني نفر.. وجه اسود وقلب اسود)
شفت البلاوي اللي احنا فيها.

Post: #70
Title: Re: حامد (الوهم) !!
Author: Adel Sameer Tawfiq
Date: 12-05-2006, 12:48 PM
Parent: #1

العالم كله حامد (الوهم)..
يبدو اني طلعت أنا ظااااطي وهم في البحرين !!

Post: #72
Title: Re: حامد (الوهم)!! نموذج للسودانيين في السعودية!!
Author: عبد الدائم سيد أحمد
Date: 12-06-2006, 04:15 AM
Parent: #1

معاذ
Quote: هل حقاً صرنا (وهم) ..
أم متوهمين ؟
أم دايشين ؟
أم منومين بمغناطيس اللمبالاة ؟
أم أن الغربة خلقتْ نوع من إنفصام الشخصية جعلتنا نقترب من (الوهم) ؟
هل هذه الحالة التي إقتبستها من موضوعك هو تلخيص لتخبط نفوس المغتربين بين (الذي كان مأمولاً من الغربة ) و بين ( الحقيقة المرة التي يعيشها ؟ )

كان الله في عوننا جميعاً

وكمان
Quote: أنت برضك : لما الواحد يبدأ قراءة مقالك الوهم يزعل منك من أول سطر وتتكرضم أسارير وشو ويتمنى يلقاك في نص السطرين الأوائل عشان يخنقك،،
لكن في نهاية المقال، وعشان نأكد نحن وهم بصحيح : نتمى مقابلتك لتهنئتك على هذا السرد الرائع ،، وما يثلج الصدر : أنك معنا ههانا واهماً ،،
لك الوهم كله والإهتمام،،

عارف يا معاذ جيت داخل الشغل عاوز اشتغل ما قدرت
علشان من الصباح قلت لي يا وهم ؟؟
كان تخليها آخر الـــــدوام عشان الواحد يرقد ينوم وينسى انو وهم .

Post: #74
Title: Re: حامد (الوهم)!! نموذج للسودانيين في السعودية!!
Author: gamal elsadig
Date: 12-06-2006, 07:14 AM
Parent: #72

..
ديباجة:
نحن (الجالية) السودانية (بالخرطوم) و الدول (المجاورة) في ظل الاتحاد الفيدرالي ....
نطلب من سوداني السعودية والمناطق المتاخمة عدم تصدير الوهم الينا ...
...........
والله مسألة تغير اللهجة دي بتزعل زعل شديد ... بحكم (تعاملي) مع بعض (الموهمين) خاصة في
في موسم (الاجازات ) واكثر الكلمات التي تغيظني هي (الحين) الي هي (هسع) عندنا هنا ..
وبعدها (الخبز) ...ياخ نحن كلمة (رغيف) بنشوفو اسم دلع (للعيش) ......
اما (السيارة) اقصد العربية فده كلام كثير خالص خالص ...طبعا (الوهم) اول مايجي في موسم
(عودة السمبر) في خريف الاجازات بيكون عاز (سيارة) وطوالي يسوق معاهو (المترجم) وخبير السوق
السوداني ..ودائما ما يكون اخوه او اخو المرا اقصد(المدام) او صاحبو الكان منتظرو يرسل ليهو عقد ولسع عشمان ..ويجي خاشي ويقول ليك ..انا طبعا وصلت (الحين) للسودان و(ابغى) (سيارة)
(ايش الالوان) العندكم ...التقول العربية دي لوماكان عندها لون مابتمشي كلو كلو .....
ويواصل( كم تساوي ) (هدي السيارة الصغيرة) ...(اعطني ثمنها بالريال يارجال) ...ويقوم ابو المفهومية الوهم بحسابها سريعا ويصر وشو مع رفع الحواجب ويقول ليك (لييييييييش هدي الاسعار غالية) ...(وين هي فتحة السقف) ...التقول هناك كان قاعد يصطاد غزلان مع (الامير ) .....
والله انا (الحين) بكتب ومامغتأأأأأأأظ خالص ....

اللهم سهل العودة لكل (الطيور المهاجرة) برؤس خالية من الوهم وبلسان سوداني معدول
اللهم امين ...

تحياتي

..

Post: #75
Title: Re: حامد (الوهم)!! نموذج للسودانيين في السعودية!!
Author: محمد أبوالعزائم أبوالريش
Date: 12-06-2006, 07:26 AM
Parent: #1

Quote: بالمناسبة ختيت ليك وهمة شديدة كنت عملتها لي مديرنا ان شاء الله تكون حصلتها

لتعميم المعلومة لغير المواهيم: حصلتها = لقيتها

شايف البوست بقى كله (شناكل) (وصنافر) .... وين سيد البيت؟

Post: #76
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 12-06-2006, 07:57 AM
Parent: #1

Quote: ...(وين هي فتحة السقف) ...التقول هناك كان قاعد يصطاد غزلان مع (الامير ) .....

Post: #77
Title: Re: حامد (الوهم)!! نموذج للسودانيين في السعودية!!
Author: الشيخ إبراهيم الشيخ
Date: 12-06-2006, 08:18 AM
Parent: #76

يا أخونا عووووك معاذ الوهم ده

حصلوه ما يكون إتورط مع الوهم

المهددنو ديلك

الزول ده فره بصحو وخلى البوست خلا

تخاف.... ده كلو من شلاقتك الكثيرة ده

ولا المدير قاعد ليك في راسك ياوهم

تحياتي

Post: #78
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-06-2006, 10:31 AM
Parent: #77

Quote: يا أخونا عووووك معاذ الوهم ده

حصلوه ما يكون إتورط مع الوهم

المهددنو ديلك

الزول ده فره بصحو وخلى البوست خلا

الشيخ إبراهيم الشيخ
وكل الوهم المروا من هنا وايضا كل الراستات
اتضح ان رسالة التهديد التي وصلتني كانت مرسلة من ((((حامد الوهم))) شخصيا!!
اما الفره من البوست والله الكفيل الوهم دا متلحني حتى خارج الدوام.
.
سلام

Post: #79
Title: Re: حامد (الوهم)!! نموذج للسودانيين في السعودية!!
Author: نصرالدين بابكر بدرى
Date: 12-06-2006, 10:57 AM
Parent: #1

الأخ معاذ سلام

ياخي بالمناسية دي أنا عندي سؤال محيرني شديد إمكن لأني وهم

ناس السعودية ديل لمن يكون في برنامج بث مباشر كيف بكونوا محظوظين في الخطوط عشان إتصلوا بمقدم البرنامج

وأنا أسوط الليل كلو في التلفون لي حد ماينتهي البرنامج الوهم ولا أنوم أنا الوهم ولا التكتح ما بلقا خط عشان أقول لي كلمة أنفش بيها أو أقشر بيها

تحياتي
أخوك

ودالبدري

Post: #86
Title: Re: حامد (الوهم)!! نموذج للسودانيين في السعودية!!
Author: معاذ حسن
Date: 12-08-2006, 07:17 AM
Parent: #79

Quote: ناس السعودية ديل لمن يكون في برنامج بث مباشر كيف بكونوا محظوظين في الخطوط عشان إتصلوا بمقدم البرنامج

وأنا أسوط الليل كلو في التلفون لي حد ماينتهي البرنامج الوهم ولا أنوم أنا الوهم ولا التكتح ما بلقا خط عشان أقول لي كلمة أنفش بيها أو أقشر بيها

يا اخوانا الحقوا ود البدري..
يا زول الوداك تتصل شنوعلى البرامج الوهم دي..
دي معمولة لناس السعودية وبس.
تسلم يا بدري.

Post: #87
Title: Re: حامد (الوهم)!! نموذج للسودانيين في السعودية!!
Author: Siddig A. Omer
Date: 12-08-2006, 01:05 PM
Parent: #86

هاهاهاهاهاه...........و الله يامعاذ الوهم

صدقته و الله..............جاييك ....

ايش فيك....أيش لوك!!!!!

صديق- الدوحة

Post: #80
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 12-06-2006, 01:33 PM
Parent: #1

Quote: لتعميم المعلومة لغير المواهيم: حصلتها = لقيتها

لا يا ابو العزائم ياخ !!!
ما للدرجة ده كمان اخوك وهمان ..
حصلتها هنا يعني لحقتها
يعني اسة لو جاكم حرامي وانت عايز تسكوا مش بيقولوا ليك حصّل الحرامي ده ؟؟
ما اظن هنا حصّل معناها ألقى لينا الحرامي مش؟
والله عقدتونا وخليتونا نحلف عشان نزوغ من الوهم

Post: #81
Title: Re: حامد (الوهم)!! نموذج للسودانيين في السعودية!!
Author: عبد المنعم سيد احمد
Date: 12-06-2006, 06:48 PM
Parent: #80

الاخ معاذ
انتو حالة الوهم دى بتصيبكم
لحظة وصولكم البر الشرقى
لك هذاالموقف الطريف
وقد حدث بالفعل
زمان ..ولا ادرى ان كان ذلك يتم حتى الان
او..لا . اول مايصل الحجاج السعودية
تلاقيهم ليك اذاعة خادم الله(امدرمان)
ونحن فى جده ومتوجهين على المدينة
ونحن فى منى ومتوجهين على عرفات
حاجة ادوها المايك وسالوها انتى وين
طمنى اهلك ودايره تقولى شنو
انا فلانة
سلموا لى على اولادى فلان وفلانة
وانا بخير
فى منى ومتوجهى على المدينة
وقولولن..القروش الدسيتوها لى
فى بطن اللحاف
ناس الجمرك ماشافوها
الطريف ياعزيزى
انو ناس الجمرك الوهم ديل
يكونوا بسمعوا فى الكلام ده
وبجيك صاد ياوهم انت

Post: #82
Title: Re: حامد (الوهم)!! نموذج للسودانيين في السعودية!!
Author: عوض حمزة
Date: 12-06-2006, 09:31 PM
Parent: #1

الحبوب معاذ

بينما كنت منهمك جدا فى قراءة هذا البوست اتصل بى احد المعارف ولا اقول ( صديق) حضر الى الدوحه فى زيارة ( لمين ما عارف) ..

اراد ان يقابلنى لامر ما.. طلبت منه ان يحدد موقعه حتى اصله هناك ... بدأ بالوصف ..

بتعرف ( دوار الجيدة؟؟ ) .. قلت ليه شنو دوار الجيدة؟ ... قال لى (ايش فيك!!) مابتعرف دوار الجيدة ؟؟..

( ايش دعوة ) .. (صوب صيدلية السلام ) .... شوف الوهم الاصلى

بصراحه قلت لية كلام لو شرحته هنا البوست ده ببيت فى الخور .. وقلت ليه شتت يا وهم انا لا جايك ولا عايز اشوفك اصلا ( وهم) ما مع

السلامة زاتو.... الزول ده ما كمل اربعه شهور هنا .. والنوع ده طبعا بعد شهر ممكن يلبس عقال .... احييييييييى انا وبس .

عوض حمزة

Post: #83
Title: Re: حامد (الوهم)!! نموذج للسودانيين في السعودية!!
Author: احمد التجانى احمد
Date: 12-07-2006, 03:20 AM
Parent: #82

الاخ معاذ

اولا انت من اوهام وين فى السعودية وكمان من موهومين وين فى السودان
لان القصة دى مهمة جدا فى تتبع التوهم وقول لى كيف اقول ليك فى ناس بعض
المناطق فى السودان قابلين ومهيائين للتوهم اكتر من غيرهم وكمثال الواحد
اول مايجى يخش طوالى فى الجلابية السعودية (الثوب) والكلام كله يبقى هادول
هاذولة ولا الواحد فيهم لو عنده مناسبة اكيد الاكل بيكون رز ولحم
وتعال شوف اسماء الاولاد والبنات البيتولدوا هنا صهيب وعكرمة وكمان مؤخرا
جابت ليها فهد وسلطان ونورا والعنود واعتقد انك عرفت الناس ديل من مواهيم
وين فى السودان

Post: #84
Title: Re: حامد (الوهم)!! نموذج للسودانيين في السعودية!!
Author: nour tawir
Date: 12-07-2006, 01:31 PM
Parent: #83

الابن المحترم معاذ حسن..

رغم أن المادة جيدة جدا..

ومؤلمة للغاية.

لانها تعبر عن وآقع معاش..

ولاننا نحن السودانيين ليست لدينا هوية(concrete)

حتى نتمسك بها مثل بقية الشعوب..

ونرتاح من تغيير الشوارب فى كل بلد..

الا أن هذا البوست ذكرنى بقصة طريفة جدا لاحد السودانيين فى الكويت.

قبل حرب الخليج..

..

كان السودانى قد حصل على وظيفة(راعى ماعز)..

وبما انه سودانى وقلبه حار..

فقد كان كثير المناكفة مع الكفيل.

حتى قرر أن يعطى الكفيل درسا لا ينساه..

..

كانت من مهام السودانى(راى الماعز)..

أن يحمل ألواح الثلج الى مزرعة الماعز..

حتى يتم تبريد الماء الذى يشربه الماعز..

..

وفى يوم شديد الحرارة.

وبعد أن اكتملت حمولة اللورى بالثلج..

وقف السودانى فى احد الشوارع الجانبية.

حتى ذاب الثلج تماما..

فعاد ادراجه للكفيل..

الذى فصله من الخدمة..

والغى كفالتهّ!

السودانى كان خريجا جامعيا!

Post: #85
Title: Re: حامد (الوهم)!! نموذج للسودانيين في السعودية!!
Author: البحيراوي
Date: 12-07-2006, 01:50 PM
Parent: #1

الوهم بالإحتكاك جمال الصادق تحياتي الوهمية تبدل ليك السيارة بالعربية والخبزة بالرغيف والطحنية وإش تبقي إنت من ناس السعودية هادول شبعوا كبسة وما فضلت لينا والله إلا القطرة والعقال وتعال شوف ليك جنس تبدل لغة ولهجات وعادات .

يا زول حرم أنا خلاص عايز أقدم إجازة مفتوحة من الوهم دا ونرجع للشوارع والأزقة السودانية وبالذات شارع الدكاترة أم درمان وموقف الحتانة وأبو روف ومنقوية وتمبوشة وسوق الناقة بعد الضهرية ولا قالوا عملوه قندهار ما عارف .

بس قبل دا خليني أعلق علي مداخلتك الجميلة حسب متابعتي وكيف نحافظ علي ما تبقي من مرارة قبل الإجتياح النهائي . حيث تضيع ملامح الهوية والثقافة السودانية عند بعض الناس بالذات عند العودة للسودان ناهيك من ضياع الكثير في بلاد الغربة . وتحديداً عندما نتغمص الشخصية السعودية أو الخليجية في تعاملنا مع بعضنا البعض ونأتي بأسوأ شئ عندهم ظانين بأن ذلك من علامات التطور والتقدم التي كسبناها من هؤلاء . مع الإحتفاظ بحقهم علينا في جوانب أخري لكن ذوبان هويتنا وشخصيتنا وملامحنا السودانية حتي في تعاملنا العادي كسودانيين هو ما يجعلنا وهم بدرجة ممتاز .

بحيراوي

Post: #88
Title: Re: حامد (الوهم)!! نموذج للسودانيين في السعودية!!
Author: عماد شمت
Date: 12-08-2006, 10:50 PM
Parent: #85

تعرف يا معاذ وSop اروبا فيها مش وهم وبس احفادمسيلمه والاسود العنسي ...

صرة مسيلمه مدفونه في اروبا !!!!!

في واحدوهم وكذاب يوم في حفلة DJ يعني استريو وشغال هاك يابوب مارلي وسلنديون

وهلمجر ...صاحبنا ده بيفتح خشمو ويقفلو كأنه بيغني مع المغني وهو ما حافظ ولا كلمه ولا

حتي فاهم الكلام شنو...ويتلفت يمين وشمال ويدنقر لي تحت عشان ما في زول يقدر يتابع حركات

الخشم ...اه صاحبنا ده لمن تشوفوه وهو بيرقص ويغني..ذي الجمل الخاشي البنطون ,,

في واحدفيكم شاف جمل خاشي بنطون؟؟؟؟

Post: #94
Title: Re: حامد (الوهم)!! نموذج للسودانيين في السعودية!!
Author: gamal elsadig
Date: 12-09-2006, 06:22 AM
Parent: #85

.
البحيرواي ....

Quote: الوهم بالإحتكاك جمال الصادق تحياتي الوهمية تبدل ليك السيارة بالعربية والخبزة بالرغيف

(مساك الله بالخير ) في كل الاوقات .. انا (ابغى) من ناس السعودية ..الماحفظة على اللسان السوداني الاصيل ....
نحن السودانيين نعشق تقليد الشعوب الاخرى في كل شي ....وطبعا هسع بلدنا اتملت اجانب من كل بقاع الارض وخاصة دول شرق اسيا ...بعض السودانين (من عندنا) العاملين في بعض الشركات الاحنبية بقوا صينيين (بالاحتكاك) زي ماقلت يابحيراوي ...تلقي الواحد يتكلم معاك (ويغمض في عيونو) ويضيق فيهن عشان يبقن صغار ..ويدخل اصابعينو مفرقات في شعروا القرقدي عشان يرجعوا لوراء..وتلاقهو ماشي ومدنقر لتحت عشان يبقى قصير ..وهنالك محاولات فاشلة لبعضم لاكل الارز بالعصايات الصغيرة بتاعت الصينين ..وبالمناسبة لاتوجد (كلاب ضالة) في الشوارع الان ؟؟؟ ..الجماعة ديلك اسمهم (الوهم) هسع نوع ديل يسموهم شنو ؟؟؟
Quote: عندما نتغمص الشخصية السعودية أو الخليجية في تعاملنا مع بعضنا البعض ونأتي بأسوأ شئ عندهم ظانين بأن ذلك من علامات التطور والتقدم التي كسبناها من هؤلاء . مع الإحتفاظ بحقهم علينا في جوانب أخري لكن ذوبان هويتنا وشخصيتنا وملامحنا السودانية حتي في تعاملنا العادي كسودانيين هو ما يجعلنا وهم بدرجة ممتاز .

هل سنذوب ونتلاشى كمالهنود الحمر ؟؟ ام ماذا ياترى ؟؟؟؟

تحياتي

..

Post: #89
Title: Re: حامد (الوهم)!! نموذج للسودانيين في السعودية!!
Author: ابوعبيدة حسن محمد
Date: 12-09-2006, 03:30 AM
Parent: #1

الاخ الفاضل / معاذ حسن
اسعد الله اوقاتك بكل خير ،،
نعم هناك الكثير من الناس ال(( الوهم)) كما تسميهم في هذا البوست ، ولكن دعنا نفترض ان هناك شخص ظل في هذه البلاد لفترة طويلة، خمس او ست سنوات متواصلة وعاد الى السودان في إجازة ، فقطعاً خلال ثلاث ساعات فقط انتقل من مجتمع الى آخر مختلف تماماٍ ، فاكيد سوف يستخدم الكثير من الاسماء والمصطلحات التى كان يستخدمها فقط قبل سويعات ، حتى ينتبه ويحاول يعدل(( لسانو))!! ، اذا ليس كل من يستخدم هذه الكلمات ((خبز)) و ((سيارة)) و((دوام)) وغيرها هو ((وهم))!!! 00
امااذا تمادى وتعمد في استخدامها لفترات طويلة خلال إجازته ، فهنافقط يمكن بكل ارتياح يمكن ان نسميه ((زول وهم))!!!
والله المستعان 0

Post: #90
Title: Re: حامد (الوهم)!! نموذج للسودانيين في السعودية!!
Author: محمد أبوالعزائم أبوالريش
Date: 12-09-2006, 04:57 AM
Parent: #1

الأخ ابوعبيدة حسن محمد

ما المانع أن يستمر هذا الوهم في استعمال لسانه الأصلي حتى وهو في بلاد الغربة؟ هل صحيح أن هؤلاء العرب لا يفهمون لهجتنا؟ أؤكد لك أن هذا غير صحيح. بدليل أن ابنتي ذات التسع سنوات والمولودة في الخليج لا تعرف حتى الآن أن تقول (سيارة).

نحن هنا نتعامل مع خليجيين وشوام ومصريين ويمنيين وغيرهم. باستمرار نحن من نتنازل عن لهجتنا بدعوى أنهم لا يفهموننا، ولكن صدقني، وبالتجربة صاروا يفهمون كا ما نقول. وإن كان لا بد من التعامل بهذه اللهجة، فلم لا يقتصر ذلك على العمل، ونتكلم لهجتنا ونحن في بيوتنا ومع أصدقائنا؟

Post: #91
Title: Re: حامد (الوهم)!! نموذج للسودانيين في السعودية!!
Author: إدريس البدري
Date: 12-09-2006, 05:10 AM
Parent: #90

معاذ يا وهم

يوم الربوع كنت طالع بالسيارة لين وصلت السرعة 140

ههههههههههههههههه

تحياتي
واحد وهم برظو

Post: #92
Title: Re: حامد (الوهم)!! نموذج للسودانيين في السعودية!!
Author: البحيراوي
Date: 12-09-2006, 05:55 AM
Parent: #1

العزيز إدريس البدري تحياتي

خلي بالك بتقوم تتوهم الحين عشان يوم الربوع كان آخر دوام عندنا ؟

والله يا إدريس غلبتنا الحكاية بس ما عارفين كيف نقنع نفسنا بأننا غير موهميين

بحيراوي

Post: #93
Title: Re: حامد (الوهم)!! نموذج للسودانيين في السعودية!!
Author: ابوعبيدة حسن محمد
Date: 12-09-2006, 06:20 AM
Parent: #1

الاخ /محمد ابوالعزائم ابوالريش

ليس هناك مانع ان نتبادل الحديث مع الخليجيين بلهجتنا((السودانية)) ولكن يبدو في الفترة الاخيرة ان ((لهجتناالسودانية)) اصبحت مثار سخرية وتهكم من الكثيرين ( على الاقل هنافي الامارات)) ، يمكنك ملاحظة ذلك اذا كنت في -الامارات -واقتضى الامر ان تقوم بإي إجراء روتيني في اي دائرة حكومية، فكلمة ((داير)) وهي مرادف في لهجتنا لكلمة(عايز) قد تضعك في موقف لا تحسد عليه ابدا، ولتفادي مثل هذه المواقف البايخة والاساساً ما عندها طعم ، تفضل تستعمل كلمات متداولة ومعروفة بينهم 00
الامر الثاني اخي الكريم ،الاعلام السوداني ظل ضعيفاً دوماً ، ففشل تماماً في نشر والترويج للهجتنا السودانية عن طريق الاغاني والمسلسلات واللقاءات وغيرها00 وانا في اعتقادي انه-الاعلام- لم يحاول القيام بهذه المهمة اصلاً حتى يفشل او ينجح فيها!!!
وتحياتي

Post: #96
Title: Re: حامد (الوهم)!! نموذج للسودانيين في السعودية!!
Author: مهيرة
Date: 12-09-2006, 02:35 PM
Parent: #93

الابن معاذ الظريف

مرة واحد دكتور /أستاذ سودانى زاير لاحدى كليات الطب فى السعودية واثناء تدريسه لبعض الطالبات

فى المستشفى، سال المريضة( موضوع الدرس)اثناء الكشف عليها:

افتحى خشمك

المريضة تعاين ليه متعجبة

افتحى خشمك ياحاجة

والمريضة تزداد دهشة

والطالبات السعوديات فى حيرة

غايتو انا لكزت الدكتور السودانى الجاى طازة من البلد: يادكتور الخشم عندهم معناه (النخرة)

وهم بسموه( تم)، حتى السؤال استعدل:

افتحى تمك ياحاجة!

أها ياخوانا فى الحالة دى ما اخير لينا نناضمم بكلامهم؟!!!

الا الوهم الجد جد المغتربين البتكلموا سعودى ولا غيره من اللهجات حتى فى الاجازة او مع اصحابهم

السودانيين!!

تحياتى

Post: #95
Title: Re: حامد (الوهم)!! نموذج للسودانيين في السعودية!!
Author: محمد أبوالعزائم أبوالريش
Date: 12-09-2006, 06:58 AM
Parent: #1

كلامك صحيح أخي أبوعبيدة. ولكن تستطيع التحايل على بعض الكلمات إن كنت تشعر بحرج منها (رغم أني لا أقر هذا الحرج)، فكما قلت أننا نستعمل كلمة (داير) وأيضاً نستعمل (عاوز)، والأخيرة مطروقة وقد تعود عليها هؤلاء الخليجيين. وأنا لست ببعيد عنك، فأنا مقيم في دولة قطر، وكل ما يواجهكم يواجهنا، ولكنا لن نعتذر عن جنسيتنا أو لساننا، ولن نخفيه حرجاً منه.

Quote: وانا في اعتقادي انه-الاعلام- لم يحاول القيام بهذه المهمة اصلاً حتى يفشل او ينجح فيها!!!

مرة أخرى كلامك صحيح. ولكن لم لا نقوم نحن المغتربين بهذا الدور؟ نستطيع إن أردنا.

لك مودتي

Post: #97
Title: Re: حامد (الوهم)!! نموذج للسودانيين في السعودية!!
Author: Hamid Ali
Date: 12-09-2006, 03:23 PM
Parent: #95

الاخ معاذ... لفت نظري هذا البوست في شيئين
الأول أنني حامد
والثاني أنني من أولئك الذين عرفتهم بالوهم.
الأحساس الذي حاولت أن تنقله عبر كلماتك شعرت به وتحدثت عنه آبان زيارتي للسعودية معتمرا وأنا طالب بالهند، كان حال المغتربين في النصف الأول من التسعينات تماما مثل الحال التي تخكي عنه الآن.. وعندما حضرت لهذه البلاد تغيرت نظرتي بعض الشي لأنني أكتشقت أن هذه البلاد تحوي الكثيرين من أبناء وطننا المتميزيين الذين أجبرهم الوهم الحقيقي القابع على صدر بلادنا أن يتركوها.
كلامك كثيرا منه يشبه للأسف الشديد الشخصية السودانية الموجودة داخل السودان أو خارجه، في السودان أيضا هنالك من يتحدث عن النظام مؤيدا إذا كان معظم الحاضرين من أهل الحضرة والحظوة، ويتحدث معارضا إذا كان معظمهم من المعارضين للنظام. العوم مع التيار للأسف الشديد أصبح سمة للشخصية السودانية.
أنت رافض للوهم.. ولكنك ربطته بالعالم الثالث وتطلعت للراستا.. حلم الرأسمالية ورامبو الذي لا يهزم والغادة الحسناء الممشوقة داخل بنطال جنز.. صورة جميلة ومبهرة يهني بعضنا بعضا إذا أقتربنا منها. إذا فنظرية الوهم أرتبطت بوضع أقتصادي وإجتماعي وتطلع...
أختلف معك أن السعودية لا تحوي إلا الوهم... تعرفت هنا.. وقد ذكر ذلك بعض الأخوة المتداخلين بشباب متطلع أيضا أستطاع رغم الظروف الصعبة التي يعيشها أن يحقق أنجازات رائعة مشهود بها.. ولو كان الوطن حر ويفتح ذراعية للكل دون محاباة او جهوية لأصبح لهؤلاء الشباب جهد مقدر.
عزيزي معاذ.. أنا على يقين بأنه لو أتيحت لك الفرصة لتكون راستا في بلاد العم سام أو أوربا، فستكتب عن وهم أخر... سيكون مختلف ولكن أكثر ألما ووهما أيضا.
لك ودي
حامد (بس عمري ما أتصلت على التلفزيون).

Post: #98
Title: Re: حامد (الوهم)!! نموذج للسودانيين في السعودية!!
Author: بت قضيم
Date: 12-10-2006, 02:45 AM
Parent: #1

ومرة واحد في كما اتصل
" الو،، السلام عليكم ،، معاك عزيزي المشاهد"
(ما ادري) من وين قرر أنه مشاهد عزيز
مرض

أنا من وجهة نظري (ودير بالك هااااا،، أنا بلبس نضارة قعر كباية) ، أنه لازم نهذب لهجتنا شوية ونغير من مخارج حروفنا عشان أحياناً مخارج حروفنا بتطلع من (تمنا) مداخل وليس مخارج، كمان لازم نحاول نخلي الناس تفهمنا مش كأننا بنرطن هندي، مش لدرجة (شوخبارك و هلا والله ، والله بخير) لأن (ازي الحال ، تمام الحمد لله ، كيف الأحوال) أظبط وأحلى وعربية أكتر، وخير الأمور أوسطها

بعدين (الرسول يا ديل) شفتوا السودانية لما تلبس توب مع (الغطوة)
(وووش هادا، بري يا يمة أريتو حال السواد)

Post: #99
Title: Re: حامد (الوهم)!! نموذج للسودانيين في السعودية!!
Author: البحيراوي
Date: 12-10-2006, 02:54 AM
Parent: #1

الأخ جمال الصادق تحياتي

بهذه الطريقة يمكن أن أقول بأن حمي الوهم قد تسللت للسودان ويمكن القول بأننا مهيئين للوهم منذ النشأة الأولي . والله ناسك ديل لو شافوا الصينين وكيف يتهافتون علينا لنعمل معهم لجعلناهم موهومين من الدرجة الأولي حتي أن الصينين يخاطب صاحبة يا زول

تحياتي

بحيراوي

Post: #111
Title: Re: حامد (الوهم)!! نموذج للسودانيين في السعودية!!
Author: malik_aljack
Date: 12-22-2006, 05:53 AM
Parent: #99

حسب ما فهمت

السودانيين (و أنا أتكلم بالتخصيص لا التعميم)

في أوروبا و العلم المتقدم يعيشون الواقع
في الإمارات خصوصا يعيشون الأحلام (لا أقول يحلمون بل يعيشون)
في السعودية لا يدرون أين يعيشون و يصعب التحدث معهم على أرضية مشتركه من الواقع أو الأحلام

Post: #113
Title: Re: حامد (الوهم)!! نموذج للسودانيين في السعودية!!
Author: celecon
Date: 03-20-2007, 07:49 AM
Parent: #1

معاذ وكل المتداخلين ...
تحياتى يا (وهم) على قولة معاز ...

أولا بعتذر انى جبت البوست ده من آخر صفحة بس عجبنى شديد
وقضيت فيه وقت كتير على حساب الشغل ..

عجبنى البوسـ(ط) لحد الاكتفاء من المنبر لاسبوع قادم ....

تعرف الوهم الجد جد اليومين ديل الشريط المار أسفل الشاشة
بقناة النيل الازرق ... مبالغة عديل كده ...

من كم يوم واحد برسل تهنئة لعروسين من حلتهم وهو فى السعودية
بعدالتهنئة قال العروسين الان فى شهر العسل فى القاهرة عاصمة
مصر .........

Post: #114
Title: Re: حامد (الوهم)!! نموذج للسودانيين في السعودية!!
Author: محمَّد زين الشفيع أحمد
Date: 03-28-2007, 04:33 AM
Parent: #1

عجبني الموضوع /
صادق يا أخ معاذ
في كل كلمة تقولها
وأنا (الوهم) لي
سبع سنوات قاعد
في البلد دي .. يعني
بقيت وهم للأس سبعة
وصراحة لمن الواحد
كان في السودان
كان فاهم في كل حاجة
.. ولكن هنا الواحد
انجرف وراء تجديد الإقامة
وتسديد المخالفات المرورية ..
ومشاكل كفلاء .. وإنت عارف
وتعاملنا بقى شين جداً جداً ..
وو الله الواحد تقريباً قرَّب يفقد ملامحو
كسوداني مش في اللهجة لكين في التعامل
.. وبعض السودانيين هنا يحُكَّك بي كتفو
وما يقول ليك سلام عليكم ..
ووالله أنا قاعد لي سبع سنوات واجتمعت بي شباب
كتيرين جداً .. تلقى كلَّ كلامهم الهظار البائخ
داك .. والرأس خواء وما فيهو أي جملة مفيدة
تتطلع بيها منو .. ونادر جداً .. اللهم إلا الواحد
أحياناً بلقى ليهو ناس فلتات .. دفعة في الجامعة أو
الكلية وكده .. ونظل نندب حظنا ونسرد حكايات الماضي
التليد لأنَّ الحاضر زي ما إنت عارف .. وهم في وهم ...
وحتى الثقافة الكانت باقية في راس الواحد بدأت تتلاشى
ويصيبها الكفاف .. وربك يستر ..
وكان شفت في واحدين مغتربين لمن يجو في حلتنا
تلقى كل كلامهم .. وينك في يا رجَّال .. ويش تبي
حيا الله الربع .. وكلها على شاكلة هذا المضمار
البليد .. والحمد لله أنا لم أتأثر باللهجة بتاتاً
بل لهجة أهلي عرب الشرق ورثتها لبعض الأخوة هنا ..

لك احترامي وتجلاتي
وآسف جداً إن كنتُ
قد طرقتُ بابَ مفرداتك
دونَ إذنٍ مسبقٍ من ضياءِ
الحقيقةِ لديك ..

أخوك - بلا استئذان - والوهم /
محمَّدزين ...

Post: #116
Title: Re: حامد (الوهم)!! نموذج للسودانيين في السعودية!!
Author: حليمة محمد عبد الرحمن
Date: 03-28-2007, 08:08 AM
Parent: #114

Quote: ..في حدائق أيام الأسبوع فيها موزعة يعني مثلا يوم السبت للعزابة فقط...ويوم الاثنين للأسر فقط....ويوم الخميس للنساء فقط...والله نظام كويس ونحن ذاتو اتعودنا..وإلا شنو!!؟؟

معاذ سيد الوهم.. يا بوي ما تقول دي حديقة الحيوانات بالملز وبس .. ولا في حديقة تاني انا ما عارفة.. على العموم لو في واحدة تانية لايمنى عليها.. عشان انا زهجت من فسيح الشفع براااااي.. او مع ابوهم في ملاهي الحكير اللي جنب بن دايل قبل ما يلغوها.. كنت انا بكون مصنقرة في الشارع ،وهن يلعبوا بجوه ويهيصوا.. والعجيبة يناولوني البطاطس والبيبي بخرم الشبك.. وانا ساعتها بس بتكيف عشان احساس "حرمة" بتلغي في داخلي، ولو مؤقتا..!!
المواهيم كتار يا معاذ يا خوي..
اهلنا قالوا.. الجن بتداوى.. بس كعبة الاندراوة (اي الوهم)
راجعالك مرة تانية..
اصلو وهمك دا رمي مكاكيهو فوقي..
لم اصل لمرحلة الوهم بعد.. وان كنت قد قطعت شوط كبيرا..!!!
ما زال لساني سوداني.. رغم معاناة الجماعة معي في فهمي..ايش؟.. ليش مابتحكي متل (فلان)..
ذلك التساؤل الذي يجعلني في حالة من الانبساط..
راجعة لتجريمات وهمية قادمة..
تحياتي

Post: #115
Title: Re: حامد (الوهم)!! نموذج للسودانيين في السعودية!!
Author: abas
Date: 03-28-2007, 07:51 AM
Parent: #1

الحبيب معاز

والشباب الظرفاء

تغير الكلام هنا في الامارات عامل لينا مشكله

بتلاقي شباب زي الورد سوداني ولابس جلابيات الاماراتيين بقول هو شغال مع شيخ ولازم يلبس كده ولا التاني تلاقيه مصاحب الاماراتيين وعامل انو زيهم

واحد سوداني قال لي وهو مشجع فريق العين يعني الناس البتكون واقفه وتعزف الالات الموسيقية قال لي بنات مواطنات قلوا ليه انت من ياتو قبيله هنا قال ليهم انا شامسي
وفرحان بي كلاموا قلت الله يخيبك فرحان كمان

انا شخصيا معاي اردني ومصري بقو ما بتكلموا الا سوداني نسوانهم قالو لي قلبت لينا الرجال ديل سودانيين عديل كده ديل نسوانهم اتقلبوا رايكم شنو في مدرس اللغه السودانيه ده

Post: #117
Title: Re: حامد (الوهم)!! نموذج للسودانيين في السعودية!!
Author: سيف الدين حسن العوض
Date: 03-28-2007, 09:16 AM
Parent: #115

كبير المتوهمين/ معاذ
والله احييك على هذا البوست الجميل
ونحن وحاتك في غربة الا مافى وهم
علشان نقدر نزيل بيهو الهم
وانتو ولله الحمد عندكم قناة النيل الازرق
والتلفزيون القومى
كان الله في عونكم
بيقولوا اهلنا زمان
ليبيا واليمن ضياع زمن
والسعودية راحة نفسية
انت خليتها كلها وهم
اما قطر فقروش مطر
احى عبرك ناذر
انت يااخوى ناذر ده غلطان
في اسمو وله اصلو كده

Post: #118
Title: Re: حامد (الوهم)!! نموذج للسودانيين في السعودية!!
Author: ناذر محمد الخليفة
Date: 03-28-2007, 05:58 PM
Parent: #1

سيف ...

Quote: احى عبرك ناذر
انت يااخوى ناذر ده غلطان
في اسمو وله اصلو كده

أصلو كدة .... خلاقة !!!

Post: #119
Title: Re: حامد (الوهم)!! نموذج للسودانيين في السعودية!!
Author: عمر الفاروق
Date: 03-28-2007, 06:25 PM
Parent: #1

هاكم الوهمة دي يا حليمة في حديقة الحيوانات الملز ..

طبعاً في يوم النسوان ما بيدخلوا معاهم الرجال وبس بيدخلوا الاولاد الصغار ..
يلا أنقروا بيحددو إنو الولد ده صغيير ولا كبير كيف؟؟
خاتّين ليهم خشبة عالية شوية كده ويجي الشافع ماري بي تحتها لو الراس دق في الخشبة دي يشتت بيتم طوالي ولو مرّ من تحتها بدون ما يهبشها فمرحباً به في عالم الجكس والنساوين والبنات داخل الحديقة ..
عندنا قريبتنا متزوجا ليها راجل طويييل وولدا الصغيير (7 سنوات) طالع لي أبوهو ..
الولد جا مع أمو وأخوانو الصغار يا زولة تووفك راسو دقّ في الخشبة ناس الاستقبال قالوا ليهو ارجع ورا ما حا تخش
يا زولة أمو دي إنفصمت ليك في الجماعة ديل انفصام !!!!!
أها يعني نسوي شنو الولد ده ابوهو طويل يعني نقص ليهو كرعينو ؟

الوهمة التانية عندنا شافع قريبنا مشى مع أمو وأخواتو الحديقة والولد صغمبروتي شديد أها قبل ما يدخلوا الحديقة البواب سألو :
انت في سنة كم يا فالح ؟
اها الشافع بي عوارة السودانيين ديك ونظام الود كبير قال ليهو :
في سنة خامسة ماشي سادسة ..
زولك قال ليهو يلا يا بابا ارجع ورا ما حا تخش وبس يدخلو البنات ديل الدخول بس لي ناس سنة رابعة الماشين خامسة

Post: #120
Title: Re: حامد (الوهم)!! نموذج للسودانيين في السعودية!!
Author: celecon
Date: 03-28-2007, 08:45 PM
Parent: #1

Quote: أصلو كدة .... خلاقة !!!

زى حصانك يا ناذر قوم لينا نفسنا وكتحنا بكرعين اتنين بس ...

Post: #121
Title: Re: حامد (الوهم)!! نموذج للسودانيين في السعودية!!
Author: محمَّد زين الشفيع أحمد
Date: 03-29-2007, 08:44 AM
Parent: #120

إت يا خوي ناذر
حصانك دا كرعينو ديل
القداميَّات وللا الورانيَّات

أها هاك الوهمة دي شوفا
كيف ..
وجاوبنا .. تكفا زي ما بقولو
الجماعة الوهمانين ..

Post: #122
Title: Re: حامد (الوهم)!! نموذج للسودانيين في السعودية!!
Author: EMU إيمو
Date: 03-29-2007, 09:46 AM
Parent: #121

وانا في قائمة الوهم

الحمد لله لم تصل درجة ربش

في مطعم الشباب اللي جوار وكالة القحطاني للشحن
لفت نظر شيخ عجوز كل ما أذهب للمطعم أجده هناك
قيل أنه منذ مطلع السبعينيات في هذا الحي الشعبي

نادراً ما أشاهد برنامج مراسي الشوق أو عزيزي المشاهد
وعندما أسمع متصل من المدينة أو بيشة ، على طول أغيّر إلى الجزيرة الوثائقية

وبكل صدق إستمتع بمداخلات المتصلين من الرياض على برنامج صحتك