تاني جيتي تسلمي ...

تاني جيتـي تسـلّمي
و تقولي عامل كيف بـلاي؟
ايه فكّرك زمن الهوى
بعد النّوى الأتعب قــواي
أصلي راجيـك من زمن
عدّى و خلاص ما اظنو جــاي

هل صحيح انك هويتي
و ما بقيت تومك بــراي؟
ولا بقيت ليكِ الونيس
ما بقيتي لي توبي و غطــاي؟
لا حنان يبري الجراح
و لا السنين ترحم أســاي
لا رزاز يروي الحنايا
و لا دعاش روحك حــداي
لا شموس طلة صباحك
ضاوية لآخر مــداي

لسه القلوب مليانة شوق
بالهجر ما اتبدل هــواي
بس كيف أصارحك بعد ما
تاهت دروب ريـدك معــاي
و اتبدّد الأمل اللي كان
نور دنيتي .. زادي و دواي

و مهما كنتي هناك بعيد
أنا في انتظارك يا رجــاي
لسه صابر.. برضي ساير
في طريـق ضيّع خطـــاي
ليك عاود التحنان مطر
رشـرش أمل,, خضّر ربـــاي
غمر الصحاري القاحلة ريد
اشرق نجم سعدي و منـــاي

هـل ممكن الأحــلام تعود
يتوارى همي و طول أســـاي؟
تصبح حقيقة.. نعيش فصولا
بالفرح تـمطر سمــاي؟
تتهــادى أزهاري و تفوح
و املّي بشوفتـــك رؤاي؟
و ترفــرف الأطيــار تغرّد
تسمع الأنجم غنـــاي؟

المبدع دوماً حسام الدين , شعرك جميل جداً وبما إنها اولي محاولاتك فاني اعطيك 100% ولكن لا تستسلم بل

واصل إبداعك الجميل وحتماً ستكون اول الواصلين .

Quote: هـل ممكن الأحــلام تعود يتوارى همي و طول أســـاي؟ تصبح حقيقة.. نعيش فصولا بالفرح تـمطر سمــاي؟ تتهــادى أزهاري و تفوح و املّي بشوفتـــك رؤاي؟ و ترفــرف الأطيــار تغرّد تسمع الأنجم غنـــاي؟

جيتك تاني اسالم فيك احساسك براك

العزيز أبو أحمد :


شكراً لأنك أول الواصلين ..



لكن 100% ؟؟

احنا دايرين باص بس (50%) ..



أشكرك على التشجيع ..

Quote: هـل ممكن الأحــلام تعود يتوارى همي و طول أســـاي؟

ياريت

Quote: ياريت

إنت برضـو ؟؟






تسلم يا رفيق ..

يا ســـلام

إنت عارف انا فتحت الكلام
السمــح دا وكنت فاكرك جايب لى غنوه بعنوان

"تانى جيتى تســلمى "

بس فعلاً زى ما قال ليك هاشم

واصل نثرك للشذى
ومتعْ جموع الناظرين

كلامك سمح حيل

مودتى

ياصحافة ..


النص جميل وانيق جدا ..واصل فى هذا الدرب فأنت تملك مداخله

وثابر واجتهد لمزيدا من التجويد ..


مودتى

محمد عبد الرحمن :

أشكر لك هذا التنبؤ الذي يثلج الصدور ..



ألف تحية ..

داش ..

يا مصدر الروعة ..

بزيارتك بيتنا نور ..


و تشكـر على التشجيع..

قلتا ليك الريد حقيقة..
غطَّى المساحات اليباب..
وقلتا ليك قلبي الوهبتو..
عمرو مابهدي العذاب..
لاهو خان زولو البريدو..
ولاهو من تشواقو تاب.

Quote: قلتا ليك الريد حقيقة.. غطَّى المساحات اليباب.. وقلتا ليك قلبي الوهبتو.. عمرو مابهدي العذاب.. لاهو خان زولو البريدو.. ولاهو من تشواقو تاب.

عارفو قلبك كيف رهيف
أصلو ما بيعرف يخون
ده القدر مكتوب علينا
نعيش فصولو ضنا و شجون
لا اعتراض أبداً في أمره
ربي عالم بالشؤون

وعارفو قلبك فيو غرامك
أقوى من كل الظنون
لو مرَّة جافيتنا وبعدتا
قلبي بيعيش السكون
والمحبّة..الفي..عيونك..
حيَّرت فيني العيون
رتَّبت نبض المشاعر
ووزعت فيها الشجون

بس ليه رحلتي مع الزمن
سبتي العذاب لي و الجنون
كنت فاكر انك أقوى
مهما زادت بيك شجون
ما خلاص فارقت طيفك
و انهمر دمعي الهتون
باقية سيرتك في وريدي
حتى لو زارني المنون

اول حاجة تشيل القصيدة دى وعلى اى مطرب وتتلحن لانك شاعر غنائى ماك هين
لانه كل عوامل القصيدة الغنائية متوفرة
الايقاع
وحدة الموضوع
التسلل المنطقى
الكلمات البسيطة العميقة
الاسئلة والاجابات
كل ما يعتبر غنائيا ماثلا فى هذه القصيدة
فقط عليك ان تحملها لملحن
وستكون شاعرا غنايئا لا يستهان به
كل المنى لك بالتوفيق
حاجة اخيرة
احييك انك تخاطب الانثى بخطاب مباشر
لانك لم تستخدم خطاب المذكر فيما المعنى او المشار اليه او المتحدث اليه انثى
وهذه احدة من علامات الانفلات الشعرى لديك نحمد لك انك خرجت بنسقك من دائرة المخاطب الذكورى
وهو امر نجده فى الخطاب الغنائى السودان والعربى

قريبي
صباحك ابيض
اول حاجة الحاجات الجميلة دي كنت داسيها وين .
بعدين اوعك تكون جاينا مشوكش من الهند.

Quote: اول حاجة تشيل القصيدة دى وعلى اى مطرب وتتلحن لانك شاعر غنائى ماك هين لانه كل عوامل القصيدة الغنائية متوفرة الايقاع وحدة الموضوع التسلل المنطقى الكلمات البسيطة العميقة الاسئلة والاجابات كل ما يعتبر غنائيا ماثلا فى هذه القصيدة فقط عليك ان تحملها لملحن وستكون شاعرا غنايئا لا يستهان به كل المنى لك بالتوفيق حاجة اخيرة احييك انك تخاطب الانثى بخطاب مباشر لانك لم تستخدم خطاب المذكر فيما المعنى او المشار اليه او المتحدث اليه انثى وهذه احدة من علامات الانفلات الشعرى لديك نحمد لك انك خرجت بنسقك من دائرة المخاطب الذكورى وهو امر نجده فى الخطاب الغنائى السودان والعربى

طبعادي شهادة مرور الي عالم الشعر المغني من استاذة الجميع الرائعة / سلمي الشيخ سلامة.

التحايا لهنودي

الصحافة صباحك خير

يازول انت جميل الدواخل وفنان يبقى لازم
البيجي من جانبك يكون حلو وتلقائي الانسياب

بعدين الكلام الكتبته الجميلة سلمى الشيخ
ده ما تخليه يمشي ساكت بصراحة عملت تشريح
عالي للمكتوب وفعلاً ينفع غناء وحيكون جميل
بالتأكيد لانه بكل بساطة يمتلك المقومات اللازمة

وبقول ليك واصل سعيك انت قريب جداً

مودتي ياجميل الدواخل

الشيـخ ابراهيم الشيخ ..


يا أخي و الله أخجلت تواضعي بكلامك اللطيف الظريف ..

Quote: بعدين الكلام الكتبته الجميلة سلمى الشيخ ده ما تخليه يمشي ساكت بصراحة عملت تشريح عالي للمكتوب وفعلاً ينفع غناء وحيكون جميل

إن شاء الله سأحاول العمل بتوصيات الأستاذة سلمى و ربنا يسهل الأمور ..

عارف ... كم أفتقد صديقي ابن رفاعة الفنان متوكل الأمين زميلي بالهند ..لطالما (خرمجنا) أشعار و ألحان في تلك البلاد .. لكن الضغوط الأكاديمية كانت كثيراً ما تعيق مساعينا ..
بالمناسبة هو فنان الهند الأول لسنين عديدة ..كما أنه يكتب الشعر أيضاً ..



له و لك أجمل تحية ..

سلمت يا جميل..

أبو أمنية سلام ..

بلا شك شهادة الأستاذة سلمى وسام على صدري ..

تخيل التحليل ده أنا زاتي ما كنت عارفو ؟؟



لقاؤنا مساءاً ان شاء الله في ليلة السمر الصيفية


لك الود ..

ألأستاذة العزيزة سلمى:

هذه شهادة لم أكن أتوقعها صراحة و ما عارف كيف أرد عليها ..

منكم نستمد قوتنا ..



كل الود و التقدير ..

سلا وتحية أخ حسام الدين

والقصيدة جميلة جداً...فلا تتوقف عن الكتابة الشعرية

Quote: هـل ممكن الأحــلام تعود يتوارى همي و طول أســـاي؟ تصبح حقيقة.. نعيش فصولا بالفرح تـمطر سمــاي؟ تتهــادى أزهاري و تفوح و املّي بشوفتـــك رؤاي؟ و ترفــرف الأطيــار تغرّد تسمع الأنجم غنـــاي؟

ممكن شدييييييد


كل الود والتقدير

سيدة الركن الجميل الهادي ..

شهادتك دون شك هي محل تقديري و اهتمامي الشديدين..


لك التحايا العطرات ..

Quote: ممكن شدييييييد

تفتكـري ؟؟

Quote: تفتكـري ؟؟

برضه شدييييييد


مرينا بس وتاني جينا نسلم...

كل الود والتقدير

Quote: مرينا بس وتاني جينا نسلم...

تاااااني ؟

Quote: لسه القلوب مليانة شوق بالهجر ما اتبدل هــواي

دا شوق شنو ياخ اللسه موجود دا

شوق أصيل لكن!!!!


الصحافة القصيدة معبّرة بسيطة سهلة

يا ريت تواصل كتابات زي دي

إنعام عبد الحفيظ :

Quote: دا شوق شنو ياخ اللسه موجود دا

ده شوق الزهر للشمسة
يعانق بيها وهج النور
و شوق الطفل لي لمسة
حنونة وهادية زي عصفور
بلاها حياتي كيف تمسى؟
و كيف تضوي الليالي بدور؟
صبرت و راجي بس همسة
تعطرأمسياتي بخور

Quote: الصحافة القصيدة معبّرة بسيطة سهلة يا ريت تواصل كتابات زي دي

كلامك مشجع جداً ..

خليكي متابعة..

Quote: عارفو قلبك كيف رهيف أصلو ما بيعرف يخون ده القدر مكتوب علينا نعيش فصولو ضنا و شجون لا اعتراض أبداً في أمره ربي عالم بالشؤون

الصحافة 30
تخصص أحياء دقبقة 00 قلنا كويس
بتاع أورغن 00 ماشي 00
كمان شاعر ؟ وبالطريقة دي !!
يا أخي والله أكثر من رائع وكما قالت الأستاذة سلمى الشيخ
هذه القصيدة تذهب بها إلى أقرب ملحن وستتغنى كما يجب أن تغنى
وكمان كانت المجادعات مع تماضر الخنساء رائعة وسلسة ومدهشة
في انتظار المزيد 00 راجينك 00

سلامات أستاذ عادل..

تشكـر على الكلام الحلو ..

و دوماً في انتظار آرائكم و توجيهاتكم ..


تسلم كتير..

حسام الدين دخول اخر من اجل ( جيتي تسلمي .... ) وبصراحة انا جيت اسلم واطمئن عليك والحمد لله زاد

عدد المشاركين وهذه من البشارات وزي ما وصيتك في بداية البوست واصل واغلط والناس بتصلحك وتتعاطف

معاك عارف ليه ؟؟؟ لانك حبيب الكل يا حسام وربي يحفظك ويغطيك فأنت زول سمح في زمن شين وصعب .

هاشم أبو أحمد

ما بعرف أرد على الزي كلامك ده..


أدام الله المحبة في قلوبنا جميعاً..

حسام

سيد الأنغام
حياك الحيا
وسقاك الغمام

Quote: يا ســـلام إنت عارف انا فتحت الكلام السمــح دا وكنت فاكرك جايب لى غنوه بعنوان "تانى جيتى تســلمى "

والله ده بالضبط الكنت حأقوله ليك

زى ما قال صاحبنا داش الدعاش

لقيت الموضوع شعر

لا، وشعر طاعم كمان ومليان موسيقى ومعنى

لما لقيت الموضوع كده يا حسام

وبما أنه ده يعتبر "إنتهاك حلو وجميل لمجالنا الجوى"

طوالى قعدت أتابع وأرصد "الوزن" والإيقاع الداخلى

لأنه ده أهم عنصر فى كتابة الشعر عموما، خاصة الشعر المقفى

ولو ما اتوجد العنصر ده، يبقى الكلام ممكن يكون أى شى غير الشعر

وكانت النتيجة المفرحة

إنك زول شاعر

شاعر جد جد والله

وبالمناسبة يا حسام الدين

نحن اصله ما قاعد نجامل فى الجمال

كل شى إلا الجمال

واصل يا فنان

وما دام الملكة موجودة وقوية كمان

ما باقى ليك غير تزيد حصيلتك من اللغة والمفردات وقراية الشعر كتير
مع إنه شى متعب، لكن أكيد حتنمى ذخيرتك ومحصولك حيكون كتير وجميل زيك

"أهو واحد تانى كمان حيداقرنا فى أرزاقنا"

شكرا يا حلو

أستاذنا أبوذر..


أكيد شهادتك و نصائحك ستكون دافعاً للمزيد (مع التجويد) .. خصوصاً و أنها أتت من شاعر محترف مثلك ..

Quote: ما باقى ليك غير تزيد حصيلتك من اللغة والمفردات وقراية الشعر كتير مع إنه شى متعب، لكن أكيد حتنمى ذخيرتك ومحصولك حيكون كتير وجميل زيك

فعلاً هذا ما أنوي القيام به منذ فترة ..
رغم إني كسول بعض الشئ في هذه الأمور , لكن إشادتك بلا شك ستكون محرضاً على الإجتهاد في هذا المنحى..



آلآف التحايا..

Quote: "أهو واحد تانى كمان حيداقرنا فى أرزاقنا"

Quote: و ترفــرف الأطيــار تغرّد تسمع الأنجم غنـــاي؟

الصحاافة..

فى الصميم
و كلااام جميل
و اصل و نحن فى انتظاارك..

يديك العاافية...

الجميل محمد عثمان
سيد الروعة و الألحان


تشكـر كتير على الإشادة و الإطراء ..

و شهد شاهد من أهل الفن كما قالت الأستاذة سلمى أدناه يا حسام:

Quote: اول حاجة تشيل القصيدة دى وعلى اى مطرب وتتلحن لانك شاعر غنائى ماك هين لانه كل عوامل القصيدة الغنائية متوفرة

تعرف يا حسام زي ما قال ليك داش .. انا زااااتي قايل دي أغنية و جيت داشي توش و كمان الكاشف أختي قايلاها غنية ... و جات داشة تسلم و تفتش لينك الحفظ ... بالمناسبة ما فيها لينك الحفظ الله يقويك يا ولدنا و أسمع كلام سلمى دة و إلى الأمام سر و واصل...

العزيز هيثم عبد العزيز ..

وينك يا راجل مختفي اليومين ديل؟؟


الجماعة قالاو أنها مشروع أغنية ... فخليك متابع لغاية ما نجيب الأغنية مع لنك حفظها


تشكـر ع المرور يا حبيب ..

حزينه لانى لم ادخل هذا البوست الا اليوم .. كنت فاكراها غنية ..

حقيقى ابداع استاذ الصحافه ..نص شعرى مدوزن وموسيقى وجميل جدا والمعانى رائعة..

واصل بداية قوية وطريقك مفروش بالورود بعون الله .. كل الامانى الطيبة لك بالتوفيق ..

مودة وتقدير ..

العزيزة هند:

أولاً آسف جداً لتأخري في الرد


بحضورك اكتملت الصورة و زادت بهاءاً بوصفك (لخطرفاتي) المتواضعة ..

تنبؤك مفرح جداً و دوماً في انتظار آرائكم و ملاحظاتكم ..



شكري الجزيل ..